Eskom waarsku dat herstel tyd neem

Eskom het laat Donderdagaand sy fase drie beurtkrag beëindig, maar het gewaarsku dat dit kan tyd neem om die kragtoevoer na alle gebiede te herstel, het RSG berig.

Die kragverskaffer gaan gebuk onder geweldige druk om die ligte aan te hou, met 27 van sy 87 kragopwekkers wat Donderdag nie behoorlik gefunksioneer het nie.

Dit sluit in een van die twee opwekkers by die Koeberg kernkragsentrale in die Kaapse Skiereiland, wat vroeër vandeesweek onklaar geraak het.

Eskom het gister fase-twee beurtkrag toegepas en moes dit teen laatmiddag na fase-drie oorskakel.

Dit het chaos in die spitsverkeer veroorsaak. Die sakesektor het gewaarsku dat kragprobleme kan lei tot werksverliese.

Eskom het egter die moontlikheid van ‘n landswye ineenstorting van die kragnetwerk uitgesluit.

Eskom het intussen aangekondig dat beurtkrag ook Vrydag ingestel sal word.

“Fase 2-beurtkrag sal vandag van 08:00 tot 22:00 toegepas word,” het die kragvoorsiener gesê.

Landbou- en energie-belanghebbendes Vrydag wat ‘n werkswinkel oor energiebesparing, volhoubaarheid en klimaatsverandering by Glen Landboukollege buite Bloemfontein bywoon, het gehoor dat SA ten minste R7,5 miljard per jaar aan elektrisiteitdiefstal verloor.

Eskom se Eugene Myburgh het die volhoubaarheidswerkswinkel aangebied vir Eskom.
 
By dieselfde geleentheid, is verklaar dat 2014 die warmste jaar op rekord was. Die landbousektor is gewaarsku oor die werklikheid van klimaatsverandering, veral in Afrika, waar ‘n temperatuurverhoging van 1,5-3 grade Celsius groot persentasies waardevolle landbougrond kan vernietig.

Klagtes van mishandeling by Infanterieskool ondersoek

Die departement van verdediging gaan glo bewerings van fisieke asook verbale mishandeling by die weermag se infanterieskool op Oudtshoorn ondersoek, het Sapa berig.

“Minister Nosiviwe Mapisa-Nqakula wil dit graag duidelik stel dat geen vorm van mishandeling op militêre basisse geduld sal word nie,” het Joy Nonzukiso Peter, woordvoerder van die departement, in ‘n verklaring gesê.

Volgens Peter is daar bewerings dat rekrute by die infanterieskool aan mishandeling blootgestel word. “Minister Mapisa-Nqakula veroordeel die fisieke en sielkundige mishandeling van rekrute ten sterkste.”

Die minister het voorts gesê daar sal streng opgetree word teen oortreders in die jongste voorval.

Die militêre ombudsman, Temba Matazima, het verlede jaar ‘n ondersoek geloods ná klagtes van soldate ontvang is. Matanzima het verskeie voorstelle ingedien rakende sulke voorvalle wat sedertdien geïmplementeer is deur die SANW.

Noord-Koreane ontken bande met wapenbedryf in Namibië

Die Namibiese tak van die Noord-Koreaanse staatsmaatskappy Mansudae Overseas Project Group of Companies (M.O.P.) sê hy het géén bande met die omstrede Korea Mining Development Trade Corporation (KOMID) teen wie streng internasionale sanksies ingestel is nie.

KOMID is Noord-Korea se grootste wapenhandelaar en is by die verspreiding van ballistiese missiele en ander wapentuig aan lande soos Iran en Sirië betrokke. Die maatskappy verskans sy bedrywighede dikwels deur Noord-Koreaanse frontorganisasies te gebruik in die lande waar hy sake doen.

Volgens ’n goedgeplaaste intelligensiebron bestaan ’n verbintenis tussen M.O.P. in Namibië en KOMID.

Mnr. Ryong Choe, woordvoerder van M.O.P Architectural & Technical Services (Namibia), het vandeesweek gesê die maatskappy waarvoor hy werk “doen nét kuns- en konstruksiewerk en het niks met wapens te make nie”.

Volgens hom ken hy nie die twee Noord-Koreaanse amptenare, Kil Jong Hun en Kim Kwang Yon, wat in Namibië woon en KOMID se belange in Suider-Afrika behartig nie.

Hulle is twee van die tien Noord-Koreane teen wie die Amerikaanse tesourie in Januarie sanksies ingestel het.

Dit is gedoen omdat hulle resolusie 1718 van die Veiligheidsraad van die Verenigde Nasies (VN) oortree het. Dié resolusie is op 14 Oktober 2006 aanvaar nadat Noord-Korea op 9 Oktober 2006 ’n kerntoets uitgevoer het, strydig met die kernsperverdrag waarvan dié land ’n ondertekenaar is.

Ingevolge hierdie resolusie moet lidlande van die VN alle oorsese bates van individue en maatskappe betrokke by Noord-Korea se wapensprogramme bevries. ’n Internasionale reisverbod is ook op werknemers van hierdie programme en hul families geplaas.

Die twee mans se teenwoordigheid in die land het die Namibiese regering in ’n groot diplomatieke verleentheid gedompel. Dit het verlede week bekend geword die VN gaan op grond van dié gebeure ’n amptelike ondersoek gelas na Namibië se skending van resolusie 1718 van die Veiligheidsraad. Namibië is net soos Noord-Korea ’n ondertekenaar van die kernsperverdrag.

Volgens Choe verwerp M.O.P. in Namibië enige beweringe dat hy as frontorganisasie vir KOMID optree.

“Ons is reeds vir dekades wyd bekend in Namibië as een van die groot konstruksiemaatskappy en het ’n goeie naam onder ons kliënte en diensverskaffers. Ons het niks met KOMID te make nie en is nie ’n filaalmaatskappy van KOMID nie.

“Ons moedermaatskappy Mansudae Art Institute ”

Hy sê gerugte hieroor bring mee dat groot diensverskaffers wat reeds jare lank bou- en ander konstruksiemateriaal aan M.O.P. lewer, vra skielik vrae en wil weet wat aangaan.

Choe sê M.O.P. het noue bande met die Namibiese regering wat een van dié maatskappy se grootste en mees gewaardeerde kliënte is.

“Ons het staatshuis, die Heldeakker, die Oorlogsmuseum op Okahandja en die Gedenkmuseum vir Onafhankliheid gebou en was ook by talle ander kleiner konstruksieprojekte betrokke.”

Hy ontken dat M.O.P. enigsins betrokke was by die bou van die wapenfabriek by Luiperdsvallei en sê dit was ’n “ander Noord-Koreaanse maatskappy”, maar hy ken nie die naam daarvan nie.

Volgens die waghondliggaam North Korean Economy Watch, is Namibië die land in Afrika wat die meeste geld, naamlik sowat US$67 miljoen, aan monumente en ander bouwerk deur M.O.P. bestee het.

“Noord-Korea het reeds meer as US$160 miljoen in die laaste tien jaar verdien uit die oprigting van reusemonumente en beeldhouwerke in lande in Afrika. Die grootste deel hiervan was afkomstig uit Namibië”, sê dié liggaam op sy webtuiste.

Bron: Die Republikein

Persklub betreur die sluiting van Sapa

Die Nasionale Persklub sê die sluiting van die nuusagentskap Sapa is ‘n hartseer dag vir die mediabedryf.

Jos Charle sê Sapa was vir baie dekades ‘n betroubare vennoot in die mediabedryf wat nuusinhoud gegenereer en verskaf het wat deur die meeste mediahuise gebruik is.

Sapa se raad het Donderdag aangekondig dat die nuusagentskap se laaste storie op 31 Maart om middernag gepubliseer sal word.

Die maatskappy sal gelikwideer word sodra die bates verkoop is, het OFM berig.

Sapa, wat sedert 1938 bestaan, is ‘n spesiale kategorie nie-winsgewende maatskappy en kan nie verkoop word nie.

Indonesië stel veiligheid vir lugrederye uit

Indonesië se ministerie van vervoer het Donderdag gesê planne om volgende maand die veiligheidgradering aan te kondig van lugrederye wat in die land werksaam is, is tot Junie uitgestel, het Xinhua berig.

Die veiligheidsgraderings is daarop gemik om veiligheid binne die plaaslike lugvaarbedryf te verbeter, het ’n beampte gister gesê.

Die land se minister van vervoer, Ignatius Jonan, het gesê sy ministerie sou die lisensies van lugrederye wat nie aan spesifieke veiligheidstandaarde voldoen nie, summier opskort. Ander lugrederye sal daarna die geleentheid kry om maatskappye wat nié aan die vereistes voldoen nie, te vervang.

Jonan het die plan verlede maand aangekondig ná die neerstorting van ’n AirAsia-vliegtuig op 28 Desember in Indonesiese waters, en waarin al 162 passasiers gesterf het.

Nouer samewerking met die Indonesiese Nasionale Lugrederyvereniging (INACA) sou ook onderneem word om deursigtigheid in die werksaamhede en die finansiering van vliegtuie te verbeter, het die minister gesê.

Indonesië skenk ernstige aandag aan die veiligheidstandaard van lugvaart, aangesien verskeie vliegtuigongelukkie in die afgelope paar jaar daar plaasgevind het. Die Europese Unie het in 2007 ’n reisverbod ten opsigte van talle Indonesiese lugrederye uitgereik. Die verbod is twee jaar later weens ’n verbetering in veiligheid opgehef.

Indonesië, wat bestaan uit ’n groot eilandgroep met ‘n bevolking van meer as 238 000 000 en ‘n groeiende middelklas, is ‘n potensiële mark vir laekoste-lugrederye, met die regering wat vlugroetes wil uitbrei om die meer as 17 500 eilande deur middel van lugvervoer met mekaar te verbind.

China bekyk GMO-beheer

’n Chinese amptenaar het gister gesê dié land gaan te midde van toenemende kommer oor veiligheid sy navorsing, beheer en bewusmaking oor die genetiese modifikasie van organismes (GMO) verbeter.

“GM-tegnologie is baie belowend en daarom moet ons die voortou met navorsing neem aangesien China oor beperkte landbouhulpbronne beskik,” het die adjunkhoof van die mees gevorderde navorsingsgroep op die gebied van landbou, Han Jun, gesê.

Volgens Han is dit te danke aan hierdie groep uitstekende wetenskaplikes dat China op die gebied van navorsing oor genetiese manipulering van rys en mielies die voortou kon neem.

“Ons GMO-mark sal nie deur buitelandse produkte versadig word nie,” het hy gedurende ’n mediakonferensie gesê.

Bron: Xinhua

Krisis in die Oekraïne nader breekpunt

Minstens 7 mense is Maandag doodgeskiet en sowat 19 beseer in grofgeskut-aanvalle toe regeringsmagte en selfverdedigingsgroepe in Donetsk in die ooste van die Oekraïne op mekaar losgebrand het, het owerhede in dié land Woensdag gesê.

Die krisis in die Oekraïne nader breekpunt soos ontleders voorheen gewaarsku het dit sou, nadat die VSA ‘n kleurrewolusie vanaf Maidanplein georganiseer het om die land by NAVO in te lyf.

Die Oekrïene het in ‘n smeltkroes van konflik ontaard en word tans in flarde geskeur deur die bekende Atlantiese vyande van vrede.

Amerikaanse nuusbronne waaronder die Wall Street Journal, die Atlantic, Reuters en die LA Times is byna histeries in hul eenderse aandrang om ‘n volskaalse oorlog te bespoedig: “Bewapen Kiëf”.

Die selfverdedigingsmagte het hul stellings probeer beskerm na grofgeskut huise in vier gebiede van die stad getref het, het stadsowerhede in ’n verklaring bekend gemaak.

Onlangse samesprekinge om die geweld tot ‘n einde te bring, het Vrydag ’n dooiepunt bereik met regeringsfaksies onder Washington se invloed, wat die ontsporing van die vredesproses wil bewerkstellig.

Die vredesamesprekinge, deur Rusland voorgestel, was veronderstel om die geweld wat die lewe van meer as 5 300 mense geëis het, te beëindig. Die skrikwekkende dodetal is nalv die VN se jongste beramings.

Die vyandigheid tussen die pro-­Russiese selfverdedigingsgroepe en die Oekraïense regeringstroepe het in Januarie, ná ‘n maand van relatiewe kalmte, opnuut opgevlam, nadat die VSA en NAVO hernude steun vir die junta in Kiëf aangebied het.

Tans is hul grootste offensief Debaltseve, ’n spoorwegaansluiting wat vantevore ’n tuiste aan 25 000 mense gebied het en geleë is tussen die stede Luhansk en Donetsk, wat beide deur selfverdedigingsgroepe beheer word.

Sowat 2 000 van die inwoners het in die afgelope paar dae gevlug.

Selfverdedigingsgroepe het verlede week die dorp V­uhlehirsk, van ­kardinale belang in die opmars na Debaltseve, beskerm teen aanvalle deur regeringstroepe. ­Hulle dring egter aan dat hulle nie beplan om Debaltseve aan te val nie, vanweë potensiële groot burgerlike sterftes.

Die selfverdedigingsleier van Donetsk, Alexander Zakharchenko, het gesê hulle help om Vuhlehirsk vanweë die swaar gevegte in die gebied te ontruim.

Intussen het broodpryse in die land die hoogte ingeskiet agv die konflik.

Oproer saai oral chaos

‘n Vierde skool is by Khakhanwa in Malamulele in Limpopo aan die brand gesteek omdat hulle klasse voortgesit het.

Ouers het die skool probeer bewaak te midde van die laaste vier weke se oproer in die gebied.

Drie skole in die gebied is vroeër dié week ook aan die brand gesteek.

Dienste en toegang tot die gebied is steeds versper. Oproer in die gebied duur reeds sowat vier weke met Tsongas wat ‘n aparte munisialiteit eis.

Intussen sê die Malamulele-taakspan die Tsongas sal Sondag besluit of hulle protes gaan opskort. ‘n Woordvoerder, Isaac Nukeri, het met die minister van polisie, Nathi Nhleko en die minister van staatsveiligheid, David Mahlobo, gesprek gevoer.

In ‘n ander voorval van openbare geweld, het Jacob Mamabolo, LUR vir samewerkende regering in Gauteng, Woensdag gesê dit was EFF-lede wat munisipale geboue aan die brand gesteek het tydens oproerigheid in Mohlakeng buite Randfontein.

“Die EFF-lede het op ‘n plundertog gegaan en munisipale eiendomme aan die brand gesteek en alle paaie en ingange na die gebied versper, en die gemeenskap is verhoed om te gaan werk,” het Mamabolo gesê.

Die burgemeester se huis en motor, die biblioteek, munisipale kantore en die stadsaal is van die eiendomme wat in ligte laaie gelaat is.

Volgens Mamabolo het die betogers ook winkels, wat deur buitelanders besit word, geplunder.

Inwoners het Woensdagoggend op ‘n plundertog uitgevaar. Christina Mabala, voorsitter van die EFF se Wes-Rand-tak, het egter gesê ANC-lede het die brande begin.

“Sommige mense binne die ANC het besluit om die geleentheid te gebruik om eiendomme te brand en te plunder. Ons as die EFF distansieer onsself van die gewelddadige optrede en skade aan eiendom,” het sy gesê. Sy het gesê die beskuldigings is vals.

Mabala het gesê die EFF het ‘n optog gereël van Mohlakeng na Randfontein om hul griewe aan die burgemeester te oorhandig.

Volgens Mabala het die polisie met rubberkoeëls op die betogers losgebrand.

In nog ‘n voorval van openbare geweld, het die polisie Woensdag met rubberkoeëls op betogers in Majakaneng, naby Mooinooi in Noordwes, losgebrand.

Brig. Thulani Ngubane, woordvoerder van die polisie, het gesê die oproeriges het dele van die N4 met hekke, klippe, bome en brandende bande versper. Volgens Ngubane het die betogings Maandag begin.

Sewe betogers is in hegtenis geneem en sal aangekla word van openbare geweld en kwaadwillige saakbeskadiging.

‘n Bus is aan die brand gesteek en twee winkels, wat aan buitelandse behoort, geplunder. Inwoners is glo ongelukkig oor water- en elektrisiteitstoevoer in die area.

Biskop Paul Verryn van die Metodistekerk en ‘n kollega wat probeer het om dialoog te bevorder, is met klippe bestook. Verryn en sy kollega is nie beseer nie.

Hoofpaaie was Woensdag gesluit nadat die oproeriges motoriste tussen Rustenburg en Pretoria met klippe bestook het. Die pad tussen Mooinooi en Brits was ook gesluit.

Die departement van gemeenskapsveiligheid in Noordwes het gesê drie vragmotors en ‘n voertuig is Dinsdagaand aan die brand gesteek.

Niemand is nog in hegtenis geneem in verband met die voorval nie.

DA betoog teen Eskom-monopolie

Die DA het Woensdag gesê die regering se monopolie op kragvoorsiening moet gebreek word en privaatelektrisiteitsprodusente moet in die mark toegelaat word om mee te ding, het Sapa berig.

“Kom ons breek die monopolie voor Eskom ons breek,” het Mmusi Maimane, parlementêre leier van die DA, aan ondersteuners in Johannesburg gesê.

Die DA het buite Megawattpark, Eskom se hoofkantoor, in Sunninghill betoog. “Skrap nou die kernooreenooms … Zuma en sy kabinet jaag hul eie pensioene uit hierdie ooreenkoms. Dit het niks te make met die behoeftes van Suid-Afrikaners nie,” het Maimane gesê.

Hy het ‘n beroep gedoen op die parlement om die Wetsontwerp op Onafhanklike Stelsels en Markoperateurs (ISMOB) goed te keur. Indien die wetsontwerp goedgekeur word sal dit privaatinstansies tot die mark toelaat.

Verlamde wag reeds 2 weke tevergeefs op dokters

Die woordvoerder van die Vrystaatse regering, Mondli Mvambi, het gevra dat die verlamde Carina Visagie, wat al langer as twee weke in Bloemfontein se Pelonomi-hospitaal se spinale afdeling lê, nie moed moet verloor nie.

Dit het dié week aan die lig gekom dat die 19-jarige Visagie reeds 18 dae ongeopereer in die hospitaal lê, weens ‘n tekort aan dokters.

Visagie was verlede maand in ‘n motor-ongeluk en het haar rug op die T6-werwel gebreek, het OFM berig.

Mvambi sê die regering werk hard daaraan om dokters by Pelonomi aan te stel en die publiek word gevra om geduldig wees.

Hy sê verlede jaar het die ortopedie-afdeling van die hospitaal soortgelyke probleme ondervind, maar dié is spoedig opgelos.