Suider-Afrika Archives - Page 331 of 888

Bebloede lyk van 11-jarige in plakkershut gevind

Die bebloede lyk van ‘n 11-jarige meisie is die afgelope naweek in ‘n plakkershut in Limpopo gevind, het die polisie Dinsdag gesê.

Die meisie se vriendin, wat aan ernstige beserings ly, is ook in die plakkershut gevind.

Kol. Ronel Otto, polisiewoordvoerder, het in ‘n verklaring gesê ‘n 27-jarige man sal Dinsdagoggend in die Bolobedu-landdroshof verskyn in verband met die voorval.

Otto het gesê die 11-jarige Hermanda Masia en haar vriendin het by nóg ‘n vriend en ‘n 20-jarige vrou in Bokhuta gaan kuier.

“Die 20-jarige vrou het die huis vroeg Sondagoggend verlaat om kerk toe te gaan, maar toe sy terugkeer, was die huis se deur afgebreek en albei meisies was vermis.

“Nadat sy rondgevra het, het sy inligting ontvang dat die meisies in dieselfde gebied by die plakkershut van die 27-jarige verdagte gesien is.”

Toe die vrou by die plakkershut ingaan, was albei meisies vol bloed en het nie beweeg nie.

Hermanda is later dood verklaar en haar vriendin is na ‘n hospitaal geneem.

Die eienaar van die plakkershut staan tereg op aanklagte van moord, ontvoering en huisbraak.

‘n Nadoodse ondersoek sal gedoen word om vas te stel of die kind ook verkrag is.

Die meisie wat die aanval oorleef het, sal ondervra word sodra sy met die owerhede kan kommunikeer. – Sapa

Hlope-verhoor hervat na openingsbetoë

Die dissiplinêre tribunaal na die beweerde wangedrag van die Wes-Kaapse regterpresident, John Hlophe, word vandag hervat wanneer daar repliek gelewer sal word op gister se openingsbetoë.

Hlophe is in 2008 van regterlike wangedrag beskuldig nadat hy na bewering probeer het om regters van die Konstitusionele Hof te beïnvloed in die korrupsiesaak teen president Jacob Zuma.

Hlophe se regspan bevraagteken die geldigheid van die verhoor sê die klagte teen Hlophe is nie onder eed ingedien nie.

Die regsverteenwoordiger vir die Konstitusionele Hof het egter gesê die klagte is deur al die regters van die Konstitusionele Hof gemaak, en was vergesel van beëdigde verklarings. – RSG

Denel kry multimiljardrandkontrak vir Badger-pantser

‘n Multimiljardrandse kontrak is deur Krygkor aan die wapenvervaardiger Denel toegeken vir die bou van 200 gepantserde militêre voertuie.

Dit sal die Ratel vervang wat nou al 30 jaar oud is. Die weermag het nie soos die vloot en lugmag gebaat by die omstrede wapentransaksie nie.

Die Hoefysterprogram is daarop gemik om 8-wiel voertuie in die 25 ton-klas te vervaardig. Die voertuig, is soos sy voorganger, uiters rats en taai en kan 12 man dra.

Die twee partye sê die 8×8 Badger is die beste voertuig in sy soort en sal bydra tot die modernisasie van die Nasionale Weermag.

BAE Systems Land Systems SA het voorgestel dat die Badger laat vaar word ten gunste van die nuwe generasie RG4. Die RG41 voldoen aan mobiliteits-, beskermings- en vuurkragbehoeftes, en die nodige gevegskrag, sê kritici.

Die maatskappy in Benoni het honderde RG31 voertuie vir die Amerikaanse gewapende magte gebou en honderde miljoene dollars daaruit verdien.

Terwyl die RG31 voertuig gewild is by die Amerikaanse departement van verdediging, voldoen die BAE RG41 voertuig nie aan die Suid-Afrikaanse Weermag se spesifikasies nie. Die Suid-Afrikaanse voertuig gebruik ‘n Finse ontwerp wat aangepas is vir plaaslike toestande.

Krygkor en Denel sê Suid-Afrikaanse se troepe-ontplooiing in die Demokratiese Republiek van die Kongo het opnuut die klem geplaas op weerbare slagveldmobiliteit, wat die Badger sal kan verskaf.

Die uitvoerende hoof van Denel, Riaz Saloojee, sê dit is die grootste kontrak met ‘n Suid-Afrikaanse maatskappy die afgelope tien jaar.

R55 weer oop na oproer

Die verkeersvloei op die R55 in Pretoria-Wes het na normaal teruggekeer nadat betogers vroeër die pad versper het.

Inwoners van die Mooiplaas-lokasie het die pad met brandende bande en klippe versper, het lt.kol. Katlego Mogale, polisiewoordvoerder, gesê.

“Die polisie monitor nou die situasie in die gebied. Niemand is nog in hegtenis geneem nie.”

Inwoners het vermoedelik betoog oor dienslewering in die gebied. – Sapa

Kommer heers oor Wits se toekoms

Kommer heers oor die toekoms van die Universiteit van die Witwatersrand (Wits) nadat nóg senior personeellede te midde van herstrukturering bedank het.

Die oudste universiteit in Johannesburg was onlangse in die nuus weens voorvalle van seksuele teistering wat gelei het tot die afdanking van twee swart en een wit akademiese personeellid.

Verskeie top-akademici het intussen bedank, het die Business Day berig.

Twee dekane het ook hul bedanking ingedien.

Die Academic Staff Association of Wits University (Asawu) het gesê daar was ‘n gebrek aan duidelike kommunikasie.

Die vereniging het ‘n beroep gedoen op Adam Habib, viserektor van die universiteit, om bekend te maak wat die werklike redes vir die bedankings is.

Regering gaan plase terugvat wat onderbenut word

Die regering gaan plase wat in die herkapitalisering- en ontwikkelingsprogram toegeken is, maar nie benut word nie, terugvat, het Gugile Nkwinti, minister van landelike ontwikkeling en grondhervorming, gesê.

Nkwinti het verskeie herkapitalisering-grondhervormingsprojekte in die Vrystaat besoek.

Die besoek is deel van ’n bestekopname oor vordering wat gemaak is sedert die instelling van die program vir herkapitalisering en ontwikkeling vir grondhervormingbegunstigdes in 2010.

Nkwinti het gesê die regering gaan streng tydsbebalings instel sodat die nuwe eienaars nie die grond verkoop of verhuur kort nadat hulle dit bekom het nie.

Die provinsiale leier van die African Farmers Association of South Africa (Afasa), het aan Beeld gesê baie van die begunstigdes het plase verkoop weens ’n gebrek aan toewyding aan landbou en afwesige mentors.

Nkwinti sal ‘n hof Dinsdag vra om te bevestig dat sy departement onwettig opgetree het met ‘n R600 miljoen grondeis in 2009.

Die transaksie het aanleiding gegee tot KwaZulu-Natal se R10 miljard Blythedale Coastal Resort ontwikkeling.

Die verhoor wat oor vier dae sal loop, dien voor Regter AJ Sardiwalla in die Durbanse Grondeisehof. Landboukenners sê indien Nkwinti en die grondeisers daarin slaag dat die transaksie gekanselleer word, twyfel sal heers oor al die grondeisooreenkomste wat deur die regering sedert 1998 aangegaan is.

Nkwinti beskuldig die voormalige Minister van Landbou, Lulu Xingwana, en die waarnemende hoof van die voormalige Departement van Grondhervorming, Blessing Mphela – wat die transaksie vir 3 800 hektaar goedgekeur het – van ‘n “onwettige” rubberstempel.

Die voormalige minister van behuising, Lindiwe Sisulu het voorheen na die transaksie as ‘n “belangrike mylpaal en ‘n bloudruk vir behuisingsontwikkeling” verwys.

Die meer as 1 000 eisers vra dat die hof ‘n ooreenkoms met die KwaZulu-Natalse ontwikkelaar Mark Taylor ter syde te stel, en beweer die implikasies van die transaksie was nie ten volle aan hulle verduidelik toe hulle dit onderteken het nie.

Hulle het die hof gevra om die ontwikkelingsooreenkoms nietig te verklaar, wat aan hulle gratis huise en duisende werkgeleenthedesou bied .

Hulle vra die hof ook om Xingwana te dwing om ‘n belofte na te kom van 2009, waar elke eiser ‘n kontant betaling van R10 000 sou ontvang tot die huise en werksgeleenthede realiseer.

In hofdokumente het die eisers, beter bekend as die Zwelabantu Dube Communal Property Association, ook gevra dat Regter Sardiwalla oorweeg of die regering, in terme van artikel 42D van die Wet op Herstel van Grondregte, grondwetlik was.

Taylor is in die knyp met ‘n paar angstige beleggers en skuldeisers wat hulself nou na die howe wend om hul geld terug te kry na die oord-ontwikkeling verlede jaar tot stilstand gekom het.

AgriSA, Kwanalu en SA Canegrowers sê dat hulle die hofverrigtinge fyn dophou aangesien die uitslag beleggingsvertroue kan skud.

Die Mamre–gemeenskap het verlede Dinsdag die titelaktes van 4 200 hektaar se landbougrond terug ontvang wat glo onder die apartheidsregering meer as twee dekades gelede, van hulle vervreem is.

Die oorhandiging is deur die minister van Landelike Ontwikkeling en Grondhervorming as deel van die dorp se Erfenisdagvieringe gedoen.

“Hierdie oordrag is ‘n groot prestasie vir die meer as 2 000 huishoudings wat sal voordeel trek uit dit. Dit is die eerste van ‘n soortgelyke oordrag na ander landelike bruin gemeenskappe,” het die departement gesê.

Sowat 500 gesinne is gedwing om hul grond te verkoop in 1986 om plek te maak vir die ontwikkeling van Atlantis.

Petroljoggiestaking verby

Die vakbond Numsa het ‘n beroep op petroljoggies gedoen om onmiddelik terug te keer werk toe.

Petroljoggies het drie weke gelede begin staak terwyl hulle ‘n salarsiverhoging van 30 rand per uur geëis het.

Vrydag het Numsa ‘n verhoging van twee rand per uur aanvaar wat beteken die werkers kry ‘n verhoging van 11,6 persent.

Die woordvoerder van Numsa, Casto Ngobese sê die ooreenkoms beteken petroljoggies se staking is verby, maar die staking in die onderdelesektor duur nog voort. – RSG

Polisie skiet meisie in oproer

Die polisie het na bewering ‘n 17-jarige meisie wat onder ‘n groep oproermakers was, doodgeskiet. Hulle het teen die sloping van hul plakkershutte in Cato Crest, Durban betoog.

Vroeër vanjaar is sewe polisiebeamptes vrygespreek vir die 2011 moord op die Ficksburgse aktivis Andries Tatane.

Bandile Mdlalose, sekretaris-generaal vir NGO Abahlali baseMjondolo, het gesê: “Die gemeenskap is kwaad, hulle wil geregtigheid hê, hulle sal nooit hierdie sinnelose slagting vergeet nie. Die tiener is doodgeskiet sonder dat ‘n waarskuwingskoot geskiet is.“

Die provinsiale woordvoerder van die polisie, Jay Naicker sê die betogers het twee polisiebeamptes in ‘n hinderlaag gelei wat veroorsaak het dat hulle skote in die skare gevuur het, wat tot die dood van die meisie en ‘n ander persoon gelei het.

“Die skare van ongeveer 500 mense het die polisie omsingel. Hulle het die polisievoertuig in ‘n hinderlaag gelei en die voertuig met klippe bestook. Hulle het ‘n venster gebreek en groot skade aan die voertuig veroorsaak. Die verdagtes het na bewering probeer om die polisie te trek uit die voertuig. Maar toe die polisie ‘n skoot in die skare afvuur, het hulle weggehardloop“. – SABC

Minister vra insette oor matriekslaagsyfer

Die minister van basiese onderwys, Angie Motshekga, wil die matriekslaagsyfer van 30% verbeter.

Motshekga se departement het sedertdien ’n beroep op die publiek gedoen om kommentaar te lewer en hul menings oor die toedrag van sake te gee.

Die minister vra onder meer of die huidige mininum slaagsyfer van 30% voldoende is.

Leerlinge moet tans minstens 40% in tale en wiskunde kry en 30% in ander vakke om Graad 12 te slaag.

Die sluitingsdatum vir openbare konsultasie is volgende Sondag, 6 Oktober.

Insette kan per faks aan Me. K. Sechoaro by 012 323 0069 of per epos by publiccommentsnsc@dbe.gov.za gelewer word.

Twee sterf in Klerksdorp-vliegongeluk

Twee jong mans is dood toe hul ligte vliegtuig in ’n veld langs ’n aanloopbaan in Klerksdorp in Noordwes neergestort het, het paramedici gesê.

Vanessa Jackson, woordvoerder van ER24, sê paramedici wat besig was om toerusting in ’n helikopter te laai, het gesien hoe die vlieënier van die vliegtuig Sondagoggend glo toertjies gedoen het.

Die paramedici het skielik ’n harde geluid gehoor net na 11:00 en besef dat die vliegtuig sowat 500 m van hulle af neergestort het.

Die twee jong mans, vermoedelik in hul 20’s, het reeds aan hul beserings beswyk voor die paramedici hul kon bereik.

Plaaslike owerhede is na die toneel ontbied om die ongeluk te ondersoek.