Kaapse Nobel-beraad sink

Die burgemeester van Kaapstad, Patricia de Lille sal na verwagting aankondig dat ‘n luisterryke beraad in Kaapstad afgestel gaan word.

De Lille sal vanmiddag die aankondiging doen, nadat sy voorheen die versekering gegee het dat die geleentheid sal voortgaan.

Die 14de Wêreldberaad van Nobel Vredespryswenners sal glo nie meer in Kaapstad plaasvind nie, en sal afgestel word.

Dit sou tussen 13 tot 15 Oktober in Kaapstad gehou word, oor minder as twee weke.

Ses ontvangers van die vredesprys het vroeër aan die beraad onttrek nadat Suid-Afrika nie ‘n visum aan die Tibettaanse geestelike leier, die Dalai Lama, wou toestaan nie.

Hy sou ook die geleentheid bywoon.

Die Departement van Internasionale Betrekkinge sê dat die Dalai Lama sy reis gekanselleer het, terwyl hulle besig was om sy visum-aansoek na te gaan.

‘n Nuwe stad sal na verwagting vir die beraad gekies word.

Sowat 1 500 internasionale afgevaardigdes wat reeds vliegtuigkaartjies en verblyf bespreek na Kaapstad.

Reuters berig twee Nobel-vredespryswenners, Jody Williams en Shirin Ebadi, het gesê genoeg Nobelpryswenners het die beplande beraad geboikot om te verseker dat dit nou gekanselleer sal word. Hulle het glo verwag dat dit geboikot sal word.

Emeritus-aartsbiskop Desmond Tutu het Woensdag gesê: “Ek is skaam om dié inkruiperige klomp my regering te noem. Toe die Amerikaners aan Madiba gesê het hy kan nie sy vriendskap met presidente Ghaddafi en Castro voortsit nie, het hy aan hulle gesê hulle kan in die dam gaan spring.”

Volgens Williams is die doel van die boikot sodat die beraad in ’n land gehou kan word waar die Dalai Lama welkom is.

Ebadi het gesê Suid-Afrika se gesloer om aan die Dalai Lama ’n visum te gee, was duidelik as gevolg van druk wat China uitgeoefen het.

Williams, Ebadi en nog drie Nobel-vredespryswenners het op 25 September ’n brief aan onder andere De Lille, oudpres. F.W. de Klerk en emeritus-aartsbiskop dr. Desmond Tutu gerig dat hulle nié hul besluit om die beraad te boikot, sal heroorweeg nie.

Ander lande by kernbod betrek

Die departement van energie het Woensdag gesê geen bindende kernkragooreenkoms is in Wene met Rusland gesluit nie.

Hulle het egter bevestig dat die Russies-Suid-Afrikaanse verklaring die grondslag sal lê vir die bou van 8 kernkragstasies in Suid-Afrika wat 9 600 megawatt aan die land se kragnetwerk sal lewer.

Dr. Wolsey Barnard, waarnemende direkteur-generaal van energie, het gesê die ooreenkoms vir die oprigting van kernkragstasies met Russiese VVER-tegnologie is onderteken en is deursigtig.

“Geen belangrike inligting hieroor sal van die publiek weerhou word nie, maar die regering gaan voorlopig nie die inhoud van verlede week se ooreenkoms met Rusland openbaar maak nie. Ons sal die inhoud van al die raamwerkooreenkomste bekend maak wanneer almal onderteken is,” het Barnard gesê.

Zizamele Mbambo, adjunk-direkteur-generaal vir kernenergie, sê Suid-Afrika het vroeër ’n soortgelyke ooreenkoms met Suid-Korea gesluit en soortgelyke ooreenkomste sal met Frankryk, China en Japan gesluit word.

Verskafferlande sowel as die kabinet sal besluit watter inligting vrygestel word.

Mbambo het benadruk dat ’n tenderproses vir kernenergie heeltemal verskil van enige ander tenderprosedure.

Namibië binnekort stembus toe

Namibiërs gaan op 28 November vanjaar stembus toe om vir lede van die Nasionale Vergadering en ’n nuwe president te stem.

Anders as in vorige jare, sal die verkiesings vanjaar net op een dag plaasvind en nie soos in die verlede oor twee dae nie. Die kwessie van twee stemdae was in die verlede ’n steen des aanstoots vir opposisiepartye wat aan­gevoer het dat dit ’n skuiwergat vir verkiesings­kullery geskep het.

Die proklamasie van die verkiesingsdatum sal op 13 Oktober plaasvind wanneer dit deur pres. Hifikepunye Pohamba in die Staatskoerant gepubliseer­ sal word.

Namibiërs wat hulle in die buiteland bevind, kan op 14 November by Namibië se ambassades en hoë kommissariate stem. Dieselfde datum is geoormerk vir seevarende personeel wat dan op Lüderitz en Walvisbaai hul stemme kan uitbring.

Aanvanklik is voorstelle deur hoofsaaklik die Rally for Democracy and Progress (RDP) gemaak dat die verkiesings eerder in Februarie aanstaande jaar moes plaasvind.

Die RDP voer aan die eerste demokratiese verkiesing wat in Namibië gehou is, het in November 1989 plaasgevind. Dit was voor ’n datum vir onafhanklikwording vasgestel is. Destyds moes ’n grondwet geskryf word, nasionale simbole soos die landsvlag en volkslied aanvaar word en voorbereidings vir onafhanklikwording getref word.

Sedertdien is verkiesings tradisioneel altyd in November gehou, met die nuwe Nasionale Vergadering wat eers op 21 Maart die daaropvolgende jaar diens aanvaar en ingesweer word.

Dit bring volgens die RDP mee dat die land vir byna vier maande lamgelê word omdat ampstermyne voortsleep, maar almal weet nuwe NV-lede en ’n nuwe president is reeds verkies.

Die nominasieproses vir presidentskandidate en die indien van party­lyste begin op 13 Oktober en duur tot 29 Oktober.

Op Woensdag 29 Oktober sal die voorsitter van die verkiesingskommissie ’n openbare sitting by die ECN se hoofkantoor in Van Rhijnstraat, Windhoek-Noord, hou waar die nominasies ontvang sal word. Die sitting sal van 09:00 tot 11:00 duur.

Nóg nuus van die verkiesingskommissie is dat tussenverkiesings vir die Endola-kiesafdeling op 7 November sal plaasvind en dié in Windhoek-Wes op 14 November.

Die verkiesingskommissie is ook besig met reëlings vir die akkreditasie van buitelandse en plaaslike verkiesingswaarnemers.

Ná afloop van die bykomende registrasieproses is die voorlopige kiesersregister na al 121 kiesafdelings gestuur waar dit van 1 tot 3 Oktober vir inspeksie en besigtiging beskikbaar sal wees. Die finale kiesersregister sal op 7 November in die Staatskoerant gepubliseer word.

Bron: Die Republikein

Trevor Manuel sluit van vandag af by Rothschild-groep aan

Trevor Manual, Suid-Afrika se voormalige minister van finansies, het Maandag by die Rothschild-groep aangesluit waar hy as finansiële adviseur sal dien.

“Dis met genoeë dat Rothschild aankodig dat Trevor Manuel as ‘n senior adviseur vir die wêreldwye groep aangestel is, asook adjunkvoorsitter van Rotschild Suid-Afrika met ingang vanaf 1 Oktober 2014,” het die voorsitter, David de Rothschild in ‘n mediavrystelling verklaar.

“Sy leiding van die Suid-Afrikaanse ekonomie onder opeenvolgende presidente en sy verskeidenheid rolle in verskeie globale multilaterale instellings plaas hom in ‘n besondere portuurgroep.”

Tot onlangs was Manuel minister in die presidensie waar hy vir die nasionale beplanningskommissie verantwoordelik was. Hy het vroeër vanjaar uit die openbare lewe uitgetree, ná twintig jaar in senior regeringsposte.

Op sy beurt het Manuel gesê dat hy daarna uitsien om die Rothschild-naam in Afrika te ontwikkel.

“Dit is ‘n opwindende stap en ‘n besondere plesier om naas die groep en sy senior adviseurs te werk,” sê Manuel.

ANC-Jeugliga wil Woolworths sluit

Die ANC-jeugliga wil verseker dat geen groente uit Israel op Suid-Afrikaners se borde beland nie.

Jeugliga-ondersteuners, in ANC T-hemde, het buite die Woolworths-hoofkantoor in Kaapstad Maandag betoog en geëis dat die kleinhandelonderneming bande met die Israeliese verskaffers beëindig.

Suid-Afrikaners moet Woolworths boikot omdat die winkelketting die “apartheid-staat” ondersteun.

Woolworths voer pretzels, matzos, lietsjies, mango’s, kersies en ander vrugte en groente uit Israel in.

‘n Woordvoerder van die jeugliga, Braam Hanekom, het gesê die protes is deel van ‘n boikot teen Woolworths gelei deur die beweging Boikot, Desinvestering en Sanksies (BDS) teen Israel in Suid-Afrika.

Hy het gesê die handelaar gegenereer ‘n wins van R12 miljoen per jaar deur produkte uit Israel in te voer.

“Die apartheidstaat van Israel moet ekonomies geboikot word. Ons [verbruikers] moet nie betaal vir die koeëls en die bomme wat teen kinders in Palestina gebruik word nie,” het hy gesê.

“[Woolworths] kan maklik die produkte onttrek. In plaas daarvan wil sy winkels regoor die land honderde miljoene rande verloor, want ons sal baie, baie Woolworths-winkels laat sluit. Ons het al die lede van die Jeugliga, die Jong Kommunistiese Liga en die SA Kommunistiese Party ontmoedig om by Woolworths te koop.”

Hanekom het gesê die veldtog sal verskerp word totdat Woolworths gehoor gegee aan sy eise.

Die maatskappy het daarop aangedring dat dit voldoen het aan die regering se riglyne oor Israeliese produkte en gesê die oorsprong van elke produk word op etikette aangetoon.

“Woolworths verafsku geweld en die verlies van lewe, veral van kinders, in enige omstandighede en ons is diep getref deur die tragiese gevolge van die konflik in Gasa,” het Woolworths gesê.

Die winkelgroep beweer dat hulle nie produkte uit “besette gebiede” te koop aanbied nie.

Swart dosent glo soos dier geslag

Die bebloede lyk van ’n swart dosent en nagraadse student aan die Universiteit van die Vrystaat, wat “soos ’n dier geslag” is, is in sy woonstel in Bloemfontein gekry.

’n Klag van moord word ondersoek.

Hy is die vierde Kovsie-student wat die laaste twee maande onnatuurlik dood is.

Lehlohonolo Mathengtheng (27), was ’n dosent in die departement mediese mikrobiologie en virologie.

Hy is in sy woonstel in die Madaleenhof-woonstelblok in King Edwardweg vermoor.

Polisiebeamptes het Sondagoggend op sy naakte lyk afgekom. Hy is waarskynlik reeds Vrydagaand vermoor, het die polisie gesê.

Die moordwapen, ‘n mes, ’n gebruikte kondoom en twee selfone is in een van die slaapkamers gekry.

Mathengtheng se huismaat is sedert Vrydagaand in Johannesburg.

Mathengtheng was van Odendaalsrus.

Westinghouse vat Eskom aan oor ‘politieke inmenging’

Westinghouse, ‘n Amerikaans-Japanse kernkragmaatskappy het Maandag ’n tweede hofgeding teen Eskom aanhangig gemaak.

Die toekenning van die Koeberg-vernuwingskontrak aan die Franse maatskappy Areva is in die spervuur.

Westinghouse het Maandag hofstukke by die Suid-Gautengse hooggeregshof ingedien waarin hy die hof versoek om die kontrak van R4,2 miljard wat Eskom in Augustus aan Areva toegeken het, nietig te laat verklaar.

Die kontrak behels lewering van nuwe stoomopwekkers in die twee kernreaktors. Die stoomopwekkers moet vervang word na ‘n ontwerpleeftyd van 30 jaar.

Die stoomopwekkers se leeftyd kan nog langer uitgerek word weens die hofgeding wat die veiligheidsrisiko’s ook verhoog.

Die reaktors het in 1984 en 1985 in bedryf gekom en moet dus in 2014 en 2015 vervang word, maar vertragings met die toekenning van die kontrak en die hofsaak beteken dat die stoomopwekkers eers in 2018 vervang sal kan word.

Westinghouse voer aan dat die kontrak “deur politieke inmenging” aan Areva toegewys is. Bewerings van omkopery is ook in die hofstukke genoem.

Die ramp by die Foekoesjima-kernaanleg in Japan het intussen duisende mense in Tokio Dinsdag die strate laat invaar. Die aanleg is deur Westinghouse ontwerp.

Daar heers fel kritiek teen die regering se skuif om weer twee van Japan se kernreaktors aan te skakel.

Meer as 16,000 aktiviste het in die Japannese hoofstad betoog teen die 10 September-besluit om twee reaktors by die Sendai-aanleg weer te begin.

Malema se korrupsie-verhoor gaan voort

Julius Malema, die EFF-leier se verhoor oor bewerings van bedrog, korrupsie en geldwassery word Dinsdag in die Hooggeregshof te Polokwane voortgesit.

Die polisie is in die stad asook in die Seshego-lokasie, Malema se eertydse tuiste, ontplooi.

EFF-lede en ondersteuners drom sedert Maandag naby die hof saam. Lede van die provinsiale wetgewer en parlement het ‘n nagwaak vir Malema naby die hof gereël.

Regter Ephraim Makgoba het die verdediging se versoek om die aanklagte te laat terugtrek, in November verlede jaar van die hand gewys.

Die staat voer aan dat Malema sowat R4 miljoen uit korrupte sakebedrywighede verdien het.

Die woordvoerder van die Nasionale Vervolgingsgesag (NGV), Nathi Mncube sê Malema, asook sy twee medebeskuldigdes en van hul maatskappye staar 54 aanklagte in die gesig.

Drie paaie naby die hof is sedert Maandagaand gedeeltelik vir verkeer gesluit.

Intussen het die Wes-Kaapse Hooggeregshof die Ekonomiese Vryheidsvegters se aansoek om ‘n dringende interdik teen dissiplinêre stappe teen 20 van sy parlementêre lede van die hand gewys.

Die verhore sou vanoggend begin het.

Die saak spruit voort uit die voorval toe lede van die EFF President Jacob Zuma se antwoorde oor Nkandla in die nasionale vergadering ontwrig het tydens vraetyd.

Kort voordat regter Vincent Saldanha sy bevel uitgereik het, is hy deur ‘n parlementêre regsverteenwoordiger in kennis gestel dat die verhore met ‘n week uitgestel is.

Die regsverteenwoordiger van die lede, Luvuyo Godla sê daar is steeds ‘n kans dat hulle verdere aansoeke kan bring.

Damme het voldoende water

Die Departement van Waterwese en Sanitasie het bewerings dat Suid-Afrika watertekorte kan ondervind, verwerp.

Vroeëre berigte het die rondte gedoen dat die land se varswatervoorraad kan opraak indien die water-infrastruktuur nie opgeknap word nie.

Die Direkteur-Generaal, Trevor Blazer, sê die watervlakke in die damme is voldoende vir die vraag en aanbod en is nie die oorsaak van die watertekorte wat tans ondervind word nie.

Intussen het die minister van Waterwese en Sanitasie, Nomvula Mokonyane, gesê kabeldiefstal is ‘n vorm van ernstige ekonomiese sabotasie.

Mokonyane, wat die media in Johannesburg toegespreek het, sê kabeldiefstal ondermyn pogings om infrastruktuur te ontwikkel en moet nie as ‘n ligte misdaad beskou word nie.

Dit volg nadat kabeldiefstal by verskeie substasies het gelei tot waternood vir bykans 40 Gautengse voorstede waarvan sommiges tot sewe dae sonder water was.

Rand Water poog om die watertoevoer te normaliseer ná bykans twee weke se hewige ontwrigting vir inwoners.

Mortier tref vrou teen die kop

‘n Inwoner wat naby ‘n militêre basis woon is byna dood nadat sy deur ‘n 60 mm-beligtingsmortier teen die kop getref is.

‘n Beligtingsmortier is ’n militêre wapen en nie beskikbaar vir die publiek nie. Dit word met ’n mortierpyp afgevuur.

Die polisie se bomeenheid moes die toestel kom verwyder wat die niksvermoedende Felicia Klopper (20) Saterdagoggend getref het terwyl sy op haar bed in haar slaapkamer gesit het.

Die polisie kon nog nie bepaal wie dit afgevuur het nie. Die weermag ontken dat hulle die mortier afgevuur het.

Volgens Rudi Klopper, Felicia se pa, wil hulle ’n saak teen die weermag aanhangig maak.

“Wie anders kon dit afgevuur het? Iemand moet verantwoordelik gehou word, so iets mag nie gebeur nie. Of jy nou die polisie of die weermag is, jy kan dit nie bekostig om sulke foute te maak nie. Ons gaan nou oorlog maak,” het Rudi aan Die Burger gesê.

Volgens kapt. Disebo Selepe, polisiewoordvoerder, is hulle nog besig om die oorsprong van die mortier vas te stel.

Die beligtingsmortier is deur Klopper se slaapkamerdak geskiet voordat dit haar teen die kop getref het.

Mortiere en sowel as mortierbomme word in wapenopslagplekke gestoor en slegs per opdrag uitgereik.

Dit word met ’n mortierpyp afgevuur.