Afrikaanse nuus – Bladsy 14

Uitspraak verwag in saak van twee Masbiekers wat Brits teister

Uitspraak word Maandag gelewer in die saak van twee Mosambiekers wat teregstaan op verskeie aanklagte van plaasaanvalle in die Brits-omgewing in Noordwes.

Die 27-jarige Knowledge Mandlazi en die 31-jarige John Khoza-Tibani staan in die Pretoriase Hooggeregshof tereg op meer as 20 aanklagte, wat vyf moordaanklagte, drie aanklagte van poging tot moord en verskeie huisbrake insluit.

Die misdade is tussen Maart en Junie 2014 gepleeg. Die beskuldigdes het na bewering meestal kommersiële boere in hul moordveldtog geteiken.

Die boere is van hul voertuie, selfone, kontant, vuurwapens en ander waardevolle items beroof.

Mandlazi wat skuldig gepleit het op die aanklagte dien reeds tronkstraf van 60 jaar uit vir die moord op ‘n winkelier van Pakistan in 2014 naby Brits.

Dit is nie bekend of die aanvallers verbind kan word met die moord op die agt-en-sestig-jarige Louw du Plessis nie.

Sy liggaam is vroeër dié maand ontdek in sy huis in Flapstraat deur sy vrou Rose toe sy tuisgekom het van die werk af, het die polisie gesê.

“Sy hande was vasgebind met skoenveters en dit wil voorkom asof hy verwurg is. Hy het ook ander beserings gehad.”

Louw se selfoon, ‘n kluis met ‘n vuurwapen, en sy Nissan NP200-bakkie, wat volgelaai was met waatlemoene is vermis.

Die bakkie is later verlate in Letlhabile gevind.

“Daar word beweer dat die slagoffer laas gesien is saam met sy twee werknemers,” het die polisie gesê.

Louw se vrou Rose is die matrone van die Rusoord Ouetehuis.

Swart aanvallers rand bejaardes op Verkykerskop-plaas aan

Die polisie soek steeds na twee swartes wat die naweek ‘n bejaarde egpaar op hul plaas by Verkykerskop in die Vrystaat aangeval en beroof het.

Polisiewoordvoerder in die Vrystaat, Mmako Mophiring, sê aanvallers het Vrydagnag toegang tot Bertus van Wyk en sy vrou, Trudie, se plaashuis verkry deur ‘n ruit in ‘n ander kamer in die huis te breek.

Mophiring sê die egpaar is in hul slaapkamer geslaan, waarna die booswigte met verskeie gesteelde goed op die vlug geslaan het.

Bankkaarte en die egpaar se selfone is gebuit. Die rowers het ook met ‘n dubbelkajuit-bakkie gevlug. Mophiring het nie gesê waarmee die egpaar geslaan is nie en of hulle gewapen was nie.

Netcare 911 het Saterdagoggend omstreeks 02:30 die beseerde egpaar op hul plaas behandel, voordat hulle na ‘n hospitaal op Newcastle in KwaZulu-Natal vervoer is.

Mophiring vra enigiemand met inligting om hul naaste polisiekantoor te bel.

Hy sê mense moet veral op die uitkyk wees vir die Van Wyk’s se silwer Ford dubbelkajuit-bakkie waarmee die rowers op die vlug geslaan het.

Dubbelmoord in Groot Brak skok gemeenskap

Die polisie se forensiese eenheid was Sondag op die toneel in Groot-Brakrivier waar ‘n egpaar Saterdagaand wreed vermoor is.

Die egpaar is is intussen geidentifiseer as Tewie en Eureka Human. Die slagoffers is beide in hulle sestigs.

Die egpaar is in hul woning in Sandhoogtepad aangeval en vermoor.

Groot-Brakrivier se polisie was Sondagaand tot laat op die toneel besig om leidrade bymekaar te maak.

Dit is nog nie duidelik hoe toegang tot die slagoffers se huis gekry is nie omdat al die deure van buite gesluit was.

Volgens polisie is die egpaar wreed vermoor.

Voorlopige ondersoek dui daarop dat die vrou vermoedelik met ‘n skerp voorwerp gesteek is terwyl die man met ‘n swaar voorwerp doodgekap is.

Die ondersoek duur voort. Nog geen verdagtes is in hegtenis geneem nie.

Annatjie Myburgh se vermeende kaper voor

Die vermeende swart aanvaller wat verbind word met die moord op die sakevrou Annatjie Myburgh, verskyn vandag in die landdroshof op Witrivier in Mpumalanga.

‘n Polisiewoordvoerder sê die verdagte sal aangekla word van kaping en ontvoering.

Haar lyk is in ‘n veld in die Numbi-area, onderweg na die wildtuin se Numbi-hek, gekry.

Verdere klagtes sal waarskynlik bygevoeg word nadat ‘n nadoodse ondersoek op die vermoorde vrou uitgevoer is.

Die ses-en-twintigjarige het vermoedelik nog drie helpers gehad.

Die polisie het die liggaam van die 58-jarige Myburgh Sondagoggend opgespoor na ‘n uitgebreide soektog deur boere en veiligheidsinstansies.

Haar seun Wendell het oor haar dood aan die Laevelder gesê: “Sy was so saggeaarde mens. Ek sal die Here tog wil vra as Hy voor my staan: Hoekom my ma?”

Sy is Woensdag by haar kleinhoewe deur vier swartes gekaap en ontvoer.

Intussen is ‘n tweede verdagte Sondag in verband met Myburgh se ontvoering en dood in hegtenis geneem.

Ondersoekbeamptes en sekuriteitsmanne het nie gerus voordat hulle nié ook dié vermoedelik skuldige aan die pen laat ry het nie.

Hoe hy met die misdaad verbind word, is nog nie duidelik nie.

Hy sal na verwagting saam met ‘n verdagte (26) in die landdroshof op Witrivier verskyn.

Laevelder het betroubaar verneem dat die swart verdagte wat weens haar dood in hegtenis geneem is, beweer sy het ‘n hartaanval gehad.

Haar lyk het ‘n veld gelê. Haar handsak is glo naby haar gekry.

Haar Pajero is in Kabokweni gevind waar dit naby beeskrale versteek was. Die wiele is almal na bewering afgesteel.

Annatjie Myburgh se lyk gevind

Die soektog na Annatjie Myburgh, die Laeveldse vrou wat ‘n week gelede verdwyn het, het vanoggend vroeg geëindig toe haar lyk gevind is. Volgens ‘n inskrywing op die Facebook-groep Bid vir Annatjie Myburgh deur kaptein Pieter Smit, “is Annatjie se liggaam ontdek”. Sy volledige boodskap lui:

“Môre almal. Dis met leedwese en hartseer dat ek u moet inlig dat Annatjie se liggaam ontdek is. Die familie is reeds vroeër in kennis gestel. Inligting aangaande twee verdagtes is ontvang en deur die SAPD in samewerking met veiligheidsrolspelers opgevolg. Die eerste verdagte is reeds in hegtenis geneem. Pogings om die tweede verdagte in hegtenis te neem het nie geslaag nie, maar die ondersoekspan sal nie rus alvorens hy aangekeer is nie. Van my en al die lede ons opregte jammerte aan die familie. Dankie vir u hulp en ondersteuning. Kaptein Pieter Smit.”

Boodskappe van meegevoel het onmiddellik vanaf die byna 10 ooo lede van die Bid vir Annatjie Myburgh-groep op Facebook begin instroom. Vele gebruikers bid vir Annatjie se gesin, maar ander “sien ook rooi deur die trane” en wil by die hof gaan betoog as die beweerde moordenaar vir die saak voorkom.

Soektog na vermiste vrou afgeskaal

Die soektog na die vermiste Annetjie Myburgh van die Elanzeni-distrik naby Barberton is afgeskaal.

Myburgh is Woensdag as vermis aangegee nadat sy nie by die werk opgedaag het nie.

Daar was in die afgelope sewe weke twee inbrake en vier pogings tot inbrake by haar huis.

Myburgh werk by ‘n prokureursfirma in Witrivier. Nadat sy Woensdagoggend spoorloos verdwyn het, word daar geglo dat sy by die hek van haar kleinhoewe in Curlews naby Rocky Drift gekaap en ontvoer is.

Twee kapmesse is by die hek gevind sowel as haar bril. Twee stelle spore is langs die heining van Myburgh se kleinhoewe gevind.

Die vermeende kapers het in haar wit Pajero met die registrasienommer CHF 482 MP gevlug.

Haar twee selfone het in ‘n stadium na die Swalala Trust-selfoontoring ‘n sein gestuur, maar is sedertdien afgeskakel.

Soekspanne het in die lokasies inbeweeg met ‘n nuwe taktiese aanslag.

Kapt. Pottie Potgieter van die duikeenheid op Witrivier, koördineer die soektog en het by navraag gesê dat talle mense al ingebel het met inligting sedert daar nou ‘n beloning van R31 000 uitgeloof is.

“Ons volg alle leidrade op. As mense beweer hulle het haar Pajero in ‘n bepaalde area gesien, gaan stel ons dadelik ondersoek in,” het hy gesê.

Albert Gryvenstein van Bossies Community Justice, het by navraag gesê dat, hoewel die soektog nou afgeskaal is, hulle nog reg deur die nag na haar gesoek het.

Intussen stroom aanbiedinge van hulp steeds in van regoor die land om te help met kospakkies en vervoer vir die soekgeselskap.

Boodskappe van bemoediging en gebede word ook telkens op die Facebook-groep, Bid vir Annatjie Myburgh, geplaas.

Haar man, Wendell Myburgh, het almal bedank vir hulle gebede en ondersteuning.

Honde-eienaars gewaarsku oor vergiftiging

Die polisie in die Vrystaat en die Dierebeskermingsvereniging (DBV) doen ‘n beroep op honde-eienaars om voorvalle aan te meld waarin honde deur booswigte vergiftig word om makliker toegang tot eiendomme te verkry.

Dit kom nadat voorvalle van vergiftiging sedert die begin van die jaar in Welkom, Virginia en omliggende gebiede toenemend voorgekom het. Polisiewoordvoerder, Stephen Thakeng, sê nog niemand is in hegtenis geneem in verband met die mees onlangse voorval waarin vier honde op ‘n erf in Bedelia in Welkom vergiftig is nie.

Daar is in die motorhuis ingebreek en ‘n motorfiets is gebuit terwyl die eienaars geslaap het. Hulle het eers die volgende dag op hul dooie honde afgekom. Hy sê sodra eienaars vermoed hul honde is vergiftig, moet dit aangemeld word sodat dié woongebiede onder meer intensief gepatrolleer kan word. Die voorsitter van die DBV se Virginia-tak, Thea Smit, sê sedert Januarie is sowat 50 voorvalle in dié gebied aangemeld.

Smit beaam Thakeng se versoek dat voorvalle van vergiftiging aangemeld moet word. “Laat weet ook jou bure, want in baie gevalle word jou honde vergiftig, omdat hulle ook ‘n lawaai gaan maak as daar by jou bure ingebreek word.” Sy sê daar moet rekord gehou word van die voorvalle sodat statistieke beskikbaar is. Honde is nie slegs daar om eiendom te beskerm nie, hul veiligheid moet ook in ag geneem word.

Sy beveel aan dat honde veral snags, indien moontlik, in die huis slaap of in ‘n buitekamer wat nie aan die straat grens nie. Dit kan voorkom dat honde vergiftig word. Sy glo honde is meer werd as hulle in die huis is, want hulle kan hul eienaars waarsku as daar indringers is.

Thakeng sê mense moet juis na só ‘n voorval hul veiligheid ook opskerp. Plaaslike buurtwagte en veiligheidsmaatskappye moet in kennis gestel word. ‘n Klag van opsetlike saakbeskadiging kan by die polisie aangemeld word wanneer honde vergiftig word.

Smit sê huiseienaars kom in sommige gevalle eers die volgende oggend op hul vergiftigde honde af. Dan is daar in buitekamers of motorhuise ingebreek. In ander gevalle is honde vergiftig sonder dat daar ingebreek is. Daar was dalk elders in die straat ‘n inbraak. Sy sê honde word hoofsaaklik snags vergiftig. Die gevreesde, dodelike Two-Step word in onder meer rou vleis versteek en vir honde gegooi om te vreet.

Vergiftigde honde moet spoedig na ‘n veearts of die DBV geneem word. Honde kan simptome soortgelyk aan ‘n epileptiese aanval toon. Dit sluit in die swaar beweging van ledemate, braking en speeksel uit die hond se mond. Geaktiveerde houtskool of ‘n lakseermiddel kan help, sê sy. Dit is egter uiters noodsaaklik om steeds mediese hulp te kry.

Intussen sê Reinette Meyer, ’n senior inspekteur van die Bloemfonteinse DBV, sover bekend was daar nie onlangs enige soortgelyke voorvalle in Bloemfontein nie. Die polisie het dit ook bevestig. Meyer sê dit is egter belangrik dat inwoners ingelig word oor hierdie tipe misdaad.

Bron: OFM

Niemand nog in hegtenis geneem na moord op haarkapper nie

Die polisie in die Vrystaat het nog niemand in hegtenis geneem in verband met die moord op ‘n haarkapper van Riebeeckstad in Welkom nie.

Die liggaam van die 53-jarige André Gebhardt is ontdek op die vloer in sy huis.

Hy het sy eie haarsalon vanuit sy woning bedryf. ‘n Polisiewoordvoerder, Stephen Thakeng, sê alle leidrade word opgevolg nadat Gebhardt se pa sy liggaam Maandagoggend ontdek het teen omstreeks 07:30.

Gebhardt se pa het hom na die huis van sy seun gehaas nadat hy hom nie kon bereik via selfoon nie.

Thakeng sê die ouer moes ‘n leer van ‘n buurman leen om oor te klim oor die geslote hek na sy eiendom. Volgens Thakeng was die voordeur en veiligheidshek oop.

Daar was ‘n tou om sy nek en sy hande was vasgebind met skoenveters aan die voorkant van sy liggaam.

Die huisraad was omgekeer. Thakeng sê die kluis is oopgebreek en ‘n onbekende bedrag geld en die oorledene se selfoon word vermis.

Bekende van Karasburg oorlede na huisaanval

‘n Bekende en geliefde inwoner van Karasburg, in die suide van Namibië, is in hospitaal in Suid-Afrika oorlede aan beserings wat hy gedurende ‘n gewapende roof opgedoen het.

Die 63-jarige mnr. Tillian Walters is op Afrikadag, 25 Mei deser, deur sy broer in sy huis gevind waar hy vasgebind in sy kamer gelê het. Walters was ten tyde van die voorval alleen by die huis.

Hy is per ambulans en vliegtuig na ‘n hospitaal in Kimberley vervoer waar hy tot en met sy dood in ‘n koma was, het die Republikein berig.

Walters word op Saterdag 25 Junie op Karasburg begrawe.

Walters word oorleef deur sy vrou, twee seuns, ‘n dogter, vier broers en ‘n suster.

Desmond Vries en Daniel Nuyoma is in verband met die aanval op Walters in hegtenis geneem. Hul borgtogaansoek is tot 21 Junie uitgestel en hulle bly in aanhouding.

Stellenbosch-gesinsmoord: Verdagte voor

Een van die enigste twee oorlewendes in die Van Breda-gesinsmoord op Stellenbosch gaan na verwagting vandag in die hof daar verskyn op drie aanklagte van moord en een van poging tot moord.

Polisiewoordvoerder, André Traut, het bevestig dat ‘n 21-jarige verdagte homself Maandag aan die polisie oorgegee het.

Die verdagte is op sosiale media as Henri van Breda geïdentifiseer, maar Traut wou nie uitbrei oor die inhegtenisname nie.

Dit is nie seker wat daartoe gelei het dat die verdagte homself oorgegee het nie.

Sy pa, Martin, sy ma, Teresa, en ouer broer, Rudi, is sowat 18 maande gelede in bylaanval vermoor.

Henri en sy suster, Marli, het oorleef en sy is ná maande in die hospitaal ontslaan.

Sewe swartes vas wat glo gesteelde beeste wou verkoop

Sewe swartes, wat van veediefstal verdink word, sal na verwagting aansoek doen om borgtog in die landdroshof op Ventersburg in die Vrystaat nadat hulle verlede maand in hegtenis geneem is toe hulle beweerde gesteelde beeste probeer verkwansel het.

Die verdagtes is Mc Donald Tladi (42), Samuel Ralenki (35), Innocent Thabethe (21), Hendrik Thekiso (29), Mohaeka Kamohelo (26), Ntsokoane Motsoloane (23) en Motiki Tseisi (23).

‘n Veespekulant het onraad vermoed toe hy telefonies deur ‘n man genader is wat beeste ter waarde van sowat R400 000 aan hom te koop aangebied het.

Die veespekulant is toe deur ‘n onbekende man na die plaas buite Winburg vergesel, waar die beeste in ‘n weikamp aangehou is.

Hy het egter snuf in die neus gekry toe hulle ‘n alternatiewe hek na die plaas gebruik het, omdat die hek by die hoofingang gesluit was.

‘n Lid van die polisie se veediefstaleenheid sê die veespekulant het daarna die polisie genader.

Ná ‘n polisieondersoek het dit aan die lig gekom dat die beeste nie aan die mans behoort nie. Dit is ook nie die swartes se plaas nie.

Al die verdagtes, waaronder drie Lesotho-burgers, is op die plaas in hegtenis geneem toe hulle die diere aan die veespekulant en ‘n polisiebeampte, wat hom voorgedoen het as ‘n vennoot van die veespekulant, wou verkoop.

Die polisie het ‘n beroep op boere en vee-eienaars gedoen om op hul hoede te wees vir booswigte wat onwettige veetransaksies wil aangaan.

Mense moet bedag daarop wees wanneer hulle telefonies genader word om vee te koop. Sodra voornemende kopers by die transaksies betrokke raak, moet hulle versigtig wees en seker maak dit is nie gesteelde diere wat aan hulle verkoop word nie.

Diere moet gebrandmerk word kragtens die wet op diere-identifikasie.

Kimberley moet ligloop vir skelms wat ‘kragbespaarders’ smous

Die Sol Plaatje munisipaliteit in Kimberley het ‘n waarskuwing uitgereik oor mense wat hulle as munisipale amptenare voordoen en elektrisiteitsbesparings apparate verkoop.

Sol Plaatje woordvoerder Sello Matsie sê die verkopers van dié apparate, waarvan die toerusting nie een dieselfde is nie, oortuig inwoners dat hulle toestel die huiseienaar baie geld sal bespaar.

Matsie sê bejaarde inwoners word geteiken deur die vals amptenare.

Verder sê hy is daar reeds vasgestel dat inwoners met sowat R25 000 reeds ingeloop is.

Plaasaanvaller by Warden steeds soek

Die polisie in die Vrystaat soek steeds na ‘n vyfde swart verdagte wat Maandag betrokke by ‘n plaasaanval op Warden.

Die eienaars van die plaas se identiteit word om veiligheidsredes nie bekend gemaak nie.

Polisiewoordvoerder, Thandi Mbambo, sê vier verdagtes is kort ná die voorval waarin drie televisiestelle, ‘n digitale kamera, selfone en ‘n beursie gesteel is, op die N3 by Villiers in hegtenis geneem.

Sy sê die polisie in samewerking met plaaslike boere en patrollies op die snelweg het nou saamgewerk om ‘n blou BMW met ‘n Limpopo-registrasienommer, waarin die booswigte op die vlug geslaan het, op te spoor.

Sy sê die verdagte motor is op die N3-snelweg gesien. Die booswigte het egter die snelweg verlaat toe hulle die polisie gewaar. Hulle het ‘n slaggat in die straat in Villiers getref.

Mbambo sê ‘n jaagtog tussen die polisie op Villiers en die rowers in die motor het plaasgevind, waarna die rowers die motor in die pad gelos het nadat dit ‘n slaggat getref het. Hulle het verder te voet gevlug, maar is in ‘n halfuur aangekeer.

Mbambo sê ‘n 9mm pistool met ammunisie is in een vandie verdagtes se besit gevind. Daar is ook beslag gelê op al die gesteelde goedere.

Mbambo sê al vier verdagtes sal na verwagting môre in die landdroshof op Warden verskyn op ‘n aanklag van huisroof.

Die vierde verdagte sal na verwagting ook Donderdag in die landdroshof op Villiers verskyn. Hy word ook van die besit van ‘n onwettige vuurwapen en ammunisie aangekla.

Mbambo sê daar is ook beslag gelê op die BMW wat deur die booswigte gebruik is. Die polisie kon nog nie die eienaarskap van die motor vasstel nie.

Volgens die voorsitter van Warden-landbouvereniging, Hendri Jansen van Rensburg, het die aanvallers in die oggend op die werf opgedaag.

Die werknemers is glo erg getraumatiseerd na die voorval waar hulle met vuurwapens aangehou en toe vasgebind is.

Dit is die 21ste plaasaanval in die Vrystaat tot dusver vanjaar.

Vrystaat Landbou (VL) sê die voorval word as ‘n plaasaanval bestempel omdat geweld betrokke was.

Twee mense is vanjaar reeds op plase in die omgewing vermoor. Dit sluit onder meer die moord op dr. Bennie Cilliers op die plaas Gouda by Rouxville in.

Altesaam vyf aanvalle op plase het verlede maand in die Vrystaat plaasgevind.

Bekende akteur Schalk Jacobsz oorlede

Die bekende akteur, Schalk Jacobsz is vroeg vanoggend in sy slaap oorlede by sy huis in Westdene in Johannesburg.

Volgens sy vrou, die aktrise Elma Potgieter is hy aan ‘n hartkwaal oorlede nadat hy die afgelope tyd ongesteld was.

Hy was 80.

Jacobsz was bekend vir sy rolle in televisiereekse soos Die Siel van die Mier; rolprente soos Die Bankrower en verhoogproduksies soos Boesman en Lena en Nag van Legio.

Tydens verlede jaar se RSG Kunstefees het Jacobz en Potgieter die produksie Reis sonder Einde – Uys Krige en Federico Lorca opgevoer.

Jacobz word oorleef deur sy vrou Elma en drie kinders.