Nuus Archives - Page 506 of 1583

Irak koop glo wapens van Iran teen al Kaida-terreur

Die VSA het ‘n verklaring van die Irakse regering geëis na mediaberigte dat die land ingestem het om wapens ter waarde van $195 miljoen van Iran te koop.

So ‘n ooreenkoms sal die wapenboikot wat deur die VN ingestel is, oortree.

Die ooreenkoms is bereik aan die einde van November, volgens dokumente wat Reuters glo gesien het.

Kort voor die transaksie onderteken is, was die Irakse premier Nouri al-Maliki in Washington om hulp te vra om op te tree teen al-Kaida-terroriste.

‘n Woordvoerder van die Irakse eerste minister wou nie die verkope bevestig of ontken nie, maar het gesê dat so ‘n ooreenkoms te verstane sal wees gegewe Irak se huidige veiligheidskrisis.

“Ons het begin met ‘n oorlog teen terrorisme en ons wil hierdie oorlog wen. Niks verhoed ons om wapens en ammunisie van enige party te koop nie en dit is net ammunisie om ons te help om terroriste te beveg,” het die woordvoerder, Ali Mussawi gesê.

Die regering van Iran ontken enige kennis van ‘n ooreenkoms om wapens aan Irak te verkoop.

Dit sal die eerste amptelike wapentransaksie tussen Sjiïtiese Iran en Irak se Sjiïtiese regering wees.

Dié transaksie sal, indien bevestig, die groeiende band tussen die twee groepe aandui in die twee jaar sedert die vertrek van Amerikaanse troepe uit Irak.

‘n Woordvoerder van die Amerikaanse departement van Buitelandse Sake sê indien die berigte waar is, is dit kommerwekkend.

“Enige oordrag van wapens van Iran na ‘n derde land is ‘n direkte skending van resolusie 1747,” het die Amerikaanse woordvoerder vir buitelandse aangeleenthede, Jan Psaki, gesê.

‘n Amerikaanse amptenaar het gesê so ‘n transaksie kan Washington se benadering tot onderhandeling oor Iran om internasionale sanksies oor sy kernprogram op te hef, verder bemoeilik.

Swart studente in Oos-Kaap ontwrig klasse oor NSFAS-beurse

Klasse by al drie kampusse van die Midlands Kollege in die Oos-Kaap is ontwrig nadat meer as 1.300 studente Maandagaand uit die koshuise gesit is.

Die studente is uitgejaag weens onvoldoende befondsing deur die nasionale studentehulpskema, die NSFAS.

Studente van die Grahamstad-kampus is blykbaar omstreeks middernag aangesê om hulle koshuise te ontruim.

Die kampusbestuur het gesê het die skema sal nie hulle verblyf en reiskoste betaal nie.

Die kampusse by Uitenhage en Graaff-Reinet word ook daardeur geraak.

Skooldogter deur drie boelies doodgeslaan

Die Gautengse Departement van Onderwys het met ‘n ondersoek na die dood van ‘n agt jarige meisie by ‘n laerskool in Soweto begin.

“Hierdie saak het net gister [Maandag] onder ons aandag gekom,” het Phumla Sekhonyane, woordvoerder gesê.

Die kind is na bewering op 14 Februarie deur drie boelies geskop en geslaan.

Lebohang Makala was mank met haar tuiskoms en haar bene was geswel.

Sy het aan haar ma gesê dat die seuns haar sonder rede aangerand het terwyl sy met ander kinders gespeel het.

Daar was blykbaar nie onderwysers by die Batsogile laerskool toe die voorval gebeur het nie.

Haar ouers het haar na die hospitaal geneem waarna sy weens inwendige bloeding beswyk het.

‘n Saak is gister by die polisie aangemeld. Die departement sê hulle doen ‘n onafhanklike ondersoek na die omstandighede rondom die voorval.

Wapentransaksie: Fluitjieblaser kan onthullend wees

Die Seritikommissie van Ondersoek na die Wapentransaksie van 1999 is ‘n week lank uitgestel, het RSG berig.

Dit volg nadat getuienisleiers gesukkel het om dokumente in besit van ‘n wapenhandelaar, Richard Young, in die hande te kry.

Young is die fluitjieblaser wat die aanklagte van korrupsie in 2009 by die Valke ingedien het. Young het vermoedelik 15.000 dokumente in sy besit wat die kommissie en van die getuies in die verleentheid kan stel.

Die kommissie het ‘n bevel uitgereik waarvolgens Young verplig word om van die belangrikste dokumente beskikbaar te stel.

Die openbare verhore word Maandag hervat.

Zille se geloofwaardigheid duik in die plaashek

Swart huurlinge werk nie meer nie... — Swart huurlinge werk nie meer nie…

Die DA probeer naarstiglik vure doodslaan nadat die party se steun vir die heropening van grondeise vir ’n tydperk van vyf jaar konsternasie onder grondeienaars veroorsaak het en hul leier se geloofwaardigheid onherstelbaar aangetas het.

Daar bestaan nou die sterk vermoede dat AgriSA-lede in die DA gekoöpteer is om boere te paai as die ANC voortgaan met grondgryp, aangesien Helen Zille se jongste verklarings oor die aangeleentheid in ‘n onsamehangende gebrabbel ontaard het.

Zille, die DA-leier, het haar steun vir die heropening van restitusie tydens die bekendstelling van die DA se verkiesingsmanifes die afgelope naweek bevestig, maar het Maandag ontken dat dit binne die DA bespreek is.

Die DA-LP en woordvoerder oor grondsake, Kevin Mileham, het weke gelede, op 7 Februarie reeds, in ’n verklaring die heropening van grondeise geprys.

Die DA het verlede week in die parlement tydens die stemmery oor aspekte van die wet, saam het die ANC daarvóór gestem!

Zille probeer tans verwoed terugkrabbel nadat sy uit twee monde gepraat het en sê haar party se parlementêre leierskap het nie die “reëls” nagekom in hul verklarings oor die Wysigingswetsontwerp oor die Herstel van Grondregte nie.

DA-lede was stom verbaas oor die leier se geskel tydens die drie uur lange buitengewone koukusvergadering waar sy oor die gewraakte verklaring deur die party se aangewese woordvoerder vir grondsake te kere gegaan het.

Terwyl Zille vroeër die heropening van grondeise gesteun het, beweer sy nou dat verklarings sonder haar medewete uitgestuur is en dat die DA “nog geen beleidstandpunt oor grondeise geformuleer het nie”.

As dit waar is, is dit uiters kommerwekkend dat die party nog nie een van die belangrikste kwessies vir hul kiesers oorweeg het nie, maar dat sy dit in haar verkiesingsmanifes vir 2014 die afgelope naweek nogtans as een van die sleutelkwessies genoem het.

Zille se onsamehangende uitbarsting oor die wysigingswetsontwerp is soortgelyk aan die herrie wat oor die Wetsontwerp op Billike Indiensneming losgebars het.

Die DA het verlede jaar die wetsontwerp met oorgawe gesteun, maar skielik daarna allerlei stertjies aangelas om die skade te probeer beperk nadat fel kritiek daaroor ontvang is.

Grondrestitusie het daartoe gelei dat 90% van landbougrond wat oorgedra is, nie meer produktief aangewend word nie en braak en vervalle lê.

Om grondeise te heropen sal onproduktiwiteit in die sektor vergerger en dít teen ‘n enorme koste vir die staat.

Daar is geen logika in die proses nie behalwe om Suid-Afrika se voedselsekerheid te knou en noodsaaklike landbougrond uit te lewer aan roofkapitaliste teen belaglike lae pryse, en om stemvee na die DA te lok wat uiteidelik ‘n ANC-beleid nastreef.

Ontleders meen dit is nou duidelik dat die party ‘n buitelandse agenda het wat daarop gemik is om landbou te vernietig en chaos te saai, maar dié doelwit moet vir wit stemvee gekamoefleer word.

Die DA se buitelandse weldoener is tydens die samemeltingsfiasko met AgangSA ontbloot. Swart kiesers het die DA daarvan beskuldig dat hulle swart huurlinge ( Black rentals) vir vertoon aanhou.

Syfers van die departement van landelike ontwikkeling en grondhervorming toon dat daar tot 397 000 nuwe eise kan wees wat die regering R179 miljard kan kos.

Dekaan van Stellenbosch ontvoer en aangerand

Prof. Mohammad Karaan (46), dekaan van Agriwetenskap aan die Universiteit Stellenbosch is voor sy woonhuis gekaap en na die swart woonbuurt, Khayelitsha ontvoer.

Daar is hy deur sy ontvoerders beroof en aangerand.

Die inligting is bekend gemaak deur kapt. Frederick van Wyk, ’n polisiewoordvoerder in die Wes-Kaap.

Karaan se kaper het hom in die oprit voor sy huis beveel om agter in die voertuig te klim, en hy het gesien drie mans sit in ’n ander voertuig reg agter sy eie.

Die drie mans het met hom na die swart woonbuurt gery, sy persoonlike besittings gevat en hom in ’n plakkershut aangehou.

Terwyl die kapers in ’n woordewisseling was met mekaar, kon hy ongemerk wegraak en kontak maak met ’n polisiebeampte wat op patrollie was.

Die polisiebeampte het hom opgelaai en na veiligheid geneem

Een van die drie verdagtes is in hegtenis geneem, maar die ander twee word nog gesoek.

Dit is nog onduidelik waarom Karaan ontvoer is. – Die Vryburger

Chevron se vliegtuigbrandstoftekort veroorsaak vertragings

Vlugte van die Kaapstadse Internasionale Lughawe is Maandag vertraag as gevolg van ‘n tekort aan brandstof.

‘n Woordvoerder van ACSA, Deidre Davids, sê vlugte van Comair het vertragings ondervind nadat die brandstofverskaffer nie aan die vraag kon voldoen nie.

Vlugte by die Kaapstadse Internasionale Lughawe wat weens die brandstoftekort is, is lugrederye wat deel is van Comair, is Kulula en British Airways.

Die Lughawensmaatskappy van Suid-Afrika het die verskaffer van vliegtuigbrandstof, Chevron, gevra om sy gekontrakteerde brandstofverpligtinge aan lughawens na te kom.

“Ander vlugte het voortgegaan om normaal te funksioneer,” het Davids gesê. “Daar is nogtans kommer oor brandstof-uitdagings op ‘n raffinaderyvlak.”

Sy sê die rederye behoort ‘n minimum van minstens drie dae se brandstofvoorraad te handhaaf.

Dit is nie duidelik hoe lank die vlugte vertraag is nie.

Suzanne Pullinger, Chevron se woordvoerder was nie beskikbaar vir kommentaar nie.

Kieserregistrasie sluit vandag

Stemgeregtigde kiesers het nog tot vanmiddag tyd om te registreer om in die algemene verkiesing op 7 Mei te stem.

President Jacob Zuma het Vrydag aangekondig dat hy en die nege provinsiale premiers die nasionale en provinsiale verkiesing vandag sal proklameer.

Die hoofverkiesingsbeampte van die Onafhanklike Verkiesingskommissie, Mosotho Moepya, sê die OVK sal bykomende personeel by plaaslike kantore ontplooi.

Hulle sal toesien dat alle stemgeregtigde kiesers wat vanmiddag om vyfuur in die tou is, kans kry om te registreer.

Pan-Suid-Afrikaanse Taalraad skuld Ontvanger miljoene

Die Pan-Suid-Afrikaanse Taalraad skuld die Ontvanger van Inkomste R3.3 miljoen, hoofsaaklik aan lopende belasting (LBS) afgetrek van salarisse maar wat nie betaal is nie.

Die Taalraad wat veronderstel is om die gebruik van alle Suid-Afrikaanse amptelike tale te bevorder, skuld sy verskaffers meer as R13 miljoen.

Die Raad het ‘n verdoemende ouditverslag ontvang en sukkel om 137 krediteure te betaal.

Gegriefde personeellede wil die Arbeidshof nader om die aanstelling van waarnemende uitvoerende hoof Mxolisi Zwane onwettige te laat verklaar asook sy aanstelling van 44 senior bestuurders ter syde te stel.

Sommige bestuurders het hul vaste-termyn kontrakte omskep in permanente poste. Dit is in stryd met openbaresektordiensregulasies vir senior aanstellings in staatsdepartemente en -instellings wat bepaal dat sulke aanstellings slegs vir vyf jaar geld en na gelang van prestasie oorweeg moet word.

Personeel vrees nou dat die SAID die geld verskuldig van hulle persoonlik sal eis.

In die hof het die werknemers aangevoer dat Zwane sy trawante in poste wat nie bestaan nie of gedupliseerde poste aangestel het, en dat die raad nie sy opgeblase salarisrekening kan bekostig nie.

Telefoondienste is reeds afgesny in Oktober 2013 as gevolg van wanbetaling, en die nasionale leksikografie-eenhede het nie hul volle toekennings ontvang nie.

Die Taalraad het ‘n gekwalifiseerde oudit vir die 2012-2013 finansiële jaar ontvang. Die Ouditeur-generaal het bevind dat daar vir ongeveer R21 miljoen nie verantwoording gedoen kan word nie en dat sy laste sy bates met R5 miljoen oorskry.

Zille belowe BSEB, grondhervorming en verhoogde toelaes

Die DA het Sondag sy ondersteuners die versekering gegee dat die party nie hul swart rassebeleid sal laat vaar nie.

Tydens die bekendstelling van hul verkiesingsmanifes in Polokwane het die DA-leier, Helen Zille gesê hulle ondersteun Breë Swart Ekonomiese Bemagtiging (BSEB) ten volle omdat die apartheidsregering miljoene swartes toegang tot ekonomiese geleenthede ontneem het en dat die nalatenskap voortduur.

Daarme het die DA alle bespiegelinge oor verdeeldheid binne die party oor BSEB te ruste gelê.

Sy het gewaarsku dat BSEB-geleenthede vir alle swartes moet oop wees en nie net ‘n paar met politieke konneksies nie.

Zille het gesê hulle sal nie wegdoen met maatskaplike toelaes nie en dit selfs verhoog met aansporingstoelaes.

Sy het gesê 80% van die R2 miljard tenderbegroting van die Wes-Kaap is aan swart ondernemings in die vorige finansiële jaar toegeken.

Zille het oor die grondkwessie gesê haar party is verbind tot grondhervorming en sal R10 miljard belê om die grondhervormingsproses te versnel.

Zille, wat tesame met parlementêre leier Lindiwe Mazibuko en ander uitvoerende raadslede van die party, reeds twee jaar lank herhaaldelik in die openbaar verklaar dat die DA 30% van die stemme sal inoes, het vroeër in ‘n twiet teruggekrabbel en gesê dit is nie meer ‘n doelwit nie.