Nuus Archives - Page 465 of 1583

Gill Marcus probeer walgooi teen negatiewe gradering

Die president van die Reserwebank, Gill Marcus, het gewaarsku dat die land self verantwoordelik is vir sy ekonomiese probleme.

Die Financial Times het Marcus geprys dat sy “eerlik” oor die ekonomiese malaise is wat Afrika se mees ontwikkelde land teister.

Fitch en Standard&Poor’s sal waarskynlik Suid-Afrika se kredietgradering Vrydag vrystel. S&P het reeds Suid-Afrika op ‘n negatiewe uitkyk geplaas en met nog negatiewe nuus skyn die risiko van ‘n afgradering ‘n nuwe bekommernis te wees vir Marcus.

Marcus het tydens ‘n sake-ontbyt erken dat “die plaaslike ekonomie enorme wind van voor gekry het, waarvan baie ons eie maaksel is.”

Dit was die ergste prestasie sedert die 2009-resessie weens die staking in die platinum-sektor, ‘n sleutel in die mynbedryf.

Marcus het gesê Suid-Afrika se uitvoersyfers sal benadeel word indien die staking in die platinumsektor voortduur.

Sy het in Johannesburg gesê die staking het reeds ‘n negatiewe invloed op ekonomiese groei gehad, maar het nog nie ‘n invloed op uitvoerdata gehad nie omdat mynhuise aansienlike platinumreserwes het.

Sy het egter gesê die voorraad word nou uitgeput en hoe langer die staking duur, hoe gouer gaan die nadelige uitwerking op uitvoere gevoel word.

Die platinumgordel het tot dusver 21 miljard rand aan verdienste verloor terwyl werkers lone van meer as nege miljard rand ingeboet het.

Rustenburg se ekonomie het feitlik tot ‘n stilstand gekom agv die staking.

Nhlanhla Nene, die nuwe minister van finansies, het aan die Financial Times gesê dat die groei vir die jaar sowat 2 persent op sy beste sal wees. Dit is ver onder die groei wat nodig is om ‘n duik te maak in werkloosheid en armoede.

Intussen het die Bapo Ba Mogale-gemeenskap buite Brits in Noordwes ‘n dringende aansoek in die Noordwes Hooggeregshof in Mahikeng ingedien om die platinum-staking te beëindig.

Die gemeenskap het die hof gevra om die drie platinum-maatskappye en die vakbond, Amcu te dwing om ‘n skikking te bereik.

Volgens die gemeenskap raak die staking die gemeenskap sowel as die myne.

Die Bapo Ba Mogale besit die dele van die grond waarop Lonmin platinum produseer.

‘n Woordvoerder sê die hof moet ‘n interdik uitreik wat die betrokke partye sal dwing om ‘n einde aan die staking te maak.

‘Mantashe ‘n rassis met xenofobiese kaart’

Die Sweedse adjunk-sekretaris-generaal van die Werkers Sosialistiese Party (WASP) in Suid-Afrika, Liv Shange het in ‘n verklaring te velde getrek teen die African National Congress-regering en die kapitalistiese ekonomie.

Sy het ANC-swaargewig Gwede Mantashe uitgekryt vir ‘n “rassis” wat ‘n “xenofobiese kaart” speel deur voor te stel dat wit buitelanders ophou inmeng in die platinummynbou-staking.

“Ons veroordeel hierdie poging deur die ANC om weer ‘n rassistiese, xenofobiese kaart te speel,” het WASP gesê.

Mantashe, ANC-sekretaris-generaal, het aan verslaggewers in Johannesburg gesuggereer dat die platinum-staking ‘n politieke oogmerk het.

“Die artikulasie van Amcu se posisie deur wit buitelanders dui op die belang van buitelandse magte in die destabilisering van ons ekonomie,” het hy gesê.

Shange het teen Mantashe uitgevaar: “Natuurlik is die voortslepende platinumstaking politiek, vir beide werkgewers en werknemers, in die sin dat dit ‘n mededinging om mag is oor die rykdom van die samelewing.

In Junie verlede jaar, het die Independent Online Mantashe aangehaal: “Wat gebeur het in Marikana … ek kan weergee wat uit daardie inligting kom: Anargie, anargie, anargie gedryf deur mense wat van ver af is, Swede, Ierland.” het Mantashe gesê.

“Die werklikheid is dat dit ‘n Sweedse burger is wat in die middel van anargie in die platinum-gordel staan. Ek suig dit nie uit my duim nie.”

Geskil tussen Marine Le Pen en haar pa oor anti-Joodse grappie

Marine Le Pen, die leidster van die Front National, wat sedert onlangs as Europa se mees suksesvolle regse party gesien word, het haar vader, Jean-Marie, in die openbaar gekritiseer oor ‘n opmerkinig wat hy Vrydagaand 6 Junie oor die Joodse sanger en akteur Patrick Bruel gemaak het. Sy het dié opmerking as ‘n “politieke fout” beskryf wat kwaadwillig deur die Front National se vyande aangegryp sal word.

Le Pen vader is reeds deur ‘n horde Joodse en antirassistiese organisasies in Frankryk oor die kole gehaal oor sy opmerking in ‘n internetvideo waarin hy kommentaar lewer op openbare figure soos Madonna, Guy Bedos en die tennisspeler Yannick Noah wat onder andere sou gesê het dat hulle “Frankryk gaan verlaat indien die Front National die meeste stemme kry”. Ook die sanger-akteur Patrick Bruel, wat van Joodse afkoms, asook ‘n profesionele pokerspeler is, het iets dié trant kwytgeraak, wat deur Jean-Marie Le Pen se gespreksgenoot op die intervideo aangeroer is. Hierop het Jean-Marie Le Pen geantwoord: “Dit verbaas my nie… Luister, volgende keer sal ons ‘n oond vol bak.” Die Franse woord “fournée” wat hy gebruik het, beteken ‘n “hoeveelheid brood of koek wat saam gebak word”, maar kan ook net ‘n “klomp mense met dieselfde lot beteken”. Boonop speel dit op “four” (oond) wat gewoonlik op Frans in verband met die Joodse slagting tydens die tweede wêreldoorlog gebruik word.

Le Pen senior het jare gelede in 1987 ook die holocaust as ‘n “besonderheid van die geskiedenis” beskryf, waarvoor hy sedertdien konstant gekritiseer is en waarvoor hy in 1986 “een simboliese frank” as boete deur die hof van Aubervilliers, ‘n voorstad van Parys, opgelê is.

Sy dogter se metgesel, Louis Aliot, wat gewoonlik baie lojaal teenoor Jean-Marie Le Pen is, het eerste in die openbaar losgetrek deur Sondag sy uitlating as “polities dom” te beskryf. Hierop het Le Pen senior geantwoord: “As daar mense aan my kant is wat dit op dié manier interpreteer, is hulle imbesiele.” Intussen het die FN die video van hul webblad verwyder.

Hierop het Marine Le Pen die openbare reaksie op haar pa se uitlanting as ‘n “kunsmatige polemiek” beskryf, maar tog gesê dat hy ‘n “politieke fout” begaan het. Terwyl sy daarvan oortuig is dat “die betekenis wat aan sy woorde geheg word, van kwaadwilligheid spreek”, het die FN se leidster Sondagaand verklaar dat haar pa “in die lig van sy lang ervaring… nie kon insien watter interpretasie daar van dié formulering gemaak sou word nie, ‘n politieke fout is waarvoor die Front National nou die gevolge moet dra”.

Volgens die koerant Le Monde, gaan dit vir die Front National oor ‘n “subtiele” spel daartussen om as hoofstroomparty hom te “ontdemoniseer”, maar terselfdertyd steeds “teen die stelsel” voor te kom waardeur sy gewildheid onder ontevrede Franse kiesers toeneem. Die koerant praat van “goeie demonisering” en “slegte demonisering”. Deur haar kritiek op die Europese Unie, laat Marine Le Pen haar op ‘n goeie manier deur die media “demoniseer”, maar deur sulke moedswillige antisemitiese uitlatings ontketen haar vader die slegte vorm van demonisering. Aldus Le Monde.

Jean-Marie Le Pen het verder verklaar dat “die politieke fout gemaak word deur diegene wat in pas verkeer met eenvormige denke en wat soos die ander partye wil lyk”.

Le Pen vader is die lewenslange erepresident van die party waarvan hy in 1972 stigterslid was. Hy gaan dus moeilik uit die kussings gelig word, selfs al word hy ‘n verleentheid vir sy dogter. In die Franse streeksverkiesings wat om die draai lê, sal die uitslae wel aantoon of sy uitlating die party skade berokken het, aldan nie.

Minister sal SAKP se aanbevelings oor Derby-Lewis oorweeg

Die minister van Justisie en Korrektiewe Dienste, Mike Masutha sê voorleggings van familielede en ander belanghebbendes sal in ag geneem word voor ‘n finale besluit oor parool vir Clive Derby-Lewis geneem word.

Daar is aanbeveel dat Derby-Lewis parool toegestaan word, het Masutha Maandag gesê.

“Daar is ‘n positiewe aanbeveling, met ander woorde ‘n aanbeveling om vrylating op parool,” het hy aan verslaggewers gesê in Pretoria.

Hy het vroeër bekend gemaak dat daar ‘n memorandum van die SAKP in die verband ontvang is.

Masutha sê die “politieke en emosionele sensitiwiteit” oor die kwessie sal in ag geneem word.

Die 78-jarige Derby-Lewis is onlangs twee keer in die gevangenis aangeval en met ‘n skerp voorwerp gesteek.

Hy 25 jaar tronkstraf opgelê vir die dood van die SAKP-leier, Chris Hani in 1993. Hy het reeds meer as 20 jaar van die tronkstraf uitgedien, nadat twee aansoeke op parool reeds afgekeur is.

Derby-Lewis het nie self die sneller getrek nie en het ook nie amnestie ontvang nie, ten spyte van sy bekentenisse. Talle massamoordenaars en terroriste wat burgerlike teikens om die lewe gebring het, het wel amnestie ontvang voor die WVK.

Derby-Lewis het die geweer aan ‘n Poolse immigrant Janusz Walus gegee om die Kommunistiese Party se sekretaris-generaal Chris Hani in die oprit van sy Boksburghuis, aan die Oos-Rand, op 10 April 1993 dood te skiet.

Hy word by die Kgosi Mampuru-sentraal in Pretoria in ‘n sel vol ander misdadigers aangehou en sy gesondheidstoestand is uiters kommerwekkend volgens sy vrou, mev. Gaye Derby-Lewis.

Rian Malan het onlangs voorgestel dat mev. Derby-Lewis aan die ANC “erken” dat sy en haar man CIA-agente was wat die opmars van die kommuniste wou stuit deur die moord.

Masutha het Maandag gesê voorleggings deur familielede van Hani sal in ag geneem word voordat ‘n besluit geneem word.

Dieselfde geld vir die Vlakplaas-bevelvoerder Eugene de Kock.

Verlede maand het die hooggeregshof in Pretoria gelas dat Masutha parool oorweeg vir de Kock.

Platinumstaking kan NOP kaap

Die sukkelende ekonomie is ‘n terugslag vir die ANC se belofte van groei en werkskepping onder die Nasionale Ontwikkelingsplan.

Die effek van die staking op die ekonomie is reeds groot en die handelstekort sal na verwagting toeneem.

Die ANC beplan om die energie-sektor as ‘n modus van werkskepping uit te bou. Daar is ook megaplanne vir die vervoer-infrastruktuur, water en sanitasie.

Afgesien van die ekonomie wat swaar trek, is die platinum-staking die spreekwoordelike strooihalm wat die kameel se rug kan breek.

Die staking is dus ‘n prioriteit vir die regering, en Gwede Mantashe, die ANC se sekretaris-generaal, het Amcu se posisie wat deur “wit buitelanders” geartikuleer word, skerp gekritiseer.

Mantashe het ná ‘n drie-dag-sessie van die ANC se nasionale uitvoerende komitee gesê ‘n ontleding van die verkiesing is gedoen by die vergadering.

Die party het erken dat sy oorwinning ‘n “mandaat” vir die ANC is om vorentoe te stu om groot staatsondersteunde infrastruktuurplanne in werking te stel.

Mantashe het nie uitgebrei oor die inmenging van “vreemde magte” nie, maar Amcu word bygestaan in ‘n tegniese kapasiteit deur ‘n buitelandse NRO, die Alternative Information and Development Centre (AIDC), ‘n “alternatiewe dinkskrum”, wat ‘n party was tot die loononderhandelinge.

Suid-Afrika huiwer op die rand van ‘n resessie nadat 0,6% vir die eerste kwartaal se negatiewe groei aangeteken is.

Talle bevraagteken Amcu se motiewe om die kloof tussen die partye wat vir maande al verby mekaar praat, verder te verdiep.

Die staking word gelei deur Amcu, wat reeds met agterdog deur die regerende party bejeën word omdat die nuwe unie die ANC se National Union of Mineworkers (NUM) by platinummyne vervang het.

Amcu het loonongelykhede en werksomstandighede in die mynbousektor, die hoeksteen van die land se ekonomie, reeds herhaaldelik uitgelig en vir solank as wat die staking duur poog Amcu om hul posisie te regverdig op die basis van die “klassestryd”.

Hierin word hulle ook ondersteun deur agente van George Soros se Open Society, OSISA.

Mantashe het tereg opgemerk dat die Labour Resources Centre in Kaapstad vakbondlede oplei, maar nog nooit direk betrokke was by onderhandelinge nie, waar vakbonde gewoonlik vir hulself kan praat.

Toe hy gevra is of Amcu se motiewe werkers se eise ondermyn, het hy gesê werkers kan “gebruik” word vir duistere agendas.

Brian Ashley van AIDC, sê die sentrum help Amcu met die “komplekse model van aanbiedings van die [myn]maatskappye”.

Die sentrum se senior ekonoom is die Sweed Dick Forslund, ‘n buitelandse burger. Forslund moes al voorheen ‘n openbare apologie teenoor Mike Schussler aanteken nadat hy Schussler belaster het in ‘n poging om oor “ongelykhede” te moraliseer.

Ekonomiese ontleders het Forslund as ‘n propagandis beskryf en ‘n liggewig.

Amcu kon nie vir kommentaar bereik word nie.

Mynskagte gaan sluit na taakspan ontbind

Die regering se taakspan het onttrek uit kortstondige gesprekke om die platinumstaking by te lê, het mynmaatskappye aangekondig.

Die regering se taakspan het Maandag ontbind ondanks pleidooie dat hulle nie die handdoek moet ingooi nie.

Amplats, Implats en Lonmin sal Dinsdag aankondigings oor skagsluitings en verwerkingsaanlegte doen.

Dit volg nadat Ngoake Ramatlhodi, minister van minerale bronne, bekend gemaak het dat hy sy taakspan ontbind.

Ramatlhodi en die taakspan het Maandag die hele dag met Amcu en die drie mynmaatskappye vergader. Die besluit om die taakspan te ontbind en aan die proses te onttrek, is egter vroeg geneem sodat die Kommissie vir Versoening, Bemiddeling en Arbitrasie, die bemiddeling glo kan voortsit.

Die president van Amcu, Joseph Mathunjwa, bly steeds heftig gekant teen ’n vrywillige arbitrasieproses.

Amcu se eise en die aanbod vir loonverhogings is glo “heeltemal te hoog om arbitrasie te oorweeg”, het bronne binne die onderhandelingsproses gesê.

Dit wil voorkom asof beide onderhandelingspartye nie besonder gretig is om die geskil by te lê nie.

Die buitelandse NRO, Alternative Information and Development Centre (AIDC), het homself tesame met die EFF in die onderhandelinge namens Amcu ingewurm.

“Platinumprodusente neem kennis dat die gesprekke wat deur die minister van minerale bronne gefasiliteer is ongelukkig ontbind is sonder ‘n uitkoms,” het hulle in ‘n gesamentlike verklaring gesê. “Terwyl die produsente verbind bly tot ‘n onderhandelde skikking, sal hulle nou verdere opsies tot hulle beskikking oorweeg.”

Mynmaatskappye sal ook na verwagting Dinsdagoggend aankondigings maak oor die moontlike sluiting van skagte.

Lede van Amcu staak sedert 23 Januarie en dring aan op ‘n basiese maandelikse salaris van R12 500.

Mynmaatskappye het reeds meer as R21,7 miljard in inkomste verloor terwyl werknemers meer as R9,6 miljard in inkomste verloor het weens die staking.

Minister Ngoako Ramatlhodi het kort na sy inhuldiging die taakspan op die been gebring in ‘n poging om die vier maande lange staking tot ‘n einde te bring.

Ramatlhodi sal Dinsdagoggend ‘n mediakonferensie hou oor die regering-taakspan se onttrekking uit die platinumdispuut.

Malema prys privaatskole

Die EFF-leier Julius Malema, sal voortgaan om sy seun na ‘n privaatskool te stuur, selfs al het hy gesê openbare verteenwoordigers moet openbare dienste gebruik.

Malema het gesê sy seun sal nie “disfunksionele en arm” openbare skole bywoon nie, en hy sal ook sy mediese fonds handhaaf, wat hom toegang tot private gesondheidsorg gee, het The Star berig.

Sondag het Malema egter aan verslaggewers gesê by ‘n mediakonferensie in Kaapstad dat dit geen sin maak vir die regering om dienste te lewer wat sy leiers, van LP’s tot ministers, nie bereid is om te gebruik nie.

“Ons wil skole en hospitale opgegradeer hê… hulle sal nooit van [goeie] gehalte wees as LP’s dit nie gebruik nie,” het hy gesê.

Maandag, het Malema gesê sy agt-jaar-oue seun, Ratanang, sal bly by die privaatskool, tensy ‘n wet aangeneem word wat verkose verteenwoordigers dwing om openbare geriewe te gebruik, het die koerant berig.

“Hoekom moet ek my kind aan swak onderwys onderwerp wanneer mense in magsposisies dit nie wil doen nie?” het hy gesê.

Vragmotor vol gesteelde kabels voorgekeer

Die polisie in Johannesburg het beslag gelê op ‘n vragmotor vol elektriese kabels met ‘n geraamde waarde van R5 miljoen, het RSG berig.

Die metropolisie het die voertuig naby die Gold Reef City pretpark voorgekeer. ‘n Woordvoerder van die polisie sê die bestuurder het nie die nodige dokumentasie by hom gehad nie.

Die vragmotor is deur ‘n wit Mercedes Benz begelei en die insittendes het probeer om die polisie met R15.000 om te koop. Hulle was volgens die polisie swaar gewapen.

Toe polisieversterkings ingeroep is, het die motor weggejaag. Die vragmotorbestuurder is na die Booysens-polisiekantoor geneem.

Amptenare van City Power het bevestig dat die kabels aan hulle behoort. ‘n Saak van roof is intussen geopen.

Soros sit agter mynstaking in Rustenburg

Die maande lange staking in die platinumbedryf in Noordwes word deur betaalde agente van die miljardêrfilantroop George Soros se Open Society aangehits.

Die sekretaris-generaal van die ANC, Gwede Mantashe, het by Luthuli-huis in Johannesburg na afloop van die bosberaad deur die Nasionale Uitvoerende Komitee, gesê die onrus word van buite die land aangemoedig.

Mantashe sê nie alleen die Ekonomiese Vryheidsvegters nie, maar ook wit buitelandse elemente is ten nouste by die staking betrokke.

Ene Lloyd Gedye, ‘n wit sake- en musiekjoernalis van die Mail&Guardian, is klaarblyklik deurdrenk van suiwer rewolusionêre ywer teen die “kapitalistiese mynbase”. Gedye is ‘n betaalde werknmener van OSISA, The Open Society Initiative of Southern Africa.

Dieselfde organisasie is betrokke by die betaalde opstande en aanhitsing van geweld in die Oekraïne waar vyandelikhede die land na ‘n burgeroorlog dwing.

Gedye se ywer word byna woordeliks deur Amcu se president Joseph Mathunjwa herhaal, wat die gerugte dat Gedye Mathunjwa se toesprake skryf, verder rugsteun.

Nadat Mathunjwa sowat 5 000 stakende mynwerkers by die Wonderkop-stadion toegespreek het, het hy hulle vertel die ANC is aan die kant van kapitaal en nie van die werkers nie.

Volgens Gedye verdien myners in Brasilië R25 000 per maand en in Australië R80 000.

Gedye het ook Anglo American Platinum se uitvoerende hoof Chris Griffiths se vergoeding onlangs ontbloot. In reaksie op die feit dat hy R17,6 miljoen verlede jaar betaal is, het Griffiths gesê hy “word betaal wat hy werd is”.

Gedye se marxistiese kritiek op Griffiths se salaris, het die mynbaas sedertdien gedwing om om verskoning te vra ná openbare kritiek oor sy ongeërgde kommentaar. Kennelik was Griffiths nie bewus dat hy ‘n slagoffer van die Open Society se “klassestryd” sal word nie, aangesien die miljardêr George Soros veel meer as Griffiths verdien.

Die joernalis het sy gifpen ingespan om slagoffers van die Marikana-slagting aan te moedig om te onttrek uit die Farlam-kommissie as Cyril Ramaphosa, ‘n nie-uitvoerende direkteur op Lonmin se direksie, nie getuig oor sy beweerde rol in die slagting nie.

Gedye beskuldig die ANC-regering daarvan dat hulle “die Farlam-kommissie ondermyn, sy vermoë om getuies te roep belemmer en die SAPD se rol in die slagting probeer toesmeer”.

Daarvoor het die wit Gedye oudergewoonte die swart postkoloniale teoretikus Frantz Fanon se waarskuwing ingespan dat die “inheemse elite” aandadig kan raak in die “uitbuiting van hul medeburgers in die postkoloniale projek”.

Net soos Beeld-lesers vreemd genoeg, gereeld moet verneem wat in Indië – nie Suid-Afrika nie – aangaan wat verkragting betref, haal Gedye die Indiese marxistiese teoretikus Aijaz Ahmad aan: “Fanon se haat teenoor die koloniseerder stem ten volle ooreen met sy minagting vir die uitbuitende inheemse elite.”

Uit hierdie “teoretiese grondslag” maak Mathunjwa rewolusionêre stellings soos die volgende: “Van 1652 tot op datum het die betalingstruktuur in mynbou nog nie verander nie. Dit is deur die kolonialiste ontwerp.”

Die minister van minerale hulpbronne, Ngoako Ramatlhodi, het intussen aangekondig dat die regeringstaakspan wat hy aangestel het, sy betrokkenheid by die onderhandelinge gaan staak indien daar nie *vandag ‘n ooreenkoms bereik word nie”.

Ramathlodi sal Maandag vir die laaste keer samesprekings met Amcu en die mynmaatskappye Implats, Amplats en Lonmin voer in ‘n poging om die voortslepende staking te probeer beëindig.

Hy het die naweek gesê onderhandelings kan nie onbepaald voortgaan nie en dat hy hoop die partye vandag ‘n ooreenkoms kan bereik.

Die Ekonomiese Vryheidsvegters sê die party maak nie verskoning vir sy steun vir mynwerkers se eis van ‘n basiese salaris van R12.500 nie.

Die EFF het gereageer op die sekretaris-generaal van die ANC, Gwede Mantashe, se uitspraak dat hy twyfel of die voortslepende staking in die platinumbedryf oor kollektiewe bedinging handel en of dit eerder polities gemotiveerd is.

Die woordvoerder van die EFF, Mbuyiseni Ndlozi, sê die ANC probeer die skuld vir sy onvermoë om die staking te beëindig, na ander verplaas.

Kaapse rowers dra nou polisie-uniforms

‘n Huisrooftog is in Ridgeworth, Kaapstad, uitgevoer deur gewapende mans waarvan een ‘n polisie-uniform en ‘n ander ‘n weerkaatsbaadjie gedra het. Hulle het by die huis ingestorm en gevra om met “mnr. Sjieng” te praat.

‘n Ooggetuie, Andrew Galant, meen die rowers was op soek na sy werknemer wat Koreaans en voorsitter van die Koreaanse vereniging van Kaapstad is. Die voorval het plaasgevind ‘n week nadat ‘n Nissan Sentra wat aan die huiseienaar se seun behoort in Pinelands gesteel is. In die motor was ‘n boek met vertroulike inligting oor Koreaanse inwoners van Kaapstad.

Volgens Galant het die rooftog op 27 Mei plaasgevind. Hy sê: “‘n wit Nissan Trida het in die inrypad ingetrek. Ek was besig om in my woonstel op die erf ontbyt te nuttig, en my werknemer was besig om in die huis koffie te drink. Skielik het vyf mans uitgespring. Een was in ‘n polisie-uniform en ‘n tweede het ‘n weerkaatsbaadjie gedra. Hulle het voorgegee dat hulle polisiemanne is.”

Sy Koreaanse werknemer het daarna die mans tegemoet gegaan en gevra of hy hulle kan help. Volgens die “polisiemanne” was hulle op soek na mnr. Sjieng. “Hulle het gedink omdat my baas Koreaans is, is hy mnr. Sjieng. Oplaas het ons vir hulle ons paspoorte gewys om te bewys wie ons is. Daarop het hulle hul weg in my woonstel se aparte ingang oopgedwing en geëis dat hulle tot die hoofwoning toegelaat word, wat ons geweier het.”

Volgens Galant het een van die valse polisiemanne by die eienaar gestaan terwyl die res sy woonstel geplunder het. Daarop het ‘n tweede voertuig, insgelyks ‘n wit Nissan Trida, opgedaag.

“Die ouens klim toe uit die voertuig uit. Die eerste wat na my baas toe loop, lyk asof hy die leier is (hy het ‘n volle polisie-uniform aangehad en het beweer dat sy naam sersant Warren is) en vra toegang tot die hoofwoning.

“Die huiseienaar kom toe na die agterdeur toe en binne sekondes storm die ‘polisie’ in die huis in. Nog ‘n voertuig daag in die inrypad op, en die insittendes storm die aparte ingang binne. Van die aparte ingang dring hulle die huis binne. Ek is ook gedwing om in die huis in te gaan, tesame met die eienaar, sy vrou en hul seun.

“Terwyl ons in die kombuis staan, gaan ‘n paar van hulle by die eienaar se seun se kamer in. Hulle eis toe toegang tot die kluis maar het nie so ver gekom nie.”

Volgens hom het die hele voorval ongeveer 40 minute geduur en was daar omtrent 18 mense by betrokke. Slegs ‘n Galaxy-tabletrekenaar, ‘n iPhone en ‘n Zippo-aansteker is gesteel.

Die swartmans het ‘n taal gepraat wat Galant nie kon verstaan nie.

“Alles het so wettig gelyk weens die manier waarop hulle hulself aangebied het. Vier van hulle was in polisie-uniforms geklee en die ander in gewone klere. Van almal, was daar net twee sonder vuurwapens.”

Kaptein Fienie Nimb van die Bellevillese polisiestasie het bevestig dat vier Tanzaniërs wat soos polisiemanne aangetrek was, laat op 27 Mei in hegtenis geneem is, maar hulle kon nie met die voorval in Ridgeworth verbind word nie.

Kaptein Nimb sê: “Die misdaadvoorkomingsbeamptes en dagskofoffisiere is in kennis gestel oor die huidige neigings en verdagte voertuie en persone. ‘n Wit Nissan Tiida is vermeld as ‘n verdagte voertuig waarmee verskeie sakerooftogte in Kaapstad, Milnerton en in die gebied van vier ander polisiestasies in die Wes-Kaap gepleeg is.

“Die verdagtes teiken juwelierswinkels waar hulle juweliersware en edelgesteentes steel. Inligting is ontvang dat dié Nissan Tiida deur ‘n buitelander bestuur word en dat die verdagtes goed gewapen is en tydens die rooftogte polisie-uniforms, asook tweerigtingradio’s dra.”