Internasionale nuus – Bladsy 9

Kinders onder slagoffers van selfmoordbomaanslag by Manchester-konsert

Ondersteuners van die Islamitiese Staat vier volgens berigte die aanval by ‘n popmusiekkonsert in Manchester, Engeland, op sosiale media. Minstens 22 mense is dood en meer as 50 is gewond by ‘n musiekkonsert van die Amerikaanse popster, Ariana Grande.

Die Britse polisie ondersoek dit as ‘n terreurdaad, maar geen militante groep het nog aanspreeklikheid vir die aanval buite die Manchester-arena aanvaar nie.

Hoofkonstabel Ian Hopkins sê die aanvaller het in die ontploffing gesterf. Hopkins het bevestig dat kinders onder die 22 mense is wat dood is.

Hy sê ondersoeke is aan die gang om vas te stel of die aanvaller deel was van ‘n netwerk.

Hy sê die polisie glo die man het “‘n geïmproviseerde ploftoestel gebruik”, wat daarop dui dat dit ‘n selfmoordbomaanval was.

Die Twitter-rekeninge van mense wat bande het met die Islamitiese Staat verwys met hutsmerke na die ontploffing, waarop vreugdeboodskappe instroom en soortgelyke aanvalle op ander plekke aangemoedig word.

Intussen het die popster, Ariana Grande, in reaksie op die ontploffing gesê sy is stomgeslaan.

Paul Nuttall, die Ukip-leier wat ook ‘n parlementslid vir Noordwes-Engeland is, het bevestig dat sy party sy verkiesingsveldtog sal opskort. In ‘n verklaring vanoggend het Nuttall gesê:

“Net wakker geword met die verskriklike nuus in die hart van my kiesafdeling, Manchester. My gebede en gedagtes is met diegene wat geraak word. Bly sterk.”

Die Britse verkiesing is dalk in die weegskaal nadat ander partye ook aangekondig het dat hulle hul werwingsveldtogte sal staak.

Alabama gryp in om Konfederale monumente te beskerm

Amptenare in New Orleans, Louisiana, het verskeie Konfederale monumente verwyder oor redes soos “wit rassisme” en “slawerny” in die suidelike Amerikaanse deelstate met linkses en swartes wat historiese afbeeldings van Amerikaanse geskiedenis op openbare eiendom verwerp. Maar Alabama sal nie hul voorbeeld volg nie.

Die voorgestelde verwydering van ‘n standbeeld van genl. Robert E. Lee in Charlottesville, Virginia, het verontwaardiging van patriotiese Amerikaners uitgelok en het gelei tot ‘n fakkelligprotes en ‘n kerslig-teen-demonstrasie.

Maar in Montgomery, Alabama het wetgewers staatwye beskerming vir Konfederale monumente, name en historiese gedenktekens, goedgekeur het die Associated Press berig. Die Alabama-wetgewer het Vrydag 19 Mei ‘n wetsontwerp goedgekeur wat die verwydering van monumente verbied.

Die maatreël sal die “verwydering, verandering, hernoeming of ander versteuring van enige argitektoniese beduidende gebou, gedenkgebou, gedenkstraat of monument wat vir 40 of meer jare op openbare eiendom gestaan het, verbied,” het dit gelui. Die nuwe staatskommissie sal nou veranderinge aan name of gedenktekens moet goedkeur.

Ondersteuners van die beskermende maatreëls het aangevoer dat alle soorte geskiedenis ingesluit moet word.

Gerald Allen, ‘n Republikeinse senator, het uitgevaar teen wat hy ‘n “golf van politieke korrektheid” genoem het, en gesê beelde is histories betekenisvol, selfs al het sommige historiese figure foute gehad.

Die goewerneur van Alabama, Kay Ivey, het ‘n wysiging bygevoeg, wat wetgewers goedgekeur het, om te bepaal dat skole van plek kan verander en opknapping kan doen, maar nie name verander nie.

Die wysiging is voorgestel nadat die wetgewers bekommerd was dat skole, wat dikwels na mense vernoem word, nie opknapping of verhuising onder die wetsontwerp sou kon doen nie.

Afro-Amerikaanse wetgewers probeer egter met alle wetgewende middele om ‘n “skandelike nalatenskap van slawerny” te verwyder. Monumente wat die Konfederasie eer, word uitgesonder.

“Jy sê ons beskerm geskiedenis. Ons beskerm nie geskiedenis nie. Ons beskerm monumente wat onderdrukking van ‘n groot deel van die mense in die staat van Alabama verteenwoordig,” het Hank Sanders, ‘n Afro-Amerikaanse demokraat van Selma, gesê.

New Orleans, ‘n meerderheid swart stad, breek tans nie minder nie as vier Konfederale monumente af. Die swart griewebedryf en verlinkse wit liberale het verklaar dat sulke monumente “aanstootlik aan swart mense” is.

Dieselfde aktiviste wil monumente vir Andrew Jackson, George Washington, en Johanna van Arkel ook verwyder.

Die stadsraad van New Orleans bestaan uit sewe lede, waarvan vyf swart en twee is wit. Al vyf swart lede en een van die blanke lede het ten gunste van die afbreek van die monumente gestem.

Ná die stemming van ‘n “pro-monument” wetsontwerp, het die vier-en-twintig-lid swart koukus uit protes uitgestap.

Die wetsontwerp staan bekend as LA HB71 en word die Wet op die Bewaring van Militêre Gedenktekens genoem.

Aanvanklik het die wetsontwerp enige munisipale of gemeente-owerheid verbied om enige gedenktekens wat met enige militêre veterane verband hou, te verwyder.

Maar voordat dit gestem is, is dit heeltemal geneutraliseer. Die wetsontwerp is verander om te sê dat enige munisipaliteit of gemeente ‘n openbare referendum kon hou om enige monument te verwyder.

Transgenders betaal nie: Kollege verklaar ‘finansiële nood’

Die eerste “vroulike” Amerikaanse kollege om manlike voorgraadse studente toe te laat wat hulself as “vroulik” identifiseer, het amptelik “finansiële nood” verklaar.

Verlede week het die raad van trustees van Mills College in Oakland, Kalifornië, aangekondig dat hulle in ernstige ekonomiese moeilikheid is, en dit nou oorweeg word om personeel af te dank.

Die begrotingskrisis by die kollege sal lei tot onderwyspersoneel, insluitend professore en administrateurs wat hul werk verloor. Die kollege sal “die finansiële verpligtinge van die kollege hersien” en “al sy uitgawes, insluitende personeel- en fakulteitssalarisse en ander uitgawes”, herstruktureer om “finansiële stabiliteit” te bereik.

Mills is tans besig om ‘n groot bedryfsstekort van $9 miljoen per jaar te ervaar, wat 16 persent van die kollege se jaarlikse 2017-begroting van $57 miljoen bedra.

Mills College se president, Elizabeth L. Hillman, het gesê sy verwag tot 35 afdankings, terwyl professore met vaste aanstellings ook nie gespaar sal word nie. Die liberale kollege het ongeveer 570 voltydse en deeltydse professore, administrateurs en ander werknemers.

Vir ‘n enkele jaar van voorgraadse onderrig, gelde en huisvesting by Mills, betaal studente $59,163. Mills het ‘n skenking van sowat $177 miljoen, maar dit is nie genoeg om die tekort te dek nie.

Vir die akademiese jaar 2015-2016 het Mills net 839 aansoeke ontvang, moontlik omdat ouers minder as gretig is om hul dogters te stuur om te leer met mans wat hulself as vroue voordoen.

In Augustus 2014 het Mills College die eerste vroulike kollege in die Verenigde State geword om manlike studente sonder die vereiste vroulike geslagskenmerke toe te laat. Hul nuwe beleid het verklaar dat: “self-identifikasie die dryfkrag sal wees agter die Universiteit se geskiktheidsbesluit.”

“Studente wat self as vroulik identifiseer, kan aansoek doen om voorgraadse toelating,” volgens die toelatingsbeleid. “Dit sluit in studente wat nie tydens hul geboorte aan die vroulike geslag toegewys is nie, maar leef en identifiseer as vroue ten tyde van die aansoek. Dit sluit ook studente in wat wettiglik aan die vroulike geslag toegewys is, maar wat as transgender of geslagsvloeibaar identifiseer.”

Vroue wat chirurgiese ingryping ondergaan het om manlik te word, word egter nie toegelaat nie.

“Studente wat aan die vroulike geslag by geboorte behoort het, en ‘n wettige geslagsverandering ondergaan het tot manlik voor die punt van aansoek, kom nie in aanmerking vir toelating nie,” volgens die kollege.

Maar ondanks sy benarde finansiële situasie het Mills besluit om selfs meer radikaal te word. Hulle het ‘n plan aangekondig om die huidige kurrikulum te herstruktureer om meer te fokus op “gender en rassegeregtigheid”.

Die nuwe kurrikulum – ‘n verlinkse onderwyservaring “genaamd MillsNext” – sal “studente voorsien van die gereedskap en vertroue om komplekse probleme op te los, oor verskille te kommunikeer en om aksies te skep wat daarop gemik is om hul gemeenskappe en die wêreld te transformeer,” het Inside Higher Ed. opgemerk.

In 1990, toe Mills met soortgelyke finansiële probleme gekonfronteer is, het ‘n poging om mans toe te laat gelei tot sowat 300 studente wat ‘n staking van twee weke geloods het, het die Associated Press destyds berig.

Boris Johnson waarsku teen ‘Russe wat inmeng’ terwyl sy party stemme verloor

Die Britse minister van buitelandse sake, Boris Johnson hits kiesers aan teen Rusland met bewerings dat Russe waarskynlik sal inmeng in die komende Britse algemene verkiesing.

Hy het vrese uitgespreek dat die Russiese president die vertroue in “demokrasie” sal ondermyn.

In die VSA en Frankryk het kandidate Clinton en Emmanuel Macron ook “Russiese inmenging” gebruik om hul huishoudelike politieke teenstanders swart te smeer, maar kon geen bewyse van sulke inmenging aanbied nie.

Johnson het weliswaar Vladimir Poetin openlik beskuldig dat hy die demokratiese proses verdraai het deur Emmanuel Macron se e-posse te kraak en openbaar te maak, voor Macron as president van Frankryk verkies is.

In ‘n onderhoud met The Telegraph-koerant, wat Saterdag gepubliseer is, het Johnson gesê president Poetin wil graag sien dat Jeremy Corbyn, leier van die Arbeidersparty, die verkiesing op 8 Junie wen.

Die Tory-voorsprong oor die Arbeid-opposisie in die aanloop tot die verkiesing het met nege punte gehaal, van 18 punte een week gelede, het die Sunday Times berig. Dit is veel minder as die 150-sitplek meerderheid wat moontlik was ‘n maand gelede toe die premier May die blitsverkiesing aangekondig het.

Op Vrydag is die Britse gesondheidsorgstelsel, geraak deur ‘n massiewe kuber-aanval wat sedertdien rekenaars in honderde banke, instellings en regeringsliggame in minstens 99 lande wêreldwyd geraak het.

Die aanvallers het ook Rusland geteiken, terwyl rekenaars van die Russiese ministerie van binnelandse sake ook gekraak is.

Die kraak van Macron se En Marche! veldtog deur onbekende partye – Johnson het geen bewyse vir sy aantygings teen Russe nie – voor sy oorwinning, het egter interessante materiaal opgelewer. Een stel lêers het die virtuele diefstal van Frankryk se toonaangewende inligtingstegnologiereus behandel. Dit het openbaar dat sekere individue met die Amerikaanse Sentrale Intelligensieagentskap verbind is.

As inspekteur van die Franse ministerie van ekonomie, is dit verstommend dat Macron nie bewus was van die Franse wette wat oortree is met die Amerikaanse oorname van Gemplus nie.

Die grootste Franse unie, “Confederation generale du travail” (CGT), het gesê die oorname van Gemplus het Frankryk van sy slimkaart-tegnologie-leierskap ontneem. Die maatskappy het ten minste 7000 Franse werkers in diens gehad voor die oorname deur die Amerikaners.

Migrante moet weggehou word van pro-immigrasie G7-leiers

Die leiers van G7-lande neem geen kanse met “vlugtelinge” wanneer dit hul eie veiligheid raak nie.

Smokkelbote wat migrante in die Middellandse See optel, word verbied om in Taormina waar die G7-byeenkoms op 26-27 Mei gehou word, anker te gooi.

Die riglyn van die Italiaanse Ministerie van Binnelandse Sake het gelei tot ‘n geleidelike afname in die aantal skepe wat by die hawens van Sicilië aanland, en sal lei tot die volledige sluiting van die hawens vanaf 22 tot 28 Mei.

Vrees dat migrante die veiligheid van wêreldleiers in gevaar sal stel, is deur die polisiehoof Franco Gabrielli geopper. Hy het gesê dat die Italiaanse veiligheidsdienste ‘n plan aangebied het om die veiligheid van die staatshoofde en die regerings wat tydens die beraad teenwoordig sal wees, te waarborg.

Die verbod op die aankoms van migrante sal vanaf Maandag in werking tree, terwyl leiers vergader om ekonomiese beleid te bespreek by die San Domenico Palace-hotel op die eiland. Die Libië-Italië-taxi wat deur NRO’s bedryf word om Europa te oorspoel van mense uit die Derde Wêreld, sal na ander hawens gerig word, wat volgens Dokters-Sonder-Grense (MSF) ‘n dag of twee tot die reis kan toevoeg.

Tommaso Fabbri, hoof van MSF Italië, het gesê hulle is bekommerd oor die migrante: “Ons is bekommerd omdat dit ‘n dag of twee by die seiltyd voeg.”

Migrantebote dok gereeld in Sicilië om gratis kos en mediese behandeling te ontvang voordat hulle na ander Italiaanse hawens vaar.

Migrante word ironies genoeg weggehou van die Duitse kanselier Angela Merkel wat ‘n oop grensbeleid met alle mag bevorder. Die res van Europa se kiesers moet daagliks met die risiko leef van migrante, maar anders as gewone mense sal die EU- en ander leiers nie aan dieselfde gevaar blootgestel word nie.

Die dorp sal vanaf 13 Mei afgesper word, met motors wat verbied is. Inwoners is woedend oor die ongerief maar waarskynlik dankbaar dat die toestroming tydelik gestaak sal word.

Amerikaanse Islam-deskundige in Ysland vergiftig

‘n Mediese verslag het bevestig dat die vooraanstaande Amerikaanse Islam-deskundige Robert Spencer in Ysland vergiftig is nadat hy ‘n toespraak oor Islam en die toekoms van Europese kultuur gegee het.

By die restaurant waar hy verlede Donderdag na die toespraak geëet het, is hy genader deur ‘n individu wat voorgegee het om ‘n ondersteuner te wees. Spencer het later op die individu se Facebook ontdek dat hy teenoorgestelde menings huldig.

Spencer het gesê dat hy sowat 15 minute later, toe hy terugkom na sy hotelkamer erg siek begin voel het, “Ek het gevoelloosheid in my gesig, hande en voete ervaar. Ek het begin bewe en braak. My hart het gevaarlik vinnig geklop. Ek het die nag in ‘n hospitaal in Reykjavik deurgebring.”

Die dokter het in sy verslag, gedateer 12 Mei, verklaar dat Spencer “positief getoets het vir amfetamien en MDMA”. Reykjavikse joernalis Hjálmar Friðriksson, het aan die media ‘n afskrif van Spencer se mediese verslag wat in Engels geskryf is, versprei.

‘n Oordosis MDMA, wat algemeen bekend staan as “ecstacy”, veroorsaak gewoonlik ‘n toename in hartklop. Spencer het aan die media gesê dat die dokter “probeer het om te onderspeel wat gebeur het,” maar die verslag verklaar duidelik dat hy met ‘n oordosis dwelms vergiftig is.

“Ek kan net vermoed dat die dokter geweet het wie ek was en nie wou hê ek moes die voorval gebruik om die Yslandse linkses sleg te laat lyk nie,” het Spencer aan WND gesê.

Spencer het al seminare oor Islam en die djihad aangebied vir die FBI, die Verenigde State se militêre hoofbevel, die Amerikaanse leërskommissie en die Algemene Personeelskollege, die Amerikaanse weermag se Asimmetriese Oorlogsgroep, die Gesamentlike Terrorisme Taakmag, die Departement van Justisie se Anti-Terrorisme Adviesraad en die Amerikaanse intelligensie gemeenskap.

‘n Jong Yslander het na hom gekom by ‘n restaurant en geweet het wie hy is, sy hand geskud en gesê hy is ‘n groot bewonderaar. Oomblikke later het ‘n ander Yslander na hom toe gekom en sy hand geskud en gesê, “Fok jou”. Spencer het besluit om daarna na die restaurant te verlaat.

“Maar die skade was reeds gedoen,” skryf hy. Die skrywer word gelys as een van die blitsverkoperouteurs van die New York Times.

“Ek was nie en is nie op enige soort medikasie nie, so daar is geen ander verduideliking van hoe hierdie dwelm in my bloedstroom gekom het nie,” het hy gesê. Die polisie ondersoek die voorval.

Ysland is ‘n klein land en Spencer se besoek het ‘n storm van verontwaardiging en demonisering in die Yslandse pers veroorsaak, alles gebaseer op Amerikaanse linkse “talking points”.

“Elke storie oor my besoek het dieselfde elemente gehad: die kennisgewing dat die SPLC [Southern Poverty Law Center] beweer dat ek ‘haatspraak’ pleeg, wat ‘n subjektiewe oordeel is, het hy gesê. Na die gebeurtenis het een artikel selfs ‘n groot foto van Anders Breivik gehad, maar het nooit een ding aangehaal wat Spencer gesê het nie.

Hy sê die “media-demonisering deur linkses wat van mens verskil, is direkte aanmoediging vir geweld. Deur my en ander uit te beeld wat regmatige vrae rakende djihadterreur en Sjariah-onderdrukking vra, as rassisties en Islamofobies, sonder om ons ‘n regverdige kans te gee, is die media in Ysland en elders in die Weste aktief besig om gevaar te skep vir diegene wat dit waag om te verskil”.

Wilders sê hy is steeds beskikbaar nadat koalisie-gesprekke in duie stort

Geert Wilders, die Nederlandse anti-immigrasiepolitikus, het gesê sy party is nog steeds beskikbaar nadat koalisiesprekke tussen die VVD se premier Mark Rutte en drie ander partye in mislukking geëindig het.

Een van die moontlike koalisievennote, GroenLinks, het geweier om hul belofte oor oopgrens-immigrasie te verbreek. Wilders het die ineenstorting “baie goeie nuus” in ‘n twiet genoem.

Edith Schippers, die uittredende minister van gesondheid wat die onderhandelinge gelei het, het aan verslaggewers gesê immigrasie was die mees verdelende kwessie. “Migrasie te moeilik om te oorbrug,” het sy gesê. “Ons kon nie ‘n gesamentlike basiese besluit bereik nie.”

GroenLinks, onder leiding van die 31-jarige Jesse Klaver, het ‘n veldtog gevoer vir ‘n meer vrygewige asielbeleid, ‘n baie ongewilde houding in die land.

Wilders, wie se party tweede gekom het, is heeltemal uitgesluit van die gesprekke. Sy PVV-party word geïgnoreer ten spyte daarvan dat hy die tweede grootste aantal setels in die parlement gewen het, omdat premier Mark Rutte en ander linkse partye geweier het om saam met hom te werk.

Onderhandelinge tussen liberale van die VVD, die Christen-Demokrate (CDA), die progressiewe Demokratiese Party (D66) en die ver-linkse GroenLinks het uiteindelik ná die weke van stryery oor immigrasiebeleid op niks uitgeloop nie.

Ander beleide, insluitende klimaatsverandering en inkomstevlakke, het ook tydens die gesprekke probleme veroorsaak, volgens Rutte. “Ons wou hê dit moet suksesvol wees, maar ons het nie geslaag nie. Ons het saam besluit dat dit net nie sou werk nie,” het hy gesê.

Rutte moet nou met die konserwatiewe Christelike Unie saamwerk om ‘n baie klein 76-setel meerderheid te verseker, maar Maandag se ineenstorting sal waarskynlik die vorming van ‘n regering vir maande vertraag.

Die CU het nie in die verkiesing setels bygekry nie, anders as die Groenes, maar hul arbeids- en belastinghervormingsbeleid sluit aan by dié van Rutte se liberales en die Christen-Demokrate.

Die Christelike Unie is egter konserwatief en Euroskepties, teen orgaanskenking en politieke integrasie in die eurosone.

GroenLinks het 20 distrikte gewen en is as noodsaaklik beskou om ‘n gemaklike 85 setel-voorsprong te verseker. “Ek is baie teleurgesteld,” het die CDA-leier, Sybrand Buma, gesê. “Die verskille tussen ons was te groot, veral in terme van immigrasie.”

Fopnuus? BBC reël fopdebatte vir Tory-leier

Die Britse regering het aangekondig dat premier Theresa May sal deelneem aan ‘n “lewendige” uitsending van ‘n TV-verkiesingsprogram, maar dit sal nie ‘n debat met die leier van die Arbeidersparty, Jeremy Corbyn, behels nie.

Daar sal niks spontaan wees aan May se verskyning nie.

May sal uitgenooi word na die spesiale uitgawe wat die sogenaamde leiersdebat op 2 Junie sal vervang.

Die BBC het ‘n onafhanklike private produksiemaatskappy gekontrakteer en beweer nou dat hulle nie verantwoordelik is vir die reëlings waar die vrae aan May vooraf deur haar personeel goedgekeur sal word nie en May sal vooraf oor die vrae ingelig word.

‘n Lid van die publiek het die BBC gekontak vir bevestiging van dié klugspel en ‘n antwoord van die BBC ontvang waarin die uitsaaier verduidelik dat die program gekoop word deur die BBC van die onafhanklike maatskappy en hulle nie besluitnemingsmag het nie.

Die eerste minister sal dus vrae beantwoord van lede wat in die ateljeegehoor geplant is tydens die spesiale program wat vroeg in Junie aangebied sal word. Alhoewel ‘n peiling vir The Independent bevind het dat ‘n meerderheid van die Britse publiek wil hê dat die leiers direk debat moet voer met mekaar in lewendige televisie-debatte, gaan ‘n formaat gebruik word om May af te skerm van die kiesers.

May is gekritiseer nadat sy geweier het om aan ‘n werklike debat deel te neem. Mededingers beskuldig haar daarvan dat sy “bang” is vir moeilike vrae van Arbeid, Skotse nasionaliste en natuurlik UKIP wat haar kan uitdaag oor Brexit en immigrasie.

Ten spyte van die uitroepe van Liberale Demokrate, Arbeid en SNP teen Brexit, het steun vir die verlaters in Brittanje toegeneem. Slegs 22 persent van die kiesers wil in die EU bly of Brexit blokkeer, met sowat 68 persent wat die implementering van die referendum ondersteun. May was een van diegene wat in die EU wou bly.

Maar kiesers wat die uitslag van die referendum ignoreer, is vinnig besig om ‘n krimpende randeiergroepie te word.

Debatte met ander junior figure van die belangrikste partye, insluitend die Tories en Arbeid, sal wel plaasvind voor die komende verkiesing, maar May sal beskerm word teen werklike vrae, ‘n werklike debat en om met haar kiesers gekonfronteer word.

David Dimbleby sal die program aanbied waarvolgens gehoorvrae noukeurig gekies word, terwyl die nasionale uitsaaier saamspeel met die klug.

Die Pakistanse gasheer Mishal Husain sal op 31 Mei ‘n debat modereer met verteenwoordigers van die Konserwatiewes, Arbeiders, Liberale, SNP, Plaid Cymru, Groen Party en UKIP. Op 4 Junie sal die liberaal-demokratiese leier Tim Farron die SNP se Nicola Sturgeon aanvat.

Die verkiesing in die Verenigde Koninkryk van 2017 is geskeduleer om op 8 Junie 2017 plaas te vind. ‘n Verkiesing was nie tot 7 Mei 2020 verwag nie, maar ‘n oproep tot ‘n vervroegde verkiesing in Mei het die nodige twee-derde meerderheid ontvang van 522 teen 13 stemme op 19 April 2017.

“In al haar onlangse onderhoude en toesprake is dit feitlik onmoontlik om iets interessants oor mev. May te ontdek,” sê Alison Phillips, in ‘n opiniestuk vir The Mirror. “Trouens, dit is moeilik om enige iets te ontdek.”

Phillips sê May is ‘n onbeskaamde opportunis sonder enige politieke oortuigings. “Omdat Theresa May soos ‘n pateet wat ‘n grappige das dra is, wat vasklou aan die oortuiging dat ‘n snaakse kledingstuk ‘n totale afwesigheid van persoonlikheid kan wegsteek.”

May is basies net bekend vir haar vreemde smaak in klere. Brittanje se leier het voorheen gesê: “Kookboeke beteken vir my baie.”

Duitse stad onteien privaatwonings vir migrante

Die Duitse owerhede in Hamburg het ses residensiële eenhede in die Hamm-distrik naby die middestad gekonfiskeer in wat as ‘n ernstige ingryping in eiendomsreg beskryf kan word.

Dit bly onduidelik waarom niemand die grondwetlikheid van die onteiening van die eiendom uitgedaag het nie, aangesien owerhede begin het om privaat wonings op te eis teen die wil van die eienaar.

Boonop sal ‘n trustee deur die tweede grootste stad in Duitsland aangestel word om die eiendomme op te knap om dit aan “vlugtelinge” te verhuur, terwyl alle opknapping teen die eienaar se koste gedoen sal word. Die wonings in Hamm staan sedert 2012 leeg.

Die tekort aan behuising het ontstaan deur kanselier Angela Merkel se besluit om binne ‘n kort tyd die grense vir meer as twee miljoen migrante oop te maak.

Stadsamptenare het reeds op kommersiële eiendomme beslag gelê en hulle sedert laat 2015 in migrantskuilings begin omskep. Op 1 Oktober 2015 het die stadsraad van Hamburg ‘n nuwe wet goedgekeur wat die stad toelaat om onbeboude kommersiële eiendomme te koop – kantoorgeboue sowel as grond – en te gebruik om migrante te huisves. Maar nou het hulle tot die stap oorgegaan om privaat eiendomme ook te konfiskeer.

Toe Merkel miljoene uit Afrika, Asië en die Midde-Ooste ingenooi het, het die behuisingsprobleem akuut geword. Meer as 400 nuwe migrante kom elke dag in Hamburg aan en al die bestaande vlugtelingskuilings is vol.

Die behuisingskrisis is egter deur die stad self vererger. ‘n Studie wat in 2012 gedoen is, het voorspel dat teen 2017 sal daar ‘n tekort van minstens 50 000 huur eiendomme wees. Die regering het ‘n plan aangebied om 6 000 nuwe residensiële eenhede per jaar te bou, maar die plan het nooit van die grond gekom nie omdat voornemende bouers deur regering-opgelegde huurgeld verhinder is, wat dit onmoontlik gemaak het om selfs net hul konstruksiekoste te verhaal.

Sedertdien het die stad beslag gelê op private eiendom om sy behuisingstekort op te los. Aangesien die eienaars van onbeboude eiendomme weier om hul eiendomme op vrywillige grondslag aan die stad beskikbaar te stel, word daar bloot beslag gelê op die wonings.

Die maatreël is natuurlik verwelkom deur links en ver-links. “Ons doen alles wat ons kan om te verseker dat die vlugtelinge nie in die komende winter dakloos is nie,” het senator Till Steffen van die Groen Party voorheen gesê. “Om hierdie rede moet ons vakante kommersiële eiendomme gebruik.”

“Die voorgestelde konfiskering van privaat grond en geboue is ‘n massiewe aanval op die eiendomsreg van die burgers van Hamburg,” het André Trepoll van die Christen-Demokratiese Unie (CDU) gesê en bygevoeg dat die doelwitte die middele nie regverdig het nie. “Dit is ‘n onteiening deur die staat.” Hy het die maatreël ‘n “intimidasiewet” genoem wat ‘n “politieke dambreuk met verreikende implikasies” tot gevolg het.

Katja Suding, die leier van die Vrye Demokrate in Hamburg, het gesê die voorgestelde wet is ‘n “onaanvaarbare oorsteek van rooi lyne. Sulke dwangmaatreëls sal slegs woede teen vlugtelinge veroorsaak.”

Soortgelyke onteieningsmaatreëls is in Berlyn, die Duitse hoofstad, voorgestel, maar nie geslaag nie omdat hulle ongrondwetlik geag word.

Christiana Kant, wat van die vlugteling-behuising in Hamburg koördineer, het aan die BBC gesê dat die blote getalle van die instroming ‘n groot logistieke probleem is. “Ons huisves mense in supermarkte, in ‘n tennissaal, net om ‘n dak oor hul koppe te kry,” het sy gesê.

Sal Duitse owerhede die maksimum hoeveelheid leefruimte per persoon beperk en diegene met groot woonstelle dwing om dit met vreemdelinge te deel?

Amerikaanse linkses is ‘onvoorspelbaar en op soek na identiteit’

Militêre historikus Victor Davis Hanson het aan die Daily Caller gesê dat daar ‘n “groot leuen” rondom “Russiese samespanning” is wat deur Demokrate en die media bevorder word.

In ‘n eksklusiewe onderhoud met die Daily Caller News Foundation, het hy voorgestel dat president Barack Obama gekonfronteer is met identiteitspolitiek en “die blou muur van die Demokrate het verkrummel,” en werkende mense teen die party gedraai. “Russiese bemoeiing” is toe gebruik om hul verkiesingsverlies te verduidelik.

Hy het Demokratiese leiers “afgeleef” genoem en jonger Demokratiese ondersteuners “onvoorspelbaar en op soek na ‘n identiteit”. Voormalige president Bill Clinton en Hillary Clinton was meer in die Russiese politiek betrokke as die meeste Republikeine, het Hanson gesê.

Toe die “groot leuen” van Russiese samespanning in die afgelope Amerikaanse presidentsverkiesing deur invloedryke Demokrate herhaal is, is twyfel gesaai en gerugte sonder bewyse versprei, maar nuwe verrassende bewyse van Obama se misdadige optrede teen Trump-ondersteuners sal oor die volgende ses maande rugbaar raak, het Hanson voorspel.

Eerder as om oplossings te vind om die kiesers van die werkersklas na die Demokratiese Party te lok, voorspel Hanson dat hulle ras, klas en geslag sal moet gebruik, asook klimaatsverandering en ander foefies wat deur Hollywood en die radikale elite uitgedink word.

Hanson het ook die opspraakwekkende en groeiende onverdraagsaamheid en kinderagtigheid op Amerikaanse kampusse bespreek, waar sprekers met verskillende sienings deurlopend verban en stilgemaak word deur linkses.

Oor aangeleenthede van identiteitspolitiek het Republikeine dikwels probeer om links te probeer lyk, en nie aktief teen rasse-, etniese en geslagsdrukgroepe opgetree nie. Die strategie was om minderhede nie teen te gaan nie in die hoop om ‘n groter deel van hul stemme te trek.

Daarom beweer Hanson dat die instelling van die Republikeinse Party in ‘n eksistensiële paradoks vasgevang bly, want sonder Donald Trump se pro-wit en nasionalistiese 2016-veldtog sou die GOP waarskynlik nie die verkiesing gewen het nie.

Trump glo dat 3 persent BBP-groei in die VSA en geen groot oorlog in die buiteland nie, ‘n ekonomiese nasionalisme kan bevorder om die hoofstroom “vryemark” -republikanisme te vervang.

Maar as die ekonomie traag bly of ‘n konflik ontwikkel in die buiteland, sal Trump sukkel om sy momentum te behou.

Wêreldwye kuberaanval

Naastenby 100 lande is geraak deur ‘n massiewe kuberaanval
(heel moontlik die grootste nóg). Dit is gedoen met behulp van
programmatuur genaamd “Eternal Blue” wat deur die Amerikaanse Nasionale Sekuriteitsagentskap (NSA) ontwikkel is, maar laas maand uitgelek is deur ‘n groep met die naam “Shadow Brokers”.

Die kuberkrakers het ‘n lospryswurm (ransomware worm) wat self
versprei op die internet losgelaat. Dit veroorsaak enkripsie van
slagoffers se data, en hulle moet dan ‘n losprys van soveel as R8000
betaal om weer toegang daartoe te verkry.

Vrydag is die internasionale verskepingsmaatskappy FedEx en die
Britse gesondheidsstelsel hierdeur ontwrig, in so ‘n mate dat Britse
hospitale en klinieke pasiënte moes wegwys. Antivirusprogrammatuurontwikkelaars het Vrydag berig oor tot 57 000 infeksies in 99 lande. Rusland, die Oekraïne en Taiwan was die topteikens.

Kinderlose leiers stuur Europa

Drie wêreldleiers het nou die onderskeiding behaal om op ‘n historiese tyd in Europa kinderloos te wees.

Emmanuel Macron is die nuwe president van Frankryk, en die 39-jarige, wat geen eie kinders het nie, het verbysterend die tweede rondte van die presidensiële verkiesing in Frankryk gewen sonder ‘n party om hom te ondersteun.

Die Duitse kanselier Angela Merkel en die Britse premier Theresa May is ook kinderloos terwyl hulle lewensbelangrike besluite oor die toekoms van hul lande moet neem.

Die opkoms in Frankryk was die laagste ooit in meer as 40 jaar by die stembus. Byna een derde van die kiesers het nie Macron of Le Pen gekies nie, met 12 miljoen wat nie gestem het nie en 4,2 miljoen bederfde stembriewe. Dit is dus opmerklik dat meer as 16 miljoen Franse kiesers hul stemme teen die 20 miljoen uitgebring het wat vir Macron gekies het.

Marine Le Pen het ‘n rekord van bykans 11 miljoen stemme vir Front National van die 47.5 miljoen geregistreerde kiesers getrek, waarvan die meeste jonk is. Dit beteken dat 27 miljoen Franse kiesers, meer as die helfte, inderdaad Macron verwerp het.

Ten spyte daarvan is pro-euro-ondersteuners verheug. Maar is daar regtig ‘n rede om te juig? Die drie belangrikste leiers ly duidelik aan korttermynvisie.

Volgens die Institut de Recherches Economiques et Fiscales in die eerste rondte van die presidensiële verkiesing het 55 persent van die kiesers ‘n Sosialistiese kollektiwitiese beleid gesteun. Met ander woorde: Meer as die helfte van die Franse kiesers wil hê Frankryk en Europa moet wegbeweeg van ‘n vrye markekonomie.

In die tweede rondte het die Franse grootliks Macron gekies om te voorkom dat Le Pen president word, en nie as gevolg van Macron se voorgestelde beleid nie. Maar dit kan binnekort verander.

Sy politieke beweging En marche! het geen basis in Frankryk se laer parlementshuis nie, en amper niks is bekend oor sy ekonomiese siening nie, behalwe sy steun vir ‘n Keynesiese ekonomiese beleid. Die gay en kinderlose Britse ekonoom John Maynard Keynes het in die middel van die twintigste eeu so gewild geword dat ‘n hele skool van moderne denke sy naam dra.

Die Europese Sentrale Bank se ywerige elektroniese drukpers wat state en banke befonds, het gelei tot herverdeling van inkomste en rykdom.

Die Duitse regering is senuweeagtig oor Macron se eurosone-agenda, hoewel Emmanuel Macron tydens die verkiesingsveldtog bo Le Pen verkies is.

Soos die Duitse koerant FAZ opgemerk het, weeg die verligting oor sy oorwinning nog swaarder as die realiteit – dit is dat Macron en Angela Merkel totaal verskillende standpunte oor die toekoms van die eurosone huldig. Merkel het reeds gesê dat die eurosone-effekte nie ‘n opsie is nie.

Die FAZ-artikel praat van Zumutungen, wat ‘n buitensporige en immorele eis van Frankryk op ‘n fiskale vlak beteken wat Duitsland nie naastenby kan nakom nie.

Die artikel wys daarop dat Macron se idees verder gaan as dié van voormalige president Francois Hollande.

FAZ is ontsteld, sowel as deur Macron se idee van ‘n wet om slegs Europees te koop. Die koerant het opgemerk dat die ministers van die eurosone, tydens hul vergadering in Malta, soortgelyke idees gekritiseer het deur die Europese Kommissie, het Eurointelligence berig.

Arbeidshervormings, soortgelyk aan dié wat Macron nou voorgestel het, was veral traumaties vir die uitgaande Hollande-regering. Ure ná die oorwinning van Macron het radikale vakbondlede alreeds die strate ingevaar, terwyl die meer versigtiges waarsku teen die implementering van die hele Macron-agenda.

Die verkiesing van die 577 afgevaardigdes vind plaas op 11 en 18 Junie. Terwyl Macron sy land met globalisering wil versoen, sal die ekonomiese veranderinge wat hy voorgestel het, sterk weerstand uitlok.

Vyftien jaar gelede het die eurosone se twee grootste lande, Frankryk en Duitsland, vergelykbare lewensstandaarde geniet. Vandag is Duitsland s’n sowat ‘n vyfde hoër as dié in Frankryk. En toe euro’s en munte in 2002 bekendgestel is, was die Franse en Duitse werkloosheidsyfer ongeveer 8 persent.

Vandag staan Duitsland se werkloosheidsyfer onder 4 persent terwyl die Franse werkloosheid sowat 10 persent is en nader aan ‘n kwart van alle jongmense.

#MacronLeaks te laat om uitslag van Franse verkiesing te beïnvloed

Dit was die hoogste vlak van geen belangstelling in die tweede rondte nie van ‘n verkiesing sedert 1969 in Frankryk, aangesien baie kiesers besluit het om weg te bly van die stembus, wat aan Emmanuel Macron die oorwinning oorhandig het. ‘n Massiewe inligtingskraak kon nie die uitkoms verander nie.

Macron het die presidensiële verkiesing gewen met 65 persent van die stemme teen Marine Le Pen. Sowat 10 persent van die stembriewe was leeg, twee tot drie keer meer as die gewone aantal.

Dit beteken dat minder as die helfte van die Franse vir Macron gestem het, maar ‘n verdeelde opposisie het aan hom die oorwinning besorg.

Le Pen het Macron in ‘n telefoonoproep gelukgewens en het belowe om sy vernaamste opposisie te bly. Le Pen het aan ondersteuners gesê tydens ‘n byeenkoms buite Parys. “Ek wens hom sukses toe met groot uitdagings”. Sy het bygevoeg dat die “Franse ‘n nuwe president verkies het en gekies het vir kontinuïteit”.

Die jongste president wat ooit in die land verkies is, was in sy oorwinningsrede kleinlik en giftig en het sy mededinger se party “ekstreem” genoem. Hy het Le Pen weer probeer beledig: “Ek weet hoekom mense verkies het om vir ‘n ekstremistiese party te stem.”

“Van môre af sal ons die politiek moderniseer, pluralisme herken, demokrasie laat herleef. Dit sal my eerste missie wees om almal te respekteer,” het Macron verklaar. By nadere ondersoek is die hele sin blote leë retoriek sonder inhoud.

Hy het belowe dat die premier en die regering na die inhuldiging wat voor 14 Mei geskeduleer is, aangewys sal word.

AFP het met Frankryk se president gepraat ná die uitslae bekend gemaak is. Macron het gesê: “‘n Nuwe blaadjie is omgeblaai, dié van hoop en herstel van vertroue.”

Die globaliste was verheug oor die uitslag: die Franse president François Hollande, die voormalige premier Manuel Valls, die Duitse kanselier Angela Merkel, die Britse PM Theresa, het alreeds Frankryk se president geloof.

Deur die keuse van Macron het die Franse teen die “tirannie” van “fopnuus” gestem, het die Europese Raad se Donald Tusk, gister gesê.

President Trump het ook vir Macron gelukgewens met sy groot oorwinning en getwiet dat hy “baie uitsien het om saam met hom te werk”.

Intussen het WikiLeaks getwiet dat hulle “nog nie foute in #MacronLeaks ontdek het nie” en bygevoeg dat hulle “baie skepties is dat die Macron-veldtog vinniger as ons is” om fopdokumente uit te wys.

Die kraak #MacroLeaks het onthul dat Macron op ‘n gay-poslys is, sy top-adviseurs koop dwelms aanlyn, ook vir die “baas” en dat vroue in sy veldtog baie minder betaal word as die Franse gemiddelde. Hy steek ook glo geld in die buiteland weg.

In een gelekte dokument het Macron se senior veldtoglid, Alain Tourret, ‘n ontwerperdwelm bestel met behulp van Bitcoin om die aankoop weg te steek. Die dwelm MMC-3 word deur die Franse regering in dieselfde kategorie as heroïne en kokaïen geklassifiseer. Hy het die pakket laat stuur na ‘n regeringsadres.

‘n Boekhouer in Macron se veldtog was geskok om te ontdek dat hulle veldtog se partytjies deur Rothschild Bank betaal word. ‘n Skermskoot uit haar e-posse is deur #MacronLeaks vrygestel en is deur WikiLeaks bevestig as ‘n geverifieerde dokument.

Volgens #MacronLeaks is die nuwe president van Frankryk op die poslys van VestiareGay, ‘n maatskappy wat fetisjitiese homoseksuele onderklere verkoop. Maar die lek het te laat gekom om die uitslag te beïnvloed.

Die Franse Commission Nationale de Contrôle de la Campagne Électorale het joernaliste gewaarsku om nie oor die inhoud van die gekraakte e-posse te rapporteer nie en selfs gewaarsku dat diegene wat die inligting versprei kriminele strawwe in die gesig staar.

Italiaanse aanklaer sê smokkelaars en liefdadigheid het migrasie krisis geskep

Volgens die vlugtelinge-agentskap van die Verenigde Nasies (UNHCR) het sowat 182 000 migrante in 2016, nog ‘n rekordjaar, Italië binnegedring omdat ‘n Italiaanse aanklaer sê mensehandelaars werk nóú saam met NRO’s om die krisis te skep.

Hierdie syfer sluit slegs diegene wat amptelik geregistreer is deur Italiaanse amptenare of NRO’s en nie die massiewe golf van immigrante wat onwettige toegang verkry het nie.

Die oorgrote meerderheid van buitelanders in die EU is onwettige, ongedokumenteerde immigrante, want in 2016 is slegs 2,65 persent van die immigrante in Italië asiel as vlugtelinge toegeken, oftewel 4 808 gevalle.

Die leier van die Noordelike Liga, ‘n nasionalistiese politieke party, Matteo Salvini, het aangekondig dat hy ‘n saak teen regeringsleiers sal bring vir die bevordering van onwettige immigrasie in die land.

“Dit is nou duidelik dat onwettige immigrasie georganiseer en gefinansier word. Daarom het ons besluit om ‘n saak teen die regering, die president van die Raad, die ministers en die bevelhebbers van die vloot en die kuswag aanhangig te maak,” het Salvini gesê.

‘n Beroemde Italiaanse aanklaer het die regering in die openbaar beskuldig dat hulle “mensehandelaars help” om die land se ekonomie te ondermyn. Carmelo Zuccaro, het aan Rai 3, ‘n staatsbeheerde TV-kanaal, gesê dat nie-regeringsorganisasies met hul soek-en-redding-sendings onwettige immigrasie uit Libië aanmoedig.

Zuccaro is ‘n swaargewig in Italië, wat georganiseerde misdaad daadwerklik bestry. Hy het van Italië se mees berugte Mafia-misdadigers lewenslank tronk toe gestuur, ‘n dapper daad te midde van doodsbedreigings, moorde op sy kollegas asook sy familie.

Zuccaro het in ‘n onderhoud met die koerant La Repubblica Vrydag gesê die bewerings het van geloofwaardige bronne gekom en het politici aangespoor om dadelik op te tree. Salvini het Zuccaro geprys en gesê dat NRO-werknemers wat betrokke is by die soek-en-reddingsdienste “gearresteer moet word” en hul skepe “gesink” moet word.

Verlede jaar het Salvini gekla dat die dele van Italië se mees bevolkte stad “nie Italië of Europa meer is nie” as gevolg van die “georganiseerde inval” in Milaan. “Ek het vanoggend in Milaan geloop, en sommige dele van die stad is nie Italië of Europa nie. Dit word heeltemal beheer deur immigrante.

“Die probleem is om ‘n georganiseerde inval wat die etniese suiwering van Italianers en Europeërs veroorsaak, te stuit. In ‘n jaar sal ons praat oor honderde duisende mense wat aankom.”

Die helfte van die immigrante wat in Italië aangekom het, sowat 90 000, het nooit om asiel gevra nie, en het as ongedokumenteerde immigrante verdwyn, wat in Italiaans as “clandestini” bekend staan.

Ten spyte van die feit dat die oorgrote meerderheid immigrante in Italië asiel geweier is, is minder as 5 000 in 2016 gedeporteer.

Die eerste kwartaal van 2017 het ‘n toename van 30 persent in instromers getoon vergeleke met dieselfde tydperk in 2016. Italië het in ‘n enkele naweek meer as 8 500 migrante oor Paasfees ontvang.

Meer as 140 000 immigrante is verlede jaar in Italiaanse skuilings gehuisves, ‘n sewevoudige toename van 2013, met die immigrantekrisis nou in sy derde jaar.

Intussen het ‘n ekonomieprofessor in Duitsland bevestig dat twee derdes van vlugtelinge wat in die EU aankom, ongeletterd is, sonder die vermoë om werk te vind en sodoende die land se ekonomie saboteer.

Ludger Woessmann, ‘n professor in ekonomie aan die Universiteit van München, het aan die Duitse tydskrif Zeit gesê 65 persent van Siriese vlugtelinge is ver onder internasionale standaarde wat basiese lees- en skryfvaardighede betref, en kan werkloosheidskoerse deur die dak dwing asook die vraag na maatskaplike welsynstoelaes.

“Met twee-derdes as funksioneel ongeletterd beskou in ooreenstemming met internasionale onderwysstandaarde, is dit die nodige opleiding om plaaslike besighede te bestuur wat meestal ontbreek,” sê Woessmann.

“Ons moet onsself voorberei dat die meerderheid jong vlugtelinge sal misluk in hul drie jaar opleidingskursusse wat ‘n hoë vlak van teorie bevat,” sê Woessmann. “Sewentig persent van die vlugtelinge uit Sirië, Afghanistan en Irak wat twee jaar gelede begin het, het reeds uitgeval.”

Die berig wat u hier gelees het is uniek in Afrikaans. Dit is spesiaal nagevors vir PRAAG wat die nasionalistiese tendense in Europa ten nouste volg. Help ons asseblief om dit vol te hou deur aan te sluit!