Kategorie: Internasionale nuus

Nuus oor die wêreld buite Suider-Afrika

Apple weier FBI toegang tot terroris se foon

Verlede jaar se dodelike aanvalle in Parys “sou nie gebeur het” sonder die gebruik van geïnkripteerde kommunikasie om die skuldiges in staat te stel om opsporing te vermy nie, het die Amerikaanse NSA-hoof onlangs in ‘n onderhoud verklaar.

Die National Security Agency se direkteur Michael Rogers is Woensdag aangehaal in ‘n Yahoo-verslag waarin hy gerugte bevestig het oor die gebruik van enkripsie in die November-slagting op die strate van Parys deur ondersteuners van die Islamitiese staat.

Sowat 130 mense is in die aanvalle vermoor.

Rogers het aan Yahoo gesê dat “van die kommunikasie” van die Parys-aanvallers “was geïnkripteer” wat intelligensie-amptenare se pogings belemmer het.

As gevolg hiervan, kon hulle nie “vroegtydig optree en verhoed dat Parys gebeur nie”.

Rogers, wat verlede week kommentaar oor die aanvalle gelewer het, het aangesluit by wetstoepassingsbeamptes wat waarsku oor die gevare van nuwe geïnkripteerde toestelle.

Dit maak die opsporing van terroriste moeilik, indien nie onmoontlik nie, sê hy.

Die verslag kom kort nadat Apple geweier het in ‘n Amerikaanse hof om hulp aan die FBI te verskaf.

Die saak spruit voort uit die feit dat ‘n iPhone gebruik is in die aanvalle in San Bernardino, Kalifornië, wat ‘n nuwe front in die koderingsdebat geopen het.

Rogers het gesê hy ondersteun die gebruik van enkripsie vir aanlynsekuriteit, maar het gewaarsku oor die gebruik van toestelle wat nie kan ontsyfer kan word nie.

Die Withuis se woordvoerder Josh Earnest het gesê die FBI het gevra vir toegang tot ‘n enkele toestel, nie alle toestelle nie.

Die Republikeinse voorloper Donald Trump het Apple berispe vir hul gebrek aan samewerking.

“Ek stem 100% met die howe saam… Wie dink hulle [Apple] is hulle? Hulle moet dit oopstel,” het Donald Trump Woensdag aan Fox News gesê.

Brexit kan EU in krisis dompel

Die Britse eerste minister, David Cameron het ‘n vergadering met die Europese Parlement se president, Martin Schulz en ander lede van die EU-parlement bygewoon om oor Brittanje se standpunte rakende Brexit te onderhandel.

Brittanje­ sal ‘n referendum hou of dit in die EU wil bly of wil onttrek, indien Cameron nie sy sin kry nie.

Maar Duitsland en Frankryk het gemaan dat Brittanje negatief geraak sal word as die premier nie Europa se wense in ag neem nie.

Van die 700 Europese maatskappye in Brittanje het ‘n derde aangedui dat hulle die VK dadelik sal verlaat met Brexit.

Volgens Le Monde staar die EU ‘n krisis in die gesig, selfs al besluit die VK om in te stem tot die EU-beleid.

‘n Peiling deur die Duitse Bertelsmann-stigting toon ‘n sterk pro-EU sentiment oor die hele sakegemeenskap, maar volgens die jongste meningspeiling sal 45 persent Britte stem dat die land die Europese Unie verlaat.

Slegs 36% wil in die EU bly en negentien persent is onseker.

Cameron het vroeër vandeesweek sy planne uiteengesit om die land se bande met die Europese Unie te heroorweeg.

Hy het sy voorstelle tydens die EU-beraad aan leiers voorgelê. ‘n Referendum word vir Junie in Brittanje beplan oor voortgesette lidmaatskap van die Europese Unie.

Konsepvoorstelle is reeds bekend gemaak om die land te oorreed om binne die EU te bly.

Van die voorstelle sluit in dat Brittanje nie betrokke hoef te wees by ‘n nouer verbintenis met die EU nie en dat welsyntoelae aan werkers van ander EU-lande opgeskort kan word.

Die Britse minister van finansies, George Osborne het vroeër gesê hy hoop ander EU-lande sal tot die planne instem, maar vier Oos-Europese lande het reeds die voorstelle verwerp.

Pole, Tsjeggië, Slowakye en Hongarye wil nie instem tot die beperkte toelaes vir werkers nie.

SAR hoop op vrede

Verkiesingsbeamptes het begin om die stemme te tel nadat kiesers in die Sentraal-Afrikaanse Republiek in verkiesings wat eers uitgestel is, vir die wetgewende liggaam en die president gestem het.

Die hoop is uitgespreek dat ’n einde aan die ergste sektariese geweld sedert die land se onafhanklikwording in 1960 nou gemaak sal word, het AFP berig.

Die stemmery het onder streng veiligheidsmaatreëls plaasgevind met duisende vredesbewaarders van die Verenigde Nasies wat landwyd ­ontplooi is. Sover vasgestel kon word, het die verkiesings vreed­saam verloop.

Die eerste amptelike uitslae word nie vir etlike dae verwag nie.

Anicet Georges Dologuele, ’n 58-jarige voormalige bankier van die sentrale bank, wat as “Mnr. Skoon” bekend staan vir sy pogings om deursigtigheid in die deurmekaar openbare finansies teweeg te bring, het in die eerste ronde van die presidentsverkiesing op 30 Desember 23,78 persent van die stemme op hom verenig.

Sy naaste teenstaander, Faustin Archange Touadera, ’n voormalige wiskunde professor, ook 58 jaar oud, wat as ’n onafhanklike kandidaat gestaan het, het vir ’n verrassing gesorg en 19,4 persent van die stemme ingepalm.

Kiesers het ook in ’n herverkiesing vir die wetgewende vergadering gestem nadat die aanvanklike verkiesing, wat ook op 30 Desember gehou is, ongeldig verklaar is ná talle onreël­matighede aan die lig gekom het.

Altesaam 1 800 kandidate ding mee om 105 setels in die Nasionale Vergadering.

Die Sentraal-Afrikaanse Republiek se mees onlangse bloedvergieting is begin nadat die bewind van die ­veteraanpresident, Francois Bozize, ’n Christen, in Maart 2013 deur hoofsaaklik Moslem Seleka-­rebelle omvergewerp is.

Die staatsgreep het ’n reeks vergeldingsaanvalle deur Christen “anti-balaka” (anti-kapmes) milisies en Moslem-rebelle meegebring. Duisende mense is dood en ongeveer ’n tiende van die land se 4,8 miljoen inwoners, het op die vlug geslaan.

Sowel Dologuele as Touadera is Christene.

Russiese premier sê Navo wil nuwe Koue Oorlog hê

Die Russiese premier, Dmitri Medwedef, het Saterdag gesê ‘n nuwe Koue Oorlog met die VSA en dié se bondgenote dreig.

Dit was ‘n bedekte hou in die rigting van die VSA wat steeds ‘n oplossing in Sirië bemoeilik.

Hy sê die spanning duur voort vanweë die konflik in Oekraïne, Rusland se ondersteuning van die Siriese regering en wat hy noem ‘n onvriendelike Navo-beleid teenoor Rusland.

Medwedef het ‘n veiligheidskonferensie in München in Duitsland toegespreek. Hy het Navo en die Europese Unie ook gekritiseer vir hul betrokkenheid in Oos-Europa in weerwil van beloftes tot die teendeel.

Die sekretaris-generaal van Navo, Jens Stoltenberg sê Rusland, die Verenigde State en ander nasies moet voortgaan om te fokus op hul doelwitte in Sirië.

Die VSA sal glo Awacs-vliegtuie stuur omdat enige direkte ingryping op die grond heeltemal uitgesluit is, sê waarnemers.

Die sterk moontlikheid bestaan dat die VSA “gematigde rebelle” dus slegs indirek sal ondersteun dmv ‘n Arabiese invalsmag om Sirië te probeer verdeel in ‘n oostelike sowel as ‘n westelike deel.

Só ‘n stap sal Turkye en Saoedi-Arabië dwing om alleen verantwoordelikheid vir hul troepe in Sirië te aanvaar, sonder direkte Amerikaanse ingryping.

Stoltenberg het gesê bomaanvalle teen opposisiegroepe in Sirië wat die regering tot ‘n val wil bring, moet tot ‘n einde kom en ‘n ooreenkoms bereik word.

Stoltenberg het by die Veiligheidskonferensie in München teruggeval op die supermoontheid-retoriek van die vorige eeu, en gesê Rusland gebruik sy kernarsenaal om Europa te intimideer.

Rusland, Europa en die VSA sê hulle poog om ’n einde aan die Siriese ­konflik te bring, die spanning in die ooste van die Oekraïne te verlig en saam te werk om Europese ­ekonomiese sanksies teen Rusland te lig.

“Maar Navo se politieke houding teenoor Rusland bly maar onvriendelik en geslote,” het Medwedef in sy toespraak gesê. “Ek kan dit nie sterker stel nie: Ons is nou in die era van ’n nuwe Koue Oorlog.”

Jens Stoltenberg, sekretaris-generaal van Navo, het in sy toespraak gesê die Russiese president, Wladimir Poetin, moet ophou om lande wat aan sy land grens met sy kernwapens te dreig, maar nie kommentaar gelewer op die feit dat die VSA wapens en troepe mobiliseer dmv Navo nie.

Die VSA het reeds elke belofte om Navo nie uit te brei na voormalige Warskou-verdraglande nie, gebreek.

In Genève het Rusland en die Verenigde State egter vroeër ooreengekom dat enige skietstilstand nie jihadiste en hul bondgenote sal insluit nie, in ‘n poging om Siriese opposisiegroepe wat hulself nie wil losmaak van al-Qaeda en ISIS nie, as wettige teikens te maak.

Onluste ontsier Chinese Nuwejaar in Hong Kong

Beijing se verteenwoordigers in Hong Kong het radikale onafhanklikheidsvoorstanders die skuld gegee vir onluste wat uitgebreek het in die voormalige Britse kolonie byna ‘n week gelede.

Dit is die ergste geweld sedert anti-Chinese betogings dele van die Asiatiese finansiële sentrum in 2014 verlam het.

Meer as sestig mense is in hegtenis geneem in verband met die geweld, waartydens betogers die polisie met klippe bestook het en vullisdromme in Mong Kok aan die brand gesteek het.

Dit is ‘n rowwe, werkersklaswoonbuurt net oorkant die hawe van die finansiële distrik.

Die polisie het waarskuwingskote geskiet tydens die oproerigheid wat uitgebreek het toe die owerheid probeer het om onwettige straatsmouse te verwyder vir die viering van die Chinese Nuwejaar.

Oproeriges het bakstene uit die plaveisel losgemaak en na die polisie gegooi en ander het straatborde gevandaliseer.

Sowat 90 mense is beseer en 61 betogers is in hegtenis geneem, het Lo Wai-chung, polisiekommissaris, gesê.

Die polisie het gesê waarskuwing­skote is afgevuur en pepersproei is gebruik.

Die media het beeldmateriaal van bebloede oproermakers en beseerde polisielede op televisie vertoon.

“Ons het ’n verandering in die publiek waargeneem. Hulle is geneig om geweld te gebruik om hul mening uit te druk,” het Lo gesê.

Die optrede van die “radikale onafhanklikheidsvoorstanders neig in die rigting van terrorisme”, het die South China Morning Post berig.

Eiendomspryse in Hong Kong is besig om drasties te daal en een van die grootste banke, HSBC, het aangekondig dat hulle hul hoofkantoor sal verskuif na Londen.

Die polisie moes traangas gebruik het tydens die Mong Kok-oproer en indien nodig betogers doodgeskiet het, sê ‘n Chinese regsgeleerde en distriksraadslid Junius Ho Kwan-Yiu gesê.

Ho het gesê wetstoepassers was “te besadig” toe hulle gekonfronteer is met ‘n straatbendes.

“Die polisie het haelgewere gebruik [gedurende die 1967-onluste] … om die openbare orde te handhaaf, en vir selfbeskerming [vir polisiebeamptes] moet die nodige stappe geneem word,” sê Ho.

Toe Ho gevra is deur ‘n ander deelnemer van die debat, Oscar Lai Man-LOK van studentegroep Scholarism, of hy glo dat moord geregverdig kan word op die stad se inwoners, het Ho geantwoord: “Dit beteken nie die doodmaak van Hongkongers nie. Dit beteken die doodmaak van oproeriges.”

EU wil vlugtelinge terugstuur

Die Europese Unie het ‘n beroep op lidlande gedoen om die hervestiging van migrante en vlugtelinge te bespoedig.

Die EU Migrasie-kommissaris, Dimitris Avramopoulos het aan verslaggewers in Brussel gesê dat slegs 497 mense al hervestig is uit die 160 000 waarop verlede September ooreengekom is.

Hy sê hy het in briewe aan EU-lede ‘n sterk en duidelike boodskap gestuur dat die proses bespoedig moet word.

Hy sê talle migrante sal steeds probeer om Europa te bereik, maar dat dit nie hul keuse is in watter Europese land hulle beskerming geniet nie.

Die Turkse president Recep Tayyip Erdogan verkeer tans onder druk om sy grense vir duisende Siriese vlugtelinge oop te stel ná die jongste gevegte in die Aleppo-provinsie.

Hy is tans in ‘n drukgang geplaas deur die suksesvolle Russiese lugveldtog teen ISIS op sy grens.

Na Amerika se weiering om aan die kant van Turkye toe te tree om die anti-Assad rebelle, ISIS, te steun, is die Turkse president se beweegruimte om die EU af te dreig deur vlugtelinge te stuur, beperk.

Erdogan kla dat die VSA steun aan Koerdiese militante in Sirië verleen en sê die Amerikaners se wanbegrip van die Koerde se rol as terroriste, is besig om die streek in ‘n bloedbad te verander.

Sy klagtes kom te midde van hardnekkige gerugte dat Turkye ISIS ondersteun.

Die Koerdiese kwessie bemoeilik lankal Turkye se koördinering met ander ISIS wat die rebelle téén President Bashar al-Assad steun, meen ontleders.

Kenners sê dit dui slegs op nog verdeeldheid in die streek, waar die jongste poging vir vrede op ‘n dooiepunt uitgeloop het.

Twee Republikeine blaas die aftog

Die Amerikaanse deelstaat New Jersey se Goewerneur Chris Christie en voormalige sakevrou Carly Fiorina het uit die Republikeine se benoemingstryd getree.

Hulle het beide die beëindiging van hul veldtogte vir die 2016 Republikeinse nominasie aangekondig, en ruimte gelaat in die veld van Donald Trump se teenstanders

Dit beteken ook minder mededingers vir Trump in die 8 November presidensiële verkiesing.

‘n Senior medewerker het aan Reuters bevestig dat Christie sal onttrek, ‘n dag nadat die dapper Republikein sesde geëindig het in New Hampshire.

Dit het tot twyfel oor sy lewensvatbaarheid as ‘n kandidaat gelei.

Mede-Republikein Fiorina, ‘n voormalige uitvoerende hoof van Hewlett Packard, het op Facebook aangekondig dat sy haar veldtog gaan opskort.

Trump se oorblywende teenstanders, die meeste van hulle hoofstroom-Republikeine, sal waarskynlik baat vind by die twee se vertrek, wat sewe Republikeine laat in ‘n veld wat voorheen uit 17 kandidate bestaan het.

Christie het die grootste deel van sy veldtog se hulpbronne in New Hampshire gestort en het ‘n goeie vertoning daar as van kritieke belang gesien.

Hy kon egter net sowat 7 persent van die stemme Dinsdag op homself verening, ten spyte van ‘n veglustige teenwoordigheid in ‘n Republikeinse debat verlede naweek.

‘Nee vir gratis vakansie in Israel’

In Gasa heers hongersnood nie “Hunger Games” nie.

Dit was die reaksie van ‘n Palestynse aktivis wat ‘n beroep op Oscar-benoemdes gedoen het om nie ‘n gratis reis na Israel te aanvaar wat deur die Joodse regering geborg word nie.

Lydia Weitzman, woordvoerder van die departement van toerisme, het gesê Israel sal ‘n gratis vakansie van tien dae aan 26 sterre bied, onder wie Jennifer Lawrence, Leonardo DiCaprio en Matt Damon.

Omar Barghouti, ‘n Palestynse aktivis en medestigter van die BDS, het gesê dat Israel sy “groeiende internasionale isolasie beveg deur omkopery”, eerder as om sy beleid te heroorweeg.

BDS staan vir “Boikot, Disinvesteer, Sanksies” teen Israel.

Die reis is deel van die prys wat sterre by die Oscar-prysuitdeling ontvang, het Reuters berig.

Establishment-nagmerrie: Trump & Sanders wen ver in New Hampshire

Die Amerikaanse politieke establishment is vanoggend vroeg in Suid-Afrikaanse tyd tot in sy fondamente toe geskud toe die twee aweregse, onafhanklike kandidate van beide die Republikeinse en die Demokratiese Partye hul kandidaatsverkiesings in die staat New Hampshire gewen het. Donald Trump het die res van die Republikeinse span ver in die stof agtergelaat, met 34 persent van die stemme teenoor die naaswenner John Kasich se 16 persent.

Mev. Hillary Clinton het reeds toegegee dat sy deur die verlinkse Demokratiese kandidaat, Bernie Sanders, geklop is. Sanders het ‘n beraamde 60 persent van die stemme ontvang, teenoor mev. Clinton se 40 persent.

Die geldmag in die VSA steun óf mev. Clinton óf senator Marco Rubio in die Republikeinse kamp. Rubio het egter Saterdag baie swak in ‘n TV-debat gevaar toe hy skerp deur mnr. Chris Christie aangeval is. Christie, die goewerneur van die deelstaat New Jersey, is insgelyks ‘n aanspraakmaker op die Republikeinse kandidatuur.

Republikeinse kandidate wat groot geld aan reklameveldtogte in die media bestee het, het swak gevaar. ‘n Joernalis van die Weekly Standard, Stephen Hayes, het die volgende bedrae op Twitter bekendgestel.

Die links-liberale webblad, The Huffington Post, het namens die linkse Amerikaanse media die toon aangegee toe hy Donald Trump in sy opskrif as ‘n “rassistiese, seksistiese, xenofobiese demagoog” beskryf het.

In die Afrikaanse hoofstroommedia wat deur die links-liberale Naspersgroep oorheers word, is Trump insgelyks tot dusver as ‘n nar voorgestel wat nie ernstig opgeneem behoort te word nie. Misleide lesers van dié groep se Netwerk24-webblaaie en koerante gaan waarskynlik vanoggend in hul ontbytkoffie stik as hulle agterkom dat die “buitestaander” wat die joernaliste afkraak, die New Hampshire-kandidaatsverkiesing gewen het.

Lees ook die berig op ons Engelse webblad vir meer inligting:
Establishment stunned: Big wins for Trump and Sanders in New Hampshire

Duitse treinramp nie terreuraanslag nie sê polisie

Twee passasiers­treine het in die suide van Duitsland gebots en volgens die polisie is ten minste vier mense in die botsing dood en sowat 100 beseer.

“Die huidige dodetal is vier dood, 15 baie ernstig en 40 ernstig beseer, terwyl’n totaal van 100 passasiers beseer is,” het die polisiewoordvoerder mnr Martin Winkler in die dorp Rosenheim aan AFP gesê.

Die spoorwegmaat­skappy vir die streek, Meridian, het in ’n verklaring gesê “’n tragiese ongeluk het Dinsdagoggend skuins ná sewe-uur op die enkelspoor-roete plaasgevind”.

Die oorsaak van die ongeluk naby Bad Aibling, sowat 60 km suidoos van München is nog nie duidelik­ nie, maar die polisie het verklaar dat hulle dit nie as ‘n terreuraanslag oorweeg nie.

Die streek se polisiemag in Bo-Beiere het getwiet dat honderde noodlenigingswerkers op die toneel in die landelike gebied ontplooi is.

Die treinroete asook twee plaaslike paaie was vir verkeer gesluit.

’n Woordvoerder van die federale polisie, mnr. Stefan Brandl, sê die strook spoorlyn waar die twee treine gebots het, is vasgevang tussen die Mangfallrivier aan die een kant en’n woud aan die ander kant wat die reddingsoperasie erg bemoeilik­.

Brandl het gewaarsku dat dié getal sterftes en beseerdes kan styg.

“Die huidige getal sterftes en beseerdes is net ’n waarneming, dit kan en gaan steeds verander.”

Op ’n vraag wat die oorsaak van die botsing was, het Brandl beklemtoon personeel is steeds “midde die reddingsoperasie” en dit te vroeg is om die oorsaak te bepaal.

Intussen het die operateur van die twee treine wat gebots het, Bayerische Oberlandbahn, op sy webtuiste gesê die treine van die sogenaamde Meridian-roete is albei gedeeltelik ontspoor en inmekaar vasgedruk.

Beide die treine se operateur en die federale polisie in Bavaria het noodnommers vir familie en vriende van die passasiers geopen.

Volgens die polisie is die ongeluk die grootste wat in jare in dié streek voorgekom het.