Die Verenigde Nasies se Veiligheidsraad oorweeg sanksies teen Suid-Soedan.
Die Veiligheidsraad het dié skerp waarskuwing gerig na die massaslagting verlede week in Bentiu toe rebellemagte honderde burgerlikes vermoor het nadat hul etnisiteit of nasionaliteit glo eers vasgestel is.
Die Veiligheidsraad sal ondersoek instel na sanksies indien aanvalle op burgerlikes en buitelanders in die land voortduur.
Dié verwikkling kom nadat president Salva Kirr, en die voormalige adjunkpresident Riek Machar asook ander politieke leiers, ‘n ooreenkoms, om vyandelikhede te staak, geïgnoreer het.
Die Veiligheidsraad eis dat die land se leierskap diegene aanspreeklik hou wat vir die konflik verantwoordelik is.
Die ooreenkoms is in Januarie onderteken.
Burgerlikes is intussen vermoor in sogenaamde plekke van veiligheid soos kerke, hospitale en moskees waar hulle skuiling gesoek het.
Die magstryd tussen president Kiir en sy voormalige adjunk, Machar, het tot die etniese botsings tussen die Dinka- en Nuer-stamme gelei.
Die Veiligheidsraad het ook ‘n aanval op ‘n VN-vesting in die dorp Bor veroordeel waar talle mense omgekom het of beseer is.
Franse word by Hoetoe-kamp in Butare verwelkom, 1994
Die Franse regering het woedend gereageer op beskuldigings deur die Rwandese president oor hul medepligtigheid aan die volkslagting in Rwanda.
Nie eers hul swart minister van Justisie kon die Rwandese oorhaal tot inskiklikheid nie.
Plegtighede met ‘n sterk anti-koloniale karakter word tans in Kigali gehou om die 20ste herdenking van die volksmoord teen die Toetsies te gedenk. Dit is veral teen Frankryk, België maar ook die VN gemik.
Onthullings deur ‘n Franse oud-soldaat Guillaume Ancel, wat aan die miltêre operasie deelgeneem het en Frankryk in die slagting impliseer, het verder vir opslae gesorg.
Frankryk is nie teenwoordig by die plegtighede nie, nadat die swart minister, Chistiane Taubira, haar besoek afgelas het in reaksie op die jongste beskuldigings deur president Paul Kagame.
Kagame beskuldig Franse soldate van aandadigheid aan die bloedbad waarin byna ‘n miljoen mense destyds omgekom het.
Kaptein Ancel, deel van Operation Turquoise, ‘n Franse militêre operasie in Rwanda in 1994 onder ‘n VN-mandaat, het Maandag in ‘n onderhoud met die Franse weekblad Jeune Afrique vertel hy is hy beveel om wapens te laai in burgerlike vragmotors wat bestem was vir die buurland Zaïre [ nou die Demokratiese Republiek van die Kongo ]. Die wapens was bedoel vir die vlugtende Rwandese weermag, aanstigters van die volksmoord.
“Ek was selfs aangeraai om joernaliste weg te hou gedurende hierdie tydperk, om te verhoed dat wat daar gebeur het uitlek,” sê Ancel . “Toe ek my afkeuring wys, het die [Franse] Legioen se bevelvoerder my vertel dat die leër opdrag het omdat besluit is dat die Rwandese weermag nie moet dink ons is hul vyande en teen ons draai nie. Frankryk het selfs die Rwandese soldate se salarisse betaal.”
Die volksmoord het begin op 7 April 1994 toe president Juvenal Habyarimana, ‘n Rwandese Hoetoe, se vliegtuig afgeskiet is naby Kigali Internasionale Lughawe.
Hoetoe-ekstremiste het op begin moor om Habyarimana se moord te wreek.
Die RPF ( Rwandese Patriotiese Front ) onder leiding van Kagame het die voordeel van die sosiale wanorde uitgebuit en daarin geslaag om invloed oor die hele land te verkry.
Teen Julie 1994 het die RPF Kigali met die steun van die VSA oorgeneem.
Vandag is die RPF die krag in Rwanda, soos al vir die afgelope 20 jaar.
Maar die diplomatieke verhoudinge wil steeds nie vlot tussen Rwanda en sy eertydse koloniale meesters nie, ten spyte daarvan dat die Franse president Nicolas Sarkozy in 2010 Franse “foute ” in 1994 erken het.
Kagame se beskuldiging kom kort op die hakke van ‘n Franse hof wat ‘n voormalige Rwandese weermag kaptein Pascal Simbikangwa tot 25 jaar in die tronk gevonnis het vir sy rol in die moord in die eerste verhoor in Frankryk oor die volksmoord.
Kagame se aansien in die internasionale gemeenskap is aan die taan nadat Westerse hulp in 2012 teruggehou is weens ‘n VN-verslag wat Kagame beskuldig dat hy M23 rebelle in die naburige Kongo steun.
Suid-Afrika het Kagame ook beskuldig van inmenging nadat Rwandese burgers hier in sluipmoorde geteiken is.
Die Rwandese president het egter ook in gebreke gebly om die etniese groepe van Rwanda te verenig.
Die VN se sekretaris-generaal, Ban Ki Moon, sê die VN is nog steeds skaam omdat hy nie meer gedoen het om die menseslagting stop te sit nie.
Die Verenigde Nasies en die Kongolese leër het militêre operasies in die Demokratiese Republiek van die Kongo teen die Rwandese Hoetoe-rebellegroep, die FDLR ontplooi.
Die VN se nuwe ingrypingsmag wat Suid-Afrikaanse soldate insluit, sal in die oostelike deel van die land die aanval teen die rebelle loods.
Die FDLR het skuiling in die reënwoude se ruigtes geneem tussen die plaaslike bevolking.
Die groep is in die DRK sedert die Toetsies na ‘n rebellie beheer van Rwanda oorgeneem het.
Intussen het Suid-Afrika ook ‘n diplomaat van Boeroendi die deur gewys. Die rede vir Jean-Claude Sindayigaya se vertrek is nog nie duidelik nie, maar hy het reeds die land verlaat.
Boeroendi se minister van buitelandse sake het Saterdag bevestig dat een van sy land se diplomate geskors is uit Suid-Afrika.
Die stap kom nadat Suid-Afrika en Rwanda Vrydag in ‘n diplomatieke onderonsie slaags geraak het oor die hernude sluipmoordaanslag op ‘n uitgeweke Rwandese generaal in Johannesburg.
Kigali het ses Suid-Afrikaanse diplomate geskors, na Pretoria drie Rwandese amptenare 72 uur gegee het om die land te verlaat, het Rwanda se minister van buitelandse sake en diplomatieke bronne gesê.
Rwanda se minister van buitelandse sake het op Twitter gesê hulle is bekommerd dat Suid-Afrikaanse owerhede skuiling aan andersdenkendes bied wat verantwoordelik is vir terroriste-aanvalle in Rwanda.
Amptenare van buitelandse sake het geweier om kommentaar te lewer en gesê ‘n verklaring sal later uitgereik word.
Die uitsetting volg na ‘n hernude aanslag op oud-weermaghoof Faustin Kayumba Nyamwasa. Sy teenwoordigheid in Suid-Afrika veroorsaak ‘n diplomatieke hoofpyn vir Pretoria.
Spanning het verdiep nadat Kigali se voormalige intelligensiehoof Patrick Karegeya dood aangetref is in ‘n Johannesburgse luukse hotel op Nuwejaar.
Geen arrestasies is nog gemaak ivm Karegeya se moord nie.
Sommige lede van die opposisie beweer dat die Rwandese regering agter die aanval sit.
RSG het die jongste voorval van politieke geweld, ‘n politieke sluipmoord in KwaZulu-Natal, as ‘n voorbeeld van “politieke onverdraagsaamheid” beskryf.
In 1946 het die Algemene Vergadering van die Verenigde Nasies erken dat sulke optrede per definisie ‘n misdaad onder die internasionale reg is wat die beskaafde wêreld veroordeel, en medepligtiges daaraan strafbaar maak.
Die Konvensie oor die Voorkoming en Straf van die Misdaad van Volksmoord is deur Suid-Afrika bekragtig.
Hierdie internasionale verdrag bevestig ook dat politieke sluipmoorde deur regerings ‘n misdaad onder die internasionale reg is.
“Volksmoord” beteken nie noodwendig net die onmiddellike vernietiging van ‘n volk nie, soos wanneer die massamoord van al die lede van ‘n volk plaasvind nie.
Dit dui ook op ‘n gekoördineerde plan van verskillende aksies wat gerig is op die ondergrawing van die noodsaaklike fondamente in die lewe van nasionale groepe, met die doel om die groepe uit te wis.
As die doelwitte van regerings die disintegrasie van alle politieke en sosiale instellings, kultuur, taal, nasionale gevoelens, geloof, die ekonomiese bestaan van nasionale groepe, en die vernietiging van persoonlike veiligheid, vryheid, gesondheid, waardigheid, en selfs die lewens van die individue van daardie groepe, behels, is sulke regerings strafbaar.
Die moordaanslag het by die berugte KwaMashu hostel by Durban plaasgevind toe ‘n takleier van die Inkhata Vryheidsparty Donderdagaand doodgeskiet is.
Die takleier van die IVP se Vroue-brigade, Nonhlanhla Biyela is deur vier onbekende aanvallers doodgeskiet.
Maandag is ‘n takleier van die Nasionale Vryheidsparty by die hostel doodgeskiet. Haar gedenkdiens is gisteraand gehou.
Die IVP se nasionale voorsitter, Blessed Gwala het die jongste aanval skerp veroordeel.
Polisieversterkings is die week by die hostel ontplooi.
Politieke sluipmoorde in Suid-Afrika het in die aanloop tot die 2010 FIFA Wêreldbeker die hoogte in geskiet.
Suid-Afrika se buitensporige hoë misdaadkoers kamoefleer ook talle gevalle waar politieke geweld die eintlike oorsaak van dood is, soos wat met plaasmoorde en huisaanvalle teen blankes gebeur
Daar is sedert die einde van Apartheid ‘n toename in politieke sluipmoorde as gevolg van konflik binne die regerende party self.
Die Nasionale Vryheidsparty, grootliks in KwaZulu-Natal, beweer dat 21 van sy lede vermoor is sedert die party vroeg in 2011 gestig is.
Die Inkatha Vryheidsparty beweer dat tien van sy verkose verteenwoordigers vermoor is.
Volgens die linkse, pro-swart Daily Maverick was daar “59 politieke moorde in die laaste vyf jaar”.
Raymond Suttner, ‘n oud-politieke gevangene, sê “sluipmoorde is die aangewese manier om te besluit oor leierskap en toegang tot welvaart binne die ANC en sy bondgenote”.
Suttner is gevonnis omdat hy tussen 1975 en 1983 aan die ANC se ondergrondse aktiwiteite deelgeneem het. Hy is onder die noodtoestand vanaf 1986 tot 1988 aangehou.
Die Veiligheidsraad van die Verenigde Nasies het ‘n beroep op lande gedoen om die betaling van lospryse te staak.
‘n VN-resolusie is eenparig goedgekeur, wat ledestate verhoed om lospryse aan groepe te betaal wat bande met al Kaida het.
Die resolusie is nie bindend nie, maar wil terreurgroepe verhinder om geld so in te samel.
Al Kaida verdien honderde miljoene dollar deur lospryse te eis.
Groepe wat bande het met al Kaida het in die laaste drie jaar meer as een miljard rand in lospryse ontvang, het Brittanje se VN-ambassadeur Mark Lyall Grant aan verslaggewers gesê.
Dit kom te midde van pogings om die Suid-Afrikaanse onderwyser, Pierre Korkie, vry te laat wat in Jemen as gyselaar aangehou word.
The Gift of the Givers Foundation se verteenwoordiger in Jemen sal voortgaan om te onderhandel met al Kaida vir die vrylating van die Bloemfonteinse onderwyser, maar van buite die land.
Die stigter van die Suid-Afrikaanse Moslemliefdadigheidsorganisasie Imtiaz Sooliman het gesê die onderhandelaar Anas al-Hamati moet Jemen verlaat nadat die ontvoerders hom beskuldig het dat hy die losprys vir Korkie se vrylating gesteel het.
Hulle glo die Suid-Afrikaanse regering het die losprys verlede week in Jemen betaal.
Die adjunk-Minister van Internasionale Betrekkinge en Samewerking Ebrahim Ebrahim het Jemen verlede week besoek, en ‘n vergadering met topregeringsamptenare oor Korkie se saak bespreek.
Alhoewel sekere state reeds weier om ontvoeringslospryse te betaal onder ‘n resolusie wat in 2001 aangeneem het, het die Britse regering ‘n nuwe resolusie opgestel wat ontwerp is om politieke druk op lande wat steeds lospryse betaal, te verhoog.
Die resolusie skep geen nuwe wetlike verpligtinge nie.
Die Verenigde State, die Verenigde Nasies en die Veiligheidsraadregering het die ooreenkoms tussen partye in die konflik in Suid-Soedan verwelkom.
Die regering van Suid-Soedan en die rebelle het ‘n skietstakingsooreenkoms onderteken.
Dié stap volg na vyf weke se gevegte wat die land nader aan ‘n burgeroorlog gebring het.
Die gevegte tussen soldate lojaal aan president Salva Kirr en diegene wat die afgedankte visepresident, Riek Machar steun, het in Desember uitgebreek.
Nagenoeg 10.000 mense is dood tydens die vyandelikhede en meer as ‘n halfmiljoen mense is ontheem.
Die ooreenkoms wat in die Ethiopiese hoofstad Addis Abeba onderteken is, sal na verwagting binne 24 uur in werking tree.
Suid-Soedan se president Salva Kiir het die VN-vredesending daarvan beskuldig dat hulle soos ‘n “parallelle regering” in sy land optree.
Sy kommentaar kom nadat sy regering die VN beskuldig het dat hulle aan gewapende rebelle in hul kampe skuiling bied.
Meer as 70.000 burgerlikes het in die VN se basisse regoor Suid-Soedan skuiling gesoek nadat gevegte uitgebreek het verlede maand.
Wrywing met die VN het gevolg na ‘n poging Sondag deur die minister van inligting om toegang te verkry tot die VN-basis in Bor, waar hulle glo gewapende rebelle skuil.
In ‘n verklaring, die VN se hoof Ban Ki-moon, het gesê hy is “bekommerd” en “ontsteld” deur die dreigemente teen personeel van die VN-sending in Suid-Soedan (Unmiss).
Kiir het smalend gesê die VN “moet nog net die hoof van Unmiss as ‘n mede-president van die Republiek van Suid-Soedan aanwys”.
“As dit die posisie van Ban Ki-moon is, moet hy dit duidelik maak dat hy wil hê die VN moet Suid-Soedan oorneem.”
Die ooreenkoms, onderteken onder die vaandel van die Oos-Afrika-blok IGAD in Addis Abeba, word beskou nietemin as ‘n eerste stap in die rigting van vredesgesprekke tussen die Soedanese regering en die rebelle.
Die VSA het vir die Suid-Soedan se leiers gevra om vinnig te werk in die rigting van ‘n inklusiewe politieke dialoog, terwyl die Veiligheidsraad die skietstilstand as ‘n eerste stap verwelkom het.
‘n Senior VN-amptenaar is besig om paniek te saai oor ‘n “volksmoord” in SAR.
John Ging waarsku dat die risiko van ‘n volksmoord in die mineraalryke Sentraal Afrikaanse Republiek hoog is nadat 8 mense dood is.
Dié toestand is glo geskep deur Franse magte wat strydende faksies ontwapen en hulle dan kwesbaar maak vir uitwissing, het Reuters berig.
Die land het egter ‘n lang geskiedenis van chaos.
Ging, ‘n direkteur in die kantoor vir die koördinering van humanitêre aangeleenthede, het aan die media gesê ‘n internasionale besorgdheid oor die bloedvergieting is nodig.
Ging het gepraat na ‘n vyf-dag besoek aan die streek. Bloedvergieting het die afgelope tyd die lewens van agt mense geëis.
Die voormalige Franse kolonie is een van die armstes in Afrika met verskillende taalgroepe binne sy grense.
Die VN Veiligheidsraad gaan na verwagting die moontlikheid oorweeg om binne die komende maande ‘n VN-vredesmag in die land te ontplooi.
Ging sê dat al die elemente wat voor menseslagtings in plekke soos Rwanda en Bosnië waargeneem is, ook in SAR teenwoordig is.
Hy het die gebrek aan internasionale reaksie op die verslegtende situasie betreur.
Daar is tans ‘n AU-mag met net meer as vyf duisend soldate in die land, wat bygestaan word deur een 1.600 Franse troepe.
Ontleders waarsku egter dat dit onvoldoende is as die grootte van die SAR in ag geneem word.
Die ontplooiing van Rwandese troepe , die eerste wat aan boord van ‘n Amerikaanse militêre vliegtuig Donderdag aangeland het, sal die AU-kontingent hierdie maand na meer as 5000 vredesmagte uitbrei.
Leiers van Oos-Afrika sal vandag in Nairobi, Kenia byeenkom om die dreigende burgeroorlog en voortslepende geweld in Suid-Soedan te bespreek.
Dié vergadering volg na Donderdag se samesprekings tussen die president van Kenia, Uhuru Kenyatta, die Ethiopiese premier Hailemariam Desaleg asook president Salva Kiir van Suid-Soedan.
Op die sakelys was die onmiddelike beëindiging van gevegte, onderhandelinge met die oog op ‘n politieke oplossing, en die huidige humanitêre krisis.
Nog ‘n kwessie wat aandag sal geniet is die aanhouding van ‘n groep verdagtes wat deel was van die mislukte staatsgreep.
Volgens die Verenigde Nasies is duisende mense in Suid-Soedan reeds gedood nadat geweld op 15 Desember uitgebreek het.
President Salva Kirr het sy voormalige adjunkpresident, Riek Machar van ‘n poging tot ‘n staatsgreep beskuldig en dié beskuldiging het tot die geweld gelei.
Daar word gevrees dat honderde mense dood is nadat ‘n seldsame tropiese sikloon die noorde van Somalië die naweek getref het.
Die Verenigde Nasies sê swaar reën het oor die Puntland-gebied uitgesak. Kommunikasie-kabels en toegang tot die gebiede wat geraak is, is afgesny.
Dit bemoeilik noodleniging sowel as die bevestiging van berigte wat ontvang word.
Die Puntland-owerhede het die situasie tot ‘n noodtoestand verklaar en om hulp gevra. Die VN sê sowat 30.000 mense benodig voedsel, skuiling en mediese voorraad.
Die Wêreld Meteorologiese Organisasie het bevind dat vanjaar op ses na die warmste is sedert rekordhouding in 1850 begin het.
Die organisasie sê die stygende seevlak, wat deur klimaatsverandering veroorsaak word, vererger die uitwerking van storms soos Tifoon Haiyan in die Filippyne verder.
Die sekretaris-generaal van die WMO, Michel Jarraud sê meer kweekhuisgasse in die atmosfeer sal ‘n al hoe warmer toekoms tot gevolg hê.
Hy sê ook meer uitermatige weerstoestande is onvermydelik. Volgens die WMO was die eerste nege maande van 2013 saam met dié van 2003 die sewende warmste ooit.- RSG
Suid-Afrika is verkies tot die Verenigde Nasies se Menseregteraad.
Veertien lede word verkies om ‘n driejaartermyn te dien. Hulle word deur die 193 lede van die Verenigde Nasies se Algemene Vergadering in New York aangewys.
Van die lande wat verkies is tot die Raad, soos Kuba en Saudi-Arabië, het twyfelagtige menseregterekords.
Suid-Afrika sluit by Namibië, Marokko en Algerië uit Afrika aan.
China, Rusland sowel as Viëtnam sal ook op die Raad dien.
Die ander twee is die Verenigde Koningkryk en Frankryk. Die lande se termyn begin op 1 Januarie 2014.
‘n Vredesooreenkoms tussen die regering van die Demokratiese Republiek van die Kongo en M23 rebelle is in die weegskaal, nadat ‘n finale ooreenkoms nie bereik kon word nie.
Die sogenaamde Kampala Dialoog moes gisteraand afgesluit word, en die ondertekeningseremonie sou Maandag plaasvind.
Daar is blykbaar ‘n verskil oor of die ooreenkoms ‘n vredesooreenkoms moet wees of ‘n verklaring waarin die rebellie verwerp word.
Spesiale gesante in die DRK het onder leiding van Mary Robinson van die VN ‘n dringende beroep op die partye gedoen om hul verskille oor die formaat van die dokument by te lê en verbind te bly tot vrede. – RSG
Afrika-leiers sê die voorgestelde Afrika-Unie se Noodreaksiespan sal nie die werk en die mandaat van die Verenigde Nasies oorneem nie.
Dié verklaring volg ná die beraad oor Afrika se vermoë tot onmiddelike reaksie op krisisse, wat in Pretoria gehou is.
Die beraad, wat deur verskeie Afrika-staatshoofde en hul ministers van verdediging bygewoon is, was daarop gerig om maatreëls te bespreek oor hoe om vinnig te reageer op konflikte en gewapende groepe wat die veiligheid en sekerheid van ledestate bedreig.
President Jacob Zuma sê die span sal nou met die VN saamwerk.
Die Verenigde Nasies se spesiale verteenwoordiger in die Demokratiese Republiek van die Kongo, Martin Kobler, was vol lof vir die Suid-Afrikaanse soldate wat in die ooste van die land ontplooi is.
Die soldate was deel van ‘n operasie teen M23 rebelle in die oorlog-geteisterde streek.
Volgens Kobler het hulle ‘n belangrike rol gespeel in die beskerming van burgerlikes toe gevegte verlede week in Kiwanja uitgebreek het.
Kobler het die minister van Verdediging, Nosiviwe Mapisa Nqakula ontmoet, wat die soldate besoek het. Hy het die Suid-Afrikaanse soldate bedank vir hulle bydra om lewens te red, en het hulle as dapper en professioneel bestempel.
Intussen het Kongolese regeringsoldate die oostelike grensdorp, Bunagana ingeneem terwyl die meeste M23-rebelle padgegee het.
Dit was die laaste belangrike DRK-dorp waarvan hulle in beheer was. Dit was ook die eerste plek wat die rebelle verlede jaar ingeneem het.
Die oorname van die regering en VN se gesamentlike mag in die land, is die jongste sukses wat behaal is in die 20-maandlange rebellie.
Korrupsie bedreig die sukses van die Verenigde Nasies se vredesendings regoor die wêreld, volgens ‘n nuwe verslag.
Die verslag van Transparency International identifiseer gebiede waar korrupsie alledaags geword het, veral met in die veld bedrywighede .
Dit verwoord ook die noodsaaklikheid vir die organisasie en die lidlande vir ‘n ernstige bespreking oor hoe om die probleem aan te spreek.
Die verslag identifiseer 28 tipes van korrupsie wat dreig om vredesendings te kelder, met die klem spesifieke gevalle van omkopery, die onreëlmatige verkryging en verkoop van bates, bedrog, diefstal en selfs seksuele aanranding gepleeg deur VN-personeel.
Die Programdirekteur van Transparency International Mark Pyman sê hulle wil die stryd teen korrupsie deur die Veiligheidsraad van die resolusies aanvoer.
Die voorsitter van die raad van direkteure Haguette Labelle verduidelik dat die risiko van korrupsie hoog is as groot hulpbronne betrokke is sowel as druk om vinnig te lewer.
Die skrywers van die verslag sê die onderwerp kry nie genoeg aandag op die oomblik nie en dat ‘n blinde kol oor korrupsie ‘n ernstige fout is. Die verslag doen ‘n beroep vir die aanstelling van senior personeel in al missies om verantwoordelikheid vir die integriteit waar nodig te aanvaar, asook ondersoekbeamptes in groter missie soos die DRK waar kwessies wat ontstaan dadelik hanteer kan word.
Sir Stewart Eldon, voormalige Britse ambassadeur in Noord-Atlantiese Verdrag Organisasie ( NAVO ) en ‘n senior adviseur vir Transparency sê: “Die veranderende karakter van internasionale konflik en die probleme wat deur die internasionale gemeenskap in die gesig gestaar word, toon vir ons dat korrupsie word toenemend ‘n belangrike onderliggende element in baie van hulle, so die onderwerp is die moeite werd om aan aandag te skenk in die konteks van vrede en ander internasionale ingrypings.”
Die Verenigde Nasies se Veiligheidsraad oorweeg sanksies teen Suid-Soedan.
