Kommer dat weermag nie uitslag in Lesotho aanvaar nie

Dit is nie seker of adj.pres. Cyril Ramaphosa se pogings om stabiliteit in Lesotho te bewerkstellig, suksesvol sal wees nie.

Rama­phosa is deur die Suider-Afrikaanse Ontwikkelingsgemeenskap aangewys om as hooffasiliteerder op te tree wat tot die verkiesing gelei het.

Terwyl die ver­kiesing Saterdag vreedsaam verloop het en die leiers van die vier die grootste partye aan internasionale waarnemers die versekering gegee het dat hulle wel die uitslag van die verkiesing sal eerbiedig, bestaan kommer dat senior weermagoffisiere nie die uitslag sal aanvaar nie.

Mothetjoa Metsing van die Lesotho Congress of Democrats (LCD), die party wat Lesotho tussen 1993 en 2012 regeer het, geniet steeds steun onder senior weermagoffisiere, terwyl premier Tom Thabane, van die All Basotho Convention, homself voortdurend teen die weermag verset.

Sy herverkiesing kan dus tot geweld lei. Hy het gewaarsku dat Lesotho nie ‘n “eiland” is nie en moet kennis neem van die wense van SAOG.

Thabane het die weermaghoof, lt.genl. Thali Kamoli, vroeër van sy pos onthef en sy afdanking het uiteindelik tot die mislukte staatsgreep gelei toe soldate wat ‘n polisiekantoor in Maseru aangeval het, Thabane se huis bestorm het, en die premier gedwing het om na Suid-Afrika te vlug.

Thabane het onderneem om die aanstigters van die mislukte staatsgreep in Augustus verlede jaar te vervolg, wat die moontlikheid van geweld na die verkiesing verhoog.

Indien geen party ‘n volstrekte meerderheid behaal nie, sal partye tot koalisiesamesprekings gedwing word.

Intussen loop die party van Thabane ver voor, selfs in wyke waar sy teenstander tradisioneel goed gevaar het.

Die stemme word nie elektronies getel nie, maar met die hand, het ‘n OVK-amptenaar Rethabile Pholo gesê.

Volgens die plaaslike media, het sowat 1,2 miljoen mense – uit ‘n bevolking van 2,2 miljoen – geregistreer om te stem.

Massa-aksie vir grond lei tot duisende aansoeke

Voorlopige getalle dui op nagenoeg 33 000 Namibiërs van verskillende ouderdomme en oor kleurgrense wat Vrydag as deel van die landwye massa-aksie eise vir erwe by plaas­like owerhede ingedien het.

“Ons sien wie almal alleen eet; ons wil ook eet. As hulle nie vir ons grond gee nie, sal ons sand in hul maaltye sit,” het Job Amupanda gewaarsku.

Amapundu en Dimbulukeni Nauyoma het hulself as “grondaktiviste” van die Regstellende Herposisioneringsveldtog (AR) beskryf.

Volgens Amupanda sluit hierdie getal nie die meer as 14 000 aansoeke in wat op 21 November verlede jaar by die Windhoek munisipaliteit ingedien is nie.

Die getalle wat die AR-aktiviste gister gerapporteer het, is soos volg: Windhoek (ongeveer 2 500 aansoeke), Walvisbaai (meer as 9 500), Okahandja (bykans 4 000), Swakopmund (meer as 3 500), Ondangwa (bykans 2 500 aansoeke), Ongwediva (2 500), Oshakati (2 500), Keetmanshoop (meer as 800), Otjiwarongo (bykans 2 000), Tsumeb (bykans 2 500) en Rundu (meer as 300).

Met baie getalle wat nog uitstaande is, sê die grond-aktiviste was die massa-aksie ’n reusesukses.

“Dit is duidelik uit hierdie getalle dat die grondkwessie ’n landwye probleem is,” het Amupanda gesê.

Volgens die AR-groep het die massa-aksie op ’n vreedsame wyse plaasgevind ondanks “sekere politici” se pogings om te verhinder dat dit gebeur.

Amupanda het gesê ’n politikus op Rundu het so ver gegaan om ’n “mol”, wat slegs bekend is as Kupembona, te betaal om wan­inligting oor die massa-aksie te versprei.

“Die jeug moet hierdie mol uitsnuffel en identifiseer en van hom ’n verduideliking eis,” het hy geëis.

Die AR-groep het weer eens benadruk dat hy munisipaliteite tot 31 Julie geleentheid gee om grond aan die jeug te verskaf. So nie, sal hulle eenvoudig grond beset, het Amupanda opnuut gedreig.

Op Grootfontein het die gerugte van ’n grootskaalse opmars na die munisipale kantore en massa-optrede teen 11:00 Vrydag die rondte gedoen, maar volgens die woordvoerder van die munisipaliteit, mnr. Luke Salomo, het niks gebeur nie.

Teen 16:00 Vrydag toe die munisipale kantoor gesluit het, is net 75 aansoeke ontvang.

Grootfontein het twee weke gelede 130 gedienste erwe beskikbaar gestel en ’n verdere 137 gedienste erwe is verlede jaar vir die massa-behuisingsprojek beskikbaar gestel. Benewens hierdie erwe is geen gedienste erwe op Grootfontein beskikbaar nie.

Op Otjiwarongo is altesaam 1 846 aansoeke Vrydag ontvang. Die skakelbeampte van die munisipaliteit, me. Adelheid Shilongo, sê die dorpsraad sal nou briewe waarin ontvangs van die aansoeke erken word, aan al die aansoekers stuur.

“Ons sal maar moet wag ek hoor wat die ministerie van streek- en plaaslike regering, behuising en landelike ontwikkeling ons aanbeveel om te doen,” het sy gesê.

Op Ongwediwa het aansoekers reeds vanaf 09:00 voor die dorpsraad se kantoor saamgedrom. Mnr. Peter Tuhafeni, organiseerder van die massa-aksie op dié dorp, het aan Nampa gesê 2 230 jeugdiges het eise ingedien. Mnr. Malakia Petrus, ’n lid van die dorpsraad se bestuurskomitee, sê hierdie aansoekers se name sal by die bestaande waglys vir grond gevoeg word en hulle sal nie voorkeurbehandeling kry nie.

Die massa-aksie vir Rundu is op die nippertjie gekanselleer ná ’n mediakonferensie deur die Swapo-leierskap in Kavango-Oos waarin lede van die party versoek het om hulle nié deur die AR-aktiviste te laai mislei nie. Nampa berig jeugdiges sonder grond het nietemin individuele eise by die dorpsraad ingedien.

Uit Keetmanshoop word berig die munisipaliteit het nagenoeg 150 aansoeke vir grond ontvang. Lede van die polisie het ’n oog oor die verrigtinge gehou, maar alles het vreedsaam verloop. Die aansoeke is deur die Swapo Jeuliga se penningmeester vir die Khomasstreek, mnr. Lukas Shekwaanyena, ingevorder.

Bejaarde op jagplaas vermoor

Die Republikein berig dat die moordenaars van die 76-jarige boer in Namibië nog op vrye voet verkeer.

Reinhard Schmidt van die Namibië Hoodia Jagplaas is Donderdagnag in sy huis op dié plaas deur aanvallers vermoor. Hy het vermoedelik weens versmoring gesterf.

Geen besonderhede oor die aanvallers is bekend nie.

Dit blyk dat buitelandse jagters die volgende dag op die plaas sou aankom.

Die polisie op Mariental het aan Republikein gesê Schmidt het vroeër Donderdagaand nog aandete saam met ander inwoners op die plaas geniet. Hy het daarna na sy huis gegaan en teen 21:00 sy vrou, me. Gudrun Schmidt, gebel wat in Duitsland is. Toe plaaswerkers die volgende oggend by Schmidt se huis na hom roep, was daar geen reaksie nie.

Die werkers het toe die bestuurder per radio laat weet dat daar fout by Schmidt se huis is. Die bestuurder het omstreeks 07:15 vir Schmidt dood in sy kamer gevind.

Die polisie vermoed Schmidt het versmoor het aangesien sy hande agter sy rug met ’n tou vasgemaak was en sy mond en neus met kleefband toegeplak was. Daar was geen teken van ’n worsteling nie.

“Ons vermoed ook dat mnr. Schmidt nie sy huis se deur gesluit het nie, want daar was geen teken van ’n inbraak nie. Die moordenaars moes bloot ingestap het,” het Gariseb verder gesê.

“Op die oomblik lyk dit asof diefstal die motief was. ’n Groot platskerm-televisie, ’n rewolwer, ’n geweer en ’n koelhouer wat vol drank was, word uit Schmidt se huis vermis.”

Die polisie en die plaasbestuur is sedert vroeg Vrydag met ’n intensiewe soektog na die moordenaars besig. Hulle het die spore van vermoedelik drie verdagtes gesny en ’n private vliegtuig is gebruik om die omgewing uit die lug te bespied.

Gariseb het gesê die spore het van die plaas af aanvanklik in die rigting van Schlip gelei en later in die rigting van Omamas weggeswenk.

Teen gisteroggend het die soekspan die spore op die B1-hoofpad tussen Kalkrand en Rehoboth verloor waar dit doodgeloop het.

“Dit lyk asof die verdagtes daar in ’n motor geklim het,” sê Gariseb.

Die polisie ondersoek ook die diefstal van ’n selfoon wat onlangs uit ’n ander huis op die plaas gesteel is. Hoewel die polisie nog nie ’n verband tussen die twee voorvalle kon vasstel nie, dui die ondersoek die selfoon is op Duineveld gebruik.

Die soektog na die verdagtes duur voort.

Die sluipmoord op Boris Nemtsof

Die moordaanslag op die aartshertog van Oostenryk-Hongarye en erfgenaam van die Oostenryk-Hongaarse keiserryk, Franz Ferdinand was in 1914 die druppel wat die emmer laat oorloop het om die moeisame vrede in Europa tot ‘n einde te bring. Die sluipmoord het direk aanleiding tot die Eerste Wêreldoorlog gegee.

Franz Ferdinand en sy vrou Sophie was in Sarajevo, die hoofstad van die provinsie Bosnië-Herzegovina. Die keiserlike paar het besoek gebring aan die weermag daar, maar sou die stad nie lewendig verlaat nie.

Bosnië-Herzegovina was in 1914 deel van die keiserryk, maar buurland Serwië is teen die wil van die Serwiërs deur die keiserryk as provinsie in 1908 by Oostenryk-Hongarye ingelyf.

Die Bosnies-Serwiese nasionaliste, die Swart Hand is opgesteek om die aartshertog uit die weg ruim en drie studente is opgelei om die werk te doen. Hulle het uiteindelik ‘n mislukte bomaanslag op Franz Ferdinand se motor uitgevoer waarin niemand omgekom het nie.

Toe Franz Ferdinand een van die beseerdes van die bomaanval egter wou gaan opsoek na sy ontmoeting met die troepe, is hy en sy vrou deur Gavrilo Princip doodgeskiet toe hulle in ‘n systraat beland het nadat hul bestuurder glo verdwaal het.

Daarmee het die Geallieerdes se verdragsverpligtinge oorgeneem en die hele kontinent in ‘n bloedige oorlog gedompel, met Rusland aan die kant van Serwië en Duitsland aan die kant van Oostenryk. Engeland en Frankryk het die kant van die Russe gekies en die Ottomaanse Ryk weer die Duitse kant.

Die sluipmoord Vrydagaand in Moskou op Boris Nemtsof – ‘n uitgesproke kritikus van Wladimir Poetin – het al die bestandele van die intrige wat in 1914 aanwesig was.

Die eerste vraag is natuulik cui bono?

In hierdie geval weet ons dat Rusland, en in die besonder Poetin, geen voordeel kan trek uit die sluipmoord nie.

Die dood van Nemtsof sou, onder huidige omstandighede, nie sin maak uit die oog van Russiese belange nie.

Polities het hy nie ‘n werklike bedreiging ingehou vir die Russiese leierskap nie. Met minder as 5% steun, was hy nie eers bestem vir die Duma nie. En Poetin se gewildheid is steeds bo 85%.

Sluipmoorde deur ‘n regering lyk desperaat, skep ‘n onnodige martelaar uit ‘n marginale karakter en gee brandstof aan die opposisie tuis, en veral in die buiteland.

Terwyl Nemtsof, ‘n Jood, voorheen ‘n belangrike posisie in 1998 onder Jeltsin as adjunk-premier beklee het, het sy politieke loopbaan sedertdien nie die massas geïnspireer nie.

Die Westerse pers het hom voorgehou as die waarskynlikste persoon om Poetin te vervang indien ‘n ernstige krisis politieke stabiliteit in Rusland aantas.

Nemtsof se gewildheid was tasbaar onder diegene wat Westerse liberale waardes as wenslik bo natuurlike en universele waardes regoor die wêreld stel.

Die enigste party wat egter werklik vir Poetin die stryd kan aansê, is die Kommunistiese Party van Zjoeganof. Maar hierdie feit druis in teen Westerse belange, en is in stryd met die Weste se propaganda wat beweer dat die Weste die Koue Oorlog gewen het.

Intussen het die owerhede aangedui dat Nemtsof nie ver van die Kremlin geskiet is nie, waarskynlik deur hoogsopgeleide sluipmoordenaars. Verskillende koeëls is in sy torso gekry. Hy is in die hart getref.

Sy jong Oekraïense vriendin, ‘n model, is ongedeerd. Laasgenoemde feit sal deur talle Russe aangegryp word as die werklike leidraad om op te volg.

Met die konflik in die Oekraïne wat dreig om NAVO-lande by ‘n volskaalse oorlog teen Rusland te betrek, soos in 1914, glo die meeste dat Nemtsof se moordenaars só ‘n uitkoms sal verwelkom.

Reën kom, maar vir talle te laat

Goeie reënbuie in groot dele van die Vrystaat die afgelope week het welkome verligting vir talle boere gebring al het droogtetoestande reeds sy tol op baie somergewasse, veral mielie-oeste geëis, het OFM berig.

‘n Gemengde boer van Bothaville, Christiaan Bouwer, sê die afgelope week se reën help baie vir weiding en dele in die distrik kan baat daarby. Hy sê egter die reën het té laat gekom vir ‘n groot deel van sy mielie-oes omdat daar nie vol bestuiwing weens die droogte en hitte plaasvind het nie.

Sy sonneblom-oes het ook skade gely, terwyl die reën wel vir sy grondbone, wat nog groen en welig is, gehelp het.

Bouwer meen die hele distrik het sowat 50% droogteskade.

Volgens hom is dit die eerste keer sedert Kersfees dat dit goed in die distrik gereën het.

Intussen voorspel die Nasionale Weerdiens in Bloemfontein nog reën oor die naweek vir sentraal-Suid-Afrika. Daar is ‘n 60% kans op reën môre en Saterdag vir die hele Vrystaat, terwyl daar ‘n 30% kans op reën vir Noordwes is. In die oostelike deel van die Noord-Kaap is daar ‘n 30% kans op reën tot Sondag.

Twee bejaardes gesteek, doodgebrand in hul huis

Die bejaarde egpaar wie se liggame Donderdagoggend in hul gebrande huis in Pietermaritzburg in KwaZulu-Natal aangetref is, se name is bekend gemaak.

Albei slagoffers is met ‘n skerp voorwerp in hul nekke gesteek.

Kol. Jay Naicker, polisiewoordvoerder, het die egpaar geïdentifiseer as Melvin Lawson en sy vrou Susanna, albei 71 jaar oud.

Malcolm se liggaam is in die spaarkamer aangetref met sowat vyf steekwonde aan sy nek. Susan se liggaam het in die gang gelê. Die verdagtes het glo petrol of paraffien oor haar uitgegooi en haar aan die brand gesteek.

Die aanvallers het die egpaar se huis aan die brand gesteek voordat hulle van die toneel gevlug het. Hul televisiestel word vermis.

Die bure het die nuus versprei dat die Lawson-egpaar se huis brand. Die polisie was glo dadelik op die toneel.

Die polisie ondersoek twee sake van moord, ‘n saak van huisroof en ‘n saak van brandstigting. Dii is nie bekend hoeveel aanvallers die egpaar vermoor het nie.

Twee bejaardes in Virginia aangeval

Twee bejaardes is op hul plaas in Virginia in die Vrystaat aangeval.

Sers. Mamello Mokhuoane, woordvoerder van die polisie, het gesê die drie swart verdagtes het deur ‘n venster die huis binnegedring. Die verdagtes het glo almal klapmusse gedra.

Ronald Nel (66) en sy vrou Ciska is vroeg Donderdagoggend is met elektriese kabels vasgebind. “Die verdagtes het ʼn vuurwapen op die egpaar gerig en geld geëis. Die drie het die huis deursoek en op die kluissleutels afgekom.”

Die verdagtes het met ‘n aantal wapens waaronder jaggewere en ‘n pistool, ammunisie, kontant en ‘n selfoon gevlug.

Volgens Mokhuoane kon Nel en sy vrou daarin slaag om hulself los te wikkel en bure en die polisie te ontbied. Die polisie ondersoek ‘n saak van gewapende roof.

Waarnemers glo Lesotho reg vir stem

Verkiesingswaarnemers van die Afrika Unie glo dat Lesotho gereed is om môre na die stembus te gaan, het RSG berig.

Die span van 40 waarnemers is reeds vir meer as ‘n maand in Lesotho. Die leier, Raila Odinga, sê hoewel daar uitdagings is, glo die span dat die speelveld gelyk is en dat ‘n vry en regverdige verkiesing moontlik is.

Meer as een komma twee miljoen kiesers sal na die stembus gaan. Die verkiesing is met twee jaar vervroeg om ‘n einde aan politieke onstabiliteit in die bergkoninkryk te bring.

Zuma ontken bewerings oor EFF-ontmoeting in Mosambiek

President Jacob Zuma het amptelik bewerings ontken dat hy met lede van die EFF in Mosambiek onderhandel het.

In ‘n geskrewe antwoord op ‘n parlementêre vraag deur die Demokratiese Alliansie Donderdag, het Zuma ontken dat hy ‘n vergadering by die Southern Sun Hotel in Maputo op 18 Januarie vanjaar na bewering saam met EFF-leiers bygewoon het.

Zuma was amptelik in die Mosambiekse hoofstad op 15 Januarie vir die inhuldiging van Filipe Nyusi as dié land se president.

DA-LP John Steenhuisen het ‘n skriftelike vraag aan die president gestel oor die beweerde Maputo-ontmoeting.

In sy skriftelike antwoord, het Zuma gesê: “Nee. Ek het nie ‘n vergadering in Maputo bygewoon, in Mosambiek op 18 Januarie 2015 nie.”

Bewerings van ‘n vergadering tussen EFF-leiers en ‘n groep van die ANC is in ‘n brief aan EFF-leier Julius Malema deur Gayton McKenzie gemaak.

Maar Zuma se beweerde betrokkenheid by die vergadering het aan die lig gekom tydens ‘n perskonferensie deur sekere beswaarde EFF-lede, wat beweer het dat Zuma veronderstel was om die vergadering by te woon.

Hulle beweer dat die LUR in Gauteng vir onderwys Panyaza Lesufi en ANC-LP Mathole Motshekga gereël het dat Zuma die EFF-leiers in Maputo ontmoet.

Lesufi, Motshekga en die EFF het intussen ook die bewerings ontken.

Volgens Malema hoef hy nie deur ander partye te werk om met die president te vergader nie. “Eerste van alles, Panyaza hoef nie reëlings vir my te maak as ek die president wil ontmoet nie,” het hy gesê.

“Daar is ‘n lyn van kommunikasie. Na afloop van die verkiesing verlede jaar, kan ek Lakela Kaunda [hoofbedryfsbeampte in die Presidensie] skakel en vir haar sê ek wil met die president praat.

Skare slaan selfmoordbomaanvaller dood

‘n Selfmoordbomaanvaller in Nigerië wat ‘n tweede ontploffing wou veroorsaak, is deur ‘n skare doodgeslaan.

Minstens 17 mense is dood toe ‘n selfmoordbomaanvaller by ‘n bushalte in die noordooste van Nigerië se Borno-staat toegeslaan het.

Volgens militêre bronne het ‘n tweede selfmoordaanvaller probeer om sy toestel by dieselfde bushalte te laat ontplof.

‘n Skare mense het hom egter gekeer en doodgeslaan.

Die Boko Haram-groep is bekend daarvoor dat hy selfmoordbomaanvallers gebruik.

Die Nigeriese weermag, saam met sy buurlande Kameroen, Niger en Tsjad het die afgelope drie weke verskeie oorwinnings in skermutselings met Boko Haram behaal.