DRK – Bladsy 2 – praag.co.za

Parlementslede slaan mekaar oor lukratiewe kontrakte

Die Nasionale Vergadering het die verslag van die ad hoc komitee oor Nkandla aanvaar, maar sluimerende jaloesie oor geld wou net nie bedaar nie.

Die verslag het president Jacob Zuma van enige blaam onthef nadat hy voorheen aanspreeklik gehou is vir die multi-miljoenrandse opgraderings by sy privaatwoning.

In die stemming wat gehou is, het 201 parlementslede dit aanvaar, 103 het dit verwerp en niemand het buite stemming gebly nie.

Opposisiepartye het egter ‘n minderheidsverslag ter tafel gelê wat eis dat Zuma uit sy amp verwyder word, nadat hulle die voorheen uit die komitee gestap het.

‘n Georkestreerde vertragingstaktiek deur die gesamentlike opposisie het vroeër Donderdag vir chaos in die parlement gesorg.

Opposisie-lede van verskeie partye het daarin geslaag om die Nkandla-debat met meer as drie ure te vertraag, deur ‘n rekord aantal kennisgewings van mosies in te dien.

Die Nasionale Vergadering is later weer ontwrig en moes verdaag word toe chaos opnuut uitgebreek het. Dit het kort voor elfuur gisteraand gebeur

Die EFF-parlementslid, Reneilwe Mashabela moes uit die Nasionale Vergadering verwyder word nadat sy geweier het die podium te verlaat. Sy het Zuma herhaaldelik ‘n dief genoem.

Die DA en EFF se humeure en klaarblyklike jaloesie het opgevlam oor lukratiewe kontrakte rakende ‘n verdrag tussen Suid-Afrika en die Demokratiese Republiek van die Kongo oor die Grand Inga hidro-ëlektrisiteitsprojek.

Volgens Mashabela het Khulubushe Zuma, president Zuma se neef, ‘n aandeel daarin.

DRK, Lesotho bly SAOG-kopseer

‘n Buitengewone beraad van die sogenaamde dubbele troika van die Suider-Afrikaanse Ontwikkelingsgemeenskap (SAOG), met sowel die Demokratiese Republiek van Kongo (DRK) as Tanzanië teenwoordig, is verlede week in Pretoria gehou om die voortslepende krisisse in die twee lande te bespreek.

Die beraad is deur Suid-Afrika se president Jacob Zuma, gelei wat ook die voorsitter van die SAOG-komitee vir politiek, verdediging en sekuriteit is.

Leiers van die koalisie-regering in Lesotho is gemaan om by hul verbintenisse tot die herstel van grondwetlike normaliteit in die koninkryk te bly.

Daar is ook besluit om die algemene verkiesings in Lesotho wat vir 2017 beplan is, te vervroeg.

Die leiers van die koalisie-regering is aangemoedig om saam te werk ten einde die Windhoek- en Pretoria-verklarings as ’n saak van dringendheid te implementeer.

Dit sluit onder meer die terugroep en herstel van die parlement in, wat vroeër eensydig deur die eerste minister opgeskort is.

Die land se leiers is ook aangemoedig om so gou as moontlik op die datums vir ’n nuwe verkiesing ooreen te kom.

Suid-Afrika se adjunk-president, Cyril Ramaphosa, met die steun van ’n span deskundiges uit troika-lidlande, is die opdrag gegee om as SAOG-fasiliteerder die kwessie in Lesotho te beredder, ten einde politieke stabiliteit en veiligheid in die kort en lang termyn te herstel.

Die noodsaaklikheid om die volle SAOG politieke, verdediging- en veiligheidwaarnemersendings vir ’n tydperk van drie maande in Lesotho te ontplooi, is ook benadruk.

Ná die drie maande sal die veiligheidsituasie in die land en die politieke stabiliteit deur die lidlande van die troika hersien word.

Wat betref die DRK, is die internasionale gemeenskap versoek om druk uit te oefen op maatskappye wat handel dryf in onwettige, gemynde minerale uit die DRK en onmiddellik ’n einde hieraan te maak. Lande wat as deurgang- roetes vir die onwettig gemynde minerale dien, is versoek om hul verbintenis tot die raamwerk vir vrede, veiligheid en samewerking in die DRK en Groot Mere-streek te eerbiedig en gestand te doen.

SAOG het sy posisie herbevestig ten opsigte van die rol van agentskappe van die Verenigde Nasies om logistieke steun en veiligheid te bied aan gewapende magte wat vrywillig hul wapens neergelê het en in die Kisangani-deurgangskamp gehuisves word.

’n Senior afvaardiging, bestaande uit amptenare van die troika, sal ook eersdaags die DRK besoek om met die leierskap van die FDLR-rebellegroep in gesprek te tree.

Die rebelle sal gewys word op die onafwendbaarheid van militêre optrede teen hulle, indien hulle nie by vorige ooreenkomste hou en vrywillig ontwapen nie.

Die internasionale gemeenskap en die Verenigde Nasies en sy agentskappe is versoek om bystand te verleen met die hervestiging van FDLR-lede wat vrywillig hul wapens neergelê het, maar nie bereid is of toegelaat sal word om na Rwanda te repatrieer nie.

Die buitengewone vergadering is ook bygewoon deur pres. Robert Mugabe van Zimbabwe, lt.genl. Seretse Khama Ian Khama, die president van Botswana, premier Thomas Thabane van Lesotho, visepresident Saulos Chilima van Malawi, min. Raymond Tshibanda van die DRK en min. Bernard Membe van Tanzanië.

DRK se ‘boeremag’ verskyn

Die hofsaak van twintig Kongolese burgers wat daarvan beskuldig word dat hulle beplan het om die president van die Demokratiese Republiek van die Kongo, Joseph Kabila se bewind omver te werp, begin Maandag in Pretoria.

Die groep, wat glo 7000 sterk is met internasionale steun, wou Kabila vang en verhoor. Een het glo na bewering gesê as die president deur ‘n dwaalkoeël getref word, sal dit nie ‘n verlies wees nie.

Hulle was onder aanvoering van Etienne Kabila Taratibu, wat beweer dat hy die regte seun van die ou president Laurent Kabila is. Die huidige Joseph is glo ‘n aangenome kind uit Rwanda.

Nog ‘n opposisielid, Etienne Tshisekedi, het die president ook daarvan beskuldig dat hy nie die ware seun van die vorige leier is nie.

Daar bestaan gronde vir sy agterdog, want Kabila se ma, Sifa, en sy broer en suster moes selfs ‘n getuie vir Joseph se geboorte in Fizi roep.

Joseph Kabila, het in ballingskap in Tanzanië sy kinderdae deurgebring, maar praat Frans met ‘n Engelse aksent. Die Kabila-gesin het in Dar es Salaam onder die beskerming van die destydse Tanzaniese president Julius Nyerere gewoon.

Ten einde die aandag van Mobutu se intelligensiediens te vermy, het hulle voorgegee om lede van die Fipastam te wees,’n klein etniese groep van suid-weste van Tanzanië.

Joseph het ‘n Rwandese vader en moeder, Christopher en Marcelline Kate Kanambe, uit Kampala, Uganda, volgens Etienne.

Praag het met karwagte in Johannesburg uit die DRK gesels wat dié sentiment beaam het en ontstoke is dat Suid-Afrika die huidige president ondersteun. Hulle meen president Zuma stel meer in sy konsessies in hulle land belang.

Die groep wat gevang is, is onder die vaandel van die Union des Nationaliste pour le Renouveau (Unie van Nasionaliste vir Hernuwing) verenig.

Die groep het na bewering beplan om ander senior amptenare in die DRK te teiken, insluitend die hoof van die Weermag, die minister van Binnelandse Sake en die president van die Sentrale Bank.

Die groep is 17 maande gelede in Suid-Afrika in hegtenis geneem, en die beweerde moordlys is op een van die verdagtes se rekenaar gevind, het RSG berig.

Die hofsaak sal na verwagting ses weke duur.

Kernkrag is uitgemaakte saak sê minister van energie

Kernkrag is nou ‘n uitgemaakte saak om die land se energie-tekort te verlig, sê die minister van energie Tina Joemat-Pettersson.

Sy het by ‘n New Age sake-ontbyt Woensdag gesê: “Kernkag sal gebruik word. Hierdie versekering het tot nou toe ontbreek.”

Sy het verwys na President Jacob Zuma se bevestiging in sy staatsrede Dinsdagaand.

In sy toespraak het Zuma die oplossing van die energiekwessie as sentraal tot SA se toekomstige ekonomiese groei geïdentifiseer.

Joemat-Petterson sê die regering kyk na radikale transformasie in die energiesektor om die beperkings op elektrisiteit te bowe te kom.

Duisende huishoudings en sake-ondernemings word tans deur beurtkrag geraak.

Die minister sê dit is van kritieke belang dat daar by Eskom ingegryp word om strukturele veranderinge in die sektor teweeg te bring.

“Hierdie situasie vra vir ‘n radikale transformasie van die energie-sektor, ‘n volhoubare energiemengsel wat bestaan uit steenkool, son, wind, hidro-, gas en kernkrag,” het sy gesê.

Die Nasionale Kernreguleerder en Energie Uitvoerende Koördinerende Komitee sal in ‘n Kabinet-subkomitee oor energie-sekuriteit omgeskakel word om institusionele kapasiteit te skep.

‘n Subkomitee sal verantwoordelik wees vir die toesig van, koördinering oor en rigting aan die energiesektor.

Zuma se nuwe subkommittee sal dus volle beheer oor die land se elektrisiteitbesluitneming neem. Dit sal waarskynlik ‘n Russiese kernkragplan en die Inga-projek bevoordeel.

“Kernkrag het die moontlikheid van die opwekking van meer as 9000 MW, terwyl skaliegas erken word as ‘n spel-wisselaar vir ons ekonomie,” het Zuma Dinsdag gesê.

Daar is egter baie weerstand teen hidrobreking wêreldwyd.

Sokkerwedstryd eindig in vertrapping

Sokkergeweld het die lewens van 15 mense geëis in die Demokratiese Republiek van die Kongo. Volgens sommige berigte is die aantal dooies hoër.

Minstens die toeskouers dood en 21 ernstig beseer nadat geweld Sondag by ‘n sokkerwedstryd in Kinshasa in die hoofstad van die DRK uitgebreek het.

Die polisie het glo traangas afgevuur na ‘n klipgooiery wat daarna tot ‘n vertrapping gelei het. ‘n Muur by die stadion het ook meegegee.

Vertrapping is glo ‘n algemene verskynsel in die DRK by groot byeenkomste waar 21 mense verlede maand mekaar doodgetrap het toe dinge by ‘n musiekkonsert skeefgeloop het en die skare op loop gegaan het.

Amptenare sê die dodetal is deur Kinshasa se goewerneur, André Kimbuta, aangekondig.

Kimbuts het die beseerdes in die hospitaal besoek.

Die kragmeting tussen twee gewilde plaaslike spanne, ASV Club en Tout Puissant Mazemba het tot die vertappingsterftes gelei.

Drie SA-soldate gewond in DRK

Drie Suid-Afrikaanse weermaglede is tydens ‘n aanval in die ooste van die Demokratiese Republiek van die Kongo gewond. Een verkeer in ‘n ernstige toestand.

Die twee anders sterk goed aan in ‘n hospitaal in Goma, volgens die SANW

‘n Woordvoerder van die departement van verdediging, Jaco Theunissen, sê een van die gewapende rebellegroepe in die DRK het in die vroeë oggendure ‘n Suid-Afrikaanse basis aangeval. Die soldaat wie se beserings as ernstig beskryf is, is stabiel.

Nog ‘n soldaat is deur skrapnel getref en ‘n derde soldaat het sy enkel in die skermutseling geswik.

Daar word geglo dat die rebelle gekoppel is aan die Mai Mai.

Die drie soldate is gewond in Nyabondo sowat 70 km noord van Goma in die oorloggeteisterde provinsie Noord-Kivu.

Die drie is deel van ‘n ontplooiing van 3000 soldate van Suid-Afrika, Malawi en Tanzanië, wat deel uitmaak van die VN-stabiliseringsending in die Kongo.

‘n Honderd Suid-Afrikaanse soldate uit ‘n 1000 in die DRK is by die Nyabondo-basis ontplooi, het kaptein Theunissen gesê.

Theunissen sê die soldate is aangeval deur ‘n geskatte 4500 rebelle in hul basis.

‘n Militêre kenner blameer die aanval op die Alliansie vir ‘n vrye en soewereine Kongo.

“Daar word geglo dit is Mai Mai. Hulle kom van Uganda na die DRK, want M23 is onlangs verslaan,” het hy gesê.

Die alliansie bestaan vermoedelik uit sowat 500 man, byna uitsluitlik lede van die Hunde-stam .

Die groep is betrokke in gewelddadige en uitgerekte grondgeskille met die Tutsi’s in Noord- Kivu.

Die Mai Mai is oënskynlik gevorm om die inval van Rwandese magte en geaffilieerde Kongolese rebellegroepe te weerstaan, maar daar word vermoed dat die groep spanning in die oostelike streek van die DRK uitbuit tot sy eie voordeel.

Theunissen het gesê die SANW het uitstekende werk gedoen in ‘n skoonmaakoperasie ná die aanval.

Goldstone-kommissie gaan dood van Dag Hammarskjöld na 50 jaar oopkrap

‘n Sweedse diplomaat en die sekretaris-generaal van die Verenigde Nasies, Dag Hammarskjöld, is na die ontploffing van sy vliegtuig op 18 September 1961 in die destydse Noord-Rhodesië (tans Zambië) dood.

‘n Internasionale kommissie wat bestaan uit die voormalige regters Sir Richard Goldstone en Sir Stephen Sedley, is onlangs – in Februarie 2014 – deur die Verenigde Nasies saamgestel. Dié kommissie het die Verenigde State van Amerika intussen versoek om verskeie geheime dokumente rakende die kwessie vry te stel.

Hammarskjöld was op pad om Moïse Tshombe, wat die rebelle in koper-ryk Katangaprovinsie gelei het, te ontmoet.

Katanga wou destyds van die sentrale regering van die Kongo onder Patrice Lumumba afstig. Hy het vroeër die Kongo se onafhanklikheid van België verseker.

Tshombe, wat in ‘n tronk in Algiers in 1969 gesterf het, is deur Belgiese sakebelange ondersteun en hy het ‘n huursoldaatweermag op die been gebring wat die Verenigde Nasies se pogings om die Kantangaprovinsie – ook bekend as Shaba – as deel van die sentrale regering van die Kongo te behou, uitgedaag het.

Een dokument wat reeds vrygestel is, is ‘n kabel van die Amerikaanse ambassadeur in die Kongo, Ed Gullion. Die diplomaat identifiseer daarin die huursoldaat wat in alle waarskynlikheid die vliegtuig van die sekretaris-generaal van die VN afgeskiet het as Jan van Risseghem.

Suid-Afrika is ook destyds van betrokkenheid by die ramp beskuldig, omdat ‘n “wit suprematistiese netwerk” glo die sluipmoord beplan het. Hammarskjöld het egter baie vyande gemaak, veral die Europese koloniale moondhede, asook Rusland.

Suid-Afrika het Katanga se onafhanklikheid destyds gesteun.

Die Britse Hoë Kommissaris Cuthbert Alport het die vlug op die lughawe ingewag toe die vliegtuig elders naby Ndola in vlamme neergestort het. Omdat Altport by die lughawebestuur daarop aangedring het dat Hammarskjöld elders heen gevlieg het, is die soektog ure lank vertraag.

Die wrak van die vliegtuig is eers na langer as vyftien ure opgespoor, maar ooggetuies by die ramp sê daar was binne enkele ure reeds mense wat die toneel gefynkam het.

Angel-Saksiese diplomate was glo bekommerd oor die verlies aan mag van die groot moondhede in Afrika nadat Hammarskjöld ‘n militêre operasie in die Kongo teen die advies van Washington en Londen gemagtig het.

In Suid-Afrika is die SAIMN-dokumente met betrekking tot die dood van Dag Hammarskjöld op ‘n uiters vreemde manier gehanteer. Aartsbiskop Tutu het afskrifte van die dokumente in die openbare domein in 1998 vrygestel.

Hy het in ‘n persverklaring gesê dat die oorspronklike aan die destydse minister van Justisie, Dullah Omar oorhandig is. Maar hierdie oorspronklike dokumente het intussen verdwyn, sodat dit nou onmoontlik is om vas te stel of, soos daar beweer word, dit vervalsings is.

Twee van Hammarskjöld se topvolgelinge, Conor Cruise O’Brien en George Ivan Smith, is albei oortuig dat die sekretaris-generaal se vliegtuig afgeskiet is deur huursoldate wat vir Europese nyweraars in Katanga gewerk het.

Hulle glo dat die Britte gehelp het om Operasie Morthor onder leiding van Hammarskjöld te kelder. In 1992 het die twee ‘n brief aan die Guardian gestuur waarin hulle beweer dat die vliegtuig “per ongeluk” afgeskiet is.

Wêreldbankpresident verwys na ‘energie-apartheid’

Jim Jong Kim, president van die Wêreldbank

Die president van die Wêreldbank, Jim Jong Kim, het gister gesê dat “elekrisiteit van die mense van Afrika weerhou word” wat op globale “energie-apartheid” neerkom.

Die totale energie-verbruik van die miljard mense in Afrika is gelykstaande aan dít wat België met sy 11 miljoen inwoners verbruik.

“Tans is die totale energie-verbruik van die miljard mense in Afrika gelykstaande aan wat België aan sy 11 miljoen inwoners bied,” het Kim tydens ‘n toespraak oor die bank se stryd teen armoede gesê.

“Dis ‘n vorm van energie-apartheid wat ons moet aanspreek as ons ernstig daaroor is om die Afrikalande te help groei en om geleenthede vir alle Afrikane te skep.”

Kim het die kritiek gebruik om die bank se mees onlangse groot projek in Afrika te verklaar, ‘n skenking van $73 miljoen aan die Demokratiese Republiek van die Kongo om te help om ontwikkeling van die 4 800-megawatt- Inga 3-hidroelektrieseprojek te begin.

Die Inga-omgewing het die potensiaal om 40 gigawatt krag op te wek, het Kim verklaar, wat gelyk is aan die helfte van alle kragopwekkingskapasiteit wat tans in Afrika suid van die Sahara – meesal in Suid-Afrika – bestaan.

“Ons het dié krag in Afrika desperaat nodig,” het hy tydens ‘n toespraak aan die Amerikaanse Council on Foreign Relations gesê.

Volgens gegewens van die Wêreldbank, leef 1,2 miljard mense ter wêreld sonder elektrisiteit, met ‘n derde van hulle wat in vyf Asiese en Afrikalande saamgetrek is.

SANW in ‘kritieke verval’

sandf — ‘n Kritieke gebrek aan modernisering

Suid-Afrika se gewapende magte is volgens ‘n militêre strategie-oorsig in kritieke verval wat minstens ‘n dekade nodig sal hê om omgekeer te word.

Volgens Reuters kan die agteruitgang in die land se verdedigingsvermoë ‘n invloed hê op alles van grensveiligheid tot handel- en vredessendings op die vasteland.

Dit kan ook beteken dat binnelandse veiligheid nie verseker is nie, maar die verslag is onheilspellend stil daaroor.

Suid-Afrika het op die oomblik soldate in die Demokratiese Republiek van die Kongo en Soedan, en sy skepe ondersteun anti-seerowerpogings naby die kus van Mosambiek.

In die Suid-Afrikaanse Verdedigingsoorsig van 2014 word gesê sulke ontplooiings word ook bedreig.

Volgens die verslag is daar ‘n gebrek aan behoorlike ammunisie, verouderde militêre vragvliegtuie en uitgediende toerusting soos vragmotors.

In die verslag word ook daarop gewys dat die gebrek aan fondse die modernisering van ‘n gewapende mag van 97.000 lede terughou.

Sonder meer geld, kan Pretoria se diplomatieke en kommersiële uitbreiding in Afrika misluk, waar die ou koloniale magte soos Frankryk, en ‘n nuwe een soos China teenwoordig is.

“Daar moet óf ‘n groter begrotingstoewysing of ‘n aansienlik afgeskaalde vlak van ambisie en toewyding wees,” lui die verslag.

Massiewe beleggings in swaar wapenvermoë, asook die handhawing van vrede in hoë-risiko situasies moet oorweeg word.

Kenners het gesê dit beteken Suid-Afrika se aanvalshelikopters en tenks moet aandag geniet.

Dit kan die militêre begroting na R74 miljard in 2030 van sowat R40 miljard in 2013 byna laat verdubbel.

Dit is gelykstaande aan sowat 1% van die BBP , ‘n verhouding ver onder ander ontwikkelde en ontwikkelende lande.

Militêre veiligheid benodig volgens die verslag die jaarlikse befondsing van R116 miljard of 3,3 % van die bruto binnelandse produk.

Onder apartheid was Suid-Afrika het een van die mees gevreesde gewapende magte op die vasteland, maar die hele militêre kompleks het intussen in duie gestort na ‘n doelbewuste gesamentlike poging van die NP en ANC om dit tot niet te maak.

Die ontplooiing van die Suid-Afrikaanse Weermag wat aan anti-seerowery-operasies naby die kus van Oos-Afrika deelneem, is intussen vir nog ‘n jaar verleng.

Altesaam 220 lede van die Weermag is aktief in die Mosambiekse en Tanzaniese gebiedswaters.

Bootongeluk eis 108 DRK-vlugtelinge

Die dodetal in die naweek se bootongeluk in die weste van Uganda het gestyg tot 108 van 19 wat aangemeld is Saterdag.

David Kazungu , Kommissaris vir Vlugtelinge in die Ministerie, het aan Xinhua in ‘n onderhoud verklaar dat 108 liggame in die Albertmeer opgespoor is Maandagmiddag.

Die meeste van die passasiers op die boot was vlugtelinge wat wou terugkeer huis toe na die Demokratiese Republiek van die Kongo (DRK).

Hy het gesê die totale aantal mense wat op die boot was nog nie bekend nie. Vyf-en-veertig het die ongeluk oorleef.

Hy het gesê die vlugtelinge wou terugkeer huis toe na die VN-ingryping ‘n Ugandese rebellegroep in die ooste van die DRK geneutraliseer het.

“Die Koning van die Kamango-gebied het ‘n beroep op sy volk gedoen om terug te keer huis toe,” het hy gesê.

Hy het gesê die soektog na meer liggame gaan nog steeds voort maar die kans om meer oorlewendes te kry is skraal. Talle lyke, veral die van kinders, is nog nie geïdentifiseer nie.

Stappe teen Rwandese diplomate weens misdadige bedrywighede

Jeff Radebe, minister van justisie en grondwetlike ontwikkeling, sê Suid-Afrika se besluit om diplomate van DRK-buurlande uit die land te sit, was geregverdig.

Radebe het die media in die Parlement toegespreek oor die onlangse diplomatieke onderonsie met Rwanda.

Suid-Afrika het drie Rwandese diplomate en een van Burundi die deur gewys, omdat daar bewyse was dat hulle by misdaad betrokke was, sê Radebe. Volgens hom was die indiwidue by onwettige bedrywighede betrokke.

Omdat hulle diplomatieke immuniteit geniet, kon die vier nie in hegtenis geneem word nie.

Rwanda het in reaksie ses Suid-Afrikaanse diplomate uit die land gesit.

Dié diplomatieke voorval volg nadat die voormalige Rwandese intelligensiehoof, Patrick Karegeya, in Desember in Suid-Afrika vermoor is.

‘n Week gelede was daar ‘n aanslag op die huis van nog ‘n Rwandese uitgewekene, die voormalige weermaghoof, Kayemba Nyamwasa.

Radebe het egter gesê diplomatieke betrekkinge met Rwanda is nog steeds op koers ten spyte van die stappe wat teen die onderskeie lande se diplomate geneem is.

Ingevolge die grondwet moes die regering teen hulle optree, het Radebe gesê.

VN loods aanval teen Hoetoe-rebelle in DRK

Die Verenigde Nasies en die Kongolese leër het militêre operasies in die Demokratiese Republiek van die Kongo teen die Rwandese Hoetoe-rebellegroep, die FDLR ontplooi.

Die VN se nuwe ingrypingsmag wat Suid-Afrikaanse soldate insluit, sal in die oostelike deel van die land die aanval teen die rebelle loods.

Die FDLR het skuiling in die reënwoude se ruigtes geneem tussen die plaaslike bevolking.

Die groep is in die DRK sedert die Toetsies na ‘n rebellie beheer van Rwanda oorgeneem het.

Intussen het Suid-Afrika ook ‘n diplomaat van Boeroendi die deur gewys. Die rede vir Jean-Claude Sindayigaya se vertrek is nog nie duidelik nie, maar hy het reeds die land verlaat.

Boeroendi se minister van buitelandse sake het Saterdag bevestig dat een van sy land se diplomate geskors is uit Suid-Afrika.

Die stap kom nadat Suid-Afrika en Rwanda Vrydag in ‘n diplomatieke onderonsie slaags geraak het oor die hernude sluipmoordaanslag op ‘n uitgeweke Rwandese generaal in Johannesburg.

Kigali het ses Suid-Afrikaanse diplomate geskors, na Pretoria drie Rwandese amptenare 72 uur gegee het om die land te verlaat, het Rwanda se minister van buitelandse sake en diplomatieke bronne gesê.

Rwanda se minister van buitelandse sake het op Twitter gesê hulle is bekommerd dat Suid-Afrikaanse owerhede skuiling aan andersdenkendes bied wat verantwoordelik is vir terroriste-aanvalle in Rwanda.

Amptenare van buitelandse sake het geweier om kommentaar te lewer en gesê ‘n verklaring sal later uitgereik word.

Die uitsetting volg na ‘n hernude aanslag op oud-weermaghoof Faustin Kayumba Nyamwasa. Sy teenwoordigheid in Suid-Afrika veroorsaak ‘n diplomatieke hoofpyn vir Pretoria.

Spanning het verdiep nadat Kigali se voormalige intelligensiehoof Patrick Karegeya dood aangetref is in ‘n Johannesburgse luukse hotel op Nuwejaar.

Geen arrestasies is nog gemaak ivm Karegeya se moord nie.

Sommige lede van die opposisie beweer dat die Rwandese regering agter die aanval sit.

Zuma vra Afrika-eenheid voor Veiligheidskonferensie in Frankryk

Suid-Afrika en die Kongo-Brazzaville sê die tyd het aangebreek vir Afrika-leiers om oplossings vir Afrika- probleme te vind.

Afrika-leiers berei voor om volgende maand se Veiligheidskonferensie oor Afrika in Frankryk by te woon.

President Jacob Zuma het ‘n vergadering met sy eweknie van die Republiek van die Kongo Denis Sassou Nguesso Saterdag in Pretoria gehou. Die Kongo is die DRK se buurland en tuiste van stamme wat ook in die DRK woon.

Zuma sê wat hulle nodig het is om eenheid te wys in die soeke na oplossings vir die vasteland se probleme.

“Die tyd het aangebreek dat ons moet werk aan oplossings vir Afrika se probleme. In plaas daarvan dat mense ons te vertel wat om te doen, moet mense ons ondersteun as sê wat ons gaan doen.”

Sassou – Nguesso se sê Afrika-leiers moet ondersteuning van buite kry.

“Op die kollektiewe kwessies, veiligheid en vrede, stem al die Afrika-leiers saam. In die SAR is ons besig met optredes en ons wag vir die ondersteuning van ons vennote. Ons hoop die Afrika-Unie (AU) sal die voortou neem en sal later bygestaan word deur die Verenigde Nasies (VN ),” sê Sassou – Nguesso .

Die Veiligheidskonferensie oor Afrika sal onder andere die verslegtende situasie in die Sentraal-Afrikaanse Republiek (SAR ) bespreek.

DRK-vredesooreenkoms in die weegskaal

‘n Vredesooreenkoms tussen die regering van die Demokratiese Republiek van die Kongo en M23 rebelle is in die weegskaal, nadat ‘n finale ooreenkoms nie bereik kon word nie.

Die sogenaamde Kampala Dialoog moes gisteraand afgesluit word, en die ondertekeningseremonie sou Maandag plaasvind.

Daar is blykbaar ‘n verskil oor of die ooreenkoms ‘n vredesooreenkoms moet wees of ‘n verklaring waarin die rebellie verwerp word.

Spesiale gesante in die DRK het onder leiding van Mary Robinson van die VN ‘n dringende beroep op die partye gedoen om hul verskille oor die formaat van die dokument by te lê en verbind te bly tot vrede. – RSG