Karin Roodt – Bladsy 111

Vavi sal ‘intelligensie sameswering’ teen hom beveg

By ‘n inligtingsessie by ‘n hotel in Braamfontein, Johannesburg, het Cosatu se sekretaris-generaal Zwelinzima Vavi gesê sy skorsing uit die vakverbond was die suksesvolle “afsluiting” van ‘n lang veldtog deur sy politieke vyande, en moontlik “boef-elemente” in die intelligensie-gemeenskap.

Vavi het gesê hy sal regstappe neem om sy onlangse skorsing uit die federasie te keer deur die argument dat daar ‘n politieke sameswering teen hom gevoer is.

Hy het ook beweer dat individue misbruik van die staat se hulpbronne maak om hul eie belange te bevorder en hulle het ‘n “breër plan om nie net met my nie, maar ook met byna elke persoon wat beskou word as ‘n bedreiging.”

Cosatu is in “opstand, verdeel en heeltemal verlam” as gevolg van ‘n sameswering wat daarop gemik is om enige individu gekant is teen korrupsie te neutraliseer, het hy Vrydag gesê.

Hy het aan joernaliste ‘n “intelligensieverslag” voorgehou, gemik op die diskreditering nie net van homself nie, maar ook ander leiers soos die ANC-adjunk-president Cyril Ramaphosa, Konstitusionele Hof Regter Dikgang Moseneke en voormalige minister van behuising Tokyo Sexwale.

Die verslag is na bewering versprei na vakbondleiers om Vavi te diskrediteer. Van hulle het sedertdien teen hom gedraai om Cosatu polities te neutraliseer en in ‘n arbeidsafdeling van die ANC te omskep, het hy gesê.

Sy kommentaar sal waarskynlik spanning in die regerende alliansie aanhelp.

Vavi, wat vir meer as 12 jaar as die federasie se sekretaris-generaal gedien het, is Woensdag op spesiale verlof geplaas ná ‘n warm debat tydens ‘n Cosatu sentrale uitvoerende komitee-vergadering.

Vavi het gesê hy sal hom tot die howe wend om die komitee se besluit ongedaan te maak. Hy beskryf Woensdag se verrigtinge as “onregverdig en ongeldig”, en voeg by die komitee het “my regte as ‘n individu vertrap“.

Hy het gesê Cosatu se president Sdumo Dlamini het “homself benadeel” voor die vergadering van die komitee deur die intelligensieverslag rond te stuur, waarin “transkripsies van vergaderings wat nooit plaasgevind het nie”, is. Diegene wat in besit is van die verslag word ook benadeel word, het hy bygevoeg.

Vavi beweer dat die verslag, wat verwys na “‘n groot sameswering om ‘n demokraties verkose staat omver te werp”, gekoppel kan word aan ‘n politieke faksie wat probeer om “paranoia te skep om sy ware en sinistere doelwitte te regverdig”.

Hierdie individue is gerig op diegene wat “gewaag het om die waarheid te praat met mag”. Hulle is “bang vir ‘n onafhanklike” Cosatu en wil “voortgaan as kripvreters,” het hy gesê.

“Die sogenaamde intelligensieverslag beweer ook dat die Marikana-slagting, die betogings oor dienslewering en die xenofobiese aanvalle in ons land nie die ware sentimente van die armes weergee nie … Maar deel van ‘n groot sameswering is om ‘n demokraties verkose staat omver te werp,” het hy aan joernaliste gesê.

Hy het die intelligensie-verslag met die pre-Polokwane Browse Mole-verslag vergelyk, wat glo ‘n smeerveldtog uit die intelligensie-gemeenskap teen President Jacob Zuma was.

Vavi het gesê die verslag toon al die kenmerke van “boef-elemente” in die intelligensie gemeenskap. Sy prokureurs sal skriftelik die minister van staatsveiligheid Siyabonga Cwele nader om te bepaal of die verslag ‘n produk van staatsorgane was. Hulle sal die inspekteur-generaal van intelligensie – die intelligensie ombudsman – voorts nader om te ondersoek of staatsinstellings misbruik is met die doel om die verdeling van Cosatu teweeg te bring. – bdlive.co.za

Taxibestuurder wat Zuma-skildery takel, skuldig

‘n Taxibestuurder van Limpopo, Louis Mabokela is skuldig bevind aan moedswillige saakbeskadiging.

Hy het verlede jaar ‘n skildery van president Jacob Zuma in die Goodman gallery in Rosebank beskadig.

Die Hillbrow landdroshof het bevind dat Mabokela doelbewus die skildery, waarop die president met ontblote geslagsdele uitgebeeld word, beskadig het.

Hy is tot ses maande tronkstraf gevonnis, wat vir vyf jaar opgeskort is. Die landdros het gewaarsku dat indien Mabokela voortaan aan ‘n soortgelyke oortreding skuldig bevind word, hy beslis tronk toe sal gaan.

Mabokela hou vol dat hy niks verkeerd gedoen het nie en bloot Zuma se waardigheid beskerm het.

Die skildery is glo sowat R100 000 werd, maar is nou méér werd nadat dit beskadig is. – RSG

Selfoondiewe teiken restaurante in Pretoria

Polisie vermoed dat ’n swart man en vrou restaurante teiken om kliënte se selfone te steel in Pretoria.

Dit kom nadat ’n eienaar van ’n bekende kettingrestaurant in Jeanlaan, Centurion twee verdagtes, wat moontlik ’n selfoon gesteel het, op sy sekuriteitskameras geïdentifiseer het.

Volgens Hannes Bezuidenhout het dié verdagtes naby ’n kliënt gesit. Terwyl die kliënt en sy familie gebid het, het die vroulike verdagte verby die tafel gestap na die kleedkamers.

Bezuidenhout het gesê die kliënt vermoed dat die vrou sy selfoon geneem het wat op die tafel gelê het.

Met die vrou se terugkoms het die paartjie die restaurant verlaat sonder om ’n bestelling te plaas.

Op daardie tydstip het die kliënt besef dat sy selfoon nie meer op die tafel is nie.

’n Ander eetplek in dié straat het gesê dat ’n selfoon ook daar gesteel is, maar hulle kon niemand op hulle sekuriteitskameras identifiseer nie.

Adjudant-offisier Hero Gumbu het gevra dat die publiek met inligting oor hierdie verdagtes of hul modus operandi, die polisie in kennis moet stel. – looklocal.co.za

Inwoners ontsteld oor gemors na kerkbyeenkoms

Inwoners van Doringkloof in Centurion is geskok oor die vuil toestand waarin dié woongebied agtergelaat is na ’n byeenkoms die afgelope naweek by Supersportpark.

Mense het in massas by die stadium in honderde busse opgedaag om ’n godsdienstige geleentheid van ‘n swart kerk Sondag by te woon.

Volgens een van die inwoners in Leoniestraat, slegs ’n blok van die stadion, was die oop stuk grond in dié straat in ’n walglike toestand agtergelaat met papiere en toiletpapier wat oor die hele gebied in die Augustuswind gewaai het.

Giovanni Cantarello was hoogs ontsteld toe hy die gemors wat deur die feesgangers gelos is, gesien het.

Teen Maandagmiddag het geen opruimingspan ’n poging aangewend om die gebied skoon te maak nie.

“Ons as belastingbetalers verwag dat daar ná hierdie tipe byeenkomste skoongemaak moet word aangesien ons vir hierdie dienste indirek betaal,” het Cantarello gesê.

Cantarello bevraagteken ook die toiletgeriewe wat vir die mense aangebied was, aangesien toiletpapier oral tussen die busse gelos is. Hy het ook gesê dat hy mense gesien het wat hul tande tussen die busse geborsel het.

Sondag het feesgangers in die strate afgedwaal en by huise aangeklop om vir water te bedel.

“Ek glo nie daar was genoeg water vir die mense beskikbaar nie,” het Cantarello ook besorg bygevoeg.

Sy vrou het kos vir ’n seun gegee wie die hele dag onder ’n boom voor hul huis sonder kos en water gesit het.

Hy bevraagteken ook die kapasiteit van die stadion en die werklike hoeveelheid mense wat die geleentheid bygewoon het.

’n Inspekteur van die Departement van Afvalbestuur het Maandag die gebied besoek en was geskok oor die toestand daarvan. Dié departement was glo nie in kennis gestel van die funksie nie en daarom was ’n skoonmaakspan nie gereël nie.

Hy het wel gesê dat daar werkers moontlik Dinsdag na die gebied gestuur sal word.

Supersportpark se bestuurder, Malcolm Drysdale het om verskoning gevra vir die ongerief wat dié onsmaaklikhede die inwoners veroorsaak het.

Volgens Drysdale was die stadion aan Twelve Apostels Church verhuur en dus het die stadion nie as organiseerders opgetree nie.

Die bestuur van die stadion het vereistes gestel wat deur die organiseerders van die byeenkoms nagekom moes word, maar volgens Drysdale was dit nie die geval nie.

“Sonder om die blaam te verskuif was meeste van ooreenkomste nie nagekom nie met die grootste probleem dat die beperkte getal toeskouers oorskry was.

“Ons het ooreengekom dat slegs 30 000 mense toegelaat was, maar tussen 55 000 en 60 000 mense het daarop aangedring om toegelaat te word,” het Drysdale gesê.

Volgens Drysdale was later ‘n vergadering gereël waarby die organiseerders, verteenwoordigers van Tshwane-metro, polisie en metropolisie betrokke was om dié kwessies te bespreek.

‘n Aksieplan om die gebied op te ruim was bespreek en is Dinsdag uitgevoer.

Die gebied in Leoniestraat is skoongemaak.

Oud-tennisster Bob Hewitt verskyn op aanklagte van molestering

Daar was geen teken van die voormalige grand slam tenniskampioen, Bob Hewitt by die hof waar hy moet verskyn op aanklagte van molestering nie.

Hewitt moes in die Boksburg landdroshof verskyn op aanklagte van seksuele molestering wat dateer uit sy dae as afrigter.

‘n Skare het voor die hof saamgedrom om hom in te wag. Organisasies soos die Northfield Metodiste Kerk en Vroue en Mans teen Kindermishandeling het gedreunsing: “Man up! Erken wat jy gedoen het!“

Hulle het onder meer plakkate opgehou wat lees: “Beskerm ons kinders van seksuele roofdiere“.

Die Associated Press (AP) nuusagentskap het berig in Junie dat die Nasionale Vervolgingsgesag (NV) ‘n dagvaarding op die 73-jarige Hewitt beteken het op 15 Junie deser.

Die 73-jarige Hewitt behoort vandag te weet op watter aanklagte hy tereg staan.

Hy word daarvan beskuldig dat hy jong meisies wat hy afgerig het dekades gelede gemolesteer het. Die beweerde misdade dateer terug na die sewentiger-jare. – Sapa

Inkatha: Staat moet Marikana-slagoffers se regspan vergoed

Die regering moet die ondersoek na verlede jaar se Marikana–skietery ondersteun deur die regspan wat die mynwerkers verteenwoordig te befonds, het die IVP Donderdag gesê.

Dit is ‘n bespotting van geregtigheid dat die regslui nog sonder befondsing is, het Inkatha se sekretaris-generaal Sibongile Nkomo gesê.

Dali Mpofu, wat beseerde en aangehoudenes tydens die skietery verteenwoordig, het die staat na die Konstitusionele Hof geneem om betaling vir sy regspan by die Farlam Kommissie van Ondersoek te eis.

Hy het ‘n soortgelyke versoek in die hooggeregshof in Pretoria ‘n paar weke gelede gerig, maar dit is van die hand gewys.

Nkomo het gesê: “Dit regering se verbintenis tot die ondersoek is ernstig in die gedrang en of hulle regtig antwoorde oor wat verkeerd geloop het op daardie noodlottige dag soek.“

Die ANC het hom verbind tot die kommissie, maar is huiwerig om te help.

“Ons moet die regering se mislukkings te verstaan [by Marikana] en ‘n pad vorentoe wat sal verseker dat hierdie tragedie nooit weer voorkom nie.” – Sapa

Chaos heers aan Oos-Rand, buitelanders uitgedryf na skietery

Duisende inwoners van Duduza aan die Oos-Rand het hul kinders uit die skool gehaal, en aangemoedig om te plunder en winkels wat aan buitelanders behoort, af te brand.

Vier tieners is ernstig beseer in skietgevegte met buitelandse winkeleienaars Donderdag en ‘n vyfde swart jeugdige is erg aangerand.

Die bloedvergieting het uitgebreek in Duduza laat Woensdag toe ‘n Somaliese winkeleienaar ‘n 17-jarige seun tydens ‘n argument oor R5 se selfoonlugtyd geskiet het. Onbevestigde verslae sê die jeugdige is dood. Die polisie ondersoek die voorval, maar kon dit nie bevestig nie.

Die skietery gelei tot verontwaardiging en ‘n opwelling van zenofobie, en duisende mense die strate laat invaar.

Die onrus het versprei na die naburige dorp Tsakane, waar mense huise aan die brand gesteek het, voertuie beskadig het en Somaliërs, Pakistani’s en Bangladeshis genoop het om te vlug.

Mense gewapen met kieries en ysterstawe het besighede aan die brand gesteek en by skole opgedaag, wat onderwysers gedwing het om te vlug en kinders uit klaskamers te sleep. Die skole moes noodgedwonge sluit.

Onluspolisie het gepoog om orde te herstel terwyl inwoners, verdeel in kleiner groepe, deur die lokasie versprei het om te “jag” op buitelanders.

“Ons gaan hulle doodmaak. Ons gaan alles wat hulle het brand en vat waarmee hulle nie kan weghardloop met,” het een Tsakane-inwoner geskreeu, terwyl Hassan Ali, sy winkel se voorraad inderhaas moes oplaai op ‘n bakkie om te vlug.

“Hulle het hier kom steel, ons werk en nou maak hulle ons kinders dood,” het die inwoner gekla. “Ons sal nie dit toelaat nie. Die polisie doen niks nie en die regering is nêrens.”

Kapt Johannes Ramphara beskryf die situasie as chaoties.

“Dit is totale wetteloosheid. Ons het gedink dit sou kalmeer, maar inwoners het voortgegaan om te op te breek in groepe, die skole laat sluit en kinders op die strate gejaag.”

Hy het gesê vyf mense is in hegtenis geneem en die polisie ondersoek ‘n saak van openbare geweld, intimidasie en poging tot moord.

Bantoe-onderwys was beter, sê Wits-akademikus

Die apartheidsera se Bantoe-onderwysstelsel was veel beter as die huidige stelsel, het ’n Wits-akademikus Donderdag in Pretoria gesê.

“Wat gehalte betref was dit veel beter as die onderwys wat ons kinders deesdae ontvang en dit is waar die probleem lê,” het Rabelani Dagada, ’n dosent by die sakeskool van die Universiteit van die Witwatersrand gesê tydens ’n debat oor regstellende aksie.

“Regstellende aksie moet oor bemagtiging gaan. Die beste manier om te bemagtig is nie om weg te vat van mense wat het en dit dan te gee aan diegene wat nie het nie. Dit sal nie werk nie.”

Dagada het gesê Suid-Afrikaners kan slegs deur behoorlike onderwys bemagtig word.

Suid-Afrika se gewese minister van buitelandse sake, Pik Botha, wat ook aan die debat deelgeneem het, het gesê onder die ANC se leierskap het die land wegbeweeg van oudpres. Nelson Mandela se beginsels.

Hy het gesê Suid-Afrika se beleid oor regstellende aksie benadeel hoofsaaklik die swart meerderheid.

“Hoeveel moet ons nog verduur voordat ons sê dis genoeg. Ons onderwys is ver agter. Dit is die swakste in Afrika, maar het die hoogste besteding per kapita.”

Botha het gesê selfs Zimbabwe se onderwysstelsel is beter.

“Wanneer gaan dit verander? By staatshospitale moet swart pasiënte drie jaar wag vir ’n operasie.”

Botha het gesê toe Mandela aan bewind gekom het, was hy versigtig om nie wit mense se vaardighede te verloor nie.

“Hy het gesê ons moet nie die wittes se bekwaamheid verloor nie. Hulle moet nie die openbare sektor verlaat nie, maar help om mense te leer om dieselfde vaardighede te kry,” het Botha gesê.

“En nou het hulle al daardie mense verwyder.” – Sapa

Swendelaars bedrywig by tweedehandse motors

Die polisie in Pretoria ondersoek ‘n skelmstreek deur swendelaars wat hulle as tweedehandse motorverkoopsmanne voordoen.

Kapt. Collette Weilbach, polisiewoordvoerder, het Donderdag gesê vyf sake word by die Villieria-, Pretoria-Sentraal en Sinoville-polisiekantore ondersoek.

Die swendelaars wag by die motorhandelaars en oortuig potensiële kopers om geld aan hulle te gee in ruil vir afslag op die motor waarin hulle belangstel.

Weilbach het voornemende kopers aangeraai om direk met die handelaars in verbinding te tree om te verseker die transaksie is wettig. – Sapa

Veiligheidsraad verdeel oor Egipte

Die Veiligheidsraad van die Verenigde Nasies het ‘n beroep op die Egiptiese regering en die Moslembroederskap gedoen om hulle van geweld te weerhou en versoening na te streef.

Die Raad het na ‘n noodsitting Donderdagnag egter nie ‘n konsensus-verklaring kon uitreik oor die hernieude geweld in Egipte wat reeds meer as 600 lewens geëis het nie.

Lede van die raad is vir ‘n noodsitting ontbied nadat die Verenigde Koninkryk, Frankryk en Australië die Veiligheidsraad gevra het om die saak dringend te bespreek.

Die Argentynse president van die raad, Marcia Perceval het gevra dat geweld en die onderdrukking van vreedsame optogte onmiddellik beëindig moet word.

Die VN-sekretariaat, Amerika en die Europese Unie wou nie standpunt wou inneem oor die omverwerping van die Egiptiese regering nie.

Suid-Afrika het Egipte dringend versoek om demokrasie in die land te eerbiedig. Die minister van internasionale betrekkinge – Maite Nkoana-Mashabane – het die Egiptiese situasie by die SAOG-beraad in Malawi geopper.

Dit volg nadat die Egiptiese weermag twee kampe in Kaïro met ondersteuners van die afgesette president Morsi bestorm het, en regeringsgeboue in die hoofstad aan die brand gesteek is deur Morsi-ondersteuners.

Die Amerikaanse president, Barack Obama het ook die geweld veroordeel en ‘n gemeenskaplike militêre oefening met Egipte, wat aanstaande maand sou plaasvind, gekanselleer.

Obama het homself egter nie uitgespreek oor die wetlikheid van die nuwe oorgangsregering in Egipte nie.

Die Egiptiese regering het ondersteuners van die afgesette president Morsi intussen gewaarsku dat die polisie toestemming het om volle mag te gebruik teen terreuroptrede of sabotasie.

Die dodetal in die jongste geweld in Egipte het tot meer as 600 gestyg. Die bevestigde dodetal staan op minstens 638, terwyl bykans 4 000 mense gewond is.

Die geweld wat die week uitgebreek het is die ergste sedert die begin van die “Arabiese lente”. Die militêre regering in Egipte slaan toe op ondersteuners van die afgesette president Mohammed Morsi en sy hoofsaaklik Moslem-ondersteuners, terwyl teenaanvalle ook plaasvind.

Die geweld het Donderdag verder uitgebrei toe regeringsgeboue naby die piramides aan die brand gesteek, polisiebeamptes geskiet en Christen-kerke aangeval is.

Die Moslembroederskap probeer hergroepeer na aanvalle op hul vestings en die in hegtenisneming van talle leiers.

Die Broederskap het gevra dat massa-optogte Vrydag gehou word om teenstand te bied teen die noodtoestand wat regering afgekondig het.

R33 steeds gesluit weens sianied-ongeluk

Die R33 tussen Piet Retief en Amsterdam in Mpumalanga is steeds gesluit ná ‘n toksiese chemiese storting op die pad.

Die roete is sedert Maandag vir verkeer afgesper. Volgens ‘n woordvoerder van die Mkhondo-munisipaliteit het ‘n vragmotor met natrium-sianiedbrikette omgeslaan.

‘n Spesiale span werkers moet die brikette glo met die hand verwyder.

Die vragmotor was na die Barbertonse goudmyne oppad waar die sianied in die prosessering gebruik word.

Daar word jaarliks ongeveer 650 000 ton sinaied vervaardig waarvan die meeste, ‘n driekwart, gebruik word in goudproduksie.

‘n Tipiese goudmyn gebruik sowat 1 600 ton per jaar om goud uit die erts te onttrek. Sianied is die gevaarlikste chemiese van al die giftige chemikalieë, soos arseen, lood, kwik, kadmium, chroom en swaelsuur, wat die mynbedryf gebruik.

Meer as 90% van die 2500 ton goud wat jaarliks geproduseer word regoor die wêreld, word onttrek deur middel van die gebruik van sianiedlogingstegnieke.

NUM, Solidariteit sal nie Marikana-slagting herdenk nie

Duisende mense sal na verwagting opdaag vir die herdenkingsdiens op Wonderkop by Marikana waar 34 mynwerkers ‘n jaar gelede gedurende onwettige stakings in ‘n polisielokval omgekom het.

Vakbonde, waaronder NUM en Solidariteit, het Amcu se uitnodiging om deel te neem van die hand gewys.

President Jacob Zuma het intussen om kalmte gepleit nadat nog sterftes onlangs by Wonderkop aangemeld is en daar daar sprake van hernude geweld tussen die twee strydende vakbonde NUM en Amcu was.

Hy het die land gevra om 16 Augustus as ‘n dag van gebed en verootmoediging te beskou.

Die NUM en Solidariteit sal aan die herdenking by Marikana deelneem nie. Solidariteit se adjunk-hoofsekretaris – Gideon du Plessis – sê sy vakbond is nie bereid om die verhoog met Lonmin te deel nie.

Die Metodiste Kerk van Suid-Afrika sê intussen geleenthede om die slagting te herdenk, moet met waardigheid plaasvind. Biskop Ziphozile Siwa sê die onderskeie seremonies wat gehou word mag nie politieke ondertone hê nie.

Siwa het ook ‘n pleidooi gelewer vir finansiële ondersteuning vir die Marikana kommissie.

Op 16 Augustus verlede jaar is 34 mynwerkers dood en 78 beseer toe die polisie met skerppunt-ammunisie op onwettige stakers geskiet het.

Familielede en naasbestaandes van die slagoffers sal na verwagting die eerste herdenking van die slagting in Rustenburg bywoon.

Die ANC in Noordwes het by die mynwerkersvakbond, NUM aangesluit en boikot die herdenking omdat dit volgens hulle nie die Marikana-ondersteuningsgroep ondersteun wat die geleentheid georganiseer het nie.

Die ANC sê hulle beskou dit as immoreel en onaanvaarbaar dat ‘n traumatiese voorval die politieke speelveld van sommige partye word.

Die Grondwethof sal vandag ‘n beslissing maak oor of die Staat die regskostes van die mynwerkers moet betaal wat tydens die Marikana voorval gewond of in hegtenis geneem is.

Indien die Marikana kommissie wat die dood van die slagoffers ondersoek nie staatsbefondsing ontvang nie, loop dit die gevaar om uitmekaar te val. Advokaat Dali Mpofu verteenwoordig die mynwerkers.

Hy het die Staat hof toe geneem en gevra dat sy regspan vir hul dienste betaal word, aangesien die privaat instansies nie langer hul weg oopsien om die slagoffers se regspan te ondersteun nie.

SA polisie verkoop hul uniforms, ammunisie aan skelms

Daar moes onlangs dringend opgetree word om te verhoed dat polisieklere en -wapens in die verkeerde hande beland, het die Bellvillese Gespesialiseerde Handelsmisdaadhof Maandag in Kaapstad aangehoor.

Kaptein Cathline Jephta van die polisie se taktiese reaksie-eenheid het aan die hof gesê: “Toe ons hoor dat ‘n polisiebeampte by die onwettige verkoop van polisie-uniforms betrokke was, moes ons vinnig optree.

“Al wat ons geweet het, is dat ‘n polisiebeampte besig was om uniforms te verkoop, maar ons het geen idee gehad wie hy of sy was nie.”

Sy het getuig in die saak teen kaptein Esmareld Bailey (44) wat op 8 aanklagte tereg staan: een van korupsie, een van die onwettige besit van ammunisie, asook ‘n derde klag van die besit of gebruik van dwelms en 5 klagtes van dwarsboming van die gereg.

Sy het onskuldig voor landdros Sabrina Sonnenberg gepleit.

Op ‘n vraag van die aanklaer, Xolile Jonas, het Japhta aan die hof verduidelik dat haar werk misdaadvoorkoming behels, met die klem op dwelms en bendelede.

Sy het bygevoeg: “Ons bedryf operasies onder dekking, waartydens ons mense bel en voorgee dat ons dwelms by hulle wil koop.

Volgens haar het ‘n Informant in Desember 2011 laat weet dat daar “iemand was wat polisieklere en -wapens wou verkoop”.

“Vanweë die sensitiwiteit van die inligting – daar is beweer dat die persoon ‘n polisiebeampte was – het ek die inligting deurgegee vir ons span se intelligensiehoof, en het toe die kolonel in beheer van geheime operasies gekontak.

“Vanweë die dringendheid van die saak, het ek elektroniese magtiging verkry om so ‘n operasie van stapel te stuur.”

Sy het gesê die operasie het behels om ‘n manlike polisiekonstabel as die koper uit te stuur, aan wie R500 in R100-note gegee is om ‘n polisie-uniform en ammunisie mee te koop. Die note is vooraf eers gefotokopieer.

Die konstabel is eers na ‘n vulstasie in Brooklyn geneem, waar hy deur twee mans in ‘n wit sedan opgelaai en na ‘n blok woonstelle geneem is.

Sy het voortgegaan deur te sê dat sy in ‘n ongemerkte voertuig gevolg het, en dat sy en die konstabel met behulp van sms-boodskappe in verbinding gebly het.

Een van die mans in die wit motor, Waleed Diedericks, is op na die vyfde vloer van die kompleks en het met ‘n rooi reissak teruggekom.

Nie lank daarna nie, het sy ‘n sms van die ‘koper” ontvang om te sê dat die transaksie afgehandel is.

Japhta het aan die hof gesê: “Ek het vinnig na Diedericks gegaan en myself voorgestel.

“Die konstabel het die rooi sak aan my oorhandig en het gesê dat hy so pas R500 vir die inhoud betaal het.

“Ek het die sak oopgemaak, en dit het ‘n polisiepet, twee pare blou polisiebroeke, ‘n polisiehemp met ‘n wapen daarop geborduur, asook ‘n oranje en geel polisieweerkaatsingsbaadjie en ‘n banksakkie met ammunisie bevat.

“Die konstabel wys toe na Diedericks en sê hy het die geld.”

Jephta sê sy was by toe ‘n ander polisieman die geld vanuit Diedericks se broeksak verwyder het .Sy het toe vir Hendricks gesê dat hy in arres was vir die verkoop van ‘n polisie-uniform aan polisiebeamptes onder dekking.

Al het sy vir Diedericks gesê dat hy nie onder ‘n verpligting was om enigiets te sê nie, het hy gesê dat hy die uniform by ‘n kaptein gekry het en het hulle toe na Bailie se woonstel toe geneem.

Diedericks is laas jaar vir sy aandeel aan die transaksie gevonnis, maar het n opgeskorte vonnis gekry omdat hy teen Bailey getuig het. – Sapa

Uitspraak in MDC-aansoek voorbehou

‘n Zimbabwiese Hoërhof het uitspraak voorbehou in ‘n aansoek van die opposisieleier, Morgan Tsvangirai, om die land se verkiesingliggaam te dwing om materiaal oor verlede maand se presidensiële verkiesing bekend te maak.

Tsvangirai voer aan dat die materiaal noodsaaklike getuienis sal voorsien in sy hoof regsgeding om die presidensiële uitslae nietig te verklaar omdat dit volgens hom gemanipuleer is.

‘n Voorlopige verhoor oor dié saak vind Saterdag in die land se konstitusionele hof plaas. Tsvangirai wil hê die verkiesingskommissie moet die volle presidensiële resultate per kiesafdeling vrystel.

Die MDC eis dat inligting verskaf word oor die aantal mense wat bygestaan is om te stem, afskrifte van die kiesersrol wat by stembusse gebruik is, afskrifte van die kiesersrol wat in die spesiale verkiesing gebruik is en ‘n register van diegene wat wel hulle stemme uitgebring het. – RSG