Turkse premier prys Facebook-stigter Zuckerberg

Die Turkse president Erdogan het Donderdag die stigter van Facebook, Mark Zuckerberg geprys vir die klem wat Zuckerberg plaas op die verskil tussen Islam en terreur.

Hy het ‘n boodskap aan die miljardêr gestuur ter ondersteuning omdat hy Moslems teen diskriminasie beskerm.

Erdogan, wat voorheen gedreig het om Facebook te verbied in sy land, het sy amptelike webwerf gebruik om te reageer op Zuckerberg, in Turks sowel as in Engels.

“Ek het baie waardering vir Mark Zuckerberg se boodskap wat die groot verskil tussen Islam en terrorisme uitwys, aangesien hierdie twee konsepte dikwels in dieselfde asem genoem word deesdae,” het hy geskryf.

“Islam is ‘n godsdiens van vrede.”

Erdogan is onlangs deur die Russiese president daarvan beskuldig dat hy direk meewerk om ISIS, die Islamitiese staat, te befonds.

Die ondersteunende boodskap kom net dae nadat die Republikeinse presidensiële kandidaat Donald Trump internasionale verontwaardiging uitgelok het deur ‘n verbod te vra op Moslems wat reis na die Verenigde State van Amerika.

Erdogan, wat in Augustus herverkies is as Turkye se premier nadat hy reeds vir meer as ‘n dekade aan bewind was, het voorheen geen geheim van sy minagting vir sosiale media gemaak nie.

Die regering het Twitter en YouTube dae voor Maart 2014 se plaaslike verkiesings geblokkeer nadat nuus van ‘n beweerde korrupsieskandaal versprei is.

Maar die Turkse leier wat glo Ottomaans in skole wil inbring, het sy standpunte effens versag in die afgelope tyd.

Ottomaans, terloops, is Turks wat in Arabiese skrif geskryf word, anders as Turks wat vandag mbv ‘n Westerse alfabet geskryf word.

Sy amptelike Facebook-bladsy plaas deesdae gereeld sy toesprake en verklarings.

Vrystaat oorhandig ses luukse sedans aan tradisionele leiers

Premier Ace Magashule van die Vrystaat het ses splinternuwe Mercedes-Benzes aan tradisionele leiers in sy provinsie oorhandig.

Volgens DA-lid van die Nasionale Raad van Provinsies Roy Jankielsohn, kon die R3,2 miljoen wat bestee is aan die motors ​​slagoffers van droogte gehelp het.

“In ‘n tyd waar die Vrystaat ly onder die juk van die ergste droogte in dekades, ‘n steeds stygende waterkrisis en verlammende werkloosheid, het Premier Magashule besluit om luukse Duitse sedans te koop in ‘n poging om landelike stemme te verseker vir die ANC volgende jaar,” het hy in ‘n verklaring gesê.

Jankielsohn het gesê hy is teleurgesteld dat tradisionele leiers in die provinsie hul verantwoordelikhede teenoor die mense wat “voortgaan om te ly in armoede en ontneming” versaak.

“Die DA doen ‘n beroep op die mense van die Vrystaat om die voortgesette misbruik van mag en openbare fondse deur die ANC en hul trawante te verwerp.”

Die premier se kantoor het gesê hulle sal reageer op ‘n later stadium.

Intussen, het die voorsitter van die Huis van Tradisionele Leiers, koning Lelika Moloi, bewerings verwerp dat die voertuie dien as ‘n geskenk om stemme vir die plaaslike verkiesings volgende jaar te werf.

“Dit is nie ‘n geskenk nie, maar ons reg en ons is dankbaar vir die motors,” het hy gesê.

Trump stel sy besoek aan Israel af

Die handskoene is af in die stryd tussen ‘n Amerikaanse presidentskandidaat en Israel.

Politici in Israel het Woensdag hul regering gevra om Donald Trump, voorloper in die Republikeinse Party se benoemingstryd vir 2016 se presidentsverkiesing, die land te verbied.

“Ek beveel aan dat teen terroriste en ekstremistiese Islam geveg word, maar ek sou nie ’n boikot van, verwerping van of oorlog teen Moslems in die algemeen verklaar nie,” het Yuval Steinitz, minister van energie, aan Army Radio in Israel gesê.

Benyamin Netanyahu, Israeliese premier, het ook Trump se opmerkings dat Moslems verbied moet word om na die VSA te reis, in ’n verklaring skerp veroordeel.

“Israel respekteer alle gelowe en beskerm die regte van sy burgers met ywer,” het hy gesê.

Trump het intussen getwiet dat hy eers besoek sal bring aan Israel nadat hy tot Amerikaanse president verkies is. Na wat berig word het Trump beplan om die Tempelberg te besoek.

Trump se voorneme om Israel te besoek het konsternasie by Joodse leiers veroorsaak wat in ‘n felle stryd teen Palestyne gewikkel is en daarvan beskuldig word dat hulle onverpoos ‘n ongenaakbare veldtog teen Arabiese Moslems, ook vroue en kinders, voer.

Trump se anti-Moslemuitsprake het hom intussen ’n eredoktorsgraad van ’n Skotse universiteit gekos.

Die Robert Gordon University in Aberdeen, Skotland, het ’n eredoktorsgraad wat in 2010 aan Trump toegeken was, teruggetrek.

Die universiteit het getwiet Trump se stelling is “totaal in stryd met die etos en waardes van die universiteit”.

Die Landmark-groep, een van die grootste kleinhandelmaatskappye in die Midde-Ooste, gaan glo alle “Trump Home”-handelsware van hul rakke verwyder uit protes teen Trump se uitlatings.

Inisiasieskooleienaar in Welkom van moord aangekla

Die eienaar van ‘n inisiasieskool in Welkom en sy assistent sal na verwagting vandag in die plaaslike landdroshof verskyn nadat ‘n man by die skool dood is.

Polisiewoordvoerder in die Vrystaat, Stephen Thakeng, sê die twee mans is Woensdag in hegtenis geneem by Riebeeckstad nadat die polisie inligting ontvang het dat ‘n man by die skool dood is.

Thakeng sê die polisie was vinnig op die toneel.

Thakeng sê die 54-jarige eienaar van die skool en sy 45-jarige assistent word van moord en die oortreding van die wet op inisiasieskole aangekla.

Cosatu waarsku David van Rooyen oor kerntransaksie

Cosatu het Donderdag die nuwe minister van finansies, David van Rooyen, gemaan dat hy nie behoort voort te gaan met die staat se beplande kernkragtransaksie nie.

Die Franse Areva-kerntender vir Eskom is pas deur ‘n appèlhof ter syde gestel.

Volgende maand sal die reuse kernkragtender aan die Russe, onder aanvoering van Tina Joemat-Pettersson, die minister van energie, beslis word.

Joemat-Pettersson sê die tender moet reeds voor die begin van die volgende finansiële jaar in April aan die suksesvolle bieër toegeken word.

Die vorige minister van finansies Nene was gekant teen die beplande tender en het in ‘n onderhoud gesê die regering se plan om 9,600MW van kernkragkapasiteit te bekom, sal eers goedkeur word as dit bekostigbaar is.

Ontleders meen Nene is in die pad gesteek oor sy besware. Die waarde van die kernkragtransaksie sal na verwagting tussen R650 miljard en R1000 miljard wees.

Kommer heers in sekere kringe oor die kernkragplanne wat deur die presidensie ondersteun word, omdat dit reuse geopolitieke implikasies het.

Gordon Mackay, die DA se woordvoerder oor energie, het Donderdag gesê Zuma se besluit om ontslae te raak van Nene hou direk verband met Nene se teenstand teen die kernkragplanne.

Die tesouriedokument waarin die finansieringsmodel vervat is, is steeds geklassifiseer sodat die portefeuljekomitee oor energie nog nie insae daarin gehad het nie.

Die kernkragkontrak wat Suid-Afrika met Rusland wil sluit, sal glo mbv ‘n leningskema gefinansier word.

Alhoewel die SAL-kontrak van R6 miljard voorgehou word as die rede waarom Zuma van Nene ontslae geraak het, meen ontleders dat die kernkontrak die werklike rede is.

In ANC-besprekingsdokumente voor sy nasionale algemene raadsvergadering het die party verklaar dat ‘n deursigtige bekostigbaarheidstudie oor kernkrag gedoen behoort te word.

Wat duidelik is, is egter dat sulke besluite weens politieke oorwegings geneem sal word.

Regbank straf Franse Areva oor Eskom-tender

Die Amerikaanse firma Westinghouse se kanse om ‘n reuse Eskom-tender te bekom het aansienlik verbeter nadat die Appèlhof ‘n tender aan die Franse kernmaatskappy, Areva, ter syde te stel het.

Britse en Amerikaanse invloedsmouse het die beslissing verwelkom wat Eskom se toekenning aan Areva in die wiele ry.

Die DA het gesê dit is ‘n bewys van grootskaalse “tenderkorrupsie” by die maatskappy, alhoewel dit wil voorkom asof die beslissing dui op ‘n politieke keuse van die regbank teen Frankryk en nie geskoei is op gesonde regsbeginsels nie.

‘n Woordvoerder oor Energie, Gordan Mackay, het selfs die besluit van die Appèlhof verwelkom omdat dit die politieke inmenging in die toekenning van tenders aan Hitachi vir die bou van die Medupi kragstasie omkeer.

Hy het vermoedens bevestig dat die afdanking van Nene as Minister van Finansies verband hou met die staat se kerntenders.

Die tender van sowat R5 miljard wat Eskom aan die Franse kernmaatskappy Areva toegeken het, is deur ‘n direkte mededinger, die Toshiba-filiaal Westinghouse uitgedaag.

Eskom wil hê dat Areva die ses stoomkragopwekkers vervang by die Koeberg-kragstasie. Westinghouse was Areva se enigste mededinger, maar het in Maart ‘n hofstryd teen Areva verloor. Hulle het toe teen die beslissing geappelleer.

Woensdag se uitspraak het gehandel oor Eskom se besluit om weens “strategiese” faktore die tender toe te ken.

Areva en Westinghouse was die enigste bieërs wat aan die tegniese kriteria kon voldoen, daarom sal Westinghouse outomaties die tender kon ontvang na die jongste uitspraak.

Eskom het die tender in Augustus verlede jaar aan Areva gegee as gevolg van strategiese oorwegings wat insluit dat Areva die oorspronklike vervaardiger van die toerusting by Koeberg was en oor meer ervaring beskik.

Areva het daarbenewens ‘n gedetailleerde skedule vir die voltooiing van die werk met hulle tenderaansoek ingehandig met slegs ‘n drie-maande-marge wat toelaat vir foute, iets wat Westinghouse nie kon ewenaar nie.

Griekse polisie skuif migrante na skermutselinge uitbreek

Die Griekse polisie moes inderhaas Woensdag 2300 migrante wat gestrand was vir drie weke lank by die grens met Masedonië na Athene verskuif weens oplaaiende spanning. Die fortuinsoekers hoop op asiel in Noord-Europa.

Skermutselinge het uitgebreek, alhoewel nie op die skaal van die onlangse botsings tussen die polisie en die migrante nie, wat die owerhede genoop het om die toestand te probeer ontlont.

Die fortuinsoekers is meestal uit Pakistan, Marokko, Algerië en Somalië waar daar geen konflikte is nie.

Hulle is eers in tente gehuisves in ysige toestande naby die dorp van Idomeni.

Toue mense het saamgedrom om kos te ontvang, wat deur liefdadigheidsorganisasies beskikbaar gestel word, by die vlugtelingkamp naby die noordelike Griekse dorp.

Masedoniese owerhede laat net vlugtelinge uit Sirië, Afganistan en Irak toe om die grens na hul land oor te steek.

Die Griekse polisie sê ongeveer 1 400 migrante van ander nasionaliteite is op die Grieks-Masedoniese grens gestrand en slaap in skuilings wat deur welsynsorganisasies verskaf word.

Die verdinking van ‘n Siriese vrou en haar sewe kinders in die Egeïese See het intussen die nuus gehaal om anti-immigrasiesteun te probeer keer.

Dit is die jongste tragedie wat voorgehou word sodat medelye gewek kan word vir diesulkes wat poog om Griekeland vanaf Turkye te bereik.

Die vrou se man het die bootvaart oorleef. Die Asago-familie het blykbaar van die Islamitiese Staat gevlug. Sewentien mense het reeds vandeesweek naby Turkye verdrink.

Rand val soos ‘n klip ná Zuma MK-terroris as minister van finansies aanstel

Die rand het gistermiddag en vanoggend soos ‘n klip begin val nadat Jacob Zuma ‘n voormalige MK-terroris, David van Rooyen, as sy minister van finansies aangestel het. Die vorige minister, Nhlanhla Nene, is summier van sy pos onthef. Die geldeenheid het deur die vlak van R15 per dollar gebreek, asook R16 per euro, en daal nog steeds.

Die ekonoom Cees Bruggemans het vanoggend in sy gereelde nuusbrief gesê:

“Om die rand te voorspel, is ‘n standaardgrap, want die oneindigheidsimbool is die enigste gepaste een om te gebruik.”

Bruggemans voorspel ook dat belastings, rentekoerse en die petrolprys as gevolg van dié stap sal styg. Van Rooyen sal waarskynlik alle staatsbesteding voor die voet goedkeur, wat dan agterna van die belastingbetaler verhaal sal word.

Die nuwe minister van finansies het sy loopbaan as ‘n terroris van Umkhonto we Sizwe in die tagtigerjare begin. Sedertdien was hy ‘n uitvoerende burgemeester van die Merafon-munisipaliteit en ‘n vorige Noordwes-voorsitter van die Suid-Afrikaanse vereniging vir plaaslike regering.

Blykbaar het die Universiteit van Londen in 2014 ‘n MSc Finansies aan Van Rooyen toegeken. Thabo Mbeki beskik insgelyks oor ‘n Britse graad in ekonomie, meesal marxistiese ekonomie.

 

Hittetoestande duur voort

Baie warm en droë weerstoestande duur ongelukkig voort in groot dele van die Vrystaat en Noordwes die volgende week met ‘n geringe kans op reën teen volgende week.

‘n Weervoorspeller in die Bloemfonteinse weerkantoor, Sihle Kunene, sê ‘n hittegolf sal na verwagting tot môre in die suidelike deel van die Vrystaat woed, wat Wepener en Fauresmith insluit.

Die kwik gaan in dié gebied tot 37°C en hoër styg. Teen die naweek word koeler toestande in die suidelike deel van die Vrystaat en die Noord-Kaap verwag.

Kunene sê die kwik kan aansienlik met tussen 4°C en 5°C in die Noord-Kaap daal weens ‘n kouefront wat op pad is. Hy sê temperature kan in die res van die Vrystaat en Noordwes ietwat afneem, maar dit gaan steeds bloedig warm wees met bewolkte toestande die naweek.

Kunene sê geen reën word vir die sentrale deel van die Vrystaat dié naweek voorspel nie. Teen Woensdag is daar ‘n 30%-kans op reën vir die hele Vrystaat. Droogtetoestande duur voort.

Franse verkiesing: Sosialis speel die ‘rassekaart’

Claude Bartolone, die Sosialistiese kandidaat vir die Île-de-France, die streek van 15 miljoen mense wat die hoofstad Parys insluit, het die “rassekaart” gespeel. In ‘n onderhoud met die linkse tydskrif Le nouvel observateur het hy sy opponent van die sentrum-regse Republikeine, Valérie Pécresse, daarvan beskuldig dat sy “agteraf Versailles, Neuilly en die blanke ras verdedig… Sy gebruik dieselfde taal as die Front National, sy gebruik dieselfde subliminale beeld om vrees te saai.” Versailles en Neuilly is albei duur, welgestelde voorstede van Parys wat deur blanke Franse bewoon word, terwyl Bartolone ‘n verteenwoordiger van die gekleurde buurt Seine-Saint-Denis ten noorde van Parys is.

In reaksie het die kandidaat van die Front National, Wallerand de Saint-Just volgens die TV-kanaal BFMTV gesê: “Ons verwerp die buitensporige en kinderagtige beskuldigings van meneer Bartolone. Niemand praat oor ras in dié veldtog nie.”

Valérie Pécresse, wat in die eerste rondte die meeste stemme in die Ile-de-France gekry het, is egter hewig onsteld deur Bartolone, wat van Italiaanse afkoms is, se uitlatings. Sy het op Radio classique gesê:

“Dis ellendig. Ek is skaam vir politiek. As die middele die doel heilig, dink ek die Fransiliane (inwoners van die streek) sal dit straf. Dié verklarings wat my van rassisme beskuldig het ‘n reeks reaksies ontketen. Ek het so pas ‘n telefoonoproep van Calixthe Bevala, die stigter van Africains de France (en ‘n swart skryfster) ontvang, wat my ondersteun. Sy het teenoor my gesê: “Ek vind dit ongevraag, oneerlik, dis verguising.”

‘Die afstammeling van Mussolini en Eva Braun?’

Pécresse het ondersteuning van haar party ontvang, wat ook ‘n verskoning van Bartolone eis. Haar woordvoerder Geoffroy Didier het verklaar:

“Nie net behoort Claude Bartolone nie president van die streek te word nie, maar hy is nie gepas om aan te bly as president van die Nasionale Vergadering (die Franse parlement) nie. Hy verloën reeds sy beloftes: terwyl die slagspreuk van sy veldtog ‘n “menslike Île-de-France” is, gee hy hom oor aan aanvalle wat van haat spreek.”

Die voorsitter van die UDI-party, Jean-Christophe Lagarde, is van mening dat “Claude Bartolone oorverhit is. Hy doen ‘n beroep op kiesers om vir Xavier Bertrand (teen Marine Le Pen in Nord-Pas-de-Calais-Picardie) en Christian Estrosi (in PACA) te stem om die Front National te versper. Hy verduidelik dat regs en verregs nie dieselfde ding is nie. En in die Île-de-France wil hy die indruk skep dat Valérie Pécresse die afstammeling van Mussolini en Eva Braun is? Ek eis van hom dat hy om verskoning vra en terugtrek wat hy gesê het… Die vrees om te verloor regverdig nie sommer enigiets nie. Ons moet mekaar respekteer.”

Intussen het die sentrum-regse koerant ‘n meningsopname van Ipsos gepubliseer wat bevind dat Marine Le Pen slegs 47% stemme teenoor Xavier Bertrand se 53% Sondag in die tweede rondte gaan behaal, wat sou beteken dat die gesamentlike Links-Regse front teen haar daarin kan slaag om haar uit die presidentstoel van Nord-Pas-de-Calais-Picardie te hou. In die verlede het meningsopnames egter die omvang van die Front National se steun onderskat. Ook geniet die FN die meeste steun onder jongmense wat gewoonlik traag is om te stem. Indien die Front daarin slaag om genoeg jongmense na die stembusse te lok, kan hy steeds die knoop deurhaak, volgens sommige waarnemers.

Die sakekoerant Les Echos staan ook skepties teenoor die meningsopname en meen die “republikeinse front” van Links en Regs teen Marine Le Pen, is reeds besig “om te kraak”, waarvan Bartolone se rassismebeskuldiging ‘n voorbeeld sou wees.

Volgens die koerant se politieke rubriekskryfster, Cécile Cornudet, “kry ‘n mens drie dae na die FN se 28% tydens die eerste rondte van die streeksverkiesings die indruk van ‘n ‘red wat daar te redde is’ by die hoofstroompartye, waar bitterheid en weerwraak oorheers”. Sy wys op die verdeeldheid van beide die regse en die linkse partye, terwyl die Front National as die opkomende party verenig in sy strewe en waardes is.