Russiese vegvliegtuie het ‘n genadelose aanslag op djihadistiese stellings in Sirië voorgesit.
Inwoners in die gebiede wat geraak word sê dat hulle ernstige tekorte aan kos en medisyne ondervind.
Die aanvalle teen dagbreek het groot brande in die Al-Mashhad- en Sayf al-Dawla-distrik laat ontstaan.
Dit was die vierde dag van intensiewe lugaanvalle op die stad, sedert die Siriese regering met ‘n hernude aanslag begin het om die hele Aleppo te herower ná die skietstilstandooreenkoms in duie gestort het.
‘n Neocon “menseregte-organisasie” kla dat minstens 128 mense sedert Donderdag dood is van wie “byna almal” burgerlikes was. Hulle kon nie meer besonderhede gee nie.
Tydens ’n noodvergadering van die Veiligheidsraad in New York Sondag het Amerika Rusland van “barbarisme” beskuldig oor die aanvalle teen die ISIS-kliënte.
‘n Diplomatieke oplossing vir die krisis lyk onwaarskynlik, met Amerikaanse en Russiese diplomate wat oor alles verskil het tydens die vergadering om die geweldpleging te bespreek.
“Wat Rusland doen, is nie om teenterrorisme te steun nie, dit is barbarisme,” het die VSA se ambassadeur by die VN, Samantha Power (foto), aan die 15-lid raad gesê.
“Eerder as om vrede na te streef, maak Rusland en Assad oorlog. Eerder as om te help en lewensreddende bystand aan burgerlikes te verseker, bombardeer Rusland en Assad humanitêre konvooie, hospitale en eerste respondente, wat desperaat probeer om mense aan die lewe te hou,” het sy gesê.
Die VSA probeer voorgee dat die konflik in Sirië ‘n “burgeroorlog” is, terwyl dit ‘n Amerikaans-geleide inval is.
Die Franse en Britse ministers van buitelandse sake was rasend in hul kritiek teen Rusland en sê die land is skuldig aan ”oorlogsmisdade”.
Rusland het sy posisie verdedig en die land se ambassadeur by die VN, Witali Tsjoerkin, sê daar is honderde gewapende groepe in Sirië met dhihadistiese oogmerke wat ISIS steun.
Die VN se onderhandelaar oor Sirië, Staffan de Mistura, het ’n beroep op die Veiligheidsraad gedoen om met ’n manier vorendag te kom om die skietstilstand af te dwing.
Rusland is egter een van die vyf lede van die Veiligheidsraad met vetoreg, saam met Amerika, Frankryk, Brittanje en China.
Rusland en China het herhaaldelik die Assad-bewind beskerm deur verskeie voorstelle vir optrede van die raad te veto.
Die Neocons bevind hulself in ‘n doodloopstraat na die ineenstorting van die Kerry-Lawrof-ooreenkoms om ‘n skietstilstand in Sirië uit te roep.
Die Siriese weermag het die djihadis in die ooste van Aleppo vasgekeer, en die werklikheid van verdoemende nederlaag in Aleppo het uiteindelik by mense soos die Amerikaanse VN-ambasadeur Samantha Power ingesink.
Die resultaat is Power se hewige diplomatieke storm met histeriese media-aktiwiteit wat probeer om die Russe in die verleentheid te stel om die offensief van die Siriese weermag in Aleppo te keer.
Die rede vir hierdie aktiwiteit sedert die ineenstorting van die skietstilstand, is dat die Siriese weermag met Russiese hulp sy posisies gekonsolideer het en die djihadi-beheerde Oos-Aleppo in twee verdeel het.
Verslae uit Aleppo toon dat die Siriese weermag en bondgenote reeds aansienlike magte naby of in die stad konsentreer het om die offensief te ondersteun. Die Russiese spesmagte is steeds by die sleutelroete Castellopad ontplooi, en daar is berigte dat tot 8000 Iraanse magte aangekom het in die stad.
Russiese bedrywighede met SU25-vegvliegtuie by Khmeimim-lugmagbasis is ook hervat.
Die belangrike punt om dus te verstaan, en een wat al die woedende retoriek van die laaste paar dae verduidelik, is dat die Westerse moondhede wat die Neocons ondersteun, deur die Siriese offensief teen die djihadis vasgekeer is in Aleppo.
Dit is hierdie Amerikaanse Neocon-bewustheid van sy eie magteloosheid dat sy djihadi-protégés in Aleppo totale nederlaag in die gesig staar, wat verantwoordelik is vir al die woedende beskuldigings van “gruweldade” deur die Russe wat die afgelope week die hoofstroommedia deursuur.
Samantha Power het Sondag, 25 September 2016 by die Veiligheidsraad van die VN, losgetrek en Rusland selfs van “barbarisme” beskuldig.
Maar by ‘n Amerikaanse Senaatsvoorlegging op Donderdag 22 September 2016, het die Amerikaanse stafhoof, generaal Dunford, gesê as die VSA “beslissende optrede” neem deur die instelling van ‘n vliegspergebied, is dit so goed as ‘n oorlogsverklaring teen Rusland, en daarvoor sal hy nie pa staan nie.
Die Republikeinse Senator John McCain, die ou verslete Neocon-oorlogsmous en intervensionis wat voortdurend druk toepas vir Amerikaanse militêre optrede by elke geleentheid en veral konflik met Rusland, het probeer om Dunford te dwing om te sê dat ‘n vliegspergebied nie dieselfde is as “totale beheer van die Siriese lugruim” nie, wat oorlog met Rusland en Sirië sou vereis. Maar Dunford wou nie byt nie.
Beide McCain en Dunford weet baie goed dat die VSA nog nooit ‘n vliegspergebied opgedring het aan ‘n land waaroor hy nie “totale beheer van die lugruim” gehad het nie.
Sonder ‘n vliegspersone is daar dus heeltemal niks wat die VSA kan doen om die verloop van die gevegte in Aleppo te verander nie.
Die Britse minister van buitelandse sake Boris Johnson, het tydens ‘n televisie-onderhoud op Sondag 25 September 2016 min of meer toegegee dat die Neocons hulself vasgedraai het en dat ‘n propaganda-aanslag die laatse uitweg is.
Johnson het gesê dat die enigste ding wat die Weste kan doen in hierdie situasie is om te probeer om die Russe in die verleentheid te stel.
Die huidige histeriese aanklagte van “barbarisme”, “oorlogsmisdade”, die onbewese Russiese skuld vir die aanval op ‘n hulpkonvooi, klagtes oor die doelbewuste afsny van Aleppo se watervoorraad, en dies meer, moet in daardie lig beskou word.
Na aanleiding van die ineenstorting van die skietstilstand, en met die kragdadige oplegging van ‘n vliegspergebied vir alle praktiese doeleindes uitgesluit, het Kerry met die absurde voorstel gekom dat Rusland en Sirië ‘n vliegspergebied oor hulself afkondig.
Die Russiese minister van buitelandse sake Sergei Lawrof, het intussen ten spyte van intense druk van die VSA en sy bondgenote – botweg eensydige skietstakings deur die Siriese weermag uitgesluit.
In plaas daarvan het hy dit glashelder gestel dat ‘n skietstilstand net sal gebeur as die Siriese opposisie hulself werklik verbind tot die vernietiging van die ISIS-filiaal Jabhat Al-Nusra, soos wat die VSA in Februarie en in die onlangse Kerry-Lawrof-ooreenkoms belowe het hulle sou doen.
Die Russe het skaakmat geroep in die stryd om Aleppo en die Neocons se kanse om hul djihadi-protégés in Sirië van totale nederlaag te red, asook uit die vernedering van ‘n openbare mislukking van hul strategie, is nou naby aan nul.
Want tot hul groot verbasing, het Russe nog nie teruggedeins voor die propaganda-aanslag nie.
Amerika probeer Rusland blameer vir die aanval op ’n konvooi wat hulp aan die meer as 78 000 vasgekeerde mense in die Siriese stad Aleppo moes bring.
Maar NAVO se sekretaris-generaal Jens Stoltenberg het geweier om te spekuleer oor wie verantwoordelikheid moet aanvaar vir die aanval op die hulpkonvooi naby Aleppo, en gesê partye moet eers “die feite regkry”.
Nagenoeg 20 mense is in die aanval op die konvooi dood.
Rusland ontken ten sterkste dat die lugaanval op die konvooi deur die land se magte en selfs Siriese regeringsmagte uitgevoer is.
Volgens verklarings deur Moskou was die aanval in die nag en die Siriese lugmag beskik nie oor die vermoë om nagvlugte uit te voer nie. Rusland gee militante die skuld vir die aanval.
Hooggeplaaste Amerikaanse weermagwoordvoerders hou egter vol dat hulle oor voldoende bewyse beskik dat Russiese vegvliegtuie die aanval uitgevoer het.
Rusland het intussen hommeltuig-videomateriaal vrygestel wat volgens hulle bewys dat die konvooi gevolg is deur ’n voertuig wat ’n mortierlanseerder op ’n sleepwa gesleep het.
Die Russiese regering het gesê slegs militante het geweet presies waar die konvooi was, alhoewel die VN alle partye in kennis gestel het van die konvooi.
Die Russiese ambassadeur by die VN, Witali Tjoerkin, het gesê sulke haastig beskuldigings, ontdaan van enige feite, is ontwerp, onder andere, om aandag af te lei van ‘n vreemde fout “gemaak deur vlieëniers van die Amerikaanse anti-ISIS koalisie op 17 September toe Siriese regeringsposisies naby Deir ez-Zor gebombardeer is”.
Amerika se veelvuldige verskonings en verduidelikings wat die land probeer verontskuldig, het reeds gespanne betrekkinge met Rusland verder versleg.
Rusland vermoed die VSA probeer ISIS in Sirië beskerm en sê die VSA moet onverwyld ‘n onderskeid tref tussen Siriese “opposisie” en ISIS-militante.
Die Russiese ministerie van verdediging sê ‘n Amerikaanse hommeltuig was ook in die omgewing van die humanitêre konvooi toe dit buite Aleppo aangeval is.
Hulle sê die Predator het van die Incirlik-lugbasis in Turkye opgestyg tot op ‘n hoogte van 3600 meter en teen ongeveer 200 kilometer per uur en die konvooi gevolg.
Die Verenigde Nasies (VN) het ná ‘n dodelike aanval op ‘n konvooi alle hulpverlening in Sirië opgeskort.
Die Amerikaanse minister van buitelandse sake, John Kerry, het intussen aan die VN se Veiligheidsraad in New York gesê alle vliegtuie in die noorde van Sirië behoort verbied te word om te vlieg sodat humanitêre hulp afgelaai kan word.
Kerry het by die raad gesê so ‘n stap kan die geloofwaardigheid herstel van pogings om ‘n einde aan die konflik in Sirië te maak.
Twee terreurverdagtes, broer en suster Ebrahim en Fatima Patel (foto, regs in gewaad sonder haar broer), sal na verwagting vandag in die Kagiso-landdroshof verskyn.
Hulle staan tereg op aanklagte ingevolge die Wet op Plofstowwe en Vuurwapenbeheer na ‘n skokgranaat en 21 koeëls na bewering in hul huis gevind is.
Hulle is in hegtenis geneem tydens klopjagte in Azaadville, aan die Wes-Rand, op 9 Julie.
Hulle is aanvanklik borgtog geweier. Na hul prokureur, Yousha Tayob, ‘n dringende aansoek voor die hooggeregshof in Johannesburg vir hul vrylating geloods het, is hulle op borgtog van R5000 elk vrygelaat.
Hulle het bande met die Islamitiese terreurgroep (ISIS) en het na bewering beplan om bomme by die Amerikaanse ambassade en Joodse instellings in Suid-Afrika te plant.
‘n Tweeling, Sallahoeddin (Brandon-Lee) en Jakeen (Tony-Lee) Thulsie is in hegtenis geneem tydens dieselfde klopjag.
Hulle is in hegtenis geneem op drie aanklagte van die oortreding van die Beskerming van Konstitusionele Demokrasie en Terroriste-en verwante Aktiwiteite.
Die Tulsies sal in aanhouding bly totdat hul borgaansoeke op 11 Oktober aangehoor word.
In die eerste ses maande van 2016 het nog twee militante, wat deur Amerika van die vlootbasis by Guantanamo-baai, Kuba bevry is, na die slagveld teruggekeer, het die Amerikaanse regering Woensdag bekend gemaak.
Washington het bevestig dat altesaam nege van die mense wat tot dusver uit Guantanamo vrygelaat is, weer by militante groepe aangesluit het, sedert pres. Barack Obama in 2009 aan bewind gekom het. Dit blyk uit ’n verslag van die kantoor van die direkteur van Nasionale Intelligensie (ODNI).
Amerika het die gevangenis by Guantanamo in 2002 geopen, die jaar ná die terreuraanvalle op New York en Washington op 11 September 2001, om diegene wat as vermeende buitelandse terroriste beskou word, aan te hou.
Die meeste is vir meer as tien jaar sonder ’n verhoor aangehou.
Dit het skerp internasionale veroordeling uitgelok.
Obama het gehoop om die gevangenis in die eerste jaar van sy ampstermyn te sluit. In Februarie vanjaar het hy met ’n plan vorendag te kom om dit te sluit, maar dit word deur Republikeine en lede van sy eie party teengestaan.
Volgens statistiek deur die ODNI het Obama se voorganger, pres. George W. Bush, se administrasie aansienlik meer mense uit Guantanamo vrygelaat as wat onder die Obama-administrasie die geval was.
Volgens die verslag het 113 van die 532 aangehoudenes wat deur Bush vrygelaat is na die gevegsfront teruggekeer teenoor die nege wat sedert 2009 deur Obama onset is.
In totaal het die Obama administrasie 161 mense sedert 2009 vrygelaat.
‘n Topbevelvoerder van ISIS, Aboe Mohamed al-Adnani is in ‘n Amerikaanse lugaanval dood.
ISIS het sy dood kort na die aanval aangekondig deur sy nuusagentskap Amaq.
Die Amerikaanse State Department het ‘n beloning van $5 miljoen belowe aan enige een wat hom om die lewe bring.
Foto’s van die terroristeleier is ook beskikbaar op die aanlynuitgawe van die Islamitiese Staat-groep (ISIS) se weeklikse tydskrif, Al-Nabaa.
Hy was die destydse woordvoerder van ISIS in Irak en die Levant en die bevelvoerder in Sirië en een van die organisasie se topleiers.
Die Pentagon het Maandag aangekondig dat Al-Adnani verlede maand in Amerikaanse lugaanvalle in die noorde van Sirië omgekom het.
“Die lugaanval naby Al Bab, Sirië het ISIS se hoofpropagandis, werwer en argitek van eksterne operasies van die slagveld verwyder,” het die Pentagon se mediasekretaris, Peter Cook, gesê.
Hy was die hoofargitek van aanvalle teen Westerse teikens.
In ‘n September 2014-toespraak het Adnani Islamiete aangemoedig om Europeërs om die lewe te bring op enige moontlike manier: “Vermorsel sy kop met ‘n klip, of slag hom met ‘n mes, of ry hom met jou motor dood,” het Adnani toe gesê.
Arabiese Golfstate het Iran daarvan beskuldig dat hulle probeer om die hajj te “verpolitiseer”, nadat die land se opperleier die Saoedi-owerhede oor die bestuur van die jaarlikse pelgrimstog gekritiseer het.
Ten minste 2426 mense, insluitend 464 Iraniërs, is dood in die stormloop by verlede jaar se pelgrimstog in Saoedi-Arabië (foto). Volgens Saoedi-owerhede, is net 769 dood.
Die Ayatollah Ali Khameini het die Saoediërs van moord beskuldig: “Die hartelose en moorddadige Saoediërs het die beseerdes saam met die dooies in houers opgesluit.
“In plaas daarvan om aan hulle mediese behandeling te gee, hulle te help of ten minste hul dors te les, is die oorlewendes almal vermoor.”
Die hoof van die sesnasie Golf Samewerkingsraad sê die Ajatolla se opmerkings waarin hy Rijad van die moord op Iranse pelgrims by verlede jaar se hajj beskuldig, is “onvanpas en aanstootlik.”
Abdoellatif al-Zajani sê die opmerkings is ’n “duidelike aanhitsing en ’n desperate poging om die hajj te verpolitiseer”.
Vanjaar is die eerste keer in byna drie dekades dat Iraniërs nie deel van die jaarlikse pelgrimstog na Moslem heilige plekke in Saoedi-Arabië sal wees nie, nadat gesprekke oor logistiek en veiligheid in Mei ’n dooie punt bereik het.
Die woordewisseling tussen die twee lande wat nie diplomatieke betrekkinge het nie, kom op die vooraand van die pelgrimstog wat Saterdag begin.
Saoedi-Arabië het Iran daarvan beskuldig dat hulle nie ware Moslems is nie, maar Zoroastrane, ‘n antieke pre-Islamitiese geloof. Sjeikh Abdul-Aziz Al-as-Sheikh het Woensdag gesê: “Ons moet verstaan dat hulle nie Moslems is nie.”
Saoedi-Arabië se bevolking is byna 90 persent Soenni en is lank reeds in stryd met die 95 persent Sjia Iran – twee denominasies wat sedert die 7de eeu in konflik verkeer, maar meer onlangs word Saoedi-Arabië daarvan beskuldig dat hulle Islamitiese fanatisme en terreur aanmoedig met ondersteuning aan ISIS.
‘n Reeks bomaanvalle het Sirië geruk, hoofsaaklik in gebiede onder beheer van die regering.
Die aanvalle kom te midde van gespanne onderhandelinge tussen Rusland en die VSA rakende Sirië tydens die G20-beraad en die Siriese regering se suksesse teen die inval van ISIS.
Van die minstens 48 mense wat dood is, was minstens 35 in pres. Bashar al-Assad se kusvesting, Tarsus, het die staatsmedia berig.
Die stad is ook die tuiste van ’n Russiese vlootbasis.
Die Islamitiese Staat-groep (ISIS) het aanspreeklikheid vir een van die aanvalle teen ’n Koerdiese veiligheidspos in Hasakeh aanvaar, maar niemand het nog verantwoordelikheid vir aanvalle in Tarsus, die regeringsbeheerde stad, Homs, en ’n weermagdeursoekpunt op ’n pad buite Damaskus aanvaar nie.
Gerugte dat Saudi-Arabië verantwoordelik is, is geopper aangesien Turkye hul eis dat die Siriese president moet afstap van sy pos, laat vaar het.
Die VSA en Rusland kon nie ‘n skietstakingooreenkoms vir Sirië bereik by die G20-beraad in China nie weens “gapings” in die gesprek.
‘n Ontploffing “van ‘n kriminele aard” by België se nasionale instituut vir kriminologie in Brussel dié week het ‘n brand laat ontstaan en groot skade aangerig. Niemand is die voorval beseer nie.
Volgens die Belgiese media is die ontploffing veroorsaak toe ‘n voertuig in die gebou vasgejaag het.
Dit kom terwyl België op ‘n hoë gereedheidsgrondslag is ná verwoestende selfmoordaanvalle op Brussel se lughawe en treindiens in Maart waarvoor die Islamitiese Staat-groep (ISIS) aanspreeklikheid aanvaar het.
Daar was niemand op die toneel in die noordelike voorstad, Neder-Over-Heembeek, toe die ontploffing plaasgevind het nie, het ‘n woordvoerder van die kantoor van die staatsaanklaer gesê.
‘n Woordvoerder van die brandweer, Pierre Meys, het gesê “dit was waarskynlik nie per ongeluk” nie.
“Die ontploffing was uiters kragtig,” het Meys gesê. “Vensters van die laboratorium is dosyne meter ver uitgeblaas.”
Nagenoeg 30 brandweermanne was vanaf omstreeks 03:00 (01:00 GMT) op die toneel om die brand te bestry.
RTBF-televisie berig dat twee verdagtes met die voertuig in die gebou vasgejaag en ‘n “vlambare toestel” na die gebou gegooi het.
Die afgelope paar jaar het ons vanuit allerlei hoofstroommediabronne verneem oor dade van agressie wat gepleeg was deur uiteenlopende figure, van geloofsfanatici tot mense wat geestessiek is. Soos dit die gewetenloosheid van die politiek betaam, probeer almal hier munt uit te slaan, hetsy deur strenger wapenwette, hetsy deur die bevolking se gemoedere te bedaar met allerlei praatjies. Sodra hierdie geweld geen politieke doel dien nie, word dit summier doodgeswyg en moet die alternatiewe media hierdie verhale aan die publiek bring.
Ons sien byvoorbeeld na die insident in Nice van afgelope Julie het die Franse sosialistiese premier Manuel Vallis lakoniek geantwoord dat die bevolking maar gewoond moet raak aan terreuraanslae. Dit is nou musiek in die ore van enige geloofsfanaat.
In Swede het een of ander slimkop besluit om armbande aan vroue uit te deel waarop staan “Los my uit” wat blykbaar gaan help om die verkragtingepidemie teen te werk. Tot dusver het daar egter dadels van gekom.
Sodra al die wêreld se geleerdes bymekaar kom en diskussies voer oor hoekom daar sulke geweld plaasvind, word soos gewoonlik verwys na verdrukking, die wit patriargie of ‘n eenling met ‘n geestessiekte wat die rede hiervoor was. Die werklike oorsaak word nie bespreek nie, en enige effektiewe manier om dit te stop, word onder die tapyt van rassisme gevee.
Figure soos Michael Moore probeer ons oortuig dat die Amerikaanse leefwyse die rede hiervoor is en beroep homself op allerlei abstrakte argumente wat nòg kant nòg wal raak, terwyl swart Suid-Afrikaners se geweld tot vervelens toe verklaar word deur die, groot bose wolk van apartheid wat oor hulle hang; iets wat Max du Preez en kie daagliks aan die publiek verkoop.
In die huidige Amerikaanse presidensiële wedloop sien ons presies dieselfde. Die hoofstroommedia probeer hul bes om Trump van al die wêreld se ellende te beskuldig, terwyl al die voornaamste probleme van die wêreld vandag – die mislukte state van Irak en Libië, die oorlog in Sirië, die opkoms van ISIS, die vlugtelingestroom – te danke is aan die beleid wat Hillary Clinton gevoer of gesteun het.
‘n Interessante studie wat onlangs gedoen is bied ‘n verfrissende nuwe perspektief hierop. Die navorser Tage Rai is van mening dat mense in die meeste gevalle tot geweld oorgaan nie omdat hulle geen moraal het nie, of dat hulle een of ander sadistiese behoefte het tot geweld nie, maar omdat hulle juis gehoor gee aan hul moraliteit. Hulle gebruik met ander woorde geweld omdat hulle meen dat dit moreel geregverdig is. Dat mense hulself moreel wil reinig is ‘n tendens wat bekend is by ons, en in baie kulture word dit belangriker beskou as die blote strewe na lewensgeluk. Onder Islamiste is daar heelwat bruikbare idiote wat bereid is om hulself op te blaas vir die “groter doel”, en nie omdat dit vir hulle aangenaam is nie, maar omdat hulle dink dat hulle die regte ding doen.
Deur geweld onder bepaalde omstandighede te gebruik, versterk ook die gevoelens van die lede van die binnegroep onder mekaar. Dit help om hul unieke groepsidentiteit te vorm, en kan ‘n verklaring bied hoe die meesterbrein agter die Paryse Bataclan-slagting vir maandelang in die Brusselse wyk Molenbeek beskerming geniet het van sy mede-geloofsfanate. Geweld werk nie moreel verlagend vir die geweldenaars nie, maar juis moreel verhogend.
Ek is egter nie seker of Rai se bevindinge vir kriminele politici geld nie, maar dit is ‘n hele ander diskussie.
‘n Ander studie wat gedoen was deur Tage Rai en Keith Holyoak het ook gewys hoedat wegrelativering van bepaalde kernwaardes ‘n mens se neiging tot agressie verhoog. In eksperimentele groepe waar mense se opvattings met onbetwisbare kernwaardes “gelaai” was, was hulle minder geneig om bedrog te pleeg op opvolgende toetse as ander proefpersone wie se gedagtes met relatiwisme geaktiveer was.
En dit sien ons in die wêreld vandag. Terwyl die Weste voortdurend die hand in eie boesem moet steek en moet twyfel aan sy eie kultuur, is bewegings soos ISIS besig om met ekstreme barbarisme oor te neem. In die Bataclan teater, byvoorbeeld, het hulle nie net op die konsertgangers geskiet nie, maar ook sommige onthoof en hul ingewande uitgeryg. Laasgenoemde feit was uit die hoofstroommedia verswyg waarskynlik om geen slapende honde wakker te maak oor die ware aard van die slagting nie. Dit lyk soos dieselfde taktiek tydens die Sowjet Unie se Groot Terreur van 1934 – 1939.
Tydens Oujaarsaand in Keulen het sowat 1200 Duitse vroue melding gemaak van seksuele mishandeling en verkragting wat gepleeg was deur ‘n groep van sowat 2000 Islamitiese jong mans, heelwat meer as wat aanvanklik beweer was. Dit het egter George Soros se feministe nie gestop om die skuld te probeer lê by die etniese Duitse mans nie, so asof hulle die daders was. Myns insiens is die enigste “misdaad” wat hierdie Duitse mans gepleeg het om nie met genoeg agressie die vroue te beskerm nie. Dit sou in elk geval weer gelei het tot die narratief van die outoritêre Duitsers wat die arme onskuldige Moslems aangeval het, wat die media weer skaamteloos sou uitbuit.
Hierdie laasgenoemde insident kan ook help dat hierdie vroue, wat nie meer op hul eie etniese volksgenote kan vertrou nie, juis die beskerming van die Islamiste self gaan opsoek, en uiteindelik gedwing gaan word om tot Islam te bekeer wat die oprukkende Islamdemografie ‘n handige hupstootjie sal gee.
Selfs daar in Engeland is die splinternuwe Eerste Minister Theresa May ‘n groot aanhanger van die Koran en haal gereeld strofes aan vanuit daardie geskrif. Tony Blêr lees ook gereeld die Koran en meen dat Mohamed ‘n “enorme beskawende krag” was. Daarbenewens is May ‘n ook voorstander van adopsieregte vir pedofiele. Engeland mag dalk uit die Unie gestap het, maar met so ‘n Jan Salie as Eerste Minister soos sy, is daar in elk geval geen angel in die Angelsakse meer nie.
Dit wil voorkom dat, net soos die gevreeste Zika virus in Brasilië vir verkleining van die hoofde van baba’s verantwoordelik is, het daar ook ‘n soortgelyke “virus” vanuit Suid-Afrika oorgewaai. Ons noem dit die efwee de klerk virus, en dit verklein die breine van wit politici.
Soos Tage Rai ietwat ambisieus stel, dat sodra mense van alle oortuigings besef dat geen geweld goed is nie, sal geweld dan eers begin afneem.
Ons neem aan dat hy ook geweld van linkse aktiviste teen wittes hiermee bedoel.
Frankryk sal sowat 3000 reserwetroepe ontplooi om veiligheid by skole te voorsien, het die ministers onderwys en sekuriteit aangekondig.
Anti-terreur maatreëls daarop gerig om studente vir moontlike aanvalle voor te berei, is ook opgeskerp.
Ongeveer 12 miljoen Franse skoolkinders maak reg om terug te gaan skool toe op 1 September wanneer die nuwe skooljaar begin, maar die regering is ook druk besig om planne van sy eie te maak vir dié geleentheid.
Dit is gemik op die beskerming van leerlinge en om hulle voor te berei vir terreuraanvalle op hul skole.
Alle leerlinge tussen die ouderdomme van 13-14 sal basiese noodhulp leer, om bystand te kan verleen aan klasmaats in ‘n nagmerrie scenario. Op die oomblik kan slegs 30 persent van leerlinge noodhulp toepas, het die minister van onderwys, Najat Vallaud-Belkacem gesê by ‘n perskonferensie Woensdag, luidens AP.
Ongeveer 500 skooladministrateurs sal ook elke jaar opgelei word by die nasionale krisisopleidingsentrum om op te kan tree as skakeling met sekuriteitamptenare ten tye van ‘n aanval.
Vallaud-Belkacem het tydens die perskonferensie gesê dat die nuwe planne “nie bedoel is om paniek te saai of paranoia nie,” maar het toegegee dat “die bedreiging hoog is, dit is ‘n werklikheid.”
Kinders tussen die ouderdomme van 2 en 6 sal ook aan ontruimingoefeninge deelneem, maar nie vertel word van terreur nie. Hulle sal gemaan word om stil te bly en weg te kruip tydens die “speletjie”.
Intussen het ‘n militante wit skadugroep op die Franse eiland Korsika gewaarsku dat die Islamitiese staat (ISIS) teenstand van hulle kan verwag.
‘n Splintergroep van die belangrikste FLNC-separatiste organisasie, het aan Corse Matin gesê, ‘n plaaslike koerant, dat enige een wat ‘n terreurdaad uitvoer op Korsikaans grondgebied met ‘n “vasberade reaksie sonder enige aarseling” kan reken.
Hulle het bygevoeg dat die Franse regering grootliks te blameer sou wees indien so ‘n aanval wel plaasvind.
“Die doel van die Moslemterroriste is duidelik om Isis hier te installeer en ons is bereid om dit keer,” het die gemaskerde groep gesê.
Dramatiese videomateriaal het na vore gekom van die Irakse polisie wat ‘n selfmoordplofgordel van ‘n kind afhaal, vermoedelik voor nog ‘n selfmoordbomaanvalpoging van ISIS.
Die beeldmateriaal toon hoe sekuriteitspersoneel ‘n sigbaar ontstelde seuntjie in toom hou, terwyl hulle sorgvuldig die gordel van die bolyf die jeugdige in Kirkuk afsny.
Nadat die band verwyder is, word die seun opgeraap en weggeneem.
Koerdistan24, ‘n nuusstasie in Irbil, Irak, het Sondag die beelde uitgesaai.
Owerhede het gesê hulle glo die 15-jarige het ‘n week gelede van Mosul na Kirkuk gekom, ISIS se belangrikste vesting buite Sirië.
Die arrestasie in Kirkuk kom ‘n dag nadat ‘n kind ‘n Koerdiese troue in Turkye in ‘n selfmoordaanval geteiken het.
Meer as 20 van die slagoffers was kinders onder 14, het ‘n Turkse amptenaar gister gesê.
Die aanvaller wat Saterdagaand láát op ’n feesviering in die suidoostelike stad Gaziantep toegeslaan het, was tussen 12 en 14 jaar oud, het Turkye se pres. Tayyip Erdogan verklaar.
Die selfmoordbomaanvaller het laatnag op die troue toegeslaan. Daar was ’n enorme ontploffing tussen die mense was wat nog gedans het.
Bloed en liggaamsdele was daarna besaai oor die terrein, sê ooggetuies. Brand- en bloedvlekke was sigbaar teen die mure in die nou stegie waar die aanval plaasgevind het.
ISIS het ‘n geskiedenis van die misbruik van kinders deur middel van propaganda, maar meer onlangs word hulle aangewend as wapens op die voorste linies en om burgerlikes te teiken.
Die terroriste-groep beskik oor ‘n leër van kindersoldate – gesteel van hul families en geïndoktrineer om die “saak” te bevorder.
Hierdie sogenaamde kleintjies van die kalifaat word ingelyf in die veldtog van geweld, met kinders so jonk as 8 wat deelneem volgens VN-verslae.
“Ons het verslae van kinders, veral kinders wat verstandelik gestremd is, wat gebruik word as selfmoordbommers, waarskynlik sonder dat hulle self verstaan wat gebeur of wat van hulle verwag word,” sê Renate Winter, ‘n VN-kinderregtespesialis.
Die leiers van Italië, Frankryk en Duitsland het dié week volgehou dat Brittanje se skokbesluit om die Europese Unie te verlaat, nie die einde van die ekonomiese magsblok sal beteken nie.
Italië se eerste minister, Matteo Renzi, die Duitse kanselier, Angela Merkel en Frankryk se pres. Francois Hollande het Maandag op die vliegdekskip, die Guiseppe Garibaldi, byeengekom om oor die Europese Unie (EU) se toekoms en Brittanje se uittrede uit die EU te beraadslaag.
Die vliegdekskip, een van die geboorteplekke van die droom vir ‘n verenigde en geïntegreerde Europa, was by die Italiaanse eiland, Ventotene, vasgemeer. Die leiers het onderneem om die EU te versterk ná Brittanje se vertrek.
“Baie het gedink dis verby met die EU ná Brexit, maar dit is nie hoe sake staan nie, het Renzi gesê.
Die EU is volgens hom die “antwoord” vir Europa se probleme en verseker “vrede, welvaart en vryheid”.
Volgens Merkel is die EU uit sommige van die “donkerste oomblikke van die Europese geskiedenis” gebore, ‘n verwysing na die Tweede Wêreldoorlog.
Sy sê die tyd het aangebreek om ‘n “beter bladsy” in Europese geskiedenis te skryf.
Hollande van Frankryk het gewaarsku dat Europa gevaar loop om gefragmenteer te word en dat verdeeldheid voorkom moet word.
Dit het ‘n “nuwe impuls” op drie fronte naamlik die ekonomie, verdediging en veiligheid nodig en werk- en opvoedkundige geleenthede moet vir jong mense geskep word.
In ‘n simboliese gebaar het die Italiaanse premier sy gaste na die graf van Altiero Spinelli, ‘n stigtersvader van die ideaal van Europese integrasie, geneem. Renzi het gesê die vergadering was daarop gemik om ‘n gemeenskaplike siening oor die EU se toekoms te vorm vóór ‘n spitsberaad van die oorblywende 27 lidlande op 16 September in Bratislawa begin.
Europa se ekonomiese vooruitsigte, djihadistiese aanvalle, die toestroming deur migrante, die Siriese konflik en betrekkinge met Rusland en Turkye was ook op die leiers se sakelys.
Opponente van Libië se eenheidsregering, wat die ondersteuning van die Verenigde Nasies geniet, het Maandag teen ’n mosie van vertroue in die Tripoli-bewind gestem in ’n rare sessie van die parlement wat in die ooste van die land gevestig is.
Die stemmery is ’n vars terugslag vir die regering van nasionale eenheid, wat vir maande na dié parlement se bekragtiging streef, terwyl dit probeer om invloed en gesag tot buite sy basis in die hoofstad uit te brei.
Die stemmery was die eerste sedert Januarie toe die parlement die aanvanklike lys ministers wat deur die eenheidsregering voorgestel is, verwerp het en die eerste sedert die eenheidsregering in Maart vanjaar aan bewind gekom het.
Parlementêre sessies in Tobruk is herhaaldelik uitgestel of geblokkeer, met teenkanting teen die eenheidsregering wat in die ooste van die land aan die toeneem is.
Ondersteuners van die regering, van wie baie nie Maandag se sitting bygewoon het nie, het voorheen gekla dat opponente met fisieke geweld dreig ten einde te verhoed dat stemmery plaasvind.
Altesaam 161 afgevaardigdes het die sitting bygewoon met 61 wat teen die mosie gestem het, 39 wat buite stemming gebly het en net een wat ten gunste van die mosie gestem het.
Die eenheidsregering is die gevolg van ’n VN-onderhandelde ooreenkoms wat in Desember onderteken is. Die ooreenkoms was daarop gemik om ’n einde aan konflik te maak, wat opgevlam het toe ’n gewapende alliansie in 2014 beheer oor instansies in Tripoli oorgeneem het en die nuutverkose parlement na die ooste van die land uitgewyk het.
Westerse magte maak op die eenheidsregering staat om Libië se veiligheidsvakuum die hoof te bied, olieproduksie te herstel en die stroom migrante te keer wat die Middellandse See vanuit Libië onderweg na Europa oorsteek.
Magte lojaal aan die eenheidsregering het byna die hele kusstad Sirte van die Islamitiese Staat-groep (ISIS) herower, maar die regering sukkel om elders ’n impak te hê.
Die regering se onvermoë om die krisis op te los, kragonderbrekings en ander probleme het bygedra dat die regering wyd steun verloor het.
Die minister van buitelandse sake van die Libiese tussentydse regering in Tobruk het in ‘n verklaring gesê die VN-gesant vir Libië, Martin Kobler (foto bo) moet vervang word met ‘n meer neutrale en doeltreffende figuur.
