VSA – Bladsy 12 – praag.co.za

Verhoor van Amerikaanse joernalis in Iran begin

Die verhoor van ‘n Washington Post joernalis wat die afgelope tien maande op aanklagte van onder meer spioenasie in Iran aangehou word, sal na verwagting vandag in Teheran begin.

Jason Rezaian, wat oor burgerskap van beide van die VSA en Iran beskik, se vrou is ook gearresteer maar later op borgtog vrygelaat.

Op dieselfde dag wat Europa se top buitelandse beleidsmakers ‘n datum vir die hervatting van kerngesprekke met Iran voorgestel het, is Reza Taghavi, ‘n Amerikaanse sakeman wat vir meer as twee jaar opgesluit was, in Teheran vrygelaat.

Die tydsberekening van hierdie gebeure het spekulasie laat toeneem dat dié geval en ander verhore se uitkoms vir hefboomkrag in die kernsamesprekings gebruik sal word.

Iraanse amptenare het intussen gekla oor die aanhouding van 12 tot 15 Iraanse burgers deur die Verenigde State van Amerika vir die oortreding van ekonomiese sanksies.

Rezaian se lot sal waarskynlik gekoppel word aan heersende politieke spanning en berekeninge om die sukkelende verhouding tussen Iran en die Verenigde State van Amerika te beïnvloed.

Alhoewel Rezaian, 39, ‘n Kaliforniese boorling met dubbele burgerskap in Iran en die VSA is, het sy Iraanse erfenis ‘n verdere komplikasie veroorsaak.

Met die vervolging van twee ander Amerikaners van Persiese afkoms wat tans gevange gehou word in Iran, herken die owerhede in Teheran nie hul Amerikaanse burgerskap nie en dus ook geen konsulêre regte wat gewoonlik gegun word aan ander buitelandse gevangenes nie.

Vredesgeprek in Burundi stol

Burundi se opposisie boikot tans vredesgesprekke met die regering. Die dialoog het Maandag uit protes teen die moord van ‘n opposisieleier, Zedi Feruzi, ten einde geloop.

Die VN het vroeër ingegryp om ‘n maand van protes en geweld te beëindig in dié Oos-Afrika land.

Minstens 20 mense is dood sedert oproer uitgebreek het op 26 April, ‘n dag nadat President Pierre Nkurunziza aangekondig het dat hy vir ‘n derde termyn van vyf jaar sal dien omdat hy nie vir sy eerste termyn verkies is nie.

Die oproeriges teen Nkurunziza is telkens deur soldate onderdruk wat in die lug gevuur het, net om weer elders te hergroepeer.

Daar is ook spanning in weermaggeledere dae ná die mislukte staatsgreep wat deur ’n topgeneraal gelei is, het AFP berig.

Soldate was in straatgevegte met mekaar gewikkel. Die polisie het nou grootliks op straat oorgeneem in ’n poging om die betogings te verhinder.

Voor die mislukte staatsgreep is die weermag deur betogers as meer neutraal as die polisie beskou. Soldate het dikwels tussen die polisie en betogers inbeweeg om konfrontasie te voorkom.

Minstens 20 mense is in straatgevegte gedood voordat die generaals verlede week ’n mislukte staatsgreep uitgevoer het.

Pacifique Nininahazwe, ’n leidende figuur in die protes teen Nkurunziza se poging om vir ’n derde presidentstermyn te staan, het gevra vir ’n “vreedsame betoging sonder beledigings en sonder dat klippe gegooi word”.

“Ons stop wanneer die polisie ons konfronteer. Ons sit met ons hande in die lug en daarna stap ons verder,” het hy in ’n boodskap gesê wat op sosiale media versprei is nadat vier onafhanklike radiostasies deur die owerhede gesluit is.

In die hoofstad se Nya-kabiga-distrik het die weermag in die lug gevuur terwyl betogers met hul hande in die lug op die grond gelê het en die volkslied gesing het.

Bujumbura se burgemeester, Juma Saidi, het Sondag op staatstelevisie gewaarsku dat betogers “as deel van die staatsgreep” beskou sou word en veiligheidsmagte opdrag gegee om hulle as sodanig te behandel.

’n Groep topgeneraals het vroeër probeer om Nkurunziza uit die kussings te lig, terwyl hy op ’n besoek aan Tanzanië was.

Nkurunziza word daarvan beskuldig dat hy ’n veldtog van onderdrukking teen sy opponente van stapel gestuur het. Hy het ook probeer om die onafhanklike media stil te maak sedert die staatsgreepleiers ná hewige gevegte die knie voor lojalistiese troepe gebuig het.

Sewentien beweerde staatsgreepsamesweerders, insluitende ’n voormalige minister van verdediging en twee toppolisiekommissarisse, het reeds in die hof verskyn op klagte dat hulle probeer het om die staat omver te werp.

Barclays ook met miljoene beboet

Vyf van die wêreld se grootste banke is met miljarde dollar beboet omdat hulle saamgesweer het om bankkoste te manupileer.

Barclays is die grootste boete van 2,4 miljard dollar opgelê.

UBS het ingestem on $545 miljoen dollar te betaal. Die ander banke wat beboet is, is die Royal Bank van Skotland, JP Morgan en City Group.

Hulle moet die boetes aan Britse owerhede betaal.

Suid-Afrika se Mededingingsraad het ook aan die ondersoek deelgeneem en verskeie plaaslike banke word vir valutatransaksies ondersoek.

Die banke wat in Suid-Afrika ondersoek word, is BNP Paribas, Citigroup, Barclays, JP Morgan, Investec, Standard Bank en Standard Chartered.

Die aankondiging van die boetes is deur die nuwe swart Amerikaanse prokureur-generaal, Loretta Lynch, aangekondig.

Sy het gesê die banke het “asemrowende flagrante” groep opgerig met die naam “die kartel” om ‘n mark ter waarde van $ 5trn per dag te manipuleer.

Lynch het tydens ‘n perskonferensie gesê dat die banke se gedrag mededinging beperk het.

“En dit moet mededingers in die toekoms weerhou daarvan om winste na te jaag sonder inagneming van regverdigheid, of openbare welsyn,” het Lynch gesê.

Republikeine is woedend oor Lynch se aanstelling omdat sy volgens hulle president Obama se ongebreidelde aanvaarding van onwettige immigrante in die VSA ondersteun.

Nepal weier Britse helikopters in rampgebied

Drie Chinook-helikopters wat deur die Britse leër gestuur om met noodleniging in die aardbewing-geteisterde Nepal te help, en gestrand was in Chandigarh in Noord-Indië, is onverrigter sake terug na Brittanje.

Volgens vroeëre berigte het die regering van Nepal toegang vir die helikopters geweier.

Groot verwarring heers blykbaar oor die redes vir die weiering. Die Indiese regering sê die weiering het niks met politiek te make nie.

Die Indiese minister van Inligting sê daar is gewoon nie plek op lughawe se aanloopbaan in Katmandoe vir die groot heli’s nie, maar volgens Britse bronne is daar oorgenoeg plek omdat die Chinooks ook op die gras neffens die teer kan land.

Volgens Chinese bronne wil die Indiese regering egter nie ‘n Britse of ‘n Amerikaanse militêre teenwoordigheid in die rampgebied hê nie.

Die Indiese ministerie van Buitelandse Sake het ook ‘n Amerikaanse versoek om ‘n lugbeheersentrum in Nepal op te rig, geweier.

Bendegevegte eis nege in Texas

Minstens nege mense is dood in bendegevegte in Waco, Texas, het RSG berig.

Agtien mense is ook beseer in gevegte by die restaurant. Soveel as vyf verskillende bendes was by die gevegte by die Twin Peaks-sportkroeg betrokke.

Die polisie sê agt motorfietsryers is op die toneel dood en `n negende in die plaaslike hospitaal.

Volgens omstanders is tot dertig vuurwapens gebruik en meer as `n honderd skote is afgevuur.

Die gevegte tussen die motorfietsbendes het oor parkeerplekke by die sportkroeg begin.

Dit het met vuisgevegte begin, toe is messe en knuppels uitgepluk en dit het eindelik in `n skietgeveg ontaard.

Burundi se president keer terug

Die president van Burundi, Pierre Nkurunziza het na die hoofstad, Bujumbura teruggekeer, het RSG berig.

Nkurunziza was in Tanzanië toe ‘n weermaggeneraal aangekondig het dat hy hom in ‘n staatsgreep ontsetel het.

Die president het die weermag, polisie en die landsburgers gelukgewens omdat hulle die staatsgreep teengestaan het.

Soldate aan beide kante het vroeër op mekaar geskiet om beheer oor Bujumbura oor te neem.

Magte wat lojaal aan die president is, sê hulle het sedertdien die rebelle verdryf en het weer volle beheer oor die stad.

Die onrus in Bururndi word deur spanning tussen China, Rusland en die VSA gedryf.

Orkane woed in Texas

Een mens is dood en twee groepe mense in die noorde van die Amerikaanse deelstaat Texas moes per helikopter na veiligheid gebring word nadat hulle in stygende vloedwaters vasgekeer was.

Die stormweer kom nadat orkane Texas oor die naweek getref het, het AFP berig.

Vier volwassenes en ’n baba is Sondag van hul huis se dak in Krum gered. Twee volwassenes is per helikopter van hul bakkie se dak in Sanger gered. Tien ander mense is ook uit hul huise in die gebied ontruim.

Een mens is dood en verskeie beseer toe ’n orkaan Saterdag ’n landelike gebied suid van Cisko getref het.

Sondag was daar ’n orkaan naby die dorpie Van in die distrik Van Zandt. Verskeie huise is erg beskadig.

VSA woedend oor EU-besluit wat GM-gewasse raak

Die Europese Kommissie se voorgestelde wette wat individuele lidlande van die Europese Unie sal toelaat om invoere van geneties gemanipuleerde gewasse te beperk of te verbied, het ‘n skerp reaksie van die VSA ontlok.

Selfs al is sulke GM-gewasse goedgekeur vir die EU as ‘n geheel, sal lidlande nog self kan besluit of dit strydig is met hul gesondheidsvoorskrifte.

Die VSA is woedend oor die planne wat menslike voedsel sowel as dierevoere raak.

Die EU se houding jeens die omstrede geneties gemodifiseerde kosse en veevoer, volg na ‘n vroeëre besluit deur die Europese Parlement in Januarie, wat aan die 28 EU-lande die reg gee om individueel te besluit of hulle GMO’s wil aanplant.

“Ons is baie teleurgesteld deur vandag se aankondiging van ‘n regulerende voorstel wat byna onmoontlik sal wees om te versoen met die EU se internasionale verpligtinge,” sê Michael Froman, die Amerikaanse handelsverteenwoordiger.

Die kompromie is aanvanklik verwelkom, maar omgewingsgroepe sê dat GMO’s die EU nou via die agterdeur kan binnekom op aandrang van reuse Amerikaanse agri-voedsel maatskappye.

Maar aan die ander kant, het die VSA en nywerheidsgroepe gesê die ooreenkoms verbreek die EU se kardinale reël dat die blok as ‘n enkele mark funksioneer waar produkte veronderstel is om vrylik versprei te kan word.

Slegs een GMO word tans toegelaat in die EU. Dit is die multinasionale Monsanto se handelsmerk vir koring GMO MON810 wat in Spanje, Portugal en die Tsjeggiese Republiek verbou word.

Amerika is die grootste produsent van geneties gemanipuleerde gewasse. Die oorgrote meerderheid van die mielies wat in Suid-Afrika geproduseer word, is ook geneties gemanipuleer.

Demokratiese VS-senator reël visums vir damesimmigrante met groot borste

Volgens die webblad Vdare.com het ‘n Amerikaanse senator, Bob Menendez (Demokraties, Nieu-Jersey), sy posisie misbruik om visums aan damesimmigrante met groot borste te verskaf. Die webblad verwys daarna as die “36DD-visumprogram”, ‘n pikante toespeling op die VSA se hele “alfabetsop” van visums wat gebruiklik toegestaan word: B-1 vir sakebesoekers, B-2 vir toeriste, F-1 vir studente, ens.

Juliana Lopes Leite, 'n Brasiliaanse model en aktrise wat ook naak geposeer het — Juliana Lopes Leite, ‘n Brasiliaanse model en aktrise wat ook naak geposeer het

Dit blyk dat Demokratiese mans met “konneksies” vir hulle pragtige nooiens in ander lande uitsoek wat dan blitssnel met Amerikaanse visums “beloon” word, iets wat die koerant die New York Post onlangs oopgevlek het. Onder andere het senator Menendez druk op die Amerikaanse ambassade in Brasilia, die hoofstad van Brasilië, geplaas om ‘n visum vir Juliana Lopes Leite (foto hiernaas) toe te staan.

Juliana Lopes, soos sy ook bekend is, was Salomon Melgen, ‘n vriend van Menendez, se minnares en terwyl sy in die VSA “gestudeer” het, is sy oral op reise saam met hom opgemerk. Die Amerikaanse ambassade in Brasilia het blykbaar binne slegs enkele ure in 2008 ‘n F1-studentevisum aan Lopes Leite uitgereik en sy woon vandag nog in die VSA. Melgen is intussen aangekla van bedrog met die Medicare-gesondheidsorgstelsel.Boonop is Lopes Leite se studies deur ‘n nie-winsgewende stigting gefinansier wat Melgen spesiaal vir dié doel geskep het. Sowel Lopes Leite as ‘n “minnares nr. 2” wat met Menendez self verbind word, is deur dié stigting vir “voorheen benadeeldes” gehelp.Volgens Vdare.com kom daar jaarliks 500 000 studente op F1-visums na die VSA, waarvan die meeste nooit weer na hul lande van oorsprong terugkeer nie. Sommige studeer ook aan “skim-kolleges” wat net op papier bestaan.

Obama maak vrede met Kissinger se vyande

Die Withuis het aangekondig dat Kuba van ‘n lys van lande verwyder gaan word wat volgens die VSA terrorisme steun.

Die lys bevat onder andere die name van Iran, Soedan en Sirië. Die Amerikaanse departement van Buitelandse Sake het na aanleiding van ‘n ondersoek wat deur President Barack Obama gelas is, aanbeveel dat Kuba van die lys verwyder word.

Met die Bay of Pigs-fiasko, het betrekkinge teen 1962 tussen die twee lande ‘n laagtepunt bereik nadat die mislukte inval deur die VSA tot die Kubaanse missielkrisis gelei het.

Die jongste stap word bestempel as die verwydering van een van die grootste struikelblokke in die herstel van diplomatieke betrekkinge tussen die twee lande.

Die besluit volg dae nadat Obama en President Raul Castro vir die eerste keer in bykans 60 jaar formele samesprekings in Panama gehou het.

Die Amerikaanse Kongres het 45 dae tyd om die besluit te oorweeg, voordat dit van krag sal raak.

Daar het intussen vreemde besonderhede oor die Bosoorlog aan die lig gekom waar Amerika oënskynlik aan albei kante bedrywig was.

Kissinger was volgens geheime dokumente wat onlangs vrygestel is, woedend oor die Kubane se toetrede in Angola, maar sy tirade om Kubane “te gaan vermorsel” het ‘n groot gevaar vir Suid-Afrikaanse befondsing van die Kunene-hidro-projek ingehou.

Suid-Afrikaanse spesmagte het volgens die VSA die Chevron-kompleks gemyn met ploftoestelle.

‘n Paar maande later, het die Verenigde State van Amerika nogtans sy status as “eerlike makelaar” in die oë van die Angolese verloor, deur hulp aan Savimbi se Unita-magte te verleen.

Daardie besluit het ‘n paradoksale situasie openbaar: Kubaanse troepe is ter beskerming van ‘n Amerikaanse oliekompleks ontplooi wat gedeeltelik deur die Amerikaners besit is, terwyl die Verenigde State van Amerika hulp aan hul vyande verleen het.

Uit die vrygestelde dokumente blyk dit dat Angolese amptenare glo gewag het vir die “onvermydelike”: Die ineenstorting van wit Suid-Afrika wat die CIA glo aan hulle belowe het.

So ‘n ineenstorting sou die Kubane die mees mobiele en bes toegeruste troepe in Suider-Afrika gemaak het, volgens die New York Times. Dit is moontlik waarom Kuba Angola vir 15 jaar lank beset het.

Die Angolese regering spog steeds dat hulle nie ‘n sent betaal het om die Kubane te onderhou nie. Die geld vir wapens, logistiek, troepe en kos is glo goedgunstiglik deur “internasionaliste” geskenk.

Die VSA voer steeds olie van Angola in.

Ongeveer 7% van die VSA se olie word van dié land verkry. In 2002 het Amerika hul steun aan die MPLA toegesê. Die Council of Foreign Relations het Angola in 2007 as een van Amerika se belangrikste bondgenote uitgesonder.

Kennelik het Kuba intussen van hul “opoffering” vergeet.

Amerikaner in Namibië doodgeskiet

’n Amerikaner is gister in die vroeë oggendure by sy huis op Otjiwarongo doodgeskiet, het die Republikein berig.

Volgens die polisie se woordvoerder in die Otjozondjupastreek, ao. Maureen Mbeha, het die voorval tussen Sondagaand en die vroeë oggendure gister plaasgevind toe die 56-jarige Amerikaner ondersoek gaan instel het nadat daar by sy bakkie ingebreek is.

“Hy is op ’n kort afstand in sy voorkop en onder sy ken deur ’n onbekende aanvaller doodgeskiet,” het Mbeha gesê en bygevoeg dat die oorledene se identiteit nie bekend gemaak kan word voordat sy naasbestaandes is nie van sy dood ingelig nie. Volgens Mbeha het die verdagte die Amerikaner se Ford Ranger-bakkie, wat buite sy huis geparkeer was, se linkervoorvenster met ’n baksteen uitgeslaan. Sy sê nadat die voertuig se venster uitgeslaan is, het die verdagte die linkervoordeur oopgemaak en die alarm het afgegaan.

“Dit word vermoed dat die Amerikaner deur die bakkie se alarm wakker gemaak is en twee skote deur sy kamervenster geskiet het om die verdagte op die vlug te laat slaan,” het Mbeha verduidelik.

“Omdat die deur van die voertuig steeds oop was, word vermoed dat die Amerikaner uit sy huis gegaan het om die bakkie se deur toe te maak, maar die verdagte moes iewers weggekruip het en toe op ’n kort afstand twee skote na hom gevuur het.”

Volgens Mbeha het die Amerikaner op sy maag geval en hy is op die toneel oorlede. Sy pistool het langs hom gelê, met sy bakkiesleutels in sy regterhand.

Niemand is nog in dié verband in hegtenis geneem nie en die polisieondersoek duur voort.

Die Amerikaner, ’n meganiese ingenieur, het sy eie onderneming op die Noordedorp besit en het regeringsvoertuie herstel.

Volgens inwoners het die oorledene meer as agt jaar op Otjiwarongo gewoon.

Hillary kondig aan dat sy vir die Withuis mik

Die voormalige Amerikaanse minister van buitelandse sake Hillary Clinton het formeel haar toetrede tot die presidensiële benoemingstryd aangekondig op sosiale media. Sy sal in die 2016-wedloop vir die Withuis meeding.

Clinton se perskantoor het glo ‘n tikfout in haar persverklaring gemaak met die reël dat sy “teen kinders en gesinne al haar loopbaan lank veg”. Die mediaspan sê dit moes “vir” gewees het.

As Hillary slaag, sal sy die eerste vroulike Amerikaanse president word. Barack Obama was die eerste swart president, en dit sal ‘n manier wees om nie weer ‘n swarte te hoef aan te wys nie.

Sy het op haar veldtogwebwerf gister aan Amerikaners gesê sy wil graag hulle “kampioen” wees.

Hillary het vir die Demokratiese presidensiële nominasie in 2008 gestaan, maar verloor teen Obama.

Sy is met ‘n oorweldigende meerderheid die Demokratiese gunsteling. Met die bruin Meksikane wat oor die grense van die VSA stroom en summier burgerskap kry, het die Demokrate seker gemaak dat die Republikeine se kanse vir goed bederf is, aangesien hulle beeld te “wit” is.

Die VSA streef ‘n aggressiewe beleid van rasse-gelykheid na.

Hillary dreig al vir maande om haar kandidatuur te verklaar. Haar veldtogspan sê hulle sal die volgende paar weke ondersteuning op voetsoolvlak bou in die vroeë Demokratiese primêre state.

Sy sal na verwagting haar eerste byeenkoms in die middel van Mei hou om haar veldtog mee af te skop.

Haar kritici sê sy is onnosel en het haar loopbaan aan haar man te danke. Terwyl Obama verkies is op grond van “potensiaal”, het sy twintig jaar gehad om te wys dat sy tot baie min in staat is, behalwe die gemors in Libië waaroor sy gespog het toe ‘n Amerikaanse senior diplomaat vermoor is.

Hillary het 2003 gestem vir die inval in Irak. Nadat sy, bekend as die luiste senator, ses keer gestem het dat die oorlog verder befonds moet word, het sy in die openbaar verklaar dat dit ‘n “dom oorlog” is.

Sy het kort voor die Skotse referendum ingemeng om te verklaar dat onafhanklikheid ‘n “slegte idee” is en ‘n pleidooi gelewer dat Brittanje in die EU moet bly omdat die EU “nie sonder Brittanje kan klaarkom nie”.

Hillary het aan FOX News in ‘n onderhoud met Bill O’Reilly, op 30 April 2008 gesê : “Ryk mense [soos ons], mag die Here ons seën. Al die geleentheide kom ons toe om seker te maak dat ons land en ons seëninge in die volgende generasie bly.”

Wit polisieman van moord aangekla na hy swarte skiet

’n Wit polisieman is in die Amerikaanse deelstaat Suid-Carolina van moord aangekla nadat ondersoekers ’n video-opname bestudeer het wat wys hoe die geregsdienaar ’n ongewapende swart man wat weghardloop glo agt keer van agter skiet.

Keith Summey, burgemeester van Noord-Charleston, sê amptenare het besluit om Michael Slager (33) van die moord op die 50-jarige Walter Scott aan te kla nadat hulle na die beeldmateriaal gekyk het.

Scott is na berig word Saterdag in sy voertuig deur Slager voorgekeer, omdat een van die remligte glo foutief was.
’n Video van die gebeure, wat blykbaar deur ’n omstander geneem en deur The New York Times gepubliseer is, wys hoe
Scott ná ’n kort worsteling met Slager weghardloop.

Die polisieman vuur agt skote op Scott, wat daarna vooroor val.

VSA lewer rekordmielie-oes

Die volhoubare produksie van witmielieverbouing in Suid-Afrika noodsaak bogemiddelde opbrengste en ‘n witmielieprys wat die totale produksiekoste dek. Hiermee saam is dit noodsaaklik dat uitvoerpryse nie onder die gelykbreekproduksiekoste per ton daal nie.

Wêreldvoedselpryse sal egter vanjaar tot die laagste vlak sedert 2010 daal omdat die VSA se mielievoorraad aan die begin van Maart die grootste in 28 jaar was.

Die VSA is die wêreld se grootste produsent van dié landbouproduk.

Die VSA se departement van landbou het verlede week bekend gemaak dat die land se mielieboere in die nuwe seisoen 36 miljoen hektaar sal aanplant.

Die wêreld se graanskure is vol wat ‘n daling in internasionale graanpryse voorspel.

Oorvoorsiening sal Suid-Afrikaanse graanpryse negatief raak weens die daling in VSA-pryse. Tans ondersteun die laer oesskatting en ’n swakker rand plaaslike pryse.

Amerikaanse mielieboere het die afgelope twee seisoene rekordoeste behaal, wat pryse met meer as 20% teenoor afwaarts gedruk het.

Internasionale sojaproduksie het ook ’n hoogtepunt bereik en die Amerikaanse regering verwag dat sy binnelandse produsente hierdie lente ook meer as voorheen sal plant.

Amerika se mielievoorraad is tans 11% hoër as dieselfde tyd verlede jaar en ook op die hoogste vlak sedert 1987.

China se voorraad is ook vandeesmaand deur die Verenigde Nasies met 13 miljoen ton opwaarts aangepas na 95 miljoen ton.

Suid-Afrika se plaaslike pryse het in weerwil van ’n sterker rand en laer Amerikaanse pryse hoër as die internasionale indeks gesluit, maar die plaaslike prys sal waarskynlik aanstons die VSA se pryse navolg.