Karin Roodt – Bladsy 45

Dertig ANC-lede vas na onderonsie met EFF

Dertig lede van die ANC sal vandag in die landdroshof op Nkandla in KwaZulu-Natal op aanklagte van openbare geweld verskyn .

Hulle is die naweek in hegtenis geneem toe hulle die Ekonomiese Vryheidsvegters glo wou verhoed om ‘n huis aan ‘n behoeftige gesin by Nkandla te oorhandig.

Julius Malema, EFF-leier, wou namens sy party die huis neffens Nkandla aan ‘n arm gesin gee.

Ontstoke ANC-lede het hom ook met waterbottels bestook en verskeie polisievoertuie beskadig.

Die ANC in KwaZulu-Natal het die konfrontasie tussen die ANC en EFF Sondag skerp veroordeel.

Senzo Mkhize, ‘n provinsiale woordvoerder, het gesê hulle sal ondersoek instel na die voorval.

“Sommige van ons was nie daar nie, ons was by Mbombela. So nou probeer ons inligting uit hulle te kry. Ons sal die nodige stappe neem, want ons wil nie die indruk skep dat daar geen politieke verdraagsaamheid in KZN is of vrye aktiwiteit nie. “

Hy het bygevoeg dat die ANC wil toesien dat alle partye vryelik veldtogte voer sonder enige inmenging.

Loongeskilsamesprekinge by Zondereinde-myn hervat

Die mynwerkersvakbond NUM en die bestuur van Northam Platinum se Zondereinde-myn suid van Thabazimbi, sal samesprekings hervat te midde van die staking wat reeds drie maande duur.

Die staking het reeds R500 miljoen aan verlore inkomste gekos, en werkers het R100 miljoen aan lone afgestaan. Dit kom neer op ‘n kwart van die jaar se produksie wat nog nie gemyn is nie.

Northam is Suid-Afrika se vierde grootste platinumprodusent.

Die twee partye sal byeenkom om die loongeskil te probeer oplos. Sowel die vakbond as die bestuur het die hoop uitgespreek dat ‘n ooreenkoms bereik kan word.

Dit is die enigste myn waar NUM steeds die meerderheidsvakbond is. Amcu het ‘n jaar gelede die posisie as die dominante vakbond in die platinumbedryf oorgeneem.

Northam het vroeër ‘n verhoging van nege persent aangebied wat NUM verwerp het, terwyl die werkers 16% eis en ‘n verdere verhoging van 69% in toelaes.

Die bestuur het die eis as buitensporig beskryf.

Intussen het die mynwerkersvakbond, AMCU berigte ontken dat ontevrede lede wil wegbreek om hule eie vakbond op te rig.

Daar is glo beswaarde groepe in Rustenburg wat van plan is om hul eie vakbond te stig.

Amcu is die meerderheidsvakbond by Anglo American Platinum, Impala Platinum en Lonmin-myne en ontevredenes daar sê die voorsitter, Joseph Mathunjwa, het nie enige van sy beloftes nagekom nie.

Amcu het sy bestaan te danke daaraan dat ontevrede lede voorheen van die NUM af weggebreek het.

‘n Nasionale koördineerder van Amcu het egter gesê die dreigemente van die sogenaamde wegbreekgroep is moeilikheidmakers wat die vakbond wil saboteer.

Olifant in Knysnabos gewaar

Dalene Mathee sou ontsteld gewees het om te verneem van die olifant wat in die Knysnabos gewaar is.

Die olifant is pas in die Knysnabos deur ‘n versteekte kamera gefotografeer. Die kamera is opgestel vir luiperd-navorsing.

Voor haar dood het die skrywer, wie se bosromans wêreldwyd roem vir die Knysnawoud en sy legendariese olifante verwerf het, te velde getrek teen enige toersime-foefie rakende die olifante.

Die Knysna-olifante is veronderstel om besonder aggressief te wees.

Matthee, bekroonde skrywer van die bostrilogie en ‘n ere-boswagter, was ook bitter gekant teen die olifanthervestigingsprojek.

“Ek is siek en sat van die mens se inmenging. Eers word hulle uitgeskiet, en nou word hulle sonder ‘n keuse verskuif. Olifante is spesiale en hoogs intelligente diere. Hul manier van kommunikeer is bo die mens se verstand en hulle het ‘n spesifieke sosiale struktuur. Iets in my staan op daarteen.”

Sy was ook tot haar dood erg gekant teen die beheerde eksperiment om die uitsterwende troppie in die Knysnabos te red deur olifante van die Krugerwildtuin in te voer.

‘n Woordvoerder van SANparke, Nandi Mgwadlamba, sê die foto bewys dat die Knysnabos een van min plekke is waar olifante nog natuurlik voorkom.

Honderde wilde olifante het in die 1800’s in die Knysnawoud voorgekom, maar hulle is deur ivoorjagters en die verlies van habitat uitgeroei.

Olifantjag in die 1920’s is beskryf in die outobiografie van majoor PJ Pretorius in Jungle Man.

Die laaste keer wat ‘n olifant in die gebied opgemerk is, was volgens berigte in 2000, toe die wetenskaplike en skrywer, Lyall Watson, ‘n olifantkoei reg by die rand van die bos op die kuslyn gewaar het.

Daar, in die see net ‘n klipgooi ver, was ‘n blou walvis.

Watson het die diep gedreun van die olifantkoei gehoor terwyl sy uitstaar uit na die see waar die walvis was, en die hele prentjie het hom oortuig dat sy met die walvis wou kommunikeer.

Die bewaringskundige Gareth Patterson het DNS bewyse gevind dat ‘n trop van vyf of meer olifante nog in die bos woon.

Skoor sê Thandi se duur Duitse wa buitensporig

Die LUR vir Openbare Werke en Vervoer in Noordwes, Raymond Elisha sê die aankoop van ‘n nuwe motor vir die premier, Thandi Modise is deur die opposisie en sommige lede van Skoor tot politieke speelbal gemaak.

Elisha moes die omstrede aankoop van die voertuig aan Noordwes se Staande Komitee oor Openbare Rekeninge verduidelik.

Die luukse Duitse voertuig ter waarde van R1.3 miljoen is laat verlede jaar gekoop.

Die aankoop is gekritiseer omdat dit strydig is met die besnoeiingsmaatreëls wat die minister van Finansies in Oktober in sy mediumtermyn-begrotingsoorsig aangekondig het.

Die LUR hou vol dat die premier ‘n nuwe voertuig nodig gehad het omdat die vorige een probleme gegee het.

Skoor se provinsiale voorsitter, Patrick Chauke sê egter die prys van die motor is buitensporig.

Chauke sê die motor is eers in November bestel, ná die aankondigings oor besnoeiings gedoen is. – RSG

Metropolisie skiet smous in Pretoriase middestad

‘n Smous is doodgeskiet in Pretoria se middestad vir die weiering om sy voorraad aan Tshwane se metropolisie te oorhandig, het die Tshwane Handelaarsforum Donderdag gesê.

Die forum se voorsitter, Shoes Maloka het gesê Foster Jan Rivombo is Woensdag doodgeskiet deur ‘n metropolisiebeampte wat sy voorraad appels en piesangs wou konfiskeer .

Tshwane metropolisie se woordvoerder Isak Mahamba het vrae verwys na die burgemeesterskomitee se woordvoerder Blessing Manale , wat nie gister vir kommentaar bereik kon word nie.

Die Franse nuusagentskap Agence France- Presse het berig dat die polisie die saak ondersoek.

Die smouse het glo begin klippe gooi na die metropolisie, waarna hulle skote afgevuur het.

Die man wat geskiet is, was in sy vroeë dertigs en is dood nadat hy na die hospitaal geneem is.

Hy is glo in koele bloede geskiet, het die omstanders gesê.

Nadat die metrobeampte hom geskiet het, is hy in ‘n bakkie gelaai en het die beamptes nie ‘n ambulans ontbied nie, vir ongeveer drie ure lank.

Sommige smouse het ingegryp en geëis dat ‘n ambulans geroep word. Die polisie het die smouse wat tussenbeide getree het, in hegtenis geneem. Hulle is glo steeds in aanhouding.

“Die metropolisie bestuur hierdie stad soos ‘n mafia. Ons is aan hul genade oorgelaat,” het een smous gesê.

Die polisie kom glo daagliks en vra omkoopgeld en as hulle weier om te betaal , word hul voorraad weggeneem, sê hy.

Oos-Kaap sonder krag na storms

Die kragvoorsiener, Eskom werk onverpoosd om elektrisiteitstoevoer aan sowat 30.000 kliënte aan kusgebiede van die Oos-Kaap te herstel nadat dit gistermiddag deur ‘n storm getref is.

Verskeie dorpe langs die R72-pad is sedertdien sonder krag. Dit sluit in Peddie, Hamburg, Wesley en Mpekweni.

‘n Woordvoerder vir Eskom, Ntombekhaya Mafumbatha sê die krag is reeds by sowat 17.000 kliënte weer aangeskakel, en dat die oorblywende mense vanoggend weer elektrisiteit behoort te hê.

Sy sê in sommige dele sal kragpale wat deur weerlig geslaan is, vervang moet word, wat langer kan duur.

Die groter dorpe, Queenstown en Mthatha is ook deur storms getref.

Dramatiese moordaanslag teen Krejcir-ondersoekers gefnuik

‘n Moordaanslag op ‘n senior polisiebeampte en ‘n privaat forensiese ondersoeker wat gekoppel word aan ‘n ondersoek na die Tsjeggiese voortvlugtige Radovan Krejcir, is Donderdag gefnuik na ‘n dramatiese aanval op ‘n Johannesburgse hotel.

‘n Taakspan het die Rivonia Road Lodge laat Donderdagmiddag bestorm, net ure voor drie mense, waaronder ‘n 23-jarige vrou, glo saamgesweer het om kolonel Nkosana “Killer ” Ximba en Paul O’Sullivan te vermoor.

O’Sullivan hou reeds Krejcir se bewegings dop sedert hy in 2007 uit die Seychelle in die land aangekom het.

Krejcir het by meer as drie geleenthede gedreig om hom te laat vermoor.

Die polisie se spesiale taakspan wat gemoeid is met die ondersoek na die mafiabaas se onderwêreldbedrywighede, het ‘n wenk oor die beplande moord ontvang.

Vroeër Donderdag het ‘n Johannesburgse regter aan Krejcir borgtog geweier. Hy word beskuldig van ontvoering en poging tot moord.

Krejcir, twee van die Valke van Germiston en ‘n Sandtonse eiendomsontwikkelaar word daarvan beskuldig dat hulle in Junie die ontvoering en marteling van die broer van ‘n handlanger van Krejcir gereël het, wat na bewering 25kg tik van hom gesteel het.

Die Tsjeggiese sakeman wou na bewering die vennoot, wat werk by die OR Tambo Internasionale Lughawe, oorreed om hom te help om die dwelms na Australië te smokkel.

‘n Bron sê die drie het beplan om outentieke polisietoerusting te gebruik. Hulle het selfs sirenes en blou ligte gehad, en wou die vermeende slagoffers Donderdag van die pad aftrek en doodskiet. Die twee sou met ‘n R5-polisiegeweer vermoor word.

O’Sullivan het laasnag aan timeslive.co.za gesê hy het van die beplande moordkomplot te hore gekom nadat hy drie mans buite sy huis opgemerk het.

“Ek het drie mans buite my huis opgemerk en hulle uitgedaag. Hulle het gesê dat hulle misdaadintelligensie-agente is en my vertel van die moordplan teen my wat dieselfde middag sou plaasvind.

“Hulle het my gevra om met hulle saam te werk – wat ek gedoen het – wat toegelaat het dat die beamptes hierdie voornemende moordenaars in hegtenis kon neem,” het O’Sullivan gesê.

Swartrenoster-jagveiling in VSA oorval met doodsdreigemente

Die organiseerders van ‘n Amerikaanse veiling om ‘n swart renoster te jag, word oorval met doodsdreigemente.

Die Federale Buro van Ondersoek (FBI) ondersoek glo die anti-jag organisasies wat mobiliseer teen die veiling.

Maar die Dallas Safari Club, die gasheer van die grootste jagterskonvensie op die planeet, is vasbeslote dat hulle gaan deurdruk met die veiling.

Die klub beplan om Saterdag ‘n jagsafari wat ‘n Namibiese swart renosterbul in die visier het, op te veil.

Die klub het gesê hy verwag dat die jagpermit sal gaan vir enigeiets tussen ‘n kwart en R10 miljoen, wat hulle beplan om te skenk aan bewaringspogings in Namibië.

Die jag is glo goedgekeur deur die Namibiese regering en verskeie bewaringsinstellings.

Mislukte ivoortransaksie lei tot vier se dood

Die Zimbabwiese polisie stel ondersoek in na die dood van vier mense wat naby ‘n wildreservaat geskiet is.

Die liggame van ‘n man en vrou is in ‘n bakkie in ‘n rivierbedding naby die grens met Zambië gevind.

‘n Derde liggaam is naby die voertuig gekry en ‘n vierde liggaam is ‘n kilometer verder onthoof gekry. Al vier is geskiet.

‘n Polisiewoordvoerder sê die moorde was moontlik weens ‘n transaksie tussen stropers en ivoorhandelaars wat skeefgeloop het.

Meer as honderd olifante is verlede jaar deur stropers doodgemaak. – RSG

Bob Hewitt voor vir verkragting

Die voormalige tenniskampioen, Bob Hewitt, wat van verkragting beskuldig word, sal na verwagting vanoggend in die Boksburgse landdroshof verskyn.

Die 73-jarige Hewitt staan tereg op twee aanklagte van verkragting.

Een van die voorvalle het glo by Sun City in 1981 plaasgevind, en die tweede in 1982 in Boksburg aan die Oos-Rand.

Albei sy vermeende slagoffers was 16 jaar oud toe die voorvalle plaasgevind het en ‘n derde jonger as 18.

Hewitt staar benewens die aanklag van verkragting ook ‘n aanklag van onsedelike aanranding in die gesig.

Die voormalige Grand Slam-dubbelskampioen het die bewerings ontken en dreig om die vermeende slagoffers te dagvaar.

Hy is tans in Port Elizabeth woonagtig en kon weens ‘n siekte nie ‘n vorige keer in die hof verskyn nie, het sy prokureur Alwyn Griebenow aan die hof gesê.

Sy saak moes ‘n voorheen op op 4 Oktober aangehoor word.

Landdros Emmanuel Magampa het gesê ‘n lasbrief sal tot Hewitt se volgende verskyning weerhou word.

Die saak is uitgestel nadat die staat gesê het ‘n aansoek is ingedien om al drie aanklagte in een hof te hoor.

Tsjeggiese mafiabaas hoor oor borg

Die Tsjeggiese sakeman Radovan Krejcir behoort vandag te weet of hy borgtog toegestaan gaan word of nie.

Die Suid-Gautengse hooggeregshof gaan na verwagting sy uitspraak lewer in ‘n dringende aansoek deur Krejcir se regspan om die hof se besluit om hom borgtog te weier, om te keer.

Die aansoek is Vrydag in die hooggeregshof gebring. Krejcir, Desai Luphondo en twee lede van die Valke, Samuel Modise Maropeng en George Jeff Nthoroane is in November in hegtenis geneem.

Hulle word aangekla van ontvoering, aanranding en poging tot moord.

Hulle het na bewering in Junie verlede jaar ‘n man ontvoer en aangerand nadat sy broer met 25 kilogram tik verdwyn het wat hy uit die land moes smokkel.

Krejcir is op 13 Desember in die Palm Ridge landdroshof borgtog geweier. – RSG

Witte wat renosterstroper skiet voor vir moord

‘n Wit man wat aangekla word van poging tot moord op ‘n vermeende wildstroper, sal Maandag in die landdroshof op Malelane in Mpumalanga verskyn.

Die 31-jarige Richard Hume, die seun van die renoster- en buffelteler, John Hume, is op borgtog van vyfduisend rand vrygelaat.

John Hume is die grootste privaateienaar van renosters.

Hy het vroeër gesê dat die wet teen renostereienaars diskrimineer.

Volgens hom moet eienaars soms hul lewens waag om hul eiendom te beskerm.

“Ek het ‘n klein weermag om my diere te bewaak en dit kos my ‘n fortuin elke maand. Maar die wagte is bang om ‘n skoot op stropers te skiet, want as hulle hulle tref, sal hulle van moord aangekla word,” sê Hume.

Mpumalanga se polisiewoordvoerder, brig Selvy Mohlala, het gesê die polisie beskou die saak as “ernstig” en hulle “glo hy moet verantwoording doen”.

Die verdagte is in die kop geskiet en is na die hospitaal gehaas.

Die polisie sê die jonger Hume het na bewering op Sabelo Maphungla geskiet en hom gewond, terwyl hy met ‘n bakkie in die Mauricedale-wildreservaat gery het.

Nog twee mans wat saam met die gewonde man was, is van betreding en onwettige jag aangekla.

Regsgeding om CIA se rol in Mandela se arrestasie te toon

‘n Amerikaanse student het met ‘n regsgeding teen die CIA begin om meer oor Mandela se inhegtenisname te wete te kom.

Die veldtog word deur talle linkse anti-wit aktviste gesteun in die hoop om die konserwatiewe Amerikaners in ‘n slegte lig te stel, maar ook deur ontleders wat Mandela se rol in die aanhitsing van geweld en terreur wil ondersoek.

Die student hoop om dokumente te bekom wat na bewering toon dat die Amerikaanse intellegensiediens te nouste betrokke was om Mandela in 1962 vas te trek by ‘n padblokkade.

Mandela is na die inhegtenisneming skuldig bevind tydens die Rivonia-hofsaak, en moes die doodstraf kry weens hoogverraad nadat hy destyds ‘n gewelddadige oorname beplan het.

Hy is begenadig en vir 27 jaar tronk toe gestuur. Hy het nooit geweld afgesweer nie.

Ryan Shapiro, ‘n PhD student by die Massachusetts Institute of Technology, het met die regstappe begin nadat die CIA nie gehoor gegee het aan sy versoeke om onder Vryheid van Inligting toegang tot die besonderhede van die inhegtenisname te kry nie.

Hy het die versoek by die agentskap ingedien maar die Amerikaanse spioenasiediens wou dit nie vrystel nie.

Shapiro voer aan dat die CIA weier om die dokumente te oorhandig in weerwil van wetgewing wat dit moontlik maak.

Die CIA wou nie reageer op die kwessie nie, en sê hulle kan nie kommentaar op ‘n hangende hofgeding lewer nie.

Schumacher was glo self vir sy val verantwoordelik

Franse ondersoekbeamptes sê die sewemalige wêreldkampioenrenjaer, Michael Schumacher, het beslis buite ‘n aangeduide roete in die Franse Alpe geski toe hy op 29 Desember sy balans verloor en met sy kop teen ‘n rots geval het.

Sulke roetes, soms swart roetes genoem, is gewoonlik roetes wat buite die aangeduide ski-bane val met hindernisse wat nie aangedui word nie. Dit is gewoonlik net baie ervare skiërs wat sulke onaangeduide roetes beproef.

Die ondersoekers het weer bevestig dat die veiligheidsaanduidings by die Méribel-oord baie duidelik en streng volgens regulasie aangetoon was.

Die renjaer was tussen ‘n rooi roete, Les Chamois, en ‘n bloue, La Biche, teen ‘n hoogte van 2,700 meter. Hy het die ski’s gehuur en die kamera self aan sy helm vasgeheg voor die uitstappie.

Schumacher en sy seun Mick was eers die oggend op die rooi roete, waarvan hulle later afgewyk het.

Woensdag is bekend gemaak dat twee minute se beeldmateriaal van ‘n kamera op Schumacher se skihelm toon dat hy nie teen ‘n hoë spoed verongeluk het nie. Die spoed waarteen die ervare skiër geski het was “normaal”, sê hulle.

Die rotse waarteen hy geval het, was egter bedek met ‘n ligte laag sneeu wat hulle min of meer verskans het.

Een ondersoeker, kommandeur Stéphane Bozon, sê egter die helling was besonder nou en daar was nie baie plek om dmv draaie spoed te verminder nie.

Schumacher was waarskynlik self verantwoordelik vir die ski-ongeluk en sy ski-helm het waarskynlik ‘n erger uitkoms verhoed.

Hy is die afgelope twee weke in ‘n koma. Sy toestand word beskryf as steeds kritiek maar stabiel.

Ondersoekers het daarop gewys dat daar geen probleme met sy ski’s was nie. Hulle het ook aangedui dat die spoed bereken kan word uit die filmmateriaal, maar dit was nie ‘n element in die ondersoek nie.

Schumacher is steeds in ‘n medies-geïnduseerde koma in ‘n hospitaal in Grenoble na twee breinoperasies.