Kategorie: Suider-Afrika

Suid-Afrikaanse nuus, d.w.s. sowel nuus uit Suid-Afrika én Suider-Afrika.

African Bank se uitspattige baas skielik oorlede

Omstrede voormalige hoof van risiko by African Bank, Tami Sokutu, is by sy huis in Kaapstad op die ouderdom van 53 ná ‘n kort siekbed oorlede, het die Sunday Times berig.

Sokutu, het opslae gemaak verlede jaar met sy opmerking “fok die armes” in die nasleep van die bank se probleme.

Die SA Reserwebank moes in Augustus 2014 instaan om African Bank te red, hoofsaaklik weens slegte skuld.
 
Sokutu het by dieselfde geleentheid gespog oor sy persoonlike rykdom, sy drie huise in Suid-Afrika, een in Portugal en ‘n vloot van luukse motors.

Hy is in die Sunday Times destyds aangehaal waar hy oor die bank se kliënte gesê het: “Fok hulle fok hulle”. Die bank het aan baie swartes lenings toegestaan wat nie kon bekostig om dit terug te betaal nie.
 
Hy het reeds meer as R50 miljoen in aandele-opsies en R35 miljoen aan salaris en bonusse verdien toe hy by die bank in Februarie verlede jaar bedank het.
 
Sokutu is naby Mthatha gebore. Hy het aan die Universiteit van Kaapstad studeer, en ‘n magistergraad in 1992 behaal. Hy het ook studies aan Wits Business School en Harvard voltooi.
 
Sokutu het in 2002 by African Bank aangesluit is ‘n jaar later op die direksie aangestel.
 

Koeberg sukkel weens tegniese probleme

Die Koeberg-kernkragsentrale het die helfte van sy opwekkingsvermoë – sowat 900 megawatt – weens ‘n tegniese prbleem verloor.

Eskom se woordvoerder, Khulu Phasiwe sê ‘n transformator het glo onklaar geraak wat die kragvoorsiener genoop het om eenheid-een van die netwerk te ontkoppel.

Hy sê die netwerk is tans stabiel maar het nie die moontlikheid van beurtkrag uitgesluit nie.

Phasiwe sê instandhoudingswerk sou vanaf 9 Februarie op Koeberg se Eenheid Een gedoen word.

Hy sê hulle vergader om 07:30 Maandagoggend waar vasgestel sal word of onderhoudswerk vroeër kan begin.

VN ondersoek Namibiese bande met Noord-Korea

Namibië se skending van Resolusie 1718 van die Veiligheidsraad sal aanstons amptelik deur die VN ondersoek word, het die Republikien berig.

Agt deskundiges is in 2009 ingevolge resolusie 1874 aangestel met die mandaat om alle sanksies wat die VN teen Noord-Korea ingestel het, te monitor en inligting van lande wat in gebreke bly om aan die vereistes van die sanksies te voldoen, in te samel en te ontleed.

Die ondersoek kom ná ‘n berig wat op 8 Januarie in die Republikein verskyn het oor Namibië se bande met die Noord-Koreaanse maatskappy Korea Mining Development Trade Corporation (KOMID), wat onder die alias Mansudae Overseas Project Group of Companies (M.O.P.) in die land sake doen.

Republikein het betroubaar berig dat ’n amptelike brief waarin die ministerie van buitelandse sake gevra sal word om te verduidelik en oop kaarte met die VN ondersoekspan te speel, eersdaags gestuur sal word.

Vanweë die internasionale sanksies teen KOMID registreer die onderneming telkens ’n nuwe alias waaronder sake gedoen word. In Namibië het die maatskappy onder die naam van sy alias, Mansudae Overseas Project Group of Companies, onder meer die heldeakker, die nuwe Staatshuis (2008) en die Gedenkmuseum vir Onafhanklikwording (2011) gebou.

Wat nog meer kommerwekkend is, is dat die einste maatskappy nou besig is om ’n fabriek vir die vervaardiging van ammunisie by Luiperdsvallei op te rig.

Ingevolge die resolusie moet lidlande van die VN alle oorsese bates van individue en maatskappye betrokke by Noord-Korea se ­wapenprogramme vries. ’n Internasionale reisverbod is ook op werknemers van hierdie programme en hul families ingestel.

KOMID is een van die maatskappy wat in die bylaag tot resolusie 1718 by die naam genoem word.

“Dit word van alle lidlande van die VN verwag om die maatreëls wat hulle instel om te voldoen aan die bepalinge van die resolusie, binne 30 dae aan die Veiligheidsraad te rapporteer,” lui die resolusie.

Uit regeringskringe is nie vóór of nadat die berig geplaas is, ’n enkele woord gerep nie. Verskeie navrae na die skakelafdeling van die ministerie van buitelandse sake vir die regering om sy kant van die saak te stel en enige moontlike verduideliking te verstrek, het geen vrugte afgewerp nie.

Selebi was ‘n ‘galante terroris’: minister

Die veroordeelde misdadiger en oudterroris Jackie Selebi is gister met volle eerbewys vanuit die reuse-NG Kerk Moreleta begrawe met die minister van vervoer Dipuo Peters wat sy rol in die “oorwinning oor apartheid” geloof het.

Sy het oor die omstrede polisiekommissaris wat sy bande met georganiseerde misdaad as’t ware gereklameer het, gesê: “Deur die SA Youth Congress (Sayco) was kameraad Jackie deel van al die forums van die ANC… wat die ondergang van apartheid (en die Afrikanerregering) beplan het.”

“Ek staan hier as verteenwoordiger van die jeug wat die aflosstok by Selebi oorgeneem het.”

Selebi was een van die marionette wat deur die Sweedse regering in weelde oorsee onderhou is om terreur in Suid-Afrika tydens die tagtigerjare aan te stig.

Volgens Dipuo Peters het Selebi ‘n rol daarin gespeel om te verseker dat jong swart geweldenaars in Suid-Afrika met die sogenaamde “jeug in ballingskap” saamwerk om die land op sy knieë te bring.

Sy het gespog oor die hoeveelheid geld wat die Sweedse regering, asook die Wêreldraad van Kerke, aan hul ANC-terreurgroep onder leiding van die Litaus-gebore Joe (Yossel Mashel) Slovo geskenk het. “Dit was nie kleingeld nie,” het sy in die NG Kerk Moreleta gesê. Selebi het gesorg dat die skoleboikotte in Suid-Afrika befonds en opgestook word.

“Hy was ‘n galante terroris,” het Peters gesê terwyl sy die eufemisme “vryheidsvegter” gebruik.

Selebi is op omstrede wyse uit die gevangenis op mediese parool vrygelaat, nadat hy aanvanklik op 3 Augustus 2010 tot 15 jaar tronkstraf weens korrupsie gevonnis is. Ten tye van sy dood was hy 64. Na bewering het hy aan suikersiekte en nierprobleme gely.

Onder andere het Selebi omkoopgeld van die veroordeelde misdadiger Glenn Agliotti aanvaar.

Die hoofstroommedia in die land berig vandag op ‘n kruiperige toon oor Selebi se begrafnis.

Eugene de Kock kry parool, CDL sit

Voormalige Vlakplaas bevelvoerder Eugene de Kock sal op parool vrygelaat word, het die minister van justisie, Michael Masutha Vrydag gesê.

Die voormalige polisiekolonel, ook bekend as “Prime Evil” is deur die ANC geloof toe hy ander oud-lede daarvan beskuldig het dat hulle nie verantwoordelikheid vir apartheidsveiligheid wil neem nie. Hy het gesê oudlede het “nie die ruggraat om op te staan en verantwoordelikheid te neem nie”.

Clive Derby-Lewis, wat skuldig bevind is aan die moord op die SAKP-leier Chris Hani, sal egter nie op mediese parool vrygelaat word nie, Masutha gesê.

Die 79-jarige Derby Lewis wat longkanker het, dien lewenslange tronkstraf uit vir sy rol in die moord op Hani. Die SAKP en die Hani- familie is gekant teen die aanbeveling dat Derby-Lewis op parool vrygelaat word.

“Daar is niks om te wys dat mnr Derby-Lewis se toestand sodanig is dat hy fisies onbevoeg is nie… genoeg om sy daaglikse aktiwiteit te beperk nie.”

‘n Aanbeveling dat Derby-Lewis op mediese parool vrygelaat word, kan dus nie goedgekeur word nie, het Masutha verklaar.

News24 verhef Max tot stryder vir nuwe ANC-faksie

Andrew Trench, hoofredakteur van News24, het die afgeleefde Boerehater Max du Preez Donderdag in verklaring geloof. “Sy reputasie vir die waarheid, sy passie vir persvryheid en sy kaliber joernalistiek maak hom een van die bestes, en presies die soort mening wat ons by News24 wil hê.”

Du Preez beskik juis nie oor enige van die bogenoemde kwaliteite nie. Hy het onlangs in ‘n onderhoud prontuit verklaar dat ondersteuners van ‘n veldtog teen plaasmoorde moet “fokof en doodgaan”.

Hy sal by News24 aansluit om ‘n weeklikse rubriek te skryf op Dinsdae.

Du Preez het gesê dit is ‘n “voorreg” om vir News24 te skryf. Hy is bekend vir sy beheptheid met die “regse wit gevaar” wat hy namens sekere rolspelers aanwend om invloed in die ANC te bekom.

Hy is kennelik aangestel om die anti-Zuma-faksie in die ANC in Gauteng by te staan, alhoewel hy tans voorgee om anti-ANC te wees.

Du Preez het onlangs uit die Independent Media-groep bedank omdat hulle nie sy kruistog teen president Jacob Zuma wou ondersteun nie. Hy het gesê die maatskappy het ‘n verskoning gepubliseer na een van sy rubrieke om in Zuma se goeie boekies te bly.

Die presidensie het die rubriek as “rassisties” beskryf. “Die stuk getuig van vooroordeel en rassisme gegewe die wyse waarop mnr. Du Preez die president beskryf het.”

Du Preez het voorheen aan die Noord-Kaapse Rooivleisprodusente-organisasie se kongres in Kimberley gesê sake sal eers begin verbeter wanneer Zuma nie meer president is nie. Zuma kan teen 2017 uit die kussings gelig word.

Hy het gesê dat die ANC-regering onder pres. Jacob Zuma het met die aanstelling van Senzeni Zokwana as landbouminister en Gugile Nkwinti se heraanstelling as grondsake-minister gewys hulle is “nie ernstig oor landbou en grondhervorming nie”.

Andrew Trench wat toegesien het dat The Witness in Durban sluit, is glo aangestel as redakteur van News24.com deur die toedoen van ANC-sikofant Jannie Momberg, wat in beheer van Nuus24 se Afrika-bedrywighede staan.

Geoff Cohen is die algemene bestuurder van 24.com, Afrika se grootste aanlynplatform en die tuiste van News24.

Plaaswag-eienaar kry swaarste vonnis

Rudolf Struwig (51), eienaar van ʼn plaaswagonderneming, is Donderdag in die Pietermaritzburg hooggeregshof twee keer lewenslank gevonnis vir die moorde op twee swart plaaswerkers.

Die swart werkers was glo “moeilikheidmakers”. Regter Igna Stretch het die swaarste vonnis oor Struwig uitgespreek.

Trevor Ndlovu is in Junie 2004 in Howick geskiet en is weke later in ‘n hospitaal in Pietermaritzburg dood. Mandla Masango is in Oktober 2004 op ‘n Balgowan-plaas doodgeskiet.

Die huurmoordenaar Lucky Mlangeni het in 2009 skuldig gepleit op albei moorde en is tot lewenslange tronkstraf gevonnis. Hy het in die Struwig-saak vir die staat getuig.

Stretch het gesê daar is geen oortuigende redes waarom Struwig nie die voorgeskrewe vonnisse opgelê moet word nie. Sy het gesê vergelding en straf moet voorrang geniet oor sy rehabilitasie omdat hy nie berou toon nie.

Sy het bevind Struwig was die middelman vir boere wat van die slagoffers ontslae wou raak.

Struwig het skuld ontken.

ANC ignoreer AgriSA oor grondplafon

Agri SA sê hulle is “teleurgesteld” met die ANC se aankondiging dat ‘n grondplafon-plan ingestel gaan word om grondbesit tot een of twee plase van altesaam 12 000 hektaar te beperk.

Agri SA se adjunkpresident, Dan Kriek, sê dit is onverstaanbaar waarom hierdie aankondiging gedoen is, terwyl landbourolspelers vroeër tot Maart tyd gegee is om insette hieroor te lewer.

Hy sê die grondplafon-plan strook ook nie met die model in die Nasionale Ontwikkelingsplan waarvolgens groter boere sal help om nuwe boere te vestig nie.

Dit is nie duidelik of die ANC intussen afgesien het van dié grondhervormingsmodel nie.

Kriek sê Agri SA het destyds in grondsakeminister Gugile Nkwinti se Nasionale Verwysingsgroep, Nareg, standpunt ingeneem dat grondplafonne nie kan werk nie.

Die grondplafon-aankondiging is ook onverstaanbaar in die lig van Agri SA se raamwerkvoorstelle vir sinvolle grondhervorming wat verlede jaar op die Agri SA-kongres deur Nkwinti verwelkom en aanvaar is en waaroor daar steeds samesprekings is, sê Kriek.

Die Amerikaanse miljardêr Bill Gates, is een van die voorstanders van kleinskaalse boerdery in Afrika.

Biltong is ‘n ekonomiese bielie

Biltong beteken vir die Suid-Afrikaanse ekonomie jaarliks meer as R2,5 miljard.

Dit blyk uit navorsing deur die Noordwes-Universiteit.

Melville Saayman sê die studie het die gewildheid en waarde van biltong en wildsvleis probeer bepaal.

Vyf-en-dertig persent van die respondente het aangedui dat kudu die gewildste wildsvleis is, gevolg deur springbok, impala, eland, wildebees, blesbok en volstruis.

Gemsbok was vir vyf persent van die deelnemers aan die studie die gewildste en vlakvark, vir slegs een persent.

Saayman sê dit is nou tyd vir biltong om ‘n rolspeler in die internasionale mark te word.

Plaasaanvallers gefnuik

Vyf verdagtes van Potchefstroom in Noordwes sal vandag in die plaaslike landdroshof verskyn nadat hulle ‘n plaashuis by Viljoenskroon in die Vrystaat wou aanval.

Die boosdoeners is egter in hul spore gestuit.

Polisiewoordvoerder in die Vrystaat, Thabo Litabe, sê die polisie het inligting ontvang dat die vermeende plaasaanvallers, tussen die ouderdomme van 21 en 39, vandag ‘n plaas sou aanval, maar die polisie het nie geweet waar presies nie.

Volgens Litabe is polisielede op verskeie plekke tussen Potchefstroom en Viljoenskroon ontplooi.

Vuurwapens en ‘n huisplan is in die verdagtes se motor buite ‘n kroeg gevind.

Die polisie kon later vasstel waar die plaashuis geleë is. Die verdagtes sal op aanklagte van die onwettige besit van vuurwapens en sameswering tot huisbraak verskyn.