Die Staande Komitee oor Openbare Rekeninge, Skoor, in Noordwes sal aanstons bevindinge oor ‘n ondersoek na die mynrekening in die provinsie, bekend as die D-rekening, bekend maak.
Honderde miljoene rand is deur vier mynmaatskappye vir gemeenskapsontwikkeling inbetaal in die D-rekening.
Skoor se ondersoek maak deel uit van ‘n drieledige ondersoek, met die Openbare Beskermer en die Ouditeur-Generaal wat ook ondersoek instel.
Die rekening is nog nooit ge-oudit sedert die ANC aan bewind gekom het nie. Die rekening is na bewering tans dolleeg.
Die voorsitter van die komitee sê die ondersoek is vertraag deurdat dokumentasie glo “laat” van belangehebbendes ontvang is.
Mynmaatskappye het sedert die apartheidsjare tantieme betaal aan sowat 100 tradisionele leiers om op hulle grond te myn. Hierdie gelde is gedeponeer in ‘n trustrekening bekend as die D-rekening wat nou beheer word deur die Noordwes-regering.
Meer as 243 miljoen rand alleen is sedert 2007 in die rekening inbetaal.
Een van die stamgemeenskappe, die Bapo ba Mogale naby Brits, het amper niks om te wys vir die honderde miljoene wat deur mynmaatskappye hul naam inbetaal is nie.
Die Bapo-stam woon by Marikana, Brits waar Lonmin sy mynbedrywighede het.
Lonmin sê hulle het reeds R372.9 miljoen in die D-rekening inbetaal maar die Bapo-stam het byna niks daarvan gekry nie.
Dit blyk egter dat R151 miljoen onttrek is uit D-rekening in die naam van die Bapo-stam.
Dit het vrese laat ontstaan dat honderde miljoene reeds verdwyn het uit die rekening.
Zwelinzima Vavi, Cosatu se hoofsekretaris, sal Maandag terug wees op kantoor, nadat sy skorsing ongeldig en onwettig verklaar is.
Die Suid-Gautengse hooggeregshof in Johannesburg het Vrydag beslis dat sy skorsing uit die vakbond nie geldig en wettig was nie.
Vavi is in Augustus deur die vakbondfederasie geskors weens ‘n buite-egtelike verhouding met ‘n junior-kollega nadat hy eers van verkragting beskuldig is. Die kollega het egter nooit ‘n klag van verkragting teen Vavi gelê nie.
Cosatu se bestuur sal Dinsdag vergader om te besluit of die federasie verdere stappe gaan doen ná Vavi se skorsing ter syde gestel is.
Die woordvoerder vir Cosatu, Patrick Craven, het vroeër gesê hulle sal die uitspraak bestudeer om te besluit of verdere regstappe gedoen sal word.
Nege vakbonde wat by Cosatu geaffilieer is, het Maandagoggend by Cosatu-huis in Johannesburg byeengekom om die vakbondfederasie se hoofsekretaris terug te verwelkom.
Die metaalwerkersvakbond, Numsa, het Vavi deurentyd ondersteun het nadat faksies binne die organisasie ‘n veldtog geloods het om van hom ontslae te raak.
Numsa het op ‘n vergadering in Durban laat blyk dat Vavi steeds geteiken word en dalk weer deur die federasie geskors kan word. Cosatu-leiers vergader môre om te besluit of daar verder teen Vavi opgetree gaan word.
Cosatu se tak in Noordwes beplan om die week ‘n optog na die myngebied op Rustenburg te hou teen die arbeidsonrus in die platinumgordel.
Die vakbondfederasie se provinsiale sekretaris, Solly Phetoe, het die aankondiging op ‘n gebedsdiens in die Olympiastadion op Rustenburg gedoen dat hulle vrede en bestendigheid sal nastreef.
Hy het alle rolspelers in die sektor genooi om deel te word van die Mynmisdaad-bekampingsforum, ‘n inisiatief van adjunk-president Kgalema Motlanthe.
Phetoe sê verskeie gevalle van intimidasie van nie-stakende mynwerkers is tydens Amcu se loonstaking is aangemeld.
Die staking wat deur die meerderheidsvakbond Amcu in die platinumbedryf uitgeroep is, is nou reeds in sy derde maand.
Die busbestuurders wat die toevoerbusse vir die Gautrein beheer, het so pas ‘n onbeskermde staking in Johannesburg geloods, volgens Bombela, die Gautrein se bestuursmaatskappy wat vanoggend ‘n verklaring uitgereik het.
“Ek het nog nie enige besonderhede oor waarom die staking plaasvind nie, wat enkele ure gelede begin het,” sê die woordvoerder vir Bombela, Errol Braithwaite.
“Dis geheel en al ‘n wilde staking, aangesien die maatskappy geen stakingskennisgewing van die werkers ontvang het nie.”
Busse in Pretoria funksioneer steeds normaal op Vrydag.
Volgens Braithwaite word daar reeds onderhandelings met die bestuurders gevoer.
Die Onderwysdepartement in Limpopo is teleurgesteld oor wat hy noem vals aansprake dat onafgelewerde handboeke in ‘n pakhuis by die Fetakgomo onderwyskollege gekry is, het RSG berig.
Die departement sê die inhoud in die houers is nie handboeke nie, maar handleidings en werkboeke wat voorheen deur die provinsie gebruik is.
Die DA het vroeër aangevoer dat hy tydens ‘ n roetine oorsigbesoek op duisende onafgelewerde handboeke by die kollege afgekom het.
‘n DA-woordvoerder het gesê veiligheidswagte het gekeer dat hulle die besoek kon voltooi, maar hulle het foto’s van die handboeke geneem.
Die Departement van Basiese Onderwys het intussen die voorstel van die Noord-Gautengse hooggeregshof in Pretoria verwelkom dat die geskil met onderwysgroepe buite die hof geskik moet word.
Die burgerregtegroepe, “Section 27” en “Better Education for All” hou vol dat daar ‘n groot tekort aan handboeke by skole in Limpopo is.
Drie mans het buite Pretoria op die N4 by Pelindaba op ‘n bus vol toeriste losgebrand.
Die insittendes van ‘n wit Audi met die registrasienommer XYK841GP het eers op die bus geskiet, dit tot stilstand gedwing en daarna die passasiers van hulle besittings beroof.
Die polisie sê drie mans in die wit motor het die bus se bande flenters geskiet om die bus te dwing om te stop.
Nadat die bus tot stilstand gekom het, het hulle opgeklim en al die passasiers se selfone en handsakke geëis.
Niemand is beseer nie. Die aanvallers is steeds op vrye voet.
Die SAPD is glo besig om verklarings van die passasiers te neem.
Die polisie het 40 mense by Bloemhof in Noordwes in hegtenis geneem vir openbare geweld.
Die gewelddadige oproer was teen buitelanders en die burgemeester van Lekwatemane, Moeder Makodi gemik.
Oproerige inwoners van die Boitumeleng-township het Woensdagaand ‘n aantal eiendomme beskadig wat aan die burgemeester behoort.
Die woedende skare het die bedanking van die burgemeester en haar raad geëis.
Winkels wat aan buitelanders behoort is ook geplunder. Die buitelanders is deur die polisie is na ‘n plek van veiligheid gebring, terwyl inwoners besig was om ‘n vergadering te belê.
Die betogers sê die munisipaliteit is nepotisties, korrup en het hulle van gebrekkige dienslewering beskuldig.
Inwoners sê dienslewering het nog nie in die gebied sedert 1994 verbeter nie.
Gauteng se motoriste skuld agterstallige e-tolgelde van meer as ‘n halfmiljard rand in die provinsie sedert die ongewilde e-tolstelsel op 3 Desember begin het.
Volgens die minister van vervoer Dipuo Peters is minder as 10% betaal.
Sy het op ‘n geskrewe vraag in die parlement geantwoord.
Die VPC is vir die invordering van die Suid-Afrikaanse Nasionale Padagentskap ( Sanral ) se agterstallige e-tolskuld verantwoordelik.
Vusi Mona van Sanral het gesê die R543.5 miljoen sluit beide dié van motoriste met e-skyfies se agterstallige rekeninge in, asook dié wat opgetel word deur die elektroniese hekke, maar nie geregistreer het vir die tolstelsel nie.
Mona kon nie dadelik sê watter persentasie van Gauteng se motoriste tot dusver aangeteken het nie.
In Peters se antwoord op die vraag in die parlement is ook onthul dat ‘n bedrag van R54 735 638 [ BTW uitgesluit ] op die insameling van die skuld uitgegee is.
Hierdie syfer sluit R32.8 miljoen posgeld en druk van fakture in, asook ‘n verdere R21.9 miljoen vir die insamelingsproses.
Die Bondgenootskap teen Stedelike Tol, OUTA, het die uitklaring deur die Johannesburgse metropolisie verwelkom dat onbetaalde e-tol rekeninge nie kan lei tot die weerhouding van voertuiglisensies, swak krediet of kriminele rekords nie.
Die versekering is deur die direkteur van lisensiëring en vervolging, Gerrie Gerneke gegee.
‘n Woordvoerder vir OUTA, John Clarke sê motoriste kan ook nie in hegtenis geneem word vir uitstaande e-tol rekeninge nie.
Hy sê die nie-betaling van e-tol rekeninge is nie ‘n verkeersoortreding wat kan lei tot die weerhouding van voertuiglisensies nie.
President Jacob Zuma het in ‘n verklaring gesê hy sal slegs volledig reageer op die Nkandla-verslag wanneer die ondersoek deur die Spesiale Ondersoekeenheid afgehandel is.
‘n Woordvoerder van die Spesiale Ondersoekeenheid, Boy Ndala, sê die eenheid se ondersoek sal aan die einde van Mei afgehandel wees.
Die Parlement het intussen bevestig dat hy kommentaar van die president oor die Openbare Beskermer, Thuli Madonsela, se verslag na opgraderings by sy privaatwoning ontvang het.
Zuma het sy reaksie aan die Speaker van die Nasionale Vergadering, Max Sisulu, voorgelê en ‘n afskrif van Madonsela se verslag ingesluit.
Madonsela het bevind dat die president onregverdige voordeel getrek het uit van die opgraderings by sy huis en dat hy van die koste moet terugbetaal.
Die president sê hy het nie die besluit geneem om die opgraderings te laat aanbring nie en voel dus nie genoop om daarvoor te betaal nie.
Opposisiepartye het Zuma daarvan beskuldig dat hy sy reaksie doelbewys vertraag tot na die verkiesing op 7 Mei, maar die woordvoerder van die Presidensie, Mac Maharaj het dit ontken.
Die Times of Zambia berig dat ‘n Malawiër sy liggaamsdele geoffer het nadat ‘n tradisionele geneser oftewel toordokter gesê het dit sal hom help om ryk te word.
“Ek het bos toe gegaan waar ek beveel is om kaal te loop en toe kom ‘n hiëna na my toe en begin my tone eet en uiteindelik is my geslag ook geëet.” Só word Chamangeni Zulu, wat in sy twintigerjare is, deur die koerant aangehaal.
Intussen is hy vanuit die Chipata-algemene hospital ontslaan, volgens ‘n senior verpleegster in die Zambiese grensdorp.
“Hy is Maandag ontslaan nadat sy familielede gevra het dat hy na Muchinji in Malawi oorgeplaas word,” sê Suster Precious Matongo, verwysende na ‘n dorp net oorkant die grens.
“Hulle behoort sy wonde skoon te hou, maar hy is stabiel,” voeg sy by.
Vele Malawiërs steek glo die grens tussen die twee Afrikalande oor om op Zambië se kommersiële tabakplase te werk.
Engela Nel in haar studeerkamer ‘n week ná die voorval. Foto: Die Pos
Die Pos op Nylstroom berig dat Engela Nel (86) van die Zebra Park-sekuriteitsoord op die dorp Woensdagnag, 19 Maart, ure lank gemartel is. Sy het vir haar lewe, asook vir haar tuinwerker se siel, gebid nadat hy haar glo oorval en ure lank in haar huis aangehou en emosioneel geteister en rondgeruk het.
Thomas Madimetsha Kemp het glo ongeveer vyf jaar lank vir Nel in haar tuin gewerk en ook gehelp met ander take in en om die huis.
Sy het aan Die Pos vertel dat Kemp op dié betrokke dag sy gewone vriendelike en gemoedelike self was.
Nadat hy om ongeveer 16:30 klaar gewerk het, het hy saam met Nel kombuis toe gestap, nes altyd, waar sy hom vir die dag se werk moes betaal. Hy het ’n register gehad waarin hy gewoonlik ontvangs geteken het vir sy geld.
Sy sê dat hy op dié dag kastig vir haar ’n lekkende kraan in die badkamer in haar slaapkamer wou wys, maar dat sy nie saam met hom soontoe gestap het om te gaan kyk nie. Sy het net vir hom gesê dat daar nie tyd was daarvoor nie. Sy was van plan om hom by die huis te gaan aflaai, aangesien dit gelyk het asof dit binnekort sou reën.
Kemp het haar toe glo vir meer geld gevra, maar Nel het vir hom gesê dat sy nie soveel geld het nie.
Die volgende oomblik, vertel sy, het dit vir haar gevoel asof sy deel is van ’n nare droom.
Toe sy omdraai om haar motorsleutel op die kombuistoonbank te vat, het hy haar glo van agter om die nek gegryp en begin wurg. Sy is hard op die kop geslaan en het vir ’n ruk haar bewussyn verloor.
Thomas Madimetsha Kemp, wat tans deur die polisie gesoek word
Toe sy ’n bietjie later in haar slaapkamer op die mat bygekom het, was Kemp besig om haar hande en voete vas te bind en aan die bed se pote vas te maak. Hy het ook tou om haar nek en oor haar mond vasgebind. Nel sê dat die toue só styf vasgemaak was, dat die gevoel in haar hande en voete doodgegaan het. Daar was ook baie bloed.
Sy sê dat sy vir hom gevra het hoekom hy dit doen. Hy het geantwoord dat hy R3 000 nodig het, blykbaar vir ‘n sangoma-kursus wat hy wou aflê of reeds afgelê het. Die hele tyd wat sy met hom probeer praat en by hom gepleit het om haar los te maak, het hy glo aangehou om te sê dat hy daardie bedrag geld nodig het. Sy het vir hom gesê dat sy nie soveel geld in die bank het nie, maar hy het blykbaar aangehou om vir haar te sê dat sy jok en dat hy haar nie vertrou nie.
Nel het later vir Kemp die kluis in haar studeerkamer oopgemaak, waarin daar ook niks van waarde was nie. Hy het haar toe in die studeerkamer toegesluit terwyl hy deur die huis gestap het en al die sleutels wat in die huis was, bymekaar gemaak het. Nel het die studeerkamer se duplikaatsleutel, wat toevallig ook in die kluis was, uitgehaal en die studeerkamer se deur versigtig oopgesluit. Omdat hy haar debietkaart gevat het, het sy gedink dat hy dalk gery het om te gaan kyk hoeveel geld hy uit haar rekening kon trek.
Toe sy by die studeerkamer uitstap, het hy haar egter weer van agter gegryp en gevra of sy probeer wegkom. Die toue, wat die dun vel oor haar arms en gewrigte teen dié tyd deurgeskaaf het, is nóg stywer getrek.
Teen ongeveer middernag is Kemp glo met Nel se bankkaart, selfoon, TV en motorsleutels weg. Die landlyn is blykbaar al vroeër ontkoppel en uit die studeerkamer geneem. Nel het haar handvuurwapen, wat in die studeerkamer versteek was, met haar geswelde en bebloede hande probeer laai en dit ná ’n gesukkel reggekry om twee skote af te vuur om die bure se aandag te trek.
Sy het ook een van die venstertjies in die studeerkamer se glasdeur met ’n ornament gebreek.
“Ek het besluit as hy weer terugkom, skiet ek hom dood voordat hy mý doodmaak,” het Nel gesê.
In die studeerkamer het sy ook ou Telkom-telefone onder in ’n boekrak gekry en gelukkig het een van hulle gewerk.
Sy het van die bure gebel en laat weet wat gebeur het. Terwyl sy besig was om oor die telefoon te praat, het sy haar aanvaller skielik wéér deur die glasvensters van die studeerkamer by die agterdeur sien inkom. Sy het hard vir haar buurman oor die foon gesê: “Bel die polisie, ek is deur Thomas (almal daar ken hom) aangeval.” Kemp het volgens haar net daar in sy spore omgedraai en verdwyn.
Een van haar bure, Theuns Minnaar, het ’n spaarsleutel vir Nel se voordeur gehad en kon die huis oopsluit. Die polisie, wat glo baie flink gereageer het op die oproep, moes egter die studeerkamer se deur oopskop om Nel te bevry, aangesien Kemp dié, sowel as alle ander sleutels in die huis met hom saamgeneem het.
Nel is eers na dr. Mich Veldman geneem om haar wonde te verbind, voordat ds. Fanie Hoffman (voorheen van die Hervormde Kerk op Modimolle) haar teen ongeveer 01:30 die oggend na die Orania-versorgingseenheid in die Noord-Kaap geneem het, waar sy tot Sondag, 23 Maart, behandel is. Haar dogter, Estelle Pretorius, het vir ’n paar dae kom kuier sodat sy ’n ogie oor haar ma kan hou. Sy sê dat dit die vreeslikste gevoel is om in die middel van die nag wakker gebel te word en te hoor dat jou ma aangeval is.
Nel is die tweede bejaarde inwoner in ’n kort tydperk wat op Nylstroom aangeval is. Piet Venter is verlede jaar ook pimpel en pers geslaan nadat hy in sy huis by die Amarula-kompleks deur ’n mede-inwoner se seun oorrompel en aangerand is vir geld.
“Ek kan nou nog nie glo dat Thomas tot so iets in staat was nie. Ek het op ’n stadium, terwyl hy my aangehou het, vir hom gesê om my hand te vat sodat ek vir hom ook kan bid omdat hy met ’n verkeerde ding besig was,” vertel sy.
Haar advies aan die gemeenskap: “Moet niémand vertrou nie.”
Ao. James Findlay, woordvoerder vir die polisie op Modimolle, het aan Die Pos gesê dat Nel se motor en selfoon later die nag in Kroepstraat, naby die polisiestasie, gevind is. Kemp is nog nie opgespoor nie, maar ’n saak van huisroof en diefstal van ’n voertuig is geopen. Dit word deur ao. Koos van der Berg en sy span ondersoek. ’n Beloning word aangebied vir positiewe inligting wat mag help met die ondersoek.
