Suider-Afrika Archives - Page 179 of 888

Brand breek by Rössing-uraanmyn uit

‘n Brand het kort na die middaguur by die verwerkingsaanleg van die Rössing Uraanmyn by Arandis uitgebreek. Volgens voorlopige aanduidings het die brand in die bergingsaanleg vir uraanoksied ontstaan, maar het nie na die res van die aanleg versprei nie.

Selfs die brandweer van Swakopmund is ingeroep om bystand te verleen aan die eie brandweerdiens van die myn.

Op die oomblik is die brand onder beheer en bestrydingspanne laat nou net voldoende tyd toe om die dromme met uraanoksied te laat afkoel voordat die brandtoneel besoek kan word.

Alle personeel in die myngebied is ontruim en alle personeel in die verwerkingsaanleg word op die oomblik onderwerp aan bestralingstoeste. Die myn sê dit is net ‘n voorsorgmaatreël.

Rössing is in die spervuur oor gerugte dat Noord-Korea in die myn belangstel, nadat die maatskappy aangekondig het dat ‘n kontrak vir die lewering van uraan aan Frankryk teen die einde van 2012 gesluit het en dat die grootste oopgroef-uraanmyn in die wêreld nou ‘n besluit moet neem oor sy voortbestaan.

Suid-Korea het voorheen aangedui dat sy regering graag uraan van Namibië wil invoer en daarop gewys dat die uraan benodig word om as brandstof te dien om energie by kernkragsentrale in Suid-Korea op te wek.

Die eerste kernkragsentrale in Suid-Korea is in 1997 opgerig en sedertien het dit tot 16 kragsentrales gegroei wat sowat 40 persent van die land se elektrisiteitsverbruik voorsien. Die beplanning is dat ‘n verdere agt kernkragsentrales tot 2014 in die land opgerig gaan word.

Suid-Korea se aanvraag vir die voorsiening van elektrisiteit het sedert 1990 met nege persent jaarliks toegeneem. Die land voer tans sy uraan in van Kanada, Australië en ander onbekende bestemmings.

Hy het voorts aangedui dat Suid-Korea belangstel om vis in Namibiese gebiedswaters te kom vang.

Rössing Uraan oorweeg verskeie opsies om die leeftyd van die myn te verleng. Ten eerste word dieper delwery in die bestaande groef oorweeg, ten tweede sal die uitbreiding van die oop groef in ‘n noordwestelike rigting oorweeg word om volle kapsiteit van 4 500 ton te produseer en ten derde kan die groef aanvullend tot die tweede moontlikheid ook suidwaarts uitgebrei word.

Sou opsie 3 die besluit wees, kan die myn tot 2020 voortbestaan totdat ‘n geskatte N$284 miljoen aangewend gaan word om dit te sluit.

Bob Hewitt se verkragtingsaak gaan voort

Die kruisondervraging van die Australiesgebore tenniskampioen, Bob Hewitt word Vrydag in die Johannesburgse hooggeregshof voortgesit.

Hewitt staan tereg op twee aanklagte van verkragting en een van molestering.

Hy het Donderdag in sy eie verdediging getuig nadat ‘n aansoek vir sy ontslag van die hand gewys is.

Die Staat wou tydens kruisondervraging van Hewitt weet hoe hy liefdesbriewe aan ‘n 12-jarige meisie kon skryf en dink dit is aanvaarbaar.

Hy het erken dat as hy nou daaraan dink dit nie gepas was nie.

“Ek het in ’n grap gesê dat, as ek verkragting nie kon vermy nie, ek net agteroor sou lê en dit geniet,“ het hy aangevoer.

Hewitt sê hy het dié aanmerking teenoor ’n klompie seuns gemaak aan wie hy tennislesse gegee het, maar een van die drie vroue wat Hewitt van verkragting en seksuele aanranding aankla, het egter Woensdag gesê dat hy die aanmerkings aan haar gerig het.

Suellen Sheehan, nog ’n beweerde slagoffer, het getuig dat Hewitt haar in 1982, voor ’n tennisoefening, in sy kar verkrag het. Sy was toe 12 jaar oud.

Theresa Tolken het aan die hof gesê dat Hewitt haar 34 jaar gelede, toe sy 12 was, onsedelik aangerand het.

Die 75-jarige Hewitt het vroeër getuig dat hy deur die media onder groot druk geplaas word en dat die publiek hom teister deur kwaadwillige boodskappe.

Hy het ook gesê dat hy bloot ‘n “vaderfiguur” vir een van sy vermeende slagoffers, Theresa Tolken, was.

KKaskenades: Varkwagteres Modise laat EFF deur uitsmyters uit parlement boender

DA verlaat parlement tydens Zuma-toespraak, maar Pieter Mulder bly sit

Nadat die hoofstroommedia weke lank gegons het oor hul jongste Amerikaanse akroniem, die SONA, het parlementslede gisteraand amper gesauna toe een so byna van al sy klere ontneem is deur ‘n uitsmyter. ‘n Vroulike EFF-parlementslid, Reneilwe Mashabela, se kakebeen is glo deur die uitsmyters afgeslaan en sy is agterna in ‘n (privaat) hospitaal behandel.

Baleka Mbete en Thandi Modise gisteraand in die parlement

Tydens die spesiale sitting van die parlement om Zuma se grootse rede aan te hoor, het sowel die Speaker, Baleka Mbete, as Thandi Modise wat laas oor haar rampspoedige varkboerdery in die nuus was, voorgesit. Hulle was reg vir Julius Malema en Floyd Shivambu van die EFF wat vir Zuma wou vra “wanneer hy die geld vir Nkandla gaan terugbetaal soos die openbare beskermer beveel het”. Nóg Mbete, wat ‘n deftige hoed en tabberd gedra het, nóg Modise wou enige vrae toelaat en het toe die EFF op vraetyd aandring, ‘n groep polisie en gewapend privaatveiligheidswagte laat inroep om die rooigeklede party uit te smyt. Die toneel was meer gepas vir een van Kaapstad se rowwer nagklubs waar die dwelms deesdae onder DA-regering vrylik verhandel as vir die eens waardige parlement van Suid-Afrika.

‘n DA-lid wou agterna weet of die uitsmyters, wat wit hemde dra, polisie was of veiligheidswagte wat vir die parlement werk. Die voorsittende speaker en varkwagteres het dié vrae ontwyk of onkunde geveins, waarna die DA ewe teatraal, maar met minder geweld as die EFF, uit die parlement gestap het. Blykbaar het die DA ‘n beginselbeswaar teen pistole in die parlement, wat wel deur die manne in wit hemde gedra is.

Tydens sy toespraak het Zuma aangekondig dat die regering “vyftien duisend loodgieters gaan oplei om lekkende krane (in die lokasies) reg te maak”, maar geen woord gesê oor die onwettige elektrisiteitsverbindings wat insgelyks in dieselfde buurte “lek” nie. Uit sy opmerkings oor gas en energie, kom dit voor asof die ANC Shell se skaliegasprojek in die Karoo gaan goedkeur.

Sommige van die hoofstroommedia was minder geesdriftig oor die parlementêre kaskenades. Die ANC-mondstuk in Johannesburg, Beeld, het vanoggend as opskrif: “Ons parlement is flenters.”

Die webblad TimesLive berig dat die EFF agterna gesê het dat hulle aanstaande keer wapens sal saambring.

“Hulle het ons kennelik rondgepluk. Volgende keer sal ons gewapen wees,” het Floyd Shivambu gesê terwyl hy by die parlementtrappies in die reën afstap.

Malema het na Zuma as “ons nommer-een-tsotsi” verwys.

FW de Klerk, wat die mag aan die ANC oorhandig het, het ook die sitting bygewoon en tot almal se groot verbasing gesê: “Suid-Afrika stuur op ’n grondwetlike krisis af. Ek het nog nooit so iets gesien nie.”

Binnegeveg in EFF lei tot geweld

EFF-parlementslid, Andile Mngxitama wou die media toespreek, maar moes noodgedwonge sy inligtingsessie Donderdag uitstel toe lojaliste van Julius Malema verrigtinge met geweld ontwrig het.

Mngxitama ondersoek bewerings gemaak deur die leier van die Patriotiese Alliansie, Gayton McKenzie.

Hy het Woensdag getwiet dat hy op pad is na McKenzie se huis om bewyse te sien wat Malema in ‘n moord impliseer. In ‘n ope brief gerig aan Malema, het McKenzie beweer dat Malema sy party se fondse misbruik en ‘n aandeel in die dood van ‘n man het wat gekant was teen Papiki Babuile.

Die EFF se Noordwes-leier, Papiki Babuile is skuldig bevind aan die moord.

Mngxitama wou die media inlig oor sy huidige rol en toekoms in die EFF asook sy verskille met EFF-leier, Malema.

Die twee is haaks oor verskeie kwessies insluitend Malema se beskerming van Babuile.

Die veroordeelde moordenaar geniet ‘n maandelikse salaris wat deur die Noordweswetgewer betaal word, ondanks sy skuldigbevinding. Hy is in Desember en Januarie ‘n salaris betaal maar is sedertdien uit die wetgewer verwyder.

Voordat Mngxitama kon praat by die inligtingsessie by ‘n Southern Sun-hotel, het ondersteuners van Malema en Mngxitama mekaar probeer doodskree en daarna het die strydende faksies tot geweld oorgegaan.

Verskeie pogings is aangewend om Mngxitama aan te rand. Verslaggewers van verskeie mediahuise is ook in die geveg betrokke.

Mngxitama is ongedeerd nadat hy beskerm is deur sy kollegas. Hy het later getwiet dat hy nog lewe en dat die nuuskonferensie sal voortgaan.

Daveyton in oproer

Inwoners van Daveyton, oos van Johannesburg versper paaie in die gebied met brandende buitebande en rommel.

‘n Woordvoerder van die Ekurhuleni Metropolisie, Kobeli Mokheseng sê net na middernag Woensdag is paaie versper.

Dit volg na ‘n optog, maar dis nie duidelik waaroor inwoners in opstand is nie.

In Daveyton, waar misdaad baie hoog is, is daar ‘n vigilante-groep algemeen bekend as “Die Russe”.

Dié groep wat honde gebruik, het reeds gevestigde sekuriteitsmaatskappye die loef afgesteek met die verskaffing van goedkoop beskerming.

Inwoners kla dat die polisie se afwesigheid die lokasie in ‘n toevlugsoord vir misdadigers verander het.

“Die Russe” en hul honde patrolleer dwarsdeur die nag. Honde word gevrees deur die meeste lokasie-inwoners.

Hulle is glo gewild weens hul vermoë om die diere op te lei om te reageer op hul opdragte.

In Daveyton se uitbreidings 2 en 3 betaal elke huishouding R50 per maand vir “Die Russe” se beskerming.

Kommer oor geweldsmisdaad het weer opgevlam na die moord van sokkerster Senzo Meyiwa in Vosloorus, ook aan die Oos-Rand, maar Daveyton gaan gereeld gebuk onder diensleweringsoproer en is een van Cosatu se vestings.

Zuma hou klasbewuste Britse noenmaal voor staatsrede

President Jacob Zuma het, sonder ironie, uitgelese buitelandse gaste en “struggle-helde” vir ‘n klasbewuste noenmaal by sy amptelike woning uitgenooi wat in Brittanje bekend staan as “high tea”.

Die “struggle” wat gevoer is ter wille van ‘n “klaslose” samelewing in Suid-Afrika, is klaarblyklik toe inderwaarheid vir die Britse heersersklas en hul tee-rituele gevoer.

Lees meer hier oor tee-etiket.

Ambulans weier hulp in jongste Namibiese plaasaanval

‘n Bejaarde egpaar is Woensdagoggend op hul plaas naby Hochfeld in Namibië deur vier gewapende swart rowers aangeval, vasgebind, aangerand en beroof, het die Republikein berig.

Die naaste ambulansdiens het egter hulp aan die wit egpaar geweier.

Mnr. Gernot en me. Renate Zander, albei in hul sewentigs, van die plaas Monteith sowat 50 km suid van Hochfeld, was volgens hul buurvrou, me. Heike Kash, gisteroggend tussen middernag en eenuur aangeval.

“Hulle was nog besig om TV te kyk, toe hulle ’n klop aan die deur hoor en aanvaar het dat dit hul plaaswerkers is. Vier gewapende mans het hul egter verras,” het Kash gesê.

“Mnr. Zander is wreed aangerand en met ’n swaar ystervoorwerp op sy kop geslaan wat erg gebloei het. Hy is ook op sy rug geslaan wat baie seer is. Me. Zander is gewurg. Hulle was albei vasgebind,” vertel Kash.

Me. Zander het gister in die vroeë oggendure met hul bakkie hulp by hul bure gaan soek nadat hul landlyntelefoon se drade uitgetrek en hul selfone gesteel is.

“Sy beskryf die gewapende mans as een lange en drie kortes. Sy is ook nie seker wat alles gesteel is nie, maar ’n vuurwapen en hul selfone is weg,” sê Kash.

“Die mans het aangedring op geld, maar daar was nie baie geld nie, net in hul beursies. Die Zanders is gedwing om hul kluis oop te sluit en die slaapkamer is omgedolwe.”

Die polisie van Hochfeld en Okahandja was op die toneel. Ses verdagtes, van wie vier in die huis was, is nog op vrye voet. Die kommunikasiehoof van die polisie, adj.kom. Edwin Kanguatjivi, het die voorval bevestig.

Volgens die polisie wou geen private of staatsambulans uitkom na die plaas nie. Mnr. Zander se dogter het met hom na ’n hospitaal in Windhoek gejaag waar hy steke vir sy wonde gekry het en X-strale geneem is.

’n Boer in die omgewing, mnr. Marius Basson, het aan Republikein gesê dit is die tweede keer in vier maande wat mense op plase in hul omgewing aangeval is. “Die Hammans (die bekende Afrikanerbeesboer, mnr. Eddie Hamman se ma en suster), ongeveer 30 km van ons af, is so vier maande gelede aangeval en die Zanders is 20 km van ons af.”

Skaars minder as ’n maand gelede is nog ’n bejaarde egpaar in die Ooste aangeval. Mnr. Acker en me. Dorea von Moltke is op 18 Janaurie op hul plaas, Okatjombua, sowat 90 km noordoos van Gobabis op die pad na Summerdown, deur twee mans oorval, vasgebind en beroof. Mnr. Von Moltke, ’n bekende oudonderwyser, was erg aangerand.

Oproer by TUT brei uit

Oproer oor studentelenings by die TUT, die Tshwane Universiteit van Tegnologie, het na Ga-Rankuwa, Emalahleni en die Pretoria-kampusse uitgebrei.

Werksaamhede by die TUT se Soshanguve Noord- en Suid-kampusse is reeds weens die voortslepende studente-onrus opgeskort.

Die universiteitsbestuur het Woensdag met studenteleiers vergader oor hulle griewe, maar studenteleiers het die universiteit se voorstelle verwerp

Swart studente kla dat hulle nie beurse ontvang nie.

Die Studente-organisasie Cosas het verlede week die universiteit se bestuur daarvan beskuldig dat hulle nie genoeg doen om behoeftige studente te help nie.

Die universiteit moes in September verlede jaar van sy kampusse sluit na geweldpleging. Swart studente hulself tot vandalisme en brandstigting gewend oor studente-befondsing en klasse ontwrig.

Agttien voertuie is aan die brand gesteek tydens die oproer wat byna drie weke geduur het.

Corrie Sanders se moordenaars skuldig bevind

Drie swart Zimbabwiërs is Dinsdag skuldig bevind aan die moord op die voormalige swaargewigbokskampioen Corrie Sanders.

Die staatsaanklaer het gesê sulke gedrag van Zimbawiërs lei tot aanvalle teen buitelanders. “Jy het net pyn en lyding na Suid-Afrikaanse gesinne gebring,” het die staatsaanklaer gesê.

Sanders (46) is tydens ‘n rooftog geskiet, en is die volgende dag in die Kalafong-hospitaal oorlede.

Hy het sy broerskind se 21ste verjaarsdagviering bygewoon by ‘n restaurant buite Brits toe hulle deur die drie swartes oorval is.

Regter Ferdi Preller het Paida Fish (21), Chris Moyo (28) en Samuel Mabena (29) in die Pretoriase hooggeregshof skuldig bevind aan moord, roof met verswarende omstandighede, en die onwettige besit van vuurwapens en ammunisie.

Sanders is getref toe hy sy dogter Marinique wou beskerm. Hy was reeds swaar gewond toe hy haar na die grond toe getrek het en gesê het sy moet maak of sy dood is.

Die aanvallers het die gaste van hul persoonlike besittings soos handsakke, selfone en kontant beroof. Twee van die gaste kon Fish en Moyo tydens ‘n uitkenningsparade identifiseer.

Die drie swartes is ‘n paar dae later in Oukasie-lokasie gevang met die gesteelde items. Een het ‘n gegraveerde horlosie van een van die gaste gedra wat hy met ‘n rekkie om sy arm vasgemaak het. Die ander twee het onder meer motorsleutels en simkaarte van die gaste in hul besit gehad.

Sanders het in 46 gevegte slegs vier keer verloor en 31 keer gewen deur ‘n uitklophou. Hy het die WBO-swaargewigtitel in Maart 2003 in Hannover, Duitsland ingepalm nadat hy Wladimir Klitsckho van Oekraïne in die tweede ronde met ‘n uitklophou platgeslaan het.

Die swartes word Woensdag gevonnis.

ANC skielik inskiklik oor Tsonga-eise

Die sekretaris van die ANC in Limpopo, Knocks Seabi sê die Munisipale Afbakeningsraad kan dalk sy besluit oor Malamulele verander nadat etniese konflik tussen Vendas en Tsongas die gebied reeds weke lank teister.

Die Afbakeningsraad het vroeër die Tsongagemeenskap se eis vir ‘n eie munisipaliteit van die hand gewys.

President Jacob Zuma het vroeër gesê dit sal terugreik na tuislande en is onaanvaarbaar.

Vier skole, ‘n regeringspakhuis en `n winkel is reeds aan die brand gesteek in die protesoptrede wat al meer as vier weke duur.

Seabi sê die ANC en die inwoners van Malamulele sal nuwe voorleggings by die Afbakeningsraad indien.

Volgens hom sal die ANC sy eie voorlegging en die inwoners hul eie voorlegging maak.

Die Tsongasprekers beskuldig die Thulamela-munisipaliteit daarvan dat hy nie basiese dienste soos water en sanitasie aan hulle verskaf nie.