Marikana – Bladsy 2 – praag.co.za

Geld begin praat in Cosatu

Cosatu sal meer as R1 miljoen per maand aan ledegeld moet inboet nadat die sentrale uitvoerende komitee besluit het om Numsa te skors.

Numsa se geraamde bydrae is R1 022 000 per maand uit ‘n affiliasiefooi van R2.92 wat elk van sy nagenoeg 350 000 lede maandeliks betaal. Dit beteken Cosatu kan meer as R12 miljoen jaarliks verloor sonder Numsa.

Cosatu se uitvoerende komitee het Numsa Saterdagoggend met 33 stemme teenoor 24 geskors.

“Numsa het ook R38 000 vir die verteenwoordigerstydskrif betaal,” het Mphumzi Maqungo, tesourier van die National Union of Metalworkers of SA, gesê.

Patric Craven, woordvoerder vir die vakbondfederasie het gesê finansies is een van knelpunte.

Zwelinzima Vavi, het intussen gesê hy kan nie die besluit verdedig om Numsa te skors nie. Vavi, die vakbond se uitvoerende hoof, is verlede jaar geskors.

Vavi het sy afwesigheid per brief uiteengesit oor waarom hy nie by die naweek se historiese nuuskonferensie opgedaag het nie. Sy weergawe verskil van die amptelike verduideliking.

Vavi het in ‘n brief wat deur die SABC bekom is, gesê die toekoms van die federasie is op die spel. Hy het gesê die federasie stuur op ‘n totale ramp af.

Die skorsing van Numsa en die besluit deur nog sewe filiale om hulle deelname aan Cosatu op te skort, maak Vavi kwesbaar vir optrede deur die komitee.

Volgens ingeligte bronne was NUM vermoedelik Cosatu se grootste finansiële bydraer vóór Marikana.

NUM-lede het egter na die Marikana-slagting in hul honderde by die mededinger-unie Association of Mineworkers and Construction Union (Amcu) aangesluit, en dié vakbond is nou die meerderheidvakbond by Lonmin.

Sewe ander Cosatu-filiale, die Food and Allied Workers Union, die Democratic Nurses Organisation of SA (Denosa), die SA Commercial Clothing and Allied Workers Union (Saccawu), die Communication Workers Union (CWU), die SA State and Allied Workers Union, die Public and Allied Workers Union of SA en die SA Football Players Union ondersteun almal Numsa en het onderneem om die skorsing teen te staan.

Slegs Denosa, CWU en Saccawu dra maandeliks noemenswaardige by tot Cosatu. “Maar indien dié maandelikse bydraes bymekaar getel word, is dit moontlik minstens R3 miljoen per maand, ” het ‘n arbeidskenner gesê.

Ramaphosa gee Numsa geleentheid om saak te stel

Adjunkpresident Cyril Ramaphosa het vroeër ‘n oproep om eenheid in Cosatu gedoen omdat dit volgens hom noodsaaklik is om te verseker dat werkersregte beskerm word. Hy het Numsa geleentheid gegee om eersdaag hulle saak te stel.

Cosatu dreig om te skeur en irrelevant te raak in ‘n arbeidsmark wat deur hoë werkloosheid en lae produktiwiteit gekenmerk word.

Numsa en Cosatu is sedert die skietery by Marikana haaks en die stryery het verdiep voor die algemene verkiesing vandeesjaar.

Die twis handel oor onder meer oor ‘n besluit om steun aan die ANC te onttrek en buite sy tradisionale steunbasis in die metaal- en ingenieursbedryf lede te werf om ‘n breë sosialistiese werkersbeweging te bou.

Ramaphosa het gesê daar sal nog ‘n spesiale sentrale uitvoerende komitee vergadering in November gereël word om die metaalwerkersvakbond, Numsa die geleentheid te gee om homself teen skorsing uit die federasie te verdedig.

Die besluit is geneem op ‘n vergadering van die komitee wat Donderdag in Johannesburg plaasgevind het.

Daar was bespiegelinge dat die komitee Donderdag sal stem oor Numsa se skorsing. ‘n Stemmery sou egter klaarblyklik onwettig en ongrondwetlik wees.

Britse Sosialiste skree Ramaphosa dood

Cyril Ramaphosa, adjunkpresident van die ANC, is verlede week vir ’n “moordenaar” uitgeskel deur Britse Sosialiste by die Universiteit van Witwatersrand.

Ramaphosa het ’n gehoor toegespreek oor die nasionale ontwikkelingsplan (NOP) in Wits se Grootsaal.

“Hoe slaap jy snags? Jy het bloed op jou hande,” het Claire Ceruti gegil. Sy en haar kohorte het het gedans en plakkate rondgeswaai terwyl Ramaphosa gepraat het.

Die sogenaamde “Marikana-ondersteuningsgroep” het plakkate opgehou wat lui: “Moenie toelaat dat politici met moord wegkom nie.”

Ramaphosa is ’n Lonmin-aandeelhouer wat voor die Marikana-slagting in eposse aan die Lonmin-bestuur en die ministers van polisie en minerale bronne die myners as “kwaadwillig” en “misdadig” beskryf het en vir “toepaslike optrede” gevra het.

Sowat 30 mynwerkers en aktiviste het die lesing ontwrig. Ramaphosa het gesê die rede waarom hy nie oor Marikana wil uitbrei nie, is omdat die Farlam-kommissie van ondersoek daarmee gemoeid is.

Ceruti het aanhou skree, waarna veiligheidswagte haar en nog ’n lid van die groep uit die saal begelei het.

Farlam braai Lonmin se hoof van sekuriteit

Die voorsitter van die Marikana Kommissie van Ondersoek, regter Ian Farlam, sê die hoof van sekuriteit by Lonmin, Graeme Sinclair, geroskam oor sy onvolledige voorlegging.

Farlam het gesê Sinclair is onder ‘n verpligting om ‘n volledige onthulling van die oorspronklike logboek an die Kommissie te doen.

Volgens die regter is slegs ‘n geredigeerde weergawe aan die kommissie aangebied. Inligting word glo uit die logboek vermis.

Dié weglating het na vore gekom tydens getuienis wat voor die Kommissie gelewer is.

Dit het aan die lig gekom dat die volledige weergawe aan die polisie gegee is, maar dat dié een aan die kommissie weglatings bevat.

Die weglatings hou glo verband met verskeie skietvoorvalle deur die wagte tydens die staking by Marikana in 2012.

Farlam het Sinclair ook gevra waarom die volledige logboek van Lonmin se regspan weerhou is. Sinclair het gesê hy is van mening dat hy alle getuienis wat van hom vereis is, onthul het.

Die Muishond gaan oproerige skares met pepersproei takel

‘n Suid-Afrikaanse maatskappy het ‘n onbemande tuig ontwerp om pepersproei op oproerige skares te spuit.

‘n Internasionale mynmaatskappy het reeds bestellings geplaas vir die tuig.

Desert Wolf sê hulle wil graag help in “die voorkoming van nog ‘n Marikana”.

Die “Muishondskarebeheerkopter” [Skunk Riot Control Copter] word deur arbeidsaktiviste veroordeel as “absoluut verregaande”.

Dié tuig word vergelyk met die dodelike Amerikaanse militêre tuie in Pakistan wat burgerlikes bombardeer en honderde onskuldige mense se dood reeds veroorsaak het.

Desert Wolf se Muishond kos R500 000, en is egter “ontwerp om oproerige skares te beheer sonder die gevaar van lewensverlies vir betogers of die veiligheidspersoneel”.

Die kontrêpsie weeg 45kg, en dra 4 000 peperspuitverfballetjies, plastiekballe of ander nie-dodelike ammunisie.

Die toestel is toegerus met vier houers wat tot 20 balle per sekonde elk kan afvuur, wat gelyk is aan 80 peperballe per sekonde .

Kennelik hou die buitelandse sowel as binnelandse aanstigters van geweld in die mynsektor en elders nie veel van die Muishond nie wat “enige skare in sy spore sal stuit”.

Hulle het waarskynlik reeds hul politieke kapitaal sien verdamp as hulle nie oproerige skares tot geweld kan oorhaal soos by Marikana nie.

Hennie Kieser, besturende direkteur van Desert Wolf, sê hy was by Marikana-slagting bedrywig met ‘n toesigoperasie deur ‘n onbemande tuig.

“Enigiemand wat by Marikana was sal eerder hierdie tegnologie gebruik as lewendige ammunisie,” sê hy.

“Mense wat sê dit is onmenslik teenoor 9mm koeëls is idioties.”

Huidige lugvaartreëls in Suid-Afrika verhoed dat die tuie ontplooi word, maar hy hoop die wetgewing sal verander.

James Nichol, ‘n Britse prokureur wat die families van die Amcu-stakers by Marikanaverteenwoordig, het gesê: “Dit is absoluut verregaande. Die gebruik van pepersproei-agtige ammunisie om die skare te bespuit. Mense is geregtig op ‘n staking.”

Dit is nie duidelik of Nichol ook die kannibalisme, moorde, moordbeplanning en moetierituele insluit by stakers se “regte” nie.

Volgens die jongste getuienis voor die Farlam-kommissie was dit deel van die stakingsgeweld teen die NUM-lede.

Nichol het ewe dramaties na Amerikaanse aanvalle deur onbemande tuie in Pakistan verwys, asof massamoord en skarebeheer deur pepersproei dieselfde kwessie is.

“Een van die lesse van Marikana is dat die staat moet uitbly uit industriële geskille.” Hy het nie kommentaar gelewer op Liv Shange, Julius Malema en die EFF se aandeel in die aanhitsing tot geweld of die mensvleisrituele by Marikana nie.

Malema-klug gaan voort

Die Ekonomiese Vryheidsvegters is in die parlement om ‘n rewolusie te ontketen, nie om reëls te volg nie, sê die leier van die party, Julius Malema.

Hy het gesê hulle sal nie duld dat die rewolusie ondermyn word deur konvensies wat deur kolonialiste en imperialiste geskep is nie.

Sy ondersteuners het Vrydagmiddag ‘n betoging buite die parlementsgebou gehou.

Malema het die media toegespreek nadat EFF-parlementslede Donderdagaand uit die parlement gestap het.

Malema gaan glo ‘n regsmening inwin nadat hy gevra is om die nasionale vergadering te verlaat weens onparlementêre gedrag.

Die waarnemende speaker, Thandi Modise het Malema gewaarsku dat tugstappe kan volg nadat hy gesê het die ANC het die slagting by Marikana veroorsaak.

Daar is 34 Amcu-mynwerkers by Marikana in 2012 deur die polisie doodgeskiet.

Volgens die getuienis van Meneer X wat tans voor die Farlam-kommissie dien, het die Amcu-myners onder die invloed van moetie ‘n massamoord beplan.

Meneer X getuig oor mensvleis-ritueel by Marikana

’n Oudmynwerker, wat om veiligheidsredes slegs as Meneer X bekend staan, het Donderdag oor afskuwekkende moetierituele voor die Marikana-insident getuig.

Meneer X, ’n rotsboor-operateur, tree op as die polisie se sleutelgetuie waarin die gru-besonderhede oor mensvleis wat deur Amcu-lede vir moetie gebruik is, na vore gekom het.

Hy is deel van ‘n getuiebeskermingsprogram en getuig deur middel van ’n elektroniese beeldskakel vanaf ’n ongeïdentifiseerde plek.

Die Amcu-myners het veiligheidswagte vermoor om liggaamsdele van die menselyke vir tradisionele genesers te bekom sodat hulle daarmee teen koeëls beskerm sou word.

Die ANC het Amcu reeds daarvan beskuldig dat hulle ook deur buitelandse agente geïnfiltreer is.

Die oudmyner getuig in Centurion voor die Farlam-kommissie oor die omstandighede rondom die dood van 44 mense in Augustus 2012 by Marikana.

Tien mense, onder wie polisiebeamptes en sekuriteitswagte, sowel as ses ander mynwerkers is in die week voor die Marikana-slagting tydens gewelddadige stakings vermoor.

Julius Malema, EFF-leier, en sy partylede het intussen Donderdag uit die Nasionale Vergadering van die parlement gestap omdat Malema volgehou het om die ANC en die polisie vir die moorde by Marikana verantwoordelik gehou het.

Malema het geweier om opmerkings terug te trek wat hy tydens die debat oor die Staatsrede gemaak het. Hy het toe gesê die ANC het massamoord by Marikana gepleeg.

Die voorsitter van die Nasionale Raad van Provinsies, Thandi Modise, het beslis dat sulke bewerings onparlementêr is en dat hy dit moet terugtrek.

Die Kantoor van die ANC se Hoofsweep het die gedrag van lede van die Ekonomiese Vryheidsvegters in die Nasionale Vergadering as skokkend bestempel.

Die ANC se Parlementêre woordvoerder, Moloto Mothapo, sê die kantoor verwelkom aanduidings dat die Parlement die voorval gaan ondersoek

Polisie in groot getalle by Marikana ontplooi

Stakende mynwerkers in die platinumgordel in Noordwes het tot Woensdag om terug te keer werk toe.

Dinsdagaand is berigte van hernude oproer egter ontvang. Lonmin sê intussen dat die meeste van sy werkers aangedui het dat hulle Woensdag terug sal wees.

Bykomende polisie is in die gebied ontplooi om mynwerkers te beskerm wat weer wil werk, maar daar is vrese dat hul veiligheid in gevaar is.

As mynwerkers hulle hul werk wil behou, het hulle geen ander keuse as om weer te begin werk nie.

Drie mense is Maandag naby die Lonmin platinummyn vermoor toe hulle terug wou keer om te begin werk.

Die NUM het Amcu daarvan beskuldig dat hulle vir die moorde verantwoordelik is.

Tradisionele leiers het, na wat berig word, op ‘n gemeenskapsvergadering met stakende werkers besluit dat hulle sal wegbly totdat Lonmin werknemers se veiligheid kan verseker.

Die berigte van hernude geweld en intimidasie is ontvang nadat mynmaatskappye aangekondig het dat die meeste mynwerkers wil terugkeer werk toe.

Die polisie is in groot getalle by Marikana ontplooi waar hulle deur die nag die toestand gemonitor het.

Polisieversterkings na die gebied gestuur om mynwerkers te beskerm teen druk van die Amcu-vakbond wat hou by sy salariseis van R12.500 as minimumloon.

Die polisie het Dinsdag sestien mense, waaronder 14 vroue van die Mmaditlokwe-lokasie by Marikana in hegtenis geneem in verband met openbare geweld. Hulle sal binnekort in die hof verskyn.

Volgens die polisie hou die oproer nie verband met die stakende werkers se eise nie, maar spanning loop hoog in die gebied.

Die polisie het politieke partye gemaan om nie inwoners verder aan te hits nie. Die EFF het voorheen ‘n beroep op stakers gedoen om nie toe te gee tot druk van platinumprodusente nie.

Oproermakers het strate en paaie met brandende buitebande en vullis versper.

Oproeriges maak beswaar teen plofstofoperasies by die naburige Tharisa-chroommyn. Hulle sê hul huise word glo beskadig en die gesondheid van hul kinders word benadeel deur die skietwerk.

Die polisie moes rubberkoeëls gebruik om mense uiteen te jaag.

ANC-kantoor in Marikana afgebrand

Brandstigters het Donderdag ‘n klein kantoor van die regerende ANC in Marikana aan die brand gesteek, waar waar 34 stakende mynwerkers in 2012 doodgeskiet is, het die polisie gesê.

“Die polisie ondersoek ‘n saak van brandstigting,” het die polisiewoordvoerder Sabata Mokgwabona aan Sapa gesê.

“Die gebou is na berig word gebruik as ‘n kantoor vir ‘n politieke party,” het hy bygevoeg .

Die ANC het bevestig dat sy kantoor in die Nkaneng-lokasie afgebrand is.

Geen beserings is aangemeld nie en geen arrestasies is nog gemaak nie.

In minder as twee weke sal Suid-Afrikaners hulself na die stembusse wend waar president Jacob Zuma in alle waarskynlikheid vir ‘n tweede termyn herkies sal word.

Marikana is die tuiste vir sommige van die meer as 80.000 platinummynwerkers wat reeds drie maande ‘n staking volhou in hul eis vir hoër lone.

Die werkers is honger en desperaat en die ekonomie van Rustenburg word lamgelê deur die staking, maar die samesprekinge tussen die stakers en die mynbestuur het Donderdag op niks uitgeloop nie.

Die meeste werkers behoort aan die radikale Amcu wat die ANC-gesinde vakbond NUM uitgedruk het as die dominante unie.

Die nuwe linkse EFF-party van die populistiese Julius Malema geniet aansienlike steun in Marikana.

Skoor sal binnekort oor D-rekening verslag doen

Die Staande Komitee oor Openbare Rekeninge, Skoor, in Noordwes sal aanstons bevindinge oor ‘n ondersoek na die mynrekening in die provinsie, bekend as die D-rekening, bekend maak.

Honderde miljoene rand is deur vier mynmaatskappye vir gemeenskapsontwikkeling inbetaal in die D-rekening.

Skoor se ondersoek maak deel uit van ‘n drieledige ondersoek, met die Openbare Beskermer en die Ouditeur-Generaal wat ook ondersoek instel.

Die rekening is nog nooit ge-oudit sedert die ANC aan bewind gekom het nie. Die rekening is na bewering tans dolleeg.

Die voorsitter van die komitee sê die ondersoek is vertraag deurdat dokumentasie glo “laat” van belangehebbendes ontvang is.

Mynmaatskappye het sedert die apartheidsjare tantieme betaal aan sowat 100 tradisionele leiers om op hulle grond te myn. Hierdie gelde is gedeponeer in ‘n trustrekening bekend as die D-rekening wat nou beheer word deur die Noordwes-regering.

Meer as 243 miljoen rand alleen is sedert 2007 in die rekening inbetaal.

Een van die stamgemeenskappe, die Bapo ba Mogale naby Brits, het amper niks om te wys vir die honderde miljoene wat deur mynmaatskappye hul naam inbetaal is nie.

Die Bapo-stam woon by Marikana, Brits waar Lonmin sy mynbedrywighede het.

Lonmin sê hulle het reeds R372.9 miljoen in die D-rekening inbetaal maar die Bapo-stam het byna niks daarvan gekry nie.

Dit blyk egter dat R151 miljoen onttrek is uit D-rekening in die naam van die Bapo-stam.

Dit het vrese laat ontstaan dat honderde miljoene reeds verdwyn het uit die rekening.

Anargie, geweld, winste as Amcu-staking misluk

Die komende staking by platinummyne deur die Association of Mineworkers and Construction Union (Amcu) by die platinum- en goudprodusente kan tot geweld lei, skryf ‘n arbeidskenner Jan de Lange in Sake24.

De Lange sê omstandighede by die platinummyne van Anglo American Platinum, Impala Platinum (Implats) en Lonmin, is uniek en verskil van dié by goudmyne.

Die goudmyne waar Amcu gaan staak, is nie marginale myne nie en sluimerende geweld weens ‘n arbeidsgeskil word nie in die vooruitsig gestel nie.

Daarbenewens kan die drie groot platinumprodusente baie baat by ’n uitgerekte staking aangesien dit ‘n geweldige prysstyging op die wêreldmark kan beteken weens die skaarsheid die metaal wat ‘n loondispuut tot gevolg kan hê.

Dit kan selfs die redding vir verliesmakende myne beteken om nie nou te produseer nie omdat ’n staking geen of min lopende koste inhou.

De Lange glo daar is oorgenoeg tekens van ’n “derde mag” wat arbeidsverhoudinge op die platinummyne probeer in die wiele ry en geweld aanhits.

Verskeie sluipmoorde en geïnstigeerde rebellies teen Amcu om NUM se afgang te probeer stuit, kan tot hernieude konflik lei wat die toekoms van die bedryf in die land in die weegskaal kan plaas.

Stakings by platinummyne was lank voor die Marikana-slagting reeds gewelddadig.

Werkers sal waarskynlik nie weer by die NUM aansluit as hulle vertroue in Amcu verloor nie, want die ontnugtering met die NUM is te groot.

Die National Union of Mineworkers (NUM) het ‘n geskiedenis van uitbuiting deurdat hulle werkers by platinummyne al vir dekades lank as kanonvoer vir politieke loopbane en korrupsie misbruik het, skryf De Lange.

Platinummyners voer ’n sukkelbestaan van armoede terwyl hulle een van die waardevolste grondstowwe in die wêreld moet myn.

Amcu eis ’n basiese loon van R12 500 per maand wat deur werkerkomitees ná die Marikana-slagting besluit is.

As Amcu die vertroue van platinummynwerkers verloor, sal dieselfde werkers weer hul eie werkerkomitees vorm, wat tot ‘n bedingingskrisis sal lei.

Werkerskomitees skep anargie want kommunikasie stort daarmee in duie met ‘n kakofonie van stemme en eise wat daaruit opklink.

Die bemiddelaars wat ná die Marikana-slagting met hierdie komitees probeer redeneer het, het dit tot hul skok ontdek. Amcu het juis hierdie anargie gestuit toe hulle op ‘n kritieke tydstip tussenbeide getree het.

De Lange sê ‘n terugkeer na werkerskomitees kan die einde van Suid-Afrika se platinumbedryf beteken.

As Amcu die werkers se vertroue verloor, sal die platinumprodusente ongelukkig ook nie veel slaap daaroor inboet nie. Vir hulle is daar groot winste in die vooruitsig.

Vir die mense in die platimungordel egter, sal dit nag word.

Staking kom by Lonmin

Duisende mynwerkers van die vakbond Amcu by Lonmin in Noordwes het op ‘n staking om hoër lone besluit.

Die Lonminmynwerkers op Marikana het eenparig besluit om te begin staak.

Dit is nou die tweede staking in die platinumbedryf.

Werkers het vroeër ook by Impala Platinum besluit om te staak.

Die president van die vakbond, Amcu, Joseph Mathunjwa, sê hulle eis ‘n intree-vlak salaris van R12.500. Die mynbestuur het ‘n 8,5% verhoging aanbied.

Hy sê Amcu sal Maandag ‘n 48-uur stakings-kennisgewing op die mynbestuur bedien. Die werkers sal volgende Donderdag begin staak.

Geen einde is nog in sig wat die sitstaking by die Vlakfontein steenkoolmyn by Ogies in Mpumalanga betref nie. Die werkers het Woensdag begin staak.

Werkers is ontevrede oor voorgenome afleggings.

Amcu sê verskeie kontrakteurs se werkers asook administratiewe personeel, neem aan die staking deel.

‘Polisie het nie namens Lonmin by Marikana opgetree nie’

Brigadier Adrian Calitz, het ontken dat die polisie-operasie by op 16 Augustus 2012 te Marikana daarop gemik was om die staking deur Lonmin-mynwerkers te beëindig.

Calitz was die polisie se operasionele bevelvoerder tydens die gebeure naby Rustenburg toe twee twistende vakbonde, Amcu en NUM, mekaar die stryd aangesê het.

Die eerste voorvalle van geweld is aangemeld op 11 Augustus 2012 toe NUM-leiers op hul eie NUM-lede wat wou staak, geskiet het. Hulle wou waarskynlik verhoed dat lede oorloop na hul mededinger Amcu.

Die geweld wat daarna losgebars het, het die daaropvolgende drie dae gelei tot die dood van agt mense, waaronder stakers, polisielede en sekuriteitspersoneel by die myn.

Tydens kruisondervraging deur advokaat Dali Mpofu, ‘n lid van Julius Malema se Ekonomiese Vryheidsvegters (EFF), het Calitz gesê die polisie se enigste doelwit was om openbare orde te handhaaf.

Mpofu is die regsverteenwoordiger van die families van mynwerkers wat in die voorval dood is. Hy verteenwoordig nie die polisielede of sekuriteitspersoneel wat tydens die oproer vermoor is nie.

Mpofu het vroeër aan die kommissie gesê dat daar bewyse is dat die polisie inligting oor die bewegings van die mynwerkers van Lonmin se bestuur en veiligheidspersoneel ontvang het.

Volgens Mpofu het dit die vermoede laat ontstaan dat die polisie met Lonmin saamgewerk het om die staking te beëindig, en nie onafhanklik opgetree het nie.

Die ANC se adjunk-president Cyril Ramaphosa se oproep vir “meegaande optrede” en die weermag se betrokkenheid in die Lonmin-staking was ‘n “eufemisme vir dodelike geweld”, het Mpofu vroeër gesê.

Hy het Ramaphosa se rol belig tydens kruisondervraging van die Nasionale Unie van Mynwerkers (NUM) se president Senzeni Zokwana voor die Marikana-kommissie van ondersoek.

Die dood van 44 mense tydens ‘n onbeskermde staking deur rotsbooroperateurs in diens van Lonmin, word deur sommige ontleders voor die deur van Ramaphosa gelê, aangesien sy maatskappy Shanduka 18% van Lonmin besit.

Mpofu het verwys na ‘n ketting van e-posse waarin Ramaphosa die ontplooiing van die weermag en die polisie vir “meegaande optrede” wat geneem moet word, aanbeveel om die staking te beëindig.

Numsa wil Phiyega, Ramaphosa, Zuma voor ISH daag

President Jacob Zuma se regering, Lonmin-aandeelhouers en die nasionale kommissaris van polisie Riah Phiyega moet voor die Internasionale Strafhof (ISH) verskyn meen die metaalwerkersunie Numsa.

Afgevaardigdes na die National Union of Metalworkers van Suid-Afrika het by die spesiale kongres Woensdag gesê het hul leiers het instruksies om ‘n regsmening te kry oor die moontlikheid om die Marikanaslagting na die hof in Den Haag te verwys.

Die voorstel is deur Numsa se KwaZulu- Natal-streek ingedien en ondersteun deur die ander streke.

Mpumalanga het egter hul kommer uitgespreek dat die ISH se vooroordeel teen die Afrika-leiers bekend is.

Numsa se oproep het gekom na Dinsdagaand se vertoning by die konferensie van ‘n dokumentêr wat glo die wrede slagting van mynwerkers deur die polisie op 16 Augustus verlede jaar uitgelig het.

Die dokumentêr – nog ongeredigeer en nie vrygestel nie – het die meer as 1 000 afgevaardigdes laat kook.

Hulle het onderneem om ‘n regsmening in te win oor of daar gronde bestaan om Phiyega, die regering en die Lonmin -aandeelhouers voor die ISH te sleep.

Bo-aan Numsa se lys van Lonmin-aandeelhouers vir hul beweerde rol in die moorde is Cyril Ramaphosa, die BEE-mynmagnaat, wat net vier maande ná die voorval as die ANC se adjunk-president verkies is.

Die 16 Augustus 2012 moorde in Marikana was hoofnuus op internasionaal televisiekanale wat gelei het tot globale veroordeling.

Numsa beplan om die dokumentêr internasionaal te versprei, skynbaar in die hoop dat die ISH-aansoek sal slaag.

Numsa se adjunk sekretaris-generaal Karl Cloete het gesê die dokumentêr sal afgelewer word by sakemense.

Numsa-afgevaardigdes het ook gevra vir Phiyega se onmiddellike ontslag.”Ons is van mening dat sy [ Phiyega ] is die een wat instruksies gegee het om ons mense dood te maak,” sê Cloete.