Suider-Afrika Archives - Page 285 of 888

Bomdreigement derde teen Sanral

‘n Bomdreigement is Sondag ontvang by die Suid-Afrika Nasionale Padagentskap Beperk ( Sanral ) se hoofkantoor in Samrand, naby Midrand.

Dit is die derde dreigement teen Sanral. Die dreigemente spruit vermoedelik voort uit ontevredenheid met die Gautengse e-tolstelsel.

Wetstoepassers sal ondersoek instel na drie dreigemente wat binne ‘n week by Sanral se kantore in Gauteng ontvang is.

Die perseel is verlede week twee keer ontruim nadat ‘n verdagte poeier – wat volgens berigte moontlik antraks kon gewees het – gevind is.

ETC (Elektroniese Tolinvordering) het later berig dat die stof skadeloos is.

Die minister van vervoer Dipuo Peters het die dreigemente veroordeel as pogings om Sanral se werksaamhede te ontwrig.

Sy het ‘n beroep op wetstoepassers gedoen om die skuldiges so spoedig moontlik te vervolg.

Diegene wat geraak is deur die ontvangs van die poeier sal van die nodige aandag en hulp voorsien word in die hantering van die traumatiese ervaring van die afgelope week, het Peters gesê .

Jamie Surkont, die uitvoerende hoof van ETC, het gesê die gebou is Sondagaand deursoek en indien nodig, sal die betrokke dienste na rugsteunpersele verskuif word.

Waterkanon teen stakers ingespan

‘n Waterkanon is glo ingespan teen stakende mynwerkers by Anglo American Platinum (Amplats) se Khuseleka-myn in Rustenburg.

Die Association of Mineworkers and Construction Union (Amcu) het Vrydag gesê die werkers was saamgetrek op die mynperseel.

‘n Koördineerder van Amcu het gesê die situasie is “buite beheer en gespanne” nadat veiligheidspersoneel van die myn sonder enige waarskuwing die werkers met ‘n waterkanon bespuit het.

Hy het gesê die werkers het eers begin klipgooi nadat die waterkanon ingespan is.

Hy het gesê die myn moes Amcu eers in kennis gestel het voor hulle waterkanonne gebruik.

Amcu het Donderdag by Amplats, Impala Platinum en Lonmin begin staak.

Hulle eis ’n maandelikse salaris van R12 500.

Twee ANC-dokters by Raad vir Gesondheidsberoepe aangekla

Twee ANC-dokters gaan by die Raad vir Gesondheidsberoepe (RGSA) weens onetiese gedrag aangekla word weens hul berokkenheid by terreur teen burgerlikes.

Klagtes is teen lt.genl. Veejay Ramlakan, voormalige geneesheer-generaal, en dr. Sibongiseni Dhlomo, KwaZulu-Natalse LUR vir gesondheid, ingedien, het Beeld berig.

Alhoewel die twee in 2001 amnestie by die Waarheid-en-Versoeningskommissie (WVK) gekry vir bomme wat hulle in 1985 in opdrag van Umkhonto weSizwe (MK) geplant het, was hulle destyds in 1985 praktiserende dokters.

Hulle is steeds op die RGSA se rol as mediese dokters geregistreer.

Dr Wouter Basson se straf sal eersdaags bekend word, nadat hy vroeër deur die RGSA aan onetiese gedrag skuldig bevind is.

Ramlakan was ten nouste betrokke by terreur tydens MK se Operasie Butterfly. Hy was ook Nelson Mandela se geneesheer.

Operasie Butterfly het die ANC se gewapende politieke terreurveldtog teen onskuldige burgerlikes gemik deur supermarkte, poskantore en winkelsentrums met bomme te teiken.

Hulle het die bomme glo in opdrag van hul bevelvoerders geplant.

Basson het as hoof van die chemiese en biologiese oorlogvoeringprogram eweneens die opdragte van sy bevelvoerders uitgevoer.

Die WVK het die twee MK-lede se optrede as geregverdig verklaar. “Hulle het dalk roekeloos opgetree en ontploffings veroorsaak waarin mense dood of beseer is.

“Dit is een van die tragedies van ’n vryheidstryd dat daar altyd ongevalle sal wees,” lui die verslag.

Hieruit is dit steeds nie duidelik hoe die Boeremag se optrede nie die WVK se goedkeuring wegdra nie

Die uitvoerende hoof van die RGSA het bevestig dat die klagte teen die twee MK-operateurs ontvang is.

Byna 200 partye registreer by OVK

Honderd-drie-en-tagtig politieke partye het tot dusver by die Onafhanklike Verkiesingskommissie geregistreer met die oog op die komende algemene verkiesing.

Die OVK sê 133 van die partye sal aan die verkiesing deelneem. Die Wes-Kaap het met 25 die meeste partye, terwyl 7 partye uit Gauteng afkomstig is.

Verskeie nuwe politieke partye het die afgelope jaar na vore getree, waaronder die Ekonomiese Vryheidsvegters en Agang.

Die hoofverkiesingsbeampte van die OVK, Mosotho Moepya sê die registrasieproses duur voort.

President Jacob Zuma het nog nie die verkiesingsdatum afgekondig nie. – RSG

DA probeer stemme werf uit geweld in Hoofrifgebied

Die DA het ‘n geleentheid vir stemwerwing raakgesien in South Deep in Roodepoort aan die Wes-Rand nadat een persoon Donderdag doodgeskiet tydens ‘n oproer oor uitsettings.

Die oproerige is na bewering deur die polisie in die bors geskiet nadat inwoners geprotesteer het oor uitsettingsbevele deur Dino Properties wat hul teen die einde van die maand uit hul huise sal dwing.

Tshepo Babuseng is na bewering in die bors geskiet toe hy en ‘n groep oproermakers op ‘n wetstoepassingsbeampte afgestorm het. Hy is dood verklaar met sy aankoms by die hospitaal.

Verlede week het vier mense het gesterf in botsings met die polisie op Brits in Noordwes.

Die inwoners sê hulle het nie ‘n heenkome as hulle teen Vrydag 31 Januarie hul woonplekke moet ontruim nie. Hulle het die strate ingevaar en begin klippe gooi na verbygaande motoriste nadat uitsettingsbevele op hulle beteken is.

Na gister se noodlottige botsing met wetstoepassing, het die ontevrede gemeenskap onder aanmoediging van die DA gesê verteenwoordigers van die regering verwaarloos hulle.

Die wyksraadslid is glo afwesig en daar is kragvoorsieningsprobleme. Dit was nie voorheen geopper nie. Die DA het die dood van die oproermaker en klagtes aangegryp en sal ‘n hofinterdik aanvra om die uitsetting te keer.

Dié party probeer stemme werf deur die gemeenskap se griewe te oorbeklemtoon en hulle tot onverantwoordelike gedrag aan te spoor by monde van die premierskandidaat in Gauteng, Musi Maimane.

Maimane sê hy het die gebied op versoek van van die gemeenskap besoek.

Blankes het grond gesteel sê Westonaria se grondbesetters

Inwoners van Bekkersdal glo grond wat die goudmyn-maatskappy Rand Uranium behoort, kan “wettig” beset word.

Onbeboude grond in Bekkersdal aan die Wes-Rand is gesteel deur blankes, sê die Groter Westonaria se Concerned Residents’ Association.

“Ons vra nie om verskoning vir die grondbesetting nie. Ons glo dit behoort aan ons [swartes]. Dit is gesteel deur die blankes,” het ‘n woordvoerder Mbulelo Koyana gesê.

Hy het gesê dat die regering versuim het om die inwoners te voorsien van huise.

“Toe mense in 1994 gestem het, het hulle nooit geweet dat hulle magteloos sou wees as hulle aan bewind kom nie,” het Koyana gesê.

Nog ‘n gemeenskapsleier het Woensdag gesê: “Die gemeenskap glo die grond behoort regmatig aan hulle. Hulle sê [die besetting] is nie onwettig nie,” het Thabang Wesi aan Sapa gesê.

Die Citizen berig dat meer as ’n duisend inwoners Dinsdag met grawe en pikke opgedaag het om huise te begin bou.

Die proses om die grond “wettig” oor te neem en uit te deel, is ‘n “administratiewe detail”, het Wesi gesê.

Die Citizen het vroeër berig die Westonaria- plaaslike munisipaliteit en Rand Uranium ‘n aansoek om ’n hofinterdik ingedien het teen die onwettige besetting.

Die saak sal Maandag in die Johannesburgse hooggeregshof aangehoor word.

Die munisipaliteit voer aan dat hulle nie die finansiële las kan dra van dienste waarvoor nie beplan of begroot is nie.

Die munisipaliteit sê ook die gebied is vir landbou-doeleindes geskik, aangesien dit geologies onstabiel is en sinkgate daar voorkom.

Wesi het nog nie op die hofstukke gereageer nie.

Veiligheid opgeskerp by platinummyne

Veiligheid by die land se grootste platinummyne in Rustenburg is opgeskerp nadat sowat 70.000 Amcu-lede vanoggend met ‘n onbepaalde staking begin het.

Veiligheidsbeamptes bewaak tans die ingange van die mynskagte.

Duisende werkers sal na verwagting later vanoggend by die Wonderkopstadion stroom waar die president van Amcu, Joseph Mathunjwa die stakers sal toespreek.

Produksie het gisteraand laat tot stilstand gekom.

Werkers het die skagte van die drie groot platinummyne Woensdagaand verlaat en nie vir die vieruurskof opgedaag nie.

Amcu-lede by goudmyne staak nie saam nie, nadat die Arbeidshof Woensdag uitspraak oor die staking voorbehou het.

Cosatu sowel as Fedusa en NACTU het ‘n NEDLAC-konferensie in Pretoria bygewoon om ‘n gesamentlike strategie te formuleer wat vyandigheide tussen vakbonde kan oplos.

Die president van Cosatu, Sduma Dlamini, sê vakbonde moet byeenkom en hulle verskille bylê.

Hy het ‘n beroep op Amcu gedoen om die konferensie by te woon om te fokus op werklike probleme.

Oproer tussen Randfontein en Krugersdorp belemmer verkeer

Betogers het paaie in Roodepoort in Gauteng met klippe en brandende voorwerpe versper en verkeer tussen Randfontein en Krugersdorp word negatief geraak.

Motoriste wat die pad tussen Randfontein en Krugersdorp gebruik, is aangeraai om alternatiewe roetes te oorweeg weens oproer in die gebied.

Voorvalle waar betogers verbygaande motors met klippe bestook het, is aangemeld, volgens Wayne Minnaar, woordvoerder van die Johannesburgse metropolisie.

Die Johannesburgse Metroplisie het motoriste aangeraai om alternatiewe roetes via Albertina Sisulu-, Impala- en Ontdekkersweg te gebruik.

Volgens berigte is die oproermakers by die saamvloei van Main Reef-, Randfontein-, Miles Stoker- en Cemeteryweg saamgetrek.

Minnaar sê die oproerigheid het net ná 05:00 begin en polisiebeamptes is op die toneel.

In Alexandra, Johannesburg, betoog inwoners teen uitsetting.

Llt.kol Katlego Mogale, polisiewoordvoerder, sê plakkers wat ‘n pakhuis beset het kennisgewing ontvang dat hulle uitgesit gaan word.

Hulle het glo vroeg vanoggend motorbande aan die brand gesteek naby ‘n kliniek in Wynbergweg. Die SAPD monitor die situasie.

Bob is terug

Alhoewel hy nie goed lyk nie, is ’n video vrygestel wat toon dat president Robert Mugabe van Zimbabwe nog in lewe is.

Vorige berigte wat in verskeie koerante in Zimbabwe verskyn het, is beweer dat hy reeds oorlede is.

Die bejaarde Robert Mugabe (89), verskyn op ’n video wat die afgelope naweek gemaak is tydens ’n roudiens wat vir sy suster, Bridget, gehou is in sy ampswoning.

Dit blyk dat die president sukkel om regop te sit, en sukkel om wakker te bly. Volgens die opname het sy een been aanhoudend geruk.

Dit is die eerste keer dat hy gesien is in die openbaar sedert sy terugkeer uit Singapoer.

Waarnemers sê sy vakansie in Singapoer was eerder om mediese behandeling te kry.

’n Woordvoerder van Zanu-PF het gesê die adjunk pres. Joyce Mujuru sal waarneem tot einde Januarie vanjaar.

Intussen word verneem dat kandidate hulle reeds posisioneer om president te word, en die grootste mededingers is blykbaar die huidige adjunk, Joyce Mujuru en haar grootste opponent is Emmerson Mnangagwa, ’n voormalige minister van Verdediging.

Bron: Die Vryburger

Steve vandag voor oor spoed

Die mees gewilde Afrikaanse sanger Steve Hofmeyr sal vandag in die Bronkhorstspruit-landdroshof verskyn op aanklagte van roekelose en nalatige bestuur en oorskryding van die algemene spoedgrens.

Tydens ‘n vorige verskyning, het hy gesê hy wil die saak buite die hof skik.

Hofmeyr is op die aand van 19 Desember in Bronkhorstspruit in hegtenis geneem, en is vrygelaat op borgtog van R500.

Gauteng se verkeerspolisie-woordvoerder Busaphi Nxumalo het gesê Hofmeyr is gevang dat hy teen 169kmh in ‘n 80 kmh-sone gery het.

In ‘n verklaring op sy Facebook-blad ‘n dag ná sy inhegtenisneming, het Hofmeyr gesê dit is onverantwoordelik om te jaag.

“Ek gee toe dit was onverantwoordelik en gevaarlik.”

Hy het ook die polisiebeamptes gekomplimenteer wat hom afgetrek het, en hulle beskryf as “vriendelik, professioneel en deeglik” en diegene wat aan diens was bedank.