Gwede Mantashe, sekretaris-generaal van die ANC, en Jessie Duarte, adjunk-sekretaris-generaal, het die Openbare Beskermer, Thuli Madonsela, se lekkasies as “gevaarlik” beskryf.
Nadat die verslag aan die Mail & Guardian gelek is, het veiligheidsministers Vrydag met die OB vergader.
Die voorlopige Nkandla-verslag is deur die OB vir “poltieke doeleindes” uitgelek, het hulle gesê, want dit kon niemand anders gewees het nie.
“Ons waardeer die OB se werksaamhede, maar ons is bekommerd oor optrede wat blykbaar ’n openbare ophef wou veroorsaak.
“Die OB moet na deeglike ondersoek aanbevelings maak, nie uittreksels laat uitlek, die publiek aanhits en dán die finale verslag bekend maak nie.”
Madonsela het ontken dat die verslag deur haar kantoor uitgelek is. Sy het die publikasie van die voorlopige bevindings veroordeel.
Die staat het vroeër die hof genader om te verhinder dat die verslag openbaar gemaak word.
Mantashe het egter gesê die OB-verslag asook die departement van openbare werke se geklassifiseerde Nkandla-verslag moet dringend openbaar gemaak word.
Daar word vermoed dat die geld gekom het uit ‘n padkontrak ter waarde van R1 miljard.
Die naam Nkandla kom van die Zoeloewerkwoord “khandla”, wat beteken om moeg te wees.
Minstens 100 Zimbabwiese gevangenes is van honger en siekte dood hierdie jaar, want die platsak regering kan slegs bekostig om een maaltyd ‘n dag vir gevangenes te gee.
Plase het glo nie genoeg saad en kunsmis van die regering gekry om voldoende voedsel vir gevangenes te produseer nie, volgens die koerant Newsday.
Adjunk-Kommissaris van tronke Aggrey Machingauta het aan ‘n parlementêre komitee gesê dat “Gevangenes sterf van die honger en ‘n paar (MIV) verwante siektes.”
“Die probleem van die honger word vererger deur die feit dat ons nie kan bekostig om die gevangenes drie volle maaltye per dag te gee nie.”
Hy het ook gesê die aantal gevangenes wat vanjaar gesterf het, verdubbel het van verlede jaar. Zimbabwe se 46 tronke vereis 1 miljoen dollar per maand om behoorlik te funksioneer.
Die regering was nie onmiddellik beskikbaar vir kommentaar nie. Zimbabwe sukkel om sy ekonomie op dreef te kry wat kritici blameer op wanbestuur deur president Robert Mugabe se Zanu- PF party.
Zanu- PF se aanvalle op wit besit van kommersiële plase vir herverdeling aan grondlose swartes het voedselproduksie dermate verswak in ‘n land wat eens die broodmandjie van Suider-Afrika was.
Miljoene is tans afhanklik van buitelandse hulp vir oorlewing .
Zimbabwe se ekonomie sal na verwagting 3,4 % groei vanjaar, ‘n beduidende afname van die byna dubbelsyfer uitbreiding nadat die regering die waardelose Zimbabwiese dollar in 2009 afgeskaf het.
Drie Suid-Afrikaners is in ‘n mislukte transito-rooftog net buite Maseru in Lesotho doodgeskiet.
‘n Burger van Lesotho het gehoor hoe die drie planne vir die rooftog maak.
Die Lesothopolisie en die weermag is oor hul planne ingelig en ‘n skietery het net buite die hoofstad in Khubetsoana ontstaan waarin die mans doodgeskiet is.
Die verdagtes het in ‘n dubbelkajuitbakkie gery en was met AK 47 gewere gewapen.
Hulle was ook in besit van 90 rondtes ammunisie en polisie-reflekteerders.
Suid-Afrika en Lesotho het intussen Dinsdag ‘n memorandum van verstandhouding onderteken op arbeidsake.
Minister van Arbeid Mildred Oliphant het in ‘n toespraak wat voorberei is vir aflewering in Pretoria gesê probleme in die arbeidsmark en moontlike oplossings is die enigste manier om positiewe resultate te bereik.
Sy het gesê Suid-Afrika kan Lesotho help in gebiede soos die hersiening van loonvasstellings, eise met die vergoedingskommissie, en ook die moontlikhede van die stigting van ‘n Werkloosheidsversekeringsfonds. – RSG/praag
Die geldkraan wat Nelson Mandela heet, sal waarskynlik toegedraai word as die wêreld van hom vergeet.
Die minister van Staatsdiens, Lindiwe Sisulu, het Dinsdag plegtig belowe Mandela se nalatenskap sal nooit vergeet word nie.
“Ek wil aan almal van julle belowe dat ek sal veg … om seker te maak dat die geskiedenis ‘n verpligte vak gemaak word vir al ons kinders, sodat op geen punt ons kinders grootword en nie verstaan wie ons is nie, wat ons moes deurmaak nie en wat ons definieer vir wat ons vandag is,” het sy gesê by die bekendstelling van die boek, die Nelson Mandela Opus, in Johannesburg.
“Hierdie boek is die eerste boek wat in die skole onderrig sal word wanneer ek sukses behaal.”
Die boek vertel Mandela se lewe en tye.
Sisulu het haar eie geskiedenisles gegee oor “twee groot helde” van die Afrika-kontinent, te wete Hannibal uit die hedendaagse Tunisië wat Rome oorwin het, en Sjaka.
“Niemand het onthou wie Hannibal was nie. Niemand onthou hy was ‘n Afrikaan nie omdat hy niks agtergelaat het om aan te dui dat hy daar was nie,” het sy gesê.
“Sjaka is ‘n man wat bekend staan as die een wat die hedendaagse nasiestate in Suider-Afrika geskep het. Tensy jy grawe oor hom in die geskiedenis, is baie min oor hom bekend,” het Sisulu gesê.
Sy het gesê die derde legende is Mandela, en deur die boek sal sy nalatenskap en storie nie vergeet word nie.
“Ons wil graag seker maak dat 300 jaar van nou af sal almal weet daar was eens ‘n jong … man wat vrede nagestreef het in elke dreigende sfeer.”
Makaziwe Mandela, Mandela se dogter, het gesê haar pa se gees is nog sterk, selfs al is hy baie siek.
‘n Ramptoestand is in Pretoria afgekondig weens Donderdag se hewige storm waartydens sowat 44.800 huise beskadig is.
Noodleniging is aan ongeveer 1 600 huishoudings in Mamelodi en Soshanguve verleen.
Verligting in die vorm van plastiek dakseile, komberse, matrasse en kospakkies is uitgedeel. Die Falala Gemeenskapsaal in Soshanguve is gebruik as ‘n tydelike skuiling en komberse is aan 700 mense uitgedeel.
Groot dele van Pretoria se noordelike voorstede was ses dae sonder krag nadat die donderstorm vyf kragmaste beskadig het.
Volgens sommige Twitter-gebruikers is die kragtoevoer in sekere dele nog nie herstel nie.
Die Tshwane Metro sê die skade wat aan infrastruktuur en eiendom aangerig is, beloop bykans 100 miljoen rand.
Inwoners het die skade aan infrastruktuur toegeskryf aan die metro se gebrek aan behoorlike instandhouding en dienslewering.
Die woordvoerder van die Tshwane Metro, Selby Bokaba het ontken dat die kragonderbrekings te wyte is aan swak instandhoudingswerk ten opsigte van reeds verouderde infrastruktuur.
Die noordelike voorstede van Johannesburg is tans sonder water. Water sê die toevoer kan nie dadelik herstel word nie, aangesien “tegniese probleme” ondervind word.
‘n Woordvoerder, Millicent Kabwe sê sommige van die woonbuurte wat geraak word, is Hurlingham, Parkmore, Sandown, Hyde Park en Atholhurst.- RSG/praag
Die Oekraïne se onverwagte verwerping, onder Russiese dwang, van ‘n langtermyn, onderhandelde voorlopige lidmaatskapooreenkoms met die Europese Unie is waarskynlik ‘n manier vir die Russe om protes aan te teken oor vroeëre ooreenkomste met die Weste wat eensydig verbreek is.
Rusland se werklike grief teen die Weste, en die VSA in die besonder, is dat die belofte van president George HW Bush aan die Sowjet-leier Michail Gorbatsjof met die ineenstorting van kommunisme nie nagekom is nie. Bush senior het belowe dat NAVO sal nie uitbrei om die voormalige Warskouverdraglande oor te neem nie, en daarvan het dadels gekom.
Terwyl duisende Oekraïners die strate ingevaar het, baie van hulle studente of veterane van die massa-optogte van die 2004 se Oranje Revolusie, is dit hierdie keer – nege jaar later – teen ‘n ander agtergrond.
Die Oranje Rewolusie is reeds ‘n teer punt in Moskou, aangesien dit uit die sak van die Amerikaanse miljardêr George Soros gefinansier is.
Die Russiese president Wladimir Poetin het pas ‘n skouspelagtige terugkeer na die hoofarena van magspolitiek in die Midde-Ooste gemaak – teen aansienlike koste vir die Verenigde State van Amerika – met sy vredesinisiatief in Sirië.
Nou het hy die Europese Unie ook in ‘n hoek gedryf. Die vergadering ‘n week gelede, Vrydag om presies te wees, tussen die Oekraïne en die EU kan van kritieke belang wees.
“Ons is almal Europeërs!” en “Nee” vir afpersing!” was die uitroepe tydens die optogte. Verwerping van die Europese voorstelle het nou twyfel gesaai oor die uitslag van ‘n EU- vergadering in Vilnius, Litaue, oor verdere ooreenkomste met die Oekraïne , Moldawië en Georgië.
Daar is potensiële voordele vir Rusland in ‘n indirekte verbintenis met die EU. Maar as beloftes nie nagekom word nie, kan die Russe seker nie verkwalik word dat hulle sulke voordele heroorweeg nie.
Na die Duitse eenwording is Europa se ledetal uitgebrei na die Duitsers, en die VSA het “beperkte NAVO-vennootskappe” aan Pole, Hongarye en Slowakye aangebied.
Oekraïne se president, Janoekowitsj, het onverwags die Europese voorstelle verwerp, soos sy ondersteuners in die parlement, wat teen besluite oor die EU gestem het, insluitend die een wat sou toegelaat het dat die voormalige president Julia Timosjenko – ‘n Oranje Rewolusie-aanstelling – die gevangenis sal kan verlaat en na Duitsland gaan, amptelik vir “mediese behandeling”.
NAVO het met Slowakye as lid ‘n gemeenskaplike grens met die Oekraïne, maar die laasgenoemde was nooit deel van die Weste nie.
Hulle was deel van die Sowjet-Unie tot 1991 en voorheen van die Russiese Ryk sedert 1793, en ‘n bondgenoot van Rusland sedert die Middeleeue.
Die oorsprong van die huidige krisis lê dus in die Oekraïne se geskiedenis van imperiale oorheersing deur Rusland. Vir eeue het die Russe in die Oekraïne geheers onder die vaandel van die Tsaristiese of Sowjet regimes.
Rusland het natuurlik ou taalkundige en godsdienstige verdeeldheid in die Oekraïne uitgebuit, maar buitelandse magte wat dit wil naboots, word deur Rusland en die Russies-sprekende Oekraïners gesien as onaanvaarbare inmengers in die land se sake.
Die Oranje Rewolusie is deur Poetin vertolk as deel van ‘n Amerikaansgeborgde veldtog om Rusland se wêreldposisie te ondermyn, wat begin het met Rusland se uitsluiting van die Balkan en die uitbreiding van NAVO met die oorlog teen Serwië, een van Rusland se historiese, godsdienstige en kulturele bondgenote.
Met die NAVO reeds by die Oekraïense grens, en Pole se sterk veldtog vir NAVO-lidmaatskap van die voormalige Sowjet-state soos die Oekraïne en Wit-Rusland, is die saak baie sensitief.
In 2008 is die NAVO-opmars gestuit met ‘n konflik tussen Georgië – wat ook deel was van die Sowjet-Unie – en die onafhanklike gebiede van Suid -Ossetië en Abkhazië.
Georgiese troepe het Suid-Ossetië binnegeval vergesel deur President Mikheil Saakashvili se aankondiging op internasionale televisie dat die gebiede sal verenig met Georgië.
Die Russiese weermag het oornag ingegryp en teen dagbreek was Georgiese troepe uit hul diepte en die flambojante en Amerikaans-gesteunde Saakashvili was op CNN desperaat om Amerikaanse steun en NAVO-ingryping af te bedel. Sy pogings was verniet.
Oekraïne se huidige konflik met die EU val saam met die twee belangrike en positiewe Russiese politieke ingrypings in die Midde-Ooste. Die mees onlangse was die Russies-gesteunde ooreenkoms tussen Iran en die P5+1 oor Iran se kernprogram.
Die tweede was Poetin se ingryping in die Siriese burgeroorlog na die omstredenheid oor chemiese wapens, toe die ongewilde Amerikaanse president Barack Obama wou aandring op ‘n bomaanval.
‘n Ewe konstruktiewe kompromie sal welkom wees in die Oekraïene en die EU leierskap se soms roekelose uitbreiding van die EU ter wille van die uitbreiding, kan dalk ‘n paar miljardêrs in die VSA laat glimlag, maar nie Europa se inwoners nie.
Die VSA en Hezbollah hou in die geheim indirekte gesprekke wat deur Londen gefasiliteer word oor beheer van die stryd teen Al-Qaeda, stabiliteit in die streek en ander Libanese politieke kwessies.
Senior Britse diplomatieke bronne, aangehaal in ‘n Koeweitse koerant Al- Rai verlede week, beweer Britse diplomate hou samesprekings met die leiers van die Libanese organisasie en is in besig met die oordrag van die inligting aan die Amerikaners.
Die gesprekke is daarop gemik om die veranderinge in die streek en die wêreld te bespreek, en voor te berei vir die komende terugkeer van Iran na die internasionale gemeenskap, volgens diplomatieke bronne in Washington.
Omdat die VSA , in teenstelling met die Verenigde Koninkryk, beide die politieke en militêre vleuels van Hezbollah as ‘n terroriste-organisasie beskou en weier om te onderskei tussen hulle, kan die Amerikaanse amptenare nie wettig ontmoet met enige lid van die party nie. Maar volgens die bronne, is die VSA bereid om die standpunte van die party aan te hoor wat kan lei tot ‘n direkte verhouding in die toekoms.
Betrekkinge tussen Brittanje en Iran het versleg ná Iraniërs die Britse ambassade in Teheran in November 2011 bestorm het. Maar in Oktober, het Brittanje en Iran besluit om diplomatieke betrekkinge te herstel, en Brittanje het daarna ‘n nuwe chargé d’affaires na Iran gestuur.
Usoni is ‘n verhaal oor immigrasie. Die Keniaanse toekoms-TV-reeks speel af in 2062 en skets ‘n beeld van hoe die wêreld sou wees as immigrasie omgekeer word en die Europese vlugtelinge vlug na Afrika.
Geskep deur Dr Marc Rigaudis van die Verenigde State se Internasionale Universiteit ( USIU ) in Nairobi, kaats die film Afrika as ‘n oase , die enigste plek waar die son skyn . ‘n Jong paartjie begin ‘n gevaarlike reis om die vasteland te bereik.
Maar voor hul droom verwesenlik kan word, moet hulle die ergste van die mensdom en die onmoontlik element van kans oorkom.
TechMoran se produsent Denver Ochieng verduidelik: ” Usoni is eintlik ‘n reeks wat fokus op die reis van ‘n paartjie van die rampgeteisterde Europa na die nou beroemde Afrika in 2062 . Dit is ‘n verhaal wat fokus op die immigrasiehindernisse van swartes na Europa en kyk na hoe dit sou wees as die omgekeerde moes gebeur.”
Die lokepisode is verlede week gekeur op USIU . Nou is dit wag en sien of dit sal opgetel word deur plaaslike of selfs internasionale kanale.
Die bloulig-bestuurder, Joseph Semitjie, wat Thomas Ferreira omgery het nadat hy ‘n rooi verkeerslig verontagsaam het, is in die Krugersdorpse landdroshof aan die Wes-rand skuldig bevind op alle aanklagte teen hom.
Semitjie het Thomas in 2011 by ‘n kruising omgejaag en daarna geweier om die erg beseerde seun te help.
Hy was die bestuurder van die destydse Gautengse LUR vir plaaslike regering en behuising, Humphrey Mmezi.
Hy het tereggestaan op aanklagte van roekelose of nalatige bestuur, opsetlike saakbeskadiging, versuim om bystand aan beseerdes te verleen nadat hy beserings veroorsaak het.
‘n Swart man is dood en vyf ander is in ‘n kritieke toestand op Ngwavuma in die noorde van KwaZulu-Natal nadat hulle na bewering tuisgemaakte bier gedrink het.
‘n Polisiewoordvoerder, Thulani Zwane sê ses mense is na die Mosvold-hospitaal gehaas nadat hulle siek geword het.
Die man is dood kort na sy aankoms by die hospitaal.
Die polisie ondersoek ‘n ander voorval na die dood van vyf swart familielede wat na op ‘n plaas naby Bothaville in die Vrystaat.
Die vermoede bestaan dat hulle vergiftig is. Twee kinders is in die hospitaal opgeneem.
Die polisie het op die liggame van ‘n man en vrou, twee kinders en die vrou se suster afgekom, nadat die bure hulle in kennis gestel het.
‘n Woordvoerder, Stephen Thakeng sê hulle het gif in die kospotte gevind.
Thakeng sê die man en vrou het na bewering rusie gemaak oor ‘n verhouding met sy vrou se 16-jarige suster.
Gwede Mantashe, sekretaris-generaal van die ANC, en Jessie Duarte, adjunk-sekretaris-generaal, het die Openbare Beskermer, Thuli Madonsela, se lekkasies as “gevaarlik” beskryf.
