Suider-Afrika Archives - Page 191 of 888

Valke-hoof geskors oor onwettige deportasies

Anwar Dramat, hoof van die Valke, is geskors oor bewerings dat hy betrokke was by die onwettige deportasie van Zimbabwiërs.

Plaaslike media berig dat ‘n swartman onwettig aan die Zimbabwiese polisie oorhandig is wat daarvan verdink word dat hulle hom vermoor het.

Dramat se kantoor ontken betrokkenheid in enige oortreding.

Dramat is die hoof van Suid-Afrika se elite Valke-eenheid wat georganiseerde misdaad ondersoek.

“Ja. Hy [Mnr Dramat] is geskors hangende verdere ondersoeke na die Zimbabwiese deportasie,” het die polisie ministerie se woordvoerder Musa Zondi aan Sapa gesê.

Dramat het nie kommentaar gelewer sedert sy skorsing nie.

Die DA is onthuts oor die besluit en het die parlement genader om die minister van polisie, Nkosinathi Nhleko se besluit te hersien om Dramat te skors.

Die party beweer die minister het nie die mag om die hoof van die Valke te skors nie.

Die Helen Suzman-stigting het reeds die hooggeregshof in Pretoria genader om Dramat se skorsing ongeldig te verklaar.

Zimbabwiese opposisie-aktiviste word glo herhaaldelik aangerand en gemartel deur die polisie en die weermag.

Twee lede van die Beweging vir Demokratiese Verandering (MDC) in Zimbabwe sê hulle is aangerand is deur lede van die regerende party in Masvingo, suid van Harare.

Suid-Afrika se Sunday Times het berig dat senior amptenare in die Valke en ander polisie-eenhede onwettige deportasies met hul Zimbabwiese eweknieë ooreenkom.

‘n 26-jarige Zimbabwiër, Witness Ndeya, was “oorhandig” deur die Valke en vermoor, glo deur die Zimbabwiese polisie, het die koerant berig.

Die Arbeidshof het intussen aan die hoof van die Valke in Gauteng, Shadrack Sibiya ‘n interdik teen sy skorsing toegestaan.

Sibiya se regsverteenwoordigers het die hof Sondag genader nadat hy verlede week ‘n kennisgewing van sy skorsing ontvang het.

Die skorsing hou na bewering verband met sy vermeende betrokkenheid by die onwettige deportasie van Zimbabwiërs.

Sibiya se regsverteenwoordiger, Victor Nkhwashu sê sy kliënt sal vir werk aanmeld.

Swart verdagte weer voor vir veearts-moord

‘n Swartman gaan na verwagting vir ‘n tweede keer Maandag in die Witrivier-landdroshof in Mpumalanga verskyn in verband met die moord en verkragting van Rensia de Wet (46), veearts.

Die beskuldigde was na bewering een van De Wet se werknemers.

Die 30-jarige swarte is in polisie-aanhouding sedert De Wet se moord in Desember. Hy het op 15 Desember vir die eerste keer in die hof verskyn op aanklagte van moord, verkragting en huisroof, het Sapa berig.

Hy is in KwaMagugu buite Nelspruit in hegtenis geneem nadat die polisie op ŉ wenk reageer het. Die verdagte het glo op die landgoed gewerk waar De Wet gebly het.

De Wet se halfnaakte liggaam is op 9 Desember in ŉ plas bloed in haar huis op die Nottinghill Equestrian Estate gevind. Sy het steekwonde oor haar liggaam gehad.

Die verdagte kan nie geïdentifiseer word totdat hy op die aanklagte teen hom gepleit het nie.

Verbod op Namibiese vleisuitvoer na bek-en-klouseer

Die departement van landbou in die Filippyne het ’n tydelike verbod op die invoer van enige lewendehawe of -produkte uit Namibië geplaas, het die Republikein berig.

Die verbod volg na ‘n kennisgewing deur die Internasionale Organisasie vir Dieregesondheid (OIE) oor die uitbreking van bek-en-klouseer (BKS) in die Zambezistreek.

Proceso Alcala, sekretaris van landbou in die Filippyne, het die tydelike verbod in Desember afgekondig om dié land se dieregesondheidstatus te beskerm en nie voedselsekuriteit in die gedrang te bring nie, lui ’n kennisgewing op die departement se webtuiste.

“Ons kan nie bekostig om kanse te vat nie. Ons is ’n BKS-vrye land en is dus uiters waaksaam om nie enige diere of diereprodukte uit lande waar die siekte teenwoordig is, in die Filippyne toe te laat nie,” sê hy.

Die direktoraat veeartsenydienste (DVS) in Namibië het vroeg in Desember aangekondig dat bek-en-klouseer in die Linyanti-kiesafdeling in die Zambezi uitgebreek het.

’n Verbod op die bewegings van lewendehawe en -produkte in die streek is dadelik ingestel en die slag van vee by die abattoir op Katima Mulilo is opgeskort.

Namibië se kommersiële boerdery-gebiede suid van die veterinêre kordon, of rooilyn soos dit algemeen bekend staan, is vry van bek-en-klouseer.

SA Kommunisteparty wil koerante, webwerwe sensor – weens ‘rassisme’

Die sekretaris-generaal van die Suid-Afrikaanse Kommunisteparty (SAKP) het vandeesweek gedreig dat hy webwerwe en die aanlynweergawes van koerante mag sluit omdat kommentaarblaaie nie “genoegsaam gereguleer word nie”. Nzimande het dié uitlatings gemaak tydens die twintigjarige herdenking van Joe Slovo se sterfdatum by die Avalon-begraafplaas in Soweto.

Volgens Nzimande laat koerante “rassiste” toe om op hul aanlynkommentaarblaaie “beledigings te slinger”. Hy meen dat koerante en webwerwe vanself “rassistiese kommentaar moet sensor”. Hy het gesê:

“In die naam van Joe Slovo moet ons die stryd teen rassisme op alle fronte verhewig. Daar is te veel rassisme en haatspraak op die internet.

Los Twitter en Facebook uit. Waaroor ons begaan is, is al die mediahuise wat oor internetplatforms beskik. Hulle moet verantwoordelikheid aanvaar vir mense wat op hul stories kommentaar lewer.

Die haat, die haatspraak, die rassisme, die seksisme wat daarop voorkom, ‘n mens mag nie koerante hê wat iets op die internet toelaat wat hulle nie in hul gedrukte weergawes kan druk nie. Dis walglik, ons doen ‘n beroep op Sanef en al die mediahuise om verantwoordelikheid te aanvaar vir alles wat daar geskryf word. As jy mense toelaat om op jou artikels op die internet te reageer, moet jy daarvoor verantwoordelikheid aanvaar.”

Nzimande het gesê die Suid-Afrikaanse Menseregtekommissie moet ingryp teen die rassisme wat die internet “oorstroom”. Hy meen:

“In die toekoms gaan daardie mediahuise gedagvaar word vir wat daar geskryf word. Ons doen ‘n beroep op die Suid-Afrikaanse Menseregtekommissie om dit dop te hou en die stappe aan te beveel wat rondom dié rassisme geneem moet word wat veral op die mediahuise se platvorms versprei word.”

Die voorsitter van die Freedom of Expression Institute, prof. Anton Harber, het met mnr. Nzimande saamgestem oor die rassisme en haatspraak op die internet, maar wou nie hê die regering met met die mediahuise inmeng nie.

“Nzimande is reg om oor rassisme en haatspraak op die internet begaan te wees, maar ek is nie seker dat die probleem by die vernaamste mediahuise lê nie.

Die mediahuise is reeds wetlik en eties vir hul eie webwerwe verantwoordelik en word verplig om onwettige haatspraak en rassisme te voorkom.

Ek hoop Nzimande stel nie voor dat die regering begin om inhoud te reguleer en om by die webwerwe van ons mediahuise in te meng nie, aangesien dit die vermoë van die internet om aan burgers ‘n stem te verleen om openbare deelname te bevorder, sou kortwiek.”

Die voorsitter van die nasionale redakteursforum (Sanef), Mpumelelo Khabela, meen daar is reeds stappe geneem om “ongewenste inhoud” aanlyn te verminder. Hy sê:

“Nzimande is onbewus van wat Sanef reeds doen. Dis vir ons aangenaam om hom in kennis te stel dat daar by ons laaste algemene vergadering in Kaapstad besluit is om ‘n samevoegingskomitee aan te stel om meganismes te vind wat inhoud in die multimediaruimte kan reguleer.

Ons ontwikkel ‘n beheergmeganisme nie vanweë druk nie, maar omdat ons slegs dít wat eties gesond is publiseer.”

Waterkrisis tref Kaapse boere na kanaal meegee

‘n Kanaal wat verskeie klein dorpe en honderde plase noord van Kaapstad van water voorsien het meegegee vir die tweede keer in drie jaar.

Die Wes-Kaapse Ministerie van Ekonomiese Geleenthede onder DA-bestuur, het bevestig dat die kanaal meegegee het buite Clanwilliam. Dit het ‘n impak op die dorpe van Klawer, Vredendal, Lutzville, Strandfontein en Ebenhaezer, en sowat 300 plase.

Die dorpe gebruik drinkwaterreserwes terwyl die kanaal herstel word.

‘n Woordvoerder Tammy Evans het Maandag gesê die probleem kom op ‘n “sensitiewe tyd” vir die gebied se groente- en vrugteboere.

Boere het lank gekla oor veroudering van die waterinfrastruktuur wat sowat 30% van sy kapasiteit lek. Baie waterkenners glo dat Suid-Afrika ‘n waterkrisis deels as gevolg van infrastruktuuragterstand in die gesig staar.

Die Clanwilliamdam, gebou in 1935 hoofsaaklik om aangrensende landbougrond te besproei, het ‘n kapasiteit van 121.8million kubieke meter.

Agri Wes-Kaap, sê die ramp kan ‘n potensiële oes van ongeveer 200000 ton wyndruiwe en 100000 ton tamaties raak.

“Januarie en Februarie is ‘n kritieke besproeiingstyd in die huidige seisoen, wanneer produsente maksimum watervoorsiening benodig,” het die organisasie gesê.

Herstelspanne hoop om 50% van die watervloei deur die naweek te herstel en volle kapasiteit binne die volgende maand.

Agri Wes-Kaap het gesê die herstelwerk kos sowat R4 miljoen.

Verhoogde verkeersvolumes verwag

Verhoogde verkeersvolumes word verwag op Suid-Afrika se paaie van vandag af soos motoriste terugkeer huis toe ná die feestyd.

Die finale vakansieverkeerstormloop sal na verwagting Vrydagmiddag begin. Verkeersowerhede het ‘n beroep op reisigers gedoen om nie hul vertrek uit te stel tot op die laaste minuut nie.

Owerhede sê tans is die paaie nog redelik stil, maar verkeersvolumes sal na verwagting toeneem van vanmiddag af en Sondag ‘n piek bereik.

Die N1 tussen Kaapstad en Johannesburg word ook verwag om die besigste te wees.

Intussen, sal die minister van vervoer, Dipuo Peters die 2014/15 voorlopige feestydpadsterftes aankondig.

SA Joernaliste veroordeel Charlie Hebdo-aanval

Die Suid-Afrikaanse Nasionale Redakteursforum het die aanval op die Franse weekblad waarin twaalf mense dood is, ten sterkte veroordeel.

SANEF het in ‘n verklaring gesê dat die aanval spanning plaas op godsdiensvryheid asook vryheid van spraak.

SANEF het ‘n beroep op alle godsdiensleiers gedoen om hulself van die lafhartige aanval te distansieer, en veral Moslems gesuggereer.

Die Media-instituut van Suid-Afrika het die aanval bestempel as die ergste aanval op joernaliste in baie jare.

Raymond Louw, woordvoerder van die Instituut, sê daar kan nooit regverdiging wees om mense te na te kom omdat hulle menings uitspreek nie, selfs al is die menings ook vir ander onaanvaarbaar.

Tien joernaliste en twee polisielede wat moes gesorg het vir die joernaliste se veiligheid, is doodgeskiet toe minstens twee gewapende mans gister die publikasie se kantore binnegedring en op die mense losgebrand het.

Die VN het hulde gebring aan die slagoffers van die aanval.

Die vyftien lede van die Veiligheidsraad en dosyne diplomate het met die aanvang van die sitting hul medelye met die twaalf slagoffers betuig en ‘n minuut lank in stilte gestaan.

Die spotprentkunstenaar Zapiro, wat homself beywer om Steve Hofmeyer en “regses” of Afrikaners stil te maak, het ook krokodiltrane gehuil oor “spraakvryheid”.

Die ANC en EFF was nie juis geraak deur die aanval nie, aangesien daar nie ‘n politieke voordeel in vervat is vir die twee organisasies wat self mbv terreur bewondering by sekere kiesers afdwing nie.

Perdediefstal steek kop uit in Oos-Vrystaat

Die polisie in die Oos-Vrystaat sê boere en perde-eienaars by Phuthaditjhaba moet waaksaam wees teen diewe wat reeds vyf perde en vier saals gesteel het.

Die polisie se Mmako Mophiring sê drie perde is op die plaas Mount Paul gesteel en nog twee op die plaas Platkop. Al die perde is gesteel terwyl hulle in die veld gewei het.

Voor hierdie perdediefstalle is ook by die stalle van die polisie se berede-eenheid ingebreek en vier saals asook polisiebeamptes se perdrystewels gesteel.

Die polisie vra enigiemand met inligting oor hierdie diefstalle om die Phuthaditjhaba-polisiekantoor te kontak.

Twee SAID-amptenare weer geskors

Peter Richer, groephoof van risikobeplanning, is weer deur die Suid-Afrikaanse Inkomstediens (SAID) geskors, het Sapa berig.

Richer is Dinsdag amptelik geskors, het die SAID in ŉ verklaring gesê.

Die SAID het vroeër, voor die saak in die arbeidshof aangehoor is, Richer se skorsing teruggetrek om hom tyd te gee om redes aan te voer oor hoekom hy nie geskors moet word nie.

“Die SAID het mnr Richer se vertoë oorweeg en is steeds van mening dat hy geskors moet word,” het die SAID Woensdag in ŉ verklaring gesê.

Die Arbeidshof het op 18 Desember beveel dat Ivan Pillay, adjunkhoof van SAID, se skorsing onmiddellik tersyde gestel moet word. Pillay is saam met Richer geskors in wat beskou word as ‘n politieke besluit deur die ANC.

Dié twee here het die SAID glo gebruik om invloedryke figure te teiken.

Die Sunday Times het egter berig dat Pillay na die hofuitspraak weer nogtans ‘n kennisgewing van skorsing ontvang het.

Swartrenoster kan uitsterf in 2015

Die swartrenoster is een van 13 spesies wat die wêreld dalk vanjaar moet groet en nooit weer lewendig gesien gaan word nie, het die Republikein berig.

Met net meer as 4 800 swartrenosters in die wêreld oor, sal selfs die vurigste bewaringspogings nie help om stygende renosterstropery en die verhoogde aanvraag na renosterhorings op die swartmark in veral Asië, te verminder nie.

Volgens dr. Derek Tittensor, ’n marine ekoloog van die Wêreldbewaringmonitorsentrum in Cambridge, Engeland, is die swartrenoster een van 13 spesies wat moontlik vanjaar kan uitsterf.

Verlede jaar is minstens 24 renosters, waarvan die meerderheid swartrenosters, in Namibië gestroop.

Tittensor sê die wêreld is besig om dosyne spesies daagliks te verloor en kundiges noem dit die sesde massa-uitwissing in die geskiedenis van die aarde. Soveel as 30% tot 50% van alle spesies beweeg na uitwissing in die middel van die eeu. Vingers wys na net een skuldige: die mens.

“Habitatverwoesting, besoedeling en onwettige visvang dood wilde diere en plante of los hulle in ’n erg verswakte toestand. Die probleem is die bykomende bedreiging van klimaatverandering gaan in komende dekades vererger en nog meer van hierdie oorlewendes laat vrek,” sê Tittensor.

Sowat 190 nasies het einde verlede jaar die Verenigde Nasies (VN) se beraad oor klimaatverandering in Lima, Peru bygewoon vir optrede om stygende groenhuisgasse te verminder.

Korrupsie en onwettige aanlynhandel bedreig ook bewaringspogings. Die onwettige handel in wildlewe word op sowat U$10 miljard per jaar bereken. Dit is die vyfde grootste smokkelhandel ná dwelms, aangevuur deur die stygende vraag na wilde diere as troeteldiere, trofeë en bestanddele in medisyne, voedsel en ander produkte.

“Dit is ’n opdraande stryd teen die mens se onvolhoubare gierigheid en verbruik, maar dit is ’n geveg wat ons nie mag verloor nie,” sê Tittensor.

Die ander 12 spesies wat moontlik vanjaar kan uitsterf, is die oostelike luiperd (net sowat 30 is in die wildernis oor), die Sumatra-olifant, Java-renoster, leerskilpad, die westelike laelande gorilla (wat ook veral weens die Ebola-virus gevrek het), die saola, vaquita (nog net sowat 100 oor), die Siberiese tier, berggorilla, die groter bamboeslemur (sowat 60 in die wildernis en 150 in aanhouding op Madagaskar), die Sumatra oerangoetang en die Yangtze vinlose tornyn.