Woedende Poetin veroordeel Turkse ‘rugstekers’

President Wladimir Poetin het Turkye “rugstekers” genoem nadat Turkye ‘n Russiese vegvliegtuig in Sirië neergeskiet het.

‘n Sigbaar woedende Poetin het gesê dit is ook verbasend dat Turkye daarna nie met Rusland wou skakel oor die voorval nie, maar dadelik NAVO genader het oor ‘n “krisis” asof dit Rusland was wat ‘n vegvliegtuig van ‘n vriendelike bondgenoot afgeskiet het.

Turkye is ‘n lid van NAVO. Finland en Australië het egter voorheen na die Turkse president Erdogan as ‘n “diktator” verwys.

Een vlieënier is dood en terroriste het die tweede vlieënier gevange geneem. Die Associated Press het Dinsdag berig dat die een Russiese vlieënier doodgeskiet is voordat hy met ’n valskerm in Sirië geland het.

Die Russiese vlieënier se lyk is deur ‘n opgewonde horde wat daarop toegesak het, afgeneem en die gru-getuienis is dadelik op YouTube geplaas. Die horde om die man se bebloede lyk jil voortdurend “Allah is groot” in die film.

Terroriste wat pres. Bashar al-Assad se bewind wil omverwerp, het glo ook ‘n Russiese hulphelikopter aangeval met ‘n Amerikaanse TOW anti-tenkmissiel, maar die geredigeerde beeldmateriaal kon nie bevestig word as outentiek nie.

Intussen het die Noord-Atlantiese Verdragsorganisasie (NAVO) ’n noodvergadering belê vir Dinsdagmiddag in Brussel om Turkye se vyandigheid te bespreek.

Turkye gee tans noodsaaklike ondersteuning aan diegene wat verantwoordelik was vir die slagting in Parys.

Daar is dus waarskynlik net een rede waarom Turkye die Russiese vegvliegtuig afgeskiet het: Pure frustrasie met die Russiese ondersteuning vir Assad en die Russe se sukses om ISIS af te takel.

Turkye het ook die eerste geleentheid om die situasie te eskaleer benut, in die hoop dat NAVO gemobiliseer kan word teen Rusland.

Skermgrepe van ‘n video wys die vegvliegtuig in vlamme waar dit in ‘n bergagtige gebied in die noorde van Sirië neergestort het en twee valskerms wat oopmaak.

Die Dogan-nuusagentskap het berig dat die vliegtuig aan die Siriese kant van die grens neergestort het, en dat die twee vlieëniers daarin kon slaag om met valskerms uit te skiet.

Rusland se ministerie van verdediging sê dit is nie duidelik waar presies die twee vlieëniers hulle tans bevind nie. Hulle het geen kontak met die twee nie.

Die Amerikaanse departement van verdediging glo die Russiese Su-24 bomwerper is afgeskiet binne die Siriese lugruim, het Reuters berig.

“Die Verenigde State is van mening dat die Russiese vegvliegtuig wat afgeskiet is deur Turkye Dinsdag, getref is binne die Siriese lugruim na ‘n kort deurvlug deur die Turkse lugruim,” het die amptenaar gesê op voorwaarde van anonimiteit.

Volgens die bron, is die assessering gegrond “op opsporing wat die hittebeeld van die vliegtuig volg”.

Beeldmateriaal wat deur die Anadolu-nuusagentskap uitgereik is, wys hoe die twee vlieëniers met valskerms grond toe daal.

Dit word deur Europese waarnemers as onwaarskynlik beskou dat die Turke sal slaag met hul plan om ‘n NAVO-aanval teen Rusland te bewerkstellig, anders as om karakters soos Senator John McCain, Pole of die Baltiese state, se openlike goedkeuring te kry.

NAVO sukkel om sy bestaan in Europa te regverdig nadat die Warskouverdragslande ontbind het, en probeer voortdurend twis saai.

Die Amerikaanse president, Barack Obama, het intussen “Turkye se reg verdedig om sy lugruim te beskerm” en daarmee sy teenkanting teen internasionale terreur onder verdenking geplaas.

Hy het by ‘n gesamentlike nuuskonferensie met die Franse President, François Hollande, in Washington herhaal dat daar “gematigde” terroriste is wat ‘n burgeroorlog in Sirië dryf met buitelandse steun.

Obama sê Rusland moet mede-verantwoordelikheid vir die voorval aanvaar.

Hy sê die Russe vlieg baie naby aan die Turkse grens en val “opposisiegroepe” aan wat nie net deur Turkye nie, maar ook ander lande gesteun word.

Die VSA probeer steeds voorgee dat daar ander groepe in Sirië is wat gekant is teen Assad, maar dit is reeds bekend dat ISIS die enigste “opposisie” verteenwoordig.

Turkye sorg dat die olie wat ISIS in Sirië steel, op die internasionale mark verkoop word. Met dié inkomste, het ISIS tot ‘n gedugte internasionale terreurorganisasie gevorder wat onlangs ‘n Russiese passasiersvliegtuig afgeskiet het, asook ‘n massaslagting in Parys gereël het.

Poetin het lugfoto’s van die ongehinderde ISIS-oliekonvooie by die pasafgelope G20-beraad vertoon en gesê lede van die G-20 steun internasionale terreur.

Wit koshuismatrone met klip en baksteen doodgeslaan

Die polisie in die Vrystaat het nog nie die naam van ‘n 50-jarige vrou, wie se lyk Dinsdagmiddag op die Jimmie Roos-jeugsorgsentrum se skoolterrein by Dewetsdorp gevind is, bekend gemaak nie.

Volgens PRAAG se inligting was sy glo mevrou Barnard, die koshuismatrone.

Polisiewoordvoerder, Yanda Ngcukana, sê die polisie is steeds op die toneel nadat twee skoolseuns glo omstreeks 14:20 op die vrou, wat verbonde is aan die skool, afgekom het. Sy was reeds dood.

Die SAPD het intussen bevestig dat die twee leerlinge by die Jimmie Roos Jeugsentrum naby Dewetsdorp vir ondervraging in verband met die moord aangehou word.

Volgens hom is die wit vrou ook ‘n bestuurder van ‘n gastehuis op die skoolterrein.

Haar lyk is by haar bakkie tussen die gastehuis en ‘n dam wat op die terrein geleë is, gevind.

Hy sê die seuns het twee mans in ‘n Land Cruiser-bakkie van die toneel sien wegry. Hulle het glo hulp ontbied.

Ngcukana sê die slagoffer is met ‘n baksteen en ‘n groter klip teen die kop geslaan.

Niks word uit die gastehuis of haar bakkie vermis nie. Hy sê haar selfoon is steeds op die toneel.

Nog niemand is in hegtenis geneem nie.

Ngcukana sê haar familie moet eers in kennis gestel word.

Johnny Erlank, wat onlangs as skoolhoof uitgetree het, help glo die polisie met hul ondersoek.

Duitsland genader na plaasmoordverdagtes borg kry

Boere van die Kalkrand-omgewing en die gemeenskap van Omamas in Namibië is woedend en geskok nadat die vyf swart verdagtes van die moord op die bejaarde Duitse burger, mnr. Reinhardt Schmidt, Vrydag borgtog van N$5 000 elk gekry het.

Die vyf verdagtes te wete dr. Gerson Kandjii en mnre. Erwin Tjiteer, Domingo Juseus, Stefanus Jarson en Mawapunchila Nakapanda, het in die landdroshof op Kalkrand verskyn nadat hulle vroeg in Maart op klagte van moord en diefstal in hegtenis geneem is.

Landdros Ismael Huanga het nie die redes vir die toekenning van borgtog in die hof gelees nie.

Adjudant-offisier Aloy Haraseb van die Namibiese polisie het gister bevestig dat Kandjii, die Brave Warriors se spandokter wat ‘n ander hangende saak van renosterstropery teen hom het, reeds op vrye voet is nadat hy Saterdag sy borgtog betaal het.

Die ander vier is steeds in aanhouding tot tyd en wyl hulle hul borgtog kan betaal.

“Dit is absoluut onaanvaarbaar dat moordverdagtes borgtog van N$5 000 elk kry. Dit is ondenkbaar. Ek kan nie verstaan dat jy ‘n prys van N$5 000 op iemand se lewe kan plaas nie,” het die ontstelde bestuurder van die Namibië Hoodia-jagplaas, mnr. Derek MacKinnon, gister gesê.

Hy het bygevoeg: “Die regering sal moet ingryp. Hoe kan ‘n moordverdagte dieselfde borgtog as ‘n vermeende veedief kry?”

MacKinnon het gesê Schmidt se familie in Duitsland het Vrydag ‘n brief aan die Duitse ambassadeur in Namibië, mnr. Christian Schlaga, geskryf om hul skok oor die borgtog uit te spreek en te vra of hy met die Namibiese regering kan vergader om hul misnoeë oor die vrylating oor te kan dra.

MacKinnon het gesê hy is ook van plan om ‘n brief van protes aan die ministerie van landbou, water en bosbou te rig.

“Ek sukkel om te glo dat vermeende moordenaars toegelaat kan word om op vrye voet rond loop,” het MacKinnon gesê.

Schmidt is in die oggendure van 26 Februarie en 27 Februarie in sy huis op die Namibië Hoodia-jagplaas in die Omamas-omgewing vermoor. Die verdagtes het glo ook twee vuurwapens, ‘n platskermtelevisie en ander items uit sy huis gesteel.

Van die verdagtes is vasgetrek toe hulle van die gesteelde items verkoop het.

Toe die verdagtes in Maart in hegtenis geneem is, is gespekuleer dat hulle moontlik deel van ‘n sindikaat verantwoordelik vir renosterstropery is en die jagplaas vir ‘n ruk lank dopgehou het. Schmidt was glo van voorneme om renosters tot die wildbevolking van die plaas te voeg.

Bron: Republikein

Ses Russe eerste doodgeskiet in Mali-aanval

‘n Moslemgroep verbonde aan Al-Kaïda het aanspreeklikheid vir Vrydag se terroriste-aanval op ’n hotel in die hoofstad van Mali aanvaar.

Altesaam 19 mense, van wie die meeste buitelanders was, is in die voorval dood. Gerugte doen die ronde dat 27 lyke getel is. Minstens twee van die aanvallers is doodgeskiet.

Die twee name wat die owerhede vrygestel het, het laat blyk dat die aanvallers van Mali was, maar dit kon nie bevestig word nie.

Minstens 170 mense was in die hotel tuis toe die aanvallers Vrydagoggend daar ingestorm het.

Ses Russe, drie Chinese, twee Belge, ’n Amerikaner, ’n Israeli, ’n Senegalees en ’n lid van Mali se spesiale magte was onder die slagoffers.

Die owerhede is op soek na minstens drie mense wat met die aanval verbind word. ‘n Gas in die hotel het gehoor hoe die aanvallers Engels praat.

Die Russiese owerhede het intussen ‘n klag van moord teen die aanvallers geopen. Al ses Russe het vir die Volga-Dnepr-lugdiens gewerk. Russiese wetstoepassers sal oorlewendes ondervra oor die voorval.

Die Russe is glo heel eerste doodgeskiet.

Al Mourabitoun, wat aan Al-Kaïda verbonde is en in die woestyn in die noorde van die land gevestig is, het in ’n Twitter-bood­skap aanspreeklikheid vir die aanval aanvaar.

Dié voormalige Franse kolonie is al jare in ’n stryd met Islamitiese rebelle gewikkel.

Die regering van Mali het ’n noodtoestand verklaar ná die dodelike nege-uur lange gyselaarkrisis Vrydag in die Radisson Blu-hotel, presies ’n week ná die aanvalle in Parys.

Die Al-Murabitoun groep, ’n Al-Kaïda-filiaal, gelei deur die berugte een-oog Algeriese militant, Mokhtar Belmokhtar, wat die bynaam die “onvangbare” of “Mr Marlboro” het, het verantwoordelikheid vir die aanval aanvaar.

Ongeveer 10 gewapende mans het Vrydag in die vroeë oggendure die hotel beset en in die gange geskiet waarna 170 hotelgaste en personeel gyselaar geneem is.

Die aanval is beëindig toe Malinese en 40 Franse spesmagoperateurs die hotel om 3:00 bestorm het. Mali se president, Ibrahim Boubacar Keita, het bevestig dat buitelanders die hotel ontset het.

Die spesiale magte het ook glo twee Amerikaanse soldate ingesluit. Hulle het ‘n dramatiese reddingspoging, van vloer na vloer, uitgevoer en die besetting ná nege ure beëindig. Twee Franse soldate is beseer in die operasie.

Keita het in ’n televisie-boodskap gesê “terreur sal nie seëvier nie”. Hy het die hotel Saterdag besoek.

“Nêrens in die wêreld is enige iemand veilig van hierdie barbare uit ’n ander era nie. Hierdie aanvallers het besluit van weg te breek van die mensdom,” het hy gesê.

Mali het drie dae van nasionale rou afgekondig.

Belgiese polisie vra Twitter vir katte

Die polisie in België het Twittergebruikers gevra om foto’s van katte te twiet ipv inligting oor ‘n uitgebreide anti-terreuroperasie.

Sestien mense is in 22 klopjagte in hegtenis geneem in verband met die beplanning en uitvoering van die Parys-terreuraanvalle.

Die owerhede het ‘n man van medepligtigheid aangekla in die aanvalle in Parys meer as tien dae gelede waarin 130 mense dood is.

Die man is nie geïdentifiseer nie, maar is een van vyf mans wat Sondag tydens klopjagte in hegtenis geneem is.

Vyftien van die mense wat aanvanklik ook vir ondervraging ingeneem is, is vrygelaat.

Salah Abdeslam (26), een van die vermeende baasbreine agter die aanvalle, is nie onder dié wat in hegtenis geneem is nie.

Die polisie vrees dat hy na Brussel teruggekeer het om nuwe aanvalle uit te voer.

Om ‘n aanval soortegelyk aan die een in Parys af te weer, het België die hoogste waaksaamheidsvlak afgekondig, ook in die hoofstad Brussel maar het gesê die metro-stelsel en skole sal Woensdag heropen.

Potensiële teikens blyk inkopiesentrums en openbare vervoer te wees. Die publiek is gevra om plekke soos winkelsentrums, konserte en stasies te vermy waar groot groepe mense gewoonlik byeen is.

België is die hart van die ondersoek na die aanvalle sedert Franse wetstoepassers verklaar het dat twee van die selfmoordbommers daar gewoon het.

Abdeslam, wat ’n kroeg in die woonbuurt Molenbeek bestuur het, ontwyk die polisie sedert die aanvalle in Parys verlede Vrydag. Molenbeek is ‘n put van anti-wit haat en ontoeganklik vir Belgiese wetstoepassers.

Sy ouer broer, Brahim, het homself opgeblaas by een van die restaurante wat geteiken is.

“Wat ons vrees, is ’n aanval soortgelyk aan die een in Parys, met verskeie individue wat moontlik verskeie aanvalle gelyktydig in verskillende plekke van stapel kan stuur,” het Charles Michel, premier van België, Sondagaand op ’n mediakonferensie gesê.

Die polisie het kort daarna met die klopjagte begin. Hulle het toegeslaan op 19 persele in Brussel en drie in die nywerheidstad Charleroi, 50 km suid van Brussel.

Eric van der Sypt, aanklaer, het egter Maandag verklaar dat geen wapens of ploftoestelle gevind is nie. ’n Regter sou die klagtes teen die 16 aangehoudenes intussen hersien.

“Abdeslam Salah is nie gedurende die klopjagte opgespoor nie,” het Van der Sypt gesê.

Drie mense is tot dusver in België weens hul beweerde betrokkenheid by die Parys-aanvalle aangekla. Volgens die Franse owerhede is die aanvalle in België gereël.

Die EU het Vrydag ooreengekom om hervormings aan die paspoort-vrye Schengen-sone te oorweeg.

Frankryk het intussen ‘n verbod op openbare byeenkomste tot 30 November verleng ter voorbereiding vir die VN se beraad oor klimaatverandering wat dan in Parys begin.

Jan Jambon, Belgiese minister van binnelandse sake, het aan die uitsaaier VRT gesê Abdeslam is nie die enigste veiligheids­bedreiging nie.

“Dit is ’n bedreiging wat verder as net een mens strek.

“Ons kyk na meer (mense). Daarom het ons so ’n konsentrasie van hulpbronne gereed,” het hy gesê.

Streng veiligheidsmaatreëls word tans in Brussel toegepas. Die munisipaliteit, heelwat winkels en skole sal Dinsdag ook gesluit bly. Sommige ondernemings het hul werknemers toestemming gegee om van die huis af te werk.

Die hoofkantore van die Europese Unie en die Noord-Atlantiese Verdragsorganisasie, NAVO, is in Brussel.

Die moltreinstelsel in Brussel, die Belgiese hoofstad, is Saterdag gesluit omdat die owerheid ‘n terreurbedreiging vermoed.

België het ná ‘n vergadering met die polisie, ministers en veiligheidsdienste, sy gereedheidsvlak in die hoofstad tot die hoogste vlak – vlak 4 – verhoog.

Sekuriteit is ook by lughawens in die land verskerp.

Die stad se geskiedkundige “Grand Place”, wat gewoonlik vol toeriste is, was stil met slegs enkelinge wat op straat te siene was terwyl gepantserde voertuie voor die indrukwekkende stadsaal geparkeer was.

Die menseslagting in Parys het die Europese Unie (EU) op sy hoede uit vrees dat ekstremiste wat deur die sogenaamde Islamitiese Staat-groep (ISIS) geïnspireer is, vrylik binne die Unie se paspoort-vrye Schengen-sone kan beweeg.

Hulle het die afgelope weke honderde mense regoor die wêreld vermoor.

In Madrid is ondersteuners van Saterdag se El Clasico-sokkerwedstryd tussen Real Madrid en Barcelona deur snuffelhonde, berede polisie en eindelose identiteitsdeursoekings begroet.

Die Verenigde Nasies se Veiligheidsraad het Vrydag eenparig ’n resolusie aanvaar “om alle nodige maatreëls te tref” om ISIS te beveg.

NWU wag vir terugvoer van Blade

Die Noordwes-Universiteit wag op terugvoer vanaf die minister van Hoër Onderwys en Opleiding, Blade Nzimande, rakende die bedrag wat die universiteit sal ontvang om op te maak vir die 0%-verhoging in studentegelde volgende jaar.

Dit is volgens die universiteit se Louis Jacobs, wat ook byvoeg dat die NWU-raad reeds voorberei het vir verskeie scenario’s.

Jacobs sê planne sal verseker dat die universiteit die situasie kan hanteer sonder om akademiese uitnemendheid te benadeel.

Jacobs sê die 0%-verhoging, ’n uitvloeisel van die #FeesMustFall betogings vroeër vanjaar deur studente oor die land heen, het ’n impak van sowat R178 miljoen op die NWU se begroting.

Cosatu sê regering moet ophou inmeng in pensioene

Die president van Cosatu, S’dumo Dlamini het die regering gewaarsku om nie in te meng in die bestuur van staatsdiens-pensioenfondse nie, het RSG berig.

Hy het by die opening van die vakbondfederasie se twaalfde nasionale kongres in Midrand gesê, dreigemente om beleid oor aftrede en pensioene te verander, het tot ‘n groot aantal bedankings in die staatsdiens gelei.

Dlamini het selfs gedreig dat Cosatu nié die ANC in aanstaande jaar se munisipale verkiesings sal steun tensy die regering ophou inmeng in werkers se pensioenfondse nie.

Intussen sê President Jacob Zuma die vakbondfederasie moet uitstyg bó sy huidige uitdagings en in belang van die werkers eenheid voorop stel.

Zuma het gisteraand Cosatu se kongres toegespreek, nadat sy toespraak vroeër weens administratiewe kwessies uitgestel moes word.

Zuma sê vakbonde wat aan die federasie behoort moet alles moontlik doen om Cosatu se eenheid te beskerm sodat die federasie die kragtige vegter kan wees wat hy sedert sy stigting in 1985 was.

Vroeër is vyf van Cosatu se ses bestuurslede, insluitend die president S’dumo Dlamini, onbestrede in hulle poste herkies.

Daar sal slegs vir ‘n adjunk-hoofsekretaris gestem moet word. Die kongres duur tot Donderdag.

Universiteitseksamens afgestel, verskuif

Die Tshwane Universiteit van Tegnologie het eksamens by die Soshanguve-kampus, noord van Pretoria onbepaald uitgestel, het RSG berig.

Dit volg na hernude geweld deur studente waarin drie sale en sekerheidsvoertuie aan die brand gesteek is.

‘n Woordvoerder van die universiteit, Willa de Ruiter sê meer besonderhede sal binnekort bekendgemaak word.

Die omvang van die skade is nog nie bepaal. De Ruiter sê die Soshanguve-kampus sal tot verdere kennisgewing gesluit bly.

Die Kaapse Skiereilandse Universiteit van Tegnologie sê intussen eksamens sal afgelê word by sy Bellville- en Wellington-kampusse en die Wingfield weermagbasis in Goodwood.

Die eksamens sou vroeër by die Kaapstadse Internasionale Konferensiesentrum afgelê word.

Gewelddadige betogings het die Universiteit gedwing om alternatiewe reëlings te tref.

Rooibospryse kan met 90% styg weens droogte

Suid-Afrika se ergste droogte die afgelope twee dekades kan ‘n verwoestende daling in Rooibosuitset beteken.

Die daling in produksie kan die prys van rooibostee met soveel as 90% laat styg.

Volgens ‘n woordvoerder van die SA Rooibosraad, Ernest du Toit, word die produk net in die Cederberg- en Bokkeveldstreke van die Wes-Kaap gegroei, en is steeds baie gewild.

Du Toit sê afgesien van Rooibos se gebruik as ‘n drank, warm of koud, word dit ook beskou as waarskynlik die grootste anti-allergiese en anti-oksidantproduk in die wêreld.

Dit bevat ook anti-diabetiese en anti-stres-eienskappe, en word dikwels ‘n wonderwerkproduk genoem.

Malema waarsku oor komende rewolusie

Julius Malema het uit sy parlementêre sluimer ontwaak om die Duitse Sakekamer in Suid-Afrika te gaan waarsku oor die komende rewolusie en Zuma se opvolgingstrategie.

“Ek gewaarsku oor ‘n ongeleide rewolusie in Suid-Afrika. Dit kom,” het hy Vrydag gesê.

Malema se “waarskuwings” kom te midde van ‘n verlamming wat by die land se grootste vakbondfederasie Cosatu ingetree het weens binnegevegte.

Cosatu gaan binnekort ‘n veldtog vir ‘n nasionale minimumloon loods.

“Dit is in die universiteite [en] dit sal gaan na die fabrieke oorspoel. Studente eis gratis onderwys by die universiteite… Werkers gaan ‘n minimumloon eis in die fabrieke.”

Luidens News24, het Malema gesê President Jacob Zuma en die ANC het geen beheer nie en ly aan ‘n gebrek aan geloofwaardigheid en legitimiteit.

Net soos met die studente, sal geen mens in staat wees om die werkers te vertel om op te hou om fabrieke af te brand as hulle begin protesteer nie.

Hy het die geleentheid gebruik om die ANC se 2017-opvolgstryd te skets.

Hy het gesê die enigste rede hoekom Zuma sy eks-vrou Nkosazana Dlamini-Zuma tot president verkies wil sien, is omdat hy weet dat sy sou hom nie sal laat arresteer nie.

“Hy weet Cyril [Ramaphosa] sal hom laat arresteer. Dit is waarom die ‘premierliga’ Zuma se vrou verkies,” het Malema gesê

Die ‘premierliga’ is glo Noordwes se premier Supra Mahumapelo, Vrystaat se premier Ace Magashule en Mpumalanga se premier David Mabuza. Die drie is ook die ANC-voorsitters in hul onderskeie provinsies.

Die groep wil Dlamini-Zuma as president sien om Ramaphosa te verhoed oor te neem na Zuma.

Die ANC het intussen ‘n anti-wit veldtog van stapel gestuur om bruines en Indiërs te werf.

Die KwaZulu-Natalse ANC voorsitter, Sihle Zikalala het die aankondiging in Ixopo gemaak. Zikalala sê bruinmense en Indiërs het ook onder wittes gely en moet deur swartmense en die ANC omarm word.

Mercedes-Benz, die Duitse motorvervaardiger, is deur Malema berispe omdat hulle nie aandele aan hul werkers gee nie.

Die kakofonie van swart stemme is verhoog deur die Kommuniste se ontleding van die voortslepende universiteitsoproer.

Die SAKP het die EFF en die Pan Africanist Student Movement of Azania die skuld gegee vir plundery en die ontwrigting van eksamens by die Universiteit van Wes-Kaapland.

Hulle is beskryf as ‘n klein groepie anargiste wat van buite beheer word, om studente vir hul eie gewin te beïnvloed.

Die SAKP se adjunk-hoofsekretaris het by die party se sentrale komiteevergadering in Benoni aan die Oos-Rand gesê die beskadiging van eiendom en misdadige optrede is nie die werk van diegene wat werklike transformasie by universiteite nastreef nie.