Internasionale nuus Archives - Page 119 of 464

Bibi op ‘n mespunt

Die Israelse eerste minister, Benjamin Netanyahu se beloftes om die skepping van ‘n Palestynse staat te keer, is ongewild by kiesers in sy land.

Hy het in ‘n laaste poging om steun te werf voor vandag se verkiesing gesê hy sal geen Palestynse staat toelaat indien hy herkies word nie.

Netanyahu het gewaarsku dat enigeen wat ‘n Arabiese tuisland tot stand sou bring, die gevaar loop om ‘n platform vir radikale elemente te skep waarvandaan aanvalle geloods kan word, maar talle kiesers is moeg vir die boodskap.

Netanyahu se grootste teenstander, Isaac Herzog het kiesers aangemoedig om die eerste minister se ses jaar-lange bewind te beëindig.

Herzog en die voormalige minister van justisie, Tzipi Livni se Zionistiese Alliansie het onderneem om die vredesproses met die Palestyne te hervat indien hulle die verkiesing wen.

Volgens peilings kan Herzog en Livni tussen 24 en 26 setels in die parlement wen, teenoor Netanyahu se sowat 23.

Kremlin ontken gerugte oor Poetin se gesondheid

Pres. Wladimir Poetin se woordvoerder het gerugte ontken wat op die internet oor die Russiese staatshoof se gesondheid versprei is.

Dmitry Peskof het Donderdag aan die Ekho Moskvy-radiostasie gesê die president is “absoluut gesond en bygevoeg dat sy handdruk nog só ferm is “dit kan jou hand breek. Peskof se kommentaar is met verwysing na die Kremlin se gewone reaksie op vrae oor die gesondheid van die voormalige president, Boris Jeltsin, wat gedurende sy ampstermyn ’n hartoperasie ondergaan het.

Peskof het ook gesê Poetin sou nie by ’n vergadering met die Federale Veiligheidsdiens wees nie, al woon hy dit gewoonlik by.

’n Aankondiging wat Woensdag deur die Kremlin uitgereik is dat Poetin ’n reis na Kasakstan uitgestel het, het gerugte aanlyn ontketen met sommige mense wat gis dat Poetin ernstig siek is, en ander wat meen hy beplan om ’n bekende persoon in die regeringte ontsetel.

Britse nuusbronne het berig dat Poetin “nog lewe” maar “geneutraliseer” is in ‘n staatsgreep in Moskou.

‘n Voormalige veiligheidshoof sit glo volgens die Britse nuusbronne agter die komplot.

Poetin is laas op 5 Maart in die openbaar gesien toe hy die Italiaanse eerste minister, Matteo Renzi, in Moskou ontmoet het.

Die Kremlin se mediadiens het Woensdag ’n foto vrygestel van ’n vergadering tussen Poetin en die Karelia-streek se goewerneur.

Plaaslike nuusagentskappe het egter reeds op 5 Maart oor dié ontmoeting gerapporteer.

Die Russiese nuusagentskap RBC het ’n anonieme bron in die Karelia-streekkantoor aangehaal wat gesê het die vergadering het al op 4 Maart plaasgevind.

Intussen is berig dat ‘n brand naby die Kremlin uitgebreek het in die Novodevichy-klooster.

Die presidente van Rusland, Wit-Rusland en Kasakstan sal in Astana op 20 Maart ontmoet, het die nuusagentskap Novosti Maandag berig.

Dié ontmoeting wat op 13 Maart sou plaasvind, is eers uitgestel, maar die Russiese afvaardiging het reeds hul deelname bevestig in Kazakhstan se hoofstad en Poetin se verskyning sal ‘n einde aan die gissings maak.

VSA ontken dat Sierra Leone se adjunkpresident asiel vra

Die Verenigde State van Amerika het Sondag ontken dat die vise-president van Sierra Leone, Samuel Sam-Sumana by die Amerikaanse ambassade in Freetown skuil.

Sierra Leone sukkel steeds met die Ebola-epidemie wat sedert verlede jaar woed.

‘n Amerikaanse amptenaar het gister bevestig dat die Amerikaanse ambassade in aanraking was met al die betrokke amptenare.

Die Amerikaanse regering het alle betrokkenes aangemoedig om die situasie op te los deur middel van wettige middele en om die oppergesag van die reg te respekteer.

Sam-Sumana Saterdag het Saterdag om asiel in die Verenigde State van Amerika aansoek gedoen. Hy beweer dat sy lewe in gevaar is. Sierra Leone se regerende party het ontken dat die vise-president bedreig word.

Sam-Sumana is op 6 Maart uit die regerende All People’s Congress-party geskors wat hom daarvan beskuldig dat hy “politieke geweld orkestreer” en probeer om ‘n nuwe party in sy tuisdistrik te vorm.

Sam-Sumana het die Amerikaanse ambassadeur Saterdag vir asiel gevra nadat soldate by sy woning opgedaag het en sy veiligheidswagte ontwapen het.

Hy het aan Associated Press gesê dat hy nie meer veilig voel in die land nie.

Hy sê hy is in kennis gestel deur top-amptenare in die presidensiële wag dat die soldate op die bevele van President Ernest Bai Koroma optree.

Britse soldaat nuutste Ebola-geval in Sierra Leone

‘n Britse militêre gesondheidswerker is met Ebola in Sierra Leone gediagnoseer, het owerhede in Londen Woensdag gesê en ‘n militêre vliegtuig is gestuur om haar terug te bring indien nodig.

“Ons kan bevestig dat ‘n Britse militêre gesondheidswerker in Sierra Leone positief vir Ebola getoets het,” het ‘n woordvoerder vir Openbare Gesondheid Engeland (PHE), ‘n regeringsagentskap, verklaar.

Die vroulike gesondheidswerker word in ‘n spesialis-Ebolasentrum in Kerry Town in die westelike deel van Sierra Leone behandel.

A Royal Air Force-vliegtuig is gestuur na die land en is gereed om die pasiënt te ontruim indien nodig.

“Mediese kenners is tans besig om die situasie te peil om te verseker dat die nodige sorg gegee word,” het die PHE-woordvoerder gesê.

“‘n Mediese besluit of die individu ontruim sal word na die Verenigde Koninkryk vir behandeling sal mettertyd geneem word.”

‘n Geskatte 700 Britse soldate, mans en vroue, is ontplooi om Sierra Leone te help in hul reaksie teen Ebola wat Wes-Afrika verlede jaar getref het.

Hulle het gehelp bou aan mediese sentrums, saam met ‘n aantal vrywilligers van Brittanje se staatsbeheerde National Health Service.

Twee Britse verpleegsters, Pauline Cafferkey en William Pooley, het Ebola opgedoen maar herstel na behandeling in Brittanje.

PHE het gesê ‘n ondersoek is aan die gang oor hoe die naamlose militêre dienspligtige die virus opgedoen het, en enigiemand wat in onlangse kontak met die pasiënt was, word gesoek.

“Enige individue geïdentifiseer deur die feit dat hy in noue kontak [met die slagoffer] was, sal geassesseer word en ‘n kliniese besluit rakende hulle afvoer na die Verenigde Koninkryk sal geneem word,” het die woordvoerder bygevoeg.

Byna 24000 mense is met Ebola besmet sedert Desember 2013, byna almal in Guinee, Liberië en Sierra Leone, en meer as 9 800 is reeds dood daaraan, volgens die Wêreldgesondheidsorganisasie.

Liberië het verlede week sy laaste bevestigde Ebola pasiënt uit die hospitaal ontslaan. Geen nuwe geval is aangemeld in die land sedert 19 Februarie nie.

Noodsamesprekinge in Brussel oor Griekse reddingsplan

Noodsamesprekinge oor hervormings wat nodig is om Griekeland se ekonomiese reddingsplan te verleng, is Woensdag in Brussel gehou. Intussen het die nuwe regering in Athene geswoeg om genoeg kontant bymekaar te skraap om die res van die maand te kan oorleef.

Die Europese Kommissie, die uitvoerende eenheid van die EU, het volgens AFP bevestig dat die onderhandelings in Brussel begin het, maar het geen besonderhede oor die inhoud of deelnemers verstrek nie.

“Ek kan bevestig dat tegniese onderhandelings met deskundiges en Griekse owerhede en internasionale vennote begin het, wat deur onderhandelings in Athene verder ondersteun sal word, het die kommissie se woordvoerder, Mina Andreeva, gesê.

“Dit is baie belangrik dat hierdie tegniese onderhandelinge plaasvind in ’n kalm en polities-neutrale atmosfeer, sodat daadwerklike stappe gedoen kan word, het sy gesê.

’n Griekse regeringsbron het gesê onderhandelinge sou twee dae duur met die doel om die regte “raamwerk te vind oor hoe om voort te gaan.

“Die instansies’ soek spesifieke data, en dit is wat hulle sal kry, het die bron gesê, met verwysing na die Griekse regering se benoeming van die Troika-groep krediteure – die kommissie, die Europese Sentrale Bank en die Internasionale Monetêre Fonds (IMF).

Griekeland se eurosone-vennote het verlede maand ooreengekom om die land se reddingsplan tot Junie te verleng, in ruil vir hervormings, hoewel die uitbetaling van die volgende porsie van sowat 7 miljard einde April afhang van ’n oorsig van hervormingsplanne.

Griekeland moet hierdie maand 6 miljard betaal om skuld te delg, wat 1,5 miljard aan die IMF insluit.

Volgens verslae wat gister vrygestel is, het die linkse regering van eerste minister Alexis Tsipras oorweeg om pensioenfondse te gebruik om staatsamptenare se salarisse te betaal terwyl onderhandelinge met die troika voortgaan.

Indonesiërs lewer munte by Australiese ambassade af

Indonesiërs het “Maak Abbott se mond stil en “Abbott, sê jammer”, geskree en op’n plakkaat met die Australiese premier, mnr. Tony Abbot, se foto getrap, terwyl hulle sakke met muntstukke by die Australiese ambassade in Jakarta afgelewer het.

Abbott het verlede maand gesê Jakarta moet die US$1 miljard wat Australië as bystandshulp aan Indonesië gegee het in die nadraai van die 2004 Indiese Oseaan-tsoenami onthou. Die tsoenami het die lewens van ongeveer 220 000 mense geëis.

Sy opmerkings was daarop gemik om die teregstelling van die Australiese dwelmsmokkelaars, wat deel uitmaak van die sogenaamde “Bali nege, te stop. Andrew Chan en Myuran Sukumaran sal na verwagting enige dag tereggestel word.

Abbott se poging het egter misluk en n lelike nadraai gehad met betogers in Indonesië wat met n veldtog begin het om muntstukke in te samel om Australiese hulp “terug te betaal.

Sewe sakke muntstukke ter waarde van ongeveer sewe miljoen rupiah (US$535) is gister by die Australiese ambassade afgelewer.

Die koördineerder van die veldtog, Andi Sinulingga, sê Abbott se opmerkings was laakbaar.

“Ons het nooit gevra vir hulp nie, maar Australië het dit aangebied. As ons geweet het hulle was nie opreg nie, sou ons dit nooit aanvaar het nie, het hy gesê.

Gaan Ban se opvolger ‘n vrou wees?

‘n Veldtog is Sondag op internasionale vrouedag van stapel gestuur om n vrou as sekretaris-generaal van die Verenigde Nasies te benoem.

Op die webtuiste, www.womanSG.org sal die profiele van ‘n groep moontlike kandidate van tyd tot tyd gepubliseer word.

Die huidige sekretaris-generaal, mnr. Ban Ki-Moon, se termyn verstryk op 31 Desember 2016.

Moontlike kandidate is Unesco se direkteur-generaal, Irina Bokova; die internasionale monetêre fonds se besturende direkteur, Christine Lagarde; Litaue se pres. Dalia Grybauskaite en die Deense premier, Helle Thorning-Schmidt. Onder v.l.n.r. is die Europese Unie se kommissaris, Kristalina Georgieva; die voormalige Nieu-Seelandse premier, Helen Clark en Chili se pres. Michelle Bachelet.

VSA kondig sanksies teen Venezuela aan

Die Verenigde State van Amerika het Venezuela Maandag as ‘n “nasionale veiligheidsbedreiging” verklaar in die ergste bilaterale diplomatieke geskil nog.

Sanksies sal teen sewe amptenare van die olieryke land ingestel word. Die land se intelligensiehoof, Gustavo Gonzalez, is een van die sewe.

President Nicolas Maduro het die sewe as nasionale helde verklaar en gesê hy verwerp die VSA se imperialisme.

Die Amerikaanse president Barack Obama het reeds die uitvoerende bevel onderteken, maar senior administrasie-amptenare het ontken dat Venezuela se energie-sektor of breër ekonomie geteiken word.

Vroeër in Februarie het Maduro Amerika daarvan beskuldig dat hulle agter die mislukte staatsgreep in Venezuela sit.

“Die noordelike imperiale mag verkeer in ‘n gevaarlike fase van desperaatheid, en gaan onderhandel met die vasteland [Suid-Amerika] se regerings om die omverwerping van my regering aan te kondig. En ek beskuldig vise-president Joe Biden hiervan,” het Maduro gesê.

Venezuela se leier het intussen aangekondig dat die land ‘n Amerikaans-geleide staatsgreep suksesvol afgeweer het. Dit sou na bewering ‘n aanval op die presidensiële paleis of ‘n ander topteiken behels.

Enige land wat deur die Amerikaanse administrasie as ‘n “bedreiging vir nasionale veiligheid” beskryf word, kan Amerikaanse sanksies te wagte wees.

Dieselfde proses is gevolg met lande soos Iran en Sirië, het Amerikaanse amptenare gesê.

Heli-ongeluk eis Olimpiese sterre

Agt Franse burgers, onder wie twee Olimpiese sportsterre en twee Argentiniërs is dood in ‘n helikopterongeluk in Argentinië, het RSG berig.

Volgens die Argentynse polisie het twee helikopters in die westelike provinsie La Rioja naby die Andes-berge teen mekaar vasgevlieg.

Die Olimpiese vroue swemkampioen, Camille Muffat en die Olimpiese bokser, Alexis Vastine was onder die oorledenes.

Die vlieëniers was van Argentinië.

Hulle was deel van ‘n span wat die realiteitsprogram, Dropped verfilm het.

Japannese woedend oor kernkrag

Betogers in Tokio, Japan, het plakkate uit protes teen die gebruik van kernkrag opgehou. Die land se regering onderspeel die skade wat die ramp veroorsaak het.

Duisende beswaardes het tydens hul optog ’n beroep op die regering gedoen om kernkrag in hul land te staak.

Die optog volg op die vooraand van die vierde herdenking van die 11 Maart-aardbewing en tsoenami wat verskeie ineenstortings by die Foekoesjima Dai-itsji-aanleg veroorsaak het.

Ten spyte van Japan se kernramp het sy regering vroeër besluit dat kernkrag as bron van elektrisiteitvoorsiening sal voortgaan.

Verskeie kernkragreaktors wat sluimerend was, is weer aangeskakel. Die land se minister van handel en nywerheid het verlede jaar aan verslaggewers gesê dat die regering “realistiese en pragmatiese energievoorsiening” beoog.

Japan het voor 2011 se Foekoesjimakernramp ongeveer 30% van die land se totale kragvoorsiening van kernkrag ontwikkel.

Ten minste 23 reaktors in die VSA is dieselfde generasie foutiewe General Electric-model wat misluk het in Foekoesjima.

Die Obama-administrasie word intussen daarvan beskuldig dat hulle die gevare van die reaktor se ontwerp onderbeklemtoon.

Tot nou toe, is dit geheim gehou dat General Electric die ses kernreaktors ontwerp het wat beskadig is en gesmelt het in 2011.

In werklikheid, het GE ook drie van die ses vervaardig, terwyl Toshiba twee gebou het en Hitachi een.

Die ontwerp van vyf van die ses reaktors is die GE Mark I model, terwyl die sesde die GE Mark II weergawe verteenwoordig.

Beide modelle is gekritiseer in die 1960’s as gebrekkige ontwerpe.

Byna vier dekades gelede het Dale G. Bridenbaugh en twee van sy kollegas by General Electric hul werke bedank nadat hy al hoe meer oortuig geraak het dat die kernreaktorontwerp so gebrekkig is dat dit kan lei tot ‘n verwoestende ongeluk.

Vrae oor die vermoë van die Mark 1 om die geweldige druk te hanteer wat wat opbou indien die reaktor sy verkoelingskrag verloor, het nooit opgehou nie en is ongelukkig deur die uiteindelike ramp te laat beantwoord.

GE en sy voorsitter Jeff Immelt persoonlik is albei rojale donateurs van Barack Obama en die Demokratiese Party.