Die Suid-Afrikaanse departement van internasionale betrekkinge ontken dat enige passassiers met Suid-Afrikaanse paspoorte op die noodlottige vlug van die Maleisiese lugdiens was. Volgens die departement het “twee van die mans op die vlug bande met Suid-Afrika, maar het met buitelandse paspoorte gereis”.
‘n Woordvoerder van internasionale betrekkinge, Nelson Kgwete sê “indien iemand met ‘n buitelandse paspoort reis, moet die land wat die paspoort uitgereik het die leiding neem in sulke voorvalle”. Kgwete het namens die Suid-Afrikaanse familie sy meegevoel uitgespreek teenoor die families van die twee mans met Suid-Afrikaanse bande.
Intussen het een van die rebelleleiers in Oos-Oekraïne gesê die opstandelinge is bereid om tot ‘n kort skietstaking in te stem om toe te laat dat ‘n ondersoek na die Maleisiese passassiersvliegtuig in die gebied onder hul beheer uitgevoer word.Alexander Borodai, die eerste minister van die Donetsk-volksrepubliek, wat eensydig onafhanklikheid verklaar het, sê separatistiese magte is gereed om tot ‘n wapenstilstand van etlike dae in te stem.Die Amerikaanse regering glo dat die vliegtuig deur ‘n grond-tot-lugmissiel afgeskiet is, maar dit is onduidelik wie die wapen sou afgevuur het.
Volgens ‘n anonieme woordvoerder, “bekyk hulle die data om te bepaal of die wapen deur die pro-Russiese separatiste in die Oekraïne afgevuur is, of deur Oekraïense regeringsmagte of deur Russiese troepe oorkant die grens”.
In ‘n voortsetting van onluste wat op 11 Julie in Clare Estate, wes van Durban, losgebars het, heers daar vandag weereens chaos. Inwoners van Palmietweg is deur die polisie na hul huise vergesel ná ‘n klipgooiery. Elektriese meters en kragpale is insgelyks aan die brand gesteek.
Blykbaar is die inwoners ongelukkig omdat hul onwettige elektrisiteitsverbindings deur die stadsraad ontkoppel is.
Die polisie se onluseenheid is gister ontbied nadat meer as 100 plakkerskampinwoners in Clare Estate ‘n pad met brandende buitebande en takke versper het.
Die inwoners is woedend vir die Durbanse munisipaliteit wat twee privaatveiligheidsmaatskappye gekry het om die kabels van onwettige verbiedings af te sny.
Ná ‘n konfrontasie tussen polisie en die skare, is die onluseenheid se hulp ingeroep.
Blykbaar hou die probleem reeds jare lank aan. ‘n Inwoner in die formele deel van die buurt, wat slegs as Rio bekend wil staan, sê dat die hele gebied nou sonder elektrisiteit is.
“Telkens as hulle die elekrisiteitskabels van die kragbron afsny, gebeur dit. Die hoofkragkas is naby waar ek woon en as die sekerings uitbrand, sny dit die krag in die hele gebied af,” sê Rio.
“Ons verdien dit nie want ons help hulle met kos en klere. Ons is daarvan bewus dat (die plakkers) onder moeilike omstandighede leef en help hulle waar ons kan. Die wykraadslid is nooit beskikbaar nie en stel ook nie in ons probleme belang nie.”
Maar die betrokke raadslik Themba Mtshali, meen dat hy sy bes doen om te help. Volgens hom verkeer ‘n deel van die grond wat die plakkers beset egter in privaatbesit.
Die munisipaliteit het ingestem om elektrisiteit te voorsien maar toestemming om die grond te beset moet eers van die eienaars verkry word.
Nadat die Amerikaanse Hooggeregshof, daardie land se ekwivalent van ons Grondwethof in die saak Fisher v University of Texas, Austin, beslis het dat regstellende aksie deur middel van rassekwotas onwettig is, het die universiteit egter ‘n nuwe uitspraak in ‘n laer hof verkry wat dit wettig.
Die Amerikaanse Appèlhof vir die Vyfde Kring het Dinsdag bepaal dat die universiteit mag voortgaan om ras as ‘n maatstaf by die toelating van studente te gebruik. Hiermee is die blanke student, Abigail Fisher, se jare lange stryd teen rassekwotas by dié universiteit weereens omgekeer.
Die rektor van die Universiteit van Texas, Bill Powers, is “baie in sy skik” met die uitspraak en het soos volg daaroor uitgelaat:
“Hierdie beslissing sal verseker dat ons kampus, ons staat en die hele nasie sal baat by die uitwisseling van idees en gedagtes wat plaasvind wanneer studente wat in alle opsigte divers is in die klaskamer bymekaarkom, asook by kampusaktiwiteite en in alle aspekte van die kampuslewe.”
Fisher, wat intussen aan ‘n ander universiteit moes gaan studeer omdat sy as blanke nie by Texas in haar tuisstaat toelanting kon verkry nie, sê sy beplan om teen die beslissing te appelleer, selfs al beteken dit dat sy na die hoogste hof, die Hooggeregshof, moet teruggaan.
“Dis teleurstellend dat die regters wat my saak aangehoor het nie die Hooggeregshof-uitspraak van verlede jaar gevolg het nie,” sê sy. “Ek bly daartoe verbind om met die hofsaak voort te gaan selfs al beteken dit dat ek weereens na die Hooggeregshof toe moet appelleer. Dis ‘n skande daar daar oor die afgelope ses jaar honderde aansoekers by die Universiteit van Texas weggewys is weens die universiteit se rasse- en etniese voorkeure.”
Volgens die uitspraak vandeesweek is die regstellende aksie wat die Universiteit van Texas in sy toelatsingsbeleid toepas, “eng gedefinieer”, maar die instelling beskik nie oor ander metodes om “diversiteit” te verhoog nie, nadat die Hooggeregshof verlede jaar in Junie daaroor uitspraak gelewer het.
Twee uit die drie regters in Fisher v Fisher v. University of Texas at Austin, voel dat hulle “oortuig is” dat Texas noodwendig ras “holisties” moes gebruik in hul toelatingsprosedure. Die hof voel ook dat die ander howe reeds konsensus daaroor bereik het dat universiteite ras mag gebruik om diversiteit te bewerkstellig en om gelyke geleenthede te bevorder as die alternatiewe selfs ‘n groter gebruik van ras mag vereis.
Die Kring-regter Patrick Higginbotham het die meerderheidsuitspraak onder meer soos volg regverdig:
“Die agtergrond van ons pogings hier sluit egter die werklikheid in dat die aanvaarding van toelaatbare beleid met die doel om ‘n gewenste rasse-uitkoms te bereik, die grens tussen kwotas en die holistiese gebruik van ras onder spanning plaas. Ons het dié grens nou vasgestel. Om die Universiteit van Texas se plan te verwerp, is om die ontwikkelende beginsels van neutrale regstellende aksie te verwar.”
Die derde regter, wat egter van die ander twee verskil, meen dat Dinsdag se uitspraak die nuwe streng ondersoekstandaard “systap” en dat Texas geen getuienis aangebied het dat hul program wettig of geregverdig is nie.
“Omdat die universiteit sy diversiteitsdoelwet op enige sinvolle wyse gedefinieer het nie – pleks daarvan gebruik dit bloot die term ‘kritiese massa’ – is dit heeltemal onmoontlik om te bepaal of sy gebruik van rasseklassifikasie eng gedefinieer is,” sê die regter wat nie saamstem nie, Emilio Garza.
Sherrilyn Ifill van die NAACP
Terwyl konserwatiewe groepe oor die algemeen hul teleurstelling met die nuwe uitspraak uitgespreek het, het Sherrilyn A. Ifill, voorsitster en regsadviseur van die NAACP-regsverdedigingsfonds, gesê dat die beslissing “behoort te staan as ‘n verklaring van die ononderbroke belangrikheid en wettigheid van regstellende-aksie-pogings wat aansoekers om toelating tot hoër onderwys holisties evalueer, asook vir die beginsel van stare decisis”.
* NAACP, die National Association for the Advancement of Coloured People, Amerika se grootste swart aksiegroep
Die Oekraïnse departement van binnelandse sake, het Donderdag die skuld vir die lugramp in sy land dadelik op “pro-Russiese separatiste” gepak en gesê Vlug MH17 is met ’n lugafweermissiel neergeskiet.
Volgens die jongste inligting was daar 298 mense aan boord.
‘n Ontleder van Jane’s Defence, Nick de Larrinaga, sê egter die self-verdedigingsgroepe het nie die vermoë om die Maleisiese vliegtuig af te skiet nie.
“Teen normale kruishoogte van burgerlike vliegtuie is hulle buite bereik van die soort van bemande draagbare lug[verdediging]stelsels wat ons in Oos-Oekraïne toenemend sien,” het hy in ‘n verklaring gesê.
Die Oekraïnse magte het egter die wapenstelsels om ’n passasiersvliegtuig neer te skiet.
Die Oekraïense weermag het ‘n paar Buk-M-missielstelsels met ten minste 27 laaiers, wat in staat is om burgerlike vliegtuie in die Donetskstreek waar die Maleisiese passasier vliegtuig verongeluk het, af te skiet, het die Russiese ministerie van verdediging gesê.
Die gewapende magte van die Oekraïne in die ongeluksgebied is glo toegerus met Buk-M1-stelsels wat lugteikens op ‘n afstand tot 160 kilometer kan opspoor en op ‘n afstand van meer as 30 kilometer kan afskiet.
Dié missiel kan ’n hoogte van tot 25 000 m bereik en dus gemaklik ’n passasiersvliegtuig bereik.
Die Malaysia Airlines-vliegtuig het Donderdag op ’n hoogte van sowat 10 000 m verdwyn en die vermoede bestaan dat die vliegtuig afgeskiet is.
Nog ‘n militêre ontleder van die Belfer Center for Science and International Affairs sê die vliegtuig kon alleen deur ‘n professionele militêre mag afgeskiet gewees het.
‘n Suid-Afrikaanse helikoptervlieënier, Cameron Dalziel (43), was een van die oorledenes op Vlug MH17. Hy het in Maleisië gewerk en sou na Nederland reis vir opleiding, volgens Beeld.
Reddingswerkers het intussen die tweede swart vlugopnemer van die Maleisiese passasiersvliegtuig gevind, het Reuters berig.
Vroeër het ‘n woordvoerder van die Vostok-bataljon gesê dit is naby die dorp van Torez in die Donetsk gekry.
Nie een van die 283 passasiers en 15 bemanningslede aan boord, het die ongeluk oorleef nie.
Die Oekraïnse president Petro Poroshenko het Vrydag gesê die vlugopnemer is deur die plaaslike verdedigingseenhede opgespoor wat dit na Rusland sal neem in ‘n poging om “al die spore dood te vee”.
Interfax het Donderdag berig dat president Wladimir Poetin se straler ook dié roete gebruik het met sy terugvlug uit Brasilië van die pasafgelope BRICS-beraad.
Die Maleisiese Boeing777 en Poetin se straler lyk op ‘n afstand baie dieselfde, met dieselfde kleure gemerk.
‘n Bron het egter aan Gazeta.ru aanlynnuusportaal gesê Poetin se vliegtuig het opgestyg vanaf Vnukovo-3, maar die president nie oor die konflik-gebied in die buurland gevlieg nie.
Ander lugdienste gebruik dié roete, maar het nou hul vlugplanne aangepas om nie oor die Oekraïne te vlieg nie. Die VSA vlieg egter sedert April nie oor die Oekraïene nie.
Die Reserwebank het die repokoers met ‘n kwart van ‘n persentasiepunt verhoog.
Gill Marcus, die president van die Reserwebank het die koers tot 5,75 persent opgeskuif.
Sy het inflasie as rede vir die verhoging aangevoer. Die hoër koers beteken dat banke hulle prima uitleenkoers tot 9,25 persent sal verhoog.
Marcus sê die swak rand en uitgerekte stakings hou ‘n risiko vir inflasie-vooruitsigte in. Sy het bygevoeg dat die land vanjaar na verwagting swakker ekonomiese groei sal toon.
Sy sê vooruitsigte vir ontluikende markte, insluitende Suid-Afrika, Rusland en Brasilië bly steeds onder druk.
Marcus sê ondanks die slegte vooruitsigte, het verbruikersvertroue verbasend genoeg verstewig.
Nosey Pieterse, die uiters omstrede hoofsekretaris van Bawusa sê die landbouvakbond se werkers wil ‘n dubbelsyferverhoging hê.
Plaaswerkers wat aan Bawusa behoort, het kennis gekry van uitsluiting by die werkplek nadat hulle Maandag by Douglas Green Bellingham in die Boland begin staak het.
Die varkboer Pieterse, is ‘n skatryk begunstigde van bemagtigingstransaksies.
Vrae oor sy teenwoordigheid by die jongste protes sal nie te ruste gelê word nie. Hy het gedurende die laaste oproer in die Boland kospakkies uitgedeel wat deur die vorige minister van landbou, Tina Joemat-Pettersson, betaal is.
Bawusa eis ‘n 10 persent verhoging, terwyl die bestuur 7 persent aanbied. Sowat 80 vakbondlede neem aan die staking deel.
Pieterse sê hulle is ook ingelig dat die werkgewer aansoek om ‘n interdik gaan doen, maar het gesê dat stakers alleen ‘n dubbelsyfer-verhoging sal oorweeg.
Die feit dat Joemat-Pettersson voorheen R10-miljoen van die regering se voedselsekuriteitbegroting op die kospakkies uitgegee het – geld uit openbare fondse – is vir Pieterse geen probleem nie.
Hy het voorheen gesê hy glo hy en ‘n paar van die plaaswerkers is betrokke by ‘n landbourewolusie.
President Jacob Zuma sê die regering het nie die moontlikheid bespreek om die ambassadeur van Israel uit die land te skop nie. Zuma het met die SAUK gepraat by die Brics-beraad in Brasilië.
‘n Beroep is op die ANC-regime gedoen om op te tree teen die ambassadeur weens Israel se voortgesette bombardering van Gasa.
Arthur Lenk is Woensdag ingeroep deur die departement van internasionale betrekkinge om Israel te waarsku teen ‘n grondinval in Gasa.
Lenk het op sy beurt die gesprek verwelkom en gesê dat hy verheug is dat hy die geleentheid gegun is om Israel se posisie aan die ANC-regering te verduidelik.
Zuma sê Suid-Afrikaners voel ernstig oor die situasie in die Midde-Ooste, maar die regering het nie die moontlikheid bespreek om Israel onder diplomatieke druk te plaas oor sy oortredings nie.
Hy sê daar moet ‘n tweestaat-oplossing vir Israel en Palestina gevind word om die geweld in die gebied tot ‘n einde te bring.
Die president het gesê “Die kwessie van Palestina en Israel moet tot ‘n einde kom, dit is eintlik ‘n globale verleentheid, in vandag se wêreld […] met soveel magtige internasionale organisasies wat help om probleme op te los, is daar ‘n kwessie wat onoplosbaar is, dit is eintlik ‘n moeilike ding.”
Israel is een van die lande wat die ANC sterk steun.
Suid-Afrika se ambassadeur in Israel, Sisa Ngombane, het Israel Woensdag geprys: “Jode het gehelp met die bevryding van Suid-Afrika. […] Die regering onthou en herken julle bydraes. Jy kan verseker wees dat die formele verklaring deur my regering nie valse dinge sal bevat nie.”
Die “valse dinge” waarna Ngombane verwys is die aantygings dat Israel se onwettige optrede teen Palestyne met die van die Nazi’s vergelyk kan word.
Een van 20 passasiers, insluitende ‘n baba, wat Woensdag beseer is op ‘n SAL-vlug tussen Johannesburg en Hong Kong, sê dit was vreesaanjaend.
Ewald Sadie beskryf op Facebook hoe ” verskeie mense ‘n paar ernstige rugbeserings” opgedoen het en in die hospitaal opgeneem moes word.
Die mense was aan boord vlug SA-286 toe die voorval plaasgevind het. Van die 165 mense aan boord is minstens 17 passasiers en drie bemanningslede beseer.
Die voorval het vyf uur van Hong Kong plaasgevind in die lug toe die vlug ernstige turbulensie ondervind het. Ambulanse en mediese personeel was daar toe die vliegtuig geland het.
Binnepanele op die vliegtuig sal ook herstel moet word, het ‘n woordvoerder van SAL gesê.
Sulke ernstige woelinge is glo skaars en is nie iets wat opgetel word op die radar nie.
Weerradar wys vog, terwyl onstuimigheid veroorsaak word deur die wind.
Die Suid-Afrikaanse Lugdiens sê dit is nog nie duidelik wanneer die passasiers en bemanning wat beseer is tydens hewige turbulensie na Suid-Afrika sal terugkeer nie.
Die redery sê 18 van die 20 beseerdes, is reeds uit ‘n hospitaal in Hong Kong ontslaan.
Die voorval het in die lugruim bo Maleisië plaasgevind.
Israel en Hamas het ‘n skietstilstand van vyf uur aangekondig nadat vier kinders op ‘n strand in ‘n Israelse lugaanval dood is, het eNCA Donderdag berig.
Die VN het dié versoek gerig in ‘n poging om ‘n langtermyn oplossing vir Israel se aggressie teen Palestynse burgerlikes te vind.
Daar is ooreengekom dat alle spervuur van 10:00 tot tot 15:00 gestaak sal word. Israel berei glo vir ‘n grondaanval voor teen die inwoners van Gasa wat die dodetal aansienlik sal verhoog.
Israel se onwettige militêre operasie teen Hamas het Donderdag sy tiende dag bereik.
Daar het reeds 224 Palestynse inwoners gesneuwel waarvan 80% burgerlikes is.
Sedert 2009, het Israel drie groot aanvalle in die Gasagebied onderneem, wat tot ‘n groot aantal sterftes en beserings gelei het, meestal van burgerlikes.
Na elke aanval het Israel sy eie militêre “ondersoek” onderneem na die dood van slagoffers.
Hulle het hulself ook elke keer vrygespreek van die slagting van burgerlikes en vernietiging van Gasa se hulpbronne, geboue, huise en kritieke infrastruktuur.
Die ontoereikendheid van hierdie “ondersoeke” word skerp deur die internasionale gemeenskap veroordeel.
Die Verenigde Nasies, Amnestie Internationaal, die Israeliese organisasie B’Tselem en talle ander menseregtegroepe wys op die algehele gebrek aan onafhanklikheid of deursigtigheid.
Onder die internasionale reg, is state verplig om ‘n geloofwaardige ondersoek in te stel en daarna vergoeding aan die slagoffers van oorlogmisdade aan te bied.
In 2013 het Amnestie Internasionaal gesê dat die slagoffers en menseregteorganisasies geen insae in die ondersoeke gegun word nie.
In November 2012, is 165 Palestyne gedood waarvan 35 persent onder die ouderdom van agtien, terwyl niemand in die Israelse weermag ondersoek of vervolg is nie.
Die vorige militêre ondersoek het geeneen aanspreeklik gehou vir die aanvalle op twee hospitale, vier klinieke en 10 lede van een gesin waaronder vier kinders tussen die ouderdomme van een en sewe nie.
In 2005, het die Israeliese eerste minister Ariel Sharon besluit om te onttrek van Gasa. Sharon, skepties oor Palestynse onafhanklikheid, het tot die gevolgtrekking gekom dat die Israeliese besetting nie in Israel se belang is nie.
Sharon het die Israeliese buiteposte ontruim en 10000 setlaars teruggebring. Dit was ‘n uiters omstrede skuif in Israel.
Die huidige Israeliese eerste minister, Benjamin Netanyahu, het destyds uit die regering bedank uit protes.
Ontleders meen Sharon is vergiftig vir die stappe wat hy geneem het om vrede te bewerkstellig.
Egipte beheer die enigste ander toegang tot Gasa, benewens Israel.
