Afrikaanse nuus Archives - Page 38 of 166

Koekemoer-moord: Verdagte verskyn

Die swartman wat verdink word van die moord op en verkragting van die 15-jarige Noeline Koekemoer van Bainsvlei, verskyn na verwagting vandag in die Bloemfontein-landdroshof.

Koekemoer se ma, Natasha, het op 7 April op haar bebloede lyk in hul woonstel op ‘n hoewe in Bainsvlei afgekom.

Die aangeklaagde, in sy dertigs, is vantevore in Delportshoop in die Noord-Kaap aan gewapende roof skuldig bevind en ‘n vonnis van 12 jaar opgelê.

Hy is in Maart 2013 op parool vrygelaat, maar sal egter nou die res van sy vonnis in die Grootvlei-gevangenis buite Bloemfontein uitdien. Hy het ook ‘n saak van huisbraak hangende teen hom.

Die aangeklaagde se naam kan eers bekend gemaak word wanneer hy op die aanklagte, wat ook huisbraak en diefstal insluit, pleit.

Bruin drukgoep brand Springbokrugbytrui

Die betoging teen die samestelling van die Suid-Afrikaanse Springbok rugbyspan, wat op Dinsdag, 11 Augustus in George plaasgevind het, het volgens ‘n klag wat op Dinsdag, 18 Augustus by die Mosselbaai polisie aanhangig gemaak het, ‘n “rassistiese” nadraai gehad.

Die bruin leier van ‘n drukgroep, Dawid Kamfer van Mosselbaai, beweer ‘n persoon het hom rassistiese goed op Facebook toegesnou na aanleiding van sy groep se aandrang dat die Bokke se breier, Heyneke Meyer, afgedank en ‘n meer verteenwoordigende span gekies moet word.

Kamfer het ‘n rugby-drukgroep, SARRA (Supporters Against Racist Rugby Associations), wat voor Outeniquapark vreedsaam betoog het, onlangs tot stand gebring.

Kamfer het in sy klagte beweer dat ‘n persoon, wie se naam bekend is, maar nie openbaar gemaak kan word totdat die persoon voor die hof gedaag is en gepleit het nie, het die afgelope Sondag op Facebook op vernederende wyse na hom verwys en dat die persoon se boodskap haatspraak verteenwoordig.

Die Mosselbaai polisie se kommunikasiebeampte, Ao Pieter Koekemoer, het bevestig dat ‘n klagte by die polisiestasie ingedien is en dat dit aan Ao Briel vir ondersoek toegewys is.

Die groep het intussen oor die naweek ‘n groen Springboktrui aan die brand gesteek met ‘n Sasol-borgskapteken duidelik sigbaar.

Hulle sê ‘n bruin afrigter het gesorg dat Suid-Afrika hoër op die wêreldranglys as wat die wit bokbyer kon regkry.

Bron: Mossel Bay Advertiser

NWU pak sonkrag-uitdaging

Ingenieurstudente aan die Noordwes-Universiteit pak vanjaar ‘n groot bul by die horings wanneer hulle in Oktober skouers skuur met die groot name in sonenergie.

Die studente sal dan in die Bridgestone Wêreld Solar uitdaging in Australië meeding, het OFM berig.

Hulle spring weg in Darwin in die noorde van Australië – 45 voertuie van 25 lande sal oor 3 000 km tot in Adelaide resies jaag.

Volgens spanleier Albert Helberg het hulle nou nuwe tegnologie ingespan om die nuwe voertuig vinniger, ligter, meer doeltreffend en sterker te maak. Dié voertuig word deur die hoeveelheid energie aangedryf wat gelykstaande is aan dié van ‘n haardroër.

Volgens Helberg behoort die span die afstand in sewe dae kaf te draf, maar hul doelwit is om dit in vyf dae te vermag.

Afriforum kanselleer fees glo weens ‘regses’

Die burgerregte-organisasie, AfriForum, het Woensdagoggend aangekondig dat hulle nie dié jaar die gratis AfriForum-fees by die Voortrekkermonument gaan aanbied nie.

Kallie Kriel, hoof uitvoerende beampte van AfriForum, het aan Centurion Rekord bevestig dat die konsert na agt jaar gekanselleer is.

Die gratis fees, wat die afgelope agt jaar mense van regoor Pretoria getrek het, het te omstrede geraak vir Afriforum nadat beide Steve Hofmeyr en Sunette Bridges by die konserte opgetree het.

AfriForum het sowat drie jaar gelede alle bande met Bridges verbreek, maar Hofmeyr was een van die fees se grootste trekpleisters.

Klaarblyklik voel Afriforum dat die fees ‘n “regse-gevoel” begin kry het, want die Vierkleur het gereeld by die konserte gewapper en wyle Eugene Terre’blanche, het die jaar voordat hy vermoor is, self ‘n draai by die konsert gemaak.

Kriel het tydens vroeëre media-onderhoude gesê dat ‘n regse inslag “nooit die bedoeling daarvan was nie”.

Die fees het ook al knelpunte, waaronder die omstrede naamsverandering van Pretoria, hoog op die agenda geplaas en Hofmeyr, het byvoorbeeld, sterk standpunt teen die verandering van die verhoog af ingeneem.

Die fees het jaarliks tussen 20 000 en 30 000 mense gelok.

Oud-terroris op witskuld-boektoer

Een van die terroriste wat by Rivonia aangekla is, en goeie vriend van oud-president Nelson Mandela, Ahmed Kathrada het Grey Kollege in Bloemfontein Maandag besoek as deel van sy boekbekendstellingsprogram.

Die oud-terroris wou nie oor die hede praat nie, maar het net op die verlede van “onreg” gefokus voor ‘n gehoor wat weens hul ouderdom geen aanspreeklikheid daarvoor kan aanvaar nie.

Die leerlinge is almal lank na 1994 gebore.

Gesprekke met die jeug oor apartheid is dus gehou met die uitsluitlike doel om kollektiewe wit skuld aan te moedig.

Kathrada wou nie kommentaar lewer oor die huidige politieke situasie nie, maar het eerder gekonsentreer op die “vryheidstryd” in die land.

‘n Dokumentêre program oor die lewe van Kathrada is vertoon, waarna leerlinge die geleentheid gehad het om hom vrae oor sy 26 jaar in die gevangenis te vrae, insluitend die 18 jaar op Robbeneiland.

Gauteng-onderwysdept. stel wiskundehandboek slegs in Engels beskikbaar

Die Gautengse Onderwysdepartement, wat oor die afgelope aantal jare gereelde dreigemente teenoor Afrikaanse skole maak dat hulle verengels gaan word, het so pas ‘n wiskundehersieningshandboek vir graadsesleerlinge slegs in Engels beskikbaar gestel. In ‘n omsendbrief is skole in kennis gestel dat hulle die hersieningsboeke vir wiskunde moet kom haal.

Daar word in vetgedrukte letters gestel dat die boeke nie in Afrikaans gedruk is nie:

“ . . . die boekies word deur die hoofkantoor verskaf en daar is geen weergawe in Afrikaans nie.”

Verskeie Afrikaanse organisasies het verklaar dat hulle die saak met Pansat (die Pan-Suid-Afrikaanse Taalraad) gaan opneem.

Elijah Mhlanga, die departement se woordvoerder, wou nie op versoeke om kommentaar reageer nie.

Verdagtes van Vrede-plaasaanval weer voor

Die saak teen twee swartes wat in die rondgaande hof op Vrede verskyn het weens die aanval op ‘n bejaarde egpaar op hul plaas buite die dorp, sal na verwagting vandag hervat word.

Vrystaatse polisiewoordvoerder Zweli Mohobeleli sê Thabo Motloung sal na verwagting Augustus om borgtog aansoek doen, terwyl Paul Mei Zulu, wat slegs ure ná die aanval op Johannes en Rita Kritzinger in hegtenis geneem is, nie beplan om aansoek te doen nie.

Die verdagtes staan tereg op ‘n aanklag van poging tot moord, huisbraak en gewapende roof. Johannes is vier keer en Rita drie geskiet.

OFM-nuus het verlede week berig dat die egpaar steeds in die Netcare-Unie-hospitaal in Alberton se hoësorgeenheid is.

Hulle was onder pynverdowing en Johannes het al gepraat en reageer op sy kinders se stemme. Woordvoerder Ruan Combrink het gesê die egpaar is bewus dat twee verdagtes aangekeer is.

Jong vrou oorleef plaasaanval

Landelike veiligheidstrukture wat in plek is het heel waarskynlik vroeg vanoggend bygedra dat ‘n jong vrou op haar plaas by Ficksburg fisiek ongedeerd van ‘n plaasaanval afgekom het.

Hoof van die plaaslike veiligheidsreaksiegroep, Jordaan Marais, sê die jong vrou bly alleen op die plaas en het omstreeks 01:00 gehoor hoe haar huis se agterdeur oopgebreek word.

Hy sê sy het haar in die hoofslaapkamer toegesluit en oor ‘n tweerigtingradio hulp ontbied. Die swart aanvallers het haar slaapkamerdeur oopgebreek, haar gegryp, na buite gedwing en beveel om haar bakkie aan te skakel.

Volgens hom het hulle haar net daar gelos en is met die voertuig weg.

Hy vermoed die gesprekke op die tweerigtingradio het die swart aanvallers die hasepad laat kies.

Marais sê lede van die reaksiegroep was vinnig op die toneel, terwyl ander na die gesteelde bakkie gesoek het.

Intussen sê Vrystaatse polisiewoordvoerder Phumelelo Dhlamini ‘n klag van “huisroof” word ondersoek.

Niemand is nog in hegtenis geneem nie. Die bakkie is ook nie teruggevind nie. Dhlamini vra enigiemand met inligting om hul naaste polisiekantoor of die Crime Stop-nommer te bel.

Die vrou se naam is nie bekend nie vir haar eie toekomstige veiligheid.

Polisiekantoor wat plaasaanvalle moet keer onbeman

Die waarnemende polisiekommissaris vir Noordwes, Jacob Tsumane het vandag die situasie by die Assen-polisiekantoor in die verre oostelike deel van die provinsie, sterk veroordeel.

Dit volg nadat die kantoor Dinsdagmiddag glo onbeman aangetref is. Die stasie bedien hoofsaaklik landbougemeenskappe.

Tsumane het vanoggend in ‘n verklaring gesê die stand van sake is onaanvaarbaar. Hy het opdrag gegee dat die groepsbevelvoerder ‘n formele ondersoek begin.

Afsonderlike voorvalle in Coligny en Vrede hierdie afgelope maand het intussen weer die kollig op plaasaanvalle geplaas.

Agri-Noordwes se Boeta du Toit sê met dit in gedagte, moet daar streng opgetree word teen skuldige partye.

T.T. Cloete is dood

Die Afrikaanse digter T.T. Cloete het vanoggend in die Mooimed-hospitaal op Potchefstroom gesterf. Hy was een van die bekendste moderne Afrikaanse digters wat veral in woordspel en kriptiese beeldspraak uitgemunt het. Theunis Theodorus Cloete is op Republiekdag, 31 Mei, in 1924 gebore en was dus 91 jaar oud ten tye van sy oorlye.

Hoewel hy as dosent en literêre teoretikus aan die Universiteit van Potchefstroom aktief is, debuteer Cloete eers op die rype ouderdom van 56 met sy bundel Angelliera, waarvoor hy sowel die Ingrid Jonker-prys as die WA Hofmeyr-prys vir Poësie ontvang. In ‘n onderhoud met Die Burger op 12 Februarie 2011 het Cloete verklaar:

“Ek kom uit ’n ras-egte boeregemeenskap. Maar my pa was as boer baie belese en het altyd vir ons gesê ons bly naby die engele.”

Cloete promoveer in 1953 onder ‘n ander groot, miskien die grootste, Afrikaanse digter N.P. van Wyk Louw in Amsterdam met die proefskrif: “Trekkerswee en Joernaal van Jorik”.

Hy was 58 jaar lank getroud met Anna van Zyl, wat op 2 Mei 2007 aan nierkanker oorlede is. Gedurende die laaste vier jaar van Anna se lewe het hy haar self versorg. Volgens sy seun Theo, “het hy nooit haar bed verlaat nie. Hy het homself daar ingerig en langs haar bed gesit en werk.” In ‘n ander onderhoud in Die Burger in 2009 het Cloete oor sy vrou gesê:

“Anna was die nie-skrywende digter in my. Sy het my bewus gemaak van so baie dinge. Goed wat spontaan aanleiding gegee het tot gedigte. As jy die verhouding tussen Alice en Edward Elgar snap, het jy dalk iets van die verhouding tussen my en Anna.”

In J.C. Kannemeyer se Geskiedenis van die Afrikaanse Literatuur word Cloete redelik afgeskeep, waarskynlik omdat hy en Kannemeyer in 1980 in ‘n polemiek betrokke was oor die oorspronklikheid, aldan nie, van Kannemeyer se uitsprake oor Afrikaanse literêre werke. Nietemin, gegewe die groot aantal pryse wat Cloete vir sy œuvre ontvang het, word hy as een van die groot Afrikaanse digters van die twintigste eeu erken.

Volgens Heilna du Plooy het na Cloete se akademiese werk verwys en “hoedat hy geskool is in ’n wye humanitêre insig in die geestesaktiwiteit van die mens”. CLoete het ook vertalings van Frans na Afrikaans gedoen.

Artikels oor T.T. Cloete:

Afrikaanse Wikipedia

TT Cloete (1924–2015), biografie deur Erika Terblanche