Die Verenigde Nasies se spesiale verteenwoordiger in die Demokratiese Republiek van die Kongo, Martin Kobler, was vol lof vir die Suid-Afrikaanse soldate wat in die ooste van die land ontplooi is.
Die soldate was deel van ‘n operasie teen M23 rebelle in die oorlog-geteisterde streek.
Volgens Kobler het hulle ‘n belangrike rol gespeel in die beskerming van burgerlikes toe gevegte verlede week in Kiwanja uitgebreek het.
Kobler het die minister van Verdediging, Nosiviwe Mapisa Nqakula ontmoet, wat die soldate besoek het. Hy het die Suid-Afrikaanse soldate bedank vir hulle bydra om lewens te red, en het hulle as dapper en professioneel bestempel.
Intussen het Kongolese regeringsoldate die oostelike grensdorp, Bunagana ingeneem terwyl die meeste M23-rebelle padgegee het.
Dit was die laaste belangrike DRK-dorp waarvan hulle in beheer was. Dit was ook die eerste plek wat die rebelle verlede jaar ingeneem het.
Die oorname van die regering en VN se gesamentlike mag in die land, is die jongste sukses wat behaal is in die 20-maandlange rebellie.
Die Noord-Gautengse hooggeregshof in Pretoria het beslis dat Boeremaglede wat weens hoogverraad gevonnis is, nie hul bates sal terugkry waarop vroeër beslag gelê is nie.
Regter Eben Jordaan het ‘n bevel toegestaan waarin die Boeremag-bates verbeurd verklaar word aan die staat.
Dit sluit skootrekenaars en voertuie in.
Vyf van die lede is opgeskorte vonnisse opgelê en veertien is gevonnis tot tronkstraf van meer as 200 jaar.
Die Stad Kaapstad wil die organiseerders van ‘n betoging Woensdag vir R6 miljoen dagvaar, nadat dit in geweld en plundering ontaard het.
Grootskaalse plundery en aanranding het voorgekom en winkelvensters is tydens die chaos uitgeslaan. ‘n Dienende en ‘n voormalige ANC-raadslid het krotbuurtbewoners na die middestad gelei nadat hulle die optoggangers aangehits het om sakeondernemings te gaan plunder.
JP Smith, burgemeesterskomiteelid vir gemeenskapsveiligheid, het gesê beeldmateriaal sal bestudeer word om diegene wat verantwoordelik is vir die geweld, te identifiseer, berig The Times.
“Ons het regsadvies ingewin en ons kan die betogers sowel as die organiseerders van die betoging dagvaar.”
Smith het gesê die skade word op R6 miljoen geraam.
Hy het gesê die stad sal geld van die ANC, die raadslid Loyiso Nkohla en voormalige ANC-raadslid Andile Lili eis.
Die ANC het hom intussen van die betoging gedistansieer.
Die Demokratiese Alliansie het die betoging veroordeel en het gesê die regerende party moet Nkohla afdank omdat hy die geweld aangehits het, berig Sapa.
Muhammad Khalid Sayed, woordvoerder van die ANC-jeugliga in die Wes-Kaap, het Woensdag gesê die kriminele aktiwiteit kan nie regverdig word nie.
Kusile in Mpumalanga, Suid-Afrika se steenkoolaangedrewe kragstasie kan die eerste elektrisiteit teen die einde van 2014 lewer.
Eskom sê die Medupi-aanleg in Limpopo sal ook teen die tweede helfte van aanstaande jaar begin krag lewer.
Bouwerk aan Medupi is met minstens ses maande vertraag weens arbeidsonrus en die beweerde wanprestasie van kontrakteurs.
Eskom het eers laasmaand ’n belangrike oorwinning behaal wat sy vermoë versterk het om Hitachi Power Africa tot verantwoording te roep vir brouwerk by die Medupi-perseel.
Vyf appèlregters het bevestig dat Eskom daarop geregtig is om waarborge aan te vra wat verseker dat Hitachi sy werk behoorlik en tot die bevrediging van Eskom doen. – Sapa
Suid-Afrikaanse sport gaan broodnodige borgskappe verloor te danke aan die regering se beplande verbod op alkoholadvertensies.
Die direkteur-generaal (DG ) van sport en ontspanning Alec Moemi het die Parlement se portefeuljekomitee oor sport ingelig oor die gevolge van die voorgestelde wet wat binnekort in die Staatskoerant verskyn vir openbare kommentaar.
“Dit sal ‘n jammer dag vir ons in sport wees as dit gebeur, en as ons so beduidende borgskappe verloor, want eerlik … wat die Tesourie aan ons sal gee, sal heeltemal te min wees om sport mee te dryf,” het Moemi gesê.
Die DG het verwys na die verbod op advertensies wat hy gesê het die departement van sport heelhartig ondersteun.
Maar hulle glo dat die geld wat ingesamel word met die toename in sondebelasting sal na die departement vloei.
Moemi gesê hy sal nie by die debat oor die vraag betrokke raak of daar ‘n direkte verband tussen alkoholadvertensies en alkoholmisbruik is nie.
Hierdie debat moet oorgelaat word aan die departemente van gesondheid en maatskaplike ontwikkeling.
BMI Sports Info, SA Breweries en Brandhouse projekteer dat die ekonomie sowat R7.4 miljard sal verloor as die verbod geld.
Daarbenewens sal duisende werkgeleenthede verlore gaan .
Die wetsontwerp word gedryf deur die Minister van Gesondheid, Aaron Motsoaledi wat sê dit kos die regering dubbel die bedrag weens die gevolge van alkoholmisbruik as wat die bedryf tot die ekonomie bydra.
Motsoaledi het gesê dit kos die regering R40 miljard per jaar aan die impak van alkohol op die samelewing. – Sapa
‘n Vermeende renosterstroper is doodgeskiet en nog een gewond tydens ‘n skietery met veldwagters van die Nasionale Krugerwildtuin.
‘n Derde vermeende wildstroper is ook in hegtenis geneem. Die gewonde verdagte is onder polisiebewaking in die hospitaal.
Die polisie sê die voorval het naby die Vlakteplaaskamp in die noorde van die wildtuin voorgekom.
‘n Woordvoerder, Samuel Matsimbi, sê die verdagtes is met jaggewere en ammunisie betrap. Die verdagte verskyn vandag in die landdroshof op Makhado. – RSG
Die dwelmbendegevegte in die Wes-Kaap raak warm. Genl. Riah Phiyega sal egter in haar pos as polisiehoof aanbly terwyl die onafhanklike polisie-ondersoekdirektoraat (Opod) klagte van regsverydeling teen haar ondersoek.
Die ondersoek spruit uit beweerde vriendskapsbande van lt.genl. Arno Lamoer, Wes-Kaapse polisiehoof, met ’n dwelmbaas, waarin Phiyega glo geïmpliseer word
Phiyega word daarvan beskuldig dat sy die Wes-Kaapse polisiekommissaris oor ondersoeke teen hom gewaarsku het.
Phiyega se teenstanders hoop daar is gronde vir skorsing onder die Wet op Arbeidsverhoudinge. As sy skuldig bevind word hoop hulle sy sal summier afgedank word en formeel aangekla word van dwarsboming van die gereg.
Waarnemende direkteur van Opod, Koekie Mbeki het gesê die besluit om die saak te ondersoek was in lyn met die wet.
“Ons verwag om die ondersoek te voltooi binne drie maande. Phiyega verwelkom die ondersoek,” het haar woordvoerder Lt.genl Solomon Makgale gesê.
“Die nasionale kommissaris hou nog steeds vol dat sy geen misdaad gepleeg nie,” het hy gesê.
Volgens berigte het Phiyega Lamoer by drie geleenthede gewaarsku dat sy bewus was dat hy ondersoek word.
Die Sunday Independent het berig dat hulle telefoongesprekke wettig afgeluister is deur misdaadintelligensie-agente wat Lamoer se oproepe afluister.
Hy het na bewering bande met ‘n Kaapse dwelmhandelaar en bekende sakeman.
Makgale het gesê Lamoer het in Julie 2012 self die ondersoek aangevra en was dus nog altyd bewus van die ondersoek. Hy het gesê die ondersoek was egter in geen stadium openbare kennis nie.
Hy sê Lamoer was verbaas toe hy uitgevind het dat ‘n politieke party ook bewus is van so ‘n saak.
Phiyega het vroeër gesê dit is “interessant” dat die aantygings teen haar opgeduik het kort ná haar besluit om die voormalige waarnemende misdaadintelligensiebaas Maj.genl. Chris Ngcobo op spesiale verlof te plaas.
Ngcobo is op spesiale verlof geplaas ná ‘n keuringsproses teenstrydighede in sy kwalifikasies gevind het.
Phiyega en generaals in misdaadintelligensie het mekaar daarna van wanvoorstelling en verdagmakery beskuldig oor ’n ondersoek deur die Valke en misdaadintelligensie na die beweerde vriendskapsbande van Lamoer, Wes-Kaapse polisiehoof, met ’n dwelmbaas, asook beweerde korrupsie.
Intussen het die Pietermaritzburgse landdroshof Dinsdag gehoor dat Maj.genl. Bethuel Mondli Zuma in die toilet weggekruip het om te verhoed dat ‘n alkoholtoets op die aand toe hy in hegtenis geneem is, geneem word.
‘n Padverkeertoesighouer Zain Mahomed het getuig in Zuma se verhoor .
Vorige getuienis het getoon dat Zuma se bloedalkoholvlak 3,5 keer die wettige perk was, maar dat die toets nie geldig was nie in die hof.
Zuma sou Gauteng se nuwe provinsiale kommissaris van polisie geword het, maar is ure nadat hy aangestel is deur die nasionale kommissaris van polisie Riah Phiyega afgedank toe dit blyk dat die saak teen hom hangende is.
Inwoners van Duduza buite Nigel aan die Oos-Rand het Dinsdag op ‘n wyksraadslid en voorsitter van hulle gemeenskapstaakspan begin dreig met die dood. Die twee moes na ‘n plek van veiligheid vlug.
Die tierende skare het oproerig begin raak en gedreig om die raadslid se motor aan die brand te steek.
Die inwoners het ‘n openbare vergadering gehou waar hulle dit duidelik gemaak het dat die taakspan nie aandag gee aan hulle griewe nie.
Van die belangrikste knelpunte dateer terug na Augustus vanjaar toe ‘n Somaliese winkeleienaar na bewering ‘n 23-jarige man doodgeskiet het. Dit het tot ‘n vlaag xenofobiese geweld gelei wat twee dae geduur het voordat die polisie die orde kon herstel.
Plundery en vandalisme van winkels wat aan buitelanders behoort is aangemeld.
Die Oos-Kaapse gesondheidsdepartement is bekommerd oor die “misbruik van die ambulansvloot” nadat twee ambulanse die naweek by ’n gewilde braaiplek opgemerk is.
“Ons is bekommerd oor die gedrag van sommige van ons beamptes,” sê ’n woordvoerder, Sizwe Kupelo.
Die voertuie is gesien by Ebuhlanti se strandgebied, ’n gewilde partytjie- en braaiplek.
’n Foto op die koerant Dispatch se webwerf wys die ambulans onder ’n boom, ’n vuur langsaan, die deure van die ambulans oop en ’n man wat by die voertuig staan.
Volgens die fotograaf was daar twee mans wat voor die ambulans gestaan en rook het en toe hy verbyry, het hulle geglimlag en vir hom gewaai. Kort daarna het nog ’n ambulans aangekom.
In ’n verrassende wending het die bestuurders nadat die foto geplaas is ’n verklaring uitgereik waarin hulle sê hulle het “toestemming gehad om daar te wees”.
Die voorval het gebeur oor dieselfde naweek wat ’n krieketspeler in Alice dood is omdat ’n ambulans glo nie opgedaag het om hom hospitaal toe te neem nie.
Die departement was ook onlangs in die nuus weens petrolkaartbedrog. – Sapa
Pres. Jacob Zuma het die afgelope naweek in die Oos-Kaap ’n dwarsklap na die Ekonomiese Vryheidsvegters (EFF) gemik.
“Sommige sê hulle veg vir ekonomiese vryheid. Wie onderdruk hulle ekonomies? Van wie soek hulle ekonomiese vryheid?” het Zuma volgens DispatchOnline gesê.
“Net die ANC het aan Suid-Afrika vryheid gebring. Toe dit tyd was om te veg, was dit ons wat vir vryheid gesterf het. Ons is in hegtenis geneem en het na Robbeneiland gegaan en ons is die enigste party wat mense in Suid-Afrika se situasie kan verander.”
Zuma het sowat 500 mense by die Laerskool Nonzwakazi in Mdantsane toegespreek voordat hy ’n gedenklesing in Oos-Londen gelewer het.
Hy het aan inwoners gesê om nie hul stem op opposisiepartye te verkwis nie en het gesê dit sal so nutteloos wees soos om “jou stem in die see te gooi”.
“Daar sal baie wees wat sal sê niks het sedert 1994 verander nie. Hulle sal die ANC kritiseer en tog het hulle nog nie een ding vir julle gedoen nie en sal nooit, want hulle is nie in die regering nie.”
Die EFF is gestig deur Julius Malema, voormalige president van die ANC-jeugliga, nadat hy uit die regerende party geskors is.
