Suider-Afrika – Bladsy 38

Kayla Meyer en haar gesin se moordenaars gevang

In wat deur die polisie as ‘n “deurbraak” beskryf is, is vier verdagtes deur die Randfonteinse polisie aangekeer in verband met die grusame moorde op 10 Maart 2016 op Kayla Meyer,9, en die res van haar gesin, waaronder haar moeder Marietjie Meyer, 46, dié se vriend Kenny MacCormack, 42, en Monty MacCormack, 73. Die vier verdagtes het gister in die Randfonteinse landdroshof verskyn en hul saak is tot 18 Augustus uitgestel. Hul name is nog nie bekendgemaak nie.

Volgens kaptein Appel Ernst van die Randfonteinse polisiestasie, het “luitenant-kolonel Gert Kruger, wat aan die Randfonteinse speurtak verbonde is, asook lede van die Wesrand-trio-taakmag vier verdagtes ná ‘n intense ondersoek in die saak in hegtenis geneem”.

Brigadier Manamela, die stasiebevelvoerder van Randfontein, het sy tevredenheid oor die inhegtenisnames uitgespreek. “Hierdie span polisiebeamptes het ‘n positiewe uitwerking op ondersoeke betreffende ernstige misdaad,” het hy gesê. Hy het luitenant-kolonel Kruger met sy volharding in die saak gelukgewens.

Lees ook ons vorige berigte oor die moorde op ‘n kleinhoewe in die Rodora-gebied in Randfontein:

‘Nog geen arrestasies’ in moorde op Kayla Meyer (9) en haar gesin

‘Dis kruipende volksmoord’: kommentaar oor uitwissing van Randfontein-gesin

PAP-eters geskiet, beroof

Lede van die Pan-Afrika Parlement eis beter veiligheidmaatreëls nadat `n vroue-parlementslid van Senegal Donderdag geskiet is tydens ‘n rooftog by die OR Tambo-lughawe.

Sy is na haar aankoms op die lughawe in Kempton Park in die heup geskiet.

Volgens bronne in die PAP gebeur sulke aanvalle elke keer wanneer daar ‘n sitting in Suid-Afrika is.

Die Senegalese LP is aangeval toe sy en ander parlementslede onderweg was na hul hotel in Sandton. Hulle is van al hulle waardevolste besittings en reiksdokumente beroof.

Die ander drie is Namibiese politici wat in Johannesburg beroof is Donderdagaand.

Die Namibiese hoëkommissaris in Suid-Afrika, Veiccoh Nghiwete het Saterdag gesê, “Dit is jammer, maar hierdie dinge gebeur. Jy weet nooit wanneer dit sal gebeur nie.”

Nghiwete het berigte ontken dat ‘n lyfwag dood is tydens die rooftog.

Een van die Namibiërs, Laura McLeod-Katjirua (foto bo) het Vrydag die voorval bevestig en gesê die rowers het klere, selfone en kredietkaarte gesteel.

Volgens McLeod-Katjirua, is ‘n kollega van Senegal in die heup geskiet tydens die rooftog.

Sy is in ‘n plaaslike hospitaal opgeneem.

Dit was volgens berigte die derde aanval op LP’s uit Afrika onderweg na hulle hotelle met die laaste drie sittings in Midrand.

Die Suid-Afrikaanse parlement het vroeër die aanval veroordeel.

Kort en lang stembriewe

Die kortste stembriewe gaan in Buffalo City in die Oos-Kaap aan kiesers uitgedeel word, waar net 12 politieke partye deelneem.

Kiesers in die Mangaung Metro Munisipaliteit gaan die tweede kortste stembrief van alle metro munisipaliteite landwyd kry tydens die 2016 Munisipale Verkiesing.

Volgens die OVK gaan net 14 politieke partye in dié gebied aan die verkiesing deelneem.

Die langste stembrief gaan in Kaapstad, Suid-Afrika se dwelmhoofstad, uitgedeel word waar kiesers ‘n keuse van 36 politieke partye het.

Daar word vermoed dat politieke partye ook gebruik word om geld te was, aangesien wetgewing nie vereis dat skenkers blootgelê word nie.

Die leier van die IVP, Mangosuthu Buthelezi het in Ulundi in KwaZulu-Natal by die party se laaste saamtrek voor Donderdag se verkiesing gesê in die Wes-Kaap is daar bejaardes wat al 18 jaar op huise wag en steeds vir die DA stem.

Buthelezi sê daar is ook gemeenskappe sonder kraanwater. Hierdie inwoners is nie eers bewus van die menigte partye nie.

Die OVK het vroeër aangedui dat ‘n rekord getal politieke partye vanjaar aan die verkiesing gaan deelneem.

In terme van plaaslike munisipaliteite het die Richtersveld-munisipaliteit in die Noord-Kaap die kleinste proporsionele stembrief met net drie partye wat in die gebied tot die verkiesingstryd toegetree het.

Stembriewe is intussen in Soweto gesteel. Houers met bykans 2000 stembriewe is Donderdag uit `n afleweringsvoertuig in Dobsonville gesteel.

Die gesteelde stembriewe sal nie gebruik kan word nie en veiligheidsmaatreëls is opgeskerp.

Meer as 800 000 kiesers sal vandag en môre spesiale stemme kan uitbring in wat eintlik maar weer eens ‘n etniese sensusopname is.

Die Verkiesingskommissie sê dié syfer is glo die hoogste ooit.

Die VK se adjunk-hoofverkiesingsbeampte, Sy Mamabolo sê die hoë getal mense wat spesiale stemme kan uitbring, is moontlik gemaak weens die VK se veldtog om registrasie te vergemaklik.

Mense kon hulle aansoeke indien met SMS-boodskappe, op die internet of aansoeke per hand.

Nelson Mandelabaai sal na verwagting ‘n koalisie-raad kry waar die EFF met die DA kan saamwerk teen die ANC.

Dit sal beteken dat ‘n stem vir die DA in Pretoria en Port Elisabeth in werklikheid ‘n stem vir die EFF is, want met die DA-steun asook die EFF se steun, kan Tshwane dieselfde pad loop.

Die Munisipale Verkiesing 2016 vind op Woensdag 3 Augustus plaas.

Twee Noordwes-skole afgebrand in verkiesingsgeweld

Sewe klaskamers by Setilo Sekondêre Skool by Mareetsane naby Mahikeng in Noordwes is aan die brand gesteek deur oproeriges.

Die skool is in ligte laaie gelaat nadat verkiesingsgeweld in die gebied opgevlam het. Die Graad 11 en 12 klaskamers is in puin gelê.

Die Verkiesingskommissie het bevestig dat sy stemlokaal in Mareetsane nie gebruik kan word nie, nadat die klaskamers uitgebrand het.

Die verkiesingshoof in die provinsie, Tumelonthe Thiba sê ‘n tydelike struktuur sal opgerig word indien die perseel toeganklik is. Indien nodig sal die stemlokaal verskuif word.

Nog ‘n skool op Piet Plessis is ook aan die brand gesteek in ‘n tweede voorval van openbare geweld.

“Ek wil graag ons gemeenskappe aanmoedig om wanneer hulle verskil van die owerhede, ‘n vreedsame oplossing te soek eerder as om openbare eiendom te vernietig,” het LUR Sello Lehari gesê.

Die Noordwespolisie het gesê ‘n saak van brandstigting is geopen by die Mooifontein-polisiekantoor maar niemand is nog in verband met die voorval in hegtenis geneem nie.

Kolonel Sabata Mokgwabone gesê daar was ook ‘n poging om ‘n gemeenskapsaal af te brand, maar net stoele is verbrand.

Die minister van basiese onderwys, Angie Motshekga, het intussen haar misnoë te kenne gegee oor die brandstigting wat polities gemotiveerd is.

Motshekga sê in ‘n verklaring dat sulke gedrag nie geduld sal word nie en het ‘n beroep op die owerhede gedoen om die skuldiges spoedig aan te keer.

Vroeër in die week het ‘n skare ook klasse by die skool ontwrig en onderrig kon sedertdien nie voortgaan nie.

Motshekga het ook ‘n beroep op die gemeenskap en ouers gedoen om nie toe te laat dat politieke struwelinge met onderwys inmeng nie.

Sanco het ook hul stem by Motshekga s’n gevoeg en gesê die vernietiging van openbare eiendom is ‘n terugslag vir die gemeenskap.

Provinsiale voorsitter, Paul Sebegoe, het ‘n beroep op kalmte gedoen aan die vooraand van die verkiesing.

Zuma gaan lening aan vir Nkandla-skuld

President Jacob Zuma sal glo ‘n persoonlike lening aangaan om die R7,8 miljoen wat hy skuld vir Nkandla terug te betaal.

Die Openbare Beskermer het bevind dat hy die geld wat onregmatig uit die staatskas kom vir verbeterings aan sy eie woning, moet teruggee.

City Press berig dat Zuma ‘n lening van VBS Mutual Bank ontvang het daarvoor.

Handelsbanke weier om huisverbande toe te staan aan wonings wat op stamgrond gebou is, soos in die geval van Nkandla wat aan die Ingonyama-trust behoort.

VBS is ‘n klein bank wat spesialiseer in lenings in landelike gebiede aan mense wat op kommunale trustgronde bly.

Terreursaak teen SA tweeling gaan voort

Die terreursaak teen ‘n Moslemtweeling (23) sal in die Johannesburgse landdroshof voortgaan.

Die saak is Donderdag uitgestel nadat Brandon Lee en Tony Lee Thulsie van Newclare se regsverteenwoordiger `n aansoek teen hul aanhouding ingedien het.

Hulle regte name is Sallahoeddin (Brandon-Lee) en Jakeen (Tony-Lee) Thulsie.

Hulle word daarvan beskuldig dat hulle beplan het om die Amerikaanse ambassade en Joodse instellings in Gauteng aan te val.

Hulle sou gister om borgtog aansoek gedoen het, maar dit het toe nie plaasgevind nie weens die aansoek teen hul aanhouding.

Die vrou van een van die tweeling het die nag van hul inhegtenisneming beskryf.

In ‘n beëdigde verklaring, het die vrou van Tony-Lee Thulsie, Aadila Alben, besonderhede gegee van die aand van die arrestasies.

Sy het gesê die polisiedokumente is onderteken deur haar skoonfamilie in ‘n “klimaat van vrees en intimidasie”.

Hulle beweer dat hulle nie lasbriewe ontvang het toe hulle in hegtenis geneem is nie.

Die twee het vandeesweek drie keer die Johannesburgse landdroshof verskyn. Hulle het nog nie formeel om borgtog aansoek gedoen nie.

Borgverrigtinge is uitgestel ten einde vas te stel of hul arrestasies in werklikheid onwettig was.

Die vervolging moet nou bewys dat die behoorlike prosedures gevolg is toe die identiese tweeling op 9 Julie in hegtenis geneem is.

As hulle versuim om dit te doen, kan die Thulsie broers vrygelaat word.

Die tweeling is in hegtenis geneem in Newclare, wes van Johannesburg.

Verdagmakery oor terreur ontbloot

Die organisasie CAGE het tot die Moslemtweeling wat van terreur aangekla word, se verdediging gekom en gesê “AWB-lede” is in hegtenis geneem met wapens en hulle is nie “terroriste” genoem nie.

Sallahoeddin (Brandon-Lee) en Jakeen (Tony-Lee) Thulsie word daarvan beskuldig dat hulle beplan het om die Amerikaanse ambassade en Joodse instellings in Gauteng aan te val.

Die AWB-verwysing in CAGE se verklaring is egter ‘n totale versinsel, een wat Maroela Media herhaal het, kennelik as verdagmakery.

Hieronder die regstelling van Johannes Meintjies, ook aan Maroela Media gerig:

Geagte Afrikanerleiers,

In die lig van die bevordering van GPF samewerking, as volg te rapporteer:

Hiermee ter kennisname te vermeld dat ek beskeie maar ernstig aan die gerespekteerde redaksie by Maroela Media geskryf het om te versoek dat moontlike onakkurate verslaggewing wat aangedui het dat AWB lede (LW, nie “verdagtes” of “onbevestigde berigde”, of nagaan van feite soos wat ek ‘n tydens GPF verwante rapportering ‘n tydjie gelede skriftelik ingelig is dat geen SAPD verwante berig in Maroela Media gepubliseer word sonder om eers die feite met die SAPD te bevestig nie) besmoontlik publiek reggestel behoort te word.

Hierdie skakel en kommentare verwys.

Na wat verneem word is daar geen rekord van daardie manne se name op die AWB se rekords, oud of nuut nie. Mens vertrou dat enige hofsaak (as dit nie ‘n voor-verkiesings vals vlag foefie uit ge-orkestreerde staatsgeledere was) dan ook die verdagtes of ge-arresteerdes sal vra vir bewyse van hul AWB lidmaatskap aansoeke of lidmaatskap bevestiging sodat dit deel van die deursigtige publieke ondersoekrekord kan wees.

Ek het bloot as medeburger gereageer omrede ek vantevore ingelig is dat daar wel samewerking onder Afrikaner/ Boere-Afrikanervolk/ Volksleierskap bestaan, of dat Afrikaner instansies mekaar nie sal pootjie of te nakom of teenstaan in selfbestuur en selfbeskikkingsake nie.

Ter wille van die vertroue van die Afrikaner publiek op grondvlak, en die integriteit van Afrikaner instansies in SA, sou mens dus enige beriggewing, veral in wat as nog enkele betroubare Afrikaanse media beskou word, onomwonde wil kan vertrou.

Dit sou werklik na mening uitermate betreurenswaardig wees as die verraad en uitverkopery onder Afrikaners en Volksgenote steeds sou voortgaan, en gelate aanvaar sou word.

My beskeie verwagting is dat Maroela Media, ook ter wille van betroubare nasionale vlak GPF inter-aksies en samewerkings met instansies wat oud SAW en Kommmando ondervinding bydra tot die SA gemeenskap onder aanslag, publiek sal regstel soos en waar nodig.

Onderlinge integriteit, volwasse wedersydse erkenning vir elke instansie se deurdagte of medewerkende doelstellings en onomwonde vertroue is na mening baie krities in die Afrikaner/ Boerevolk se selfbestuur en selfbeskikkingsstrewe.

Met ag op Volksintegriteit, – en in medewerkersgroete vir Burgerlike Beskerming onder ons mense,

Johannes Meintjes
Pretoria

Krugerpark-bewaarder vasgetrek vir stropery

Twee mans wat getaak was met anti-stroperbedrywighede in die Kruger Nasionale Park het Donderdag in die Bosbokrand-landdroshof op aanklagte van renosterstropery verskyn, het SANParke gesê.

Die veldwagter en ‘n veeartstegnikus in dieregesondheiddirektoraat van die landbou en bosbou departement in Skukuza is na bewering op heter daad betrap Woensdag. SANParke-woordvoerder William Mabasa kon nie hul name of hul volgende hofdatum gee nie.

Veldwagters op ‘n daaglikse patrollie het drie skote gehoor en gaan ondersoek instel.

“Toe hulle die toneel nader, het hulle twee mans, een in ‘n groen veldwagteruniform en die ander een in kakieklere sien hardloop in die rigting van ‘n bakkie wat daar naby geparkeer was.”

‘n Jaagtog het gevolg en meer veldwagters is ingeroep om te help. Hulle het die bakkie tot stilstand gedwing en die twee is in hegtenis geneem. ‘n Vars witrenosterkarkas, twee horings, ‘n geweer, en ander stropertoerusting is in hulle besit gevind.

SANParke se hoof uitvoerende beampte Fundisile Mketeni het die veldwagters se optrede verwelkom, en gesê dit is “hartseer en verskriklik” dat twee van hul eie na bewering betrokke was by stropery.

Petroltekort dreig as gevolg van staking

Vrese vir ‘n brandstoftekort het ontstaan nadat die petroleumwerkersvakbond CEPPHWAWU gister begin staak het. Die vakbond CEPPWAWU het belowe om vandag af kontrakteurs te verhoed om brandstof af te lewer in die petroleumbedryf.

Brandstofvervaardigers het verskeie maatskappye gekontrakteer om hulle van diens te wees terwyl die staking aan die gang is. Die rede vir die staking is dat geen loonooreenkoms tussen vervaardigers en CEPPWAWU bereik kon word nie. Die werkers eis `n verhoging van nege persent maar die wergewers bied net sewe persent aan.

‘n Verteenwoordiger van die vakbond in die Wes-Kaap, Fazel Ernst het gesê:

“Ons is bereid om ons werkgewers te druk totdat hulle rede insien en ons hoop dat dié optrede die bestuur die lig sal laat sien.”

Die staking sal na verwagting 15 000 werkers betrek en sal die aflewering van brandstof aan vulstasie regoor die land raak, veral in Kwazulu-Natal, die Oos- en Wes-Kaap, asook Mpumalanga. Gauteng word deur ‘n pyplyn vanaf Durban verskaf, alhoewel daar ook ongeveer 100 tenkwaens per dag tussen die PWV en Durban loop.

In die verlede het vulstasies na ongeveer drie dae leeggeloop. Motoriste kan dus van Sondag af brandstoftekorte verwag.

Volgens mnr. Jan Schoeman van die Suid-Afrikaanse brandstofkleinhandelaarsvereniging, sal die staking werkers by die brandstofdepots insluit, vervoerfasiliteite en olieraffinaderye, maar nie die petroljoggies by vulstasies nie, wat aan ‘n ander vakbond behoort.

Layton Beard van die Outomobielasssosiasie sê:

“Motoriste moet voorsiening maak deur te verseker dat hul tenks vol gehou word en dat hulle vir ten minste ‘n tyd lank gedek is.

“Motoriste moet ook sover moontlik brandstof bespaar deur nie onbeplande ritte te onderneem as hulle dit kan vermy nie en deur nie in piektye te bestuur of hul lugreëling te gebruik nie.

“Hulle behoort hul vensters toe te hou om die sleurfaktor van hul voertuie te verminder en sodoende minder brandstof te gebruik.”

SA studente uit Turkye teruggeroep

Die Vrystaatse provinsiale regering het 52 studente wat in Turkye studeer, teruggeroep.

Die besluit volg ná die mislukte staatsgreep in dié land wat gelei het tot die sluiting van universiteite.

Die groep studente uit die Vrystaat is in Meimaand na Turkye om hul studies in ingenieurswese, ekonomie, bestuur en sielkunde voort te sit.

Hulle is egter nou terug in Suid-Afrika. ‘n Verdere 37 studente, wat ook in Turkye studeer, was in Suid-Afrika met vakansie toe die geweld uitgebreek het.

‘n Woordvoerder van die Vrystaatse premier, Setjaba Maphalla, sê die studente se veiligheid was die dryfveer vir die besluit om hulle terug te bring.

“Wanneer daar ‘n poging is om ‘n staatsgreep teen ‘n regering uit te voer, is selfs ‘n man op straat altyd in gevaar. In terme van direkte gevaar, was hulle nie blootgestel nie. Ons het aan die studente gedink voor enigiets kon gebeur. Ons wag vir die situasie om te normaliseer. Oor waar die studente geplaas sal word, is die prerogatief van die uitvoerende raad, hulle kan selfs terug na Turkye gaan,” het Maphalla gesê.

Die owerhede in Turkye het intussen lasbriewe uitgereik vir die inhegtenisneming van 42 joernaliste, as deel van die ondersoek na ‘n mislukte staatsgreep op 15 Julie.

Duisende soldate, regters en staatsdienswerkers en selfs skoolkinders is reeds sedert die mislukte staatsgreep in hegtenis geneem (foto hierbo). Die regering van president Erdogan het ook van 87 generaals ontslae geraak.

Sowat 45 koerante en 16 TV-stasies is gesluit in die dae na die staatsgreep, en indiwiduele joernaliste is die week vir die eerste keer geïdentifiseer.

Ten minste 130 mediamaatskappye is gesluit en owerhede teiken enige persone wat beweerde bande het met die Moslem-godsdienstige, Fethullah Gulen, wat in Amerika woon.

Die regering beskuldig Gulen daarvan dat hy die staatsgreep beplan het.

Die regering het verlede week ‘n noodtoestand afgekondig

Ommekeer deur SAUK: 7 uit 8 joernaliste heraangestel

Die Suid-Afrikaanse Uitsaaikorporasie (SAUK) het aangekondig dat hy sewe uit die agt afgedankte joernaliste gaan heraanstel. Die joernaliste is oorspronklik afgedank omdat hulle intern beswaar gemaak het teen die verbod op beriggewing oor onluste en openbare geweld in Suid-Afrika.

Die amptelike woordvoerder van die SAUK, Kaiser Kganyago, het gistermiddag ‘n verklaring uitgereik waarin dit gestel word:

“Die Suid-Afrikaanse Uitsaarkorporasie (SAUK) se bestuur het sy regspan opdrag gegee om nie voort te gaan met regstappe nie en dat die SAUK die sewe afgedankte nuuswerknemers in hul poste sal herbevestig… Die SAUK bly daartoe verbind om sy openbarediensmandaat uit te voer.”

Die SAUK het drie Afrikaanse joernaliste by RSG, Foeta Krige, Suna Venter en Jacques Steenkamp, asook ‘n Indiër van die sakenuusafdeling, Krivani Pillay, summier afgedank soos voorheen berig is. Die rede vir die afdanking wat deur die SAUK aangevoer is, is die “verbreking van hul dienskontrakte”, maar die Arbeidshof het Dinsdag bevind dat dié rede ongeldig is en beveel dat hulle heraangestel word.

Tot dusver het die SAUK egter gedreig dat hy teen die Arbeidshofbeslissing gaan appelleer, maar kragtens die jongste verklaring het hy van dié besluit afgesien.

Gister het die drie Afrikaanse joernaliste in die voorportaal van die SAUK gewag om vir diens aan te meld, maar is nie in die gebou toegelaat nie (foto hier bo).

Die ommekeer van die SAUK volg nadat die joernaliste se regspan gedreig het om ‘n dringende hofbevel aan te vra dat dié liggaam die Arbeidshof se bevel van Dinsdag moet nakom.

Die agste afgedankte joernalis, Vuyo Mvoko, wat blykbaar op ‘n vryskutbasis aangestel is, se dienskontrak is nie deur die SAUK heringestel nie.

SAUK-joernaliste mag nie terug werk toe, ten spyte van hofbevel

Die SAUK het by wyse van ‘n brief van sy prokureurs (sien hier onder) aangedui dat hy teen gister se bevinding van die Arbeidshof gaan appelleer en dat die uitsaaier dus nie gaan toelaat dat Foeta Krige, Suna Venter, Krivani Pillay en Jacques Steenkamp weer vir diens aanmeld nie.

Regter Robert Lagrange van die Arbeidshof het gister in die guns van die vier afgedankte joernaliste bevind en beveel dat hulle heraangestel word. Deel van die hofbevel het behels dat hulle terugkeer werk toe en nie verder aan tugmaatreëls onderwerp moet word nie.

Enkele minute gelede het hulle egter in die voorportaal van die SAUK-gebou in Johannesburg gewag dat ‘n beampte van menslike hulpbronne hulle te woord staan (foto hier bo).

Die prokureursbrief hier onder is deur Dirk Hermann van Solidariteit getwiet.

20 beseer, winkelsentrum beskadig toe tornado Tembisa tref (met video)

Volgens die jongste syfers is 20 mense beseer toe ‘n tornado die swart lokasie Tembisa, noordoos van Johannesburg, getref het (sien foto’s en video hier onder). Die Oos-Randse metro, Ekurhuleni, het ‘n hele noodoperasie aangekondig en daar gaan aan minstens 400 dakloses hulp verskaf word.

Sommige beserings is veroorsaak toe die dak van ‘n winkelsentrum, die Phumulani Mall, ineengestort het. Reddingswerkers moes 11 mense uit die puin red.

Ook die plaaslike hospitaal, die enigste openbare hospitaal in die hele omgewing, is deur die werwelstorm beskadig. ‘n Deel van die dak het meegegee en bome is ontwortel, volgens ‘n woordvoerder van die hospitaal, Steve Mabona.

Die 20 beseerdes is vanaf die winkelsentrum na die hospitaal gebring, waar die werwelstorm ook die heining, motorafdakke en 20 voertuie beskadig het.

“Gelukkig is geen pasiënt of werknemer beseer as gevolg daarvan nie,” sê Mabona. “Die hospitaal kyk reeds na die mense wat beseer is toe die Phumlani Mall in Tembisa verwoes is, en omtrent 20 mense is na die hospitaal oorgeplaas.”

‘n Hewige haelstorm het ook tydens die tornado gewoed.

Wenke vir nat paaie en vloedwaters

‘n Paar wenke om Praag-bestuurders veilig te hou as ‘n swaar bui uitsak:

Verminder spoed! Pas spoed en volgafstand aan. Dit moet minstens ses sekondes van die motor voor wees. Maak seker die volgafstand is groot genoeg om gemaklik tot stilstand te kom.

Skakel altyd die hoofligte van jou voertuig aan in nat weer asook helderder misligte agter vir beter sigbaarheid.

Bewolkte weer en reën beteken swak sig. Wees veral versigtig wanneer jy verbysteek, en onthou nie alle bestuurders gaan onthou om hul hoofligte aan te skakel nie.

Maak seker dat jou ruitveërs in ‘n goeie toestand is en behoorlik skoonvee.

Moenie dat die binnekant van die vensters van jou motor opwasem nie. Dit belemmer veral sigbaarheid. Skakel die vensterverhitter aan en sommer die lugversorging ook sodat die lug binne uitdroog. In hardnekkige gevalle kan ‘n venster op ‘n skrefie oopgedaai word.

Gaan die loopvlak van jou bande na. Die wetlike minimum is 1mm maar ter wille van veiligheid maak seker dis meer.

Verslete skok-absorbeerders hou nie die rubber op die padoppervlak nie. Geen kontak = geen ABS = geen greep = beperkte remkrag.

Vermy skielike versnelling, gerem en stuurbewegings wat kan lei tot ‘n gegly en verlies van beheer.

Moenie deur baie diep water ry nie. Dit kan jou motor beskadig en moontlik jou jou lewe kos.

As jy het geen ander keuse het as om deur dieperige water te ry nie, ry dan stadig in ‘n lae rat, en hou die stuurwiel bestendig.

‘n Rit in swaar reën beteken jy moet jou remme toelaat om droog te word, veral as jou voertuig dromremme het.

Indien jou ryding onklaar raak, skakel die noodligte aan en probeer om heeltemal van die pad af te beweeg. As dit moontlik is, gebruik ‘n reflektiewe waarskuwingsdriehoek ‘n entjie agter jou voertuig.