Ramaphosa lei Cosatu, Lesotho se krisissamesprekinge

Cosatu se sentrale uitvoerende komitee sal na verwagting vandag samesprekings voortsit oor die toekoms van die metaalwerkersvakbond, Numsa het RSG berig.

Die vakbond is vroeër gevra om te verduidelik waarom hy in die vakverbond moet aanbly. Die ANC se adjunkpresident, Cyril Ramaphosa sê intussen eenheid in Cosatu is noodsaaklik vir die drieparty-alliansie.

Ramaphosa lei `n ANC-taakspan wat Cosatu probeer help om sy interne uitdagings te oorkom. Hy het op `n mediakonferensie in Kaapstad gesê dat 19 COSATU-vakbonde eenheid in die vakverbond wil sien.

Ramaphosa sê al die vakbonde, insluitend NUMSA, moet in COSATU aanbly. Hy sê ook dat die dissplinêre proses teen Cosatu se hoofsekretaris, Zwelinzima Vavi regverdig hanteer moet word.

Die ondersoek hou verband met Vavi se seksuele verhouding met `n junior werker op kantoor. Dit handel ook oor die aankoop van COSATU se nuwe kantore.

Ramaphosa sal ook Donderdag terugkeer na Lesotho.

Hy sal as voorsitter van die Suid-Afrikaanse Ontwikkelingsgemeenskap se afvaardiging poog om die politieke impasse aan te spreek.

Ramaphosa se woordvoerder, Ronnie Mamoepa sê hy sal voortgaan om samesprekings met die politieke rolspelers te voer.

Die SAOG se fasiliteringproses het Koning Letsie die Derde oorreed om verlede week die parlement heropen.

Die SAOG-span bestaan uit amptenare van Botswana, Namibië, Suid-Afrika en Zimbabwe. Amptenare van ander SAOG-lande sal na verwagting by hulle aansluit.

Derde ongeluk vir vragmotorbestuurder wat chaos saai

Dit is die derde keer dat die swart vragmotorbestuurder wat verlede week verwoesting by Alberton gesaai het, vir strafbare manslag aangekla word.

Isaac Maruding het verlede week tussen 48 motors op die N12 by Alberton ingejaag en vier mense se dood veroorsaak.

Maruding (44) het Woensdag in die Palm Ridge-landdroshof aan die Oos-Rand om borgtog aansoek gedoen. Hy ontken skuld op vier aanklagte van strafbare manslag en roekelose of nalatige bestuur.

Maruding is in 1996 van strafbare manslag aangekla nadat hy ook in ’n ongeluk betrokke was, maar dit is later teruggetrek, het Media24 berig.

In 1997 is hy na nóg ’n ongeluk weer van strafbare manslag aangekla. Hy is skuldig bevind en het ’n vonnis van 18 maande uitgedien.

Hy is toe ook op aanklagte van roekelose of nalatige bestuur skuldig bevind, maar het ’n opgeskorte vonnis van vyf jaar tronkstraf gekry. Sy rybewys is ook vir 12 maande opgeskort.

Sewe mense is nog in ’n kritieke toestand en nog 19 is beseer. Die polisie het Maruding eers ’n dag ná die ongeluk in Potchefstroom aangekeer.

Maruding het van die ongelukstoneel gevlug en daarna gelieg deur te beweer verkeersbeampte het hom toestemming gegee om die toneel te verlaat.

Hy het Potchefstroom toe gevlug en nie sy werkgewer of die polisie oor die ongeluk ingelig nie.

Die eienaar van die Benusi-vervoermaatskappy, het gesê hulle was nie bewus van Maruding se vorige oortredings toe hy aangestel is nie.

Die verhoor is tot 27 Oktober uitgestel.

Katolieke in Afrika eis transformasie

Die Rooms Katolieke Kerk gaan nie transformasiedruk vryspring nie, veral omdat die kerk se lidmate in Afrika groei.

Leiers van die kerk meen uitdagings van gelowiges in Afrika word nie behoorlik aangespreek nie.

Die byeenkoms van kerkleiers en akademici by die St Augustine-kollege van Suid-Afrika in Johannesburg volg nadat Pous Franciskus twee weke met die 200 Katolieke biskoppe in die Vatikaanstad vergader het.

Dokter Jakub Urbaniak van die teologie-afdeling by die kollege sê Afrika het die vinnigste groeiende aantal lidmate van die kerk, maar min aandag word ongelukkig volgens hom aan Afrika se probleme gewy.

Urbaniak sê vir Afrika is kwessies soos hoe MIV/Vigs gesinne raak, enkelouers en families wat deur kinders versorg word, belangriker as dié wat wel bespreek is.

‘n Professor van die departement van kerkgeskiedenis by die Universiteit van Pretoria, Graham Ducan sê die kerk het nie met planne vorendag gekom om die kerk te transformeer nie.

Swart boere waarsku minister, Absa prys grondbeleid

Swart boere het gevra dat grond slegs toegewys word aan nuwe swart boere wat die vermoë het om dit te gebruik.

Die president van die swart boerevereniging, Mzamo Mlengana, sê die minister van Grondhervorming, Gugile Nkwinti, moet sorg dat maatstawwe in plek is vir die keuring van nuwe boere.

Mlengana sê sonder boerderykennis, strek só ‘n grondbegunstigde tot nadeel van die landbou en skep dit die indruk dat swart boere nie kan boer nie.

Mlengana sê ‘n goeddeurdagte grondherverdelingsproses sal voedselsekuriteit verseker en tot voordeel van die land wees.

Die “hand van vriendskap en samewerking deur mnr. Gugile Nkwinti is dié geleentheid van ‘n leeftyd vir die landbou”, sê mnr. Ernst Janovsky, hoof van Absa AgriBesigheid.

Janovsky het Nkwinti, Minister van Landelike Ontwikkeling en Grondhervorming, by Agri SA se kongres geprys.

Hy het by die kongresdinee gesê die “oorlog” is verby. “’n Wit vlag is gehys wat sê kom ons werk saam en hierdie samewerking moet vir ons die pad vorentoe baan. Ek wil elkeen uitdaag om dit môre op jul plase te begin toepas.”

Hy het verwys na Nkwinti se opmerkings dat hy in sy skik is met die vordering wat Agri SA met hervormingsplanne maak. Hy het gesê hy is verleë dat hy nie daarvan bewus was nie.

Janovsky sê banke kan baat by grondhervorming en meer winsgewend wees. “Hierdie moet nie ’n meulsteun om jou nek wees nie. Hierdie is die geleentheid waarvoor almal gewag het. As jy kyk na hoeveel kos in die volgende 40 of 50 jaar geproduseer moet word, is hierdie die grootste enkele geleentheid wat nog binne Suid-Afrikaanse landbou bestaan het.

“Die Minister het gesê die planne het verander en júlle planne lyk beter as myne. Dit is ’n groot verandering. Moet nie daardie geleentheid laat verbygaan nie, al gaan dit nie maanskyn en rose wees nie. Daar is staatsdepartemente wat nog nie ingekoop het by dit wat gebeur het nie. Van die banke se kant af sal ons julle help bemagtig om die pad vorentoe te stap.”

Janovsky het boere gemaan om nie geleentheid te laat verbygaan nie: “Moet nie dat dit by julle verbygaan of toelaat dat klein jakkalsies die skape opvreet nie. Dit is ’n geleentheid om aan te gryp.”

Swartvlek-kwessie oor SA sitrus na WHO

Die krisis wat die EU oor swartvlek by SA se sitrus veroorsaak het, is op hoë vlak met die WHO opgeneem.

Sitrusboere het die stap van die Departement van Handel en Nywerheid verwelkom om die swartvlekkwessie na die Wêreldhandelsorganisasie (WHO) te neem, maar gesê ander EU-kanale moet ook oop bly.

Mnr. Rob Davies, Minister van Handel en Nywerheid, het die kwessie met die sanitêre en fitosanitêre komitee van die WHO opgeneem omdat die Europese Unie dreig om te weier dat sitrusvrugte uit Suid-Afrika die gebied binnekom omdat hulle glo bang is dat die siekte na boorde in die gebied oorgedra kan word.

Davies meen dat die EU se standpunt daarop gemik is om sy lidlande te beskerm deur hoogs mededingende sitrus uit Suid-Afrika te beperk, eerder as wat die unie oor plantgesondheid besorg is.

Hy sê wetenskaplike kennis ondersteun nie die EU se aantyging dat swartvleksiekte Europese boorde kan besmet nie. Volgens hom het die EU ‘n voorstel van Suid-Afrika om die EU in verskillende sones te verdeel en strenger regulasies in te stel vir sitrus wat na sitrusproduserende gebiede in die suide van Europa uitgevoer word, geïgnoreer.

Mnr. Pieter Nortjé, voorsitter van die sitrusprodusentevereniging (CGA), sê hulle verwelkom die stap, maar meen dat die aangeleentheid dalk uitgeklaar kan word vóórdat dit na die WHO gaan. “Daar is reeds gunstige verwikkelinge deurdat Europa ‘n onafhanklike paneel van kundiges saamgeroep het om die feite oor swartvlek om ‘n tafel te bespreek. Indien dit in ons guns afloop, sal die saak nié voor ‘n paneel van die WHO hoef te dien nie.”

Hy glo dat die deurlopende inligting wat hulle aan die Departement van Handel en Nywerheid deurgegee het, verseker het dat die minister baie goed ingelig is oor die aangeleentheid.

Nortjé sê gevestigde en nuwe sitrusprodusente is onder geweldige finansiële, operasionele en administratiewe druk om simptoomvrye vrugte te lewer. “Die sitrusbedryf se koste uit eie sak was vanjaar byna R1 miljard. Die Departement van Landbou, Bosbou en Visserye is onder net soveel druk om die proses te administreer.”

Tog is dit nie net slegte nuus nie. “Die goeie wat hieruit ontstaan het, is dat die sitrusbedryf en Departement van Landbou mekaar gevind en bygestaan het sodat ons nou net ‘n sterker uitvoerder gaan word.”

Bron: landbou.com

Poskantoorwerkers aangeval, petrolbomme gegooi

Drie personeellede wat by die Poskantoor werksaam is, is Dinsdag in Krugersdorp aangeval.

“Die drie persone het by die possentrum gewerk toe hulle met klippe bestook is,” het kapt. Appel Ernst, woordvoerder van die polisie in Gauteng, gesê. “Hulle het geringe beserings opgedoen.”

Drie vragmotors van die Poskantoor en ander privaat motors is ook beskadig. “Niemand is nog in verband met die voorval in hegtenis geneem nie,” het Ernst gesê.

Intussen het die Poskantoor bevestig dat die Belle Ombre- en Atteridgeville-poskantore gesluit is nadat petrolbomaanvalle twee geboue beskadig het.

Maandag het die Belle Ombre-poskantoor en Dinsdag het Atteridgeville deurgeloop. Die skade is glo gering.

“Die polisie volg alle leidrade en ondersoek tans kringtelevisiebeeldmateriaal om die verdagtes uit te ken,” het die Poskantoor in ʼn verklaring gesê.

“Nie een van die werknemers is beseer nie, maar traumaberading is vir die kassiere by die takke gereël,” lui die verklaring. Die aanvallers wat die petrolbomme gegooi het, het hulself glo geïdentifiseer as stakende werkers.

Geen posstukke is beskadig nie.

“ER24-paramedici en die Tshwane-brandweer het baie vinnig reageer op die voorvalle,” het die Poskantoor gesê.

Permanente Poskantoor-werknemers staak oor ʼn salarisverhoging van 15% en tydelike werknemers eis permanente aanstellings.

Britse koerant suig Zuma-kritiek teen Oscar uit hul duim

Die Britse koerant, The Guardian, het dié week voorgegee dat hulle ‘n eksklusiewe onderhoud met president Jacob Zuma gevoer het, maar dit blyk ‘n versinsel te wees.

Die president het glo nie enige onderhoud toegestaan aan die koerant in verband met die Oscar Pistorius-verhoor of enige ander kwessie nie.

“‘n Joernalis van die Guardian het die indruk geskep dat hy die afgelope week ʼn eksklusiewe onderhoud met die president gevoer het oor die Pistorius-saak,” het Mac Maharaj, woordvoerder van die presidensie, in ʼn verklaring gesê.

Maharaj sê die verslaggewer het oor ‘n byeenkoms betreffende mediavryheid tydens ʼn informele netwerksessie wat Sondag gehou is, berig.

Die Guardian het voorgegee dat Zuma Oscar se regspan gekritiseer het nadat hulle aangevoer het dat hul kliënt Pistorius nie tronkstraf behoort te kry nie omdat hy gestremd is en “baie geld het”.

Pistorius se prokureurs het ter versagting getuienis gebring oor Suid-Afrikaanse tronke wat nie behoorlik na gestremde mense kan omsien nie omdat die storte byvoorbeeld nie handrelings het nie.

Die Paralimpiese atleet het intussen sy eerste nag in sy sel in die hospitaalvleuel van die Kgosi Mampuru-gevangenis in Pretoria deurgebring.

Hy is gister tot vyf jaar tronkstraf gevonnis nadat hy skuldig bevind is aan strafbare manslag.

In die hospitaalvleuel is daar 24 uur permanente toesig en twee verpleegsters voltyds aan diens.

Die gevangenis se kommissaris, Zebilon Monama, sê hy is deur ‘n kapelaan en ‘n sielkundige besoek. Monama sê Pistorius is in ‘n enkelsel geplaas weens sy kwesbaarheid.

‘n Woordvoerder van Korrektiewe Dienste, Manelisi Wolela, sê Pistorius word saam met nog agt gestremde oortreders aangehou.

Die Departement van Korrektiewe Dienste sê intussen geen spesiale maatreëls sal getref word om Pistorius se veiligheid in die tronk te verseker nie.

Dit volg na vroeëre beweerde doodsdreigemente van bendelede in die tronk.

Vyf jaar vir Oscar Pistorius

Die paralimpiese atleet, Oscar Pistorius, is vir vyf jaar tronk toe gestuur.

Hy het Dinsdag sy vonnis gehoor nadat hy vroeër skuldig bevind is aan strafbare manslag na die skietdood van sy vriendin.

Regter Thokozile Mazipa het Pistorius tot vyf jaar tronkstraf gevonnis vir die dood van Reeva Steenkamp op 14 Februarie 2014.

Hy is voorts tot drie jaar tronkstraf, opgeskort vir vyf jaar gevonnis vir die oortreding van die wapenwet. Die vonnisse sal gelyklopend uitgedien word.

Die vonnisoplegging het meer as ‘n uur geduur.

Regter Masipa het die verskillende vonnis-moontlikhede oorweeg en ‘n uiteensetting gegee.

Die belange van die gemeenskap, die erns van die misdaad en die persoonlike omstandighede van Pistorius is volgens die regter in aanmerking geneem.

Pistorius sal waarskynlik tien maande gevangenisstraf in die Kgosi Mampuru gevangenis in Pretoria uitdien voordat hy vir parool in aanmerking kom.

Volgens Artikel 276 van die Strafproseswet, kan ‘n sesde van ‘n gevangenistermyn omgeskakel word huisarres as die vonnis nie meer as vyf jaar is nie.

Regter Masipa het met haar vonnisoplegging gesê ‘n opgeskorte vonnis of korrektiewe toesig sou nie ‘n gepaste vonnis wees nie.

Die Nasionale Vervolgingsgesag sê intussen die NVG het nog nie besluit of hy gaan appelleer teen Pistorius se skuldigbevinding aan strafbare manslag nie.

Die regsverteenwoordiger van die Steenkamp-gesin, Dup de Bruyn het na die vonnisoplegging gesê die reg het geseëvier en die regte vonnis is opgelê.

Pistorius is na die hofverrigtinge in ‘n gepantserde voertuig na die gevangenis geneem.

Die atleet se loopbaan is waarskynlik verby aangesien hy nie toegelaat sal word om aan die 2016 Paralimpiese Spele deel te neem nie, selfs al word hy vroeër uit die tronk vrygelaat.

Die Internasionale Paralimpiese Komitee sê hy sal verbied word om aan enige van hulle byeenkomste deel te neem vir die volle vyf jaar wat sy vonnis is.

Die verbod sal steeds geld selfs al word hy vroeër vrygelaat onder huisarres of op volle parool.

Ryk sakeman van Johannesburg in hof oor gesteelde koperkabels

‘n Johannesburgse sakeman, wat in ‘n huis van R10m in die spogwoonbuurt Atholl woon, het gister in die Roodepoortse Landdroshof verskyn op aanklag van gesteelde koperkabels. Hy word saam met vier medepligtiges aangekla.

Na bewering het die sakeman gesteelde koperkabels by sy skrootwerf aangekoop. Hy word daarvan verdink dat hy aan die hoof staan van ‘n hele sindikaat wat koperkabels steel.koperkabelsHy besit ‘n skrootwerf in Roodepoort aan die Wes-Rand waar hy saam met die vier ander aangeklaagdes in hegtenis geneem is. Hy het gepoog om die polisiebeamptes met ‘n bedrag van R30 000 om te koop, maar die beamptes het geweier om dit te aanvaar en hom aangekeer.

Volgens sekere bronne is die gesteelde koperkabels verwant aan die waterskaarste wat Johannesburg verlede maand getref het. Inwoners was omtrent drie weke sonder water ná ‘n kragonderbreking weens kabeldiefstal en vandalisme by ‘n groot pompstasie.

Moontlike einde vir poskantoorstaking?

Gisteraand was Suid-Afrika veronderstel om te hoor of die Poskantoorstaking gaan eindig, maar daar is nog geen nuus oor die moontlike ooreenkoms wat die minister van telekommunisie en poswese, Siyabonga Cwele, aan die bestuur en stakende werkers sou voorlê nie. Blykbaar word die uitvoerende bestuur in briewe gevra om te bedank aangesien hulle vir die langdurige staking geblameer word.

SA Post Office
‘Ons lewer af, wat dit ook al verg’: die Poskantoor se ironiese leuse

Daarmee saam is daar sprake van wanbestuur, waaronder bewerings van bedrog en nepotisme, wat die getransformeerde poskantoor reeds jare lank teister. Tot vandeesweek het vakbonde gekla dat die bestuur nie met hulle wil onderhandel nie; vandaar die staking wat deur die grootste van drie organisasies, die Kommunikasiewerkersvakbond, uitgeroep is.

Dit was dieselfde vakbond wat drie jaar gelede versoek het dat die openbare beskermer ‘n ondersoek doen na beweerde wanbestuur, bedrog en nepotisme by die SAPK wat tot R2,1 miljard kan bedra. Dit het gekom ná jare van klagtes dat die bestuur personeel deur verwante of “vriendelike” arbeidsmakelaars huur, teen salarisse wat hoër is as dié van permanente personeel.

Weens ‘n gebrek aan kapasiteit, is die openbare beskermer se ondersoek egter gesubkontrakteer na ‘n buite-instelling en toe dit voorgelê is, het “die standaard van die ondersoek veel te wense oorgelaat”. “Ons sukkel al lank hiermee,” sê die Kommunikasiewerkersvakbond se algemene sekretaris, Aubrey Tshabalala. Die vakbond wil hê dat strafregtelike klagtes teen die bestuur ingestel moet word indien die verslag die vakbond se besware sou staaf.

Die Kommunikasiewerkersvakbond word hierin deur die Suid-Afrikaanse Poswerkersvakbond gesteun. Dié vakbond se werkers neem nie aan die staking deel nie, maar ondersteun eersgenoemde se aantygings dat die SAPK vrot van die vermorsing, wanbestuur en waarskynlike bedrog is.

Vanweë ‘n gebrek aan finansiële middele, waarvoor Tshabalala “geheel en al die bestuur verantwoordelik hou”, word die loonaanbod aan die SAPK-werkers blykbaar vanjaar tot 6,5% beperk. Daar is egter ‘n belofte van ‘n verdere verhoging teen Januarie, “indien sake sou stabiliseer”.

‘n Kwessie waaroor die vakbonde reeds koning kraai, is die verbod op arbeidsmakelaars om voortaan langtermynwerkers aan die poskantoor te lewer.

Sien ook: Stakende poswerkers saai verwoesting (foto’s)