Zuma belowe werk en wetenskap

merakaPresident Jacob Zuma sê die regering het nog nie sy planne laat vaar om vyf miljoen nuwe werksgeleenthde teen 2020 te skep nie.

Statistiek Suid-Afrika het vroeër die week bekendgemaak dat die getal werklose mense in die tweede kwartaal van die jaar tot vier komma sewe miljoen toegeneem het – die grootste nog.

Tussen die eerste en tweede kwartale van vanjaar het 122 000 werksgeleenthede verlore gegaan.

Zuma het Donderdagaand in Johannesburg by die bekendstelling van die SAUK se 24-uur nuuskanaal op DSTV gesê die uitdaging is dat die ekonomie nie vinnig genoeg groei om werkskepping te bevorder nie.

Die Wetenskaplike Nywerheidsnavorsingsraad werk intussen onverpoosd om tegnologie te ontwikkel wat Suid-Afrikaners in staat sal stel om beter lewens te lei.

Die bestuurshoof van die WNNR, Sibusiso Sibisa het by die Raad se Meraka Instituut in Pretoria ‘n beroep op jong Suid-Afrikaners gedoen om wiskunde en wetenskap as vakke op skool te neem.

Hy het die Minister van Wetenskap en Tegnologie, Derek Hanekom, op ‘n toer vergesel van sommige van die projekte waaraan gewerk word.

Sibisa sê geleenthede soos die WNNR se Wetenskapsweek, wat vandeesweek plaasvind, is daarop gemik om belangstelling in wiskunde en wetenskap te help bevorder. – RSG

Wit boere het ‘geen rede tot paniek nie’

Dan Kriek
Dan Kriek

Die voorsitter van Vrystaat Landbou (VL), het boere Woensdag op dié organisasie se jaarlikse kongres in Bloemfontein gerusgestel dat blanke in die Vrystaat geen rede tot paniek het oor grondgryp nie.

Dan Kriek het VL se verbintenis tot ordelike grondhervorming geprys met die aankondiging dat sy provinsiale grondoudit afgehandel is.

Kriek, sê dié inisiatief is die afgelope 18 maande met die samewerking van die staat aangepak en maak die Vrystaat die pionier-provinsie op dié gebied.

Dit is ’n poging om die ongeregtigheid van die nalatenskap van die Wet op Naturellegrond van 1913 reg te stel.

Kriek het vroeër in reaksie op die honderdjarige herdenking van dié wet gesê die nalatenskap daarvan kan nie verdedig word nie.

Kriek sê die regering se mikpunt om 30% van grond wat in 1994 in wit besit was aan swart eienaars te oorhandig, is onafdwingbaar.

Vrystaat Landbou en die provinsie se departement van grondsake se volledige grondoudit wys dat meer as 10,775 miljoen hektaar (86,39%) landbougrond in die provinsie in wit hande is.

Die totale landbougrondoppervlak in die Vrystaat meer as 12,196 miljoen hektaar waarvan 152 700 hektaar (1,22%) in swart privaatbesit is, en 209 000 hektaar deur die staat vir swartes aangekoop is. Ongeveer 5,31% is in staatsbesit.

Prof. Nick Vink, hoof van die departement landbou-ekonomie aan die Universiteit van Stellenbosch, sê die hoë persentasie wit grondbesit toon dat grondhervorming ’n “algehele mislukking is”.

Vink en prof. Johann Kirsten, hoof van die departement landbou-ekonomie aan die Universiteit van Pretoria, was gassprekers op die kongres.

Kapers gooi ma en kleuter uit kar

hijacking‘n 31-Jarige wit vrou is Vrydagoggend deur drie kapers by n huis in Brakpan-Noord ingewag, waar sy elke oggend n persoon wat saam met haar ry, oplaai

Die vrou het versoek dat haar naam nie gepubliseer moet word nie.

Volgens haar man ry sy elke oggend min of meer dieselfde tyd vanaf hul huis in Brakpan-sentraal na Malanstraat, waar sy die ander persoon oplaai.

“Ek glo die kapers het haar al n rukkie lank fyn dopgehou, want dit is asof alles net mooi volgens hul plan verloop het”, het haar man gesê.

Die vrou het voor die huis stilgehou en die passasiersdeur oopgessluit.

Die oomblik toe sy dit doen het n man dadelik die deur oopgepluk, in die voertuig gklim en n vuurwapen teen haar kop gedruk.

‘n Tweede kaper het haar deur oopgemaak en haar veiligheidsgordel self losgemaak.

“My vrou het op dié stadium gevra of sy net ons seuntjie (2), wat in sy karstoeltjie op die agtersitplek was, kon uittel.”

Die kapers het haar toegelaat om dit te doen en toe sy die kind in haar arms het, het hulle haar en die kind uit die voertuig gepluk en op die sypaadjie neergestamp.

Die twee kapers het in haar Citi Golf weggejaag.

‘n Derde boosdoener, wat in n ligkleurige voertuig gewag het, het saam met hulle weggery.

Al die vrou se persoonlike besittings, soos haar handsak en selfoon, was ook nog in die motor.

“Ek is baie dankbaar dat my vrou en kind ongedeerd hiervan afgekom het”, het haar man gesê.

“Dit is belangrik dat mense weet dat dit op enige tyd en op enige plek kan gebeur.”

Die voorval word deur die SAPD ondersoek. – looklocal.co.za

 

 

Voortekkermonument spog met nuutste tegnologie

vmwaensBesoekers aan die Voortrekkermonument kan nou met die behulp van hulle slimfone die monument verken.

As paghouer van geskiedenis is die Voortrekkermonument byderwets die eerste monument in die land wat met slimfoontegnologie die belang van die Monument en ’n verduideliking van die tonele op die friese kan gee.

“Die tegnologie behels ’n QR-kode wat via die monument se Wi-fi op slimfone die besoeker toegang gee tot wetenswaardighede omtrent die monument en brokkies geskiedenis wat gekoppel is aan die tonele uitgebeeld op die friese,” het Sonja Lombard, besturende direkteur van die Voortrekkermonument gesê.

“Met behulp van die tegnologie het jy nie ’n toergids nodig nie. Die Wi-fi is gratis beskikbaar vir besoekers.”

Die nuwe tegnologie en ’n DVD met die naam ‘Vryheid’ wat die vryheidsideaal van die Voortrekkers verduidelik, is onder blyke van groot belangstelling tydens ’n kultuuraand bekendgestel.

Die DVD is tans in Afrikaans en Engels beskikbaar, maar sal later ook in Chinees, Duits, Spaans, Italiaans en in Portugees beskikbaar wees.

Die bekendstelling is voorafgegaan met sangnommers uit die FAK, ’n volkspele-vertoning deur die Erika volkspelelaer, die bekendstelling van eg eie Suid-Afrikaanse mampoerlikeurs en ’n boekvoorlesing uit Louis Trichardt se dagboek.

Pretoriase man skiet aanvaller dood

rooihuiskraal‘n Vermeende rower is Dinsdagaand in Rooihuiskraal, Pretoria, doodgeskiet.

Skote het Dinsdagaand in Rooihuiskraal afgegaan toe ’n man glo ‘n vermeende rower in selfverdediging doodgeskiet het.

Dié man, Karel Liebenberg, het na bewering die vermeende rower voor sy huis doodgeskiet nadat ’n vuurwapen op hom gerig is.

Met die aankoms vroeër by hul huis, het Liebenberg uit sy voertuig geklim om die veiligheidshek en motorhuisdeur oop te maak.

’n Oomblik daarna het hy opgemerk dat ’n silwer-grys Subaru sonder ’n nommerplaat agter hulle voertuig stilgehou het. Die voertuig het vir hom verdag voorgekom en hy het sy gelisensieerde vuurwapen uitgehaal.

’n Passasier het regs agter uit die voertuig geklim en ’n vuurwapen op Liebenberg gerig.

Volgens Liebenberg se prokureur, Peet du Plessis, is Liebenberg die hoof van die plaaslike blokwag en daarom dra hy ten alle tye ’n vuurwapen by hom. Weens vrees dat sy lewe in gevaar was, het hy twee skote op die verdagte gevuur.

Volgens Du Plessis het die bure en Liebenberg se vrou verskeie skote gehoor wat afgevuur is, wat moontlik kan aandui dat dié 33-jarige verdagte teruggeskiet het.

Die verdagte is raak geskiet en die ander verdagtes in die voertuig het van die toneel gevlug.

Liebenberg het dadelik die polisie ontbied. Met Sersant Michiel Roos se aankoms op die toneel het die verdagte nog geleef en Roos het die mediese dienste ontbied.

Ten spyte van mediese sorg, is die verdagte op die toneel dood verklaar.

“Die egpaar is nog in skok en erg getraumatiseer,” het Du Plessis aan Looklocal gesê.

Hy wou nie verdere kommentaar lewer totdat die verslae afgehandel is nie.

Volgens Generaal-Majoor Tommy Mthombeni was die reeksnommer van die oorledene se vuurwapen afgeskuur en elf rondtes van ammunisie is in die wapen gevind waarvan een patroon reeds in die kamer gelê het.

Mthombeni het bevestig dat ’n saak van poging tot kaping deur die polisie ondersoek sal word. ’n Geregtelike doodsondersoek sal ook gedoen word. – looklocal.co.za

DA, EFF sal saamwerk in Tlokwe

tlokweDie DA wil met die 14 geskorste ANC-raadslede in die Tlokwe-stadsraad in Potchefstroom in Noordwes saamwerk wat gehelp het om Maphetle Maphetle as vorige burgemeester te ontsetel.

Die nuwe burgemeester, Annette Combrink, sal amptelik vandag met haar pligte begin.

Sy sê sy sien uit na die moontlikheid om met die geskorste raadslede in ‘n koalisie saam te werk.

Van dié lede ondersteun Julius Malema se Ekonomiese Vryheidsvegters.

Die DA het voorheen aangedui dat hulle van die geskorste raadslede wat met die EFF simpatiseer, finansieel sal ondersteun.

Die Noord-Gautengse hooggeregshof in Pretoria het Maandag beslis dat Maphetle uit die kantore moet padgee.

Die ANC het gister sy planne om teen die uitspraak te appelleer, laat vaar, nadat die ontsetelde burgemeester eers vasgeskop het en nie die kantoor wou ontruim nie. – RSG/praag

Mugabe, die gunsteling

whatsappDie meeste ontleders glo Zimbabwe se president, Robert Mugabe het ‘n beter kans as die opposisieleier, Morgan Tsvangirai om die verkiesing te wen.

Mugabe se voorsprong is te wyte aan sy beheer oor die media, kuberruim, veiligheidsmagte en verkiesingslogistiek. Mugabe het alle Westerse waarnemers verbied om toesig te hou oor die verkiesing. Hy het Britse en Amerikaanse regerings beskuldig van ‘n anti-swart agenda.

Waarnemers van die Afrika Unie en die Suider-Afrikaanse Ontwikkelingsgemeenskap het die verkiesing intussen as vry en regverdig gaan verklaar. Ontleders meen die AU en SAOG is so desperaat vir ‘n geloofwaardige uitslag in die verkiesing dat hulle sommige probleme sal miskyk, solank daar nie openlike geweld plaasvind nie.

Die Afrika Unie sê aanvanklike bevindings rakende die verkiesing in Zimbabwe is dat dit vreedsaam en vlot verloop het. Die leier van die AU-waarnemerspan en voormalige president van Nigerië – Olusegun Obasanjo – sê daar is geen rede waarom die verkiesing nie as geloofwaardig beskou kan word nie.

Kiesers het gister in groot getalle by stembusse regdeur die land opgedaag om hul kruisies te trek.

Die MDC in Zimbabwe het egter ‘n lang lys van ongerymdhede opgestel in dié land se parlementêre en presidentsverkiesing.

Die party beweer dat twee miljoen stembriewe met dieselfde strepieskodes as bestaande stembriewe gedruk is. Die party sê ook dat groot getalle kiesers weggewys word weens die chaotiese kieserslys.

Die MDC beweer dat vervalste registrasiekaarte gedruk is, dat stempunte in verkeerde wyke is en dat kiesers in plattelandse gebiede geïntimideer word. Die sekretaris-generaal van die MDC, Tendai Biti sê die party het Woensdag steeds nie toegang tot die jongste kieserslys gehad nie.

President Robert Mugabe sê die verkiesing in sy land is om vir vryheid en regverdigheid te stem. Mugabe het sy kruisie in Harare getrek, en dit duidelik gemaak dat hy vir homself gestem het.

Vroeër het die polisie in Zimbabwe bevestig dat hulle die diefstal van kieserslyste in die Midlands-provinsie ondersoek. ‘n Polisiewoordvoerder, Charity Charamba wou nie meer inligting gee oor die ondersoek nie, maar het gesê dat verdagtes binnekort in hegtenis geneem sal word.

Die MDC beweer dat Zanu PF besig is met ‘n verbete kuberstryd wat toegang tot kommunikasie platforms soos Whatsapp en SMS-boodskappe beperk.

Die Zimbabwiese Verkiesingskommissie het die verkiesing as vry en regverdig bestempel. Die voorsitter van die kommissie, Justice Rita Makarau het onderneem om berigte van ongerymdhede te ondersoek.

Die Zimbabwiese polisie het mense opnuut gewaarsku wat probeer om voortydig uitslae oor die verkiesing uit te lek, dat hulle in hegtenis geneem sal word.

‘n Woordvoerder vir die polisie, Charity Charamba sê enigeen wat die uitslae vooruitloop, voordat dit amptelik deur die Zimbabwiese Verkiesingskommissie aangekondig word, loop die risiko om in hegtenis geneem te word, en dit sluit in die bekendmaking via die internet of sms-boodskappe.

Die waarskuwing bemoeilik nou planne deur sommige burgerregte-groepe wat die uitslae so gou moontlik bekend wil maak.

Mugabe het vroeër gesê dat hy dit sal aanvaar indien hy verloor. – RSG

VSA kan alles en almal aanlyn sien!

xkeyscore“Big Brother“ Amerika sien aanlyn, sonder toestemming, feitlik alles van almal. Met die program X-Keyscore bly daar weinig wat daar op die internet gebeur wat vir die Amerikaanse geheime diens verborge bly.

Dit blyk uit nuwe inligting wat die voormalige medewerker van die Amerikaanse geheime diens NSA, Edward Snowden, aan die Britse koerant The Guardian gelek het.

X-Keyscore is ‘n soort ‘Google‘ maar dan vir speurders van die Amerikaanse intelligensie. Met die program kan databases, e-pos, klets en die soekenjin–geskiedenis van feitlik elke individu op hierdie aarde deursoek word.

NSA het geen amptelike toestemming van owerhede nodig om die program te gebruik nie.

In opleidingsmateriaal noem die NSA die program ‘die mees omvattende soekstelsel ter wêreld‘.

In ‘n video–onderhoud sê die nog steeds voortvlugtige Snowden dat hy as NSA–medewerker ‘feitlik op almal aanlyn kon spioeneer‘.

“Vanaf my lessenaar kon ek almal afluister, van jou tot jy rekenmeesters, van ‘n aanklaer tot selfs die president, met slegs ‘n persoonlike e-posadres tot my beskikking,” sê Snowden.

Die onthulling kom tesame met nog ‘n fluitjieblaser, Bradley Manning, se verhoor wat tans voor ‘n krygsraad in Maryland uitspraak oor sy vonnis afwag.

Manning het duisende lêers aan die anti-geheimhoudingsorganisatie Wikileaks gelek. Manning gaan moontlik baie jare agter tralies deurbring.

Snowden hoop sy straf te ontduik en het in Rusland asiel aangevra. – Elsevier

Swemmers vol vertroue vir eindstryd

Van der Burgh
Van der Burgh

Die Suid-Afrikaanse swemmer Chad le Clos sê hy is ontspanne en vol vertroue voor vanaand se eindronde in die 200 meter vlinderslag by die Wêreld Swemkampioenskappe in Barcelona, Spanje.

Le Clos is een van drie Suid-Afrikaanse swemmers wat vanaand in eindrondes swem. Cameron van der Burgh en Giulio Zorzi het gekwalifiseer vir die eindronde van die 50 meter borsslag.

Le Clos en Van der Burgh is albei die gunstelinge om hulle eindrondes te wen, nadat hulle met die vinnigste tye gekwalifiseer het.

Van der Burgh het Maandag die silwermedalje in die 100 meter borsslag gewen.

Selfoondiewe teister hoërskoolkinders

birchleighTWEE 16-jarige seuns van die Hoërskool Birchleigh, Kemptonpark is beroof deur dieselfde groep mans in afsonderlike voorvalle ‘n week uitmekaar.

Die een seun se ma het gesê vier swart mans het haar seun en sy vriend, in Silverstraat kort na skool op 18 Julie voorgekeer terwyl hulle te voet was.

Hulle het in die rigting van Birch Acres gestap toe die swart mans uit ‘n kantstraat gekom het. Drie het bly staan ​​en gestaar na hulle, terwyl een na haar seun gestap het om kwansuis te vra hoe laat dit is.

Toe hy die derde keer vra, het hy na sy sak gereik na  ‘n mes of geweer, en haar seun het sy selfoon aan hom oorhandig.

Die ma het gesê die swarte het haar seun se telefoon uit sy hand geraap. Hulle het niks gedoen aan sy vriend nie, net omgedraai en weggestap, terwyl hulle lag.

Die volgende Donderdag 25 Julie op byna dieselfde plek, het dieselfde mans haar seun se vriend beroof, ook van sy selfoon. Die seun het daardie dag alleen geloop.

Mnr André Gloy, hoof van die Hoërskool Birchleigh, het gesê dat hulle byna op ‘n daaglikse basis hoor van skoolkinders wat van hul selfone beroof word. Hy waarsku gereeld kinders oor hierdie tipe gevaar. – looklocal.co.za