rassisme – Bladsy 11

Anti-Rhodes-aktivis kla UK oor rassisme aan

Chumani Maxwele, die student wat die Cecil John Rhodes-standbeeld met menslike ontlasting gegooi het, sê sy skorsing van die Universiteit van Kaapstad is polities gemotiveer.

Hy het aan News24 gesê dit handel oor ‘n politieke probleem by die UK: “Ons is besig met transformasie … [en] hulle wil ons intimideer.”

Maxwele is deel van die Rhodes-moet-val-beweging wat die Rhodes-standbeeld verwyder wou sien.

Hy beskuldig die universiteit dat hulle administratiewe reëls inspan om politieke probleme op te los.

Die universiteit het nie bevestig dat Maxwele geskors is nie. ‘n Woordvoerder het gesê die instelling beskou dissiplinêre aangeleenthede as vertroulik.

Hy het intussen ‘n klag van rassisme teen die UK ingedien. Maxwele beskryf ‘n insident met die betrokke dosent wat hy beskuldig as ‘n “baie traumatiese voorval”.

In sy verklaring het Maxwele verduidelik wat op 1 Mei by die wiskundegebou gebeur het.

Volgens hom was die badkamers daar gesluit, want dit was ‘n openbare vakansiedag. Die dosent het hom toe vergesel om hom te wys dit is gesluit.

Die dosent het hom toe vertel wat met haar gebeur het in die verlede en dat sy aangeval is deur ‘n “barbaarse swart student wat toe nie ‘n student was nie” en dat ‘n “hoof van die departement vermoor is deur ‘n wrede en barbaarse swart student”.

“En sy het gesê dat al hierdie gebeure het veroorsaak dat dit nie meer so ‘n veilige omgewing by die universiteit en nog meer so by die departement is nie. Ek het haar gevra hoe hierdie gebeure iets met my te doene het? Uit die bloute sy het baie kwaad vir my geword en geskree “As jy my treiter, sal ek jou vra om die gebou te verlaat of ek sal die sekuriteit bel om jou uit te neem …”

Hy het hom teëgesit en die dosent uitgedaag om die sekuriteit te roep.

Maxwele het gesê hy is geskok en ontsteld omdat sy regte as ‘n student misken is. Hy sê in sy verklaring dat hy gepolisieer is, as ‘n krimineel behandel is en dat swartes in die wit wêreld as kriminele voorgehou word wat almal om hulle bedreig.

UK skors swart Rhodes-aktivis

Die Universiteit van Kaapstad (UK) het gister bevestig hulle ‘n student oor ‘n beweerde rasse-onderonsie met ‘n personeellid geskors het.

Die UK weier egter om die student se naam of ras bekend te maak.

Dit is klaarblyklik die swart aktivis Chumani Maxwele wat die veldtog teen Rhodes se standbeeld gelei het.

Hy word volgens bronne geviktimiseer deur die universiteit.

UK se woordvoerder, Gerda Kruger het gesê die skorsing volg na ‘n voorval tussen die student en personeellid wat na bewering ‘n week gelede plaasgevind het.

“Daar word beweer dat die student ‘n lid van die personeel geïntimideer, geteister en gedreig het asook rassisties was.”

Die swart student het aan Eyewitness News gesê die ‘n personeellid het ‘n rassistiese aanval teen hom geloods, en nie andersom soos die universiteit beweer nie.

“Toe sê sy vir my, die onlangse politieke voorvalle van ons barbaarse swart studente, hulle kan dit nie meer toelaat nie.”

Die student sal na verwagting volgende week voor ‘n tugkomitee verskyn.

Kernfisikus van Stellenbosch geskors oor SMS

‘n Dosent in kernfisika aan die Universiteit van Stellenbosch is geskors nadat hy na bewering ‘n rassistiese SMS-boodskap aan ‘n student gestuur het.

‘n Woordvoerder van die universiteit sê die dosent in kernfisika, Anton Stander is tydelik van sy pligte onthef en daar is met tugstappe teen Stander begin.

Dit volg ná ‘n klagte van ‘n sosiologiestudent en lid van die Oop-Stellenbosch forum, Sikhulekile Duma waarin hy beweer hy het die volgende ontvang: “Jou swart moer van die wit boer”.

Die selfoonnommer wat vir die SMS gebruik is, behoort volgens berigte aan die dosent.

Die Oop-Stellenbosch forum beywer hom vir verskeie veldtogte ten gunste van transformasie en verswarting by die universiteit.

Die SU-woordvoerder Martin Viljoen het bevestig dat die akademikus van sy pligte onthef is: “Sulke gedrag is onaanvaarbaar en nie in lyn met die Universiteit se waardes nie.”

Viljoen sê die instelling beskou die voorval in ‘n baie ernstige lig.

Die swart student wat die klagte gelê het, is in kennis gestel van die ontwikkelinge, en sal op hoogte gehou word, het Viljoen bygevoeg.

Brande woed steeds in Baltimore

Brande het gister steeds in die noordoostelike Amerikaanse stad Baltimore gewoed, waar ’n aandklokreël gisteraand ingestel sou word nadat onluste Maandag tot diep in die nag voortgeduur het.

Die deelstaat Maryland het ’n noodtoestand afgekondig nadat betogers winkels geplunder en met armsvol buit ontsnap het. Skole is gister as ’n veiligheidsmaatreël gesluit. Die volle omvang van die skade sou deur die loop van die dag bepaal word.

Amptenare van die stad, swart gemeenskapsleiers en die familie van die 25-jarige Freddie Gray wat in polisieaanhouding dood is, het hul afkeur te kenne gegee oor die omvang van die betogings wat ná Gray se begrafnis begin het.

“Te veel mense het vir geslagte hierdie stad gebou, net om te sien hoe boewe dit op ’n sinnelose manier verwoes en alles afbreek wat ons opgebou en voor geveg het,” het burgemeester, Stephanie Rawlings-Blake, gesê.

“Dit is idioties om te dink julle sal ’n beter lewe vir enige iemand verseker deur die stad te vernietig,” het sy gesê.

Die swart burgemeester moes onder kwaai kritiek deurloop nadat sy langer as 5 ure gewag het om in te gryp teen die geweld wat onbeheerst voortgewoed het.

Duisende lede van die polisie en die nasionale wag is ontplooi om beleërde wetstoepassers by te staan. Minstens 27 mense is in hegtenis geneem en 15 polisiebeamptes is beseer nadat hulle Maandagnag deur die woedende massas met klippe bestook is.

Volgens die Baltimore Sun is twee mense Maandagnag in afsonderlike skietvoorvalle gewond.

Die geweld is die ergste in ’n reeks konfrontasies tussen Amerikaanse polisielede en hoofsaaklik Afro-Amerikaanse jeugdigdes, wat woedend is oor wat hulle as rassisme in die polisiemag beskou.

Verlede somer se noodlottige skietery van die ongewapende tiener Michael Brown deur ’n wit polisiebeampte in Ferguson, Missouri, het die kus-tot-kus-protes begin.

Die onluste in Baltimore is ontketen nadat Freddie Gray op 19 April in aanhouding gesterf het – glo weens rugbeserings wat hy tydens sy inhegtenisneming vroeër die maand opgedoen het.

President Barack Obama is ook van oor die verwikkelinge in Baltimore ingelig.

Hillary Clinton, ‘n voornemende presidentskandidaat, het die geweld en plundery heeltemal geïgnoreer en onvanpaste twiets uitgestuur oor gratis plakkers met haar gesig op.

Die onluste het tot uitbarsting gekom kort nadat duisende roubeklaers Maandag vir Gray se begrafnis in die New Shiloh Baptiste kerk in die stad se verarmde Sandtown-woonbuurt vergader het. Voor die diens het ’n kriptiese boodskap op sosiale media die rondte gedoen oor ’n “purge” (straattaal vir dade van wetteloosheid) wat om 15:00 sou begin.

Gray se familie, wat in rou gedompel is, het spesifiek gevra dat geen betogings gehou word nie.

Regsverteenwoordigers van Gray se familie sê sy dood is veroorsaak deur erge rugbeserings wat opgedoen is nadat hy in hegtenis geneem is. Hy was vir ’n week in ’n koma.

Ses polisiebeamptes is geskors hangende die bevindinge van ’n ondersoek wat Vrydag aan staatsaanklaers oorhandig moet word.

Die polisie het bevestig dat Gray mediese hulp versoek het nadat hy in hegtenis geneem is, en het toegegee dat hy vroeër mediese behandeling moes gekry het.

Koue winter wag vir witgesigte

Ons mense moet nou begin oplet in die klas. Daar is baie goed wat gebeur wat op hulle eie nie regtig ‘n probleem is nie, maar sou mens na die geheel kyk is ons in vir ‘n koue winter.

Toe ek die fotos op die nuus sien van Rhodes se standbeeld was die eerste assosiasie wat my brein gemaak het met die van die beelde na Saddam se paleis bestorm is. Onthou hoe die mense met vreugde die oorwinning gevier het deur sy standbeeld om te trek. Daardie oomblik was die klimaks van ‘n stryd wat gewen is. Baie min van ons weet nou wat daar aangaan en nog minder van ons gee om, maar tog het meeste van ons al die beeldmateriaal gesien.

Die vreugde van die skare wat Rhodes se standbeeld met haat en skelwoorde vergesel het gee mens ‘n dieper realiteit teenoor die gevoel wat baie mense koester teenoor die “kolonialiste”. Ek presoonlik voel nie veel vir Rhodes nie. Myns insiens was hy ‘n tweegat, rooinek diamantsmokkelaar, maar dit is nie regtig die punt nie. Hy is nie ontroon as gevolg van ‘n dieper gesprek oor sy bydrae tot Afrika nie. Die motivering was -hy was ‘n wit kolonialis, verteenwoordigend van die wit geskiedenis. Die aantal skendings van standbeelde oral oor die land is nie na aanleiding van ‘n akademiese debat oor die individue nie, maar eenvoudig ‘n haat teenoor die mense wat verteenwoordig word deur die standbeelde.

Kyk ons na die Groot Boek, moet ons darem ook eers voor ons eie deur vee- Is hierdie standbeelde, monumente in lyn met ons Bybelse opdrag? Is dit nie net afbeeldings wat ons gemaak het op aarde om te vereer nie? Dit is immers so genoem in die 10 gebooie. Selfs wanneer Israel opdrag gee om ‘n land in te neem is die eerste ding wat hulle doen om die afgode en simbole van die vyand te vernietig. Is Paul Kruger ons goue kalf? Moet ons nie dalk self al die monumente en standbeelde verwyder nie? Ek wil nie eers raak aan al die simboliek van sekere geheime organisasie in ons volk se stanbeelde en monumente nie!

Bogenoemde kan seker ‘n redelike debat op sy eie wees, maar ek vermoed die rede waarom ons so emosioneel raak oor ons standbeelde is omdat dit ons sn is. Simboliek, reg of verkeerd, is ons eie. Dit is ‘n stukkie onthou van hulle wat voor ons hierdie stryd baklei het. Ek glo nie Sunette het haarself vasgeketting aan Oom Paul se standbeeld omdat sy hom aanbid nie, ook heel moontlik nie omdat sy dink al sy besluite was reg nie- Ek vermoed Sunette het haar gaan vasketting aan daardie “bietjie van ons” wat nog oor is. Daardie hoop van ‘n volk met waarde en karakter. ‘n Volk van Naam.

Hoe wis jy ‘n volk uit? Daar is seker baie maniere, maar die regering van RSA behoort ‘n prys te wen vir hulle subtiele vernietiging van ‘n volk deur die volk self. Maak dit in die eerste plek “nie cool” om deel te wees van die volk nie en die kinders sal self wegskram. Vervang hulle waardestelsel met vrye keuse en promiveer ‘n identiteit-lose lewe as hooftstroom terwyl jy agteraf jou eie kultuur en tradisies gesond hou. Twee dekades later sit jy met ‘n volk wat mekaar verskeur. Al wat oorbly is om die voetspore in die sand weg te vee wat dien as herinnering aan wat hulle eintlik is. Breek hulle standbeelde af, verander hulle straatname en ontken hulle bydrae.

Ek kom terug na die klein jakkalsies wat die wingerd verniel. Met of sonder Oom Paul se standbeeld gaan brood my nog dieselfde kos. Of ek in Verwoerdlaan of Mandela-laan ry gaan ek nog dieselfde verkeer kry. Vanaand word nog ‘n Boer vermoor en ek gaan more nogsteeds my snooze knoppie druk om 5 minute langer te slaap. Nie een van hierdie goed gaan my lewe direk raak nie. Sunette kan nie elke dag aan Oom Paul vasgeketting wees nie- vanaand kan iemand gaan en die beeld verwoes. Haar lewe sal aangaan.

Dit is hierdie kultuur van gemaklik wees om klein goedjies te verloor wat op die einde van die dag gaan lei tot ‘n hele identiteit van ‘n volk wat gaan verdwyn. Dit is ‘n simbool van oorwinning oor die wit gesigte as jy op Rhodes se standbeeld sit wat verskuif word. Wat het Mugabe hier kom doen? Was dit nie Malema wat laas vir hom gekuier het nie? Hoe lank het die wit gesigte oor?

Kom ons draai die waarheid op sy maag. Gaan ons volk oorlog maak as hulle Oom Paul se standbeeld verwoes? Nee. Gaan ons die wapen opneem as hulle die Voortrekker monument platslaan? Nee. Gaan ons alles wat ons het opgee, gesin, huis en beroep om ‘n rebelle oorlog te begin voer in die land oor ‘n paar Boere wat op plase vermoor is? Nee. Gaan ons die gerief van ons huis en ons gemeenskap verruil om in ‘n volkseie gebied te gaan woon? Nee.

Die realiteit my liewe mense is dat hulle elke liewe monument kan afbreek in die land en geen haan sal daarna kraai nie. As ons na die duisende Boere se moorde nog nie weerstand gebied het nie, sal ons dit wragtig nie doen vir ‘n standbeeld nie. Baie mense dink grondhervorming sal ‘n tipe weerstand laat onstaan, maar ek weet van meer as een plaas wat baie soetjies hervorm is en geen haan of buurman het daarna gekraai nie.

Die sukses van die revolusie (wat nog steeds aan die gang is) is dat hulle ‘n klomp klein gevegte elke dag wen sonder om dit as ‘n geheel te erken. Elke dag is nog een wit gesig armer of meer dood as die vorige dag. Elke dag is daar ‘n klein stukkie van ons waarde, geskiedenis of bestaan wat weggeneem word in skole, in die werkplek in die gemeenskap. Dit is klein goedjies wat op hulle eie nie pla nie tot mens dit in geheel begin sien. Die waarheid is dat elke dag wanneer jy opstaan is ons volk ‘n klein bietjie armer as die vorige dag.

Wat Rhodes se storie verskillend maak is die openbare vertoning wat daarmee saamgegaan het. Mugabe wat in die publiek erken hy wil nie wit gesigte sien nie. Met ander woorde die subtiele kleiner aksies begin nou oorspoel in meer publieke vertonings van mag. En enige iemand wat dit verstaan behoort bekommerd te raak…

Wat hou dit vir ons in?

Ek vermoed in die nabye toekoms gaan ons al meer sulke publieke vertonings van mag sien. Ek vermoed die “wit gesig haters” besef ons het geen behoefte om weerstand te bied nie. Moenie skrik as daar skielik al meer grond beset word nie, monumente, standbeelde vernietig word en of ander soorteglyke aksies van direkte magsvertoning gaan plaasvind nie. Die regering sal sekerlik die heeltyd diplomaties bly en hierdie aksies selfs kritiseer, maar die realiteit sal wees dat daar nou momentum is om die geskiedenis van die kolonialis saam met die “kolonialis” uit te wis. Ek vermoed meer “wit gesgite” sal hulle werk verloor en ons kan selfs op die uitkyk wees van meer van ons mense wat geviktimiseer word.

Die van u wat Game of Thrones gekyk het sal die woorde “Winter is coming” ken. Ek glo dat ons ‘n koue winter kan verwag. Binnekort gaan die stakings weer begin en elke jaar is die eise groter en die geweld meer, brandstof word al duurder, kos word duurder, krag word duurder, mense word armer. Die ekonomie lyk nie goed nie. Moeilike tye…

Al die bogenoemde kan nog hanteer word, maar die een ding wat ons nie gaan wen nie, die een faktor wat hierdie land oornag op sy kop kan laat draai is Eskom. Sonder krag sal hierdie land nie dae kan oorleef met die chaos nie. Dit is die een ding wat die “wit gesigte” uit hulle huise sal dwing en ook die enigste ding.

Dinge lyk partykeer nie asof hulle iets met mekaar uit te waai het nie, tog is simboliek maar altyd ‘n bliksem. Die idee dat die hele Eskom netwerk ineen kan stort, is nie meer so vergesog soos ‘n paar jaar terug nie. Sou dit gebeur, sal dit die einde wees van elektrisiteit in RSA vir ‘n baie lang tyd. Die ironie hiervan kom by ‘n klein stukkie detail. Die eerste dorp in die Suidelike halfrond, selfs voor Londen, om elektriese straatligte te gebruik was Kimberley, 2 Septemeber 1882. In daardie tyd was daar ‘n jong Engelsman besig om die diamantvelde van Kimberley om te keer en sou hy later een van die rykste besighede in die wêreld begin en daar sou selfs vir hom ‘n standbeeld opgerig word. Mens kan nie help om te wonder of die ligte wat Rhodes sien aankom het, nie ook dalk saam met hom gaan afgaan in die lang koue winter voor ons nie…

Vannermerwe

Twee voor oor hulle beelde beskadig

‘n Een-en-twintig-jarige man sal vandag in die Johannesburgse landdroshof verskyn in verband met die beskadiging van die Mahatma Gandhi-standbeeld op Gandhi-plein in Johannesburg.

Die swart verdagte is Saterdag in hegtenis geneem. Die polisie het hom betrap terwyl hy die standbeeld met wit verf beskadig het.

Hy was deel van ‘n groep wat ANC-pette gedra het.

Hy het ook ‘n stuk karton by hom gehad waarop gestaan het dat die “rassistiese Gandhi moet val”. Hy sal van kwaadwillige saakbeskadiging aangekla word.

Volgens Gandhi was een van die groot prestasies in Suid-Afrika rasseskeiding deur te weier om ‘n poskantoordeur met swartes te deel.

Hy het in die Britse leër gedien en gretig deelgeneem aan die 1906-oorlog teen swart Zoeloes.

Gandhi het breedvoerig oor sy ervarings met swartes van Suid-Afrika geskryf en deurentyd na hulle as “kaffers” verwys, met ‘n diepgewortelde minagting vir die Afrika-inboorling.

In Pretoria sal ‘n swarte ook vandag in die hof verskyn nadat die standbeeld van Paul Kruger op Kerkplein vir ‘n tweede keer gevandaliseer is.

Dit is die tweede voorval van vandalisme by die standbeeld die afgelope twee weke.

Die verdagte was deel van ‘n EFF-bende die naweek by die standbeeld wat verf daarop uitgegooi het. Een persoon is in hegtenis geneem toe die groep weggehardloop het.

‘n Dag nadat ‘n standbeeld van die dominee en skrywer Andrew Murray gevandaliseer is in Wellington in die Wes-Kaap, het ‘n paar inwoners gesê hulle is nog steeds woedend oor die voorval.

Die standbeeld wat op die terrein van die Wellington NG Kerk opgerig is, is Vrydagnag besmeer met rooi verf.

‘Ek wil nie ‘n wit gesig sien nie’

Zimbabwiese president Robert Mugabe se oënskynlike afgryse by die sien van ‘n “wit gesig” in Suid-Afrika is op sosiale media met lof begroet deur swartes.

Mugabe was in Soweto Donderdag om die Hector Pieterson-gedenkmuur te besoek.

Ná sy besoek aan die museum, is hy toegejuig deur die plaaslike bevolking. In ‘n opname wat deur die SABC uitgesaai is, is Mugabe gesien waar hy verby die skare loop terwyl die nasionale uitsaaier se TV-joernalis aan hom vra watter emosies sy terugkeer na Soweto ontlok.

Mugabe was op die punt om te antwoord, maar toe hy opmerk dat daar ook ‘n wit joernalis is, het hy die mikrofoon weggedruk en het gesê: “Ek wil nie ‘n wit gesig sien nie.”

Die minister van Kuns en Kultuur Nathi Mthethwa het ongestoord langs Mugabe gestaan toe hy die opmerking gemaak het.

Die afgeleefde ou terroris wat graag met sy potsierlike koloniale Britse aksent spog, is op Twitter geprys vir sy barbaarse rassisme.

Twitter-gebruiker PM_Plaatjie het gesê: “Dit is hoekom ons hom bewonder.”, Terwyl B_Thabede gesê het “Hy was in die kol.”

Hy het sy staatsbesoek van twee dae om te kom geld bedel van Suid-Afrika Donderdag afgesluit.

Hy het sy gevorderde leeftyd glo te danke aan beskerming wat die Israelse geheimediens aan hom bied.

Is ‘afrofobie’ die nuwe gonswoord?

Die minister van Binnelandse Sake, Malusi Gigaba het die diplomatieke gemeenskap opnuut verseker van die regering se erns om vreemdelingehaat te hanteer. Gigaba het gisteraand met ambassadeurs in Pretoria vergader, het RSG berig.

Die vergadering volg op voorvalle van xenofobiese aanvalle in KwaZulu-Natal nadat Koning Goodwill Zwelithini na bewering gesê het dat buitelanders na hulle lande van herkoms moet terugkeer.

Gigaba het ‘n beroep gedoen op alle leiers in die land om nie roekelose uitlatings rakende die kwessie te maak nie.

Hy sê die internasionale gemeenskap moet Suid-Afrika nie sien as ‘n land waar xenofobie en afrofobie voorkom nie.

Intussen het Robert Mugabe Donderdag op TV-nuus aan ‘n wit joernalis gesê wat ‘n vraag aan hom wou stel, hy “wil nie witmense sien nie”.

Mugabe is op staatsbesoek aan Suid-Afrika om te kom geld bedel. Suid-Afrika voorsien reeds voedselhulp aan sy land.

Mandela-advokaat probeer walgooi teen erfenisvandalisme

Advokaat George Bizos het ‘n beroep op jong Suid-Afrikaners gedoen om hulle te weerhou van geweld wanneer hulle kwessies soos standbeelde takel, en eerder die Grondwet as riglyn te gebruik.

Bizos het Nelson Mandela tydens sy hoogverraad-verhoor in die 1960’s verteenwoordig. Hy het ‘n lesing aangebied oor gedeeltes van die Grondwet by die Universiteit van KwaZulu-Natal.

Bizos sê hy steun die studente van die Universiteit van Kaapstad oor die verwydering van Cecil John Rhodes se standbeeld, maar sê geweld en vandalisme is strydig met die Grondwet.

Na wekelange betogings is Cecil John Rhodes se standbeeld is gister met ‘n hyskraan van die Universiteit van Kaapstad se gronde, waar dit vir agt dekades lank gestaan het, geskuif.

Die rektor van die UK, Max Price, sê “die meeste” belanghebbendes is is verheug omdat die standbeeld afgebreek is.

Die universiteit het strydig met wetgewing opgetree en prosedures betreffende erfenissimbole verontagsaam.

Wit studente by die UK is ontsteld oor die raadsbesluit om die standbeeld af te breek en sê dit kom neer op onverdunde rassisme, aangesien swart studente se grootste aanklag teen Rhodes is dat hy wit was.

Wit egpaar by Namibiese oord aangeval

“Dis die mees vreesaanjaende geluid om te hoor hoe ’n deur afgebreek word en jy is binne vasgekeer.”

Ida Ryan (66) en haar man, Larry (67), het albei ernstige beserings opgedoen toe hulle Woensdag in die middernagtelike ure deur drie swart mans in hul kamer oorval is.

Die egpaar van Bethal, Mpumulanga, het saam met nog vriende uit Suid-Afrika by ’n lodge buite Windhoek oornag, voordat hulle die volgende dag vir ’n kort wegbreek na die Etosha Nasionale Park sou vertrek, het die Republikein berig.

Ida het met ’n diep snywond en erge kneuswonde aan die struweling ontkom, terwyl Larry, wat herhaaldelik met ’n knopkierie op sy kop geslaan is, bloeding op die brein opgedoen het. Hy is gister suksesvol vir die bloeding geopereer en moet ten minste twee dae in die hoësorgeenheid deurbring.

Ida het tydens ’n onderhoud vertel sy en haar man het Woensdagoggend omstreeks een-uur van ’n hou teen die kamer se deur wakkergeskrik. Dit was egter doodstil daarna, tot sowat ’n uur later, toe die egpaar deur die “vreesaanjaende geluid van ’n deur wat oopgebreek word” en met ’n pistool se loop wat in die deur verskyn, begroet is.

Ida en Larry het opgespring en die deur teen die oormag aan die anderkant probeer toedruk en toehou.

“Ek het op my knieë gestaan en van onder teen die deur gedruk, terwyl Larry die deur met sy skouer probeer toedruk het.”

Die egpaar is egter oorval deur drie swartes, met een wat Larry met ’n knopkierie oor die kop geslaan het. Nog een het vir Ida in haar arm met ’n “mes met ’n baie lang lem” gesteek. Een van die aanvallers het sakke gegryp wat op ’n stoel by die venster gelê het en waarin Ida se beursie met identiteitsdokument en kaarte, juwele, skoene en reisdokumente was.

“Die swartes het nie ’n woord gesê nie. Ek kon in die lig van die buitelig sien die een met die knopkierie was lank en skraal en het ’n hoed op gehad; ’n ander een was fris en groot.”

Die drie swartes het uit die kamer gestorm en in die bosse in verdwyn.

“Toe ek buite toe storm, het drie swartes met groen uniforms buite gestaan. Larry het egter geskree ek moet inkom en die deur toemaak.” Volgens Ida het die lodge nie sekuriteitspersoneel nie en weet hulle nie wie dié swartes was nie.

So hard het sy tydens die aanval geskree dat Ida se stem tydens die onderhoud ’n dag later steeds hees was.

“Die eienaars se kind het van my geskree wakker geword en hulle wakker gemaak.” Dié het met flitse en honde hul na die Ryan’s gehaas.

“Eers toe ons die lig aansit en tot verhaal kom, het ons al die bloed gesien soos wat die wond aan my arm gebloei het.”
Die polisie is ontbied, terwyl die lodge-eienaar Ida se wond verbind het om die ergste bloeding te stop.

Die egpaar is in die Mediclinic-hospitaal in die hoofstad opgeneem, waar Ida nege steke vir die wond in haar arm gekry het. Larry het ’n breinskandering ondergaan en is stil gehou tot sy operasie Maandag om die bloeding op sy brein te verlig.

Hy het Vrydag uit sy hospitaalbed gesê die egpaar sal weer Namibië besoek, waar hulle in die sewentigerjare gebly het.

“Ons het ses jaar in Namibië gebly, Sodom en Gomorra toe getrek, net om terug te kom en hier ’n pak slae te kry!”
Die polisie het teen druktyd nog geen verdagtes in hegtenis geneem nie.

Klag teen KSA by Internasionale Krieketraad oor ras

‘n Amptelike klag gaan glo binnekort by die Internasionale Krieketraad téén Krieket Suid-Afrika ingedien word, het RSG berig.

Dit volg nadat voorskrifte oor die rassesamestelling na bewering deur die Protea-bestuur neergelê is in die wêreldbekerhalfeindstryd teen Nieu-Seeland.

Die KSA hoof, Haroon Lorgat het na bewering ‘n teksboodskap aan die afrigter, Russell Domingo gestuur en gesê hy moet vier spelers van kleur in die span insluit.

Suid-Afrika het daarna die wedstryd verloor.

Volgens die reëls van die Internasionale Krieketraad word enige vorm van rasse-diskriminasie en politieke inmenging uitdruklik verbied.

Senekal-plaasaanvallers nog op vrye voet

Nog niemand is in hegtenis geneem in verband met die aanval op ‘n bejaarde egpaar op hul plaas naby Senekal in die Vrystaat verlede week nie.

Vrystaatse polisiewoordvoerder, Phumelelo Dhlamini, vra enigeen wat inligting het oor “vier mans” wat gesoek word om hul naaste polisiekantoor te bel.

Hy het egter nagelaat om te noem dat die aanvallers swart was, was kennelik die soektog kan belemmer.

Dries Stemmet en sy vrou Fransie is verlede Woensdagaand in hul slaapkamer deur die swart aanvallers oorval. Hulle het ‘n sementblok deur die egpaar se slaapkamerruit gegooi.

Dries is met ‘n stuk sementblok teen die kop geslaan. Hy het sy bewyssyn verloor waarna hulle hom vasgemaak het. Fransie is ook vasgemaak.

‘n Onbekende bedrag kontant, ses vuurwapens en selfone is gesteel. Een van die wapens is later in die veld gevind.

Omstrede UV-studentedekaan nog nie vervang

Die Universiteit van die Vrystaat het nog nie ‘n plaasvervanger vir die omstrede voormalige studentedekaan Rudi Buys gekry nie.

Dit is bevestig aan OFM-nuus deur die Universiteit se woordvoerder, Lacea Loader.

In ‘n e-pos reaksie op ‘n navraag het Loader bevestig dat ‘n besluit nog nie geneem is nie, en bygevoeg dat Cornelia Faasen instaan as die waarnemende dekaan tot tyd en wyl ‘n nuwe studentedekaan aangewys word.

Buys, ‘n verloopte Afrikaner, het onder skoot gekom het verlede jaar oor sy naakte anti-Afrikaanse houding om die JBM Hertzog-koshuis te “transformeer”.

Voormalige inwoners van die manskoshuis het hul misnoeë met ‘n voorgestelde naamsverandering van die koshuis uitgespreek, asook die eensydige verwydering van koshuis-memorabilia op Buys se aandrang.

Kriekethoof ontken ras-besluit

Die uitvoerende hoof van KrieketSA, Haroon Lorgat het berigte ontken dat hy ‘n sms aan die Proteas-afrigter gestuur het om ‘n speler van kleur in die halfeindstryd van die Wêreldbekerreeks in te sluit.

Volgens koerantberigte het Lorgat teen een-uur die oggend die sms aan Russel Domingo gestuur om na bewering tussen sekere spelers te kies.

Lorgat het aan die African News Agency gesê die bewerings is heeltemal vals en dat die span reeds teen sesuur die aand bevestig was.

Hy sê hy het geen onderhoude aan koerante toegestaan wat hom in die berigte aanhaal nie, het RSG berig.