Kategorie: Suider-Afrika

Suid-Afrikaanse nuus, d.w.s. sowel nuus uit Suid-Afrika én Suider-Afrika.

SA plaas ebola op G20-beraad se agenda

Suid-Afrika het die bespreking oor die ebolakrisis in Wes-Afrika by die G20-leiersberaad in Brisbane, Australië versoek, het die minister van finansies, Nhlanhla Nene gesê.

“Ons is inderdaad bekommerd. Ons versoek het eintlik daartoe gelei dat sake wat verband hou met ebola op die G20-vlak bespreek is sowel as in alle ander multilaterale vergaderings waaraan ons deelgeneem het,” het Nene aan verslaggewers in Pretoria gesê.

“Ons verstaan dat dit nie net ‘n ekonomiese kwessie is nie, maar ‘n humanitêre saak. Hierdie [lande wat geraak word] is ons handelsvennote. Ons moet multilaterale instellings en verbintenisse hê. ”

Nene het die gesprekke as bemoedigend beskryf. Hy het gesê die Verenigde State van Amerika sowel as Spanje het ook met die siekte te kampe weens verbintenisse tussen alle dele van die wêreld.

“Ons het gesien dat filantrope, selfs van ons eie land, nie net praat daaroor nie, maar die finansiële hulpbronne gee om te verseker dat diegene in Wes-Afrikalande bygestaan word om ebola te bekamp.”

Nene het gesê die leiers van Brasilië, Rusland, Indië, China en Suid-Afrika (BRICS) het op die kantlyn van die G20-beraad beraadslaag.

President Jacob Zuma het die Suid-Afrikaanse afvaardiging na die beraad gelei wat tussen 15 en 16 November plaasgevind het.

Zuma is vergesel deur Nene en die minister van Internasionale Betrekkinge, minister Maite Nkoana-Mashabane.

Nene het gesê die trae globale ekonomiese groei was ‘n groot bron van kommer vir almal by die G20-beraad.

Hy het gesê gesprekke in Brisbane het gesentreer op strategieë deur alle lande wat sal bydra tot die toevoeging van ‘n verdere twee persentasiepunte tot groeivooruitskattings oor die volgende vyf jaar.

Nene het gesê daar was “robuuste gesprek” met betrekking tot oproepe vir die hervorming van bestaande internasionale finansiële instellings, veral die Internasionale Monetêre Fonds (IMF).

“Daar is ooreengekom dat internasionale finansiële instellings sal moet hervorm word om die feit dat ontluikende markte en ontwikkelende ekonomieë nou verantwoordelik is vir die grootste deel van die globale groei, te weerspieël,” sê Nene.

Lede van die G20 is Argentinië, Australië, Brasilië, Kanada, China, Frankryk, Duitsland, Indië, Indonesië, Italië, Japan, Suid-Korea, Mexiko, Rusland, Saoedi-Arabië, Suid-Afrika, Turkye, die Verenigde Koninkryk, die Verenigde State van Amerika en die Europese Unie.

Die internasionale forum is ook bekend as die Groep van Twintig.

Die minister van Verdediging, Nosiviwe Mpahisa-Nqakula, het intussen geweier besonderhede oor president Jacob Zuma se reis na ‘n BRICS-beraad in Brasilië te gee.

Sy het kommer oor inligting wat betref die bewegings van die staatshoof aangedui as rede waarom sy nie die vraag kan beantwoord nie.

Die minister het bygvoeg dat sy toestemming van die Parlement se Staande Komitee oor Verdediging sal vra om die inligting bekend te maak.

Algemene Balieraad wil drie staatsadvokate laat skors oor Mdluli-affêre

Drie van die advokate by die nasionale vervolgingsgesag (NV) wat verseg het om aanklagte teen Richard Mdluli te ondersoek en te vervolg, loop gevaar om van die advokaterol geskrap te word. Hulle is advv. Nomgcobo Jiba, Lawrence Mrwebi en Sibongile Mzinyathi.

Die voorsitter van die algemene balieraad, adv. Jeremy Muller SC, het teenoor die media verklaar dat hul uitvoerende komitee reeds die besluit geneem het om ‘n hofaansoek ter skorsing van die drie swart advokate in te dien. Hulle loop ook gevaar om heeltemal van die advokaterol geskrap te word, indien die aansoek sou slaag.

Klagte van onetiese gedrag is reeds teen Jiba, Mrwebi en Mzinyathi by die Pretoriase Balieraad ingedien. Hierna is die klagte na die Algemene Balieraad verwys wat ‘n subkomitee saamgestel het om die bewerings te ondersoek.

“Daar is besluit om ’n hofaansoek teen die drie in te dien by die hooggeregshof in Pretoria. Indien nodig, sal die aansoek ook in ander howe ingedien word,” het Muller aan die media verklaar.

Die drie staatsadvokate was na bewering betrokke by die terugtrek van aanklagte van bedrog, korrupsie en geldwassery teen luitenant-genaarl Richard Mdluli, die geskorste hoof van die polisie se misdaadintelligensie-eenheid.

In Maart 2011 is ‘n lasbrief vir die inhegtenisname van Mdluli uitgereik, wat verband hou met die moord op Oupa Ramogibe wat op 17 Februarie 1999 doodgeskiet is. Op 21 Maart het Mdluli hom aan die Boksburgse Landdroshof oorhandig waar hy en drie ander aangekla is van intimidasie, drie klagte van ontvoering, twee klagte van aanranding met die doel om ernstig te beseer, poging tot moord en sameswering met die doel om moord te pleeg. Mdluli sou ook tereg staan op ‘n verdere klag van dwarsboming van die gereg.

Die NV het al drie voorheen aangekla en Mrwebi se besluit om die klagte teen Mdluli terug te trek is deur die Gautengse Hooggeregshof in Pretoria tersyde gestel. ‘n Appèl hierteen, wat deur die Appèlhof in Bloemfontein verhoor is, is van die hand gewys.

Met die tersydestelling van Mrwebi se nie-vervolging van Mdluli, het die nuwe NV-hoof, Mxolisi Nxasana, opnuut vier aanklaers aangesê om die klagstaat deur te werk om te bepaal of daar ‘n prima facie-saak teen Mdluli bestaan. Advokaat Pat Ellis SC is insgelyks versoek om ‘n regsmening oor Mrwebi, Jiba en Mzinyathi se optrede betreffende die saak te verskaf. Ellis se mening was dat hulle geskors moes word terwyl hul bevoegdheid ondersoek moes word en dat hulle eweneens strafregtelik vervolg moes word.

‘n Klag van meineed is ook teen die drie omstrede staatsadvokate by die polisie ingedien.

Die drie lede van die nasionale vervolgingsgesag beklee tans die volgende posisies:

  • Jiba – adjunkhoof
  • Mrwebi – nasionale hoof van die gespesialiseerde handelsmisdaadeenheid
  • Mzinyathi – direkteur van openbare vervoling in Pretoria

‘n Woordvoerder van die NV, adv. Nathi Mncube, het verklaar dat hulle “bewus is van die balieraad se beoogde aansoek en die finalisering daarvan sal afwag”.

Eskom waarsku dat kraglewering gaan sukkel

Die land se kragleweringsnetwerk sal na verwagting groot druk ervaar weens die kouer weer.

Eskom het Dinsdag gewaarsku dat die netwerk vir die volgende paar dae tydens spitstye kaan knor.

Koue en bewolkte weer wat vir die volgende paar dae voorspel word, sowel as probleme by kragstasies met gebrekkige onderhoud het daartoe gelei dat die kragvoorsiener ‘n waarskuwing uitgereik het.

‘n Silo wat steenkool berg, het onlangs ineengestort. Eskom sê die Majuba-kragstasie wek tans sowat 600 megawatt elektrisiteit omdat bergingsprobleme tot nat steenkool gelei het.

Eskom het glo intussen ‘n “natsteenkoolbestuurstrategie” ontplooi om die risiko van nat steenkool by ander kragstasies te verminder, maar waarsku dat die risiko nie heeltemal uitgeskakel kan word as reën aanhou uitsak nie.

Beurtkrag is reeds ingestel nadat die steenkoolsilo by Majuba ineengestort het toe Eskom nie gereageer het op aanduidings dat die silo strukturele onderhoudskade toon nie.

Diere neem wraak in Limpopo

‘n Toeris by die Phafuri-rivierkamp naby die Nasionale Krugerwildtuin is deur ‘n gewonde buffel aangeval, in een van twee soortgelyke voorvalle in Limpopo.

Die park se bestuurder, Von van Niekerk sê die sestigjarige is na die hoësorg-eenheid van die Polokwane-hospitaal geneem.

Die beseerde besoeker moes per helikopter na die hospitaal gehaas word.

Van Niekerk sê veldwagters en ander toeriste het gehelp om die buffel te verwilder.

In ‘n ander voorval is ‘n swart veiligheidswag Richard Mashale, deur ‘n seekoei doodgemaak op ‘n plaas naby Phalaborwa in die provinsie.

Die wag is die naweek aangeval terwyl hy aan diens was. ‘n Woordvoerder van die familie, Kenny Mashale sê die seekoei het Mashale aan die kop gebyt.

Mashale het glo slegs ‘n sambok by hom gehad. Die polisie ondersoek die dood.

 

EFF-bloedbad na aanvalle met bakstene, messe en pangas

Chaos het Sondagmiddag uitgebreek tydens die EFF se Noord-Kaap-konferensie, toe lede, gewapen met messe, pangas en bakstene vir ‘n bloedbad gesorg het.

Die konferensie by die Savoy Hotel in Kimberley om die provinsiale leierskap te verkies, het buite beheer geraak toe aangewese partyleier Aubrey Baartman, en ‘n afgevaardigde by die konferensie, Ronald Februarie op mekaar toegesak het.

Saterdag is ‘n klag van aanranding by die polisie gelê na ‘n voorval tussen Baartman en Februarie. Sondag het die polisie bevestig dat ‘n saak geopen is, maar alle navrae na die party self verwys.

Chaos het egter losgebars toe een persoon, geklee in ‘n kamoefleeruniform en gewapen met ‘n skokgeweer, probeer het om soveel mense as moontlik te “skiet” terwyl hulle in alle rigtings gevlug het.

Die vlugtende lede was self gewapen met pangas, messe, bakstene en selfs bierbottels en het teruggekeer na die hotelperseel.

Die voorste deure van die hotel is oopgedwing en bakstene het gevlieg tussen die twee faksies van die EFF, met lede wat probeer het om weg te kruip agter voertuie geparkeer in die pad.

Die voorruit van ‘n bus, wat gebruik is om lede te vervoer na die konferensie, is ook in skerwe gelaat.

Op ‘n stadium, het Februarie uit die gebou gevlug met bloed wat by sy mond uit en oor sy arm stroom. Hy het ook gekoes vir dekking agter motors in die pad.

Binne-in die lokaal was daar nog meer chaos, met afgevaardigdes wat op en af met die trappe en deur die gange hol.

Tafels en stoele is vernietig, sowel as talle binnedeure.

Die bloedbad wat gevolg het, het die matte en die teëls in die gange besmeer. Beide deure na die konferensie sentrum is gebreek en die een ingang is versper met sowat 10 tot 15 stoele wat opmekaar gestapel is.

EFF-lede het beledigings rondgeslinger, afgevaardigdes as verraaiers uitgeskel en mekaar as bedrieërs uitgevloek.

Sowat 10 minute ná die chaos uitgebreek het, ‘n paar polisievoertuie asook veiligheidswagte opgedaag om orde te herstel.

‘n Joernalis is gedwing om dekking te neem en moes die polisie vir hulp ontbied nadat afgevaardigdes probeer het om sy kamera met geweld te neem om hom te verhoed om foto’s van die geweld te neem. Die polisie het uiteindelik het sy kamera geneem om die situasie te ontlont.

Intussen het ‘n EFF-koördineerder, Mabatho Mokause, wat self oor die kop geslaan is met ‘n stoel, Baartman beskuldig van korrupsie en omkopery van afgevaardigdes met R10 000 om vir hom te stem.

 

SA se kinders funksioneel ongeletterd

Teen die tyd dat baie Suid-Afrikaanse leerlinge Graad 4 bereik, is hulle funksioneel ongeletterd, hoofsaaklik omdat hulle nie in Graad 1, 2 en 3 leer lees nie, het City Press berig.

Wat nog meer skokkend is, is dat die meeste van hul onderwysers ook nie lees nie.

‘n Unisa-professor Elizabeth Pretorius het in die studie onthul dat daar geen leeswerk hoegenaamd gedurende of na skool plaasgevind het nie.

Verskeie studies het aan die lig gebring dat leerlinge wat Graad4 verwerf, massiewe leertekortkominge het en nie kan lees of basiese probleme rekenkundig kan oplos nie.

“Een van die sterkste bydraende faktore tot die lae vlakke van geletterdheid was die feit dat baie van die onderrig en leer wat in die grondslagfase plaasgevind het, mondeling gebaseer is,” het Pretorius in die studie bevind, wat in die joernaal Perspectives in Education van Mei gepubliseer is .

“Hoewel mondelinge interaksies belangrik vir taal- en geletterdheidsontwikkeling in die vroeë jare blyk te wees, is dit nie gebalanseer deur vroeë geletterdheidspraktyke nie,” lui die verslag.

“Daar is baie gepraat in die klaskamer… maar baie minder gelees en geskryf.”

“Die kinders het baie min blootstelling aan lees en skryf,” het Pretorius gesê.

Dit het beteken dat hulle die voordrag van woorde en sinne herhaal het sonder om dit te verstaan.

“Die gevolge van hierdie onderrigbenadering is rampspoedig vanuit ‘n geletterdheidsperspektief.”

Een van die probleme wat Pretorius opgetel het was dat onderwysers self nie lees nie.

“Navorsing in Atteridgeville, noord van Pretoria, van meer as sewe jaar het bevind dat 70% van die onderwysers daar nie lees nie, ” het Pretorius in die studie aangedui.

Dr Karin Murris, mede-professor by die Universiteit van Kaapstad se Skool van Onderwys, het Pretorius se bevindinge beaam.

 

Blade wil amokmakers in parlement vasvat

Die hoofsekretaris van die SAKP, Blade Nzimande het ‘n beroep op die ANC as die meerderheidsparty gedoen om strenger op te tree teen oproerige gedrag in die Parlement.

Hy sê indien dit nodig is, moet die reëls in die Parlement en die Provinsiale Wetgewers verander word, het RSG berig.

Nzimande sê hoewel daar diegene is wat die onlangse gebeure in die Parlement vier, moet die ANC strenger optree.

Nzimande het ook die Suid-Afrikaanse Nasionale Redakteursforum – Sanef – ‘n anti-ANC klub genoem.

Hy het dié stelling gemaak in reaksie op Sanef se klagte dat daar ingemeng word met die klank en beeld wat in die Parlement uitgesaai word sodra daar ontwrigtings plaasvind.

Nzimande het Sanef se klagte as absurd beskryf.

Bob se kleinneef dood in kas gevind

Die 20-jarige Zimbabwiese man wat dood aangetref is in ‘n klerekas by Monash Universiteit in Johannesburg was ‘n kleinneef van President Robert Mugabe.

‘n Student in inligtingstegnologie, Takudzwa Wesley Goronga is sowat twee weke geledeas vermis aangemeld.

Hy is later dood aangetref in sy klerekas op die kampus.

Die Zimbabwiese Uitsaaikorporasie het gesê Mugabe het roubeklaers by Goronga se begrafnis aangespreek Saterdag en het die student se dood as ‘n “raaisel” beskryf, het ‘n Sapa-korrespondent berig.

Die Zimbabwiese president, wat twee seuns en ‘n dogter het, het gesê: “Sommige kinders word na die buiteland gestuur vir studies en as hulle terugkeer is dit met ‘n paar negatiewe gewoontes soos om dwelms te gebruik.”

Die polisie is steeds besig om die oorsaak van Goronga se dood te ondersoek.

Die student is glo wat deur familie in Marondera, in die sentrale deel van Zimbabwe grootgemaak, ná die dood van sy ma 10 jaar gelede.

Oorskot van sommige kerkslagoffers land in SA

Gedenkdienste vir die Lagoskerkslagoffers sal oral in die land gehou word.  Die oorskot sal eers na verskillende provinsiale lykshuise geneem word voordat die slagoffers privaat begrawe word.

President Jacob Zuma het vanuit Brisbane in Australië waar hy die G20-beraad bywoon, gesê die ramp het Suid-Afrika verenig.

‘n Diens sal ook Mpumalanga gehou word nadat die liggame amptelik deur die premier van Mpumalanga, David Mabuza in ontvangs geneem is.

Drie-en-twintig inwoners van die provinsie het in die ramp in Lagos omgekom. Vyf van dié liggame is egter nog onder die 11 liggame wat geïdentifiseer moet word.

Al 18 liggame is gister na die Themba Hospitaal naby Witrivier geneem vanwaar dit vandag na die gedenkdiens in Mbombela vervoer sal word.

Die vliegtuig met 74 liggame het Sondag in die land aangekom en ‘n gedenkdiens is daarna op die Waterkloof Lugmagbasis in Pretoria vir die slagoffers en hul families gehou.

Die oorskot is glo by die lughawe behandel teen die oordrag van ebola ten spyte daarvan dat Nigerië as “ebola-vry” deur die Wêreldgesondheidsorganisasie (WGO) verklaar is.

Dié pandemie in Wes-Afrika het in Nigerië aangeland deur die toedoen van ‘n Liberiese diplomaat in Julie.

‘n Werknemer van die departement van gesondheid is intussen glo dood aan malaria.

Pieter Fourie was deel van die mediese ondersteuningspan in Nigerië, het die minister in die Presidensie Jeff Radebe, vroeër verklaar.

Radebe het gesê Pieter Fourie, wat ‘n lid van die mediese span gestuur na Lagos vir die repatriasie van die kerkgebou ineenstorting slagoffers, gesterf het op Vrydag.

Adjunkpresident Cyril Ramaphosa het die seremonie by Waterkloof-lugmagbasis gelei.

Paramedici moes van die gesinslede bystaan toe hulle histeries begin weeklaag het terwyl Cassius Lubisi, direkteur-generaal in die presidensie, die name van die oorledenes voorgelees het.

Die aankondiging is laat Saterdagaand gemaak dat slegs 74 van die 85 liggame van die slagoffers na Suid-Afrika teruggebring sal word, glo weens DNS-toetse wat nog steeds deur die owerhede in Nigerië gedoen moet word.

Die gesinne wag nou al ongeveer twee maande vir die 81 Suid-Afrikaners, waaronder drie Zimbabwiërs en een man van Kongo wat met Suid-Afrikaanse paspoorte gereis het.

Altesaam 116 mense is op 12 September dood toe ʼn gastehuis in Lagos ineengestort het.

Altesaam 26 beseerde Suid-Afrikaners het ʼn maand gelede teruggekom, waarvan 20 reeds uit die hospitaal ontslaan en met hul gesinne herenig is.

‘Regstellende herposisionering van grond’

Julius Malema en sy hordes is nie alleen nie. Die Swapo Jeugliga se geskorste mnr. Job Amupanda het pas aangekondig hy wil grond gryp.

Amupanda wil volgende Vrydag 2 000 aansoeke vir erwe in “die elite buurt” Kleine Kuppe by die Windhoek munisipaliteit indien.

Hy het ‘n beroep op grondlose Namibiërs gedoen om by dié aksie betrokke te raak.

Die munisipaliteit sal agt maande tyd gegun word om die aansoeke af te handel.

Indien hulle nie gehoor gee nie, sal oorgegaan word tot “regstellende herposisionering” van grond in “ryk en gegoede” voorstede soos Kleine Kuppe, Avis, Eros, Auasblick en Klein-Windhoek, sê Amupanda in ‘n verklaring wat vanoggend uitgereik is.

Politieke ontleders is egter dit eens dat mnr. Job Amupanda se skielike bedanking uit die Swapo Jeugliga (SPYL) se nasionale uitvoerende komitee, nie die regerende party se politieke planne op die vooraand van die verkiesing gaan verongeluk nie, het die Republikein berig.

Amupanda, voorheen die jeugliga se sekretaris van inligting, publisiteit en mobilisasie, het bedank. Dié stap volg ná hy eergisteraand met mnr. Nangolo Mbumba, sekretaris-generaal van Swapo, en dr. Elijah Ngurare, leier van die SPYL, asook ander lede van die regerende party, vergader het.

Amupanda het sedert Sondag die tonge laat klap toe hy onwettig ‘n erf in Kleine Kuppe in Windhoek afgesteek het. Dié stap het hy “regstellende herposisionering” gedoop.

Hy gaan homself nie langer ten gunste van lede van die Swapo-party verloën nie, het Amupanda gisteroggend in ‘n verklaring gesê.

Hy het ook uitgevaar teen Swapo-lede wat volgens hom die kluts kwyt is. Amupanda sê hy is nie bereid om soos ’n eerbiedige dienskneg die vrede te bewaar met die hoop dat hy daarvoor vergoed sal word nie.

Pogings is aangewend om hom sover te kry om sy siel te verkoop en na ander se pype te dans, onreëlmatighede mis te kyk, net handjies te klap en liedjies te sing, sê hy.

“Dít kan ek nie toelaat nie. Ek weier om die ander wang te draai soos wat die Bybel ons geleer het. Die situasie het onuithoudbaar geword, soveel so dat die nasionale uitvoerende komitee (van SPYL) iets heeltemal anders geword het as wat ons gedink het,” sê hy.

Amupanda bly egter aan as lid van die sentrale komitee, maar gaan hom voortaan op aktivistiese veldtogte toespits en meer tyd in die nedersettings en landelike gebiede deurbring.

“Ek gaan nou hoofsaaklik op regstellende herposisionering konsentreer en die jeug mobiliseer sodat ons leiers besef hoe ernstig die grondkwessie is en dat oplossings gevind moet word voordat dit te laat is,” se Amupanda.

Op sosiale media het die nuus van Amupanda se bedanking soos ’n veldbrand versprei. Daar is kwaai gegis dat hy gedwing is om van sy posisie afstand te doen.

Mbumba het dit ten sterkste ontken. Slegs “Swapo-kwessies” is tydens Dinsdagaand se vergadering bespreek, het hy gesê.

Intussen meen die politieke ontleder, mnr. Graham Hopwood, dat Amupanda se bedanking geen impak op Swapo se ondersteuners gaan hê nie, aangesien hy steeds deel van die party bly.

“Miskien as hy uit die party bedank en ’n beroep op sy ondersteuners gedoen het om níé die party te steun nie, sou dit ietwat van ’n verskil gemaak het,” het Hopwood gesê.

Hopwood sê die lojaliteit teenoor Swapo lê baie diep en dat stemme nie maklik na ’n ander party geskuif kan word nie. Kiesers gaan ook nie sommer níé aan die verkiesing deelneem nie.

Prof. Bill Lindeke, nog ‘n politieke kenner, sê Amupanda se bedanking is buitengewoon, veral in Swapo. Dit het hom egter ook nie heeltemal verras nie.

“Amupanda het homself meer as een keer in konflik geplaas en is waar­skynlik gevra om te bedank, aangesien hy die party onder verdenking geplaas het. Wat ons nou wil sien, is hoe ver is hy bereid om te gaan,” sê Lindeke.