Is Mandela deur die Mossad opgelei?

Winnie, 'David Mobsari' en Joe Slovo
Winnie, ‘David Mobsari’ en Joe Slovo

Volgens ‘n brief waarvan uittreksels in die Israelse koerant Haaretz gepubliseer is, het die jong Nelson Mandela in 1962 opleiding in sabotasie van dié land se geheimediens, die Mossad, ontvang. Blykbaar het Mandela die Mossad-agente gegroet met “Sjalom” en was “bekend met die probleme van die Jodedom en van Israel en het die indruk gewek dat hy ‘n intellektueel is. Die personeel het [daarom] gepoog om ‘n Sionis van hom te maak.”

Hierdie onthulling, wat ook deur die wêreld se grootste nuuswebwerf, die Huffington Post, oorgeneem is, kom ná enkele weke van intense heldeverering aan Mandela, oënskynlik in ‘n poging van die Joodse meningsvormer, David Fachler, om versoening tussen die ANC en Israel te bewerkstellig ná onlangse meningsverskille tussen die twee. Ná die uitlatings van die voormalige Israeliese minister van buitelandse sake Avigdor Lieberman dat ‘n “pogrom [ etniese vervolging of slagting ] teen die Jode in Suid-Afrika net ‘n kwessie van tyd is”, het die ANC die plaaslike Jode gepaai. Mary Kluk, die voorsitster van die Suid-Afrikaanse Joodse Raad van Afgevaardigdes, het insgelyks die gedagte verwerp dat daar hoegenaamd enige gevaar vir Jode in Suid-Afrika dreig.

Mandela het tydens sy tydperk in die buiteland blykbaar onder andere die skuilnaam David Mobsari gebruik Die aangehaalde gedeelte uit die geheime brief van die Mossad, wat in die Israeliese argief bewaar word, lui soos volg:

Amptelike embleem van die Mossad, die Israeliese geheimediens
Amptelike embleem van die Mossad, die Israeliese geheimediens

Soos u u mag herinner, het ons drie maande gelede die geval bespreek van ‘n kadet genaamd David Mobsari wat by die Israelse ambassade in Ethiopië opgedaag het en van Rhodesië afkomstig was. Eersgenoemde het van die Ethiopiese personeel [wat amper vir seker Mossad-agente sou wees] opleiding in judo, sabotasie en vuurwapens ontvang.

Hy het ons manne met “Sjalom” gegroet, was bekend met die probleme van die Jodedom en van Israel en het die indruk gewek dat hy ‘n intellektueel is. Die personeel het gepoog om van hom ‘n Sionis te maak.

Tans beklee verskeie Suid-Afrikaanse Jode belangrike poste in die ANC-regering en ander instellings, soos byvoorbeeld die president van die Reserwebank, Gill Marcus, haar broer Gilbert wat die meeste van die ANC se belangrike hofsake as advokaat hanteer, asook die minister van handel en nywerheid, Rob Davies, die rektor van die Universiteit van Kaapstad, Max Price, en vele ander.

Maar volgens Haaretz, wat in Tel Aviv gesetel is en in beide Engels en Hebreeus verskyn, is Jode besig om terug te staan in die Suid-Afrikaanse politiek en speel hulle tans ‘n mindere rol as in die verlede:

Jode was eens op ‘n tyd aktief in die Suid-Afrikaanse politiek op elke vlak. Benewens Helen Suzman, is die Progressiewe Party deur die voormalige opposisieleier Tony Leon verteenwoordig, asook Selma Browde en Harry Schwarz. Die African National Congress, die bevrydingsbeweging wat in 1994 die regerende party geword het, het oor ‘n getalryke groep Jode beskik, waaronder Joe Slovo [lees praag se resensie oor sy biografie], Ronnie Kasrils en Dennis Goldberg. Jode was ook prominent in die munisipale politiek. Tydens Johannesburg se 120-jarige geskiedenis, was 22 van sy 94 burgemeesters Jode, volgens die stad se webwerf. Sedert 1907 het Kaapstad reeds oor 13 Joodse burgemeesters beskik.

Intussen het die Nelson Mandela-stigting in ‘n verklaring die brief wat deur Haaretz gepubliseer is, verwerp:

“Die media dra tans die verhaal oor dat Nelson Mandela in 1962 interaksie met ‘n Israeliese agent in Ethiopië gehad het.

“Die Nelson Mandela-stigting kan bevestig dat hy geen getuienis in Nelson Mandela se private argief (wat sy 1962-dagboek en notaboek insluit) kon vind dat hy interaksie met ‘n Israeliese agent gedurende sy toer van Afrika-lande in daardie jaar gehad het nie. Sowel die dagboek as sy notaboek is as getuienis teen hom in die Rivoniaverhoor in 1963-1964 vir sabotasie gebruik.

“In 1962 het mnr. Mandela militêre opleiding van Algerynse vryheidsvegters in Marokko en van die Ethiopiese Onluspolisie te Kolfe buite Addis Abeba ontvang alvorens hy in Julie 1962 na Suid-Afrika teruggekeer het. In 2009 het die Nelson Mandela-stigting se senior navorser na Ethiopië gereis en onderhoude met die mans wat by Mandela se opleiding betrokke was, gevoer – geen getuienis van ‘n Israeliese verbintenis het na vore gekom nie.”

Luidens die artikel in Haaretz was Golda Meir, die toentertydse eerste minister van Israel, ‘n groot ondersteuner van die swart bevrydingsbewegings in Afrika. Eers later in die sewentigerjare, toe die meeste onafhanklike Afrikalande onder Arabiese invloed besluit het om die Palestyne te steun, het Israel sy posisie verander en begin om militêr met Suid-Afrika saam te werk. Samewerking tussen die ANC en die Mossad in die vroeë sestigerjare, gegewe ook die aansienlike persentasie radikale Jode wat die ruggraat van die ANC- en SAKP-leierskap uitgemaak het, sou dus strook met die destydse Israeliese buitelandse beleid.

 

Zuma loof Vendas vir respekbetoon

vendas
Uit die argief: Vendavroue wat gaan lê

President Jacob Zuma sê hy sou vir hom ‘n Vendavrou gevat het as hy nie reeds getroud was met sy vier vroue nie. Hulle gaan “lê selfs om respek vir ander mense te wys”, het hy vol lof gesê.

The Star het Vrydag berig dat hy honderde mense op Impendle in die KwaZulu-Natalse Middellande vroeër hierdie week toegespreek het, waar hy die belangrikheid van respek beklemtoon het.

Zuma het gesê dat jong mans en vroue moet selfrespek en respek vir ander toon.

“Toe ek in Venda was onlangs, was ek so beïndruk om te sien hoe die mense daar respek vir ander mense toon,” het Zuma glo gesê.

“‘n Vrou het haar hande geklap en selfs gaan lê om respek te toon.”

Die president het gesê hy was beïndruk, en onder groot gelag gesê as hy nie reeds getroud was nie, sou hy in Venda gaan soek het vir ‘n vrou.

Drie tieners verdrink by Knysna

leisureislandDrie tieners is in die hospitaal oorlede nadat hulle by Leisure Island op Knysna in die Suid-Kaap verdrink het.

Die drie is deur die see meegesleur, terwyl ‘n vierde kind oorleef het.

‘n Woordvoerder van die Nasionale Seereddingsinstituut, Craig Lambinon, het bevestig dat ‘n vierde meisie oorleef het.

Hy sê die NSRI kon daarin slaag om die drie uit die water te haal en hulle op die toneel behandel met mond-tot-mondasemhaling.

Hulle is daarna na die hospitaal gehaas, maar ten spyte van voortgesette noodbehandeling is die drie dood verklaar.

Lambinon sê daar word vermoed dat hulle in vlakwater deur seestrome meegesleur is.

Die munisipaliteit van Knysna het hulle skok uitgespreek oor die dood van drie kinders in ‘n trekstroom.

Hulle was glo tussen tien en dertien jaar oud en is in die plaaslike hospitaal dood.

Die nasionale seereddingsinstituut die vierde kind het ongedeerd uit die water gestap.

Hul name is nie bekendgemaak nie.

IVP, APC sal nie koalisie met KD aangaan nie

IVP-leier Buthelezi
IVP-leier Buthelezi

Die leier van die African People’s Convention, Themba Godi sê sy party sal nie by die opposisie-koalisie, die Kollektief vir Demokrasie aansluit nie.

Godi sê sy party se politieke program verskil van dié van Kollektief vir Demokrasie onder aanvoering van Mosiuoa Lekota.

Die KD wat uit ‘n paar marginale partye bestaan, beplan om saam te werk met die oog op aanstaande jaar se verkiesing.

Skaars ‘n dag na die aankondiging dat die IVP ook deel uitmaak van die groep, het die IVP gesê hulle was geskok om uit te vind dat hulle by die kollektief aangesluit het.

“Die leierskap van die IVP was geskok om te leer in die media, dat die IVP ‘n formele koalisie vir die komende 2014 aangegaan het om die nasionale en provinsiale verkiesing te betwis,” het die party se sekretaris-generaal, Sibongile Nkomo, gesê in ‘n verklaring Woensdag .

“Die IVP het nog nie sy seën gegee vir ‘n nuwe party wat gevorm moet word nie, en het ons ingestem om as ‘n deel van ‘n formele opposisie aan die koalisie vir die 2014 verkiesings deel te neem,” het sy gesê.

Nkomo gesê haar party is versigtig vir alliansies na die rampspoedige ervaring in 2004, toe hulle die noodlottige Koalisie vir Verandering met die Demokratiese Alliansie in KwaZulu-Natal aangegaan het.

Dit het gelei tot “meer as 250.000 bedorwe stembriewe (wat) die diepte van verwarring aangedui het onder voetsoolvlakondersteuners, wat vir beide partye op die stembrief gestem het,” het sy gesê.

“Dit was tot die IVP se nadeel,” sê Nkomo, en het bygevoeg dat dit bygedra het dat die party beheer van KwaZulu-Natal aan die ANC afgestaan het.

Die IVP het beklemtoon dat hulle nie ‘n koalisie aangegaan het nie, maar ‘n strategiese samewerkingsooreenkoms is vir die 2014-verkiesing.

Die Demokratiese Allaince (DA ) het na bewering ‘n uitnodiging om aan te sluit van die hand gewys.

Cosatu dreig Numsa oor Vavi

Vavi en Mandela
Vavi en Mandela

Cosatu dreig met regstappe teen die vakbond Numsa, omdat hy die geskorste hoofsekretaris, Zwelinzima Vavi genooi het om sy spesiale kongres toe te spreek.

Cosatu het vroeër by die geaffilieërde Numsa oor die uitnodiging aan Vavi beswaar gemaak en gesê dat die uitnodiging teen die besluit om Vavi te skors indruis.

Die federasie se sentrale uitvoerende komitee-vergadering het Vavi verbied om enige Cosatu-byeenkoms toe te spreek.

Die vakbondfederasie het gesê dat Numsa nie uit sy geledere geskop sal word nie, maar dat Vavi se uitnodiging in ‘n baie ernstige lig beskou word.

Die hoofsekretaris van Numsa, Irvin Jim, het in reaksie gesê Vavi is in sy persoonlike hoedanigheid genooi om te praat by die herdenking van ‘n voormalige vakbondleier, Mthunthuseli Tom.

Vandag is die vakbond se laaste dag van hulle spesiale nasionale kongres.

‘Zuma het nie voordeel getrek uit opgraderings nie’

Thulas Nxesi
Thulas Nxesi

Die minister van Openbare Werke, Thulas Nxesi sê dit is nie waar dat die president eie voordeel getrek het uit die opgraderings nie.

Hy het gesê alle soewereine lande het ‘n plig om die land se verkose leier te beskerm.

Nxesi het die volledige inter-ministeriële verslag oor veiligheidsopgraderings by President Jacob Zuma se privaatwoning by Nkandla in Pretoria bekend gemaak.

Nxesi het gesê die opgraderings was noodsaaklik, en dat president Zuma nie daarvoor gevra het nie. Die veiligheidsopgraderings het meer as R200 miljoen gekos.

Hy het egter bygevoeg dat die spesiale ondersoekeenheid en die ouditeur-generaal ondersoek gaan instel na bewerings dat die kostes van die opgraderings opgejaag is.

Hulle sal ook ondersoek of enige ander ongerymdhede voorgekom het.

Die direkteur van die Sentrum vir Demokrasie-studies aan die Rhodes Universiteit, professor Steven Friedman het aan RSG gesê dat hy twyfel of openbare vertroue herstel is ná die bekendmaking van die interministeriële verslag oor president Jacob Zuma se privaatwoning by Nkandla.

Hy sê die ministers van die Veiligheidsgroepering, as deel van die regering, het een kant van die saak gestel.

Hy sê die verwagting is dat hulle die president sal steun.

Friedman sê sonder die verslag van die Openbare Beskermer, sal die publiek se vertroue nie herstel word nie.

Numsa wil Phiyega, Ramaphosa, Zuma voor ISH daag

Karl Cloete
Karl Cloete

President Jacob Zuma se regering, Lonmin-aandeelhouers en die nasionale kommissaris van polisie Riah Phiyega moet voor die Internasionale Strafhof (ISH) verskyn meen die metaalwerkersunie Numsa.

Afgevaardigdes na die National Union of Metalworkers van Suid-Afrika het by die spesiale kongres Woensdag gesê het hul leiers het instruksies om ‘n regsmening te kry oor die moontlikheid om die Marikanaslagting na die hof in Den Haag te verwys.

Die voorstel is deur Numsa se ​​KwaZulu- Natal-streek ingedien en ondersteun deur die ander streke.

Mpumalanga het egter hul kommer uitgespreek dat die ISH se vooroordeel teen die Afrika-leiers bekend is.

Numsa se ​​oproep het gekom na Dinsdagaand se vertoning by die konferensie van ‘n dokumentêr wat glo die wrede slagting van mynwerkers deur die polisie op 16 Augustus verlede jaar uitgelig het.

Die dokumentêr – nog ongeredigeer en nie vrygestel nie – het die meer as 1 000 afgevaardigdes laat kook.

Hulle het onderneem om ‘n regsmening in te win oor of daar gronde bestaan om Phiyega, die regering en die Lonmin -aandeelhouers voor die ISH te sleep.

Bo-aan Numsa se ​​lys van Lonmin-aandeelhouers vir hul beweerde rol in die moorde is Cyril Ramaphosa, die BEE-mynmagnaat, wat net vier maande ná die voorval as die ANC se adjunk-president verkies is.

Die 16 Augustus 2012 moorde in Marikana was hoofnuus op internasionaal televisiekanale wat gelei het tot globale veroordeling.

Numsa beplan om die dokumentêr internasionaal te versprei, skynbaar in die hoop dat die ISH-aansoek sal slaag.

Numsa se adjunk sekretaris-generaal Karl Cloete het gesê die dokumentêr sal afgelewer word by sakemense.

Numsa-afgevaardigdes het ook gevra vir Phiyega se onmiddellike ontslag.”Ons is van mening dat sy [ Phiyega ] is die een wat instruksies gegee het om ons mense dood te maak,” sê Cloete.

 

Nkandla-verslag geopenbaar

nkandla-residenceDie volledige verslag van die ministeriële taakspan oor die veiligheidsopgraderings by president Jacob Zuma se privaatwoning in Nkandla sal Donderdag bekend gemaak word.

Die verslag sou vroeër bekend gemaak word, maar is uitgestel vanweë oud-president Nelson Mandela se dood, het RSG berig/

Die ministers van die veiligheidsgroepering sal die verslag bekend maak.

Die verslag is vroeër vanjaar deur die minister van openbare werke, Thulas Nxesi geklassifiseer, omdat dit die president se veiligheid sou benadeel.

Die besluit is egter verander nadat uittreksels uit die Openbare Beskermer, Thuli Madonsela, se verslag oor die woning in die Mail & Guardian-koerant gepubliseer is.

Die uittreksels impliseer dat die president persoonlik deur die verbeterings bevoordeel is.

Die ANC het vroeër versoek dat die volledige verslag bekend gemaak word.

Ivoorsmokkelaar vas by OR Tambo

ivory‘n Chinese vrou is in die streekhof in Kemptonpark aan die Oos-Rand tot ‘n boete van R50.000 of drie jaar tronkstraf gevonnis nadat sy probeer het om ivoor deur Suid-Afrika na Hongkong te smokkel.

Sy is een van talle Asiese smokkelaars wat die afgelope tyd vasgevat is.

Chinese doeanebeamptes het Augustus in Hongkong op 1 120 olifanttande, 13 renosterhorings en vyf luiperdvelle beslag gelê.

Dit beteken 3 ton ivoor is sedert Januarie vanjaar teruggevind.

‘n Woordvoerder van die Inkomstediens, Adrian Lackay, sê die vrou wou meer as 13 kilogram ivoor uitsmokkel.

Die 58-jarige Jialing Yang is Vrydag op die OR Tambo Internasionale Lughawe in hegtenis geneem.

Yang beweer dat sy die ivoor by ‘n vlooimark in Mosambiek gekoop het.

Vier mans en drie vroue is na samewerking deur die Inkomstediens, die polisie en Interpol by die lughawe in Hongkong vasgetrek.

Die sewe mense het van Dubai oor Johannesburg na Hongkong gereis.

Grace Ge Gabriel, die Internasionale fonds vir dierewelsyn, Ifaw, se streekdirekteur in Asië, het vroeër gesê olifantstropery in Afrika is buite beheer en die groot beslagleggings is bewys hiervan.

Die meeste ivoor is bedoel vir die Asiese mark, veral China, waar dit as “wit goud” bekend is en vanweë die skaarsheid, al duurder raak.

Die Wildlife Trade and Monitoring Network (Traffic) lei tans labrador-honde op om doene-amptenare te help met die opsporing van onwettige handel in wilde diere se horings of velle.

Die labradors kan ivoor, renosterhoring, tierbeendere, luiperdvelle, ietermagogskubbe en varswaterskilpaaie uitsnuffel selfs al is dit dig verpak.

Winnie tree tot Mandela-erfgename se geveg toe

Winnie Mandela het die standaard gestel wat kopdoeke betref, wat Koos Bekker en Piet Croucamp nou volg
Winnie Madikizela-Mandela

Winnie Madikizela-Mandela het tot die geveg tussen oudpresident Nelson Mandela erfgename toegetree deur haar steun aan Mandela se oudste dogter te verklaar.

Sy sê koerantberigte wat beweer daar is gevegte binne die Mandela-familie is van alle waarheid ontbloot.

Sy sê daar is “geen debat” oor opvolging in die Mandela-familie nie, in weerwil van talle bewyse dat die familie stry oor Mandela se nalatenskap.

Mandela se gewese vrou het haar steun aan Mandela se oudste dogter Makaziwe toegesê in die geveg tussen haar en Mandela se kleinseun.

Madikizela-Mandela het die media in ‘n verklaring beskuldig van insinuasies wat ontwerp is om die familie in oneer te bring.

Sy het gesê gewoontereg en tradisie bepaal dat Makaziwe die hoof van die familie word. Volgens Madikizela-Mandela sal Makaziwe besluite neem met die steun van haar susters Zenani en Zindzi.

Sy sê Mandela se oudste kleinseun Mandla is deel van die volgende generasie, en sal hom daarom moet hou by Makaziwe se besluite.