Kategorie: Nuus

Totale aanslag op Afrikaans

Terwyl die frase “totale aanslag” deesdae weer veld wen onder kenners om die allesomvattende konflik te beskryf waarin Afrikaners hulself bevind, is PRAAG oor die afgelope weke deur verskeie individue genader wat hul misnoeë uitgespreek het oor die ongekende ondermyning van die Afrikaanse taal wat tans plaasvind.

Provinsiale onderwysdepartemente wil Afrikaanse skole beëindig deur model-C-skole met lokasieskole saam te smelt. In Gauteng word Afrikaanse skole reeds die afgelope paar jaar gedreig dat hulle na Engels toe moet oorskakel om swart leerlinge aan te trek.

Akademiese publikasies in Afrikaans sal nie meer vir staatsubsidie kwalifiseer nie omdat hulle nie “internasionaal toeganklik” is soos Engelse publikasies nie. Die meerderheid Afrikaanse akademici publiseer reeds in Engels uit vrees dat hul Afrikaanse publikasies nie deur die owerheid en die NRF (National Research Foundation, ou RGN) erken sal word nie. Tot dusver word ‘n klein aantal Afrikaanse tydskrifte egter steeds vir publikasie erken, maar indien al die akademici na Engels oorskakel, sal dié tydskrifte in elk geval wegkwyn en tot niet gaan.

Dit is algemeen bekend dat neurolinguïstiese programmering internasionaal deur die VSA, Brittanje en Israel se geheimedienste gebruik word om hele bevolkings te beïnvloed. ‘n Kundige met wie PRAAG gesels het, meen dat dit ook in Suid-Afrika aangewend word om “Afrikaners mak en gedienstig te hou”. Hy sê: “Daar was nog nooit soveel plaasmoorde en geweld soos tans nie. Ook word daar op alle gebiede teen Afrikaners gediskrimineer. Maar daar is beswaarlik enige verbale kritiek wat deur Afrikaners uitgespreek word. Hoe verklaar ‘n mens dit? Die Afrikaanse taal self word egter deur geheimedienste as ‘n probleem gesien omdat hulle nie volkome beheer het oor wat in Afrikaans gesê en geskryf word nie, anders as in Engels waar hulle oor wêreldwye netwerke beskik en na willekeur bevolkings kan opsweep of manipuleer. Dis daarom nie verbasend dat hulle poog om Afrikaans nou die doodskoot te gee nie.”

Volgens inligting tot PRAAG se beskikking, is die Nederlandse regering ook besig om ‘n akademiese aanslag op die Afrikaanse standaardtaal te befonds. Engelse taalkundiges aan die Universiteit van Kaapstad word deur Nederland betaal om in akademiese tydksrifte ‘n argument daarvoor uit te maak dat Standaardafrikaans eintlik die “taal van negentiende-eeuse rassiste” is wat van Afrikaans ‘n “witmanstaal” wou maak. Daarom moet Afrikaans soos ons dit ken afgetakel of uitgefasseer word ten gunste van Kleurlingafrikaans of ‘n stedelike soort Engels-kreools wat ‘n paar Afrikaanse woorde sal bevat en as die “nuwe Afrikaans” bekendgestel sal word. Taalkundiges aan die Universiteit van Stellenbosch, waaronder dr. Gerda Odendaal, is reeds met ‘n projek besig om Afrikaans te “herstandaardiseer”. Steun vir dié projek is ook deur die hoof van RSG, Magdaleen Kruger, uitgespreek.

Aan die Universiteit van Potchefstroom, waar prof. Hans du Plessis in 2006 Afrikaans as ‘n “gemorstaal” beskryf het, word daar ook gewerk aan ‘n politieke projek om beheer oor Afrikaanse instellings soos die Akademie en die Taalkommissie aan meer Engels-georiënteerde kleurlinge oor te dra. So iets sou die invoer van ‘n nuwe standaardtaal of Engels-kreools vergemaklik. Prof. Wannie Carstens, voorsitter van die Afrikaanse Taalraad, het verlede jaar op LitNet in ‘n lang artikel die Naspersideoloog Leopold Scholtz aangehaal wat gesê het:

“Afrikaans moet die instrument van aanvaarding en transformasie wees […].”

Onder “transformasie” word ‘n revolusionêre verandering in Suid-Afrika, maar ook ‘n revolusionêre wysiging van Afrikaans in die rigting van Engels-kreools verstaan, wat die taal as ‘n minder belangrike onderdeel van Britse en Suid-Afrikaanse Engels sal vestig.

Afrikaans moet dus nie net van buite deur middel van diskriminerende maatreëls en die marginalisering van die taal onderdruk word nie, maar ook van binne gerysmier en “getransformeer” word om meer soos Engels en die gemengde taal van die Kaapse vlakte te klink.

Pelsverkope herstel

Die resultate­ van die swakara-veiling op 9 September by Kopenhagen­ Fur in die Deense hoofstad Kopenhagen, is uitstekend, het Namibiese pelshandelaars gesê.

Die veiling het die hoogste prys ooit vir ’n lot swart swakara-pelse­ opgelewer, met die prys van N$2 964 wat ’n verhoging­ van N$558,40 teenoor die April 2014 veiling getoon het.

Agra sê in ’n verklaring die hoogste prys vir ’n lot wit pelse was N$2 546. Die grys pelse wat laas in September 2013 verkoop is, het ’n gemiddelde prys van N$710,60 per pels behaal en die bruin pelse wat laas in 2012 verkoop is, ’n gemiddelde­ prys van N$640,30 per pels.

Me. Dagmar Honsbein, hoofbestuurder van Agra ProVision, sê voor die veiling was bedrywighede by die pelshuis in die algemeen minder as tydens vorige veilings.

“Ons het ’n herhaling van die April 2014-veilingsverrigtinge­ gevrees, veral aangesien die gereelde swakara-kopers­ betreklik laat opgedaag­ het om die pelse te besigtig. Hulle het ons boonop ingelig dat hulle nog baie pelse oor het van die vorige veiling. Daarom is ons geweldig­ verheug om produsente­ mee te deel dat die verkope inderdaad­ herstel het,” sê Honsbein.­

Pelspryse was vroeër die jaar onder geweldige­ druk, wat ’n demper op verwagtinge vir die September-­veiling geplaas het. ­

Die pryse het nie net in April aansienlik teruggesak­ nie, maar het boonop meegebring dat nie alles verkoop is nie.

Die aanbod nou het bestaan uit 35 872 swart pelse, 8 794 wit pelse, 3 835 grys pelse, 725 bruin pelse en 2 787 gespikkelde pelse.

Die veilingsbelangstelling verlede week was aanvanklik traag, met die gemiddelde prys vir swart pelse wat op N$495,90 in April gemiddeld­ 12% laer was. Daarna is die bordjies verhang, met die gemiddelde prys van wit pelse wat met 10,9% gestyg het tot N$818,90 en gespikkelde pryse wat met 95,7% tot N$359,10 gestyg het.

Die duurste lot wit pelse is teen N$2 546 opgeraap­ deur mnr. Tony Jessop, ’n pelsmakelaar­ by Avanti Furs van Kastoria­ in Griekeland.­

Die duuste lot swart pelse se bod is toegeslaan­ op mnr. Thomas Rebild, ’n Deense makelaar wat dit namens Elena Furs van Moskou in Rusland gekoop het.

Bron: Die Republikein

Eskom: Kragagterstand sal nog 5 jaar duur

Die kragreus Eskom het gewaarsku dat dit tot vyf jaar kan neem om die agteruitgang in sy aantal kragstasies om te keer, het RSG berig.

Die kragvoorsiener se waarnemende uitvoerende hoof, Collin Matjila, sê die beskikbare energiefaktor sal eers teen 2019 tot bo 85 persent styg.

Matjila het aan die Parlement se Energiekomitee gesê die eerste eenheid by die nuwe Medupi-kragstasie in Limpopo sal na verwagting op 24 Desember vanjaar, ná ‘n vertraging van drie jaar, begin krag lewer aan die nasionale netwerk.

Die tweede kragstasie, Kusile in Mpumalanga sal vroeg in 2016 begin krag lewer. Matjila sê hulle het verskeie eise ingedien teen kontrakteurs by Medupi vir die nie-lewering van dienste.

Dit is ook gedeeltelik die rede vir die stygende koste.

Johannesburg Water gaan watertenks in ‘n aantal voorstede beskikbaarstel nadat kragprobleme by Randwater se Eikenhof-pompstasie tot ontwrigtings in watervoorsiening gelei het.

‘n Woordvoerder van Johannesburg Water, Millicent Kabwe, sê Randwater het die kragprobleem herstel, maar opgaardamme is leeg en moet nog volgepomp word.

Watertenks sal by die Coronationville hospitaal geplaas word, asook by Crown Gardens, Sophiatown, Quellerina, Bergbron, Winchester Hills en Campus Square in Aucklandpark.

Inwoners in die gebiede wat wel water het, is gevra om dit spaarsamig te gebruik totdat opgaardamme volgetap is.

Dodetal in Nigeriese kerkramp vermoedelik hoër

President Jacob Zuma het vroeër die sterftes bevestig van die 67 Suid-Afrikaners wat dood is in die ineenstorting van ‘n kerkgebou in Lagos, Nigerië, en sy meegevoel betuig met die gesinne.

Minstens vier Suid-Afrikaanse toergroepe het pastoor TB Joshua se Kerk besoek. Die President het steun beloof aan diegene wat geraak word en sê hulp sal verleen word met die uitkenning en herwinning van liggame.

Daar word egter vermoed dat die dodetal veel hoër is as die amptelike syfer omdat geen joernaliste naby die ramptoneel toegelaat word nie.

Die kerk gebruik glo sy eie reddingswerkers en die gebied is vir die publiek afgesper.

TB Joshua se bewerings van ‘n vreemde vliegtuig wat kort voor die ineenstorting van die gebou vier keer laag oor die gebou gevlieg is glo volgens veiligheidskenners ‘n foefie om die blaam vir die tragedie op Islamitiese Boko Haram te plaas.

Die land gaan reeds dekades lank gebuk onder godsdiensgeweld wat vir politieke doelwitte aangewend word.

Die “Profeet” beskik oor aansienlike politieke invloed in Afrika met presidente en premiers wat sy raad en aanbevelings as navolgingswaardig beskou.

Geboue wat ineenstort is ‘n alledaagse verskynsel in Nigerië. Die oorspronklike gastehuis, wat uit vier verdiepings bestaan het, het onlangs nog twee verdiepings bygekry, maar vermoedelik was die onderste struktuur nie sterk genoeg daarvoor nie.

Bouregulasies wat sogenaamd “nagekom word” in Nigerië se korrupsienes behels ‘n sertifikaat waarop staan “Hierdie gebou is veilig”. Dit word glo in die meeste gevalle bloot gekoop.

Die “heldersiende profeet” kan blykbaar ongelukkig nog nie betonsterkte verbeter nie. Joshua het onlangs beweer dat hy selfs slagoffers wat met die Ebola-virus besmet is, met soutwater kan genees.

“Moeilike tye kan my toets, kan hulle my nie vernietig nie,” het Joshua Dinsdag getwiet en op Facebook het hy 2 Kronieke 12:5-8 aangehaal: “God het die vyand toegelaat om Israel te oorwin sodat hulle kon besef hoe om God te dien verskil van hoe om die duiwel te dien. As dit nie vir ons moeilike tye was nie, sou ons nie die aangesig van God gesoek het nie. Ek bedoel, as dit nie vir ons moeilike tye was nie, sou die mens uit sy bose natuur nie die aangesig van God gesoek het nie. Dit beteken God gebruik soms moeilike tye om ons na Homself te trek sodat ons ons regte posisie en besitting in Hom kan inneem.”

Reddingswerkers kla dat “Die Sinagoge”, soos die kerk bekendstaan, hulle werk bemoeilik deur geen samewerking te gee nie.

Ten minste vyf Suid-Afrikaanse kerk toergroepe was by Die Sinagoge ten tye van die ineenstorting, volgens Suid-Afrikaanse amptenare.

Beeld snuffel nog ‘n ‘groen-rassis’ uit

Volgens Beeld het die sanger Jakkie Louw sy kop “in ’n rassebynes gesteek” op Facebook toe hy na ‘n vermeende swart dief ‘n “donkergroen mannetjie” genoem het. Sy skootrekenaar en foon ter waarde van R50 000 is geroof.

Hy is in Walvisbaai, Namibië besteel deur vermoedelik ‘n swart karwag.

“As jy in Walvis bly en ’n donkergroen mannetjie sien met so ’n sak (wat gesteel is) . . . Inbox my . .  . Ek’s nou daar,” het hy op sy Facebook-muur geskryf.

Louw sê dit was ‘n “komiese manier” om na die kort swart motorwag te verwys, maar Beeld het dit vergelyk met Sunette Bridges wat in 2010 aangeval is as ‘n ver-regse rassis toe sy na ‘n “groenie” verwys het.

Louw se paspoort was ook in die sak wat gesteel is. Louw is sedert Donderdag in Walvisbaai vir twee welwillendheidskonserte en sou Sondag teruggekeer het Suid-Afrika toe.

Hy vermoed sy motor se afstandbeheersein is onklaar gestel toe hy die motor wou sluit.

Lousw sal byna ‘n week moet wag vir ‘n noodpaspoort.

Jongste rassevoorval by UP skok studente

Die Universiteit van Pretoria (UP) het bevestig dat hy ondersoek instel na ‘n beweerde rassevoorval waar swartes wit studente gedreig het.

‘n Woordvoerder van die universiteit, Nicolize Mulder het gesê die beweerde voorval is Maandag onder UP se aandag gebring en dat ‘n ondersoek sal volg.

Twee ongeïdentifiseerde swart studente van Kollege Tehuis rassistiese uitlatings en dreigemente teenoor wit studente by die hekke van die Taaibos-koshuis geuiter. Die voorval het glo die aand van 4 September plaasgevind.

“Die een student het wit studente gevloek, en geskree dat hy wit mense haat en dat hy al die wit mense wil doodmaak.” Die dreigemente het Taaibos-studente diep ontstel, het een Taaibos-inwoner gesê.

UP-sekuriteit het video-opnames van sekuriteitkameras by die hek asook data van die sekuriteitshekke.

In ‘n ander voorval op kampus het swart dienspersoneel ‘n wit student Maandag agtervolg met seksuele voorstelle. Sy het weggehardloop en in ‘n lesingsaal gaan wegkruip.

Wit studente kla ook dat hulle aanmekaar lastig geval word deur swartes wat net buite die kampus bedel en aggressief optree, veral oppad na Hatfield se Gautreinstasie.

Spuende generaal wat wittes haat kos SANW halfmiljoen

Die hooggeregshof in Kimberley het beslis dat swart weermaglede adjudant-offisier At Malan onregmatig in hegtenis geneem en aangerand het omdat hy sy werk gedoen het.

Hy is deur die weermaglede aangerand en daarna weer deur ‘n swart vroue brigadier-generaal wat aan hom gesê het dat sy wittes haat terwyl sy op die grond langs hom gespuug het.

Dié siviele saak wat meer as vier jaar geduur het, kan die Suid-Afrikaanse Weermag sowat ‘n halfmiljoen rand kos.

Dit volg na ‘n hofuitspraak dat lede in die weermag se topstruktuur onregmatig opgetree het en hulle mag misbruik het.

Die brigadier-generaal wat by die voorval betrokke was, is glo ‘n kandidaat om die nuwe hoof van die leër te word.

Miljoene dollar sou wapens in SA koop

Amerikaanse dollars ter waarde van meer as R100 miljoen waarop daar beslag gelê is by Lanseria-lughawe, is bevries nadat die Suid-Afrikaanse Inkomstediens (SAID) ingegryp het.

Die stapels banknote van 90 blokke ter waarde van $100 000 elk was in twee swart tasse op ’n vlug wat op 5 September 2014 van Nigerië by die Lanseria-lughawe geland het, het Beeld berig.

Dit is ver bo die voorgeskrewe wettige hoeveelheid kontant wat land ingebring mag word.

Die Noord-Gautengse hooggeregshof in Pretoria het intussen ’n bevel ten gunste van die nasionale vervolgingsgesag (NVG) se batebeslagleggingseenheid gemaak dat die geld bevries word.

Dié geld is glo gebruik om ‘n misdaad te pleeg, vermoedelik om wapentuig en helikopters aan te koop.

Luidens ’n verklaring van die NVG het elke tas ’n kombinasie-slot gehad wat net bekend was aan ’n ene Eyal Mesika, ’n Israeliese burger. Mesika het ook drie soortgelyke stapels note in sy handbagasie gehad.

Tier One Services, het glo ‘n faktuur aan ’n Sipriese maatskappy, ESD International Group Ltd, gestuur vir die aankope van wapentuig en helikopters wat glo in Nigerië gebruik sou word.

Die NVG het in hofdokumente aangevoer dat Tier One nie by die Nasionale Konvensionele Wapenbeheerkomitee geregistreer is nie en nie gemagtig is om enige ooreenkoms rakende die verkoop of verhuring van militêre toerusting aan te gaan nie.

Die geld word nou deur die Suid-Afrikaanse Reserwebank bewaar.

MRK herhaal weer dat plaasmoorde gewone misdaad is

Dr. Chris de Kock, voormalige hoof van die polisie se misdaadinligting­analisesentrum (Mias), het Maandag voor die Menseregtekommissie (MRK) in Johannesburg getuig dat roof die motief vir plaasaanvalle is.

De Kock is tans ‘n “onafhanklike misdaadkonsultant” wat geroep is om te getuig oor plaasmoorde.

Die MRK hou tans ‘n sitting oor “plaasveiligheid” en die invloed daarvan op “menseregte in landbougemeenskappe”.

De Kock het gesê in 95% van plaasaanvalle is roof die motief. Hy het gesê rassisme is nie die hoofoorsaak nie en gebeur slegs in die “hitte van die oomblik”.

Alhoewel De Kock onomwonder verklaar het dat plaasmoorde nie rasgedrewe is nie, het hy erken dat daar geen “deeglike ontleding van die dossiere” bestaan “om die diepliggende motiewe” daaragter te bepaal nie.

Dit is dus nie duidelik hoe hy weet dat plaasmoorde nie rasgedrewe is nie.

Suid-Afrika se voormalige minister van intelligensie, Ronnie Kasrils, sing reeds dekades lank saam met swart politieke rolspelers, “Kill the Boer”, naamlik dat Afrikaners uitgewis moet word.

Plaasmoorde het glo die afgelope tien jaar gedaal, terwyl huisrooftogte gestyg het, het De Kock gesê.

Hy het bygevoeg dat huisrooftogte in dorpe en stede net so gewelddadig as rooftogte op plase is. De Kock het nie gespekuleer oor die rassegronde vir huisaanvalle nie.

Die ATKV het by monde van Danny Titus gesê die slagoffers wat aanvalle oorleef, moet “sensitief” behandel word. Titus meen blykbaar dat hulle andersinds ‘n probleem kan word vir die ANC se openbare betrekkinge veldtog om plaasmoorde as “roof” voor te stel.

Die geleentheid is gereël op aandrang van AfriForum wat ‘n bundel met klagtes oor plaasmoorde aan die MRK oorhandig het.

Solidariteit weer na hof oor diskriminasie

Die vakbond Solidariteit het Jeff Radebe, voormalige minister van justisie en grondwetlike ontwikkeling, gedagvaar om op 25 en 26 September 2014 in die gelykheidshof in Pretoria te verskyn. Solidariteit sal sy lid, landdros Martin Kroukamp, in die gelykheidshof verteenwoordig en aanvoer dat minister Radebe onbillik op grond van sy ras teen hom gediskrimineer het.

‘n Volbank regters van die Grondwethof het onlangs Solidariteit se nege jaar lange regstryd teen onregverdige diskriminasie teen Renate Barnard van die SAPD op grond van ras gesink.

Die hof het beslis daar is nie onregverdig teen Barnard gediskrimineer omdat sy wit is nie.

Die vakbond is tans in 33 sake teen regstelaksie in verskillende howe betrokke. Solidariteit het voorheen gesê die stryd van bruin tronkbewaarders in die Wes-Kaap is die heel belangrikste.

Volgens Johan Kruger, adjunkhoofsekretaris van Solidariteit, volg die hofsaak nadat Radebe die aanbeveling van die Landdrostekommissie om Kroukamp aan te stel, geïgnoreer het op grond van Kroukamp se ras.

“Vir Solidariteit is die hart van die saak nie net die reg van landdros Kroukamp nie, maar die reg van Suid-Afrikaners op ʼn effektiewe regstelsel. Die kernpilaar van die Suid-Afrikaanse demokrasie is die regstaat en ons moet dit beskerm,” het Kruger gesê.

Kroukamp het hierna ʼn aansoek, ingevolge die Wet op die Bevordering van Toegang tot Inligting, gebring om vas te stel hoekom hy nie aangestel is nie. Volgens die inligting wat Solidariteit ontvang het, sê die Landdrostekommissie dat, in ag genome die prestasie van die onderhoudkandidate, die vereistes ten opsigte van geslag en ras vervat in artikel 174(2) van die Grondwet, die behoeftes van die kantoor en die behoeftes van die gemeenskap wat bedien word, Kroukamp as die enigste geskikte kandidaat aanbeveel word.

Volgens Kruger het minister Radebe die kommissie se aanbevelings geïgnoreer ten spyte daarvan dat Kroukamp deur die Landdrostekommissie as die beste en enigste kandidaat vir die pos van landdros in die Alberton-landdroshof aangewys is, en gesê dit sou nie transformasie bevorder nie. Hy het verder aangedui dat die vakante poste weer geadverteer moes word.

“Dit is die eerste keer dat Solidariteit ʼn Minister dagvaar om sy besluit in die hof te verduidelik. In ons dagvaardiging aan die minister versoek ons dat hy bewyse moet lewer om sy besluit ten opsigte van die nie-bevordering van landdros Kroukamp te staaf,” sê Kruger.

“Senior landdroste speel ’n belangrike rol in die funksionering van die laer howe en moet onder andere landdroste bystaan. Dit is dus noodsaaklik dat die posisies gevul word ten einde te verseker dat landdroshowe die nodige dienste aan die publiek kan lewer,” het Kruger gesê.