Rand tuimel na Marcus se bedanking

Die president van die Suid-Afrikaanse Reserwebank, Gill Marcus sal nie nog ‘n termyn dien nie. Sy het gesê sy sal uit haar pos bedank as haar kontrak in November verstryk.

Die Rand het verswak nadat die nuus versprei het.

Marcus het President Jacob Zuma van haar besluit in kennis gestel. Sy het  vandag in Pretoria aan die einde van die monetêrebeleidskomiteevergadering die aankondiging aan verslaggewers gemaak.

Zuma het nog nie bekend gemaak wie haar opvolger sal wees nie.

Marcus, ‘n voormalige adjunkminister van finansies en voorsitter van Barclays se Suid-Afrikaanse eenheid, ABSA, het die amp in 2009 na die wêreldwye finansiële krisis opgeneem.

Haar aanstelling is aangekondig kort nadat Zuma, 72, verkies is as leier. Volgens Bloomberg was Marcus se aanstelling om Zuma se “losser fiskale druk te weerstaan”.

Marcus was egter ‘n ANC- politieke aanstelling.

Marcus het aangekondig dat die repokoers onveranderd gaan bly op 5,75 persent. Sy het gesê die binnelandse groeivooruitsigte het verder verswak.

Die Reserwebank se beleidskomitee het in Januarie die repokoers met 50 basispunte tot 5,5 persent verhoog en in Julie is dit met 25 basispunte  tot 5,75 persent opgestoot.

Die repokoers is in Maart en Mei ook onveranderd gelaat.

Aantal slagoffers van kerk-ramp in Nigerië onbekend

Die Minister van Internasionale Betrekkinge en Samewerking, Maite Nkoana-Mashabane sê `n rampbestuurspan het gisteraand na Nigerië vertrek om te bepaal hoeveel Suid-Afrikaners dood is toe ‘n kerkgebou in Lagos ineengestort het.

Nigeriese amptenare sê 70 liggame is in die puin van die gebou gevind. President Jacob Zuma het vroeër in `n verklaring gesê dat 67 van sy landgenote in die ongeluk dood is.

`n Woordvoerder van Nigerië se nooddiens-agentskap, Ibrahim Farinloye, sê Zuma is nie in Nigerië nie en dit is te vroeg om te bespiegel waar die slagoffers vandaan gekom het, het RSG berig.

Die gebou het inmekaar gestort terwyl werk aan die gang was om nog verdiepings by die gastehuis by die prediker, T.B. Joshua se kerk te voeg.

‘Replika’ van Mandela-tronksel ‘n klaaglike foefie

Robbeneiland trek nie meer besoekers wat oud-terroris Nelson Mandela se tronksel wil sien nie.

Met die afname in belangstelling, het Denis Goldberg besluit om die foefie na die vasteland te bring om skoolkinders te indoktrineer. Goldberg was een van die politieke gevangenes wat deel was van die Rivonia-verhoor, ‘n groep Joodse kommuniste wat terreur in Suid-Afrika gepleeg het.

Mandela se tronksel op Robbeneiland het deur die jare egter ‘n uiters vreemde transformasie ondergaan.

Tydens sy aanhouding was dit vol boeke op sy boekrak en ‘n bed met ‘n matras en kussing, ‘n stoel en lessenaar soos foto- en filmmateriaal van selfs CNN, of die Johannesburgse digitale argief duidelik aantoon.

Foto’s van swart Amerikaanse sterre soos Beyoncé wat by die tronksel poseer, wys die rak en bed in die agtergrond.

Met President Obama se besoek het die kamer skielik die bed, matras, boekrak, tafel en stoel verloor!

Die getransformeerde “replika” van die tronksel is Dinsdagoggend by die Nelson Mandela Gateway in die V&A Waterfront in die Moederstad bekend gestel.

Die “replika” wat ‘n totale versinsel blyk te wees, is deur gevangenes van die Pollsmoor-gevangenis gebou en dit word nog tot môre in die V&A Waterfront uitgestal. Van daar word dit in Oktober na die Kaapstad-biblioteek geskuif.

Die “replika” het ook ’n interaktiewe webtuiste, www.mandela27.eu. waar die nou kaalgestroopste ruimte en klaaglike propagandafoefies besigtig kan word.

Pelsverkope herstel

Die resultate­ van die swakara-veiling op 9 September by Kopenhagen­ Fur in die Deense hoofstad Kopenhagen, is uitstekend, het Namibiese pelshandelaars gesê.

Die veiling het die hoogste prys ooit vir ’n lot swart swakara-pelse­ opgelewer, met die prys van N$2 964 wat ’n verhoging­ van N$558,40 teenoor die April 2014 veiling getoon het.

Agra sê in ’n verklaring die hoogste prys vir ’n lot wit pelse was N$2 546. Die grys pelse wat laas in September 2013 verkoop is, het ’n gemiddelde prys van N$710,60 per pels behaal en die bruin pelse wat laas in 2012 verkoop is, ’n gemiddelde­ prys van N$640,30 per pels.

Me. Dagmar Honsbein, hoofbestuurder van Agra ProVision, sê voor die veiling was bedrywighede by die pelshuis in die algemeen minder as tydens vorige veilings.

“Ons het ’n herhaling van die April 2014-veilingsverrigtinge­ gevrees, veral aangesien die gereelde swakara-kopers­ betreklik laat opgedaag­ het om die pelse te besigtig. Hulle het ons boonop ingelig dat hulle nog baie pelse oor het van die vorige veiling. Daarom is ons geweldig­ verheug om produsente­ mee te deel dat die verkope inderdaad­ herstel het,” sê Honsbein.­

Pelspryse was vroeër die jaar onder geweldige­ druk, wat ’n demper op verwagtinge vir die September-­veiling geplaas het. ­

Die pryse het nie net in April aansienlik teruggesak­ nie, maar het boonop meegebring dat nie alles verkoop is nie.

Die aanbod nou het bestaan uit 35 872 swart pelse, 8 794 wit pelse, 3 835 grys pelse, 725 bruin pelse en 2 787 gespikkelde pelse.

Die veilingsbelangstelling verlede week was aanvanklik traag, met die gemiddelde prys vir swart pelse wat op N$495,90 in April gemiddeld­ 12% laer was. Daarna is die bordjies verhang, met die gemiddelde prys van wit pelse wat met 10,9% gestyg het tot N$818,90 en gespikkelde pryse wat met 95,7% tot N$359,10 gestyg het.

Die duurste lot wit pelse is teen N$2 546 opgeraap­ deur mnr. Tony Jessop, ’n pelsmakelaar­ by Avanti Furs van Kastoria­ in Griekeland.­

Die duuste lot swart pelse se bod is toegeslaan­ op mnr. Thomas Rebild, ’n Deense makelaar wat dit namens Elena Furs van Moskou in Rusland gekoop het.

Bron: Die Republikein

Eskom: Kragagterstand sal nog 5 jaar duur

Die kragreus Eskom het gewaarsku dat dit tot vyf jaar kan neem om die agteruitgang in sy aantal kragstasies om te keer, het RSG berig.

Die kragvoorsiener se waarnemende uitvoerende hoof, Collin Matjila, sê die beskikbare energiefaktor sal eers teen 2019 tot bo 85 persent styg.

Matjila het aan die Parlement se Energiekomitee gesê die eerste eenheid by die nuwe Medupi-kragstasie in Limpopo sal na verwagting op 24 Desember vanjaar, ná ‘n vertraging van drie jaar, begin krag lewer aan die nasionale netwerk.

Die tweede kragstasie, Kusile in Mpumalanga sal vroeg in 2016 begin krag lewer. Matjila sê hulle het verskeie eise ingedien teen kontrakteurs by Medupi vir die nie-lewering van dienste.

Dit is ook gedeeltelik die rede vir die stygende koste.

Johannesburg Water gaan watertenks in ‘n aantal voorstede beskikbaarstel nadat kragprobleme by Randwater se Eikenhof-pompstasie tot ontwrigtings in watervoorsiening gelei het.

‘n Woordvoerder van Johannesburg Water, Millicent Kabwe, sê Randwater het die kragprobleem herstel, maar opgaardamme is leeg en moet nog volgepomp word.

Watertenks sal by die Coronationville hospitaal geplaas word, asook by Crown Gardens, Sophiatown, Quellerina, Bergbron, Winchester Hills en Campus Square in Aucklandpark.

Inwoners in die gebiede wat wel water het, is gevra om dit spaarsamig te gebruik totdat opgaardamme volgetap is.

Miljoene dollar sou wapens in SA koop

Amerikaanse dollars ter waarde van meer as R100 miljoen waarop daar beslag gelê is by Lanseria-lughawe, is bevries nadat die Suid-Afrikaanse Inkomstediens (SAID) ingegryp het.

Die stapels banknote van 90 blokke ter waarde van $100 000 elk was in twee swart tasse op ’n vlug wat op 5 September 2014 van Nigerië by die Lanseria-lughawe geland het, het Beeld berig.

Dit is ver bo die voorgeskrewe wettige hoeveelheid kontant wat land ingebring mag word.

Die Noord-Gautengse hooggeregshof in Pretoria het intussen ’n bevel ten gunste van die nasionale vervolgingsgesag (NVG) se batebeslagleggingseenheid gemaak dat die geld bevries word.

Dié geld is glo gebruik om ‘n misdaad te pleeg, vermoedelik om wapentuig en helikopters aan te koop.

Luidens ’n verklaring van die NVG het elke tas ’n kombinasie-slot gehad wat net bekend was aan ’n ene Eyal Mesika, ’n Israeliese burger. Mesika het ook drie soortgelyke stapels note in sy handbagasie gehad.

Tier One Services, het glo ‘n faktuur aan ’n Sipriese maatskappy, ESD International Group Ltd, gestuur vir die aankope van wapentuig en helikopters wat glo in Nigerië gebruik sou word.

Die NVG het in hofdokumente aangevoer dat Tier One nie by die Nasionale Konvensionele Wapenbeheerkomitee geregistreer is nie en nie gemagtig is om enige ooreenkoms rakende die verkoop of verhuring van militêre toerusting aan te gaan nie.

Die geld word nou deur die Suid-Afrikaanse Reserwebank bewaar.

Solidariteit weer na hof oor diskriminasie

Die vakbond Solidariteit het Jeff Radebe, voormalige minister van justisie en grondwetlike ontwikkeling, gedagvaar om op 25 en 26 September 2014 in die gelykheidshof in Pretoria te verskyn. Solidariteit sal sy lid, landdros Martin Kroukamp, in die gelykheidshof verteenwoordig en aanvoer dat minister Radebe onbillik op grond van sy ras teen hom gediskrimineer het.

‘n Volbank regters van die Grondwethof het onlangs Solidariteit se nege jaar lange regstryd teen onregverdige diskriminasie teen Renate Barnard van die SAPD op grond van ras gesink.

Die hof het beslis daar is nie onregverdig teen Barnard gediskrimineer omdat sy wit is nie.

Die vakbond is tans in 33 sake teen regstelaksie in verskillende howe betrokke. Solidariteit het voorheen gesê die stryd van bruin tronkbewaarders in die Wes-Kaap is die heel belangrikste.

Volgens Johan Kruger, adjunkhoofsekretaris van Solidariteit, volg die hofsaak nadat Radebe die aanbeveling van die Landdrostekommissie om Kroukamp aan te stel, geïgnoreer het op grond van Kroukamp se ras.

“Vir Solidariteit is die hart van die saak nie net die reg van landdros Kroukamp nie, maar die reg van Suid-Afrikaners op ʼn effektiewe regstelsel. Die kernpilaar van die Suid-Afrikaanse demokrasie is die regstaat en ons moet dit beskerm,” het Kruger gesê.

Kroukamp het hierna ʼn aansoek, ingevolge die Wet op die Bevordering van Toegang tot Inligting, gebring om vas te stel hoekom hy nie aangestel is nie. Volgens die inligting wat Solidariteit ontvang het, sê die Landdrostekommissie dat, in ag genome die prestasie van die onderhoudkandidate, die vereistes ten opsigte van geslag en ras vervat in artikel 174(2) van die Grondwet, die behoeftes van die kantoor en die behoeftes van die gemeenskap wat bedien word, Kroukamp as die enigste geskikte kandidaat aanbeveel word.

Volgens Kruger het minister Radebe die kommissie se aanbevelings geïgnoreer ten spyte daarvan dat Kroukamp deur die Landdrostekommissie as die beste en enigste kandidaat vir die pos van landdros in die Alberton-landdroshof aangewys is, en gesê dit sou nie transformasie bevorder nie. Hy het verder aangedui dat die vakante poste weer geadverteer moes word.

“Dit is die eerste keer dat Solidariteit ʼn Minister dagvaar om sy besluit in die hof te verduidelik. In ons dagvaardiging aan die minister versoek ons dat hy bewyse moet lewer om sy besluit ten opsigte van die nie-bevordering van landdros Kroukamp te staaf,” sê Kruger.

“Senior landdroste speel ’n belangrike rol in die funksionering van die laer howe en moet onder andere landdroste bystaan. Dit is dus noodsaaklik dat die posisies gevul word ten einde te verseker dat landdroshowe die nodige dienste aan die publiek kan lewer,” het Kruger gesê.

Haaieraad toets afweerkabel

Die KwaZulu-Natalse Haaieraad sal binnekort begin om ‘n nuwe elektroniese haai-afweerkabel te toets om toekomstige haai-aanvalle te probeer voorkom, het RSG berig.

Die uitvoerende hoof, Mthokozisi Radebe, sê die 100 meter lange kabel is daarop gemik om haaie en swemmers op ‘n veilige afstand van mekaar af te hou, sonder on enigeen van die twee skade aan te doen.

Hy sê die kabel straal ‘n lae frekwensie elektroniese sein uit, wat witdoodhaaie afskrik.

Radebe het egter gewaarsku dat dit ‘n eksperiment is en in die stadium sal die kabel geen beskerming aan swemmers bied teen haai-aanvalle nie.

Toetse sal aanstaande maand by die Glencairnstrand in Kaapstad uitgevoer word. Die kabel sal op sekere dae geaktiveer word, in bedags van November tot Maart aanstaande jaar.

N2 sluit na oproer by Grabouw

Oproeriges in Grabouw het Maandag motors met klippe gegooi wat in ‘n verkeersknoop op die N2 vanaf Kaapstad vasgesit het, het die polisie gesê.

“Ons het baie polisie hier, en ons herlei die verkeer,” het lt.kol Raldene Watson gesê.

Die polisie sê die betogers het die donker gebruik om motoriste op die alternatiewe roetes ook onder die klippe te steek. Informele behuising op Melrose Place in die dorp is deur die betogers afgebreek.

Watson het gesê die polisie monitor die situasie.

Vroeër, het die polisie rubberkoeëls en traangas gebruik om meer as ‘n 1000 oproeriges by Grabouw se munisipale kantore te verjaag.

Die rubberkoeëls is afgevuur toe oproeriges in Ou Kaapse Weg begin het om klippe na die polisie te gooi.

‘n Gedeelte van die N2 verby die dorp moes gesluit word vir ‘n paar uur na verbygaande motors met klippe bestook is.

Olie is op die snelweg uitgegooi en later is rotse en brandende bande om toegang tot die dorp af te sper.

Die N2 is gesluit by Sir Lowryspas, Gordonsbaai en naby Botrivier.

Die betogers het in Gaffleystraat saamgedrom en na die munisipale kantore in Pineview geloop om ‘n memorandumlys van hul griewe te oorhandig.

Die openbare orde polisie-eenheid is ingeroep met njalas en waterkanonne om die skare onder beheer te hou.

Na die oorhandiging van die memorandum en toesprake deur verskeie gemeenskapsleiers, het die skare die munisipale kantore verlaat en terug in die lokasie begin om klippe te gooi.

Die protes is die tweede in die afgelope weke. John Michels, leier van die Grabouw Civics Organisation, het gewaarsku dat die N2 elke naweek afgesper sal word totdat daar aan hul eise voldoen word.

Griewe in die memorandum sluit ‘n gebrek aan behuising, swak en duur elektrisiteit en die slegte toestand van die paaie in.

Die 229 opstande teen owerhede het die Gautengse regering sedert Junie vanjaar tien miljoen rand gekos.

Die LUR vir Gemeenskapsveiligheid, Sizakhele Nkosi-Malobane, het die inligting in antwoord op ‘n vraag in die provinsiale wetgewer verstrek.

SAUK-raadsvoorsitter versin glo ook kwalifikasies

Ellen Tshabalala, die voorsitter van die SAUK-raad, kan nie aan die portefeuljekomitee oor kommunikasie bewys lewer van haar sogenaamde kwalifikasies nie.

Die komitee sal glo aanbeveel dat president Jacob Zuma Tshabalala vir die duur van die ondersoek skors.

Tshabalala, wat in Oktober aangestel is, het op haar CV beweer sy het ‘n BCom-graad aan die Universiteit van Suid-Afrika behaal, sowel as ‘n nagraadse kwalifikasie in arbeidsverhoudinge.

In Julie, het City Press berig dat die universiteit bevestig het dat Tshabalala nie die kwalifikasies het nie.

Die universiteit het slegs die inligting vrygestel nadat ‘n aansoek in terme van die Wet op Bevordering van Toegang tot Inligting Wet gemaak is.

Joyce Moloi-Moropa, ANC-lid van die Parlement en die voorsitter van die komitee, het bevestig dat Tshabalala nie behoorlike antwoorde kon verskaf nie.

Die komitee vergader Dinsdag om die ondersoek te finaliseer. Die komitee sal dan besluit of Tshabalala geskors moet word.

In ooreenstemming met artikel 15 van die Wet op Uitsaaiwese, kan sy nie langer in die amp dien nie. Tshabalala kan ook krimineel aangekla word omdat meineed ‘n kriminele oortreding is.