Etiket: VSA

Hillary op pad na die wenpaal

Hillary Clinton is heelwat nader daaraan om die Demokratiese Party se kandidaat in die presidentsverkiesing te word, met Bernie Sanders wat sukkel om by te bly.

Clinton het haar teenstander, Bernie Sanders, in al die deelstate waar gestem is – Florida, Noord-Carolina, Ohio, Illinois en Missouri – verslaan.

Sanders se kanse om Clinton se voorsprong met haar lang lys afgevaardigdes in te haal, lyk straks onmoontlik.

“Ons beweeg nader daaraan om die Demokratiese Party se benoeming te verseker en die verkiesing in November te wen,” het Clinton na afloop van die uitslae se bekendmaking verklaar.

Donald Trump se veldtog het nuwe momentum gekry.

Trump het Woensdag sleuteloorwinnings behaal in Illinois, Noord-Carolina en Florida

Die plaaslike senator Marco ­Rubio, het dadelik sy verkiesingsveldtog beëindig na sy swak vertoning.

Nadat bykans al die stemme getel is, het dit geblyk die 69-jarige Trump sou Missouri ook wen, maar hy het nie ’n volstrekte meerderheid in die belangrike kiesafdeling van Ohio nie.

John Kasich het in Ohio, sy tuisstaat, gewen.

Trump het mede-Republikeine Woensdag van ernstige gevolge gewaarsku indien hulle poog om ‘n bemiddelde konvensie te organiseer as hy nie ‘n volstrekte meerderheid kry nie

“Ek dink jy sal onluste hê. Ek dink jy sal onluste hê,” het Trump Woensdag op CNN opgemerk. “Ek verteenwoordig ‘n geweldige klomp, baie miljoene mense.”

Kasich se oorwinning het Trump, die party se voorloper, van sy 66 afgevaardigdes ontneem.

Dit maak dit moeiliker vir die miljardêr om die 1237 afgevaardigdes wat hy nodig het sonder ‘n vloerstryd, te kry.

VS-benoemingstryd: Donald Trump wen gister 4 uit 5 deelstate

Mnr. Donald Trump het gister vier uit die vyf benoemingstryde vir die Republikeinse Party se presidensiële kandidaatskap gewen: Florida, Missouri, Illinois en Noord-Carolina, maar moes die belangrike Ohio aan sy mededinger John Kasich afstaan. Ohio is die tuisstaat van Kasich, wat daar aan hom ‘n voordeel besorg het. Daarteenoor het Trump in Florida, tuisstaat van Marco Rubio, met 45,6% van stemme teenoor Rubio se 27,5% gewen. Weens die wenner-vat-als-stelsel in Florida, besorg dit 99 afgevaardigdes aan Trump.

Die 44-jarige mnr. Marco Rubio, het gisteraand Suid-Afrikaanse tyd sy uittrede uit die resies aangekondig. Hy was die gunstelingkandidaat van die sogenaamde “Republikeinse establishment” wat onder geen omstandighede wil sien dat Trump die benoemingstryd wen nie. Die enigste ander kandidaat wat deur die establishment gesteun word, John Kasich, het wel gisteraand Ohio verowwer en sodoende 66 afgevaardigdes ingepalm, maar loop baie ver agter Trump wat afgevaardigdes betref. Nogtans het Kasic aan sy ondersteunders gesê: “Ek sal nie ongesiens na die hoogste amp streef nie.”

Trump se ondersteuners voel ook goed oor sy oorwinning in Illinois, die deelstaat waar Chicago geleë is. Betogers het nog laas Trump se vergadering in Chicago ontwrig sodat dit gekanselleer moes word.

Met slegs drie kandidate nou oor in die Republikeinse resies na die kandidaatskap, lyk die stand van elkeen se afgevaardigdes ná 27 state só:

Aantal afgevaardigdes om ‘n Republikeinse meerderheidstem te verseker: 1237.

Donald Trump: 621

Ted Cruz: 396

John Kasich: 138

Mev. Hillary Clinton het gisteraand skoonskip gemaak en ‘n meerderheid van stemme teenoor haar mededinger Bernie Sanders in al vyf deelstate (Florida, Ohio, Noord-Carolina, Missouri en Illinois) verkry. Indien sy slegs 40% van stemme voortaan verkry, behoort sy die Demokratiese benoeming te kan impalm. Dog Sanders se ondersteuners hou vol dat mev. Clinton tot dusver bloot danksy die swart stem in Suidelike Amerika goed gevaar het en dat deelstate in die Noorde en Midde-Weste eerder vir hom gaan stem. Indien Sanders meer Demokratiese “superafgevaardigdes” verkry, staan hy ook nog ‘n kans vir die benoeming, dus gaan hy geensins tou opgooi nie.

Aantal afgevaardigdes om ‘n Demokratiese meerderheidstem te verseker: 2383.

Hillary Clinton: 1561

Bernie Sanders: 800

Trump en Hillary loop voor

Senatore Ted Cruz en Bernie Sanders het Saterdag betekenisvolle oorwinnings in hul aanslag op die Withuis behaal, maar dit was Donald Trump en Hillary Clinton wat weer eens hul opponent uitgestof het en die onbetwiste voorlopers is.

Trump, ’n Republikein, en Clinton, ’n Demokraat, het hul ding gedoen in die deelstaat Louisiana, het AFP berig.

Die res van die uitslae op “Super Saterdag” was verdeeld. Cruz het in Kansas en Maine geseëvier en sodoende sy aanspraak dat hy die beste alternatief vir Trump is, bevestig.

Senator Marco Rubio, wat sleg gevaar het, moet besin of hy sy veldtog kan omkeer of liewer die wedloop vaarwel moet wuif.

“Dankie Louisiana, en dankie Kentucky,” het Trump gesê minute nadat hy as die waarskynlike wenner in Kentucky, verklaar is. Hy het met vier persentasiepunte geklop.

Vir die Republikeine was die naweek se voorverkiesings die eerste ware toets om vas te stel of die ­politieke elite, onder aanvoering van die 2012-kandidaat, Mitt Romney, se desperate pogings om ’n stokkie voor Trump se aanslag te steek, wel vrugte afgewerp het.

Trump sê Romney se pogings het misluk. Hy het ook vir Rubio, wat deur menige politieke waarnemers beskou word as die beste hoop om Trump te verslaan, gesê om maar sy tasse te pak.

“Marco Rubio het ’n baie slegte nag gehad. Persoonlik vra ek hom om die wedloop vaarwel toe te roep,” het Trump gesê.

“Ek sal dit geniet om Ted (Cruz) een tot een aan te vat. Dit sal maklik wees,” het Trump bygevoeg.

Benewens die aantal verteenwoordigers wat hulle ingeoes het, kan sowel Cruz en Sanders aanspraak maak op nuwe momentum in die aanloop tot kritiese voorverkiesings in Michigan, Dinsdag en dan eerste-oor-die-wenstreep-verkiesings in Florida en Ohio op 15 Maart.

Trump het reeds geseëvier in 12 van die 19 state waar voorverkiesings gehou is. Cruz se oorwinnings dui egter daarop dat, ondanks die feit dat Trump in alle waarskynlikheid die Republikeine se nominasie sal kry, dit steeds nie ’n uitgemaakte saak is nie.

Die konserwatiewe senator het bo verwagting in Kansas gepresteer waar hy 48,2 persent van die steun gekry het, meer as dubbel soveel as Trump se 23,3 persent.

Rubio was derde met 16,7 persent gevolg deur Ohio se goewerneur, John Kasich, met 10,7 persent.

Aan die Demokrate se kant het die selfverklaarde demokratiese sosialis, Sanders, oorwinnings in Kansas en Nebraska behaal wat meebring dat hy in sewe van die 18 Demokratiese voorverkiesings die oorwinnaar was.

Clinton het egter ’n betekenisvolle oorwinning in Louisiana behaal met 59 Demokratiese afgevaardigdes wat allerweë as die naweek se grootste prys beskou is. Kansas het 37 afgevaardigdes en Nebraska 25.

Die voormalige minister van buitelandse sake en eerste dame, het Louisiana, met sy sterk Afro-Amerikaanse kieserskorps oorheers.

Sanders het gewen in die ander twee state, met betekenisvolle wit bevolkings, ’n demografie waarin hy goed vaar.

Noord-Korea se bedrywighede in Namibië raak SAOG

Veiligheidsraad-resolusies is deur Namibië verbreek deur toe te laat dat Noord-Korea “wapenfabrieke of ander militêre geriewe” oprig.

Dit is strydig met die kernsperverdrag wat die land as VN-lid onderteken het en raak die hele SAOG-streek.

Die Noord-Koreaanse staatsmaat­skappy Mansudae Overseas Projects Group of Companies (MOP) het glo bande met Korea Mining Development Trade Corporation (KOMID) waarteen daar internasionale VN-sanksies van krag is.

‘n Ondersoekverslag is op 25 Februarie deur ‘n taakspan wat Noord-Korea se kernwapenprogram monitor, aan die Veiligheidsraad van die VN voorgelê.

Volgens die taakspan-aanbaveling “is Mansudae Overseas Projects verbind aan KOMID, Noord-Korea se primêre wapenhandelaar en hoofuitvoerder van goedere en toerusting wat verband hou met ballistiese missiele en konvensionele wapens”.

Luidens die verslag beweer die “Namibiese owerhede dat hulle nie bewus is van die bande tussen die twee entiteite nie”, maar voeg by dat Noord-Koreaanse arbeiders “so onlangs as Augustus 2015 ­konstruksiebedrywighede by ’n ander militêre basis in Suiderhof onderneem het”.

Namibië het nog nie op die aanklag gereageer nie. Die Republikein het die bewerings ondersoek.

Die reusegebou wat tans neffens die weermagbasis in dié Windhoekse woonbuurt gebou word, is volgens inligting die nuwe hoofkwartier van die Namibiese weermag.
Satellietbeelde van die militêre basisse by Luiperdsvallei en Oamites suid van Windhoek wat so onlangs as vroeg verlede maand deur Google Earth opgelaai is, wys reuse-aanlegte waarvan die bouwerk volgens inligting deur Noord-Korea gedoen is.
Republikein se ondersoekspan het in antwoord op ’n vraag oor dié aanlegte, die volgende antwoord van ’n ingeligte bron ontvang: “Die een f­asilitieit is ’n ammunisieopslagplek met ’n reeks van aanwendings – vanaf pistole (handwapens), tot gewere, artillerie, vliegtuie en ander wapentuig. Die ander fasiliteit is ‘buite perke’. Daar is glo ’n wyer SADOG-konteks.”

Karel Combrinck: Donald Trump – iets nuuts?

Die meeste van ons sal seker uitsien na ‘n suksesvolle kandidatuur vir mnr Trump in die komende presidentsverkiesing. Ons weet natuurlik nog nie presies wat hy gaan doen en sê as hy eers president is nie, maar die voorlopige tekens lyk belowend.

Nou moet ons egter nie die fout maak om te dink dat mnr Trump se verkiesing ‘n uitgemaakte saak is nie, want mnr Trump het sterk, maar ook swak elemente in sy mondering en soos dit dikwels gaan, kan sy sterk punte ook mettertyd teen hom werk. In elk geval moet daar nog baie water in die see loop voor die presidensiële verkiesing uiteindelik oor agt maande plaasvind.

Mnr Trump se sterkste punt, behalwe uiteraard sy persoonlikheid, is die feit dat hy onafhanklik is van ryk borge en dat hy self vir sy verkiesingsveldtog kan betaal. Hy hoef dus nie die rituele agteroorbuigings te maak voor die borge en ander lobbies nie waarvan sommige, soos ons weet, magtiger is as ander. Dit lyk reeds duidelik dat mnr Trump ‘n nuwe rigting gaan inslaan bv. wat betref vriendskaplike betrekkinge met Rusland en ‘n meer ewewigtige beleid ten opsigte van die Midde-Ooste.

Pas weer kwaak Leëpot Scholtz weer die Navo-bevelvoerder genl Philip Breedlove se verklaring na dat Rusland doelbewus die situasie in Sirië vererger ten einde ‘n verleentheid vir Europa te skep. Duidelik wil die Amerikaanse establishment van mnr Poetin ‘n muishond maak en vyandigheid teenoor Rusland aanstook ten einde munt daaruit te kan slaan. Ons sien dit mos ‘n tydlank al aankom.

Donald Trump se sterkste punt is dus sy finansiële onafhanklikheid. Terselfdertyd is dit ook vir hom ‘n bedreiging aangesien sy onafhanklike beleid, veral ten opsigte van betrekkinge met Rusland, die gevaar inhou om die multimiljard industrieel-militêre belangegroep teen hom die harnas in te jaag; hulle jeuk vir ‘n konfrontasie met Rusland. Dit sal welkome nuus wees indien mnr Trump aan hierdie gevaarlike spiraal ‘n einde kan maak.

Die feit dat mnr Trump niks benodig van die groot geldlobbies nie en dus geen beloftes aan hulle hoef te maak nie, beteken ook dat hulle geen belang het om hom te steun nie en eerder daarby mag baat om Hillary Clinton te steun wat by uitstek ‘n kandidaat vir die miljoenêrs is. Mnr Trump se onafhanklikheid maak dus dat hy gevaar loop om die steun van die miljoenêrs aan beide die Republikeinse en Demokratiese kant te verloor. Hy is ongetwyfeld van hierdie moontlikheid bewus, maar dis ‘n risiko waarmee hy bereid sal moet wees om saam te leef ten einde onder die diktate van die geldlobbies uit te kom. Op sterkte van sy finansiële krag kan hy bekostig om die steun van die geldmagte te ontbeer. Weens die meer populistiese aard van sy verkiesingsveldtog het hy aan die ander kant dalk ‘n beter kans as sy opponente om die populêre stem te trek.

Niks is egter seker nie. Mnr Bernie Sanders, die ander mededinger aan Demokrate-kant, het pas op Super-Dinsdag veld verloor teen Hillary Clinton weens die negerstem in die suidelike state. Die feit dat mnr Sanders ‘n kampvegter vir die gewone mense teen die groot geldmagte is, het skynbaar aan die swart steun vir Clinton geen verskil gemaak nie.

‘n Sleutelfaktor in Amerikaanse presidentsverkiesings die afgelope dekades en nog ‘n area waar mnr Trump nie te sterk staan nie, is dus die negerstem. Die Amerikaanse negerbevolking staan op vyftigmiljoen en die Latino’s (Spaanssprekendes) is nog meer. Normaalweg is die stempersentasie onder negerkiesers laag. Met die laaste twee presidentsverkiesings en Obama as kandidaat het hulle egter bankvas vir die swart kandidaat gestem. Dit beteken terselfdertyd dat hulle nou ontdek het dat hulle stem in ‘n presidentsverkiesing beslissend is.

Dis onwaarskynlik dat die meerderheid Negers en Latino’s vir mnr Trump sal stem en om die verkiesing te kan wen, sal hy dus die steun van die oorgrote meerderheid van die blanke kiesers op hom moet verenig. Gaan hy daarin slaag ? Kom ons hoop maar so. ‘n Feit wat mnr Trump onder oë sal moet sien, is dat die negerstem voortaan bepaal wie die president van Amerika is. Waarop dit neerkom, is dat ‘n minderheid inderdaad beslis wie die meerderheid regeer. Dit beteken terselfdertyd ook dat die Amerikaanse demokrasie besig is om te faal. Kom ons hoop maar mnr Trump is nie die slagoffer daarvan nie.

Super Trump Dinsdag

Die grootste dag van die voorverkiesingsveldtog, Super-Dinsdag, is wanneer die meeste Amerikaanse kiesers stem om hul partykandidaat aan te wys. Republikeine kon die helfte van hul afgevaardigdes kies, en Demokrate ‘n derde.

Donald J. Trump se wenveldtog het sy gewildheid oor ‘n breë spektrum beklemtoon.

Trump en Hillary Clinton het as die onderskeie voorlopers in hul partye se presidentsbenoemings uitgestaan.

Trump het tot dusver in sewe deelstate gewen in die Republikeine se benoemingstryd in vergelyking met die twee wat sy naaste teenstaander, Ted Cruz, ingepalm het.

Cruz het tydens ‘n toespraak ‘n beroep op die ander kandidaat, Marco Rubio, gedoen om aan die wedloop te onttrek en by hom aan te sluit om Trump te verslaan. Ted Cruz is van die Republikeine.

Hillary Clinton is in die Demokrate se voorverkiesings ook die duidelike voorloper en het reeds in sewe deelstate gewen.

Die miljardêr-sakeman het ondermeer Alabama, Georgia, Massachusetts en Tennessee, asook Arkansas, Vermont en Virginia ingepalm en daardeur gewys dat hy plaaslike en ideologiese verskille in die Republikeinse Party te bowe gekom het.

Die teorieë oor hoe om Trump te keer, hoop intussen op.

Sy teenstanders hoop op ‘n ineenstorting van sy ondersteuningsbasis deur na hulle as “wit gemors” te verwys of ‘n konsolidasie van anti-Trumpkiesers agter net een kandidaat.

Hierdie twee dinge wil klaarblyklik nie gebeur nie. En as dit nie binne die volgende twee weke gebeur nie, is Trump op koers om die Republikeinse benoemingstryd te wen.

Obama takel Trump

Met die gewilde miljardêr, Donald Trump, steeds die voorloper onder die Republikeine, het pres. Barack Obama nou ook tot die stryd toegetree en in ‘n onderhoud gesê Trump sal nie president word nie, omdat hy vertroue in die oordeel van Amerikaners het.

“Om die president te word, is ernstige werk, en nie dieselfde as om die gasheer van ‘n geselsprogram of werklikheidsprogram op televisie, ‘n vermaaklikheidskunstenaar, ‘n promotor of ‘n bemarker te wees nie,” het Obama gesê.

Trump het egter dadelik teruggekap en gesê Obama moes bly wees hy wat Trump is, het nie as kandidaat in die vorige verkiesing gestaan nie.

Obama het in dié verkiesing geseëvier oor die Republikeinse kandidaat, Mitt Romney. “As ek die kandidaat was, sou Obama nie ‘n twee termyn president gewees het nie,” het Trump gesê.

Trump geniet volgens meningspeilings 38 persent van Republikeine se steun en is 16 punte voor sy naaste teenstaander, Ted Cruz.

Aan die Demokrate se kant, geniet Hillary Clinton 56 persent van die steun teenoor Bernie Sanders wat 38 persent van die steun geniet. Clinton se grootste steun kom van veral vrouens en swart kiesers.

Suid-Carolina, waar die volgende rondte voorverkiesings gehou sal word, word as belangrik geag vir kandidate omdat dit die deelstaat is waar die eerste voorverkiesing in die suide van die land plaasvind.

Die deelstaat is ‘n Republikeinse vesting, met 65 persent van die inwoners wat hulle as wedergebore Christene bestempel.

Ondertussen duur die debat oor die opvolger van die ontslape regter van die hooggeregshof, Antonin Scalia, voort.

Obama het reeds aangedui dat hy Scalia se opvolger sal aanwys, maar Republikeine sê hulle sal sy nominasie in die senaat blokkeer. Hulle meen dit behoort die prerogatief van die volgende president, wat in Januarie 2017 aan bewind kom, te wees om die posisie te vul.

Obama hou egter voet by stuk en sê hy sal iemand met wat erns het met “die demokrasie en die regstaat”, waarskynlik ‘n Demokraat, benoem.

Sommige Republikeinse senatore het egter aangedui hulle sal wag om te sien wie die genomineerde is, voor hulle besluit om die kandidatuur te steun al dan nie.

Twee Republikeine blaas die aftog

Die Amerikaanse deelstaat New Jersey se Goewerneur Chris Christie en voormalige sakevrou Carly Fiorina het uit die Republikeine se benoemingstryd getree.

Hulle het beide die beëindiging van hul veldtogte vir die 2016 Republikeinse nominasie aangekondig, en ruimte gelaat in die veld van Donald Trump se teenstanders

Dit beteken ook minder mededingers vir Trump in die 8 November presidensiële verkiesing.

‘n Senior medewerker het aan Reuters bevestig dat Christie sal onttrek, ‘n dag nadat die dapper Republikein sesde geëindig het in New Hampshire.

Dit het tot twyfel oor sy lewensvatbaarheid as ‘n kandidaat gelei.

Mede-Republikein Fiorina, ‘n voormalige uitvoerende hoof van Hewlett Packard, het op Facebook aangekondig dat sy haar veldtog gaan opskort.

Trump se oorblywende teenstanders, die meeste van hulle hoofstroom-Republikeine, sal waarskynlik baat vind by die twee se vertrek, wat sewe Republikeine laat in ‘n veld wat voorheen uit 17 kandidate bestaan het.

Christie het die grootste deel van sy veldtog se hulpbronne in New Hampshire gestort en het ‘n goeie vertoning daar as van kritieke belang gesien.

Hy kon egter net sowat 7 persent van die stemme Dinsdag op homself verening, ten spyte van ‘n veglustige teenwoordigheid in ‘n Republikeinse debat verlede naweek.

Siriese vredesonderhandelinge tydelik gestaak

Die Verenigide Nasies (VN) se afvaardiging na Sirië het aangekondig dat die vresamesprekings in Genève, Switserland, tydelik gestaak word.

Dit sal glo later vandeesmaand hervat word.

Te midde ’n toename in die felheid van gevegte in dié land, is Rusland besig om Westerse ISIS-jihadiste op die slagveld te verdryf.

Die suksesvolle Russiese lugveldtog is tans besig om die gang van die onderhandelinge te bepaal, iets wat die VSA tot dusver wou vermy.

Steffan de Mistura van die VN het ná ’n vergadering met opposisieleiers aan joernaliste gesê “dit is nie die einde nie and dit beteken nie die samesprekings het misluk nie”.

Hy sê beide kante stel belang “om die politieke proses aan die gang te kry” en dat hy 25 Februarie as datum vir hervatting van die vredesamesprekings gekies het.

Die aankondiging kom slegs twee dae nadat De Mistura vir die eerste keer in twee jaar met die hervatting van die samesprekings begin het.

Dis daarop gemik om ’n einde te bring aan die vyf jaar lange oorlog waarin 250 000 mense gesterf het en tot die ontheemding van 11 miljoen mense gelei het.

Sneeustorms verlam ooste van VSA

Miljoene Amerikaners moes tonne sneeu buite hul huise verwyder nadat een van die ergste winterstorms in negentig jaar die oostelike deel van die land getref het.

Bykans 70 sentimeter sneeu het in Central Park in New York geval, die tweede meeste sedert daar in 1869 met rekordhouding begin is.

Ten minste 18 sterftes word met die uiterste toestande verbind.

In Washington sal die lughawens na verwagting steeds gesluit bly. Die stad se burgemeester, Muriel Bowser, sê dit sal dae neem om die sneeu op te ruim.

Sy het motoriste ook gevra om nie paaie te gebruik nie.

Die Suid-Afrikaanse Lugdiens het intussen sy vlugte van Johannesburg na Washington DC en New York Sondag hervat nadat die reisbeperkings weens die sneeustorms opgehef is.

‘n Woordvoerder van SAL, Tladi Tladi, sê die besluit om die vlugte te hervat , is geneem na inligting wat daarom dui dat die weersituasie gaan opklaar of sodanig sal wees dat die SAL se vlugte op ‘n veilige manier daar sal kan land.

Meer as 5 000 vlugte moes gekanselleer word, hoofsaaklik in Noord-Carolina en Washington DC.

Die Amerikaanse deelstate Arkansas, Tennessee en Kentucky moes die ergste sneeu, ysreën en reën trotseer en in Arkansas en Tennessee is staatskantore Vrydag weens die storm vroeg gesluit.

Skole en universiteite in die suidooste moes ook sluit en inwoners is aangeraai om voorrade gebottelde water, kos en ander noodsaaklikhede aan te skaf.

Die Amerikaanse nasionale weerdiens het die storm as “verlammend” beskryf.

Navorsers op die spoor van Salem-heksejag

‘n Span Amerikaanse navorsers wat geskiedkundige dokumente en 21ste eeu argeologiese tegnieke gebruik het, het die presiese plek bevestig van die Salem-heksejag.

Geen oorblyfsels van ‘n galg of grafte kon egter opgespoor word nie. Die grond is te vlak en klipperig waar die sogenaamde verhore plaasgevind het.

Op dié plek is 19 onskuldige mense gedurende die Salem hekse-verhore meer as drie eeue gelede gehang.

Die plek, bekend as Proctor’s Ledge, is ‘n klein stukkie grond in die woude tussen twee woonbuurtstrate en agter die Walgreens apteek, het Salem Staatsuniversiteit se geskiedenisprofessor emeritus, Emerson (Tad) Baker, ‘n lid van die seweman span gesê.

Twintig mense wat in 1692 van heksery in Salem verdink is, is glo gedurende ‘n vlaag van angs opgehang.

Dié gebeure is glo aangedryf deur bygelowigheid, vrees vir siektes en jaloesie. Negentien is gehang en een man is gestenig.

VSA stel nuwe sanksies teen Iran in

Iran het nuwe Amerikaanse sankies teen die Islamitiese Republiek veroordeel en gesê dit is onwettig.

Die land sal voortgaan om konvensionele militêre toerusting te ontwikkel, het Reuters berig.

Amerika het Sondag sanksies teen 11 maatskappye en individue, wat verskaffers vir Iran se ballistiese missielprogram is, aangekondig onder druk van Israel.

Die aankondiging is met twee weke vertraag om nie die naweek se vrylating van Amerikaanse gevangenes in gevaar te stel nie.

Ondertussen is die lot van die voormalige FBI-agent, Robert Levinson, onbekend nadat hy in 2007 in Iran verdwyn het. Hy was nie deel van die uitruiling van gevangenes tussen Iran en Amerika die naweek nie.

“Die Islamitiese Republiek sal op hierdie verswarende en propagandistiese maatreëls reageer deur sterker as ooit voort te gaan met sy wettige missielprogram en om sy verdedingsvermoë te ontwikkel,” het die ministerie van buitelandse sake in ‘n verklaring gesê.

Iran het in Oktober 2015 missieltoetse uitgevoer wat deur die Verenigde Nasies bestempel is as ‘n verbreking van ‘n resolusie, wat die land verbied om missiele te ontwikkel wat kernplofkoppe kan dra.

Iran hou vol die missiele dra bloot konvensionele wapens.

‘n Woordvoerder vir die buitelandse ministerie, Hossein Jaberi Ansari, sê Washington se verkoop van wapentuig aan sy bondgenote in die Midde-Ooste, ter waarde van miljarde dollars jaarliks, word in “oorlogsmisdade teen Palestyne, Libanese en Jemeense burgers” gebruik.

“Die Amerikaanse sanksies teen Iran se ballistiese missielprogram het geen wettige of morele legitimiteit nie,” het hy gesê.

Die koerante, Kayhan en Vatan-e-Emrooz het die nuus op hul voorblaaie uitbasuin. “Sanksies is terug!” het die opskrif in Kayhan gelui.

In die artikel word Teheran se opperleier, die ajatolla Ali Khamenei, aangehaal wat sê dat nuwe sanksies, onder enige voorwendsel, ‘n verbreking van die kern-ooreenkoms sou wees.

Sanksies teen Iran opgehef

Iran het Saterdag ’n reusetree vorentoe gegee om sy internasionale afsondering te beëindig, toe sanksies teen die land opgehef is.

Die geskiedkundige kernooreenkoms met verskeie wêreldmagte wat in Julie gesluit is, het uiteindelik in werking getree, het AFP berig.

Iran se pres. Hassan Rouhani, wie se verkiesing in 2013 gehelp het om die reuse diplomatieke poging vir die 14 Julie Wenen-ooreenkoms van stapel te stuur, het dit as ’n “glorieryke oorwinning” vir die “geduldige nasie van Iran” verwelkom en as ’n “nuwe hoofstuk” in Teheran se betrekkinge met die res van die wêreld beskryf.

Die dag van implementering van die ooreenkoms het aangebreek nadat die Internasionale Atoomenergie-agentskap (IAEA) se inspekteurs bevestig het dat Iran ál die maatreëls nagekom het waarop ooreengekom is.

Die hoof van buitelandse sake van die Europese Unie (EU), Federica Mogherini, wat die ses groot wêreldmoonthede verteenwoordig het, het gesê dat “multilaterale en nasionale ekonomiese en finansiële sanksies wat verband hou met Iran se kernprogram opgehef word”.

Dit sluit in sanksies teen Iran se noodsaaklike olie-uitvoere. Rouhani het ’n “jaar van voorspoed” vir sy land voorspel.

Die aankondiging is gevolg deur die nuus van uitruiling van gevangenes tussen Amerika en Iran, nóg ’n teken dat betrekkinge tussen die twee ou vyande aan die verbeter is.

Verdere stappe deur Iran sal gekombineer word met uiters noukeurige inspeksies deur die IAEA en dit sal vir ’n jaar duur.

Iran het nog altyd ontken dat die land kernwapens wil hê en hou vol sy kernaktiwiteite is uitsluitlik vir vreedsame redes soos die opwekking van elektrisiteit.

Die ooreenkoms het meegebring dat Amerika en Iran nou op die pad na beter betrekkinge is, 35 jaar nadat die Islamitiese rewolusie die Amerikaans-gesteunde sjah uit die kussings gelig het.

Die VSA het egter nuwe sanksies teen Iranse maatskappye en individue ingestel oor ‘n onlangse ballistiese missieltoets.

Die nuwe sanksies raak 11 entiteite en individue gekoppel aan die missielprogram en sal hul gebruik van die Amerikaanse bankstelsel verhoed.

Strenger Amerikaanse wetgewing kan leeujag knou

Strenger nuwe Amerikaanse wetgewing rakende die invoer van leeu-trofeë gaan ’n beduidende impak op die Suid-Afrikaanse toerismebedryf hê.

Dit is volgens Melville Saayman, toerismekenner verbonde aan die NWU se Potchefstroomkampus.

Sy kommentaar aan OFM volg nadat dit bekend gemaak is dat die nuwe wetgewing op 22 Januarie in werking sal tree.

Saayman meen dit gaan ’n direkte invloed hê op die inkomste wat gegenereer word uit jag, veral omdat leeus so gesog vir trofeë is.

“Dis eintlik ons grootste bron van inkomste as jy na enkele items kyk. So dit gaan vir seker ‘n invloed daarop hê. Ek dink wat amper vir my nog meer belangrik is, is die feit dat as Amerika hierdie tipe van aksies loods, het dit gewoonlik ‘n afwentelingseffek op ander lande.

“So ons kan dalk sien dat meer lande so ‘n tipe van reaksie gaan toon, wat dan natuurlik die effek baie groter gaan maak as wat ons dit op die oomblik gaan voel.”