Die Afrika Unie het ‘n beroep gedoen dat die ebola-epidemie in wes-Afrika bekamp word sonder om die slagoffers óf lande te isoleer en te stigmatiseer, het RSG berig.
Elf bestuurslede van firmas wat in die hulpbronsektor in Wes-Afrika werk, het ook in ‘n gesamentlike verklaring gevra dat die reisverbod na die streek opgehef moet word omdat dit slegs die humanitêre krisis laat vererger.
Suid-Afrika het onder andere reisbeperkings ingestel op buitelanders uit Guinee, Liberië en Sierra Leone.
Die sakelui sê dat die lande se ekonomieë sonder die ondersteuning van die internasionale gemeenskap, groot skade sal ly.
Brittanje het intussen planne bekend gemaak om binnekort ‘n behandelingsentrum in Sierra Leone naby Freetown te bou.
Londen se Luton-lughawe is Maandag ontruim en alle inkomende vlugte is opgeskort. Die hoofpad na die lughawe is ook gesluit nadat ’n “verdagte item” opgemerk is.
Die sluiting het erge verkeersopeenhopings op die M1 veroorsaak.
’n Woordvoerder van dié lughawe – die vyfde grootste in Brittanje – sê die drastiese maatreëls is geneem nadat die item gekry is. Duisende passasiers is ure lank verontrief, maar het glo “kalm” gebly volgens die BBC.
‘n Gekontrolleerde ontploffing is daarna gereël om 17:15. Owerhede sê die item was nie skadelik nie, maar “agterdogwekkend”.
“Dié besluit is saam met die polisie geneem om die veiligheid en sekuriteit van passasiers en personeellede te waarborg.”
Luton is die vierde grootste lughawe in Londen. In 2013 het ongeveer 9,7 miljoen passasiers dié lughawe gebruik.
Die Openbare Beskermer, Thuli Madonsela het die adjunkminister van Verdediging en Militêre Veterane, Kebby Maphatsoe drie dae gegee om met bewyse vorendag te kom nadat hy beweer het Madonsela is ‘n CIA-spioen.
Sy sê indien hy dit nie kan bewys nie, moet hy sy stelling terugtrek en amptelik om verskoning vra. Maphatsoe kan aangekla word van minagting van die Openbare Beskermer as hy nie aan die versoek voldoen nie.
Die Amerikaanse ambassadeur in Suid-Afrika, Patrick Gaspard het bevestig dat ‘n amptelike diplomatieke klag gelê gaan word. Hy sê die bewerings is “ongegrond en beledigend”.
Gaspard, het homself Maandag tot Twitter gewend om Maphatsoe, ook voorsitter van die Umkhonto we-Sizwe militêre veterane-vereniging (MKMVV), uit te daag.
“Dit is problematies, maar onbelangrik weens ‘n gebrek aan geloofwaardigheid vir die gemiddelde Suid-Afrikaner wat deur die rookskerms sien,” het Gaspard getwiet.
Maphatsoe, wat Saterdag in Soweto die beskuldiging teen Madonsela gemaak het, het Maandag by Luthuli-huis in Johannesburg sy aanval voortgesit en bygevoeg buitelandse magte gebruik haar om die land te destabiliseer.
Verskeie ontleders meen egter dat Madonsela ‘n Britse agenda eerder as ‘n Amerikaanse agenda dryf.
Maphatsoe sê Madonsela was nooit ’n MK-lid soos sy vroeër beweer het nie. “Sy het ’n openlike agenda teen die ANC en pres. Zuma. Sy ondermyn parlementêre prosesse,” het Maphatsoe gesê.
Hy het ook verwys na ondersoeke deur Madonsela wat voortdurend aan die media uitgelek word.
Zizi Kodwa, ANC-woordvoerder, het gesê die party ondersteun die Openbare Beskermer se funksie wat ongehinderd en sonder vrees of guns verslag moet doen.
Die internasionale beleggingsbank Morgan Stanley het gister sy vooruitskattiong vir Suid-Afrikaanse groei in die bruto nasionale produk (BNP) tot slegs 1,3% vir vanjaar verlaag.
In die eerste kwartaal vanjaar het die ekonomie met 0,6% gekrimp, maar het in die tweede kwartaal tot 0,6% groei verbeter. Dit is egter steeds baie laag en sal geen indruk op die hoë werkloosheidsyfer maak nie.
‘n Ekonoom van Morgan Stanley, Michael Kafe, meen dat die voortdurende arbeidsonrus, swakker vooruitsig vir reële toename in lone, die verwagtinge van strenger krediet en moontlike verhogings in persoonlike belasting die oorsake van die laer groei is.
Hy verwag dat die BNP aanstaande jaar tot 2,5% groei sal verhoog, wat laer is as die vorige voorspelling van 2,8%, terwyl dit in 2016 “nie meer as 3%” sal wees nie.
Ook die Wêreldbank het onlangs sy vooruitsigte vir die Suid-Afrikaanse ekonomie afwaarts aangepas tot 2,7% van ‘n vroeër voorspelling van 3,2% af. Dié voorspelling was egter vóór die vyf maande lankge staking en ‘n daling in die land se kredietgradering van Standard & Poor, asook die bankrotskap van African Bank.
Die ander groot Amerikaanse graderingsagentskap, Moody, het ook intussen die land se groot banke afgegradeer in reaksie op die African Bank-debakel.
‘n Ekonoom van Citigroup, Gina Schoeman, is nie verbaas oor die afwaartse aanpassings in Suid-Afrikaanse groeivooruitsigte nie. Terwyl Citi tans voorspel dat die land teen 1,7% gaan groei, meen sy dat daar “aansienlike risiko na benede bestaan”.
Nog ‘n groot probleem is die hardnekkige tekort op die handelsbalans, wat weer na die betalingsbalans deurvloei. Volgens Barclays sal ‘n lopende rekening wat hoër is as die tekort van R161 miljard in die eerste kwartaal vir die rand baie negatief wees. Die rand is tans swakker op 10,74 teen die dollar, teenoor 10,70 wat die vorige sluitingskoers was.
“Woensdag het ‘n groep wit mansstudente my ‘n rasseverraaier en ‘n moffie genoem,” sê Jaco Oelofse. “Nie baie oorspronklike nie, maar hulle het probeer.”
Oelofse is gay, wit, marxistiese en Afrikaans, asook die studenteleier van die Ekonomiese Vryheidsvegters op die kampus van die Universiteit van Pretoria. Hy beskou Julius Malema as ‘n “uitstekende leier” en sê:
“Die media slaag daarin om ‘n sterk swart stem te demoniseer. Ek dink dat hy ‘n uitstekende leier is en presies die soort leier wat die land nodig het, en meen dat hy ‘n “goeie spreker is
“Hy ken politiek, is ‘n uitmuntende orator en wat ek van hom hou, is dat hy verstaan dat die waarheid radikaal is, hy praat die waarheid.”
Tot dusver het die 23-jarige Oelofse nog nie sy leier ontmoet nie, maar wil baie graag.
Jaco Oelofse, leier van die EFF se gevegseenheid by Tuks
Wat die grondkwessie betref, voel hy dat alle grond aan die “regmatige eienaars” terugbesorg moet word aangesien dit “met geweld gesteel is. Daar moet geen vergoeding (vir boere) wees nie, dit moet net aan die regmatige eienaars teruggegee word.”
“Maar,” sê die filosofiestudent aan Tuks wat onder invloed van marxistiese denkers gekom het, “dit beteken nie dat blankes nie ook deel van die land kan wees nie, maar voordat ons kan praat van die land met blankes deel, kom ons fokus liewers daarop om blankes te kry om die grond te deel.”
Volgens Oelofse mag blankes ook deel wees van Suid-Afrika.
Sedert Oktober 2013 is hy lid van die Ekonomiese Vryheidsvegters en ‘n lid van die “studentegevegseenheid” aan die UP.
Benewens filosofie, studeer Oelofse ook staatsleer. Hy meen “daar is geen ander keuse as nasionalisering nie”.
Hoe het dit gebeur dat hy die marxisme omhels het? In die onlangse verlede is Tukkies gesuiwer van nie-marxistiese akademici deur veldtogte teen hulle te voer, onder meer deur dr. Piet Croucamp van die Universiteit van Johannesburg wat ‘n dosent in die filosofiedepartement laat vervolg het weens kritiek wat sy op feminisme en marxisme uitgespreek het.
Oelofse het toenemend in sy studies die radikale menings van sy dosente, wat deesdae meesal van Wits, Kaapstad, Natal en ander radikale Engelse kampusse afkomstig is, omhels. “Soos wat ek in my studies gevorder het, het my belangstelling in radikale teorie toegeneem,” sê hy. “Ek vereenselwig my met ‘n radikale party wat die belang van die lydendes, die armes en die stemloses op die hart dra. As ‘n gay persoon glo ek ook dat die EFF die regte party is, aangesien hulle by verre die mees progressiewe beleid oor geslagtelikheid en seksualiteit het. Die EFF veg vir gelyke behandeling vir almal, ons kan nie groepe aan die rand van die samelewing uitsluit nie.” Volgens hom is daar, afgesien van die EFF, geen ander studentevereniging wat blanke oorheersing, die patriargie, seksisme en homofobie met soveel “radikale ambisie” beveg nie.
Hy het ook “die patriargale, heteroseksuele kulture by koshuise, wat mense met ander seksuele voorkeure uitsluit”, gekritiseer.
Jaco besef dit is idealisties om diskriminasie heeltemal uit te skakel.
“Op universiteit kan ons ten minste die ruggraat van rassisme breek.”
Tydens die studenteverkiesing verlede Woensdag op 3 September, het Afriforum Jeug egter 50% van die stemme verkry. Die stemverdeling lyk soos volg:
AfriForum Jeug het 6 uit die 12 setels verkry, insluitend twee setels op die uitvoerende bestuur van die studenteraad.
Die uitslag van die verkiesing is soos volg:
• AfriForum Jeug: – 50% (6 setels)
• Radical Youth Coalition – 8.3% (1 setel)
• South African Student Congress (SASCO) – 8,3% (1 setel)
• Democratic Alliance Student Organisation (DASO) – 8.3% (1 setel)
• Onafhanklike kandidate – 25,1% (3 setels)
Die EFF Tuks-gevegseenheid het egter die adjunkpresidentskap van die studenteraad ingepalm. Oeloefse meen dit is “goed vir ‘n organisasie wat maar sedert Februarie op die kampus aktief is”.
Nogtans voel hy teleurgesteld met die uitslae, aangesien hy nie Afriforum se verkryging van die transformasieportefeulje kan aanvaar nie.
Hy meen dat die EFF oor die algemeen goed op die kampus aanvaar word en studente nader hulle gedurig om aan te sluit.
“Ons het ‘n radikale vonk in Tuks-studentepolitiek veroorsaak.”
Die hoof van die weermag van Lesotho, luitenenant-generaal Maaparankoe Mahao, het ‘n beroep op buurlande gedoen om militêre hulp teen die voormalige bevelvoerder, Tlali Kamoli.
Mahao sê hy het die SAOG se veiligheidsliggaam versoek om in te gryp. Kamoli is ‘n week gelede deur die eerste minister Tom Thabane afgedank.
Mahao sê die land se weermag sal sukkel om Kamoli te beheer omdat hy verskeie wapenopslagplekke oorgeneem het en saam met soldate in die berge naby die hoofstad, Maseru skuil.
Thabane het verlede week vir vier dae na Suid-Afrika gevlug nadat Lesotho se weermag die polisiehoofkwartier beset het.
Volgens berigte is daar Suid-Afrikaanse troepe in die buurland om Thabane en sy koalisie-regering te beskerm.
Die Amerikaanse weermag gaan toetree tot die stryd teen die ebola-epidemie in Afrika. President Barack Obama het dié aankondiging gemaak in ‘n onderhoud Sondag, maar hy het gewaarsku dit sal maande wees voordat die epidemie verlangsaam. Hy het op NBC se Meet the Press verskyn.
Obama het gesê dat, in sy huidige vorm, sal ebola nie die Verenigde State bereik nie, maar het gewaarsku dat die virus kan muteer en ‘n veel groter bedreiging vir diegene wat buite Afrika woon, inhou. Die president het aangevoer dat die dodelike aard van die siekte vererger word as gevolg van die gebrekkige openbare gesondheidsinfrastruktuur in Afrika.
Hy sê die Amerikaanse weermag sal betrokke raak by take soos die oprigting van afsonderingseenhede, die installering van toerusting en beskerming verskaf aan gesondheidswerkers wat met die siekte te doen het.
Die dodetal in veral lande soos Liberië, Sierra Leone en Guinee het reeds meer as 2000 lewens geëis. Meer as 30 sterftes het ook in die noorde van die Demokratiese Republiek van die Kongo voorgekom.
“Jy weet, soms sê die Amerikaanse publiek: ‘Hoekom geld mors op hulle?'” het hy gesê.
“Wel, deels, want as ons nou die korttermyn-belegging maak, kan dit werklik baie van dividende in die toekoms betaal.” Obama het gewaarsku dat dit in ‘n nasionale veiligheidsaangeleentheid kan ontaard indien die VSA nie optree nie.
Obama het nie besonderhede gegee oor die Amerikaanse weermag se toetrede nie, maar hy het bygevoeg: “As ons nie nou ‘n poging insit nie, en dit versprei nie net regdeur Afrika nie, maar na ander dele van die wêreld, is daar die vooruitsig dat die virus kan muteer. Dit raak makliker oordraagbaar. En dan kan dit ‘n ernstige gevaar vir die Verenigde State van Amerika inhou.
Die verkiesing op 18 September vir Skotse onafhanklikheid oorheers die Verenigde Koninkryk na die deur-tot-deur veldtog aan beide kante verlede week nie meer ‘n dramatiese oorwinning vir die nasionalistiese leier Alex Salmond uitsluit nie.
Maak geen fout nie, die Britse regering is paniekbevange. Die land kan oor 12 dae uitmekaarval. Dit herinner aan wat gebeur het in Quebec in Oktober 1995, toe die ja-stemmers ‘n voorsprong op die laaste minuut bekom het.
Kanadese, wat die debat toe meestal geïgnoreer het, het daarna skielik besef dat hul land onherroeplik kan verander. Sewe dae voor die verkiesing, is ‘n byeenkoms in Montreal georganiseer deur ‘n minister van visserye op sy eie inisiatief. Dié byeenkoms het glo die nee-stemmers se bas gered.
Volgens Bloomberg, “kan die skuif na ‘n volstrekte meerderheid vir die ondersteuners van onafhanklikheid finansiële markte verder vertroebel na die pond verlede week verswak het toe die pro-Britse kant se ondersteuning vernou tot ses persentasiepunte.”
“Vir ‘n positiewe boodskap om soveel in ‘n maand op te skiet is heeltemal ongekend,” sê Matt Qvortrup, ‘n senior navorser by Cranfield Universiteit in Engeland en skrywer van “Referendums en etniese konflikte”. “Dit is ‘n baie revolusionêre ding in referendumterme. Ons sit aan die hooftafel van die geskiedenis,” het hy gesê.
Die nee-stemmers het op ‘n stadium met 22 punte voorgeloop, maar het die eerste plek intussen met twee persentasiepunte aan die nasionaliste oorhandig met 45 – 47.
Die koningin is glo diep bekommerd oor die skielike wending.
Rupert Murdoch het getwiet dat “meninsgpeilings [soos die een oor Skotse onafhanklikheid] wêreldwyd ontnugtering met politieke leiers en die ou instellings weerspieël en ‘n opening vir libertyne en ver-linkses skep”.
Skotland sal “meer kwesbaar word vir terroriste-aanvalle” in ‘n “baie gevaarlike en onseker wêreld” as hulle stem vir onafhanklikheid op 18 September, het die Britse premier David Cameron gesê.
Om deel te wees van ‘n eenheid [soos die VK] gee Skotte die beskermende voordele van ‘n deel van ‘n groter land, het Cameron aan verslaggewers gesê aan die einde van die Noord-Atlantiese Verdrag Organisasie se beraad in Newport, Wallis.
“Met terroristebedreigings en ander bedreigings, is dit nie beter om deel van ‘n Verenigde Koninkryk te wees wat een van die topvyf verdedigingsbegrotings het nie, om een van die beste intelligensie- en sekuriteitsdienste ter wêreld te wees, wat deel is van elke enkele alliansie wat regtig saak maak in die wêreld soos NAVO, die G8, die G20, die Europese Unie, ‘n lid van die Veiligheidsraad van die VN?” het Cameron gesê. “Al die netwerke en vermoëns om te werk met bondgenote om ons veilig te hou. Is dit nie beter om dié dinge te hê as om jouself daarvan af te sonder nie?”
Die stereotipe dat Japannese baie skoon mense is, is gestand gedoen deur ‘n wêreldwye opname oor hotelkamers in groot stede. Tokio het die hoogste punt behaal met 8,93/10.
Ander stede wat hoë punte behaal het op die webblad hotel.info, is Warskou in Pole met ‘n gemiddelde punt van 8,76, ‘n kortkop voor ‘n ander Oosterse stad, Seoel in Suid-Korea. Bratislawa in Slowakye het ook baie goed gedoen op 8,54, gelykop met Sofia in Bulgarye.
Afrikaners se gereelde klagtes dat Wes-Europeërs nie danig skoon mense is nie, word bevestig deur die lae punte wat Wes-Europese hotelle aangeteken het: Londen, Engeland (7,52), Oslo, Noorweë (7,53), Amsterdam, Nederland (7,58) en Kopenhagen, Denemarke (7,60).
Die groot stad met die vuilste hotelle is egter Rio de Janeiro wat slegs 7,29/10 behaal het.
Die stad ter wêreld wat die meeste besoekers jaarliks lok, Parys in Frankryk, het net effens beter as die vuil man van Europa, Londen, gevaar met 7,63.
Hotel.info het die graderings van hotelle se netheid gegrond op inligting wat deur meer as 6 miljoen van sy gebruikers verskaf is.
