Suider-Afrika Archives - Page 270 of 888

Malema betower buitelandse beleggers

Buitelandse en plaaslike beleggers het die oorlaaide paaie van Alexandra in Johannesburg Maandag aangedurf om te verneem van die ekonomiese orde na die verkiesing.

Die leier van die Ekonomiese Vryheidsvegters het beleggers uit Brittanje en Amerika ontmoet om die party se beleid ten opsigte van die nasionalisering van myne en banke en die herverdeling van grond uiteen te sit.

Julius Malema het uit die vergadering met beleggers gestap oortuig daarvan dat die EFF die mag sal oorneem van die regerende party.

“Hulle [ beleggers ] het besef dat die EFF ‘n lewensvatbare alternatief is, en ons het hulle saggemaak,” het hy gesê.

“Hulle kyk na of hulle miljarde aan risiko blootgestel sal wees, en ons het verduidelik dat ons nie hul maatskappye met geweld sal vat nie.”

Die beleggers wou egter nie na afloop van die vergadering met die media praat of hulself identifiseer nie.

“Dit is ‘n deurlopende betrokkenheid by politieke organisasies. Ons het met ander organisasies voorheen geskakel,” sê een van die beleggers.

Mbuyiseni Ndlozi, EFF-woordvoerder het die maatskappye geïdentifiseer as onder meer Investec, JP Morgan, Autonomy Capital, Coronation en Micro Synergy .

Malema het gesê die beleggers se grootste kommer is gesentreer rondom die manifes van die EFF.

“Ons het vir hulle gesê dat ons bereid is om te praat oor persentasies, maar ons sal nie ‘n kompromie oor die staat se beheer van minerale hulpbronne aanvaar nie.”

Malema het gesê hy is ongemaklik met die geloofwaardigheid van die Onafhanklike Verkiesingskommissie.

Hy het aangehaal oor bewerings wat gemaak is van kieserbedrog tydens die onlangse tussenverkiesings in Tlokwe in Noordwes.

“Ons wil ‘n skoon OVK hê wat nie bevooroordeeld is nie. Verkiesings het die potensiaal om ‘n burgeroorlog te veroorsaak.”

‘Homo’s nie van Afrika’

Die Zimbabwiese president Robert Mugabe het sy stem gevoeg by die lande wat Oeganda se drakoniese anti-gay wette steun, het die staatsmedia Maandag berig.

Hy het ook gesuggereer dat homoseksuele in sy eie land ook uitgesonder sal word.

Hy het die Weste gekritiseer dat hulle hulp aan Kampala wil weerhou nadat president Yoweri Museveni ‘n wetsontwerp wat homoseksualiteit verbied in die Oos-Afrikaland onderteken het.

“Hulle [die Weste] wil ons vertel … dit is ‘n skending van menseregte. Dit is wat hulle reg nou doen aan Museveni,” het Mugabe gesê.

“Die menslike reg wat jy het as ‘n man is om met ‘n ander vrou te trou, nie om met ‘n ander man te trou nie. Ons weier,” het Mugabe die naweek by die troue van sy enigste dogter, Bona gesê.

Mugabe het vroeër gesê dat homoseksualiteit nie van Afrika is nie en het gays en lesbiërs beskryf as erger as varke en honde.

“Dit is ‘n verskriklike wêreld waarin ons is, ‘n verskriklike wêreld waar mense dinge wil doen wat hulle voel hul eie belange sal verbeter as hulle dit doen.”

Mugabe het gesê tot onlangs was hy nie bewus van die bestaan van ‘n vereniging van homoseksuele in Zimbabwe nie en het gewaarsku dat hy wil weet wie behoort tot die groep .

Gays en lesbiërs van Zimbabwe ( Galz ) is al lank in die land bedrywig ten spyte van Mugabe se uitbarstings teen homoseksualiteit.

Die polisie het die Galz-kantore al by verskeie geleenthede deursoek en aanklaers het klagtes teen die vereniging gebring weens die feit dat dit ‘n ongeregistreerde organisasie is. Maar ‘n landdros het verlede week die klag van die hand gewys.

Dieselfde geslag huwelike word in Zimbabwe verbied.

Wreedheid van jongste plaasmoord skok

In die jongste plaasmoord, is die egpaar, Eckard (76) en Elizabeth Schutte, en hul seun Lutz (33), so erg vermink dat die polisie nie met sekerheid kan sê hoe hulle vermoor is nie.

Die polisie se woordvoerder sê die gesin kon doodgeslaan gewees het. Hulle is waarskynlik geslaan, gesteek, opgekap en verbrand.

Die skokkende wreedheid van die moord op die Schutte-egpaar, Eckard en Elizabeth en hul seun Lutz in KwaZulu-Natal het die gemeenskap van Richmond geruk.

Die vader se nek en bors is oopgekap en die moeder se kop is met ‘n swaar voorwerp verbrysel. Al drie is aan die brand gesteek. Al drie het ook steekwonde gehad.

Die aanvallers het met ‘n voertuig en wapens weggekom. Hulle verkeer steeds op vrye voet.

Volgens die polisie het hulle geen inligting oor moontlike verdagtes nie, maar hulle is reeds as swart beskryf., en ‘n getalryke bende. Die aanval en moorde toon al die tekens van ‘n etnies gedrewe haatmisdaad teen blankes.

Daar is in 2014 reeds vyftig blanke slagoffers vermoor in rasgedrewe aanvalle.

‘n Buurman van die oorledenes het gesê die seun, Lutz, het Saterdag uit Duitsland in Suid-Afrika aangeland om sy vader te verras met sy 77ste verjaarsdag op Sondag.

Sy moeder het hom Saterdag by die lughawe gaan haal. Die moordenaars het hulle tuis ingewag waar mnr Schutte vermoedelik toe al reeds vermoor is.

‘n Ander seun van die egpaar, Stefan, het die lyke ontdek toe hy vir die verjaarsdagviering opdaag.

Sommige Limpopo-skole het nog nie handboeke nie

Sommige skole in Limpopo het nog nie hul handboeke ontvang vir die 2014-skooljaar nie, het Rapport Sondag berig.

“Hulle [die onderwysdepartement] maak ‘n bohaai oor die radio om te sê dat die boeke afgelewer word, maar dit is nie so, en dit is ‘n probleem,” het Sipho Mothobuka gesê. Hy is die skoolhoof van Laerskool Moloketla, een van die skole wat geraak word.

‘n Wiskunde-onderwyser by die skool, Daniel Ramatladi , het gesê onderwysers gskryf soms die hele handboek op die bord.

Moloketla Primêre was een van agt skole in die Capricorn en Mopani-distrikte in Limpopo wat joernaliste besoek het om te bepaal of handboeke afgelewer is vir die 2014-skooljaar.

Die mediaspan van Rapport se susterkoerant, City Press, het bevind dat daar ernstige tekorte aan handboeke in alle grade en vakke is, alhoewel dit nie naastenby so erg soos die tekorte in die provinsie in 2012 is nie.

Die skole wat nog steeds wag op handboeke is Moleketla Laerskool , Khethapoye Laerskool , Thaphane Laerskool , Modumela Sekondêr, Kabelo Sekondêr en Moremotse Sekondêr.

Elia Mhlanga, ‘n woordvoerder vir die departement van basiese onderwys, het gesê die tekorte kan ‘n gevolg van die migrasie van studente tussen die verskillende provinsies aan die begin van die jaar wees.

Oscar-sirkus begin

‘n Groot aantal joernaliste van Westerse mediamonopolië het die staatsaanklaer in die Oscar Pistorius-moordverhoor ingewag kort voor agtuur Maandagoggend by die Hooggeregshof in Pretoria.

Die sirkus in die hofsaal sal regstreeks op televisie en radio uitgesaai word. Die saak trek wêreldwyd aandag en groot gedeeltes van die hofverrigtinge sal te siene wees soos dit ontvou.

Die 27-jarige Olimpiese atleet se hofverrigtinge begin om tienuur. Buite-uitsendingseenhede en tente het soos paddastoele in Madibastraat in die Pretoriase middestad verrys.

Die verkeersowerhede in Pretoria het motoriste gewaarsku dat hulle verkeersontwrigtings in die omgewing van die Hooggeregshof te wagte kan wees. Die saak is vir ten minste drie weke op die hofrol geplaas.

Die wit gestremde sportster se skuld of onskuld sal afhang van hoeseer die regter die onaanvaarbare hoë vlakke van misdaad in Suid-Afrika in ag neem.

Pistorius voer aan dat hy Reeva Steenkamp as ‘n inbreker aangesien het toe hy haar op 14 Februarie, Valentynsdag, verlede jaar in sy huis doodgeskiet het.

Die staatsaanklaer Gerrie Nel sal die staat se saak lei teen die atleet wat teregstaan vir die moord op sy vriendin, Reeva Steenkamp.

Meer as 300 plaaslike en internasionale joernaliste sal die saak volg. Die minister van Sport, Fikile Mbalula het intussen gevra dat die reg sy gang gaan. Hy sê elke aangeklaagde is onskuldig totdat hy of sy skuldig bewys kan word.

Die verdediging se advokaat, Barry Roux, en sal teen Nel te staan kom. Die saak sal deur die swart regter Thokozile Masipa gehoor word.

Reeva se pa, Barry Steenkamp, sal weens gesondheidsredes nie die verhoor bywoon nie. Ander familielede, waaronder haar ma, June, sal wel teenwoordig in die hofsaal wees.

Pistorius se regspan onderhandel nog met die Steenkamps oor ‘n multimiljoenrand-eis wat die Steenkamps teen die atleet ingedien het weens ‘n verlies aan inkomste.

Joernaliste is gevra om nie te praat met die regter of die regslui betrokke in die Hooggeregshof in Pretoria nie.

‘n Woordvoerder van die Kantoor van die Hoofregter, Lulama Luti, het aan die media gevra om nie met hulle te praat nie en verslaggewers beveel om nie foto’s van die hofsaal te neem met selfone of tablette nie.

Nathi Ncube, woordvoerder van die nasionale vervolgingsgesag, het aan die media in die openbare galery gesê hulle sal nie die meriete van die saak bespreek nie.

Polisie sê hulle is nie genoeg om plundery te stop

Verskeie winkels wat aan Somaliërs behoort, is by Pienaar naby Nelspruit geplunder. Die aanvalle het gevolg op die dood van ‘n 20-jarige man, wat na bewering aan die hand van ‘n winkeleienaar gesterf het.

Die plundering het begin nadat die slagoffer begrawe is. Een van die Somaliese winkel-eienaars Ali Mohamed sê die polisie doen nie genoeg om hulle te beskerm nie.

Mohamed sê hulle het die saak drie dae gelede by die polisie aangemeld, maar niks word gedoen nie.

Hy sê die polisie daag altyd eers op nadat die winkels reeds geplunder is. Die eienaar se verteenwoordiger voeg by dat die mense wat dit doen, skoolgaande kinders is.

Mpumalanga se polisiewoordvoerder, Jabu Ndubane, het die bewering ontken. “Ons het nie versuim nie maar die winkels is te veel en ons het ‘n paar ander eenhede versoek om ons te kom help hier by die stasie.”

Ndubane het beklemtoon dat hulle die Somaliese winkeleienaars voor die begrafnis gevra het om uit te beweeg, maar hulle het nie.

Swaar reën voorspel

KwaZulu-Natal is gewaarsku om hom gereed te maak vir moontlike oorstromings in die volgende paar dae, het RSG berig.

Die Nasionale Weerdiens sê voorspellers hou ‘n ogie op ‘n naderende kouefront wat oor die provinsie inbeweeg.

Sy sê die noorde van die provinsie sal die ergste deur swaar reën geraak word. Swaar reën word ook oor Gauteng voorspel.

Goeie reën sak sedert Vrydag in die provinsie uit. Die kanse vir reën word op 80 persent beraam.

Voorspellers sê reenbuie sal ook nog môre uitsak.

ANC-lid voor vir gewapende roof

’n ANC-wyksraadslid van Middelburg laai glo niksvermoedende vroue langs die pad op om hulle met ‘n vuurwapen af te dreig en te beroof.

Die ANC-lid en haar man verskyn volgende week in die hof op aanklagte van aanranding en gewapende roof, het die City Press berig.

Hulle word daarvan aangekla dat hulle vroulike rylopers geleenthede aangebied het op die snelweë tussen Middelburg en Springs om hulle met ‘n sneller teen die kop te besteel as hulle inklim.

Een van die klaers het volgens die polisie die agbare wyksraadslid in Middelburg herken ná die voorval, en het toe vasgestel dat haar aanvaller ook ‘n ANC-ampsdraer is.

Nog ‘n vrou wat so afgedreig en beroof is, het die twee se motorregistrasienommer neergeskryf en dit aan die polisie oorhandig.

Die man en vrou is twee weke gelede in hegtenis geneem en sal Woensdag in die Springs-landdroshof verskyn.

McBride is Opod se nuwe hoof

Die uiters omstrede voormalige bomplanter Robert McBride is as die nuwe hoof van die Polisie se Onafhanklike Ondersoekdirektoraat (Opod) aangestel.

Die Minister van Polisie, Nathi Mthethwa, sê McBride sal eerskomende Maandag in sy nuwe pos instap.

McBride was destyds deel van ‘n groep van Umkhonto we Sizwe wat twee restaurante in Durban in 1986 opgeblaas het waarin onskuldige burgerlikes dood is.

Drie vroue het in die ontploffing omgekom en nog 69 is beseer.

McBride is later as die hoof van die Ekurhuleni Metropolisie aangewys maar het sy werk verloor nadat hy van dronkbestuur aangekla is.

Die Direktoraat was vir meer as ‘n jaar sonder ‘n permanente hoof na die vertrek van Francois Beukman.

Malema onskuldig op aanklag van roeklose bestuur

juju — SA se regstelsel blykbaar pasgemaak vir Juju

Die leier van die Ekonomiese Vryheidsvegters, Julius Malema is in die Vanderbijlparkse Landdroshof onskuldig bevind op aanklagte van roekelose bestuur.

Malema het erken dat hy te vinnig gery het, maar hy sê hy het uit “sy foute geleer”.

Malema is op 23 Desember in die Vaaldriehoek in hegtenis geneem nadat hy glo teen 215 kilometer per uur gejaag het.

‘n Woordvoerder van die Gautengse Verkeerspolisie, Obed Sibasa sê hulle is verbaas oor die hof se uitspraak.

Volgens Sibasa het hulle bewyse aan die hof verskaf, insluitend beeldmateriaal en verklarings, maar dit is nie in die hof getoets nie.

Die Gautengse Verkeerspolisie sê hulle sal dit oorweeg om appél aanteken teen die beslissing.

‘n Klag van aanranding is dié week ook teen Malema laat vaar in ‘n ander voorval waar hy na bewering ‘n wit motoris geslaan het in ‘n padwoedevoorval.