Suider-Afrika Archives - Page 219 of 888

Valke-lid deel van stropersindikaat

‘n Lid van die Valke. ‘n grootwildjagter, ‘n prokureur, en vlieënier is onder die tien beskuldigdes wat Maandag in die landdroshof in Hatfield verskyn het op 318 aanklagte wat verband hou met renosterstropery.

Die tien staar ook klagtes van diefstal en geldwassery in die gesig.

Willie Oosthuizen van die Valke, Hugo en Anton Ras, Hugo se vrou Trudie, Mandla Magagula, Joseph Wilkinson (prokureur), Bonnie Steyn (vlieënier), Arno Smit, Christopher Scheepers, en Willem van Jaarsveld is nie gevra om te pleit nie.

Hugo Ras het Vrydag in die landdroshof in Pretoria-Noord verskyn op aanklag wat ook met renosterstropery verband hou toe hy deur die Valke in hegtenis geneem is.

Die ander beskuldigdes is Vrydag in Polokwane, Ficksburg in die Vrystaat, Mamelodi, Potchefstroom en Kameeldrift in hegtenis geneem.

Volgens ‘n woordvoerder van die Valke, Paul Ramaloko, was Ras vermoedelik die leier van die stropersindikaat.

Hulle is reeds vyf jaar lank in Limpopo, KwaZulu-Natal, Gauteng en Mpumalanga bedrywig.

Hulle word daarvan beskuldig dat hulle 22 renosters tussen 2008 en 2012 gestroop het en 84 renosterhorings ter waarde van R22 miljoen onwettig bekom het.

Sowat 52 horings was vermoedelik afkomstig van gestroopte renosters terwyl die res gesteel is.

Johannesburg se waternood duur voort

Dele van Johannesburg het Maandagaand steeds onder waternood gebuk gegaan.

Die watertorings en reservoirs is glo egter besig om weer vol te loop nadat probleme met die pompstasies ontstaan het.

Lae watervlakke pla by die volgende reservoirs: Rabie Ridge, President Park en Randjesfontein. Die buurtes wat hierdeur geraak word, is Ebony Park, Kaalfontein, Ivory Park, President Park, Glen Austin, Allendale, Country View, Rabie Ridge en Mayiboye.

Watertenks is voorsien en is beskikbaar by:

South Hills-watertoring en 21 Risana-pad

Westdene op die hoek van 4de Laan en Thornton-pad

Triomf op die hoek van Miller- en Edward-straat

Coronationville-hospitaal.

Die publiek word gevra om watergebruik in te kort.

Onlusmakers blokkeer Goue Hoofweg suid van Jhb met klippe

Onlusmakers in die Lehae-gebied suid van Johannesburg buite Lenasia blokkeer tans die Goue Hoofweg met klippe, volgens die metropolisie van dié stad.

Hoofsuperintendent Wayne Minnaar verklaar dat die pad vir motoriste ontoeganklik is en verkeersopeenhopings veroorsaak.

“Hulle behoort eerder die N1 of die K43 as alternatiewe roetes te gebruik,” sê hy.

Die onlus het vanoggend voor 05:00 begin. In dié stadium is dit nie helder wat die oorsaak daarvan kan wees nie.

Volgens Minnaar is daar tans polisiebeamptes op die toneel.

Poskantoorstaking lê die land lam

Die SA Poskantoor het op 17 September aangekondig dat pos in Gauteng en die Wes-Kaap geraak word deur ‘n “onbeskermde staking” by sorteersentra in Kaapstad, Pretoria en die groter Johannesburggebied. Terwyl pos in die Wes-Kaap met slegs enkele dae vertraag word, word dit in Gauteng met “etlike weke” vertraag.

By verskeie poskantore in Johannesburg was posbusse gister leeg, wat aandui dat geen pos afgelewer word nie.

Volgens die Poskantoor is “die vertraging in Gauteng die gevolg van ‘n vorige staking waarvan die produksieomgewing nog nie herstel het nie”.

Redes wat vir die staking aangevoer word, het te make met die aanstelling van tydelike poswerkers in permanente poste. Die SA Poskantoor is besig om tydelike poste wat net op sekere tye van die jaar benodig word in permanente poste te omskep. Dit word egter nie vinnig genoeg na die smaak van die poskantoorwerkers gedoen nie.

Intussen daag werknemers by poskantore in winkelsentra en elders steeds vir werk op, hoewel die pos nie meer gesorteer word nie. Sommige poskantore in Kaapstad en in Johannesburg is egter gesluit ná voorvalle van intimidasie en dreigemente van geweld. Die Poskantoor se oproepsentrum is gesluit en klante word versoek om ‘n epos aan socialmedia@postoffice.co.za te stuur as hulle navraag oor positems wil doen. Daarvoor word ‘n opspoornommer benodig.

Die posdiens in ander provinsies, behalwe Gauteng en die Wes-Kaap, funksioneer normaalweg.E-handelaars is egter woedend aangesien hulle sakebedrywighede heeltemal lam gelê word.Volgens Mlu Mathonsi, groepbedryfshoof van die Poskantoor, “hanteer die Poskantoor landwyd vyf miljoen posstukke op ‘n gewone dag. Met ‘n vertraging van net een dag word ‘n enorme agterstand opgebou.”

Maar die staking duur nou al op sommige plekke ‘n maand lank, wat kan beteken dat tot 150 miljoen posstukke iewers in die stelsel vashaak.

Mathonsi sê: “Met e-handel word al hoe meer pakkies deur die poskantoor gehanteer.”

In ander lande het poskantore hul sakemodel verander om meer pakkies as ander posstukke soos briewe te hanteer, ten einde e-handelaars tegemoet te kom. Sowel Canada Post in Kanada as Royal Post in Brittanje het tot dié stap oorgegaan.

E-handelkliënte is gesteld op vinnige en betroubare aflewerings.

Die Poskantoorstaking kan dus op die duur veroorsaak dat die publiek vertroue in e-handel in Suid-Afrika verloor.

DRK, Lesotho bly SAOG-kopseer

‘n Buitengewone beraad van die sogenaamde dubbele troika van die Suider-Afrikaanse Ontwikkelingsgemeenskap (SAOG), met sowel die Demokratiese Republiek van Kongo (DRK) as Tanzanië teenwoordig, is verlede week in Pretoria gehou om die voortslepende krisisse in die twee lande te bespreek.

Die beraad is deur Suid-Afrika se president Jacob Zuma, gelei wat ook die voorsitter van die SAOG-komitee vir politiek, verdediging en sekuriteit is.

Leiers van die koalisie-regering in Lesotho is gemaan om by hul verbintenisse tot die herstel van grondwetlike normaliteit in die koninkryk te bly.

Daar is ook besluit om die algemene verkiesings in Lesotho wat vir 2017 beplan is, te vervroeg.

Die leiers van die koalisie-regering is aangemoedig om saam te werk ten einde die Windhoek- en Pretoria-verklarings as ’n saak van dringendheid te implementeer.

Dit sluit onder meer die terugroep en herstel van die parlement in, wat vroeër eensydig deur die eerste minister opgeskort is.

Die land se leiers is ook aangemoedig om so gou as moontlik op die datums vir ’n nuwe verkiesing ooreen te kom.

Suid-Afrika se adjunk-president, Cyril Ramaphosa, met die steun van ’n span deskundiges uit troika-lidlande, is die opdrag gegee om as SAOG-fasiliteerder die kwessie in Lesotho te beredder, ten einde politieke stabiliteit en veiligheid in die kort en lang termyn te herstel.

Die noodsaaklikheid om die volle SAOG politieke, verdediging- en veiligheidwaarnemersendings vir ’n tydperk van drie maande in Lesotho te ontplooi, is ook benadruk.

Ná die drie maande sal die veiligheidsituasie in die land en die politieke stabiliteit deur die lidlande van die troika hersien word.

Wat betref die DRK, is die internasionale gemeenskap versoek om druk uit te oefen op maatskappye wat handel dryf in onwettige, gemynde minerale uit die DRK en onmiddellik ’n einde hieraan te maak. Lande wat as deurgang- roetes vir die onwettig gemynde minerale dien, is versoek om hul verbintenis tot die raamwerk vir vrede, veiligheid en samewerking in die DRK en Groot Mere-streek te eerbiedig en gestand te doen.

SAOG het sy posisie herbevestig ten opsigte van die rol van agentskappe van die Verenigde Nasies om logistieke steun en veiligheid te bied aan gewapende magte wat vrywillig hul wapens neergelê het en in die Kisangani-deurgangskamp gehuisves word.

’n Senior afvaardiging, bestaande uit amptenare van die troika, sal ook eersdaags die DRK besoek om met die leierskap van die FDLR-rebellegroep in gesprek te tree.

Die rebelle sal gewys word op die onafwendbaarheid van militêre optrede teen hulle, indien hulle nie by vorige ooreenkomste hou en vrywillig ontwapen nie.

Die internasionale gemeenskap en die Verenigde Nasies en sy agentskappe is versoek om bystand te verleen met die hervestiging van FDLR-lede wat vrywillig hul wapens neergelê het, maar nie bereid is of toegelaat sal word om na Rwanda te repatrieer nie.

Die buitengewone vergadering is ook bygewoon deur pres. Robert Mugabe van Zimbabwe, lt.genl. Seretse Khama Ian Khama, die president van Botswana, premier Thomas Thabane van Lesotho, visepresident Saulos Chilima van Malawi, min. Raymond Tshibanda van die DRK en min. Bernard Membe van Tanzanië.

SA: Hervormde Veiligheidsraad sal vrede en veiligheid verbeter

Suid-Afrika het onderneem voort te gaan om die hervorming van die VN tydens ons land se deelname aan die sitting van die VN se Algemene Vergadering, op die agenda te hou. President Jacob Zuma sal die afvaardiging na die jaarvergadering in New York lei.

Die vergadering sal die vordering bespreek wat gemaak is met die bereiking van die Millenium Ontwikkelingsdoelwitte voor die sperdatum van 2015, waarby ontwikkelende lande veral kan baat.

President Zuma sal die sitting van die wêreldliggaam met ten minste agt ANC-ministers in New York bywoon. Dit sal die 69ste sitting van die VN se Algemene Raad wees op die vooraand van dié instelling se 70ste herdenking.

Dit sal die 15de herdenking van die Millenium Ontwikkelingsdoelwitte vir 2015 wees.

Zuma het gesê dat ontwikkeling en veiligheid twee kante van dieselfde munt is. Die Veiligheidsraad moet onder die indruk gebring word dat probleme sal voortduur tensy die VN hervorm word.

Die vyf permanente lede van die Veiligheidsraad verskil tans oor die hantering van belangrike veiligheidskwessies in Sirië en Irak.

Suid-Afrika het gesê ‘n hervorming van die VN se Veiligheidsraad sal daartoe lei dat sulke kwessies vinniger opgelos word.

Suid-Afrika het wêreldleiers ook versoek om internasionale vrede en veiligheid hoog op die sakelys vir die komende sitting van die VN se Algemene Vergadering te plaas.

Die Minister van Internasionale Betrekkinge, Maite Nkoana-Mashabane, het voor die vergadering aan die SAUK gesê wêreldvrede en ontwikkeling is onderling vervleg.

Matriek 2014: Departement is slaggereed

Die minister van basiese onderwys, Angie Motshekga, het by ‘n nuuskonferensie gesê alle voorbereidings vir 2014 se senior sertifikaat-eksamen is afgehandel.

Altesaam 688 660 matrieks het vir die eksamen geregistreer. Die meeste kandidate, 550 127 is voltydse leerlinge; net 138 550 is deeltyds.

Die matrieks gaan in 6 740 eksamenlokale reg oor die land eksamen skryf en 65 000 eksaminatore sal ‘n wakende oog oor kandidate wat die eindeksamen aanpak, hou.

Van die sleutelpunte wat ook bespreek is, sluit in:

• Die bekendstelling van tegnologie in skole wat die gehalte van onderrig sal verbeter, meen die minister.

• Die kurrikulum behoort vir die volgende sewe jaar dieselfde te bly, want “ons is wel op die regte pad”, sê Motshekga.

• Die departement sal begin om profiele met persoonlike inligting en vakkennis van onderwysers op te stel.

• Volgende jaar sal 3 700 leerlinge van gr. 1 af ’n Afrika-taal leer. Dit sal later na ander grade uitgebrei word.

Die matrikulante in Kuruman sal egter nie die matriekeindeksamen skryf nie, nadat skole in die John Taolo Gaetsewe-distrik reeds sedert 4 Junie vanweë diensteoproer ontwrig is.

Sowat 17 000 leerlinge, onder wie 496 matrikulante, het geen onderrig gekry nie. Oproeriges eis dat ‘n pad geteer word. Die leerlinge gaan wel hul eindeksamen in Maart aflê.

TB Joshua wil ‘martelare’ in SA besoek

Die Nigeriese prediker, TB Joshua, het aangekondig dat hy binnekort na Suid-Afrika sal reis omdat hy die familielede van slagoffers en oorlewendes van die ramp by sy Sinagoge wil ontmoet. ‘n Gastehuis van die kerk in Lagos het inmekaargetuimel terwyl nog verdiepings aan die gebou toegevoeg is.

Joshua het aan sy gemeente by ‘n Sondagdiens gesê hy sal Suid-Afrika besoek, om “die martelaars van geloof” te kom ontmoet.

Die prediker het glo ook joernaliste omgekoop om positief oor die tragedie te berig, het ’n Nigeriese joernalis die naweek getwiet.

Clayson Monyela, woordvoerder van die departement van internasionale betrekkinge en samewerking, het verskeie twiets van Nicholas Ibekwe, ’n Nigeriese ondersoekende joernalis, hertwiet waarin dié beweer dat Joshua sowat 50 000 Niara (sowat R3 389) elk aan Nigeriese én internasionale joernaliste aangebied het.

Die prediker het uit die staanspoor die ramp aan ‘n “verdagte” vliegtuig toegeskryf wat hy bo die kerk gewaar het, in ‘n land waar Moslem- en Christenverskille al dekades lank vir politieke doeleindes aangewend word.

Suid-Afrika het reeds ‘n span na Nigerië gestuur om die liggame van Suid-Afrikaners te gaan opspoor en uitken.

Die eerste groep Suid-Afrikaners wat beseer is in die ineenstorting, word vanoggend in Suid-Afrika terug verwag.

Die Minister in die Presidensie, Jeff Radebe, sê altesaam 26 Suid-Afrikaners, waarvan sommige in ‘n kritieke toestand is, sal in die land aankom. Hulle was onder die sowat 350 Suid-Afrikaners wat pastoor TB Joshua se kerkdiens bygewoon het.

Minstens 86 mense is in die ramp dood, waarvan 84 vermoedelik Suid-Afrikaners is.

Intussen is konstruksiemaatskappy in die Oos-Kaap in pekel nadat ‘n Graad nege-leerder verlede week dood is toe ‘n onvoltooide skoolklaskamer by Tsolo ineengestort het.

Nog drie leerders van die Ligelihle Junior Sekondêre skool is ernstig beseer in die voorval.

Plaaslike leiers sê die konstruksiemaatskappy wat vir die bouwerk verantwoordelik was, moet boet. Die speaker van die Mhlontlo-munisipaliteit, Xolile Nkombela, sê hy het krake in al die mure gesien.

Nkombela sê indien dit van hom afgehang het, sou hy opdrag gegee het dat alles platgeslaan word.

‘n Direkteur van die konstruksiemaatskappy, Kenny Steady, het egter ontken dat die ineenstorting die gevolg was van swak vakmanskap.

Geweld teen produktiewe SA-inwoners neem toe

Die jongste vrystelling van misdaadsyfers toon dat geweld in Suid-Afrika aan die toeneem is en veral produktiewe inwoners word direk geraak deur die toename.

Geweldsmisdade waarin individue persoonlik geteiken word soos moord, roof en motorkapings het kommerwekkend toegeneem.

Moord het met 5% toegeneem met meer as 17 000 moorde wat gepleeg is.

Dié toename beteken dat Suid-Afrika die twyfelagtige eer te beurt geval het om as gevaarlike misdaadhool te kwalifiseer met ‘n moordsyfer van 32,2 per 100 000 van die bevolking, terwyl die wêreldgemiddeld maar 7 per 100 000 is.

Suid-Afrika se moordsyfer is tans amper vyf keer meer as die wêreldgemiddeld. Die platteland is veral gevaarlik.

Daar heers verder kommer oor die geloofwaardigheid van die syfers, aangesien polisiestasies dikwels nie die korrekte kategorie van misdaad rapporteer nie.

Gewapende roof word in talle gevalle as diefstal gerapporteer, terwyl inbrake nie gerapporteer word nie om versekeringspremies laag te hou.

Die ISS het die toename voor die vrystelling aan “opvoeding” toegeskryf en gesê misdaadstatistiek moet maandeliks bekend gemaak word om sodoende ‘n beter misdaadvoorkomingsplan te kan opstel.

Swart aanvalle op woonhuise, die misdaad wat die meeste gevrees word in Suid-Afrika, het met 7,4%, oftewel 19 284 gevalle toegeneem en roof met verswarende omstandighede het met 12,7% of 119 351 gevalle.

Motorkapings het met 12,3% (11 221 gevalle) gestyg en roof by sake-ondernemings het met ‘n yslike 31,3% (18 615 gevalle) toegeneem.

Oop Moskee open in Wynberg

Die eerste diens van die nuwe sogenaamde Oop Moskee in Wynberg, Kaapstad, word Vrydag met etenstyd gehou.

Die stigter van die moskee, professor Taj Hargey, sê hy sal die diens in Engels waarneem. Hy sê die moskee sal toeganklik wees vir alle nie-Moslems en homoseksuele en vroue sal gebede kan lei.

Hargey is ‘n professor van Islamitiese studies en Afrika-geskiedenis aan die Oxford-universiteit in Brittanje.

Maar te oordeel aan die reaksie teen die moskee, is die Reënboognasie nie te vinde vir die gedagte nie. Die professor het glo doodsdreigemente gekry.

Die moskee, sê Hargey, sal Islam volgens sy oorspronklike heilige teks, die Koran interpreteer. Hy sê die moskee sal harde kerninterpretasies, soos dié wat gelei tot godsdienstige konflikte tussen Moslems in Irak, Somalië en Nigerië verwerp.

“Ons het ‘n teologiese mafia wat die Moslemgemeenskap beheer,” het Hargey gesê.

Vroue en mans kan voortaan dieselfde ingang gebruik, en hulle kan saambid in dieselfde saal sonder skeidsmure. Vroue sal ook deel van die moskee se uitvoerende raad wees en sal toegelaat word om gebede te lei.

Die moskee is oop vir alle Moslems asook mense van alle gelowe en tref geen onderskeid tussen verskillende groepe nie.

Verder het Hargey gesê, sal die moskee oop wees vir gay gelowiges maar sal nie gay huwelike voltrek nie aangesien dit deur die Koran verbied word.