Zuma vra VN om Palestynse kwessie op te los

President Jacob Zuma sê die mislukking van die Verenigde Nasies om die Israel-Palestynse konflik op te los, het die oproep vir die hervorming van die VN se Veiligheidsraad verskerp. Hy het die Algemene Vergadering van die VN in New York toegespreek.

President Jacob Zuma het die rol van die Verenigde Nasies in die ondersteuning van die stryd van selfbeskikking en vryheid as “merkwaardig” beskryf. Hy het Suid-Afrika as ‘n skitterende voorbeeld uitgesonder.

Zuma het gesê Suid-Afrikaners is bewus van ‘n historiese en morele verantwoordelikheid in die globale stryd teen rassisme, rassediskriminasie en ander vorme van onverdraagsaamheid.

Hy het na die Durban-verklaring verwys as die “primêre raamwerk” in die stryd teen rassisme.

Hy het gesê Suid-Afrika sal daarom voortgaan om die stryd vir vryheid en selfbeskikking te ondersteun vir die Palestyne en Wes-Sahara wat steeds onder kolonialisme gebuk gaan.
  
Hy het daarop gewys dat die Israeli-Palestynse kwessie een van die oudste items op die VN-agenda is, maar geen vordering toon nie.

Zuma het die onlangse “verwoestende konflik wat ‘n humanitêre krisis van skokkende afmetings gelaat het” skerp veroordeel.

Hy het gesê die Palestyne is dakloos gelaat, met geen mediese geriewe, geen veilige drinkwater, en geen sorg vir die gewondes nie, na die vernietigende militêre optrede deur Israel.

Twee Maties ondersoek wat hulself swart geverf het

Die Universiteit Stellenbosch het ‘n ondersoek geloods teen twee Maties-studente wat hulself Saterdagaand vir ’n partytjie swart geverf het.

Die voorval het Dinsdag oudergewoonte ‘n storm onder politiek-korrektes veroorsaak.

Twee studente van die Universiteit van Pretoria het hulself vroeër vanjaar swart gesmeer en as twee huisbediendes by ‘n partytjie opgedaag.

Die twee vrouestudente is daarna uit ​hul koshuis geskors.

Die US-studenteraad het in ‘n verklaring ook die voorval ten sterkste afgekeur. Die US-bestuur sal stappe teen die twee oorweeg.

Dié twee studente, Mark Burman en Ross Bartlett, het hul liggame Saterdag swart gesmeer en soos die tennissterre Serena en Venus Williams na ’n 21ste verjaarsdagpartytjie gegaan.

Die universiteit het in ’n verklaring bevestig dat die twee betrokkenes wel Maties-studente is.

Polisie se vuurwapenregister in chaotiese toestand

Terwyl die jongste misdaadstatistieke toon dat veral geweldmisdade “onaanvaarbaar” hoog is, veroorsaak algehele chaos by die sentrale vuurwapenregister (SVR) dat die polisie bykans geen beheer oor vuurwapens het nie.

Die parlementêre portefeuljekomitee oor polisiesake was gister geskok toe hul besoek aan die sentrale vuurwapenregister (SVR) in Pretoria aflê. Stapels onverwerkte lêers in die gange, op tafels en kantoorvloere het hulle begroet, ‘n toneel wat deur sommige LP’s as ‘n “brandgevaar” beskryf is.

Dít terwyl lede van die publiek desperaat is om vuurwapenlisensies te bekom en die polisie se eie onlangse misdaadstatistieke ‘n onrusbarende styging in moord, gewapende roof en motorkapings toon. Oor die afgelope jaar is daar 17 068 mense in die land vermoor, een van die hoogste syfers ter wêreld en selfs hoër as ander lande met veel groter bevolkings as Suid-Afrika.

‘Geen rekord van 100 000’e wapens uit tuislande’

‘n Verdere onthulling is deur generaalmajoor Bransby Luke, die waarnemende bevelvoerder van die sentrale vuurwapenregister (SVR), gemaak toe hy bevestig het dat honderdduisende wapens wat in die voormalige tuislande gelisensieer is, nooit na die sentrale register oorgedra is nie. Luke het gesê: “Ons weet nie wat van daardie wapens geword het nie.”

Die rede waarom die SVR tans oor ‘n “waarnemende hoof” beskik, is omdat die vorige hoof van dié eenheid “weens korrupsie in die pad gesteek is”.

‘Stank van urine en ontlasting’

Van die werknemers by die eenheid het by lede van die portefeuljekomitee gekla oor die stank van urine en ontlasting as gevolg van plakkers buite die gebou. Hulle word insgelyks deur rotte en voëlluise lastig geval.

Nog ‘n feit wat onder die portefeuljekomitee se aandag gekom het, is die 39 000 polisiemanne wat self oor geen bevoegdheidsertifikate beskik om ‘n vuurwapen te hanteer nie, maar tog met vuurwapens uitgereik word.

Die voorsitter van die portefeuljekomitee vir polisie, Francois Beukman van die ANC, meen daar bestaan ‘n sterk verband tussen geweldsmisdade en vuurwapens, daarom moet die toestand reggeruk word.

“Ons kan nie ’n situasie toelaat waar misdaad met wettige en onwettige vuurwapens buite beheer raak nie,” het Beukman aan die media gesê. “Daar moet ná 20 jaar van demokrasie van vuurwapens uit die voormalige tuislande verantwoording gedoen kan word. Ons moet weet wie almal vuurwapens in die land besit.”

Terwyl die polisie steeds oor ‘n rekordaantal personneellede beskik, is daar glo ‘n “personeeltekort” wat die verwerking van vuurwapenaansoeke betref. Blykbaar is polisiebeamptes by polisiekantore wat die aansoeke moet bestuur ook nie “behoorlik opgelei” nie.

Baie duisende lisensie-aansoeke raak sommer net verlore omdat daar nie behoorlike rekord gehou word nie. Met die huidige stelsel kan dieselfde vuurwapen ook in in al nege provinsies gelisensieer word en een persoon kan tot 120 vuurwapens besit.

Die portefeuljekomitee het van die polisiekommissaris, genl. Riah Phiyega, vereis dat daar teen 7 Oktober ‘n herstelplan aan die parlement voorgelê word. So ‘n herstelplan kan egter nog jare duur aangesien korrupsie en ‘n gebrek aan rekenaarvaardighede die polisie kortwiek.

Die DA-lid van die komitee, Dianne Kohler Barnard, het die gebou wat die eenheid huisves, as “absoluut walglik” getipeer.

Kernkrag-tender sluit ander spelers in sê ANC

Die regering probeer ‘n “misverstand” opklaar oor ‘n multi-miljard randse kernooreenkoms met Rusland, het RSG berig.

Die departement van energie sê nou die ooreenkoms met Rusland is deel van ‘n tenderproses wat ander mededingende lande insluit.

Amptenare sê die ooreenkoms met Rusland is nie ‘n kontrak om kernaanlegte te bou nie.

Die Russiese atoom-agentskap Rosatom het Maandagaand ‘n verklaring uitgereik waarin bekendgemaak is dat hy ‘n ooreenkoms ter waarde van R100 miljard met die Suid-Afrikaanse regering gesluit het vir die toevoeging van ‘n kernkrag-vermoë van negeduisend-600 megawatt.

Die bestuurshoof van die Kern-energiekorporasie Xolisa Mabhongo sê die ooreenkoms is in sy kinderskoene. ‘n Regeringsbron sê die Russiese aankondiging was voortydig.

Hy sê daar sal ‘n tenderproses wees voordat enige bindende kontrakte onderteken word. Soortgelyke ooreenkomste sal vermoedelik ook met lande soos Frankryk, Korea, die VSA en Japan gesluit word.

FN sal VN nader oor Derby-Lewis se parool

Die Front Nasionaal gaan die VN se Menseregtekommissie nader omdat Clive Derby-Lewis se mediese paroolaansoek sloer.

Die party sê in ‘n verklaring geen reaksie is ontvang van die Departement van Korrektiewe Dienste nie ondanks ‘n ondersoek deur die mediese paroolraad oor Derby-Lewis se geval in Julie.

Derby-Lewis, ‘n kankerlyer, is onlangs twee keer in die tronk aangeval wat sy gesondheid verder aangetas het.

Hy het die eerste keer in 2010 aansoek gedoen om parool.

Derby-Lewis is daaraan skuldig bevind dat hy saamgesweer het om die hoofsekretaris van die SAKP, Chris Hani, in 1993 te vermoor.

Die 78-jarige Derby-Lewis, dien ‘n vonnis van 25 jaar uit. Hy het reeds meer as 20 jaar in die gevangenis deurgebring.

Front Nasionaal sê hy sal ‘n vergadering aanvra met die minister van justisie, Michael Masutha. ‘n Formele klagte sal terselfdertyd by die VN ingedien word.

Op 12 April vanjaar het ‘n betoging vir Derby-Lewis se vrylating plaasgevind wat deur die sanger Steve Hofmeyr bygewoon is.

Valke-lid deel van stropersindikaat

‘n Lid van die Valke. ‘n grootwildjagter, ‘n prokureur, en vlieënier is onder die tien beskuldigdes wat Maandag in die landdroshof in Hatfield verskyn het op 318 aanklagte wat verband hou met renosterstropery.

Die tien staar ook klagtes van diefstal en geldwassery in die gesig.

Willie Oosthuizen van die Valke, Hugo en Anton Ras, Hugo se vrou Trudie, Mandla Magagula, Joseph Wilkinson (prokureur), Bonnie Steyn (vlieënier), Arno Smit, Christopher Scheepers, en Willem van Jaarsveld is nie gevra om te pleit nie.

Hugo Ras het Vrydag in die landdroshof in Pretoria-Noord verskyn op aanklag wat ook met renosterstropery verband hou toe hy deur die Valke in hegtenis geneem is.

Die ander beskuldigdes is Vrydag in Polokwane, Ficksburg in die Vrystaat, Mamelodi, Potchefstroom en Kameeldrift in hegtenis geneem.

Volgens ‘n woordvoerder van die Valke, Paul Ramaloko, was Ras vermoedelik die leier van die stropersindikaat.

Hulle is reeds vyf jaar lank in Limpopo, KwaZulu-Natal, Gauteng en Mpumalanga bedrywig.

Hulle word daarvan beskuldig dat hulle 22 renosters tussen 2008 en 2012 gestroop het en 84 renosterhorings ter waarde van R22 miljoen onwettig bekom het.

Sowat 52 horings was vermoedelik afkomstig van gestroopte renosters terwyl die res gesteel is.

Johannesburg se waternood duur voort

Dele van Johannesburg het Maandagaand steeds onder waternood gebuk gegaan.

Die watertorings en reservoirs is glo egter besig om weer vol te loop nadat probleme met die pompstasies ontstaan het.

Lae watervlakke pla by die volgende reservoirs: Rabie Ridge, President Park en Randjesfontein. Die buurtes wat hierdeur geraak word, is Ebony Park, Kaalfontein, Ivory Park, President Park, Glen Austin, Allendale, Country View, Rabie Ridge en Mayiboye.

Watertenks is voorsien en is beskikbaar by:

South Hills-watertoring en 21 Risana-pad

Westdene op die hoek van 4de Laan en Thornton-pad

Triomf op die hoek van Miller- en Edward-straat

Coronationville-hospitaal.

Die publiek word gevra om watergebruik in te kort.

Onlusmakers blokkeer Goue Hoofweg suid van Jhb met klippe

Onlusmakers in die Lehae-gebied suid van Johannesburg buite Lenasia blokkeer tans die Goue Hoofweg met klippe, volgens die metropolisie van dié stad.

Hoofsuperintendent Wayne Minnaar verklaar dat die pad vir motoriste ontoeganklik is en verkeersopeenhopings veroorsaak.

“Hulle behoort eerder die N1 of die K43 as alternatiewe roetes te gebruik,” sê hy.

Die onlus het vanoggend voor 05:00 begin. In dié stadium is dit nie helder wat die oorsaak daarvan kan wees nie.

Volgens Minnaar is daar tans polisiebeamptes op die toneel.

Poskantoorstaking lê die land lam

Die SA Poskantoor het op 17 September aangekondig dat pos in Gauteng en die Wes-Kaap geraak word deur ‘n “onbeskermde staking” by sorteersentra in Kaapstad, Pretoria en die groter Johannesburggebied. Terwyl pos in die Wes-Kaap met slegs enkele dae vertraag word, word dit in Gauteng met “etlike weke” vertraag.

By verskeie poskantore in Johannesburg was posbusse gister leeg, wat aandui dat geen pos afgelewer word nie.

Volgens die Poskantoor is “die vertraging in Gauteng die gevolg van ‘n vorige staking waarvan die produksieomgewing nog nie herstel het nie”.

Redes wat vir die staking aangevoer word, het te make met die aanstelling van tydelike poswerkers in permanente poste. Die SA Poskantoor is besig om tydelike poste wat net op sekere tye van die jaar benodig word in permanente poste te omskep. Dit word egter nie vinnig genoeg na die smaak van die poskantoorwerkers gedoen nie.

Intussen daag werknemers by poskantore in winkelsentra en elders steeds vir werk op, hoewel die pos nie meer gesorteer word nie. Sommige poskantore in Kaapstad en in Johannesburg is egter gesluit ná voorvalle van intimidasie en dreigemente van geweld. Die Poskantoor se oproepsentrum is gesluit en klante word versoek om ‘n epos aan socialmedia@postoffice.co.za te stuur as hulle navraag oor positems wil doen. Daarvoor word ‘n opspoornommer benodig.

Die posdiens in ander provinsies, behalwe Gauteng en die Wes-Kaap, funksioneer normaalweg.E-handelaars is egter woedend aangesien hulle sakebedrywighede heeltemal lam gelê word.Volgens Mlu Mathonsi, groepbedryfshoof van die Poskantoor, “hanteer die Poskantoor landwyd vyf miljoen posstukke op ‘n gewone dag. Met ‘n vertraging van net een dag word ‘n enorme agterstand opgebou.”

Maar die staking duur nou al op sommige plekke ‘n maand lank, wat kan beteken dat tot 150 miljoen posstukke iewers in die stelsel vashaak.

Mathonsi sê: “Met e-handel word al hoe meer pakkies deur die poskantoor gehanteer.”

In ander lande het poskantore hul sakemodel verander om meer pakkies as ander posstukke soos briewe te hanteer, ten einde e-handelaars tegemoet te kom. Sowel Canada Post in Kanada as Royal Post in Brittanje het tot dié stap oorgegaan.

E-handelkliënte is gesteld op vinnige en betroubare aflewerings.

Die Poskantoorstaking kan dus op die duur veroorsaak dat die publiek vertroue in e-handel in Suid-Afrika verloor.

 

DRK, Lesotho bly SAOG-kopseer

‘n Buitengewone beraad van die sogenaamde dubbele troika van die Suider-Afrikaanse Ontwikkelingsgemeenskap (SAOG), met sowel die Demokratiese Republiek van Kongo (DRK) as Tanzanië teenwoordig, is verlede week in Pretoria gehou om die voortslepende krisisse in die twee lande te bespreek.

Die beraad is deur Suid-Afrika se president Jacob Zuma, gelei wat ook die voorsitter van die SAOG-komitee vir politiek, verdediging en sekuriteit is.

Leiers van die koalisie-regering in Lesotho is gemaan om by hul verbintenisse tot die herstel van grondwetlike normaliteit in die konink­ryk te bly.

Daar is ook besluit om die algemene verkiesings in Lesotho wat vir 2017 beplan is, te vervroeg.

Die leiers van die koalisie-regering is aangemoedig om saam te werk ten einde die Windhoek- en Pretoria-verklarings as ’n saak van dringendheid te implementeer.

Dit sluit onder meer die terugroep en herstel van die parlement in, wat vroeër eensydig deur die eerste minister opgeskort is.

Die land se leiers is ook aangemoedig om so gou as moontlik op die datums vir ’n nuwe verkiesing ooreen te kom.

Suid-Afrika se adjunk-­president, Cyril Ramaphosa, met die steun van ’n span deskundiges uit troika-lidlande, is die opdrag gegee om as SAOG-fasiliteerder die kwessie in Lesotho te beredder, ten einde politieke stabiliteit en veiligheid in die kort en lang termyn te herstel.

Die noodsaaklikheid om die volle SAOG politieke, verdediging- en veiligheidwaarnemersendings vir ’n tydperk van drie maande in Lesotho te ontplooi, is ook benadruk.

Ná die drie maande sal die veiligheidsituasie in die land en die politieke stabiliteit deur die lidlande van die troika hersien word.

Wat betref die DRK, is die internasionale gemeenskap versoek om druk uit te oefen op maatskappye wat handel dryf in onwettige, gemynde minerale uit die DRK en onmiddellik ’n einde hieraan te maak. Lande wat as deurgang- roetes vir die onwettig gemynde minerale dien, is versoek om hul verbintenis tot die raamwerk vir vrede, veiligheid en samewerking in die DRK en Groot Mere-streek te eerbiedig en gestand te doen.

SAOG het sy posisie herbevestig ten opsigte van die rol van agent­skappe van die Verenigde Nasies om logistieke steun en veiligheid te bied aan gewapende magte wat vrywillig hul wapens neergelê het en in die Kisangani-deurgangskamp gehuisves word.

’n Senior afvaardiging, bestaande uit amptenare van die troika, sal ook eersdaags die DRK besoek om met die leierskap van die FDLR-rebellegroep in gesprek te tree.

Die rebelle sal gewys word op die onafwendbaarheid van militêre optrede teen hulle, indien hulle nie by vorige ooreenkomste hou en vrywillig ontwapen nie.

Die internasionale gemeenskap en die Verenigde Nasies en sy agentskappe is versoek om bystand te verleen met die hervestiging van FDLR-lede wat vrywillig hul wapens neergelê het, maar nie bereid is of toegelaat sal word om na Rwanda te repatrieer nie.

Die buitengewone vergadering is ook bygewoon deur pres. Robert Mugabe van Zimbabwe, lt.genl. Seretse Khama Ian Khama, die president van Botswana, premier Thomas Thabane van Lesotho, visepresident Saulos Chilima van Malawi, min. Raymond Tshibanda van die DRK en min. Bernard Membe van Tanzanië.