Kategorie: Internasionale nuus

Nuus oor die wêreld buite Suider-Afrika

Wit Sweed dood twee in ‘rasse-aanval’

Anton Lundin Pettersson het twee mense gedood en twee ander met ‘n swaard beseer by ‘n skool in Swede.

Vrydag het die Sweedse polisiehoof Niclas Hallgren verklaar dat die man wat twee mense gedood het “deur rassistiese motiewe beweeg is”.

“Ons is daarvan oortuig dat die aanvaller deur rassistiese motiewe beweeg is,” het hy gesê. “Ons het tot hierdie gevolgtrekking gekom op grond van wat ons gevind het toe ons sy woonstel deursoek het, sy optrede tydens die gebeure en ook op die basis van hoe hy sy slagoffers gekies het.”

Hy het glo die anti-immigrasieparty, die Sweedse Demokrate, en ander regse politici op Facebook ondersteun.

Die swaardaanvaller van Trollhättan is eers later in die hospitaal aan sy wonde dood, nadat hy deur die polisie buite die skool geskiet is.

Die media het voor hy dood is reeds berig dat hy “doodgeskiet” is, maar die hospitaal waar hy opgeneem is, het die berigte weerlê.

Volgens ‘n woordvoerder van die hospitaal is hy gedurende ‘n noodoperasie wat op hom uitgevoer is, dood.

Die 21-jarige verdagte het ‘n masker en ‘n swart uniform gedra, vermom soos ‘n karakter uit die film Star Wars.

Hy het ‘n onderwyser en ‘n skoolkind met sy swaard vermoor en nog ‘n onderwyser en ‘n kind is in ‘n kritieke toestand in die hospitaal.

Die aanvaller het na bewering voor die aanval foto’s saam met skoolkinders geneem.

Volgens berigte het van die skoolkinders gedink dit is ‘n poets vir Halloween.

Navorsers sê Trollhättan die mees gesegregeerde stad in Swede, met immigrante wat almal gekonsentreer is in Kronogården.

Die Saab-fabriek is in Trollhättan geleë en sou hierdie jaar twee keer meer immigrante ontvang as die vorige jaar, naamlik 160 000.

Dit is die derde soortgelyke voorval van sy soort te midde van oplaaiende weerstand teen massa-immigrasie wêreldwyd.

In die twee vorige gevalle het Anders Breivik en Dylan Roof glo ook uit rassistiese oorwegings moorde gepleeg.

Twee nuwe verdagtes vir Lockerbie-bom uitgewys

Britse media berig dat die Libiese owerhede die ondervraging van twee verdagtes in die 1988 bomaanval op Pan Am vlug 103 sal toelaat.

‘n Libiese woordvoerder het die week aan die BBC gesê ondersoekbeamptes kan na Libië kom en die verdagtes ondervra wat weens onverwante klagte in die gevangenis is.

Skotse aanklaers het verlede week aangedui daar is twee nuwe verdagtes in die bombardering van die vliegtuie wat oor Lockerbie neergestort het en die lewe van 270 mense geëis het.

Die twee verdagtes is nie geïdentifiseer nie, maar die BBC berig beamptes in Tripoli het hulle as Mohammed Abouajela Masud en Abdullah al-Senoussi geïdentifiseer.

Abdelbaset al-Megrahi, die enigste persoon wat skuldig bevind is aan die bomaanval, is in 2012 aan kanker oorlede.

Israelse premier skok met uitlatings oor Holocaust

Israel se eerste minister, Benjamin Netanyahu, het Dinsdagaand in ’n toespraak voor die Sioniste se kongres verwys na ’n reeks Moslem-aanvalle in die 1920’s teen Jode in Palestina, wat hy sê deur die destydse moefti van Jerusalem, Haj Amin al-Husseini, aangestig is.

Husseini het in 1941 na Berlyn gevlieg om die Nazi-diktator, Adolf Hitler, te besoek. Volgens Netanyahu was hierdie ontmoeting instrumenteel in Hitler se besluit om ’n uitwissingsveldtog teen die Jode van stapel te stuur.

“Hitler wou nie die Jode uitwis nie, maar hulle bloot uit die land verban,” het Netanyahu gesê. “Haj Amin al-Husseini het na Hitler gegaan en vir hom gesê: ‘As jy hulle verban, sal hulle almal hierheen kom’.”

“’So wat moet ek met hulle doen?’” het Hitler gevra, sê Netanyahu, waarop die moefti geantwoord het: “Verbrand hulle.”

Netanyahu, wie se pa ’n vooraanstaande geskiedkundige was, is vinnig deur opposisie-politici en deskundiges gehekel wat sê hy verdraai die ­geskiedkundige rekord.

Palestynse beamptes sê Netanyahu skeld oënskynlik vir Hitler kwyt van die moord van ses miljoen Jode, ten einde die Moslems die skuld te gee.

Twitter was oorlaai met kritiek.

“Dit is ’n hartseer dag in die geskiedenis wanneer ’n leier van die Israelse regering sy bure só haat dat hy bereid is om die mees berugte oorlogsmisdadiger in die geskiedenis, Adolf Hitler, kwyt te skeld van die moord van ses miljoen Jode,” het Saeb Erekat, die sekretaris-generaal van die Palestynse Bevrydingsorganisasie, gesê.

“Mnr. Netanyahu moet ophou om hierdie menslike tragedie te gebruik om ­politieke punte aan te teken,” het hy bygevoeg.

Netanyahu se minister van verdediging en getroue bondgenoot, Moshe Yaalon, asook die Duitse kanselier Angela Merkel het by monde van haar woordvoerder gesê die eerste ­minister is verkeerd.

“Dit was beslis nie Husseini wat die ‘finale oplossing’ uitgedink het nie, maar Hitler self wat die bose plan bedink het,” het hy aan die radiodiens van Israel se weermag gesê.

Steffen Seibert het namens die kanselier gesê die Duitsers is geheel en al verantwoordelik vir die brandoffer.

Dit is nie duidelik op watter bronne Netanyahu staatgemaak het vir sy opmerkings nie. ’n Boek wat in 1947 gepubliseer is, “Die Mufti van Jerusalem”, en ’n koerantberig uit die tyd sê ’n voormalige adjunk van Hitler het by die Nuremberg-verhoor vir oorlogsmisdadigers getuig dat Husseini en die Nazi-leier saamgesweer het om van Jode in Europa ontslae te raak.

Husseini is vir oorlogsmisdade gesoek, maar het nooit tydens die Nuremberg-verhore verskyn nie en is later in Kaïro dood.

Verskeie geskiedkundiges sê ­Netanyahu verwring die tyd en het tot ’n valse slotsom gekom.

Die ontmoeting tussen Husseini en Hitler het op 28 November 1941 in Berlyn plaasgevind. Meer as twee jaar vroeër, in Januarie 1939, het Hitler die Reichstag toegespreek.

In 1845, het die Britse lt.kol George Gawler ‘n verslag opgestel waarin die potensiaal vir Joodse kolonisasie van Palestina uitgestippel word.

Die struikelblokke wat hy voorsien het, het ‘n gebrek aan hulpbronne en die haalbaarheid daarvan om Jode te oortuig om te immigreer na Palestina, ingesluit.

Duitse oorlogskuld het Israel van die nodige hulpbronne voorsien.

Franse minister ontplooi polisie teen migrante-misdaad

Frankryk se minister van binnelandse sake het Derde Wêreld-migrante Woensdag in die hawestad van Calais belowe dat vroue en kinders verhitte tente in ‘n tydelike kamp gegee sal word teen die bitter koue.

Hy het ook verklaar dat die misdaadprobleem aangespreek sal word deur bykomende polisiebeamptes – sowat 1 125 van hulle – te ontplooi in Calais en die omliggende gebiede.

Migrante en vlugtelinge uit die horing van Afrika, die Midde-Ooste of Afghanistan probeer om Brittanje dmv vragmotors, veerbote of deur die Kanaaltonnel te bereik.

Die sogenaamde “Nuwe Oerwoud” is ‘n versameling plakkers, ​​wat ongeveer ‘n uur weg te voet van die sentrum van die noordelike Franse stad opgeskiet het.

Die Sosialiste verkeer onder druk omdat kiesers kla dat misdaad toegeneem het.

Die afgelope maande, het honderde migrante wat wil oorgaan na Brittanje, die plakkerskamp aansienlik laat uitbrei.

Sowat 6 000 mense woon in die plakkerskamp en met die heersende winterweer, vrees hulpgroepe dat toestande in die gebied verder sal versleg.

Minister Bernard Cazeneuve het Calais besoek vir die sewende keer sedert die migrantekrisis begin het, maar die onverkwiklike toestand toon geen teken van enige afname nie.

Benewens die bykomende polisie wat in die gebied ontplooi sal word, sal ‘n sentrum wat vroue en kinders huisves, verder vergroot word om 400 siele in te neem.

“In die tussentyd, sal verhitte tente opgerig word… teen die einde van die week,” het hy gesê, en belowe dat “geen vrou en geen kind sonder ‘n skuiling in hierdie stad sal bly nie”.

Net sowat 150 migrante per dag kon in Augustus onwettig na Engeland reis weens strenger veiligheidsmaatreëls om hulle uit te hou.

Baie migrante en vlugtelinge woon dus in die “Nuwe Oerwoud” ‘n krotbuurt van gevaarlike stegies besaai met tydelike skuilings wat uit afvalmateriaal opgerig is.

Vroeër hierdie week, het Calais se burgemeester Natacha Bouchart die vooruitsig van ‘n weermagontplooiing genoem, “omdat ons nie regtig weet wat daar aangaan nie”.

Bouchart het vroeër 12 miljoen Britse Pond van die Britse regering ontvang vir die migrantekrisis nadat sy gedreig het om die hawe te sluit, Britse grensbeheer op Franse grond af te skaf, die Verenigde Koninkryk se doeanebeamptes huis toe te stuur en 2000 migrante dadelik na Brittanje te laat reis.

Trudeau se oorwinning slegte nuus vir Amerikaanse Neo-Konserwatiewes

Kanadese het ‘n einde aan die nege jaar lange bewind van eerste minister Stephen Harper se Konserwatiewe Party gemaak deur ‘n Liberale regering te verkies onder leiding van Justin Trudeau.

Justin is die seun van ’n charismatiese voormalige eerste minister Pierre Trudeau.

Meningsopnames Sondag het reeds aangedui dat die Liberales ’n hupstoot uit die derde plek gekry het en nou ’n sewe punt voorsprong op die konserwatiewes het.

Baie van Kanada se 26,4 miljoen geregistreerde kiesers moes ‘n politieke sirkus aanskou met kandidate wat hulself deurentyd deur hul belaglike manewales diskwalifiseer.

Die 43-jarige Trudeau hoop om die “Trudeau-manie” te laat herleef wat in 1968 die ou garde uit die kussings gelig het.

Justin Trudeau se oorwinning is slegte nuus vir Amerikaanse Neo-Konserwatiewes.

Trudeau het bevestig dat hy Kanadese vegvliegtuie sal onttrek van die lugaanvalle in Irak en Sirië teen die demokratiesverkose president al-Assad.

Hy het die Amerikaanse president Barack Obama van sy besluit ingelig slegs ure na oorwinning by die stembus.

As deel van sy verkiesingsveldtog, het Trudeau belowe om die CF-18 vegvliegtuie wat tot Maart 2016 ontplooi is, huistoe te bring.

Trudeau, wat gekant is teen die onafhanklikheidstrewe van Quebec, het ook die wettiging van dagga belowe.

Kiëf probeer Minsk-vrede ondermyn

Regeringsbronne in Kiëf het bekend gemaak dat ’n soldaat in die konflikgeteisterde ooste van die Oekraïne doodgeskiet is.

Dit is glo die eerste sterfgeval onder regeringsmagte in ’n maand.

Dié nuus kom pas nadat president Hollande van Frankryk verklaar het dat die Minsk-vredesooreenkoms verleng behoort te word. Dit sou strek tot Desember 2015.

Dinsdag het pro-Russiese rebelle op regeringsposisies suid van Avdiivka gevuur, volgens Kiëf. Die dorp is net noord van die rebelle-vesting Donetsk geleë.

Twee ander soldate is in die skietery gewond.

Kiëf en die rebelle het ’n skietstilstandooreenkoms gesluit wat op 1 September in werking getree het.

Op 14 September het regeringsmagte twee sterftes aangemeld en die rebelle het verlede naweek ’n vegter aan die buitewyke van Donetsk verloor.

Die konflik het begin toe NAVO ‘n destabiliseringsoefening van stapel gestuur het in die Oekraïne. Meer as 8 000 mense is reeds dood en 1,5 miljoen haweloos gelaat in die konflik.

Na ‘n referendum in die Krim-skiereiland in Maart 2014 is dit as ‘n selfregerende gebied deur Rusland verklaar.

EU wil druk op Turkye plaas om migrantestroom te beperk

Leiers van die Euro­pese Unie (EU) het vergader om druk op Turkye uit te oefen om die toestroming van migrante na Europa te beperk.

Die Duitse kanselier, Angela Merkel, het gesê dit is “onaanvaarbaar” dat die kort seeroete na Griekeland deur mensesmokkelaars beheer word.

Die beraad in Brussel sal fokus op ’n ooreenkoms met Turkye waarin dié land onderneem om die vloedgolf van mense wat uit die oorloggeteisterde gebiede in die Midde-Ooste en Noord-­Afrika daarheen stroom om weer elders ’n heenkome te soek, stop te sit.

Nagenoeg 600 000 mense het reeds vanjaar die Middellandse See oorgesteek.

“Ons kan nie die vlugtelingstroom beheer of organiseer as ons nie die samewerking van Turkye het nie,” het Merkel gesê terwyl sy Europa versoek het om saam te staan in sy ergste migrantekrisis sedert die Tweede Wêreld­oorlog.

“Europa moet nou solidariteit toon; enigiets anders sal ’n mislukkig wees,” het sy gewaar­sku. Merkel sal Turkye dié naweek besoek as deel van ’n Europese diplomatieke offensief wat op Ankara gemik is.

Terwyl leiers vergader het, het ’n boot met migrante naby die Griekse eiland Lesbos teen ’n Griekse reddingsboot gebots en agt migrante word vermis.

Dié eiland is tans die toegangsroete vir een uit elke vyf migrante wat hul toevlug tot Europa neem.

Kroasië het intussen gesê meer as 4 800 fortuinsoekers het die land Woensdag binnegekom, wat die totale getal na dié EU-lidland op 175 000 te staan bring.

Die EU-beraad sal druk uitoefen vir die ­voorgenome aksieplan met Turkye, waarheen meer as 2 miljoen sogenaamde Siriese vlugtelinge, waarskynlik ISIS-rekrute, reeds gestroom het.

Dié kwessie is verlede week al in gesprekke met pres. Recep Tayyip Erdogan aangeroer.

Die EU se visepresident, Frans Timmermans, en ander senior amptenare het Woensdag in Turkye aangekom om regeringslui oor die voorgenome plan in te lig en hul onderneming vir steun te kry.

Die span sou vroeër gegaan het, maar moes die besoek weens die selfmoord-bomaanvalle die naweek in Ankara uitstel.

Donald Tusk, president van die Europese Raad wat die beraad in Brussel lei, sê egter dit lyk asof dit “moeilik” is om Turkye se instemming hiervoor kry.

Hy het tydens ’n nuuskonferensie voor die beraad aan joernaliste gesê Europa moet seker wees Turkye se reaksie op sy aanbod sal net so konkreet en substan­sieel wees.

“Die belangrikste nou is Turkye se samewerking om die vloedgolf van vlugtelinge te stop, veral omdat ons vrees die volgende golf gaan selfs nog groter wees as nou,” het hy gesê.

Ebola terug in Nigerië, Londen

Die departement van gemeenskapmedisyne van die Universiteit van Calabar in die Cross River-staat van Nigerië ondersoek die jongste geval van Ebola in die land.

Tien mense word in kwarantyn gehou nadat hulle in die suidelike Nigeriese stad Calabar in kontak was met ’n pasiënt wat simptome soortgelyk aan dié van Ebola getoon het.

Die land is ’n jaar gelede vry van Ebola verklaar.

Die pasiënt het hom verlede week by die Calabar-hospitaal aangemeld met simptome wat ooreenstem met dié van Ebola.

Die plaaslike media berig dat die pasiënt sedertdien dood is, maar geen amptelike bevestiging is ontvang nie

Intussen verkeer die Skotse verpleegster wat verlede jaar Ebola in Sierra Leone opgedoen het, in ‘n “ernstige toestand” in ‘n isolasie-eenheid in Londen.

‘n Skotse hospitaal het bevestig dat die virus steeds teenwoordig is in Pauline Cafferkey se liggaam na die oorspronklike infeksie.

Die 39-jarige is terug na die isolasie-eenheid gevlieg in die Royal Free Hospital in Londen waar sy vir haar lewe veg.

Liggaamlike weefsel kan die Ebola-infeksie huisves maande nadat die persoon klaarblyklik ten volle herstel het.

Cafferkey van Cambuslang in South Lanarkshire, het byna ‘n maand in die eenheid aan die begin van die jaar deurgebring na sy die virus opdoen het in Desember 2014.

MH17-verslag vrygestel

Die verslag oor Vlug MH17 van die Maleisiese lugdiens, wat verlede jaar neergestort en die dood van 298 mense veroorsaak het nadat dit neergeskiet is deur ‘n Buk-missiel, is dié week vrygestel maar dit is nie bekend wie die missiel afgevuur het nie.

Só het Tjibbe Joustra, ‘n Nederlandse militêre inligtingsoffisier, by die bekendmaking van die Nederlandse Ondersoekverslag die week verklaar.

Nederland het die ondersoek gelei omdat die meeste van die slagoffers Nederlanders was.

Joernaliste kon geen vrae aan Joustra stel oor die bevindinge nie. Kwelvrae oor die afwesigheid van lugfoto’s wat die ligging van die missielstelsel sou kon opklaar, is dus nie toegelaat nie.

Die vliegtuig wat van Amsterdam na Kuala Lumpur op pad was, is afgeskiet in ‘n lugruim wat veronderstel was om gesluit te wees.

Die plofkop het omtrent ’n meter van die stuurkajuit ontsteek en honderde stukke metaal losgeruk wat die Boeing 777 laat opbreek het, het Joustra, gesê.

Die missiel is van binne ’n gebied van 320 km² afgevuur in die ooste van die Oekraïne, het Joustra gesê, maar die Oekraïne moes die lugruim bo die oorlogsone gesluit het.

Op 17 Julie, die dag van die voorval, het daar 160 vliegtuie oor dié gebied gevlieg.

Hy het nie tydens die perskonferensie enige aanduiding gegee of die missiel deur Russies-­gesinde rebelle of regeringsmagte afgevuur is nie.

Almaz-Antey, die Russiese vervaardiger van die Buk missielstelsel, sê die missiel is afgevuur vanaf Zarosjtjenskoje, ‘n nedersetting suid 7 kilometer Sjakhtorsk, wat beheer was deur die Oekraïense weermag.

Almaz-Antey het hul teleurstelling uitgespreek dat die Nederlandse ondersoekspan nie kennis geneem het van die skrapnelpatroon van die missiel nie wat daarop dui dat selfs NAVO-lande oor sulke wapens beskik.

Daar is nog tot twee weke gelede wrakstukke opgetel en nog stukke kan in die toekoms gevind word, hoewel dit nie die raad se bevindings sal verander nie, het Joustra gesê.

Die rekonstruksie van die vliegtuig met dele wat op die toneel gekry is, was “gekompliseerd” omdat die wrakstukke in ‘n oorlogsgebied bymekaargemaak moes word, het hy verduidelik.

Volgens hom was die doel van die ondersoek nie om iemand vir die voorval te blameer nie, want die voorval word ook strafregtelik deur Nederland ondersoek.

Die kwessie rakende is die skuldige party is sentraal tot die ondersoek aangesien die EU sanksies teen Rusland gestem nog voor daar vasgestel is wie verantwoordelik gehou moet word vir die afskiet van die passasierstraler.

Merkel se steun neem af

Kanselier Angela Merkel se gewildheid is besig om te taan weens haar tegemoetkomende houding teenoor die instroming van Moslemimmigrante.

Horst Seehofer, die leier van die Beierse sustersparty van die CDU, stamp reeds ’n geruime tyd koppe met Merkel oor hoe Duitsland die invloei van hoofsaaklik jong mans moet behartig.

Terwyl Merkel ’n oopdeurbeleid voorstaan en daarop aandring dat Duitsland dit sal kan behartig, het Seehofer, die premier van Bavaria, wat die eerste toegangspunt vir baie migrante in Duitsland is, gedreig dat sy staat die federale regering hof toe sal sleep om die aantal asielsoekers te beperk.

Duitsland is ’n gunsteling bestemming vir migrante van oral wat beweer dat hulle uit lande in die oorloggeteisterde Sirië in die Midde-Ooste vlug, asook Siriërs self.

Ontleders meen Merkel probeer ISIS-militante beskerm deur Duitsland se deure vir hulle oop te gooi nadat Rusland aangekondig het dat hulle sal optree teen ISIS in Sirië.

Dit het daartoe gelei dat die sogenaamde Forsa-meningsopname, wat die week vrygestel is, aantoon dat steun vir die konserwatiewes met een persentasiepunt tot 38 persent geval het.

Die persentasie kiesers wat nie op een van die partye kan besluit nie, het ook met een persentasiepunt gestyg en staan nou op 34 persent.

“Die dispuut tussen Seehofer en Merkel irriteer sommige konserwatiewe ondersteuners, maar hulle beweeg nie na ander partye nie. Hulle dui eerder aan dat hul nie kan kies nie,” het die hoof van Forsa, Manfred Guellner, gesê.

Die Groen-party het 10 persent steun, een persent meer as verlede week, en steun vir die ander partye het konstant gebly. Steun vir die Sosiale Demokrate (SPD), die junior koalisievennoot van Merkel se konserwatiewes, bly op 25 persent en die verlinkse Linke-party bly op nege persent.

Die regse Alternatief vir ­Duitsland-party (AfD), wat eis dat ­immigrante weggewys word, se steun in Beiere, wat aan Oostenryk grens van waar die meeste migrante Duitsland binnestroom, geniet nege persent steun en in die ooste van Duitsland steun 13 persent.

Merkel se persoonlike gewildheid het ook afgeneem. Die volgende federale verkiesing vind in 2017 plaas.

Na verwagting sal tussen 800 000 en ’n miljoen asielsoekers vanjaar in Duitsland aankom.