Etiket: weer

Weerstelsel Dineo verloor woema onderweg na SA

Die weerstelsel wat oor Mosambiek beweeg en na Suid-Afrika onderweg is, is na ‘n oorland-depressie afgegradeer en staan nou bekend as ex-Dineo.

Volgens die Suid-Afrikaanse Weerdiens beweeg die laedrukstelsel op die oomblik teen sowat 80 kilometer per uur. Geen berigte van skade is in die stadium ontvang nie.

Die stelsel sal glo na mate dit na Suid-Afrika beweeg verder sterkte verloor. Dit sal egter steeds swaar reën in Mpumalanga en Limpopo tot gevolg hê.

Inwoners is gewaarsku om bedag te wees op oorstromings en nie paaie en brûe oor te steek wat onder water is nie.

Die polisie in die Vrystaat het ‘n dringende waarskuwing uitgestuur nadat drie swart kinders in die provinsie na reënbuie verdrink het.

Die jongste voorval is in Dealesville aangemeld. Mpakane sê ‘n sesjarige swart seun het in ‘n steengroef verdrink toe hy saam met ‘n groep swart kinders ná skool daar gespeel het.

Mandisa Makesini, provinsiale sekretaris van EFF in die Vrystaat, sê hulle gaan die situasie dringend met die Mangaung-metro munisipaliteit bespreek.

Sterk winde en reën het gisteraand groot skade by Neilersdrift naby Upington in die Noord-Kaap veroorsaak.

Verskeie boere in die distrik het aan OFM-nuus gesê die erge winde het gisteraand net na 19:00 begin waai, en het etlike kilometers vêr verwoesting gesaai.

Die winde het ‘n halfuur lank gewaai en het veral in plakkershutte by Leonardsville se dakke afgewaai waar ongeveer 150 mense tans besig is met opruimingswerk.

Vloede en storms teister Wes-Europa

Vloede en storms het die lewens van minstens vier mense geëis in Duitsland.

Drie mense is in vloede in die suidwestelike Baden-Wuerttemberg-deelstaat van Duitsland dood en ’n jong meisie is deur ’n trein doodgery toe sy onder ’n treinbrug skuiling teen die reën gesoek het.

’n Man is dood in ’n ondergrondse parkeergarage toe die gebied vol water gestroom het voor hy in staat was om te ontsnap.

Saterdag het swaar weerlig in die noorde van Frankryk en suidweste van Duitsland nege mense ernstig beseer.

Stortreën in Noord-Europa het oral oorstromings in Frankryk, België en Duitsland veroorsaak.

Die rivier Seine in Parys het sy walle oorstroom, en die Franse Ope tennistoernooi in die stad moes vir ‘n tweede dag weens die miserabele weer uitgestel word.

In die middel van die land is ‘n gevangenis ontruim, met aangehoudenes wat aangery is na ander fasiliteite.

Op die Frans-Belgiese grens, het ses weke se reën binne 24 uur uitgesak.

Talle dorpe is onder die water en weervoorspellers het meer reën vir Woensdag in die vooruitsig gestel.

Koue en nat weer voorspel

Die Suid-Afrikaanse Weerdiens het gewaarsku dat oorstromings die volgende paar dae in dele van die Kaapse metropool, die Wynlanddistrik en die Overbergstreek kan voorkom.

‘n Kouefront sal dele van die Noord-Kaap en die Wes-Kaap vandag bereik en eers teen Saterdag begin wyk.

Dit sal gepaardgaan met swaar reën en rowwe seetoestande asook stormsterk winde wat aan die kus tussen Kaappunt en Kaap Agulhas verwag word.

Dié toestande sal uitbrei na die ooskus. Die kouefront sal teen die naweek dele van die Oos-Kaap bereik.

Koue en nat toestande word die naweek oor die binneland ook verwag, maar sonder sterk winde.

Reën en sneeu sal oor dele van KwaZulu-Natal, die Oos- en Wes-Kaap, die Vrystaat en Lesotho uitsak.

Reën word Saterdag en Sondag veral vir die oostelike dele van Mpumalanga, Limpopo en Gauteng voorspel met temperature oor die hele binneland wat sal daal.

Hittetoestande duur voort

Baie warm en droë weerstoestande duur ongelukkig voort in groot dele van die Vrystaat en Noordwes die volgende week met ‘n geringe kans op reën teen volgende week.

‘n Weervoorspeller in die Bloemfonteinse weerkantoor, Sihle Kunene, sê ‘n hittegolf sal na verwagting tot môre in die suidelike deel van die Vrystaat woed, wat Wepener en Fauresmith insluit.

Die kwik gaan in dié gebied tot 37°C en hoër styg. Teen die naweek word koeler toestande in die suidelike deel van die Vrystaat en die Noord-Kaap verwag.

Kunene sê die kwik kan aansienlik met tussen 4°C en 5°C in die Noord-Kaap daal weens ‘n kouefront wat op pad is. Hy sê temperature kan in die res van die Vrystaat en Noordwes ietwat afneem, maar dit gaan steeds bloedig warm wees met bewolkte toestande die naweek.

Kunene sê geen reën word vir die sentrale deel van die Vrystaat dié naweek voorspel nie. Teen Woensdag is daar ‘n 30%-kans op reën vir die hele Vrystaat. Droogtetoestande duur voort.

Meiringspoort gesluit

Dit word uit die Klein Karoo berig dat die Meiringspoort-pad naby Oudtshoorn gesluit is weens oorstromings.

Die provinsiale verkeersdepartement het pas Meiringspoort gesluit by Klaarstroom en De Rust as gevolg van swaar reën.

Motoriste wat na Beaufort-Wes moet gaan word aangeraai om die Willowmore-pad te gebruik.

Die Swartbergpas is steeds oop vir verkeer, maar motoriste word gemaan om nie dié pad te gebruik nie.

Daar kom sedert die begin van die week swaar reën en wind in die streek voor.

Dis nie duidelik hoe lank die betrokke pad gesluit gaan word nie.

Orkane woed in Texas

Een mens is dood en twee groepe ­mense in die noorde van die Amerikaanse deelstaat Texas moes per helikopter na veiligheid gebring word nadat hulle in stygende vloed­waters vasgekeer was.

Die stormweer kom nadat orkane Texas oor die naweek getref het, het AFP berig.

Vier volwassenes en ’n baba is Sondag van hul huis se dak in Krum gered. Twee volwassenes is per helikopter van hul bakkie se dak in Sanger gered. Tien ander mense is ook uit hul huise in die gebied ontruim.

Een mens is dood en verskeie beseer toe ’n orkaan Saterdag ’n landelike gebied suid van Cisko getref het.

Sondag was daar ’n orkaan naby die dorpie Van in die distrik Van Zandt. Verskeie huise is erg beskadig.

Bibberweer, sneeu is hier

Bibberweer is hier en Suid-Afrikaners in die binneland word aangeraai om die warm komberse en watersakke uit te haal.

‘n Koue front het vanuit die suide oor die grootste deel van die binneland inbeweeg.

Berigte van sneeu is reeds uit verskeie dele van die land ontvang.

Sneeu het op die hoogste pieke van die Drakensberge uitgesak en Kokstad wat in die skadu van die hoogste bergreeks lê, het sneeuval gehad.

In die res van die land byt winterweer met temperature van minus tien in Sutherland en minus nege in Bethlehem, in die Oos-Vrystaat.

Die Weerdiens waarsku dat baie koue weer dele van die Noord- en Oos-Kaap soos De Aar, Sutherland en Calvinia sal raak.

Die temperatuur sal na verwagting eers teen Donderdag opwaarts neig, met dagtemperature wat effens sal verbeter. Dit sal egter koud bly.

Reën sal in die oostelike dele van die land voorkom en los buie word in KwaZulu-Natal teen sonsondergang verwag.

Kapenaars gaan egter weer teen Vrydag ‘n nuwe koue front moet trotseer.