praag.co.za

Tag: senekal

  • Brief: ‘Bikers is dalk nie boere nie,’ maar hulle is meer Boer as ou Nick…

    Brief: ‘Bikers is dalk nie boere nie,’ maar hulle is meer Boer as ou Nick…

    In antwoord op Nick Serfontein se neerhalende opmerkings oor die motorfietsryers op Senekal, die volgende.

    Gewoonlik spreek ek ouer mense aan as oom, maar dit is vir my ‘n eretitel van respek. Iets wat ek nie dink jy verdien nie.

    Nick, van landbou kan ek jou niks vertel nie. Ek glo mens moet krediet gee waar dit verdien word en jy het wragtag ‘n enorme besigheid gebou in die landbou. Welgedaan.

    Nick Serfontein

    Ek wonder as mense kyk na die foto’s van die Boerekommando’s wat teen die Britte baklei het, hoeveel van hulle maak dieselfde fout as jy ou Nick? Dink hulle ook dat daardie manne net landbouers was? Dink hulle ook dit was net bona fide boere, “ware boere” soos jy hulle noem, wat die wapen opgeneem het om die “landbourepublieke” te verdedig?

    Ek is ‘n besigheidsman in die ou Transvaal, ek besit ‘n ysterperd en ‘n klein stukkie grond waar ek ‘n paar diere aanhou. Was ek darem welkom op Senekal? Of net as ek met die bakkie opdaag, nie met die motorfiets nie? Wat van al die jong manne wat in kakie daar was ou Nick? Bitter min van hulle is bona fide boere, ware boere soos jy dit noem. Hulle is prokureurs, rekenmeesters, bemarkers, gifsmouse en voormanne… Want sien, ou Nick, megalandbouers het bygedra tot ‘n klimaat waar duisende familieplase opgekoop is in groot besighede en dit het ons jong manne van eienaarskap in die landbou beroof… en die mense klap hande want kapitalisme knik sy kop…

    Sien, ou Nick, terwyl groot boere fokus op opkomende boere vir politieke gewin is ‘n klomp van ons volkie se seuns nie dieselfde geleentheid gegun nie. Baie van hulle sit oorsee op stropers en trokke terwyl landbouprojekte van die staat tot niet gaan…

    Ek sien darem jy is “half gatvol”. Ek is lankal heeltemal gatvol. Jy vra “watter verskil maak die ouens wat die blerrie rubbish in Senekal gemaak het”? Ek kan nie help om te wonder wat jy presies hiermee bedoel nie. Ek weet dat duisende mense honderde kilometers gery het op hulle eie onkoste om hulle ondersteuning te wys vir wat aangaan. Dit is nou voor ons geweet het ou Nick soek net “ware boere” daar…

    Die bikers waaroor jy so gal braak — is eintlik goeie ouens ou Nick. Jy sal dalk nie weet nie, want jy het mos niemand se hulp nodig nie, maar die bikers het al miljoene rande se hulp geskenk aan talle organisasies wat boere in nood help… Die rubbish waarna jy verwys was hoofsaaklik lofsang en gebed. Maar jy het nou met een onderhoud ‘n klomp mense van mekaar vervreem… Ou Nick, jy moenie die goed verniet doen nie, die staat betaal mense om verdeeldheid onder ons volk te saai… Jy kan goeie geld maak!

    Ou Nick, kom ons doen mekaar vandag ‘n guns. Ek sien jy het vir Cyril op whatsapp. Laat hulle ‘n wet vir ons maak dat ons onderskei tussen boer en Boer. Jy sien — jy is ‘n boer, ‘n landbouer en dit is goed, maar daar is ook ‘n Boervolk hier wat besig is om op te staan. Ek verstaan jy en ou Cyril wil niks hoor van volke nie, want volke het regte en dit is iets wat julle nie aan die groot klok wil hang nie. So as julle dalk die term landbouer kan gebruik en ons volk se naam Boer uit julle woordeskat haal, gaan dinge baie beter werk…

    Want die Boere by Senekal, of hy nou ‘n biker of ‘n gifsmous of student is, het daarheen gegaan om te wys hulle is heeltemal gatvol, nie “half gatvol” soos jy nie. Jy, Nick Serfontein, ken nie jou eie mense se vrese, pyn en frustrasie nie. Jy het vervreemd geraak, want jy koop jou eie toekoms omdat jy genoeg geld het. Jy, Nick Serfontein, skep jou eie kultuur by Sernick waar jou woord wet is en jy vergeet dat daar mense daarbuite is wat deel is van ‘n ander kultuur…. Hulle noem daardie mense Boere.

    Sien… mega-“boere” het landbougode geword. Die ander boere in die distrik is eenvoudig te klein om hulle stemme te laat hoor en op die ou end koop Sernick ook hulle grondjie. Dit is hoekom daar deur vriende van jou soos Dan Kriek idees op die tafel gesit is dat die 20% megaboere die land kan voer en die 80% familieboere opgeoffer kan word.

    Ou Nick, jy vra waar was die bikers toe julle moes vuur slaan, in plaas van om dankie te se vir elke biker wat bygedra het tot die miljoene rande se skenkings wat nou daar afgelaai word. Jy praat van die cowboys wat wil vuis slaan, in plaas daarvan dat jy dankie sê vir die duisende mense, bikers ingesluit, wat in Senekal hulle mooi gedra het en die knieg gebuig het voor ons Hemelse Vader. Jy praat van die “bona fide” boere terwyl ons eie seuns oorsee op stropers sit omdat niemand hulle help om te begin boer nie. Ou Nick, jy wil landbou verlos van politiek… in Suid Afrika. Dalk moet jy jou eerder hou by boerdery?

    Onderhoude soos joune met Willemien Brümmer dryf ‘n wig tussen ons mense in. Dit maak dat bikers en ander nie meer wil help nie. Hulle word uitgeskel en beledig deur die baaslandbouer. Dalk moet elke landbouer wat nie ‘n Boer is nie, ‘n groen lint om sy hek gaan hang dat ons kan weet waar ons nie welkom is nie.

    Dankie aan elke persoon wat ons landbouers probeer ondersteun op elke denkbare manier. Dankie aan elke biker wat altyd gewillig is om te gee en deel te neem. Dankie aan elke Boer wat sy volk se fakkel dra in ‘n donker tyd. Dankie aan elke landbouer wat nog sterk staan in hierdie tyd. Weet asseblief dat Nick Serfontein nie namens ons praat nie.

    Boeregroete,

    —Alwyn de Klerk

  • Gustav Venter: Ons moenie nou terugdeins op Senekal nie

    Gustav Venter: Ons moenie nou terugdeins op Senekal nie

    Ek is ʼn groot ondersteuner van Willem Petzer, maar ek dink hy toon ʼn paar blindekolle hier wat ons duur te staan kan kom. Ek dink eerstens nie hy verstaan die mediaoorlog nie. Ons gaan nooit, nooit, ooit aangeprys word deur die hoofstroommedia nie. Hulle gaan ons óf ignoreer, óf uitkryt as die belhamels. Vergeet nou maar daarvan om die media se guns te wen.

    Kyk maar na die mediareaksie op Bronkhorstspruit: ʼn Temerige paar ou storietjies oor die protes en toe ʼn gloeiende propagandastuk oor Cosatu wat “standpunt inneem teen Plaasmoorde.”

    Dan wat skaregedrag betref: Willem het die kundigheid van veterane tot sy beskikking en die eerste reël is: Bly kalm. En die tweede reël wat hiermee gelykstaan, is: Moenie ʼn duim terugdeins nie. Retireer net ʼn aks en dit sal chaos wees. In sy scenario storm die EFF en die Boere val terug. Dit sal ʼn kolossale taktiese flater wees. ʼn Skare kan baie vinniger storm as wat mense kan terugval. Dit sal chaos wees, mense sal val en aan die genade van die EFF oorgelaat wees. Mense sal ernstig beseer wees of selfs sterf.

    As ons nie kans sien om ons man te staan nie, moet ons nie gaan nie en moet ons die terrein aan die EFF afstaan. Dan beheer en regeer hulle ons en moet ons plaasmoorde maar sluk.

    Willem se plan berus op twee dinge wat ons nie kan beheer in so ʼn situasie nie: Eerstens dat die polisie sal wil en sal kan ingryp. Skares het die polisie hierdie jaar al dikwels op loop gesit. En as hulle nie die EFF gestuit kan kry nie, is die Boere se formasie verbrokkel en het hulle net een ding om hulleself mee te verdedig en dis hulle vuurwapens. Dís wanneer daar ʼn slagting gaan uitbreek.

    Tweedens reken Willem dat as die Boere vreedsaam terugdeins en die EFF verwoed storm, die Boere die morele hoëgrond toegesê sal word deur die pers. Vergeet dit. Hulle sal die EFF miskien roskam, maar hulle sal die Boere ewe lustig striem en as die ware sondebokke uitwys. Vergeet van die pers en hulle sienings. Hulle is ʼn gespuis en sal nooit aan ons kant wees nie.

    So wat móét ons doen: Ek stel voor dat ons letterlik ʼn streep op die grond trek en teenoor mekaar onderneem om nie daaroor te gaan nie. Daar is ʼn voorstel dat ons ʼn blik rooi verf in ʼn streep oor die grond uitgiet, simbolies van die bloed van Brendin Horner, Wilmientjie Potgieter, Annette Keneally en duisende ander martelaars.

    As ons aan ons kant van die streep bly, bevredig dit al die vereistes van goeie beeldbou.

    Maar sou die EFF deur daardie rooi beweeg, moet ons vasstaan. Hierdie reëling sal dit ook vir die polisie makliker maak om die situasie te bestuur.

    Willem sê tereg dat Senekal vir ons ʼn ongekende momentum gebied het. Nou moet ons net erken, hartseer soos dit is, as dit nie was vir die inval by die landdroskantoor, die uitgedryfde Nyala en uitgebrande vangwa was nie, het niemand werklik kennis daarvan geneem nie.

    As ons dink ons is net met ʼn openbarebetrekkinge-oefening besig, het ons in 26 jaar niks geleer nie.

  • Ontsnapte gevangene steeds soek

    Die polisie op Senekal in die Vrystaat soek steeds na ‘n gevangene wat deel was van sewe gevangenes wat Saterdag uit die Senekal-tronk, waar hulle as verhoorafwagtendes aangehou is, ontsnap het.

    Ses van die gevangenes is reeds aangekeer nadat hulle bewaarders oorrompel en hul selsleutels gevat het.

    Polisiewoordvoerder, Phumelelo Dlamini, sê slegs Vasco Makubela (42) word steeds gesoek. Hy het die laaste keer wat hy gesien is ‘n blou broek en ‘n wit en swart gestreepte trui aangehad.

    Dlamini sê die hoof van die Senekal korrektiewe dienste, Mokhane Nthoroane, is Saterdag omstreeks 07:30 deur een van die gevangenes in die been geskiet toe hy en ‘n bewaarder ‘n roetinebesoek in die selle afgelê het.

    Een van die gevangenes het op Nthoroane begin skiet waarna hulle die mans oorrompel het. Die gevangenes het die sluitels van hul sel gevat en dit oopgesluit. Die mans het ook met die sleutels van ‘n kluis en die bewaarders se selfone op die vlug geslaan.

    Dlamini sê die polisie het vinnig gereageer. Ses van die ontsnaptes is twee ure later naby Senekal in hegtenis geneem.

    Hy vra mense om Makubela nie te konfronteer wanneer hulle hom gewaar nie, maar om eerder die polisie te ontbied. Die verhoorafwagtendes word van koperdiefstal en roof aangekla.

    Nthoroane is na die Mediclinic Hoogland in Bethlehem gehaas. Na wat verneem word is hy in ‘n bestendige toestand.

  • Senekal: Lokasiebewoners drink riool weens waternood

    Terwyl dele van die land toenemend onder waterbeperkings gebuk gaan met die droogtekrisis wat vererger, het die gemeenskap van Senekal in die Vrystaat reeds vir weke al geen watertoevoer nie.

    Die situasie het so drasties geraak, dat verslae van lokasiebewoners wat rou rioolwater drink na vore gekom het.

    Die uitwerking van die droogte het selfs daartoe gelei dat ‘n boer glo selfmoord gepleeg het.

    Volgens waarnemers baklei lokasiebewoners nou oor water en jaag diere weg van drinkwater om hul dors te les.

    Die waternood is besig om te vererger, met boorgate en krane wat heeltemal opdroog het. Die regering doen ook nie veel om inwoners by te staan nie.

    Die Setsoto Munisipaliteit, wat verantwoordelik is vir Senekal en die omliggende gebied, het nie gereageer op navrae oor die droogte nie.

    Boere in die gebied het water uit hul boorgate aan die lokasie voorsien, maar hulle sê hulle sal dit nie kan volhou nie, aangesien talle boorgate reeds opgedroog het.

  • Senekal-plaasaanvallers nog op vrye voet

    Nog niemand is in hegtenis geneem in verband met die aanval op ‘n bejaarde egpaar op hul plaas naby Senekal in die Vrystaat verlede week nie.

    Vrystaatse polisiewoordvoerder, Phumelelo Dhlamini, vra enigeen wat inligting het oor “vier mans” wat gesoek word om hul naaste polisiekantoor te bel.

    Hy het egter nagelaat om te noem dat die aanvallers swart was, was kennelik die soektog kan belemmer.

    Dries Stemmet en sy vrou Fransie is verlede Woensdagaand in hul slaapkamer deur die swart aanvallers oorval. Hulle het ‘n sementblok deur die egpaar se slaapkamerruit gegooi.

    Dries is met ‘n stuk sementblok teen die kop geslaan. Hy het sy bewyssyn verloor waarna hulle hom vasgemaak het. Fransie is ook vasgemaak.

    ‘n Onbekende bedrag kontant, ses vuurwapens en selfone is gesteel. Een van die wapens is later in die veld gevind.

  • Plaasmoorde in Nederlandse pers

    “Zuid-Afrika Jonge zwarte mannen martelen en vermoorden ongeveer honderd blanke boeren per jaar. In Zuid-Afrika worden gemiddeld twee boeren per week vermoord. Boerenorganisatie Agri SA luidt de noodklok.”

    So begin ‘n berig in vandag se uitgawe van Trouw.

    Die berig handel in wese oor die hofverskyning van die vermeende moordenaars van die Van Zyl-egpaar van Senekal, wat eers met “een vleeshaak” aangeval is voor hulle vermoor is.

    Hierdie berig is die jongste in ‘n skynbare oplewing in die belangstelling oor die lot van kommersiële boere in Suid-Afrika. Die leier van minstens een klein politieke party het al aangedui dat hy kort na mekaar twee media-oproepe oor plaasmoorde uit Europa gekry het – een uit Nederland en een uit Spanje.

    Die berig vermeld voorts dat Suid-Afrika deur sowat 750 tot 800 plaasaanvalle per jaar geteister word, wat ongeveer ‘n honderd sterftes per jaar oplewer.

    Die berig lig ook die “patetiese” speurwerk in die land uit, en dat maar sowat 12 persent van die sake wat by die polisie aangemeld word, in ‘n veroordeling uitloop.

    Volgens die berig meld Agri SA dat die plattelandse veiligheidsplan nie werk nie omdat te veel poilisiebeamptes nie hul werk doen nie, en dat te veel “rotten appels” in die polisie nie ontslaan word nie.

    Trouw haal selfs een van Van Zyl se werkers aan oor wat hy tydens die begrafnis gesê het: We hebben lang samengewerkt. Hij was een goede man. Als ik een schaap kwijt was, hielp hij mij zoeken.”

    free gambling games no depositданильченко юрий брониславович прокурор