Kees gryp vierjarige

‘n Vierjarige dogtertjie is verlede Woensdag vir etlike meter aan die arm gesleep toe sy deur ‘n bobbejaan by ‘n bekende piekniek-plek in die Nasionale Kruger-wildtuin (NKW) gegryp is, het die Lowvelder berig.

‘n Oog-getuie, mnr. Theuns Koen, het aan Laevelder vertel hoe ‘n groot bobbejaan, waarskynlik die brandwag, die kind by die Nkuhlu-piekniekplek gegryp het en sowat vier meter ver met haar gehardloop het, voordat hy haar neergegooi het.

Volgens Koen het sy langs haar ouma geloop toe die dier haar gryp.
“Ek het met ‘n besemstok op hom afgestorm en hy het haar gelukkig gelos. Sy het geen bytmerke aan haar lyfie gehad nie, maar was erg getraumatiseerd.”

Koen het vroeër onder dieselfde trop deurgeloop toe hy saam met familie en vriende by dié plek – tussen Laer Sabie en Skukuza – gestop het.

“Ons het net die vleis op die rooster gehad en die tafel klaar gedek, toe vyf bobbejane op ons afstorm. Hulle het uit alle rigtings op ons toegesak.

Een het bo-op my vriendin se rug gespring, die glas uit haar hand gestamp en daarna met die broodrolletjies weggehardloop.”

Volgens Koen het hulle met hul aankoms die diere opgemerk, maar is ‘n besemstok gegee om hulle te verjaag. “Die personeel het gesê die bobbejane is bang vir die besemstokke, maar dit was beslis nie die geval nie.” “Ek is die duiwel in en het besef hier kan ‘n mens nie meer stop nie. Dié plek sal my nie weer sien nie,” het hy gesê.

Volgens Koen was daar wel ‘n man wat die area gepatrolleer het, maar dié was aan die ander kant van die kamp. Daar is ook geen waarskuwingstekens nie, – slegs ‘n “geen alkohol”-kennis-gewing.
Laevelder het die wildtuin gekontak en alhoewel daar volgens mnr. Oubaas Coetzer, kommunikasiewoordvoerder van die Skukuza-polisiestasie, geen amptelike klagte ingedien is nie, dra die park wel kennis van die bobbejaan-probleem by Nkuhlu.

Volgens dr. Freek Venter, bestuurder van bewaringsbestuur van die NKW, is hulle reeds besig om aandag aan die probleem te gee.

“Daar is ‘n voerplek vir die bobbejane gemaak en ‘n groot vanghok is gestel.”

“Ons hoop om hulle binnekort te hervestig.”

Venter het ‘n beroep op besoekers gedoen om geen diere te voer nie.

Gauteng-inwoners waarsku teen aanvallers

Die Lytteltonse Gemeenskapspolisieforum in Centurion, het inwoners gewaarsku om op die uitkyk te wees vir twee “mans” wat hulle as polisiebeamptes voordoen.

Dié twee in uniform is daarop uit om inwoners aan te val en te beroof.

Die forum se woordvoerder, Clive Niepieer sê dit is ‘n ernstige misdaadprobleem, het RSG berig.

Hy sê die regte polisie moet dadelik ingryp.

Dit is nie bekend wat die ras van die aanvallers is nie, maar hulle is vermoedelik swart.

“Ons voorhek maak geheimsinnig oop vir die afgelope week of so en elke keer is ‘n baie verdagte wit Nissan-bakkie buite geparkeer in die straat,” het Milan Olivier van Atholl in Sandton gesê in nog ‘n voorval van misdaadteitering in Gauteng.

Hy het gesê hy het laas gesien hoe die bakkie geparkeer is in die straat op 7 Desember.

“Ek het buite die bakkie gaan inspekteer,” het Olivier gesê. Hy het gesê ‘n swartman met “dreadlocks” bestuur die voertuig.

“Ons glo hy is besig om die afstandbeheer van die hekke in die gebied te kloon en verken die gebied vir moontlike kwesbaarhede,” sê Olivier.

Dit is bekend dat voertuie dikwels in opritte gekaap word op dié manier.

Hy het gesê ADT se sekuriteitspersoneel het die swarte ‘n paar blokke weg langs ‘n elektriese kas gekry.

“By navraag het hy verdag geantwoord dat hy wag vir ‘n vriend en daarna vinnig die toneel verlaat,” verduidelik Olivier.

“Ek wil net Sandton-inwoners hieroor waarsku, veral nou dat ons nader aan die Desember-vakansie kom,” het hy gesê.

“Ek wil almal aanmoedig om ekstra versigtig te wees ten opsigte van hul veiligheid.”

Olivier het ook aan die Bramley-polisie gerapporteer. Ao Moses Maphakela, woordvoerder van die Bramley-polisie, waarsku Atholl se inwoners om ekstra waaksaam te wees.

AgriSA bekommerd oor minimumloon

Agri SA het Dinsdag gesê dat ‘n nasionale minimumloon tot werksverliese sal lei.

“Dit sal uiters kortsigtig wees, selfs onmenslik, om nie die desperate toestand te erken waarin baie Suid-Afrikaners hulself bevind nie,” het Johannes Möller, president van Agri SA, gesê.

“Ons kan as individue en as ‘n land beslis nie onsself blind hou vir die absolute armoede of selfs nog erger, dat mense nie kos het nie.”

Hy het gesê ʼn verhoging van 52% in die minimumloon in 2013 in die landbousektor, het die reeds merkbare afname in werkverskaffing in die bedryf veroorsaak.

Hy het bygevoeg dat die voorstanders van ‘n nasionale minimumloon klaarblyklik nie verstaan dat produktiwiteit die vlak van welvaart bepaal nie. Om bloot lone op hoër vlakke te stel, is nie die oplossing nie.

Möller meen dat selfs die huidige minimumloon die werksgeleenthede vir veral ongeskoolde werkers, nog verder kan belemmer.

“Dit oortree die edele doelwitte van die Nasionale Ontwikkelingsplan vir die bedryf om teen 2030 een miljoen poste te skep,” het hy gesê.

“Wat ons wel benodig, is ‘n arbeidsmag wat beter opgelei is, arbeidsmarkte wat nie so streng is nie en ‘n benadering wat ekonomiese mededinging sal aanmoedig.”

Hy het gesê om meer geld te skep is alleen oor ‘n baie kort termyn geldig. “Oor die lang termyn skep dit die illusie van meer geld sonder voordele,” het Möller gesê.

Sy pleidooi sal waarskynlik op dowe ore val, aangesien AgriSA in ‘n linkse diskoers verstrengel geraak het oor grondhervorming.

Kragtekorte veroorsaak waterprobleme

Eskom se kragonderbrekings het tot watertekorte in sekere dele van die land gelei. Die Polokwane-munisipaliteit in Limpopo moes inwoners vra om water te spaar weens die kragprobleme.

“Verskeie woonbuurte in die stad en ander gebiede word reeds deur die watertekorte geraak,” het Tidimalo Chuene, woordvoerder van die munisipaliteit, in ‘n verklaring gesê.

Opgaardamme se vlakke se reeds laag en hoogliggende dele word hierdeur geraak.

“Die munisipaliteit maak gebruik van watertenks om tydelike verligting aan die betrokke gebiede te bring,” lui die verklaring.

“Watertenks sal tussen die betrokke gebiede vervoer word.”

Gautengse premier ‘beplan 3 megastede’ in provinsie

Die ANC-premier in die Gautengprovinsie, David Makhura, het aangekondig dat hy beplan om drie “nuwe stede” in die provinsie te vestig.

Die presiese liggings word tans nog geheim gehou, maar Makhura het laat blyk dat die stede aan die Wesrand en in “Sedibeng” oftewel die Vaaldriehoek sal wees.

megacity_-_still_asleep‘n Aankondiging sal blykbaar aanstaande jaar gedoen word.

“Teen daardie tyd sal ons die kwessies van grond en wie daarin gaan belê, opgelos het,” sê Makhura.

“Betreffende die bou van nuwe menslike vestigings en nuwe stede, het ons nou die plan oor waar ons nuwe mega- menslike vestigings oor die volgende vyf jaar gaan bou tesame met munisipaliteite voltooi.

“Hierdie Gautengse menslike vestigingsplan sal beleggings in grootmaatinfrastruktuur rig en sal ook beslag aan ons openbarevervoer- en ekonomiese ontwikkelingsplanne gee,” het hy bygevoeg.

Die plan word reeds gekritiseer omdat die skep van Stalinistiese megamunisipaliteite of “metro’s” dienslewering bemoeilik en korrupsie stimuleer. Die drie metro’s in die provinsie sukkel steeds om rekeninge aan verbruikers te lewer nadat die onderliggende munisipaliteite jare gelede reeds saamgesmelt is.

 

Suzman verklaar teater ‘n ‘wit uitvinding’

Een van Brittanje se mees vooraanstaande aktrises het teater as ‘n “wit uitvinding” beskryf wat alleen in die DNS van die Kaukasiese ras bestaan.

Dame Janet Suzman, bekend vir haar Shakespeare-rolle, het gereageer op die menings van Meera Syal, ‘n Britse-Asiatiese komediant, wat verlede week teatermaatskappye gevra het om meer te doen om die Verenigde Koninkryk se Asiatiese gemeenskap te betrek.

Suzman het ook gekla dat etniese minderhede eenvoudig nie na die teater gaan nie, want dit is nie deel van hul kultuur nie. Sy is in Suid-Afrika gebore. Haar tante was Helen Suzman.

“Ek het pas ‘n Suid-Afrikaanse toneelstuk gedoen. My medester is ‘n jong swart man uit die krotbuurte van Kaapstad. Heeltemal ‘n briljante akteur! Ek het een swart gesig in die saal gesien, in die Print Room [Londonse teater],” het sy gesê.

“En hulle het nie blêddie opgedaag nie. Hulle is nie geïnteresseerd nie. Dit is nie in hul kultuur nie, dis hoekom. Net soos hulle goed nie in wit kultuur is nie,” het sy bygevoeg.

Haar uitlatings kom te midde van die Britse regering se waarskuwings dat kunste-organisasies hulle befondsing kan verloor as hulle nie diversiteit in hul instellings nastreef nie.

Nuwe planne deur die Verenigde Koninkryk se Kunsteraad, UK Art Council, sal organisasies dwing om planne te implementeer om meer inklusief te wees wat ander etniese groepe betref omdat hulle oor die algemeen swak in die kunste en die media verteenwoordig is.

In reaksie op Suzman se kommentaar, het Syal, een van Brittanje se mees prominente akteurs, gesê sy het nog “nooit van ‘n enkele ras of kultuur gehoor wat teater” as hul eksklusiewe uitvinding voorhou nie.

Sy het ook gesê daar is ‘n “meer diepgaande” bespreking ten opsigte van gehore nodig.

Ander bekendes in die Britse kunste was geskok deur Suzman se kommentaar, en het gesê teaters moet beter maniere vind om inklusief ten opsigte van etniese groepe te wees.

Suzman het na kritiek aan die BBC gesê sy stem eintlik saam dat teater getransformeer behoort te word en dat verhoogstukke aangebied word wat nie ‘n “ryk, wit middelklas” gehoor sal lok nie.

Sy het gesê haar opmerkings was nie “genuanseerd” aangebied nie. Sy het bygevoeg dat ras nie “goeie” teater beïnvloed nie.

 

Eksdom het ‘vergeet om diesel te koop’

Eskom het gister erken dat dié maatskappy “nagelaat het om diesel aan te koop”, wat tot die naweek se wydverspreide beurtkragsessies gelei het. Dog verdere kragprobleme is steeds op pad en sal vir ten minste nog 18 maande duur.Ekonome het intussen hul kommer uitgespreek oor die uitwerking wat die landwye kragonderbrekings op die ekonomie gaan hê.Eskom se kaskenades is blykbaar nimmereindigend, want ‘n swaar vragmotor wat die rommel by die Majuba-kragstasie moes verwyder, het ‘n kabel afgesny, wat drie verdere kragopwekkers buite werking gestel het.

Benewens die 5 690MW wat vir beplande instandhouding buite werking gestel is, het verdere kragstasies Saterdag onklaar geraak en omtrent 8 700MW van die netwerk laat verdwyn, het Eksdom se aardig besoldigde HUB, Tshediso Matona, gister tydens ‘n perskonferensie gesê.

Die verdere onklaar kragstasies het die wankelrige situasie verder vererger. Beurtkrag het verlede Donderdag begin.

Maar soos praag reeds gister op ons Engelse blad berig het, sien Eskom geen krisis op die horison nie.

“Eskom is nie ‘n maatskappy wat in ‘n krisis verkeer nie,” sê Matona. “Wat daar is, is bloot ‘n reeks probleme. Ons hanteer die kwessies, daar is oplossings vir al dié kwessies.”Toe hy gevra is of ‘n tekort aan diesel om die oopsiklusgasturbines in die Kaap aan te steek die beurtkrag veroorsaak het, het Matona erken dat Eskom sy bestelling vir diesel uitgestel het en daarom verlede Donderdag en Vrydag ‘n tekort aan diesel ondervind het.

Volgens Matona het “logistiek rondom die lewering van die brandstof” die kragonderbreking veroorsaak. Maar hy het later tydens die onderhoud erken dat ‘n tekort aan kontant by Eskom veroorsaak het dat hulle die gebruik van diesel moes inkort.

Dit kos Eskom omtrent R3 om 1kWu krag by die twee noodkragstasies op te wek. Dié elektrisiteit kan egter net teen 62,14 sent per kWu verkoop word.

Van die R7 miljard wat Eskom begroot het om die twee noodkragstasies te bedryf, bly daar slegs R1 miljard oor vir die jaar wat in Maart 2015 ten einde loop, volgens die finansiële direkteur Tsholofelo Molefe. “Enige verdere behoeftes sal vanuit besuiniging en hertoewysings gefinansier word,” sê sy.

Gemengde huwelik eindig met moord

‘n Swart prostituut 25, van Pietermaritzburg is Maandag skuldig bevind aan die moord op haar 60-jarige wit man, Alan Griffiths.

Die twee was agt maande lank getroud, het Sapa berig.

Alan se liggaam is in ʼn veld in Estcourt opgespoor. Hy is verwurg en geslaan.

Thenjiwe, sy vrou, het glo met die moordenaars gereël om op 20 Januarie 2006 hulself as rylopers voor te doen op die pad naby Colenso waar sy en haar man sou ry.

Regter Rishi Seegobin was in die hooggeregshof in Pietermaritzburg besig met sy uitspraak toe die krag onderbreek is. Dit was te donker in die hofsaal om voort te gaan en hy het gesê hy sal Dinsdag sy redes vir sy besluit verskaf. Hy het beslis dat haar borgtog opgeskort word en sy in aanhouding gehou moet word.

Alan, ʼn alkoholis, was ‘n afgetrede ingenieur in Richardsbaai toe hy Thenjiwe, ʼn prostituut, ontmoet het. Sy het by ‘n kroeg op die dorp mans opgetel.

Josias Mare, Alan se voormalige prokureur, het aan die hof gesê dat sy kliënt binne ʼn maand nadat hulle getrou het, wou skei.

Thenjiwe het glo sy motor oorgeneem, hom in die huis toegesluit of uitgesluit en sy het by haar familie ingetrek.

Volgens Mare het Alan maandeliks ʼn pensioen van R4 500 ontvang wat Thenjiwe sou ná sy dood sou kry.

Sy grootste bate was egter die huis ter waarde van ongeveer R700 000. Hy het ook gesê sy kliënt se gesondheid het duidelik agteruitgegaan na die huwelik.

Hy het die gevolge aan die paartjie verduidelik indien hulle binne gemeenskap van goedere sou trou.

Derby Lewis en APLA, skreiende dubbele standaarde

Clive Derby Lewis was die afgelope week in die dringende hof om vir mediese parool aansoek te doen. Die 78-jarige Derby Lewis is in 1993 vir die moord op die leier van die Suid-Afrikaanse Kommunistiese Party, Chris Hani aangekla. Hy is vroeër vanjaar in die tronk aangerand en luidens die hofstukke ly hy ook tans aan ernstige longkanker. Derby Lewis se regsverteenwoordiger het aangevoer dat hy slegs maande het om te leef.

Die aansoek om mediese parool is egter onbepaald uitgestel.

Enkele maande na die moord op Chris Hani, het lede van die Azanian People’s Liberation Army (beter bekend as APLA), die Saint James kerk in Kaapstad met M26 handgranate en R4-aanvalsgewere binnegeval. Tydens hierdie aanval is elf onskuldige kerkgangers vermoor en 58 beseer.

Die APLA-leier, Letlapha Mphahlele het verantwoordelikheid vir hierdie moorde aanvaar, net soos wat Derby Lewis aanspreeklikheid vir die moord op Hani aanvaar het. Beide, Mphahlele en Derby Lewis was politieke leiers. Beide het bloot opdrag gegee dat die moorde gepleeg moet word en was nie self op die moordtoneel tydens die onderskeie insidente nie. Beide is van moord aangekla en beide het voor die Waarheids- en versoeningskomissie om amnestie aansoek gedoen.

Daar is egter twee groot verskille tussen die moord op Hani en die massamoord by die Saint James Kerk. Die eerste hou verband met die slagoffers en die tweede met die Waarheids- en versoeningskommissie se hantering van hierdie twee sake.

Derby Lewis se slagoffer was die beroemde Chris Hani, die leier van die Suid-Afrikaanse Kommunistiese Party en ook die stafhoof van die ANC se militêre vleuel, Umkhonto weSizwe. Mphahlele se slagoffers was onskuldige, burgerlike teikens wat hulle nie met politiek bemoei het nie.

Derby Lewis het voor die Waarheids- en versoeningskommissie aangevoer dat die moord op Hani polities gemotiveerd was. Hy het aangevoer dat hy ’n kommunistiese oorname gevrees het en dat die stryd teen kommunisme ’n motivering vir die moord was.

Mphahlele en sy medebeskuldigdes het voor dieselfde kommissie aangevoer dat hulle moorde ook polities gemotiveerd was. Hulle het toegegee dat die slagoffers onskuldig was, maar aangevoer dat alle witmense deur hulle as legitieme politieke teikens beskou was.

Die Waarheids- en versoeningskommissie se uitsprake in hierdie twee aansoeke was erg onkonsekwent. In Derby Lewis se geval het die kommissie verklaar dat hulle nie oortuig was dat die moord op die SAKP-leier polities gemotiveerd was nie en die aansoek om amnestie het misluk. In Mphahlele se geval het dieselfde kommissie bevind dat die moorde op onskuldige kerkgangers wel polities gemotiveerd was. In hierdie geval het amnestie geslaag.

In die lig van hierdie twee sake kan ’n redelike persoon met reg bevraagteken of die waarheids- en versoeningskommissie se optrede konsekwent, deursigtig en met integriteit plaasgevind het.

Vrae oor Korkie se dood

Die oorskot van die Suid-Afrikaner, wat in ‘n Amerikaanse operasie gedood is, het Dinsdagoggend by die Waterkloof Lugmagbasis in Pretoria aangekom.

‘n Nadoodse ondersoek sal gedoen word waarby Amerikaanse amptenare glo ook teenwoordig sal wees. Eers daarna sal sy liggaam aan sy familie oorhandig word.

Pierre Korkie, ‘n biologie-onderwyser aan Grey Kollege, en ‘n Amerikaner, Luke Somers, is Saterdagoggend in Jemen doodgeskiet tydens ‘n mislukte bevrydingspoging deur Amerikaanse Spesmagte.

‘n Woordvoerder van die Departement van Internasionale Betrekkinge en Samewerking, Nelson Kgwete sê Korkie se familie het die vliegtuig ingewag.

Yolande Korkie, sy eggenoot, het gesê daar is talle onbeantwoorde vrae oor sy dood. Berigte dat al-Kaïda deur die VSA befonds word, duik gereeld op.

Pierre en sy vrou is op 27 Mei 2013 in Taiz, Jemen ontvoer. Yolande is op 10 Januarie vrygelaat nadat Gift of the Givers haar vrylating onderhandel het.

Korkie se ontvoerders het vroeër ʼn losprys van $3 miljoen (ongeveer R32 miljoen) vir sy vrylating geëis. Klaarblyklik het die familie reeds ‘n deel van die geld ingesamel.

Korkie en ander gyselaars is vroeër verskuif nadat al-Kaïda gewaarsku is dat hulle dalk ontset kan word.

Afgevaardigdes van die departement, die Suid-Afrikaanse en Amerikaanse ambassades was ook teenwoordig by die lugmagbasis.

Die Amerikaanse regering het intussen veiligheidsmaatreëls verskerp by sy fasiliteite wêreldwyd voor die vrystelling van ‘n senaatverslag wat die Amerikaanse intelligensiediens, die CIA, se “omstrede ondervragingsmetodes”, marteling, kritiseer.

Brittanje en Kanada het reeds hul missies in die Egiptiese hoofstad Kaïro gesluit uit vrees vir wraakaanvalle weens die verslag en aanvalle op Westerlinge.

Die Withuis het Maandag bevestig dat hulle verwag dat die verslag bekendgemaak gaan word.

Die Amerikaanse administrasie het bevestig dat stappe gedoen is om alle Amerikaanse ambassades en ander belange wêreldwyd te beveilig te midde van vrese van ‘n gewelddadige teenreaksie.

Dit is egter seker dat die verslag die beeld van gewone Amerikaners sal aantas.

Die minister van Buitelandse Sake, John Kerry het verlede week voete gesleep en gewaarsku dat die vrystelling tot geweld kan lei.

Die verslag gaan na verwagting besonderhede bekendmaak oor die geheime program wat onder oudpresident George W. Bush se regering gebruik is om al-Kaïda verdagtes te ondervra.

President Barack Obama het van die metodes wat gebruik is as marteling bestempel.

Die VSA het talle internasionale konvensiese en ooreekomste bekragtig en onderteken waarin hulle onderneem het om nie aangehoudenes te martel nie, maar dit geminag.