Durbanse pendelaars het elf treinwaens vernietig omdat die treine nie betyds opgedaag het nie.
Die waens is by die Reunion-stasie naby Isipingo by Durban deur oproerige pendelaars aan die brand gesteek.
‘n Woordvoerder van die KwaZulu-Natalse nooddienste sê niemand is tydens die brande beseer nie.
Die pendelaars het ook glo die trein met klippe bestook en daarna aan die brand gesteek uit ontevredheid met swak diens.
Brande het gister steeds in die noordoostelike Amerikaanse stad Baltimore gewoed, waar ’n aandklokreël gisteraand ingestel sou word nadat onluste Maandag tot diep in die nag voortgeduur het.
Die deelstaat Maryland het ’n noodtoestand afgekondig nadat betogers winkels geplunder en met armsvol buit ontsnap het. Skole is gister as ’n veiligheidsmaatreël gesluit. Die volle omvang van die skade sou deur die loop van die dag bepaal word.
Amptenare van die stad, swart gemeenskapsleiers en die familie van die 25-jarige Freddie Gray wat in polisieaanhouding dood is, het hul afkeur te kenne gegee oor die omvang van die betogings wat ná Gray se begrafnis begin het.
“Te veel mense het vir geslagte hierdie stad gebou, net om te sien hoe boewe dit op ’n sinnelose manier verwoes en alles afbreek wat ons opgebou en voor geveg het,” het burgemeester, Stephanie Rawlings-Blake, gesê.
“Dit is idioties om te dink julle sal ’n beter lewe vir enige iemand verseker deur die stad te vernietig,” het sy gesê.
Die swart burgemeester moes onder kwaai kritiek deurloop nadat sy langer as 5 ure gewag het om in te gryp teen die geweld wat onbeheerst voortgewoed het.
Duisende lede van die polisie en die nasionale wag is ontplooi om beleërde wetstoepassers by te staan. Minstens 27 mense is in hegtenis geneem en 15 polisiebeamptes is beseer nadat hulle Maandagnag deur die woedende massas met klippe bestook is.
Volgens die Baltimore Sun is twee mense Maandagnag in afsonderlike skietvoorvalle gewond.
Die geweld is die ergste in ’n reeks konfrontasies tussen Amerikaanse polisielede en hoofsaaklik Afro-Amerikaanse jeugdigdes, wat woedend is oor wat hulle as rassisme in die polisiemag beskou.
Verlede somer se noodlottige skietery van die ongewapende tiener Michael Brown deur ’n wit polisiebeampte in Ferguson, Missouri, het die kus-tot-kus-protes begin.
Die onluste in Baltimore is ontketen nadat Freddie Gray op 19 April in aanhouding gesterf het – glo weens rugbeserings wat hy tydens sy inhegtenisneming vroeër die maand opgedoen het.
President Barack Obama is ook van oor die verwikkelinge in Baltimore ingelig.
Hillary Clinton, ‘n voornemende presidentskandidaat, het die geweld en plundery heeltemal geïgnoreer en onvanpaste twiets uitgestuur oor gratis plakkers met haar gesig op.
Die onluste het tot uitbarsting gekom kort nadat duisende roubeklaers Maandag vir Gray se begrafnis in die New Shiloh Baptiste kerk in die stad se verarmde Sandtown-woonbuurt vergader het. Voor die diens het ’n kriptiese boodskap op sosiale media die rondte gedoen oor ’n “purge” (straattaal vir dade van wetteloosheid) wat om 15:00 sou begin.
Gray se familie, wat in rou gedompel is, het spesifiek gevra dat geen betogings gehou word nie.
Regsverteenwoordigers van Gray se familie sê sy dood is veroorsaak deur erge rugbeserings wat opgedoen is nadat hy in hegtenis geneem is. Hy was vir ’n week in ’n koma.
Ses polisiebeamptes is geskors hangende die bevindinge van ’n ondersoek wat Vrydag aan staatsaanklaers oorhandig moet word.
Die polisie het bevestig dat Gray mediese hulp versoek het nadat hy in hegtenis geneem is, en het toegegee dat hy vroeër mediese behandeling moes gekry het.
‘n Voertuig is Dinsdagaand in ligte laaie gelaat op die N1 naby die Maraisburg-afrit in Johannesburg, nadat die insittende doodgeskiet is.
‘n Tweede man wat stilgehou het om hulp te verleen, is ook geskiet.
Lt. Kay Makhubela, woordvoerder van die polisie, het gesê die eerste insittende is van die pad gedwing voordat hy doodgeskiet geskiet is en sy motor daarna aan die brand gesteek is.
Die insittende was glo die 58-jarige Sam Moloto wat voorheen ‘n polisielid was wat georganiseerde misdaad ondersoek het. Hy het vyf jaar gelede bedank, maar sy huis in Soweto was glo besonder goed beveilig.
Volgens Makhubela is ‘n tweede motoris, wat stilgehou het om hulp te verleen ook geskiet en vir dood in sy voertuig agtergelaat.
Makhubela het gesê niemand is nog in hegtenis geneem in verband met die moord nie.
Minstens 12 skole moes in Rolle in Mpumalanga gesluit word weens opstande oor ‘n brug.
Oproeriges het die pad tussen Bosbokrand en die Manyeleti-wildreservaat versper en ‘n brug wat die twee plekke verbind aan die brand gesteek.
Hulle eis dat die 50 jaar-oue brug herbou word.
Die Departement van Openbare Werke het vroeër onderneem om die brug te herbou, maar sê dit is nie onder sy projekte vir die huidige geldjaar nie.
Oproerige inwoners van Letlhabile en Jericho naby Brits in Noordwes het hulself tot brandstigting en plundery gewend vir dienste.
Die oproeriges, wat min of geen belasting betaal nie, dreig om vol te hou met openbare geweld totdat hulle van skoon water voorsien word.
Hulle het ‘n bus en ‘n vragmotor aan die brand gesteek en verskeie winkels geplunder.
Oproermakers beskuldig die Madibeng plaaslike munisipaliteit daarvan dat hulle nie aan die probleem aandag gee nie, ondanks die feit dat die plaaslike regering miljoene rand bewillig het vir ‘n waterprojek.
Dit is nie bekend wat met die geld gebeur het of wie verantwoordelik is vir die projek nie.
Ontevredenes het skole, sake-ondernemings en gesondheidsentrums gedwing om te sluit.
Openbare geweld by Mandlagazi buite Tzaneen in Limpopo word deur die polisie ondersoek nadat ‘n skare swartes drie huise, twee motors en ‘n sjebien in ligte laai gelaat het.
Die skare het volgens berigte ‘n huis afgebrand wat behoort aan ‘n ryk sjebieneienaar.
Niemand is nog in verband met die voorvalle in hegtenis geneem nie.
‘n Polisiewoordvoerder, Moatshe Ngoepe sê meer polisiebeamptes sal in die gebied ontplooi word.
Geweld het Sondag uitgebreek nadat die man dood aangetref is in sy slaapkamer maar die motief is nog onbekend op hierdie stadium.
“Lede van die gemeenskap beskuldig ongelukkig die sjebieneienaar dat hy verantwoordelik is,” het Ngoepe in ‘n verklaring gesê.
Hulle het die eienaar se motors, dubbel-verdiepinghuis, kroeg, en sy ouers se huis aan die brand gesteek. Die skade is na raming sowat R4 miljoen.
Tydens die voorval is ‘n familielid van die sjebieneienaar aangerand. Hy het ernstige beserings opgedoen.
Die polisie ondersoek klagtes van openbare geweld, brandstigting, opsetlike saakbeskadiging en aanranding met die opset om ernstig te beseer.
Die bejaarde egpaar wie se liggame Donderdagoggend in hul gebrande huis in Pietermaritzburg in KwaZulu-Natal aangetref is, se name is bekend gemaak.
Albei slagoffers is met ‘n skerp voorwerp in hul nekke gesteek.
Kol. Jay Naicker, polisiewoordvoerder, het die egpaar geïdentifiseer as Melvin Lawson en sy vrou Susanna, albei 71 jaar oud.
Malcolm se liggaam is in die spaarkamer aangetref met sowat vyf steekwonde aan sy nek. Susan se liggaam het in die gang gelê. Die verdagtes het glo petrol of paraffien oor haar uitgegooi en haar aan die brand gesteek.
Die aanvallers het die egpaar se huis aan die brand gesteek voordat hulle van die toneel gevlug het. Hul televisiestel word vermis.
Die bure het die nuus versprei dat die Lawson-egpaar se huis brand. Die polisie was glo dadelik op die toneel.
Die polisie ondersoek twee sake van moord, ‘n saak van huisroof en ‘n saak van brandstigting. Dii is nie bekend hoeveel aanvallers die egpaar vermoor het nie.
‘n Vierde skool is by Khakhanwa in Malamulele in Limpopo aan die brand gesteek omdat hulle klasse voortgesit het.
Ouers het die skool probeer bewaak te midde van die laaste vier weke se oproer in die gebied.
Drie skole in die gebied is vroeër dié week ook aan die brand gesteek.
Dienste en toegang tot die gebied is steeds versper. Oproer in die gebied duur reeds sowat vier weke met Tsongas wat ‘n aparte munisialiteit eis.
Intussen sê die Malamulele-taakspan die Tsongas sal Sondag besluit of hulle protes gaan opskort. ‘n Woordvoerder, Isaac Nukeri, het met die minister van polisie, Nathi Nhleko en die minister van staatsveiligheid, David Mahlobo, gesprek gevoer.
In ‘n ander voorval van openbare geweld, het Jacob Mamabolo, LUR vir samewerkende regering in Gauteng, Woensdag gesê dit was EFF-lede wat munisipale geboue aan die brand gesteek het tydens oproerigheid in Mohlakeng buite Randfontein.
“Die EFF-lede het op ‘n plundertog gegaan en munisipale eiendomme aan die brand gesteek en alle paaie en ingange na die gebied versper, en die gemeenskap is verhoed om te gaan werk,” het Mamabolo gesê.
Die burgemeester se huis en motor, die biblioteek, munisipale kantore en die stadsaal is van die eiendomme wat in ligte laaie gelaat is.
Volgens Mamabolo het die betogers ook winkels, wat deur buitelanders besit word, geplunder.
Inwoners het Woensdagoggend op ‘n plundertog uitgevaar. Christina Mabala, voorsitter van die EFF se Wes-Rand-tak, het egter gesê ANC-lede het die brande begin.
“Sommige mense binne die ANC het besluit om die geleentheid te gebruik om eiendomme te brand en te plunder. Ons as die EFF distansieer onsself van die gewelddadige optrede en skade aan eiendom,” het sy gesê. Sy het gesê die beskuldigings is vals.
Mabala het gesê die EFF het ‘n optog gereël van Mohlakeng na Randfontein om hul griewe aan die burgemeester te oorhandig.
Volgens Mabala het die polisie met rubberkoeëls op die betogers losgebrand.
In nog ‘n voorval van openbare geweld, het die polisie Woensdag met rubberkoeëls op betogers in Majakaneng, naby Mooinooi in Noordwes, losgebrand.
Brig. Thulani Ngubane, woordvoerder van die polisie, het gesê die oproeriges het dele van die N4 met hekke, klippe, bome en brandende bande versper. Volgens Ngubane het die betogings Maandag begin.
Sewe betogers is in hegtenis geneem en sal aangekla word van openbare geweld en kwaadwillige saakbeskadiging.
‘n Bus is aan die brand gesteek en twee winkels, wat aan buitelandse behoort, geplunder. Inwoners is glo ongelukkig oor water- en elektrisiteitstoevoer in die area.
Biskop Paul Verryn van die Metodistekerk en ‘n kollega wat probeer het om dialoog te bevorder, is met klippe bestook. Verryn en sy kollega is nie beseer nie.
Hoofpaaie was Woensdag gesluit nadat die oproeriges motoriste tussen Rustenburg en Pretoria met klippe bestook het. Die pad tussen Mooinooi en Brits was ook gesluit.
Die departement van gemeenskapsveiligheid in Noordwes het gesê drie vragmotors en ‘n voertuig is Dinsdagaand aan die brand gesteek.
Niemand is nog in hegtenis geneem in verband met die voorval nie.
Die Nasionale Krugerwildtuin het sy kommer oor veldbrande in die park uitgespreek.
Die park se woordvoerder, William Mbasa, sê vier veldbrande woed tans en personeel moet bontstaan om die brande onder beheer te bring. Warm toestande die afgelope week maak dit nog moeiliker, het hy gesê.
Hy het ‘n dringende beroep op mense in die omgewing gedoen om nie veldbrande te stig nie.
Volgens Mabasa, het ‘n veldbrand Vrydag in Mosambiek uitgebreek en daarna oor die grens binne die Park beweeg.
Die veldbrand het intussen weiding suid van die Olifantsrivier, by Houtboschrand, Nwanetsi en Tshokwane vernietig.
Mbasa sê alles moontlik word intussen gedoen om die brande te blus.
Swart mediese studente wat nie deurkom nie, het hulself gewend na geweld en brandstigting om hul universiteit te dwing om hulle te laat slaag.
Na twee weke van gewelddadige betogings by die Mediese Universiteit van Suid-Afrika (Medunsa), is verskeie dosente vroeër voorlopig geskors.
Studente het die geboue gevandaliseer en eiendom beskadig teen dosente in die vyfde jaar pediatrie wat hulle beweer, hulle “viktimiseer” en “doelbewus” laat druip.
Die hoofstroommedia het geen van die dosente genader om hul menings oor die gehalte van die werk van die amokmakers in te win nie.
Studente eis dat hulle deurgesit word na die sesde jaar met volle krediet wanneer die akademiese program hervat.
Die studente het vroeër deur die strate van Pretoria na die kantore van die Departement van Hoër Onderwys en Opleiding opgeruk.
Maar die departement het gesê daar is geen rede vir die optog nie en in plaas daarvan, moet studente die tyd gebruik om voor te berei om terug te gaan na klasse.
‘n Lid van die studenteraad, Tshepo Mokoena, het voorheen gesê: “Ons sal nie teruggaan universiteit toe nie, totdat hierdie kwessies uitgesorteer is. Die departement het gesê ons moet wag vir ‘n verslag oor ons griewe voor die einde van die week. Ons sal wag vir dit.”
Die aanbevelings van ‘n ministeriële taakspan wat pas vrygestel is, het glo nie aan hulle eise voldoen het nie, omdat die dosente nie permanent geskors is nie.
Hulle het weer begin amok maak en die hoofingang na die universiteit versper.
Die voorsitter van die Studenteraad, Malose Marakala, sê hulle sal voortgaan om die universiteit te ontwrig totdat die bestuur aan hulle eise voldoen.
Die Suid-Afrikaanse Mediese Vereniging (Sama) het gesê daar moet ‘n oplossing vir die probleem gesoek word.
Tydens verlede week se optog by die universiteit se Ga-Rankuwa-kampus, het studente ‘n motor aan die brand gesteek, vensters stukkend gegooi en deure afgebreek.
’n Vrouekoshuis by die Mangosuthu Universiteit van Tegnologie (MUT) in Durban is vroeg Donderdagoggend in ligte laaie gelaat en 15 studente moes vir rookinaseming behandel word.
Thami Mchunu, studentedekaan, het Donderdag gesê ’n saak van brandstigting word deur die polisie ondersoek.
Die brand is kort ná middernag gestig. Studente en veiligheidspersoneel van die universiteit kon daarin slaag om die brand te blus.
Prof. Mashupye Kgaphola, visekanselier, het gesê die skade beloop ongeveer R90 000.
Die universiteit is die afgelope week deurgeloop onder oproerige studente. ’n Groep studente wat hul die Progressiewe Jeugalliansie noem eis dat alle studente geregistreer moet word, ongeag hoeveel geld hulle die universiteit skuld in terme van uitstaande studiegelde.
Swart inwoners het die plaaslike landdroshof in die Ncotshane-lokasie by Pongola in die noorde van KwaZulu-Natal aan die brand gesteek.
‘n Kerkleier sou binnekort in die landdroshof verskyn wat Woensdagaand in ligte laaie gelaat is.
Die onrus het vroeër uitgebreek nadat ‘n vier-jarige seun vermoor en vermink is, waarskynlik vir moetie.
Dele van sy verminkte liggaam is in die kerk in ‘n sak gevind.
Ontstoke inwoners het daarna die kerk en die huis van die kerkleier wat hulle van die moetiemoord verdink, afgebrand.
Die een-en-vyftigjarige pastoor is intussen in verband met die moord in hegtenis geneem.
Die gemeenskap eis nou dat 15 mense vrygelaat word wat in hegtenis geneem is ivm die vroeëre brandstigting.
Polisie- en gemeenskapslede het slaags geraak nadat inwoners paaie met vullis versper het. Die polisie en weermag het tot laat in nag gespook om die oproer onder beheer te bring.
Hofrekords en meubels is in die brand vernietig. ‘n Motor wat buite die hof gestaan het, is ook aan die brand gesteek.
Die Johannesburgse Nooddienste is bekommerd oor ‘n vlaag brande in die Johannesburgse middestad, het RSG berig.
‘n Woordvoerder van die Nooddienste, Robert Mulaudzi sê die oorsaak van die brand Saterdagaand by ‘n gebou op die hoek van Rissik en Loveday straat is nog nie bekend nie.
Hy sê een persoon is dood in die brand, en twee mense is behandel vir rookinaseming en geringe brandwonde.
Volgens Mulaudzi het brandbestryders die afgelope week minstens vier brande in die middestad geblus.
Hy sê hulle het ook gistermiddag ‘n brand geblus by Ubuntu Kraal in Soweto.
Brandstigters het Donderdag ‘n klein kantoor van die regerende ANC in Marikana aan die brand gesteek, waar waar 34 stakende mynwerkers in 2012 doodgeskiet is, het die polisie gesê.
“Die polisie ondersoek ‘n saak van brandstigting,” het die polisiewoordvoerder Sabata Mokgwabona aan Sapa gesê.
“Die gebou is na berig word gebruik as ‘n kantoor vir ‘n politieke party,” het hy bygevoeg .
Die ANC het bevestig dat sy kantoor in die Nkaneng-lokasie afgebrand is.
Geen beserings is aangemeld nie en geen arrestasies is nog gemaak nie.
In minder as twee weke sal Suid-Afrikaners hulself na die stembusse wend waar president Jacob Zuma in alle waarskynlikheid vir ‘n tweede termyn herkies sal word.
Marikana is die tuiste vir sommige van die meer as 80.000 platinummynwerkers wat reeds drie maande ‘n staking volhou in hul eis vir hoër lone.
Die werkers is honger en desperaat en die ekonomie van Rustenburg word lamgelê deur die staking, maar die samesprekinge tussen die stakers en die mynbestuur het Donderdag op niks uitgeloop nie.
Die meeste werkers behoort aan die radikale Amcu wat die ANC-gesinde vakbond NUM uitgedruk het as die dominante unie.
Die nuwe linkse EFF-party van die populistiese Julius Malema geniet aansienlike steun in Marikana.
