Etiket: rassis

Herrie oor kunswerk: “Ek is trots om rassis te wees…”

Die kunstenaar, Willem Boshoff, wat bekend is vir sy kunswerke met gegraveerde woorde, het vir omstredenheid by die Venisiese Biennale gesorg met sy werk Racist in South Africa. Dit bestaan uit ‘n gedig wat op ‘n vierkantige aluminiumplaat van 1,2m gegraveer is en ‘n litanie van bekende klagtes oor die nuwe Suid-Afrika bevat. Die gedenkplaat begin met die woorde in Engels: “I am proud to be labelled racist in South Africa if it means that…”

Die kunswerk het agter ‘n herrie onder meer polities korrekte en Engelssprekende kunstenaars veroorsaak. Een so ‘n kunstenaar het anoniem aan die koerant City Press gesê “dis ‘n ballade van blanke bevoordeling… Ek sal Boshoff nooit weer ernstig opneem nie.” Iemand anders het gesê: “Hierdie werk is nie eens ‘n liberale persoon wat weeklaag nie. Dis 100% konserwatief.” Nog ‘n linkse kunstenaar meen: “Dis 2015 en dis al wat Suid-Afrika het om te wys? Ek het nie tyd vir sulke k.. nie.”

Toe hy om kommentaar genader is, het Boshoff bloot gesê: “Ek het niks om te sê nie; die werk spreek vanself. Ek het dit in 2011 gemaak toe dit tydens ‘n eenmantentoonstelling in Johannesburg vertoon is. Ek het dit nie vir die Biennale gekies nie; dis deur ‘n komitee aangewys.”

Boshoff was en die vroeë tagtigerjare deel van ‘n avant-garde-kuns- en letterkundebeweging waarby dr. Dan Roodt van PRAAG ook destyds betrokke was. Sowel Boshoff as Roodt het met konkrete poesië en Afrikaanse woorde geëksperimenteer wat deur Uitgewery Pannevis uitgegee is. Boshoff se grootformaatdigbundel van destyds heet Kykafrikaans en sy werk met woorde en inskrywings op metaal en klip kan as ‘n voortsetting daarvan gesien word.

Wille Boshoff se digbundel, Kykafrikaans, wat in 1980 verskyn het
Wille Boshoff se digbundel, Kykafrikaans, wat in 1980 verskyn het

Roodt het die volgende kommentaar gelewer: “Mens sien nou weer ‘n tipiese linkse heksejag wat deur die Naspersmedia soos City Press en Beeld teen Boshoff gevoer word. Nóg Ferial Haffajee van City Press nóg Adriaan Basson van Beeld verstaan enigiets van kuns of letterkunde. Hulle is linkse filistyne vir wie nivellering en konformisme soos ‘n godsdiens is. In hul wêreldbeskouing is daar geen plek vir kreatiwiteit of spraakvryheid nie. Vandaar nou dié poging om Boshoff se werk te stigmatiseer. Hy lewer ook ironiese kommentaar op die obsessie met beskuldigings van ‘rassisme’ in Suid-Afrika, soos dit deur Naspers, maar ook Afriforum, gepleeg word. Die verdelingslyn in Afrikaans en in Suid-Afrika loop steeds diegene wat meer vryheid en minder geweld/terreur wil sien, teenoor die Broederbond-NP-tipes wat met die ANC/SAKP vesmelt het en vandag vir lief neem met plaasmoorde, grootskaalse verkragting en ‘n korrupte rampokkerstaat. Eintlik voer ons nog dieselfde stryd as in 1980 toe ons as jong Afrikaners gepoog het om met ‘n meer kreatiewe benadering te kom. Ek kom al hoe meer mense teë wat ons destyds ondersteun het en vandag steeds met ons saamstem. Hulle sien ook in dat die gesanik oor rassisme die nuwe soort Lammie Snyman-sensuur is. Vandag se sensors is net baie dommer en groter barbare as dié van destyds.”

Sommige van Boshoff se kritici het sy kunswerk met die lirieke van Steve Hofmeyr vergelyk. ‘n Britse akademikus aan die Universiteit van die Witwatersrand, Chris Thurman, het sy “teleurstelling” met die werk uitgespreek.

Die tema van die Suid-Afrikaanse tentoonstelling in Venisië is What remains of tomorrow en van die swart kunstenaars fokus op die xenofobiese geweld in Suid-Afrika.

Een van die kurators van die tentoonstelling, Christopher Till, sê dat Boshoff meen dat hy “in geen opsig ‘n rassis is nie, maar dat die rassekaart altyd gespeel word sodra daardie kwessies ter sprake is… Ek het half voorsien dat daar ‘n reaksie op Boshoff se werk sal wees, maar dit poog nie om konfrontasioneel te wees of om ‘n groot kwessie te skep nie. Maar dit is ‘n stem, een tussen 13 ander, en dit word deur ‘n kunstenaar vanuit ‘n bepaalde perspektief uitgespreek.”

News24 verhef Max tot stryder vir nuwe ANC-faksie

Andrew Trench, hoofredakteur van News24, het die afgeleefde Boerehater Max du Preez Donderdag in verklaring geloof. “Sy reputasie vir die waarheid, sy passie vir persvryheid en sy kaliber joernalistiek maak hom een van die bestes, en presies die soort mening wat ons by News24 wil hê.”

Du Preez beskik juis nie oor enige van die bogenoemde kwaliteite nie. Hy het onlangs in ‘n onderhoud prontuit verklaar dat ondersteuners van ‘n veldtog teen plaasmoorde moet “fokof en doodgaan”.

Hy sal by News24 aansluit om ‘n weeklikse rubriek te skryf op Dinsdae.

Du Preez het gesê dit is ‘n “voorreg” om vir News24 te skryf. Hy is bekend vir sy beheptheid met die “regse wit gevaar” wat hy namens sekere rolspelers aanwend om invloed in die ANC te bekom.

Hy is kennelik aangestel om die anti-Zuma-faksie in die ANC in Gauteng by te staan, alhoewel hy tans voorgee om anti-ANC te wees.

Du Preez het onlangs uit die Independent Media-groep bedank omdat hulle nie sy kruistog teen president Jacob Zuma wou ondersteun nie. Hy het gesê die maatskappy het ‘n verskoning gepubliseer na een van sy rubrieke om in Zuma se goeie boekies te bly.

Die presidensie het die rubriek as “rassisties” beskryf. “Die stuk getuig van vooroordeel en rassisme gegewe die wyse waarop mnr. Du Preez die president beskryf het.”

Du Preez het voorheen aan die Noord-Kaapse Rooivleisprodusente-organisasie se kongres in Kimberley gesê sake sal eers begin verbeter wanneer Zuma nie meer president is nie. Zuma kan teen 2017 uit die kussings gelig word.

Hy het gesê dat die ANC-regering onder pres. Jacob Zuma het met die aanstelling van Senzeni Zokwana as landbouminister en Gugile Nkwinti se heraanstelling as grondsake-minister gewys hulle is “nie ernstig oor landbou en grondhervorming nie”.

Andrew Trench wat toegesien het dat The Witness in Durban sluit, is glo aangestel as redakteur van News24.com deur die toedoen van ANC-sikofant Jannie Momberg, wat in beheer van Nuus24 se Afrika-bedrywighede staan.

Geoff Cohen is die algemene bestuurder van 24.com, Afrika se grootste aanlynplatform en die tuiste van News24.

Beeld snuffel nog ‘n ‘groen-rassis’ uit

Volgens Beeld het die sanger Jakkie Louw sy kop “in ’n rassebynes gesteek” op Facebook toe hy na ‘n vermeende swart dief ‘n “donkergroen mannetjie” genoem het. Sy skootrekenaar en foon ter waarde van R50 000 is geroof.

Hy is in Walvisbaai, Namibië besteel deur vermoedelik ‘n swart karwag.

“As jy in Walvis bly en ’n donkergroen mannetjie sien met so ’n sak (wat gesteel is) . . . Inbox my . .  . Ek’s nou daar,” het hy op sy Facebook-muur geskryf.

Louw sê dit was ‘n “komiese manier” om na die kort swart motorwag te verwys, maar Beeld het dit vergelyk met Sunette Bridges wat in 2010 aangeval is as ‘n ver-regse rassis toe sy na ‘n “groenie” verwys het.

Louw se paspoort was ook in die sak wat gesteel is. Louw is sedert Donderdag in Walvisbaai vir twee welwillendheidskonserte en sou Sondag teruggekeer het Suid-Afrika toe.

Hy vermoed sy motor se afstandbeheersein is onklaar gestel toe hy die motor wou sluit.

Lousw sal byna ‘n week moet wag vir ‘n noodpaspoort.

‘G’n Boer gaan my ondermyn nie’

Regter Nkola Motata het toegegee dat hy op die aand van sy ongeluk gedrink het, het die Star Maandag berig.

Hy het die erkenning gemaak in antwoord op die klag wat Afriforum by die Geregtelike Dienskommissie gelê het.

“Ek was by ‘n restaurant in Randburg saam met my kollegas waar ons aandete gehad het. Ek het om 7uur by die restaurant aangekom. Terwyl ons geëet het, het ons ‘n bottel wyn uitgedrink waartydens elkeen van ons twee glase gehad het,” het die regter gesê. Hy het bygevoeg dat hy ‘n koppie koffie daarna gehad het voordat hy huistoe gery het.

Motata is van dronkbestuur aangekla nadat hy in Januarie 2006 deur die erfmuur van ‘n huiseienaar in Sandton, Richard Baird, gejaag het.

Hy het onskuldig op die aanklag gepleit en aan ‘n joernalis van die Sunday Times gesê “Ek was hoegenaamd nie dronk nie… Ek het saam met een van my kollegas daardie aand tee gedrink”.

Die klag wat Afriforum by die GDK gelê het is gebaseer op ‘n opname wat Baird die aand van die ongeluk gemaak het.

Daarop kan duidelik gehoor word hoe Motata sê “Geen Boer gaan my ondermyn nie… Dit was die witman se land, selfs as hulle nog grond kan kry… Suid-Afrika is ons s’n, ons regeer Suid-Afrika.

Die burgerregteorganisasie het Motata aangekla van “rassistiese optrede”.

In sy antwoord aan die GDK sê Motata hy was verkeerd aangehoor en hy het eintlik gesê: “Ja, maar julle weet my broers en susters, laat ek julle vertel, vir die meeste van ons is dit ons land en nie net vir die witman nie. Selfs al het hulle groot lywe, is Suid-Afrika ons s’n.”

In die opname sê Motata aan die polisielede op die toneel: “Daar is geen Boer wat my sal ondermyn en aftakel nie. Hy moet ophou om my te verpes oor sy muur.”

Motata sê egter hy het gesê: “Selfs al het ek die muur omgery, sal ek betaal, maar hy moet my nie aftakel/afkraak nie. daar is geen witman wat my kan aftakel/afkraak nie.”

Motata sê in sy verweer dat die Sothowoord “leburu” wat “Boer” beteken, ‘n algemene term vir alle wit mans is.

“Dit is normaal om na ‘n witman as leburu in Sesotho te verwys.”

“Daarom betwis ek die aantyging dat ek ‘n rassis is en dat dit nodig is dat ek aan enige ondersoek onderwerp hoef te word,” het hy in sy antwoord gesê.

 

бурениеФільчаков Олександр Васильович