Grondkwessie in Swakopmund raak warm

Ontevredenheid onder inwoners­ van informele nedersettings­ op Swakopmund­ in Namibië het Maandag kookpun­t bereik toe sowat 20 plakkershuise­ plek moes maak vir die regering se massabehuisingskema­, het die Republikein berig.

Inwoners van die DRC informele­ nedersetting het selfs gedreig om weens gedwonge uitsettings die reg in eie hande te neem.

Die probleme in Swakopmund­ hou klaarblyklik nie verband met die afgelope­ naweek se onwettige besetting­ van munisipale­ grond in ’n ander deel van die Mondesa-­woonbuur­t nie.

’n Klein groepie grond- en huislose­ inwoners het begin om ’n onontwikkelde­ blok woonpersele­ te beset, maar ná die inhegtenisneming­ van hul leiers is die onwettige strukture afgebreek en die perseel is ontruim.

Maandag het ’n amptelike struktuur­ van die hervestigingsprogram, die Democratic Resettlement Community­ Concern Group Association­ (DRCCGA), in groot getalle in verset getree teen hul verskuiwing en die afbreek van hul huise.

Dit is nadat konstruksiewerkers van die Power Oyeno Construction­ groep van maatskappye begin het om die fondasies van die nuwe huise ooreenkomstig die massabehuisingskema­ te grawe.

Power Oyeno is verantwoordelik­ vir die bou van altesaam 2 034 huise teen ’n totale koste van N$583 miljoen op Swakopmund.

Die projekbestuurder, mnr. Gerry Munyama, was gister duidelik­ onkant betrap deur die protesoptrede­. Hy het aan verslaggewer­s verduidelik dat die perseel geoogmerk is vir die behuisingskema­ en dat slegs die Nasionale­ Behuisingsonderneming­ en die plaaslike munisipalitei­t antwoorde­ oor die mense se ontevredenheid­ kan verstrek.

Volgens die voorsitter van die DRCCGA, mnr. David Nghiimbwasha,­ moet sy mense egter nou plek maak vir dié huise sonder enige waarborge dat hulle vir dié huise in aanmerking kan kom.

Hy het verskeie briewe aan Republikein­ ­beskikbaar gestel waarin sy vereniging onder meer ’n regsmening oor die gedwonge uitsettings­ ingewin het.

Die munisipaliteit van Swakopmund­ het egter reeds op 29 April 2013 ’n formele kennisgewing­ aan inwoners van die buurt gestuur waarin hulle gewaarsku word met uitsetting indien verdere onwettige­ strukture opgerig word.

“Geen verdere onwettige bouwerk sal geduld word en oortreders­ sal deur wetstoepassers­ van die grond verwyder­ word,” lui die omsendbrie­f deur die hoofbestuurder­ van gemeenskapsontwikkeling­.

In antwoord daarop het die vereniging­ skriftelik by die minister­ van streek- en plaaslike owerhede­, behuising en landelike ontwikkeling­, genl.maj. (afgetree­) Charles Namoloh, aansoek gedoen dat hulle as inwoners van die buurt die totale woonbuurt by die munisipalitei­t wil uitkoop.

’n Afskrif van die aansoek is op 15 September verlede jaar ook by die munisipaliteit ingehandig.

“Hierdie grond behoort aan DRC Village 110. Ons was die eerste mense hier en nou word ons nie eens geken in die saak nie. Ons sal nie toelaat dat hulle voortgaan nie, daar moet eers ’n oplossing gevind word,” het Nghiimbwasha gesê.

Volgens hom het hy self die polisie in kennis gestel van die gespanne­ toestand in die buurt omdat vrese bestaan het dat geweld kan uitbreek­.

Sowat twee ure later het die burgemeester­ van Swakopmund, mnr. Juuso Kambueshe, opgedaag en met die volle komitee van die vereniging vergader.

Later het die uitvoerende hoof, mnr. Eckart Demasius, met sy eie afvaardiging­ ook opgedaag.

Wat bespreek is en besluite wat geneem is, is nie bekend nie.

Wesbank-hoofkantoor deur swartes beroof

Die hoofkantoor van Wesbank, ‘n filiaal van Eerste Nasionale Bank wat motorfinansiering verskaf, is gister in Fairland, Johannesburg, beroof. Die teiken was ‘n MTN-winkel binne die enorme gebou net langs die N1-snelweg. Vier verdagtes is aangekeer terwyl drie ander steeds op vrye voet verkeer.

Volgens ‘n woordvoerder van die Fairland-polisiestasie, konstabel Michael Kgatla, het die voorval rondom 11:00 gisteroggend plaasgevind.

Die hoofkantoor van Wesbank, van die N1-snelweg gesien
Die hoofkantoor van Wesbank, van die N1-snelweg gesien

“Een van die aangekeerde verdagtes is deur veiligheidsbeamptes geskiet,” sê Kgatla. “Drie ander verdagtes het in ‘n Quantum-taxi gevlug, wat hulle by die Gordonweg-kruising gelos het toe die verkeerslig rooi slaan met die polisie wat hulle agtervolg.”

Toe vind ‘n skietgeveg plaas. Een van die aangekeerde verdagtes het ook ‘n veiligheidsmaatskappy se motor gekaap, maar het in die voorstad vedwaal geraak en kon nie wegkom nie.

“Die verdagte is op die hoek van Wilsonstraat en Soutpansweg in hegtenis geneem.”

Warm weer duur voort

Die Suid-Afrikaanse Weerburo sê warm weerstoestande gaan voortduur in die grootste deel van die sentrale binneland met ‘n hittegolf wat later vandeesweek in die noord-oostelike deel van Noordwes, dele van Gauteng en die westelike deel van Limpopo sal heers.

‘n Weervoorspeller sê egter die warm temperature in die res van Noordwes, die Vrystaat en Noord-Kaap kwalifiseer nie as ‘n hittegolf nie.

Volgens haar sal temperature tussen 36°Celsius en 38°Celsius wissel by Zeerust in Noordwes waar die hittegolf van Donderdag tot Saterdag sal duur. Sy sê gemeenskappe moet versigtig wees in die bloedige hitte.

Moloabi sê daar is van Donderdag tot Sondag ‘n 30% kans op reën in Noordwes en die Vrystaat, terwyl daar teen Saterdag en Sondag ‘n 60% kans in die oostelike deel van die Vrystaat is.

Volgens haar is daar vanmiddag in die sentrale deel van die Vrystaat ‘n moontlikheid van reën, met ‘n wolkband wat van die verre oostelike deel van die Noord-Kaap by Kimberley deurbeweeg.

AA waarsku dat brandstofpryse weer kan klim

Die Automobiel-Assosiasie het Dinsdag gewaarsku dat die onlangse daling in die brandstofprys van korte duur mag wees.

“Internasionale brandstofpryse het met meer as 20 persent geklim sedert die laaste week van Januarie,” het die AA in ‘n verklaring gesê.
 
“‘n Skerp styging in die rand/dollar-wisselkoers het ook druk op die brandstofprys geplaas, en die huidige data voorspel ‘n Maart-prysverhoging vir petrol van sowat 68 sent per liter, met diesel en paraffien ongeveer 45 en 48 sent per liter onderskeidelik.”
 
In die eerste week van Februarie het die prys van alle grade petrol met 93 sent per liter gedaal.
 
Vroeg in Januarie het die prys van 93 en 95 oktaan petrol gedaal met R1.27 en R1.23 per liter.
 
Tensy daar ‘n wesenlike verbetering in beide die wisselkoers en internasionale brandstofpryse is, kan motoriste gekonfronteer word met ‘n brandstofverhoging aan die einde van die maand.
 
“Dit is te vroeg om te sê of die opswaai in brandstofpryse ‘n blote wisselvalligheid is of ‘n teken dat die onderpunt van die siklus bereik is,” het die AA gesê.

Menseregtekommissie op die aanval teen oorblywende blanke skole

Kort ná die histerie oor die Curro-skool Roodeplaat, beplan die Suid-Afrikaanse Menseregtekommissie nou ‘n groot aanval op “rassistiese” skole. Dit gaan oor skole wat nog nie na ‘n swart meerderheid getransformeer het nie, en selfs skole wat wel oor ‘n swart meerderheid beskik, maar waar blanke onderwysers steeds standaarde probeer handhaaf. By sulke skole is daar klagtes dat die skool self “getransformeer” het, maar nie die onderwyserskorps nie.

Volgens die woordvoerder van die Suid-Afrikaanse Menseregtekommissie, Isaac Mangena, “oorweeg die kommissie ‘n nasionale ondersoek na rassisme in openbare en privaat skole”. Blykbaar is die kommissie “bekommerd” oor klagtes wat hy ontvang het, vanuit Mpumalanga, die Vrystaat en die Wes-Kaap, veral waar onderwysers ter sprake is.

“Klagtes is vanuit Mpumalanga, die Wes-Kaap en die Vrystaat ontvang,” sê Mangena.

“Dit is onaanvaarbaar dat onderwyers, wat in die afwesigheid van ouers beheer oor die kinders neem, hulle op so ‘n manier gedra.”

Mangena is van mening dat die departement van basiese onderwys bewerings van rassisme behoort te ondersoek. ‘n Woordvoerder van die SA raad van opvoeders, Thembinkosi Ndhlovu, sê dat dit “hoog tyd is dat rassisme op skool volwaardig gekonfronteer word”.

Hy het ‘n beroep op leerlinge en ouers gedoen om rassistiese voorvalle aan die owerheid te rapporteer.

“Dié onderwysers bederf die reputasie van die beroep,” sê Ndhlovu.

Praag het reeds voorheen berig dat sowel die huidige LUR vir onderwys in Gauteng, Panyaza Lesufi, as die vorige, me. Barbara Creecy, dreig om Afrikaanse skole te verengels en te verswart.

Ons het ook die volgende vrae – in Afrikaans – aan mnr. Isaac Mangenya, woordvoerder van die SA menseregtekommissie gestuur en sal die antwoorde publiseer sodra ons dit van hom ontvang:

Geagte mnr. Isaac Mangena,

Ons publiseer ‘n daaglikse aanlynkoerant, praag.co.za en het die volgende vrae aangaande u onlangse verklarings rondom rassisme in skole:

  1. Beskou die SA menseregtekommissie skole waar daar ‘n meerderheid blanke kinders in klasse of op die speelgrond is, as per se rassisties?
  2. Hoe voel die SAMRK oor Afrikaanse skole? Is daar steeds plek vir Afrikaanse skole of moet alle skole nou Engels word om sogenaamd “toegang” te verseker?
  3. Is daar iets soos die reg op moedertaalonderrig of beskou die kommissie ras as ‘n maatstaf wat alle ander kwessies (moedertaal, gehalte, kultuur) troef?

As u so gou moontlik op dié vrae sal antwoord, sal ons bly wees.

Lees ook: Rasherrie by skool op Witbank: wit onderwyser noem swart ouer ‘bobbejaan’

Rasherrie by skool op Witbank: wit onderwyser noem swart ouer ‘bobbejaan’

‘n Blanke onderwyser op Witbank van Reynoparkhoërskool is uitgelok om op ‘n swart ouer oor die telefoon te vloek en haar ‘n “bobbejaan” te noem, waarna die Times-koerant die telefoongesprek woordeliks gepubliseer het, asook die opname op sy YouTube-kanaal geplaas het. Die opname sal verder as “getuienis” teen die onderwyser dien aangesien ‘n klag teen hom by die Suid-Afrikaanse Menseregtekommissie aanhangig gemaak is.

‘n Sersant David Ratau van die polisie op Witbank sê dat die Reynoparkhoërskool vir hulle ‘n “kopseer” is. “Dis asof die kinders oorgegee het en glo wat die onderwysers vir hulle vertel, maak nie saak hoe hard ons hulle probeer aanmoedig en hulle anders probeer wysmaak nie,” sê hy.

Hier is die klankopname wat TimesLive op YouTube versprei:

Volgens Busisiwe Mokoena, wat blykbaar die opname met die onderwyser gemaak het, word haar dogter “fisiek, verbaal en emosioneel by die skool geteister”. Negegtig persent van die leerlinge by Reynopark is egter swart, hoewel die skool op ‘n stadium ‘n blanke skool was en steeds oor blanke onderwysers beskik. Daar word ook beweer en gekla dat die onderwysers lyfstraf toepas en leerlinge “uitvreet”.

Mokoena se dogter sê: “Sekere van die onderwysers noem ons name, soos “kaffer”, teef, slet en bobbejaan – dis so min of meer die norm, en dit is verkeerd. Die hoof se vrou het vir my gesê dat ek nutteloos en waardeloos is, en nooit iets in die lewe gaan word nie.”

Sy het verder teenoor die media gesê dat ‘n manlike klasmaat deur die skoolhoof voor die klas “gewurg is” omdat hy die verkeerde kleurbaadjie aangehad het.

Die swart ouers en leerlinge sou gisteroggend ‘n betoging reël om te eis (“demand”) dat die skoolhoof, sy gade en die hoof van graad 9 verwyder word.

‘n Saak van aanranding is ook verlede jaar teen die skoolhoof, mnr. Wolla Ras, aanhangig gemaak omdat hy na bewering ‘n leerling “geklap” het. Die Witbank-polisie het bevestig dat mnr. Ras verlede jaar in die hof verskyn het, maar die saak teen hom word steeds ondersoek.

Busisiwe Mokoena beskuldig die onderwysdepartement se distriksbestuurder daarvan dat hy die “teistering van leerlinge wegsteek” deur nie op haar griewe van verlede jaar ag te slaan nie.

In ‘n brief aan die onderwysdepartement beskuldig Mokoena die skoolhoof, mnr. Wolla Ras, daarvan dat hy “swart leerlinge beledig en fisiek mishandel”. Die distriksbestuurder het op 26 Mei verlede jaar in ‘n epos ontvangs van dié klagte erken.

‘n Woordvoerder van die onderwysdepartement in Mpumalanga, mnr. Jasper Zwane, het bevestig dat sy departement van die klagte deur Mokoena bewus is. Volgens hom word die beweringe tans ondersoek.

“Ons verwerp voorvalle waarin ouers nie deur skole met die nodige respek behandel word nie. Ons het ook voorvalle waar ouers nie met skole saamwerk nie,” sê Zwane. “Die verhouding tussen ouers en onderwysers behoort een van samewerking te wees, wat opvoeding bestendig.”

Lees ook: Menseregtekommissie op die aanval teen oorblywende blanke skole

Duitse kommer oor grondbesit ongegrond sê ANC

Die minister van Handel en Nywerheid, Rob Davies het op ‘n vraag oor negatiewe opmerkings deur die hoof van die Duitse Sakekamer in Suid-Afrika, gesê hy glo nie die wetsontwerp sal belegging deur Duitse maatskappye beïnvloed nie.

Die Kabinet moet nog besluit of die verbod op buitelandse grondeienaarskap op alle kategorieë van grond van toepassing sal wees, het RSG berig.

Die minister van Toerisme, Derek Hanekom sê in baie lande is daar ‘n onderskeid tussen landbougrond en stedelike grond, en die Kabinet is steeds besig om oor die besonderhede te besluit.

President Jacob Zuma het Donderdag tydens sy Staatsrede die omstrede wetsontwerp oor buitelandse grondeienaarskap bevestig.

Hanekom het bygevoeg dat die wetsontwerp nie die regte van huidige grondeienaars sal raak nie, en dat dit nie as ‘n bedreiging vir buitelandse belegging gesien moet word nie.

Sanef wil hof toe oor selfoonseine in parlement

Die Suid-Afrikaanse Nasionale Redakteursforum, Sanef, wil ‘n regshulpfondsop die been bring om hofsake te maak teen die skending van joernaliste se reg om ondermeer oor parlementêre gebeure te berig.

Dit volg nadat selfoonseine in die Parlement ontwrig is voor President Jacob Zuma se Staatsrede.

Die redakteursforum het die naweek verklaar dat media-maatskappye gaan aansoek doen vir ‘n dringende hofbevel om te keer dat veiligheidsagentskappe kommunikasieseine kan verhinder soos wat glo met die president se staatsrede gebeur het.

Sanef sê dit meng met beriggewing in.

Donderdagaand is die spesiale sitting in die Nasionale Vergadering ook ontwrig deur die EFF.

Sanef sal ook die hof vra om die Parlement te dwing om uitsaai-media toe te laat om hulle eie kameras in die Parlement te installeer.

President Zuma sê dit was onnodig dat hy moes kommentaar lewer op die ontwrigting terwyl hy sy staatsrede gelewer het.

Ontleders het die president daaroor gekritiseer, maar hy sê die EFF se optrede is vooraf bepaal en dat daar niks was om daaroor te sê nie.

Chaos het uitgebreek toe die EFF deur veiligheidsbeamptes verwyder is omdat hulle geweier het om die Nasionale Vergadering te verlaat.

Hulle wou ‘n punt van orde stel oor wanneer die president die geld wat aan sy Nkandla-woning bestee is, gaan terugbetaal.

Swart rowers steel 40 tablette by skool te Hammanskraal

Terwyl die Gautengse onderwysdepartement spog met sy loodsprojek om elektroniese tablette in skole te gebruik, het ses swart rowers reeds op een van die eerste skole met sulke tablette toegeslaan en 40 van hulle gesteel.

Die Steve Biko Secondary School in Hammanskraal het deurgeloop toe die ses gewapende rowers ‘n gemeenskapspatrolliespan Donderdag aangehou en agterna die 40 tablette, selfone, asook kontant by die skool geroof het.

Dit kom skaars ‘n maand nadat die LUR vir opvoeding in die provinsie, Panyaza Lesufi, die tabletprojek geloods het. Die rooftog het ook geskied, ondanks Lesufi se aanspraak dat dit sinneloos sou wees om sodanige tablette te steel aangesien hulle “slegs vir opvoedkundige doeleindes gebruik kan word”.

Lesufi het die “Big Switch On Pilot”-projek in Tembisa, ‘n swart woonbuurt tussen Midrand en Kemptonpark, bekendgestel. By dié geleentheid het Lesufi gesê dat die tablette met gevorderde opsporingstelsels toegerus is wat sou verseker dat hulle “binne 24 uur opgespoor kon word”. Alle hoërskole in Gauteng sou teen 2019 “papierloos” wees.

‘n Woordvoerder van die polisie, sersant Makgotso Mphenyeke, sê die twee patrollielede wat die skool oppas, is deur ses swartmans met vuurwapens aangehou terwyl ander net ná middernag toegang tot die stoorkamer deur ‘n venster verkry het.

“Hulle is met die vuurwapens beveel om na een van die klaskamers te gaan. Toe maak hulle die kluis oop en steel 40 tablette, kontant en selfone wat aan die leerders behoort,” sê sy.

Volgens Mphenyeke moet hulle nog die presiese hoeveelheid gesteelde kontant en die aantal selfone vasstel. Sy weet nie presies hoe die rowers die kluis oopgekry het nie. “Ons ondersoek ‘n voorval van sakeroof aangesien die skool nie ‘n woning is nie. Niemand is nog in hegtenis geneem nie,” sê sy.

Swart “hoofman” eis helfte van Pretoria in grondeis

ʼn Reusegrondeis is in die noorde en ooste van Pretoria ingestel.  Die eis van Victor Lekhulene is reeds op Vrydag 6 Februarie in die Staatskoerant gepubliseer.    Die grondeis betrek nege plase en sluit onder andere in – die gebied vanaf die Cullinan /KwaMhlanga-kruising tot wes van die Zambezi Mall, Derdepoort, Mamelodi, Koedoespoort, Laerskool Die Poort, verskeie kerke, die Derdepark-winkelsentrum, asook die Duitse Skool in die Wilgers.  Groot dele van die oostelike Moot, die Wilgers, Willow Park en Wapandrand is ook deel van die eis. Die Staatskoerant verwys na ongeveer 500 eiendomme in privaatbesit. Daar moet binne 60 dae insette gelewer word om die eis teen te staan.
Daar is Saterdag 14 Februarie ‘n beplanningsvergadering om die eis teen te staan gehou by Kleinhoewe 23, Mountain Drive, Derdepoort. Verteenwoordigers van verskeie Afrikaanse organisasies het die vergadering bygewoon.

Victor Lekhuleni, 48, beskou Pretoria as Ndebele-grond en homself as opperstamhoof van die Mkwaduba van die Bakga­tla ba Lekhuleni-stam. Na bewering is hy en sy stam in die laat vyftigerjare deur die destydse apartheidsregering van die plaas Franspoort, wat bogaande wyke van Pretoria, insluit, verwyder.