Kategorie: Suider-Afrika

Suid-Afrikaanse nuus, d.w.s. sowel nuus uit Suid-Afrika én Suider-Afrika.

Opposisie se Nkandla-veldtog stort in duie

Die parlementêre adhoc-komitee oor Nkandla het president Jacob Zuma in sy voorlopige verslag kwytgeskel van enige ongerymdhede met die opgraderings by sy privaat woning.

Mathole Motshega sê die “pay-back-veldtog” deur opposisie partye het in duie gestort.

Opposisiepartye het daarop aangedring dat die president ‘n gedeelte van die geld wat op Nkandla se opgraderings spandeer is, terugbetaal.

Maar Woensdag het die ANC die Wes-Kaapse hooggeregshof se beslissing tussen die DA en die SABC-voorsitter in die opposisie se neuse gevryf oor Nkandla.

Luidens die beslissing strek die magte van die Openbare Beskermer, Thuli Madonsela, nie so ver as wat die DA beweer tov Nkandla nie.

Die hof het bevind dat die remedieerende optrede deur die Openbare Beskermer nie bindend is nie.

Die ANC-lid van die komitee, Motshega is van mening dat die hofuitspraak die komitee se bevindinge regverdig.

“Die uitspraak sê as die Grondwet in die vooruitsig gestel het dat die remedieerende optrede van die Openbare Beskermer bindend moet wees, sou dit so gesê het. Dit sê nie so nie en die Wet op die Openbare Beskermer sê ook nie so nie.”

“Die terugbetaalveldtog het dus in duie gestort as gevolg van die hofbevel en die briewe wat geskryf is [deur Madonsela], het hul geldigheid verloor. So ek is bly dat die regbank van hierdie land ons regtig behoorlik gelei het. Ons sal in staat wees om vorentoe te beweeg met spoed sonder enige verwarring van enigiemand se kant.”

Die komitee wat slegs uit ANC-lede bestaan nadat die opposisie uit die komitee gestap het, het weer begin om sy voorlopige verslag te bespreek.

‘n Komiteelid, Mamoloko Kubayi, sê president Zuma was nie deel van ongerymdhede nie, maar dat die argitek van die projek, Minenhle Makhanya, onreëlmatig aangestel is.

Hy sê dit is duidelik dat die president nie die opgraderings versoek het nie.

Berigte oor ebola-slagoffer in Durban misleidend

Die Nasionale Instituut vir Oordraagbare Siektes sê berigte dat ‘n ebola-slagoffer in Durban aangemeld is, is misleidend.

Volgens die Instituut is die man se simptome nié dié van ebola nie, hy is voorts nooit daarvoor getoets nie en is ook nie opgeneem nie.

Luidens verskeie berigte is ‘n man vir toetse vir die ebola-virus in Durban se Addington-hospitaal opgeneem.

Daar is berig dat die man tyd in Sierra Leone deurgebring het, een van die state in Wes-Afrika waar die pandemie uitgebreek het.

Dié nuus het konsternasie by die hospitaal veroorsaak.

Die man werk as ‘n vlootbestuurder vir ‘n maatskappy in Sierra Leone en daar is volgens die Instituut geen risiko dat hy aan die virus blootgestel is nie.

Oogetuie vertel hoe metropolisie wit mans mishandel

‘n Ooggetuie van die inhegtenisneming van twee wit mans Saterdag by Zitapark in Garsfontein, Pretoria, tydens een van die mans se dogter se verjaarsdagpartytjie, sê sy sal nooit vergeet hoe dié tienjarige meisietjie histeries vir haar pa geskreeu het nie.

“Ek was baie bang en haar angsgille sal altyd by my spook,” sê Carmen Goodrich van Villeria.

Goodrich en haar familie het haar ouma se verjaarsdagpartytjie by die park gehou toe Chris De Lange en David Du Plessis deur vier swart metropolisiebeamptes in hegtenis geneem is.

“Die beamptes was baie arrogant en intimiderend en het die man (De Lange) klaarblyklik ‘n harde tyd gegee,” sê Goodrich.

“Dit was onnodig om die twee mans voor hul kinders, maatjies en ‘n klomp ouers in hegtenis te neem,” sê sy.

“Almal was duidelik getraumatiseer, insluitend my eie ma, en ek voel die beamptes kon beter opgetree het.”

Goodrich sê hulle het gesien hoe iemand wat by die park werk haastig ná die arrestasie rooi kleefband oor die kennisgewingbord wat aandui dat honde daar toegelaat word, aanbring.

De Lange en sy vrou, Sonja, het Maandag gaan foto’s neem van die bord wat nou aandui dat honde nie daar mag wees nie.

Op die webtuiste pretoriafordogs.co.za, wat plekke in Pretoria aandui waar mense met hul honde kan stap, is Zitapark gelys.

Daar is selfs foto’s op dié blad van honde wat langs die swembad baljaar.

Die getraumatiseerde wit klaers  behoort onverwyld ‘n klag by SAPS in te dien asook ‘n siviele eis teen die stadsraad instel, meen regslui.

In die video is dit uiters verdag dat ‘n wit man wat geen oortreding begaan het nie, op dié wyse hardhandig in hegtenis geneem is met brute krag en kragwoorde.

Senior Superintendent Isaac Mahamba, metropolisiewoordvoerder, sê die Tshwane metropolisie is in besit van die video, maar dat die beeldmateriaal van só aard is dat dit hulle nie toelaat om al die gebeure voor en ná die voorval te sien nie.

Hoewel ons vir dié rede nie kan vasstel of die beampte korrek of verkeerdelik opgetree het nie, is ons baie bekommerd oor die vulgêre taalgebruik wat gehoor kan word,” sê Mahamba.

Oproer by platinummyn onder beheer

Gewelddadige oproer naby die Bokoni-platinummyn buite Burgersfort in Limpopo is volgens die polisie onder beheer gebring.

Inwoners het vroeër twee huise en ‘n motor van ‘n plaaslike hoofman aan die brand gesteek.

Ontstoke inwoners beskuldig die hoofman daarvan dat hy die myn toestemming gegee het om in die omgewing aktief bedrywighede te begin.

Oproermakers het ook myntoerusting aan die brand gesteek.

Oproeriges het die dood van ‘n inwoners wat vermoedelik na skietwerk by die myn deur ‘n klip getref is, maande gelede, as verskoning gebruik om op ‘n vernietigingstog te gaan.

Hulle sê die mynbestuur het sedert die ongeluk nog nie met hulle geskakel nie.

Byna 170 oortredings tydens Poskantoorstaking

Die minister van Telekommunikasie, Siyabonga Cwele, sê byna 170 sake is by die polisie aangemeld vir misdade wat tydens die staking gepleeg is.

Die onwettige tweemaandelange staking deur werkers wat vaste aanstellings en verhogings eis, het die Poskantoor feitlik op sy knieë gedwing.

Die misdade sluit ondermeer gevalle van kwaadwillige saakbeskadiging, intimidasie en aanranding in.

Cwele het in die Nasionale Vergadering van die parlement op ‘n vraag gereageer.

Die minister sê diegene wat die meeste deur die staking geraak word, is die armes, maar sakeondernemings het swaar gely onder die staking aangesien talle van duur koerierdienste moes gebruik maak.

Cwele pogings om die Poskantoor en die vakbondleiers te oorreed om tot ‘n vergelyk te kom sal voortgaan sodat werkers kan terugkeer werktoe.

Vakbondleiers het vroeër hulle looneis van 15 persent tot 7,5 persent afgeskaal.

Die Universiteit van Suid-Afrika het ondanks die staking ononderbroke dienste ontvang.

UNISA is een van die Poskantoor se grootste kliënte.

Cwele het gesê die Poskantoor het met die hulp van UNISA stelsels in plek gestel om te verseker dat die Unisastudente hulle pos en studiemateriaal ontvang.

Dit is veral belangrik vir studente wat eksamen gaan skryf dat hulle hulle werkstukke ter voorbereiding van die eksamen betyds ontvang.

Die minister het ook gesê die Departement en die Poskantoor sal voortgaan om met ander groot rolspelers en instellings wat swaar leun op die Posdienste, in gesprek te tree.

Dan Roodt neem deel aan SABC3-program oor ‘rassisme’

Dr Dan Roodt was Dinsdagmiddag die enigste wit gas op ‘n geselsprogram op SABC3 oor rassisme.

Roodt is genooi om saam met vyf swart deelnemers waaronder Eusebius McKaizer en Ndumiso Ngcobo op 3Talk saam met Noeleen Maholwana-Sangqu te verskyn.

As die enigste wit gesig is Roodt van meet van aan as die “rassis” uitgekryt deur die res, maar hy het die deelnemers gemaan om nie in vervoering te raak oor ingevoerde Amerikaanse idees nie.

Volgens Roodt word swartes in die VSA nou in stede soos New York “ebolas” genoem en twee swart kinders uit Senegal het die week in die hospitaal beland nadat hulle deur wittes aangerand is. Daarom is die VSA met sy obsessie oor “rassisme” kwalik die land van waar Suid-Afrika lesse behoort te neem.

Eusebius McKaiser het erken dat hy as kleurling ‘n “rassistiese opvoeding” gehad het omdat sy ma vir hom dikwels gesê het hy “moet die gordyn toetrek as hy aantrek want die Bantoes kyk vir jou”.

Op ‘n stadium het die deelnemers daaroor gedebatteer of ‘n blanke ook ‘n Afrikaan kan wees, op aandrang van Sebenzile Nkambule, ‘n aanbiedster van Radio 702. Volgens haar kan slegs ‘n swartmens ‘n “Afrikaan” wees. Die programleidster Noeleen Maholwana-Sangqu het egter die idee verdedig dat Roodt insgelyks, as Afrikaner, ‘n “Afrikaan” sou wees.

“Jy is mos ‘n Afrikaan?” het sy aan hom gevra.

“Ja, beslis, ek is ‘n Afrikaan,” het hy geantwoord. Hy het egter die gehoor daaraan herinner dat daar 80 miljoen mense in Egipte is wat nie swart is nie, en erg in die gesig gevat sou voel indien hulle nie ook as boorlinge van Afrika gereken word nie.

Nkambule het aanhou sê dat slegs swartes Afrikane kan wees.

Heelwat Twitter-boodskappe oor die debat het gisteraand en vanoggend gevlieg. Onder andere het Zelda La Grange, die voormalige sekretaresse van Nelson Mandela, aan Eusebius McKaiser getwiet dat Roodt nie “eerlik was nie”:

Hierop het Roodt haar geantwoord:

Humeure vlam na wangedrag-bevindinge teen EFF

Humeure het opgevlam en stemme het opgegaan Dinsdag met die EFF se dissiplinêre verhoor, toe die party se 20 LP’s se wangedrag tydens die chaotiese Nasionale Vergadering se sitting in Augustus bespreek is.

Twee EFF-perlementslede het uitgestap uit protes nog voor die slotbetoë van die Bevoegdhede- en Voorregtekomitee gehoor is.

Die bruin advokaat, Randal van Voore, het bevind dat sommige van die 20 EFF-lede hulle in die Nasionale Vergadering tydens President Zuma se antwoordsessie aan growwe wangedrag skuldig gemaak het.

Van Voore is aangestel as die getuienisleier in die Parlement se wangedragverhoor teen die EFF-parlementslede.

Hy het sy verslag van meer as 170 bladsye voltooi en sy betooghoofde uitgestippel nadat vyf getuies in die verhoor getuig het.

Van Voore het gesê daar kan min twyfel wees dat die agbare lede presie geweet het wat van hulle verwag word en doelbewus en opsetlik geweier het om die Speaker se instruksies te ignoreer.

Hy het gesê sy verslag is ‘n stel feite wat nie tot sommige lede sal spreek nie, maar feite bly feite al is hulle ongerieflik.

Swart SA miljardêr skenk miljoene teen ebola

Die mynmaatskappy African Rainbow Minerals, A.R.M, het bevestig dat die sakemagnaat, Patrice Motsepe, meer as tien miljoen rand aan die Ebolafonds in Guinee geskenk het om te help om die siekte in Wes-Afrika te bestry.

Die skenking van een miljoen Amerikaanse dollar is namens die Motsepestigting en A.R.M gedoen, waarvan Motsepe die uitvoerende voorsitter is, het RSG berig.

A.R.M sê die nodige regulatoriese toestemming wat gister verkry is sal Guinee van hulp wees met kliniese bestuur, maatskaplike mobilisering, mediese koördinasie en ander belangrike meganismes om die siekte te beheer.

Ebola het volgens amptelike syfers reeds die lewens van bykans vyfduisend mense in veral Liberië, Guinee en Sierra Leone geëis.

Huishulp vlug na sy baba mishandel

‘n Swart huishulp is op op vrye voet nadat haar werkgewers op geslote kringtelevisie gesien het hoe sy hulle 15-maande-oue baba mishandel.

Norwood se polisiewoordvoerder, konst Nonzwakazi Tsoanyane, sê volgens die ma, het sy en haar man besluit om hul huis te monitor nadat hulle agterdogtig geraak het.

Tot hul stomme verbasing het hulle gesien hoe die huishulp hul 15-maande-oue babadogtertjie met ‘n hanger slaan.

Die ma het gesê sy kon haar oë nie glo toe die huishulp die kind met ‘n hanger bydam nie.

Dit was nie die enigste geval van swak hantering van haar kind nie, sê sy. Die ouers beweer sy was nalatig as werknemer wat na die kind moes omsien.

Volgens die ma het die kind selfs sonder toesig gespeel met die water in die toilet.

Sy het gesê die laaste strooi was toe die huishulp die vloerpolitoer laat oopstaan het en die kind daarvan geëet het. Die kleinding het ook munte ingesluk.

Al verweer van die huishulp was dat sy “jammer” is.

Volgens die moeder het die huishulp een keer haar kind op die kop geslaan met die koord van ‘n strykyster.

Die ouers het ‘n klag by die Norwood-polisiestasie gelê.

Plastieksakheffing bring R1 miljard in

Die totale omvang van geld wat ingesamel is sedert die bekendstelling van die plastieksakheffing in 2003 tot Augustus vanjaar is R1,1 miljard, het die minister van finansies, Nhlanhla Nene die parlement verklaar.

Tot dusver vanjaar is R42 miljoen ingesamel.

Die minister het erken dat slegs ‘n fraksie van die geld wat ingesamel is na die departement van omgewingsake gekanaliseer word. Oor die afgelope 10 jaar R215 miljoen aan die departement gegaan.

Hy het verduidelik dat alle geld wat deur die nasionale regering ingesamel word – insluitend alle belasting inkomste – word gedeponeer in die Nasionale Inkomstefonds, soos vereis deur die Grondwet.

Die heffing is ingestel op 3 sent per sak in 2004, betaalbaar deur plastieksakvervaardigers en invoerders. Dit het tot 4 sent per sak in April 2009 gestyg en aan die begin van April 2013 het dit gestyg tot 6 sent per sak.

Die plastiekinkopiesakheffing is ingestel deur die destydse minister Valli Moosa in 2004 as ‘n meganisme om die probleem van plastieksakke te bestuur, wat as die wind waai, heinings, bome, of in die oop veld ontsier en as rommel rondwapper.

‘n Artikel 21 nie-winsgewende maatskappy Buyisa-e-Bag is gestig om plastieksakherwinning te bevorder.

Hierdie maatskappy het is gelikwideer in 2010/11 en en die departement van omgewingsake het die projekte en programme oorgeneem.

Die ingrypings het die gebruik van plastieksakke van tussen 45 en 75% ingekort. Voorheen is ongeveer 10 miljard sakke as rommel gestort.