Internasionale nuus Archives - Page 94 of 464

Ivoorkus-verkiesing in die weegskaal oor ongeloofwaardige kandidaat

Vyf van die Ivoorkus se tien presidentskandidate het Woensdag gesê die land is nie gereed om geloofwaardige en deursigtige verkiesings op 15 Oktober te hou nie.

Hulle dreig nou om hulle aan die verkiesings te onttrek.

Opposisiegroepe sê Alassane Ouattara se ouers is nie Ivoorkus-burgers nie, dieselfde beswaar wat voor die dodelike onrus in 2010-2011 geopper is en waarin meer as 3000 dood is.

Die voormalige president Laurent Gbagbo, wat aangekla is deur die Internasionale Strafhof vir misdade teen die mensdom moet in November in Den Haag oor dié onrus verskyn.

Hy het geweier om van sy pos te bedank en erken nie Ouattara se oorwinning by die stembus nie. Ouattara is ‘n Moslem en ekonoom wat voorheen vir die IMF gewerk het.

Die vyf kandidate het die week tydens ‘n byeenkoms van die Nasionale Koalisie vir Verandering (CNC) in die hoofstad, Abidjan, gepraat.

‘n Voormalige speaker, Mamadou Coulibaly, het gesê sommige presidentskandidate is nie gereed om in die huidige omstandighede aan verkiesings deel te neem nie. Hy wil ook hê die nege presidentskandidate wat die huidige president, Alassane Ouattara, teenstaan, moet byeenkom en “gesels”.

Ander opposisieleiers het weer te velde getrek teen die onafhanklike verkiesingskommissie wat volgens hulle ten gunste van Ouattara is.

Tien sterftes in Nigerië dalk ebola

Vrese dat ebola weer in Wes-Afrika kan uitbreek is verhoog nadat die virus in die suide van Nigerië klaarblyklik tot sterftes gelei het.

Dié nuwe gevalle kom ‘n jaar nadat die land vry van die virus verklaar is.

Tien mense in die suide van Nigerië is onder kwarantyn geplaas, nadat hulle in kontak was met ‘n man wat simptome soortgelyk aan die van die ebola-virus getoon het, het amptenare gesê.

Dit volg ‘n jaar nadat Nigerië vry van die virus verklaar is.

Die man is volgens berigte dood kort nadat hy by ‘n hospitaal in Calabar opgeneem is.

Intussen het die drie lande wat die ergste deur die ebola-virus geraak is, Guinee, Sierra Leone en Liberië, Woensdag verklaar dat geen nuwe gevalle sedert Maart 2014 aangemeld is nie.

Meer as 11.000 mense in Wes-Afrika is sedert die begin van 2014 aan die ebola-virus dood.

MSF vra onafhanklike ondersoek na Amerikaanse bomaanval

Die hulpagentskap, Dokters Sonder Grense, MSF, het ‘n ondersoek deur ‘n onafhanklike instansie gevra oor die Amerikaanse bomaanval op sy hospitaal in die Afghaanse stad, Koendoez.

Die MSF sê hy vertrou nie die interne Amerikaanse militêre ondersoeke na die bomaanval waartydens 22 mense dood is nieen sê dit verteenwoordig ‘n oorlogsmisdaad.

Amerika het vroeër gesê die bomaanval was ‘n fout te midde van pogings om ‘n Taliban-oorname van die stad te verhoed.

Die hoof van MSF, Joanne Liu, sê die bomaanval was juis ‘n aanval op die konvensies wat ten doel het om die optrede van diegene wat by die oorlog betrokke is, te beheer.

Volgens Dokters Sonder Grense, moet so ‘n ondersoek bewyse van die VSA, NAVO en Afghanistan, asook getuienisse van die hospitaalpersoneel en pasiënte insluit.

Dié bevindings sal bepaal of MSF sal voortgaan met eise teen die betrokke partye. “As ons dit laat gaan, asof dit niks was nie, skryf ons basies ‘n blanko tjek aan enige land wat in oorlog gewikkel is,” het Liu op ‘n nuuskonferensie gesê.

“As ons nie die mediese ruimte beskerm vir ons om ons aktiwiteite te doen nie, dan is dit onmoontlik om te werk in ander kontekste soos Sirië, Suid-Soedan, soos Jemen,” het sy bygevoeg, terwyl sy aangedaan die gruwels van die hospitaalbombardement beskryf het.

“In Koendoez is ons pasiënte in hul beddens verbrand. MSF dokters, verpleegsters en ander personeel is dood terwyl hulle gewerk het. Ons kollegas moes op mekaar opereer. Een van ons dokters is dood op ‘n geïmproviseerde operasietafel – ‘n kantoorlessenaar – terwyl sy kollegas probeer het om sy lewe te red,” het dr Liu gesê.

Intussen het Edward Snowden getwiet dat die vrystelling van opnames van die Amerikaanse vegvliegtuie wat betrokke was in die aanval asook die beheerinstansie, gou-gou enige kwessies oor wie verantwoordelik was, sal opklaar.

President Obama het Woensdag om “diep” om verskoning gevra vir die aanval op die hospitaal, maar geen besonderhede gegee nie.

Kongo stem binnekort oor president se derde termyn

Pres. Denis Sassou Nguesso is reeds meer as 30 jaar aan die stuur van sake in die Republiek van die Kongo.

Die 72-jarige president word grondwetlik verhinder om hom vir ‘n derde termyn verkiesbaar te stel en daar is ‘n ouderdomsbeperking van 70 jaar vasgestel, het AFP berig.

Sassou Nguesso is onder verskeie Afrika-leiers wat in omstredenheid gedompel is omdat hulle verseg om die leisels prys te gee.

Sassou Nguesso se besluit om hom vir ‘n derde termyn verkiesbaar te stel, het tot protesoptrede in die hoofstad, Brazzaville, gelei nadat die regering verlede maand sy voornemens aangekondig het.

Soortgelyke planne deur sy eweknieë het vanjaar elders in Afrika tot geweldpleging gelei. In nabygeleë Burundi het pres. Pierre Nkurunziza se wyd veroordeelde derde termyn tot ‘n mislukte staatsgreep gelei.

Laat verlede jaar is die ystervuis-leier van Burkina Faso, Blaise Compaore, uit die kussings gelig ná wydverspreide en gewilde straatprotes. Dít nadat hy probeer het om sy 27 jaar lange bewind te verleng.

Die Oktober-referendum sal handel oor die twee-termyn-beperking en om die ouderdomsbeperking-voorsiening te skrap.
Die referendum sal op 25 Oktober plaasvind.

Sassou Nguesso was van 1979 tot 1992 president. Daarna was hy die leier van die opposisie en het ná ‘n kort burgeroorlog in 1997 na die presidensiële paleis teruggekeer.

Hy is in 2002 en weer in 2009 herkies as president midde ernstige besware van opposisiepartye rakende wydverspreide verkiesingsbedrog.

Pegida kom na Nederland

De gemeente Utrecht is in gesprek met mensen die op 11 oktober een Pegida-demonstratie op de Neude willen houden.

Pegida is een van oorsprong Duitse bewewiging die tegen de islam is. De organisatie wil onder meer dat de asielwetten in Nederland veel strenger worden. Inmiddels hebben zich ook tegendemonstranten gemeld.

De demonstratie in Utrecht werd enkele weken geleden klein op de Facebook-pagina van Pegida in Nederland aangekondigd.

Inmiddels heeft de organisatie bekendgemaakt dat onder meer de Duitse Pegida-oprichter Lutz Bachman komt spreken.

Ook zou Tommy Robinson komen spreken, een schuilnaam voor Stephen Yaxley-Lennon. Hij was in het verleden mede-oprichter van de omstreden English Defence Legue en was eerder verbonden aan de British National Party.

De organisatie wil dat de demonstratie in Utrecht netjes verloopt. “Het is heel erg belangrijk dat wij een goed visitekaartje afgeven. En niets doen dat door onze critici en/of tegenstanders tegen ons kan worden gebruikt”.

Daarom zijn strenge regels gesteld. Zo is gezichtsbedekking niet toegestaan en is alcohol drinken verboden.

Bron: RTV Utrecht

ISIS vernietig geskiedkundige erfenis verder

Lede van die die Islamitiese Staat (ISIS) het die naweek die eeue oue triomfboog in die geskiedkundige stad Palmira opgeblaas.

Vroeër het die beweging ook twee tempels en ander strukture in die 2 000 jaar oue stad verwoes.

Die terroriste het die stad, ’n Unesco-bewaringsgebied, in Mei verower. Hulle beskou die geskiedkundige geboue en monumente as heidens en teen hul geloof.

“Dit is asof ’n vloek die stad getref het. Daar sal niks oorbly as dit in hul hande bly nie,” het Maamoun Abdulkarim, hoof van oudhedebewaring in Sirië, gesê.

“Hulle is nou op ’n moedswillige vernietigingstog. Hul optrede word nie meer deur ideologie of godsdiens gemotiveer nie. Hulle blaas nou ook geboue op wat geen godsdienstige betekenis het nie.” Die rebelle het in Augustus die tempel van Baal Shamin en die tempel van Bel vernietig.

Dit is van die geboue uit die Romeinse era wat die beste behoue gebly het. Unesco het die vernietiging van geskiedkundige terreine in Palmira as oorlogsmisdade bestempel.

Israel lê Palestynese huise in puin

Israel het Dinsdag die huise van twee Palestyne wat na bewering agter verlede jaar se aanvalle was, in puin gelê.

Dit volg nadat eerste minister Benjamin Netanyahu beloof het om ’n ystervuis teen toenemende onrus in te span.

Die verwoesting van die huise kom terwyl Netanyahu onder druk van regse faksies in sy koalisie is, met skermutselinge wat ná die moord van vier Israeli’s voortduur.

Die toename in geweld het tot internasionale oproepe tot kalmte gelei, met kommer dat die onluste buite beheer kan raak.

Die huise wat vernietig is, het aan Ghassan Abu Jamal en Mohammed Jaabis behoort, het ’n militêre verklaring gelui.

Opdrag vir die vernietiging van die huise is gegee nadat die mans Israeli’s verlede jaar aangeval het.

Gewapen met vleismesse en ’n pistool, het Abu Jamal en sy neef Uday Abu Jamal vier rabbi’s en ’n polisieman vermoor voordat hulle in November 2014 doodgeskiet is.

Jaabis het in Augustus 2014 met ’n stootskraper teen ’n bus vasgery. Een Israeli is dood en etlike is beseer. Hy is op die toneel deur die polisie doodgeskiet. Die vernietiging van die wonings is in Israel se hoogste hof uitgedaag, maar het enkele maande gelede goedkeuring gekry.

Die strafmaatreëls volg nadat geweldpleging die afgelope dae na die ooste van Jerusalem en die Wesoewer versprei het ná die moord van vier Israeli’s, insluitende ’n egpaar wat hul kinders skool toe geneem het.

Israeliese veiligheidsmagte het Maandag aangekondig dat hulle vyf Palestynse mans in hegtenis geneem het wat lede is van die militante groep, Hamas, en erken het dat hulle die egpaar geskiet het.

Israeliese troepe het Maandag ’n Palestynse tiener doodgeskiet, die tweede sterfgeval van ’n Palestyn in 24 uur met dosyne mense wat in die jongste geweldpleging beseer en gewond is.

Air France se baas vlug vir sy werknemers

Air France se direkteur van langafstandvlugte, Pierre Plissonnier moes deur veiligheidspersoneel en polisiebeamptes gehelp word om oor ’n draad te klim om van woedende werknemers te ontsnap.

Honderde beswaarde werknemers het die kantore van Air France Maandag tydens ’n vergadering van die sentrale komitee van die organisasie in Roissy-en-France binnegestorm.

Air France-KLM het Maandag ’n herstruktureringplan bekend gemaak wat tot die verlies van 2 900 werkgeleenthede sal lei.

Dié stap kom nadat vlieëniers van die sukkelende lugredery geweier het om ’n voorstel vir langer werksure te aanvaar.

Amerikaanse lugaanval op hospitaal skerp veroordeel deur VN

Die Verenigde Nasies (VN) het ’n aanval op ’n hospitaal van die organisasie Médecins Sans Frontières (MSF), beter bekend as Dokters Sonder Grense, in Koendoez in Afganistan skerp veroordeel.

Die hoof van die VN se humanitêre sending, Zeid Ra’ad Al Hoessein, het gesê indien ’n ondersoek sou bevind dat die hospitaal met opset geteiken is, dit as ’n oorlogsmisdaad beskou sal word.

Die sekretaris-generaal van die VN, Ban Ki-moon, sê ‘n grondige en onpartydige ondersoek na die voorval moet spoedig volg.

Die Amerikaanse president, Barack Obama, het ook ‘n ondersoek na die tragedie belowe. Jens Stoltenberg, NAVO se sekretaris-generaal het ook sy “diepe meegevoel” uitgespreek.

Negentien mense, onder wie 12 personeellede van MSF, is in die aanval dood.

Volgens MSF is die intensiewesorg- en ongevalle-eenheid in vlamme gelaat en het pasiënte doodgebrand.

Die Amerikaanse lugmag het erken dat hy in die omgewing van die hospitaal ’n lugaanval uitgevoer het.

“Die departement van verdediging sal ’n volledig ondersoek doen en ons sal op die uitslag van die ondersoek wag voordat ons enige verdere besluite neem rakende die omstandighede wat die aanval betref,” het Obama in ’n verklaring gesê.

Volgens Dokters Sonder Grense is die GPS-koördinate van sy fasiliteite in Koendoez by verskeie geleenthede aan Amerikaanse magte in Afghanistan deurgegee.

Afgaanse regeringsmagte, met die steun van onder meer Amerikaanse lugaanvalle, het die afgelope paar dae na wat berig word dele van Koendoez in hewige gevegte herower nadat die Taliban die stad vroeër vandeesweek ingeneem het.

Die Taliban se suksesvolle aanslag was ’n vernederende nederlaag vir die VSA. Dit was die eerste keer sedert 2001 dat ’n provinsiale hoofstad in die Taliban se hande beland het.

Bruin Oregon-slagter pleeg selfmoord

Die 26-jarige bruin skieter in die massaskietvoorval by die Umpqua Community College in Roseburg in die Amerikaanse deelstaat Oregon het selfmoord gepleeg, volgens Amerikaanse owerhede.

“Die mediese ondersoek het bevestig dat selfmoord die oorsaak van die skieter se dood was,” het die Douglas-distrik se polisiehoof, John Hanlin, gesê.

Hy het gesê die bruinman, Christopher Harper-Mercer, was ’n student aan die kollege waar die massaslagting plaasgevind het.

Harper-Mercer wat minstens nege studente en lektore doodgeskiet het, is deur die hoofstroommedia as wit voorgehou.

Dit was Amerika se ergste voorval van massamoord vanjaar. Voor die jongste voorval is daar reeds 293 mense vanjaar in massamoorde in dié land gedood.

Die slagting het begin toe Mercer Donderdagoggend by ’n lesinglokaal ingestorm en ’n lektor doodgeskiet het, waarna hy van die een lokaal ná die ander gestap en geskiet het. Angsbevange studente het probeer om die deure, wat nie kan sluit nie, toe te maak. Ander het op die vloer neergeval of agter tafels en stoele probeer skuil.

Pres. Barack Obama het egter sy woede teen die wit National Rifle Association (NRA) gerig.